| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠡᠢᠮᠦ ᠨᠢᠭᠡᠨ ᠠᠬᠠ ᠳᠡᠭᠦᠦ ᠬᠣᠶᠠᠷ ᠪᠣᠯᠪᠠᠰᠤ ᠮᠢᠨᠦ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢᠨ ᠦᠶᠡᠶᠢᠨ ᠰᠠᠢᠬᠠᠨ ᠨᠥᠬᠦᠷ ᠠᠭᠰᠠᠨ ᠪᠦᠯᠦᠭᠡ᠃ ᠨᠡᠷᠡᠶᠢ ᠢᠨᠦ ᠡᠳᠦᠭᠡ ᠦᠯᠦ ᠳᠤᠷᠠᠳᠤᠮᠤᠢ᠃ ᠰᠠᠯᠤᠭᠠᠳ ᠤᠳᠠᠭᠰᠠᠨᠤ ᠤᠴᠢᠷᠠ᠂ ᠠᠭᠠᠵᠢᠮᠢᠶᠠᠷ ᠵᠠᠬᠢᠳᠠᠯ ᠴᠢᠮᠡᠭᠡ ᠦᠯᠦ ᠨᠡᠪᠲᠡᠷᠡᠯᠴᠡᠬᠦ ᠪᠣᠯᠪᠠᠢ᠃ ᠨᠢᠭᠡ ᠢᠨᠦ ᠬᠦᠨᠳᠦ ᠡᠪᠡᠳᠴᠢᠨᠡ ᠨᠡᠷᠪᠡᠭᠳᠡᠪᠡᠢ ᠬᠡᠮᠡᠨ ᠮᠥᠨᠥᠬᠡᠨ ᠭᠡᠨᠡᠳᠲᠡ ᠰᠣᠨᠤᠰᠤᠭᠠᠳ ᠨᠤᠲᠤᠭᠲᠤ ᠬᠠᠷᠢᠬᠤ ᠲᠠᠰᠢᠷᠠᠮᠢᠶᠠᠷ ᠲᠤᠰᠭᠠᠢᠯᠠᠨ ᠡᠷᠢᠵᠦ ᠣᠴᠢᠬᠤᠯᠠ᠂ ᠭᠠᠭᠴᠠᠬᠠᠨ ᠠᠬᠠᠯᠤᠭᠠ ᠠᠨᠤ ᠣᠯᠵᠤ ᠤᠴᠠᠷᠠᠭᠰᠠᠨ ᠪᠥᠭᠡᠳ ᠡᠪᠡᠳᠪᠡᠢ ᠬᠡᠮᠡᠭᠰᠡᠨ ᠢᠨᠦ ᠲᠡᠭᠦᠨᠦ ᠳᠡᠭᠦᠦ ᠠᠭᠰᠠᠨ ᠠᠵᠤᠭᠤ᠃ ᠲᠠ ᠮᠢᠨᠦ᠂ ᠠᠯᠤᠰᠤᠨ ᠵᠠᠮᠳᠤᠷ ᠵᠦᠳᠡᠷᠡᠭᠰᠡᠨ ᠪᠣᠯᠪᠠᠤᠤ᠂ ᠲᠡᠢᠨ ᠬᠡᠮᠡᠪᠡᠰᠦ ᠲᠡᠷᠡ᠂ ᠬᠡᠳᠦᠢᠨ ᠢᠯᠠᠷᠢ ᠪᠣᠯᠤᠭᠠᠳ᠂ ᠭᠠᠳᠠᠭᠰᠢ ᠠᠯᠪᠠ ᠡᠷᠢᠬᠦᠪᠡᠷ ᠶᠠᠪᠤᠪᠠᠢ ᠬᠡᠮᠡᠨ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠡᠳᠦᠷᠦᠨ ᠲᠡᠮᠳᠡᠭᠯᠡᠯ ᠬᠣᠶᠠᠷ ᠳᠡᠪᠲᠡᠷ ᠭᠠᠷᠭᠠᠭᠠᠳ᠂ ᠲᠡᠷᠡ ᠦᠶᠡᠶᠢᠨ ᠡᠪᠡᠳᠴᠢᠨᠦ ᠪᠠᠢᠳᠠᠯᠢ ᠡᠭᠦᠨᠡᠴᠡ ᠮᠡᠳᠡᠵᠦ ᠪᠣᠯᠬᠤ ᠪᠣᠯᠠᠢ᠃ ᠬᠠᠭᠤᠴᠢᠨ ᠨᠥᠬᠦᠳᠲᠦᠷ ᠠᠨᠤ ᠦᠵᠡᠭᠦᠯᠦᠭᠰᠡᠨᠴᠦ ᠦᠯᠦ ᠪᠣᠯᠬᠤ ᠶᠠᠭᠤᠨ ᠬᠡᠮᠡᠪᠡᠢ᠃ ᠠᠪᠴᠤ ᠢᠷᠡᠭᠡᠳ ᠨᠢᠭᠡᠨ ᠤᠳᠠᠭᠠ ᠤᠩᠰᠢᠵᠤ 《ᠬᠠᠪᠴᠢᠯᠭᠠᠶᠢᠨ ᠭᠠᠯᠵᠠᠭᠤ》 ᠮᠡᠲᠦᠰᠲᠦᠷ ᠨᠡᠷᠪᠡᠭᠳᠡᠭᠰᠡᠨᠢ ᠢᠨᠦ ᠮᠡᠳᠡᠪᠡᠢ᠃ ᠦᠭᠡ ᠢᠨᠦ ᠡᠨᠳᠡᠭᠦᠦ ᠲᠠᠰᠢᠶᠠ ᠶᠡᠬᠡᠲᠡᠢ᠂ ᠡᠬᠢ ᠠᠳᠠᠭᠦᠭᠡᠢ ᠴᠠᠯᠴᠢᠶᠠ ᠭᠣᠣᠯᠲᠠᠢ ᠪᠥᠭᠡᠳ ᠪᠠᠰᠠᠬᠦ ᠡᠳᠦᠷ ᠰᠠᠷᠠᠶᠢᠴᠤ ᠲᠡᠮᠳᠡᠭᠯᠡᠭᠰᠡᠨᠦᠭᠡᠢ ᠲᠤᠯᠠ ᠭᠠᠭᠴᠠᠬᠦ ᠪᠡᠬᠡᠨᠦ ᠥᠩᠭᠡ ᠪᠠ ᠪᠢᠴᠢᠯᠭᠡᠶᠢᠨ ᠨᠢᠭᠡᠳᠦᠯᠦᠭᠡᠢᠡᠴᠡ ᠦᠵᠡᠪᠡᠰᠦ᠂ ᠨᠢᠭᠡᠨ ᠴᠠᠭᠲᠤᠷ ᠪᠢᠴᠢᠵᠦ ᠭᠠᠷᠭᠠᠭᠰᠠᠨ ᠠᠨᠤ ᠪᠤᠰᠤ ᠪᠣᠯᠠᠢ ᠬᠡᠮᠡᠭᠴᠢᠶᠢ ᠮᠡᠳᠡᠪᠡᠢ᠃ ᠬᠠᠶᠠ ᠪᠠᠰᠠ ᠬᠠᠷᠢᠴᠠᠭᠠ ᠬᠣᠯᠪᠤᠭᠠ ᠪᠦᠬᠦᠢ ᠵᠦᠢᠯ ᠴᠣᠬᠤᠰ ᠮᠡᠳᠡᠭᠳᠡᠬᠦ ᠲᠤᠯᠠ ᠡᠳᠦᠭᠡ ᠨᠢᠭᠡᠨ ᠪᠦᠯᠦᠭᠢ ᠰᠣᠩᠭᠤᠨ ᠰᠡᠢᠷᠡᠭᠦᠯᠵᠦ ᠡᠮᠴᠢᠨᠡᠷᠦᠨ ᠰᠢᠨᠵᠢᠯᠡᠯᠭᠡᠨᠡ ᠵᠣᠷᠢᠭᠤᠯᠪᠠᠢ᠃ ᠲᠡᠮᠳᠡᠭᠯᠡᠯᠳᠡᠬᠢ ᠦᠰᠦᠭᠦᠨ ᠲᠠᠰᠢᠶᠠᠶᠢ ᠨᠢᠭᠡᠴᠦ ᠡᠰᠡ ᠵᠠᠰᠠᠪᠠᠢ᠃ ᠭᠠᠭᠴᠠᠬᠦ ᠬᠥᠮᠦᠰᠦᠨ ᠨᠡᠷᠡ ᠢᠨᠦ ᠣᠯᠠᠨᠠ ᠡᠰᠡ ᠠᠯᠳᠠᠷᠰᠢᠭᠰᠠᠨ ᠡᠭᠡᠯ ᠬᠥᠳᠡᠭᠡᠶᠢᠨ ᠬᠥᠮᠦᠰ ᠪᠥᠭᠡᠳ ᠲᠡᠮᠳᠡᠭᠯᠡᠯᠦᠨ ᠪᠦᠬᠦ ᠪᠠᠢᠳᠠᠯᠳᠤᠷ ᠲᠡᠳᠦᠢᠯᠡ ᠦᠯᠦ ᠬᠠᠷᠰᠢᠯᠠᠬᠤ ᠲᠤᠯᠠ ᠴᠥᠮᠢ ᠬᠠᠯᠠᠪᠠᠢ᠃ ᠪᠢᠴᠢᠭᠦᠨ ᠨᠡᠷᠡᠶᠢ ᠡᠪᠡᠳᠴᠢᠲᠡᠨ ᠢᠯᠠᠷᠢ ᠪᠣᠯᠤᠭᠠᠳ᠂ ᠥᠪᠡᠷᠢᠶᠡᠨ ᠥᠭᠭᠦᠭᠰᠡᠨ ᠲᠤᠯᠠ ᠳᠠᠬᠢᠵᠤ ᠡᠰᠡ ᠵᠠᠰᠠᠪᠠᠢ᠃ ᠳᠣᠯᠤᠭᠠᠨ ᠣᠨᠤ ᠳᠥᠷᠪᠡᠳᠦᠭᠡᠷ ᠰᠠᠷᠠᠶᠢᠨ ᠬᠣᠶᠠᠷᠤᠨ ᠡᠳᠦᠷ ᠪᠢᠴᠢᠪᠡᠢ᠃
ᠨᠢᠭᠡ
ᠰᠠᠷᠠᠲᠠᠢ ᠰᠠᠢᠬᠠᠨ ᠰᠠᠷᠠᠭᠤᠯ ᠦᠳᠡᠰᠢ ᠪᠠᠢᠯᠠ᠃
ᠪᠢ ᠲᠡᠭᠦᠨᠲᠡᠢ ᠠᠭᠤᠯᠵᠠᠭᠰᠠᠨᠦᠭᠡᠢ ᠭᠤᠴᠢ ᠭᠠᠷᠤᠢ ᠵᠢᠯ ᠪᠣᠯᠤᠭᠰᠠᠨ ᠲᠤᠯᠠ ᠥᠨᠥᠳᠦᠷ ᠣᠯᠵᠤ ᠠᠭᠤᠯᠵᠠᠭᠠᠳ ᠳᠣᠲᠤᠷᠠᠮᠢᠨᠢ ᠲᠤᠩ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠪᠠ᠃ ᠢᠩᠭᠢᠭᠡᠳ ᠡᠨᠡ ᠭᠤᠴᠢ ᠭᠠᠷᠤᠢ ᠵᠢᠯᠢ ᠪᠦᠷ ᠮᠤᠩᠭᠢᠨᠠᠵᠤ ᠣᠩᠭᠡᠷᠡᠭᠦᠯᠦᠭᠰᠡᠨᠢᠶᠡᠨ ᠰᠠᠶᠢ ᠣᠯᠵᠤ ᠮᠡᠳᠡᠯᠡ᠃ ᠶᠡᠬᠡᠬᠡᠨ ᠪᠣᠯᠭᠤᠮᠵᠢᠯᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠦᠭᠡᠢᠪᠡᠯ᠂ ᠥᠨᠥ ᠵᠣᠣ ᠣᠪᠤᠭᠲᠠᠨᠤ ᠨᠣᠬᠠᠢ ᠶᠠᠭᠤᠨᠳᠤ ᠨᠠᠮᠠᠢ ᠬᠡᠳᠦ ᠬᠠᠷᠠᠵᠤ ᠠᠪᠬᠤ ᠪᠢᠯᠡ?
ᠮᠢᠨᠦ ᠠᠶᠤᠬᠤᠨᠢ ᠵᠦᠢᠲᠡᠢ᠃
ᠬᠣᠶᠠᠷ
ᠡᠨᠡ ᠰᠥᠨᠢ ᠰᠠᠷᠠᠨᠤ ᠭᠡᠷᠡᠯ ᠣᠭᠲᠤᠦᠭᠡᠢ᠂ ᠬᠡᠷᠡᠭ ᠮᠠᠭᠤᠬᠠᠢ ᠪᠣᠯᠬᠤᠶᠢ ᠪᠢ ᠮᠡᠳᠡᠪᠡ᠃ ᠥᠷᠯᠦᠭᠡ ᠬᠡᠷᠰᠡᠦᠬᠡᠨ ᠭᠠᠳᠠᠭᠰᠢ ᠭᠠᠷᠪᠠᠯ᠂ ᠵᠣᠣ ᠡᠷᠬᠢᠮ᠂ ᠨᠠᠳᠠᠠᠴᠠ ᠠᠶᠤᠵᠤ ᠪᠠᠢᠭᠠ ᠶᠤᠮᠰᠢᠭ᠂ ᠨᠠᠮᠠᠢ ᠬᠣᠣᠷᠯᠠᠬᠤ ᠭᠡᠵᠦ ᠪᠠᠢᠭᠠᠴᠤ ᠶᠤᠮᠰᠢᠭ ᠨᠢᠳᠦᠨᠢ ᠵᠢᠭᠲᠡᠢᠬᠡᠨ ᠪᠠᠢᠯᠠ᠃ ᠲᠡᠭᠡᠭᠡᠳ ᠪᠠᠰᠠ ᠳᠣᠯᠤᠭᠠ ᠨᠠᠢ᠍ᠮᠠᠨ ᠬᠥᠮᠦᠨ᠂ ᠴᠢᠬᠢ ᠬᠣᠩᠰᠢᠶᠠᠷᠢᠶᠠᠨ ᠨᠡᠢᠯᠡᠭᠦᠯᠵᠦ ᠮᠢᠨᠦ ᠲᠤᠬᠠᠢ ᠰᠢᠪᠡᠨᠡᠯᠳᠦᠬᠦᠳᠡᠭᠡᠨ ᠪᠠᠰᠠ ᠨᠠᠳᠠᠠᠴᠠ ᠨᠢᠭᠤᠵᠤ ᠪᠠᠢᠯᠠ᠃ ᠵᠠᠮᠳᠤ ᠲᠠᠭᠠᠷᠢᠯᠳᠤᠭᠰᠠᠨ ᠬᠥᠮᠦᠰ ᠴᠥᠮ ᠡᠢᠮᠦ ᠪᠠᠢᠪᠠ᠃ ᠲᠡᠳᠡᠨᠦ ᠳᠣᠲᠤᠷᠠᠬᠢ ᠬᠠᠮᠤᠭᠤᠨ ᠬᠡᠷᠴᠡᠭᠡᠢ ᠨᠢᠭᠡᠨᠢ ᠨᠠᠮᠠᠢ ᠬᠠᠷᠠᠭᠠᠳ ᠠᠮᠠᠪᠠᠨ ᠠᠩᠭᠠᠢᠨ ᠢᠨᠢᠶᠡᠭᠰᠡᠨᠳᠦ ᠮᠢᠨᠦ ᠣᠷᠤᠢᠠᠴᠠ ᠤᠯᠠᠳᠤ ᠬᠦᠷᠲᠡᠯᠡ ᠬᠦᠢᠲᠡᠨ ᠣᠷᠭᠢᠪᠠ᠃ ᠲᠡᠳᠡ ᠬᠠᠮᠤᠭᠢᠶᠠᠨ ᠪᠡᠯᠡᠳᠭᠡᠵᠦ ᠭᠦᠢᠴᠡᠭᠰᠡᠨᠢ ᠮᠡᠳᠡᠯᠡ᠃
ᠭᠡᠲᠡᠯᠡ ᠪᠢ ᠶᠡᠷᠦ ᠠᠶᠤᠬᠤᠦᠭᠡᠢ᠂ ᠶᠠᠪᠤᠳᠠᠭᠢᠶᠠᠷᠢᠶᠠᠨ ᠶᠠᠪᠤᠭᠰᠠᠭᠠᠷᠯᠠ ᠪᠠᠢᠪᠠ᠃ ᠡᠮᠦᠨᠡ ᠨᠢᠭᠡ ᠪᠦᠯᠦᠭ ᠬᠡᠦᠬᠡᠳ ᠪᠠᠰᠠᠯᠠ ᠨᠠᠮᠠᠢ ᠶᠠᠷᠢᠯᠴᠠᠨᠠ᠃ ᠨᠢᠳᠦᠨᠦ ᠬᠢᠨᠢ ᠬᠠᠷᠠᠴᠠ ᠮᠥᠨ ᠵᠣᠣ ᠡᠷᠬᠢᠮᠲᠡᠢ ᠠᠳᠠᠯᠢ᠂ ᠴᠢᠷᠠᠢᠨᠢ ᠴᠢᠯ ᠬᠥᠬᠡᠷᠡᠭᠰᠡᠨ ᠪᠠᠢᠯᠠ᠃ ᠪᠢ ᠬᠡᠦᠬᠡᠳᠲᠡᠢ ᠶᠠᠮᠠᠷ ᠥᠰᠲᠡᠢ ᠪᠢᠯᠡ? ᠲᠡᠳᠡ ᠪᠠᠰᠠ ᠢᠩᠭᠢᠳᠡᠭᠨᠢ ᠶᠠᠭᠤ ᠪᠤᠢ ᠭᠡᠵᠦ ᠪᠢ ᠰᠠᠨᠠᠪᠠ᠃ ᠲᠡᠭᠡᠭᠡᠳ ᠲᠡᠰᠴᠦ ᠴᠢᠳᠠᠭᠰᠠᠨᠦᠭᠡᠢ ᠶᠡᠬᠡ ᠳᠠᠭᠤᠨᠢᠶᠠᠷ: 《ᠴᠢ ᠨᠠᠳᠠ ᠬᠡᠯᠡᠭᠡᠳ ᠠᠯᠢ!》 ᠭᠡᠵᠦ ᠬᠠᠰᠭᠢᠷᠪᠠ᠃ ᠭᠡᠲᠡᠯᠡ ᠲᠡᠳᠡ ᠳᠤᠲᠠᠭᠠᠵᠤ ᠠᠷᠢᠯᠪᠠ᠃
ᠪᠣᠳᠤᠬᠤᠳᠤ ᠪᠢ ᠵᠣᠣ ᠡᠷᠬᠢᠮᠲᠡᠢ ᠶᠠᠮᠠᠷ ᠥᠰᠲᠡᠢ ᠪᠢᠯᠡ᠃ ᠵᠠᠮᠤᠨ ᠬᠥᠮᠦᠰᠲᠡᠢ ᠪᠠᠰᠠ ᠶᠠᠮᠠᠷ ᠥᠰᠲᠡᠢ ᠪᠢᠯᠡ᠃ ᠬᠣᠷᠢᠨ ᠵᠢᠯᠦᠨ ᠡᠮᠦᠨᠡ᠂ ᠭᠦ᠋ ᠵᠢᠦ ᠠᠪᠤᠭᠠᠢᠶᠢᠨ ᠤᠳᠠᠭᠠᠨ ᠵᠢᠯᠦᠨ ᠬᠢᠨᠢ ᠳᠠᠩᠰᠠᠶᠢ ᠨᠢᠭᠡ ᠭᠢᠰᠭᠢᠭᠡᠳ᠂ ᠲᠡᠭᠦᠨᠢ ᠶᠡᠬᠡᠯᠡ ᠳᠤᠷᠠ ᠦᠭᠡᠢᠴᠡᠭᠦᠯᠦᠭᠰᠡᠨ ᠲᠡᠳᠦᠢᠶᠦᠮ᠃ ᠵᠣᠣ ᠡᠷᠬᠢᠮ ᠬᠡᠳᠦᠢᠪᠡᠷ ᠲᠡᠭᠦᠨᠢ ᠲᠠᠨᠢᠬᠤᠦᠭᠡᠢ ᠪᠣᠯᠪᠠᠴᠤ᠂ ᠴᠢᠮᠡᠭᠡᠶᠢ ᠰᠣᠨᠤᠰᠤᠭᠠᠳ ᠲᠡᠭᠦᠨᠦ ᠡᠮᠦᠨᠡᠡᠴᠡ ᠠᠭᠤᠷᠯᠠᠵᠤ᠂ ᠵᠠᠮᠤᠨ ᠬᠥᠮᠦᠰᠲᠡᠢ ᠦᠭᠡ ᠨᠢᠰᠦᠭᠡᠳ ᠨᠠᠳᠠᠲᠠᠢ ᠥᠰ ᠬᠥᠭᠡᠭᠡᠵᠦ ᠪᠠᠢᠬᠤᠨᠢ ᠡᠨᠡ ᠪᠠᠢᠯᠭᠦᠢ᠃ ᠭᠡᠲᠡᠯᠡ ᠬᠡᠦᠬᠡᠳ ᠶᠠᠭᠠᠬᠢᠵᠤ ᠪᠠᠢᠭᠠᠨᠢ ᠡᠨᠡ ᠪᠤᠢ? ᠲᠡᠷᠡ ᠦᠶᠡᠳᠦ ᠲᠥᠷᠦᠭᠡᠴᠦᠦᠭᠡᠢ ᠪᠠᠢᠭᠰᠠᠨᠶᠤᠮᠴᠢᠨᠢ ᠶᠠᠭᠤᠨᠳᠤ ᠥᠨᠥᠳᠦᠷ ᠪᠠᠰᠠ ᠨᠠᠳᠠᠠᠴᠠ ᠠᠶᠤᠵᠤ ᠪᠠᠢᠭᠠ ᠶᠤᠮᠰᠢᠭ᠂ ᠨᠠᠮᠠᠢ ᠬᠣᠣᠷᠯᠠᠬᠤ ᠭᠡᠵᠦ ᠪᠠᠢᠭᠠᠴᠤ ᠶᠤᠮᠰᠢᠭ ᠮᠠᠭᠤᠬᠠᠢ ᠬᠠᠷᠠᠨᠠ ᠪᠤᠢ? ᠡᠨᠡᠴᠢᠨᠢ ᠨᠠᠳᠠ ᠠᠶᠤᠮᠠᠷ ᠪᠥᠭᠡᠳ ᠭᠠᠢᠬᠠᠰᠢ ᠠᠯᠳᠠᠮᠠ᠂ ᠵᠣᠪᠠᠯᠠᠩᠲᠠᠢ ᠬᠡᠷᠡᠭ ᠪᠠᠢᠨᠠ ᠰᠢᠤ!
ᠪᠢ ᠮᠡᠳᠡᠯᠡ᠃ ᠡᠬᠡ ᠡᠴᠢᠭᠡᠨᠢ ᠢᠩᠭᠢᠵᠦ ᠵᠢᠭᠠᠵᠤ ᠥᠭᠴᠡᠢ!
ᠭᠤᠷᠪᠠ
ᠰᠥᠨᠢ ᠶᠡᠷᠦ ᠨᠣᠢᠷ ᠬᠦᠷᠬᠦᠦᠭᠡᠢ᠃ ᠠᠯᠢᠪᠠ ᠬᠡᠷᠡᠭᠨᠢ ᠨᠢᠭᠲᠠᠯᠠᠵᠤ ᠪᠠᠢᠪᠠᠯ ᠰᠠᠶᠢ ᠤᠴᠢᠷᠢᠨᠢ ᠣᠯᠳᠠᠭ ᠪᠠᠢᠨᠠ᠃
ᠲᠡᠳᠡᠨᠦ ᠳᠣᠲᠤᠷᠠ ᠰᠢᠶᠠᠨᠤ ᠨᠣᠶᠠᠨᠢᠶᠠᠷ ᠳᠥᠩᠭᠡᠯᠡᠭᠦᠯᠦᠭᠰᠡᠨ ᠬᠥᠮᠦᠨᠴᠦ ᠪᠤᠢ᠂ ᠡᠷᠬᠡᠲᠡᠨᠳᠦ ᠲᠦᠭᠦᠰᠢᠯᠡᠭᠦᠯᠦᠭᠰᠡᠨ ᠬᠥᠮᠦᠨᠴᠦ ᠪᠤᠢ᠂ ᠶᠠᠮᠤᠨᠤ ᠲᠤᠰᠢᠶᠠᠯᠲᠠᠨᠳᠤ ᠡᠬᠡᠨᠡᠷᠢᠶᠡᠨ ᠪᠤᠯᠢᠶᠠᠭᠳᠠᠭᠰᠠᠨ ᠬᠥᠮᠦᠨᠴᠦ ᠪᠤᠢ᠂ ᠠᠪᠤ ᠡᠵᠢᠨᠢ ᠠᠪᠤᠯᠭᠠᠶᠢᠨ ᠡᠵᠡᠳᠲᠦ ᠬᠠᠪᠴᠢᠭᠳᠠᠨ ᠦᠬᠦᠭᠰᠡᠳᠴᠦ ᠪᠤᠢ᠃ ᠲᠡᠷᠡ ᠦᠶᠡᠳᠦ ᠲᠡᠳᠡᠨᠦ ᠵᠢᠰᠦ ᠴᠢᠷᠠᠢ ᠶᠡᠷᠦ ᠥᠴᠦᠭᠡᠳᠦᠷᠦᠨᠰᠢᠭ ᠲᠡᠢᠮᠦ ᠠᠶᠤᠮᠠᠷ᠂ ᠲᠡᠢᠮᠦ ᠬᠡᠷᠴᠡᠭᠡᠢ ᠪᠠᠢᠭᠰᠠᠨᠦᠭᠡᠢᠰᠠᠨ᠃
ᠬᠠᠮᠤᠭᠤᠨ ᠵᠢᠭᠲᠡᠢᠨᠢ ᠥᠴᠦᠭᠡᠳᠦᠷ ᠭᠤᠳᠤᠮᠵᠢᠨᠳᠤ ᠲᠠᠭᠠᠷᠢᠯᠳᠤᠭᠰᠠᠨ ᠲᠡᠷᠡ ᠡᠮᠡᠭᠲᠡᠢ ᠪᠠᠢᠯᠠ᠃ ᠲᠡᠷᠡ ᠬᠦᠦᠪᠡᠨ ᠵᠣᠳᠤᠵᠤ: 《ᠡᠴᠢᠭᠡᠮᠢᠨᠢ ᠡ! ᠪᠢ ᠴᠢᠮᠠᠢ ᠭᠠᠢᠭᠤᠢ ᠬᠡᠳᠦ ᠬᠠᠵᠠᠶᠠ ᠬᠡᠮᠡᠨ ᠰᠠᠨᠠᠵᠤ ᠪᠠᠢᠨᠠ!》 ᠭᠡᠵᠦ ᠬᠡᠯᠡᠨᠡ᠃ ᠭᠡᠲᠡᠯᠡ ᠨᠢᠳᠦᠨᠢ ᠬᠠᠷᠢᠨ ᠨᠠᠮᠠᠢ ᠰᠢᠷᠲᠡᠭᠡᠳ ᠪᠠᠢᠪᠠ᠃ ᠪᠢ ᠨᠢᠭᠡᠮᠦᠰᠦᠨ ᠠᠶᠤᠭᠠᠳ ᠣᠷᠤᠬᠤ ᠭᠠᠵᠠᠷᠢᠶᠠᠨ ᠣᠯᠤᠭᠰᠠᠨᠦᠭᠡᠢ᠃ ᠥᠨᠥ ᠬᠦᠢᠲᠡᠨ ᠬᠥᠬᠡ ᠴᠢᠷᠠᠢᠲᠠᠨᠨᠤᠭᠤᠳ ᠴᠥᠮ ᠳᠦᠷᠬᠢᠷᠡᠲᠡᠯᠡ ᠢᠨᠢᠶᠡᠯᠳᠦᠪᠡ᠃ ᠴᠧᠨ ᠯᠣᠣ ᠦ᠋ ᠤᠬᠤᠰᠬᠢᠨ ᠭᠠᠷᠴᠤ ᠢᠷᠡᠭᠡᠳ ᠨᠠᠮᠠᠢ ᠭᠡᠷᠲᠦ ᠴᠢᠷᠴᠦ ᠣᠷᠤᠪᠠ᠃
ᠪᠢ ᠭᠡᠷᠲᠡᠭᠡᠨ ᠴᠢᠷᠦᠭᠳᠡᠨ ᠣᠷᠤᠬᠤᠯᠠ ᠭᠡᠷᠦᠨ ᠬᠥᠮᠦᠰ ᠴᠥᠮ ᠨᠠᠮᠠᠢ ᠲᠠᠨᠢᠬᠤᠦᠭᠡᠢ ᠶᠤᠮᠰᠢᠭ ᠠᠭᠠᠰᠢᠯᠠᠨᠠ᠃ ᠲᠡᠳᠡᠨᠦ ᠬᠠᠷᠠᠴᠠᠨᠢ ᠮᠥᠨ ᠥᠭᠡᠷᠡ ᠪᠢᠰᠢᠨᠲᠡᠢᠪᠡᠨ ᠪᠦᠷ ᠠᠳᠠᠯᠢᠬᠠᠨ ᠪᠠᠢᠪᠠ᠃ ᠪᠢᠴᠢᠭᠦᠨ ᠭᠡᠷᠲᠦ ᠣᠷᠤᠵᠤ ᠣᠴᠢᠲᠠᠯᠠ ᠲᠠᠬᠢᠶᠠ ᠨᠤᠭᠤᠰᠤ ᠬᠣᠷᠢᠭᠰᠠᠨ ᠶᠤᠮᠰᠢᠭ ᠡᠭᠦᠳᠡᠶᠢ ᠠᠷᠤᠠᠴᠠ ᠲᠦᠭᠵᠢᠵᠦ ᠣᠷᠬᠢᠪᠠ᠃ ᠡᠨᠡ ᠶᠠᠪᠤᠳᠠᠯ ᠨᠠᠮᠠᠢ ᠤᠯᠠᠮᠴᠤ ᠤᠴᠢᠷ ᠤᠬᠠᠭᠠᠨᠢᠨᠢ ᠣᠯᠬᠤᠦᠭᠡᠢ ᠪᠣᠯᠭᠠᠵᠤ ᠬᠠᠶᠠᠵᠠᠢ᠃
ᠤᠷᠢᠳ ᠬᠡᠳᠦᠨ ᠡᠳᠦᠷ᠂ ᠯᠠᠩ ᠽᠢ ᠼᠦᠨ ᠲᠣᠰᠭᠤᠨᠤ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠭᠠᠮᠰᠢᠭᠲᠤ ᠳᠠᠭᠠᠷᠢᠭᠳᠠᠭᠰᠠᠨᠢᠶᠠᠨ ᠮᠡᠳᠡᠭᠳᠡᠬᠦᠪᠡᠷ ᠢᠷᠡᠭᠡᠳ᠂ ᠮᠢᠨᠦ ᠶᠡᠬᠡ ᠠᠬᠠᠳᠤ ᠲᠣᠰᠭᠤᠨᠤᠪᠠᠨ ᠨᠢᠭᠡᠨ ᠬᠠᠴᠢᠨ ᠮᠠᠭᠤ ᠬᠥᠮᠦᠨᠢ ᠠᠢᠯ ᠣᠯᠠᠨᠢᠶᠠᠷᠢᠶᠠᠨ ᠴᠣᠬᠢᠵᠤ ᠠᠯᠠᠭᠰᠠᠨ ᠪᠥᠭᠡᠳ ᠬᠡᠳᠦᠨ ᠬᠥᠮᠦᠨ ᠵᠢᠷᠦᠬᠡᠶᠢᠨᠢ ᠰᠤᠭᠤᠯᠵᠤ ᠠᠪᠤᠭᠠᠳ᠂ ᠰᠥᠰᠦ ᠵᠣᠷᠢᠭᠢᠶᠠᠨ ᠪᠦᠳᠦᠭᠦᠷᠡᠭᠦᠯᠬᠦᠶᠦᠮ ᠭᠡᠵᠦ ᠲᠣᠰᠤᠪᠠᠷ ᠬᠠᠭᠠᠷᠢᠵᠤ ᠢᠳᠡᠪᠡ ᠭᠡᠵᠦ ᠶᠠᠷᠢᠯᠠ᠃ ᠪᠢ ᠳᠤᠮᠳᠠᠠᠴᠠᠨᠢ ᠨᠢᠭᠡ ᠳᠤᠤᠭᠠᠷᠤᠭᠰᠠᠨᠳᠤ ᠥᠨᠥ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠶᠡᠬᠡ ᠠᠬᠠ ᠬᠣᠶᠠᠷ ᠨᠠᠮᠠᠢ ᠬᠡᠳᠦᠨᠲᠡ ᠭᠢᠯᠤᠢᠵᠤ ᠬᠠᠷᠠᠭᠰᠠᠨ ᠪᠢᠯᠡ᠃ ᠲᠡᠳᠡᠨᠦ ᠬᠠᠷᠠᠴᠠ᠂ ᠭᠠᠳᠠᠨᠠᠬᠢᠶᠢᠨ ᠲᠡᠷᠡ ᠣᠯᠠᠨ ᠬᠥᠮᠦᠰᠲᠡᠢ ᠶᠠᠭ ᠠᠳᠠᠯᠢᠬᠠᠨ ᠪᠠᠢᠭᠰᠠᠨᠢ ᠥᠨᠥᠳᠦᠷ ᠰᠠᠶᠢ ᠣᠯᠵᠤ ᠮᠡᠳᠡᠯᠡ᠃
ᠡᠭᠦᠨᠢ ᠪᠣᠳᠤᠪᠠᠯ ᠮᠢᠨᠦ ᠣᠷᠤᠢᠠᠴᠠ ᠤᠯᠠᠳᠤ ᠬᠦᠷᠲᠡᠯᠡ ᠬᠦᠢᠲᠡᠨ ᠣᠷᠬᠢᠬᠤᠶᠤᠮ᠃
ᠲᠡᠳᠡ ᠬᠥᠮᠦᠨ ᠢᠳᠡᠳᠡᠭᠯᠡᠶᠦᠮ ᠪᠣᠯ ᠨᠠᠮᠠᠢ ᠢᠳᠡᠬᠦᠦᠭᠡᠢ ᠭᠡᠵᠦᠦᠭᠡᠢᠶᠦᠮ᠃
ᠲᠡᠷᠡ ᠡᠮᠡᠭᠲᠡᠢᠶᠢᠨ 《ᠴᠢᠮᠠᠢ ᠭᠠᠢᠭᠤᠢ ᠬᠡᠳᠦ ᠬᠠᠵᠠᠨᠠ》 ᠭᠡᠰᠡᠨ ᠦᠭᠡ᠂ ᠲᠡᠷᠡ ᠣᠯᠠᠨ ᠬᠥᠬᠡ ᠴᠢᠷᠠᠢᠲᠠᠨᠤ ᠢᠨᠢᠶᠡᠳᠦ ᠪᠣᠯᠤᠨ ᠤᠷᠢᠳ ᠡᠳᠦᠷᠦᠨ ᠥᠨᠥ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨᠤ ᠬᠡᠯᠡᠭᠰᠡᠨ ᠦᠭᠡ ᠪᠦᠷ ᠨᠢᠭᠡ ᠶᠣᠰᠤᠨᠤ ᠨᠢᠭᠤᠴᠠ ᠳᠣᠬᠢᠶᠠ ᠮᠥᠨ ᠪᠣᠯᠬᠤᠨᠢ ᠢᠯᠡᠷᠬᠡᠢ᠃ ᠲᠡᠳᠡᠨᠦ ᠦᠭᠡᠨᠢ ᠬᠣᠣᠷᠢᠶᠠᠷ ᠳᠦᠭᠦᠷᠴᠦ᠂ ᠢᠨᠢᠶᠡᠳᠦᠨᠢ ᠢᠷ ᠮᠡᠰᠡᠪᠡᠷ ᠭᠢᠯᠠᠯᠵᠠᠨ ᠬᠤᠷᠴᠠ ᠰᠢᠳᠦᠨᠢ ᠢᠷᠵᠠᠭᠠᠨᠠᠭᠠᠳ᠂ ᠶᠣᠰᠤᠲᠠᠢ ᠬᠥᠮᠦᠨ ᠢᠳᠡᠳᠡᠭ ᠮᠢᠬᠠᠴᠢᠨ ᠮᠥᠨ ᠭᠡᠵᠦ ᠪᠢ ᠮᠡᠳᠡᠯᠡ᠃
ᠪᠢ ᠪᠡᠶᠡᠪᠡᠨ ᠮᠠᠭᠤ ᠬᠥᠮᠦᠨ ᠭᠡᠵᠦ ᠰᠠᠨᠠᠬᠤᠦᠭᠡᠢ ᠪᠣᠯᠪᠠᠴᠤ ᠭᠦ᠋ ᠣᠪᠤᠭᠲᠠᠨᠤ ᠳᠠᠩᠰᠠᠶᠢ ᠭᠢᠰᠭᠢᠭᠰᠡᠨᠡᠴᠡ ᠬᠣᠢᠰᠢ ᠬᠠᠷᠢᠨ ᠬᠡᠯᠡᠵᠦ ᠮᠡᠳᠡᠬᠦᠦᠭᠡᠢ ᠪᠣᠯᠵᠠᠢ᠃ ᠲᠡᠳᠡ ᠶᠠᠭ ᠮᠠᠭᠤ ᠰᠠᠨᠠᠭᠠ ᠠᠪᠴᠤ ᠪᠠᠢᠭᠠᠴᠤ ᠶᠤᠮᠰᠢᠭ᠂ ᠪᠤᠤ ᠮᠡᠳᠡ᠃ ᠢᠯᠠᠩᠭᠤᠶᠠ ᠲᠡᠳᠡ ᠴᠢᠷᠠᠢ ᠬᠤᠪᠢᠯᠤᠮᠠᠭᠴᠠ ᠬᠥᠮᠦᠨᠢ ᠮᠠᠭᠤ ᠬᠥᠮᠦᠨ ᠪᠣᠯᠭᠠᠴᠢᠬᠠᠳᠠᠭᠶᠤᠮ᠃ ᠶᠡᠬᠡ ᠠᠬᠠ ᠤᠷᠢᠳᠤ ᠨᠠᠳᠠᠪᠠᠷ ᠨᠢᠭᠡ ᠵᠣᠬᠢᠶᠠᠯ ᠪᠢᠴᠢᠭᠦᠯᠦᠭᠰᠡᠨᠢ ᠪᠢ ᠡᠳᠦᠭᠡ ᠬᠦᠷᠲᠡᠯᠡ ᠮᠠᠷᠲᠠᠭᠠᠳᠤᠢ ᠪᠥᠭᠡᠳ ᠬᠢᠷᠢ ᠵᠡᠷᠭᠡᠶᠢᠨ ᠰᠠᠢᠨ ᠬᠥᠮᠦᠨᠢᠴᠦ ᠬᠡᠳᠦᠨ ᠦᠭᠡ ᠮᠠᠭᠤᠴᠢᠯᠠᠮᠠᠭᠴᠠ ᠲᠡᠷᠡ ᠳᠠᠷᠤᠢ ᠵᠥᠪᠳᠡᠭᠡᠵᠦ ᠬᠡᠳᠦᠨ ᠪᠢᠨᠲᠦ ᠵᠢᠷᠤᠭᠠᠳ᠂ ᠮᠠᠭᠤ ᠬᠥᠮᠦᠨᠢ ᠠᠭᠤᠴᠢᠯᠠᠵᠤ ᠬᠡᠳᠦᠨ ᠦᠭᠡ ᠪᠢᠴᠢᠪᠡᠯ 《 ᠣᠷᠴᠢᠯᠠᠩ ᠳᠡᠯᠡᠬᠡᠢᠶᠢ ᠬᠥᠷᠪᠡᠭᠦᠯᠦᠭᠴᠢ ᠣᠯᠠᠨᠠᠴᠠ ᠣᠨᠴᠤᠭᠤᠢ ᠮᠡᠷᠭᠡᠨ》 ᠭᠡᠳᠡᠭ᠃ ᠡᠢᠮᠦᠡᠴᠡ ᠲᠡᠳᠡ ᠴᠣᠬᠤᠮ ᠶᠠᠭᠤ ᠪᠣᠳᠤᠵᠤ ᠪᠠᠢᠭᠠᠶᠢ ᠪᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠤᠢ? ᠢᠯᠠᠩᠭᠤᠶᠠ ᠬᠥᠮᠦᠨ ᠢᠳᠡᠬᠦ ᠭᠡᠵᠦ ᠪᠠᠢᠭᠠ ᠦᠶᠡᠳᠦ᠃
ᠠᠯᠢᠪᠠ ᠬᠡᠷᠡᠭᠢ ᠨᠢᠭᠲᠠᠯᠠᠵᠤ ᠪᠣᠳᠤᠪᠠᠯ ᠰᠠᠶᠢ ᠤᠴᠢᠷᠢᠨᠢ ᠣᠯᠳᠠᠭ᠃ ᠡᠷᠲᠡᠨᠡᠴᠡ ᠠᠪᠤᠭᠠᠳ ᠬᠥᠮᠦᠨ ᠢᠳᠡᠭᠰᠡᠭᠡᠷ ᠢᠷᠡᠭᠰᠡᠨᠢ ᠪᠢ ᠪᠠᠰᠠ ᠮᠡᠳᠡᠬᠦ ᠪᠣᠯᠪᠠᠴᠤ ᠲᠡᠢᠮᠦ ᠲᠣᠳᠤᠷᠬᠠᠢ ᠪᠢᠰᠢ ᠪᠠᠢᠨᠠ᠃ ᠪᠢ ᠲᠡᠦᠬᠡᠶᠢ ᠰᠡᠬᠦᠵᠦ ᠡᠷᠢᠬᠦᠯᠡ᠂ ᠡᠨᠡ ᠲᠡᠦᠬᠡᠨᠢ ᠣᠨ ᠵᠢᠯᠢ ᠲᠡᠮᠳᠡᠭᠯᠡᠭᠰᠡᠨᠦᠭᠡᠢ ᠪᠥᠭᠡᠳ ᠬᠠᠭᠤᠳᠠᠰᠤ ᠪᠦᠷᠢᠳᠦᠨᠢ ᠴᠥᠮ 《ᠥᠷᠦᠰᠢᠶᠡᠯ᠂ ᠵᠢᠷᠤᠮ᠂ ᠶᠣᠰᠤ᠂ ᠡᠷᠳᠡᠮ》 ᠭᠡᠰᠡᠨ ᠬᠡᠳᠦᠨ ᠦᠰᠦᠭᠢ ᠮᠤᠷᠤᠢ ᠰᠠᠷᠤᠢ ᠡᠷᠢᠶᠡᠴᠢᠭᠰᠡᠨ ᠪᠠᠢᠨᠠ᠃ ᠮᠢᠨᠦ ᠨᠣᠢᠷ ᠬᠤᠯᠵᠢᠭᠰᠠᠨ ᠤᠴᠢᠷ᠂ ᠲᠡᠭᠦᠨᠢ ᠬᠠᠭᠠᠰ ᠰᠥᠨᠢ ᠨᠢᠭᠲᠠᠯᠠᠵᠤ ᠦᠵᠡᠭᠡᠳ ᠰᠠᠶᠢ ᠦᠭᠡ ᠦᠰᠦᠭᠦᠳᠦᠨ ᠵᠠᠢ ᠵᠠᠪᠰᠠᠷᠢᠶᠠᠷ 《ᠬᠥᠮᠦᠨ ᠢᠳᠡᠨᠡ!》 ᠭᠡᠰᠡᠨ ᠬᠣᠶᠠᠷ ᠦᠭᠡ ᠳᠡᠪᠲᠡᠷ ᠳᠦᠭᠦᠷᠡᠩ ᠪᠢᠴᠢᠭᠡᠰᠦᠲᠡᠢ ᠪᠠᠢᠭᠰᠠᠨᠢ ᠣᠯᠵᠤ ᠦᠵᠡᠯᠡ! ᠪᠢᠴᠢᠭ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠥᠴᠢᠨᠡᠨ ᠣᠯᠠᠨ ᠦᠰᠦᠭ᠂ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨᠤ ᠬᠡᠯᠡᠭᠰᠡᠨ ᠳᠥᠴᠢᠨᠡᠨ ᠣᠯᠠᠨ ᠦᠭᠡᠨᠢ ᠬᠠᠷᠢᠨ ᠴᠥᠮ ᠢᠨᠢᠶᠡᠮᠰᠦᠭᠯᠡᠩᠭᠦᠢ ᠵᠢᠭᠲᠡᠢ ᠨᠢᠳᠦᠪᠡᠷ ᠨᠠᠮᠠᠢ ᠬᠠᠷᠠᠵᠤ ᠪᠠᠢᠯᠠ᠃
ᠪᠢᠴᠦ ᠮᠥᠨ ᠬᠥᠮᠦᠨ ᠪᠣᠯᠬᠣᠷ ᠲᠡᠳᠡ ᠨᠠᠮᠠᠢ ᠢᠳᠡᠬᠦ ᠭᠡᠵᠦ ᠪᠠᠢᠨᠠ!
ᠳᠥᠷᠪᠡ
ᠥᠷᠯᠦᠭᠡᠭᠦᠷ ᠪᠢ ᠲᠦᠷ ᠨᠠᠮ ᠰᠠᠭᠤᠯᠠ᠃ ᠴᠧᠨ ᠯᠣᠣ ᠦ᠋ ᠨᠢᠭᠡ ᠠᠶᠠᠭᠠ ᠨᠣᠭᠤᠭᠠ᠂ ᠨᠢᠭᠡ ᠠᠶᠠᠭᠠ ᠵᠢᠩᠨᠡᠭᠰᠡᠨ ᠵᠢᠭᠠᠰᠤᠲᠠᠢ ᠬᠣᠭᠤᠯᠠ ᠠᠪᠴᠢᠷᠠᠵᠤ ᠥᠭᠪᠡ᠃ ᠲᠡᠷᠡ ᠵᠢᠭᠠᠰᠤᠨᠤ ᠬᠠᠪ ᠬᠠᠲᠠᠭᠤ ᠴᠠᠪ ᠴᠠᠭᠠᠨ ᠨᠢᠳᠦ ᠪᠠ ᠠᠩᠭᠠᠢᠭᠰᠠᠨ ᠠᠮᠠᠨᠢ ᠬᠥᠮᠦᠨ ᠢᠳᠡᠬᠦᠶᠢ ᠵᠠᠪᠳᠤᠭᠰᠠᠨ ᠲᠡᠷᠡ ᠣᠯᠠᠨ ᠬᠥᠮᠦᠨᠲᠡᠢ ᠪᠦᠷ ᠠᠳᠠᠯᠢᠬᠠᠨ ᠪᠠᠢᠪᠠ᠃ ᠬᠡᠳᠦᠬᠡᠨ ᠰᠠᠪᠬᠠᠯᠠᠲᠠᠯᠠ ᠵᠢᠭᠠᠰᠤᠴᠤᠶᠤᠮᠤᠤ᠂ ᠬᠥᠮᠦᠨᠴᠦᠶᠦᠮᠦᠦ ᠪᠤᠤ ᠮᠡᠳᠡ᠂ ᠨᠢᠭᠡᠯᠡ ᠮᠠᠭᠤᠬᠠᠢ ᠨᠢᠯᠤᠭᠤᠨ ᠣᠷᠬᠢᠭᠰᠠᠨᠳᠤ ᠶᠠᠭᠤᠲᠠᠢ ᠬᠡᠦᠳᠡᠢᠨᠢ ᠪᠥᠭᠡᠯᠵᠢᠵᠦ ᠭᠠᠷᠭᠠᠪᠠ᠃
《ᠯᠣᠣ ᠦ᠋᠂ ᠪᠢ ᠠᠢᠬᠤᠪᠲᠤᠷ ᠤᠢᠳᠤᠭᠠᠳ ᠪᠠᠢᠨᠠ᠂ ᠬᠠᠰᠢᠶᠠᠨᠳᠤ ᠭᠠᠷᠴᠤ ᠠᠯᠬᠤᠬᠤᠰᠠᠨ ᠭᠡᠵᠦ ᠠᠬᠠᠳᠤ ᠬᠡᠯᠡᠭᠡᠳ ᠠᠯᠢ》 ᠭᠡᠵᠦ ᠪᠢ ᠬᠡᠯᠡᠯᠡ᠃ ᠴᠧᠨ ᠯᠣᠣ ᠦ᠋ ᠳᠤᠭᠤᠢ ᠭᠠᠷᠴᠤ ᠣᠳᠪᠠ᠃ ᠪᠠᠬᠠᠨ ᠤᠳᠠᠰᠬᠢᠭᠡᠳ ᠬᠠᠷᠢᠨ ᠢᠷᠡᠵᠦ ᠡᠭᠦᠳᠡᠶᠢ ᠨᠡᠭᠡᠭᠡᠪᠡ᠃
ᠲᠡᠳᠡ ᠨᠠᠮᠠᠢ ᠴᠣᠬᠤᠮ ᠶᠠᠭᠠᠬᠢᠳᠠᠭᠢᠨᠢ ᠦᠵᠡᠶᠡ ᠭᠡᠵᠦ ᠬᠥᠳᠡᠯᠦᠯᠦᠭᠡᠢ ᠠᠵᠢᠭᠯᠠᠵᠤ ᠰᠠᠭᠤᠨᠠ᠃ ᠯᠠᠪ ᠠᠮᠤᠷ ᠲᠠᠯᠪᠢᠬᠤᠦᠭᠡᠢ ᠭᠡᠭᠴᠢᠶᠢ ᠪᠢ ᠮᠡᠳᠡᠵᠦ ᠪᠠᠢᠯᠠ᠃ ᠦᠨᠡᠬᠡᠷᠴᠦ ᠲᠡᠢᠮᠦ ᠪᠠᠢᠵᠠᠢ! ᠮᠠᠨᠤ ᠠᠬᠠ ᠨᠢᠭᠡᠨ ᠡᠪᠦᠭᠡᠨᠢ ᠳᠠᠭᠠᠭᠤᠯᠵᠤ ᠶᠠᠭᠠᠷᠠᠯᠦᠭᠡᠢ ᠣᠷᠤᠵᠤ ᠢᠷᠡᠯᠡ᠃ ᠡᠪᠦᠭᠡᠨ ᠠᠢᠬᠤᠪᠲᠤᠷ ᠬᠦᠢᠲᠡᠨ ᠬᠠᠷᠠᠴᠠᠲᠠᠢ ᠪᠠᠢᠭᠰᠠᠨᠢᠶᠠᠨ ᠨᠠᠳᠠ ᠰᠡᠷᠡᠭᠳᠡᠭᠦᠯᠵᠡᠢ ᠭᠡᠵᠦ ᠲᠣᠯᠤᠭᠠᠢᠪᠠᠨ ᠪᠥᠬᠦᠢᠵᠦ ᠪᠦᠷ ᠭᠠᠵᠠᠷ ᠤᠷᠤᠭᠤ ᠬᠠᠨᠳᠤᠭᠤᠯᠤᠭᠠᠳ ᠨᠢᠳᠦᠨ ᠰᠢᠯᠦᠨᠢᠶᠡᠨ ᠬᠠᠵᠠᠭᠤᠪᠠᠷ ᠨᠠᠮᠠᠢ ᠰᠡᠮᠬᠡᠨ ᠰᠢᠷᠲᠡᠨᠡ᠃ ᠠᠬᠠ: 《ᠴᠢ ᠥᠨᠥᠳᠦᠷ ᠵᠦᠭᠡᠷ ᠪᠠᠢᠬᠤᠰᠢᠭ᠋ ᠪᠠᠢᠨᠠ》 ᠭᠡᠬᠦᠳᠦ ᠪᠢ 《 ᠲᠡᠢᠮᠦ》 ᠭᠡᠪᠡ᠃ ᠠᠬᠠ: 《ᠥᠨᠥᠳᠦᠷ ᠾᠧ ᠡᠮᠴᠢᠶᠢ ᠵᠠᠯᠠᠵᠤ ᠪᠡᠶᠡᠶᠢᠴᠢᠨᠢ ᠦᠵᠡᠭᠦᠯᠬᠦ ᠭᠡᠰᠡᠨᠶᠦᠮ》 ᠭᠡᠬᠦᠳᠦᠨᠢ ᠪᠢ: 《ᠵᠠ!》 ᠭᠡᠪᠡ᠃ ᠦᠨᠡᠨᠳᠡᠭᠡᠨ ᠡᠨᠡ ᠡᠪᠦᠭᠡᠨ ᠪᠣᠯ ᠵᠢᠰᠦᠪᠡᠨ ᠪᠤᠷᠤᠭᠤᠯᠠᠭᠰᠠᠨ ᠶᠠᠷᠭᠠᠴᠢᠨ ᠮᠥᠨ ᠭᠡᠭᠴᠢᠶᠢ ᠪᠢ ᠶᠠᠮᠠᠷ ᠮᠡᠳᠡᠬᠦᠦᠭᠡᠢᠶᠦᠮ ᠪᠢᠰᠢ! ᠰᠤᠳᠠᠯ ᠪᠠᠷᠢᠬᠤ ᠨᠡᠷᠡᠪᠡᠷ ᠲᠠᠷᠭᠤᠨ ᠡᠴᠡᠩᠭᠡᠷᠢᠮᠢᠨᠢ ᠦᠵᠡᠭᠡᠳ ᠡᠨᠡ ᠭᠠᠪᠢᠶᠠᠪᠠᠷᠢᠶᠠᠨ ᠨᠢᠭᠡ ᠵᠦᠰᠦᠮ ᠮᠢᠬᠠ ᠣᠯᠵᠤ ᠢᠳᠡᠬᠦᠯᠡ ᠭᠡᠰᠡᠨ ᠬᠡᠷᠡᠭ ᠡ᠃ ᠪᠢᠴᠦ ᠠᠶᠤᠬᠤᠦᠭᠡᠢ᠂ ᠬᠡᠳᠦᠢᠪᠡᠷ ᠬᠥᠮᠦᠨ ᠢᠳᠡᠳᠡᠭᠦᠭᠡᠢ ᠪᠣᠯᠪᠠᠴᠤ ᠲᠡᠳᠡᠨᠡᠴᠡ ᠢᠯᠡᠭᠦᠦ ᠵᠢᠷᠦᠬᠡ ᠪᠦᠳᠦᠭᠦᠨ ᠬᠥᠮᠦᠨ ᠪᠢᠯᠡ ᠪᠢ᠃ ᠬᠣᠶᠠᠷ ᠨᠢᠳᠤᠷᠭᠠᠪᠠᠨ ᠰᠤᠩᠭᠠᠵᠤ ᠥᠭᠭᠦᠭᠡᠳ ᠶᠠᠭᠠᠬᠢᠵᠤ ᠭᠠᠷ ᠬᠥᠳᠡᠯᠬᠦᠶᠢᠨᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠡᠪᠦᠭᠡᠨ ᠨᠢᠳᠦᠪᠡᠨ ᠠᠨᠢᠭᠠᠳ ᠤᠳᠠᠲᠠᠯᠠ ᠲᠡᠮᠲᠡᠷᠢᠵᠦ᠂ ᠤᠳᠠᠲᠠᠯᠠ ᠪᠣᠳᠤᠯᠭᠠ ᠪᠣᠯᠤᠨ ᠰᠠᠭᠤᠭᠠᠳ ᠰᠠᠶᠢ ᠰᠢᠮᠨᠤᠶᠢᠨ ᠨᠢᠳᠦᠪᠡᠨ ᠨᠡᠭᠡᠭᠡᠵᠦ: 《ᠳᠡᠮᠡᠢ ᠶᠠᠭᠤᠮᠠ ᠪᠤᠤ ᠪᠣᠳᠤ ᠠ᠋᠃ ᠬᠡᠳᠦᠨ ᠡᠳᠦᠷ ᠨᠠᠮ ᠰᠤᠪᠢᠯᠠᠪᠠᠯ ᠰᠠᠢᠨ ᠪᠣᠯᠤᠨᠠ》 ᠭᠡᠨᠡ᠃
ᠳᠡᠮᠡᠢ ᠶᠠᠭᠤᠮᠠ ᠪᠤᠤ ᠪᠣᠳᠤ᠂ ᠨᠠᠮ ᠰᠤᠪᠢᠯᠠ! ᠰᠤᠪᠢᠯᠠᠭᠰᠠᠭᠠᠷ ᠲᠠᠷᠭᠤᠯᠠᠪᠠᠯ᠂ ᠲᠡᠳᠡ ᠢᠯᠡᠭᠦᠦ ᠮᠢᠬᠠ ᠣᠯᠵᠤ ᠢᠳᠡᠬᠦᠨᠢ ᠶᠠᠷᠢᠶᠠᠨᠦᠭᠡᠢ᠃ ᠨᠠᠳᠠ ᠶᠠᠮᠠᠷ ᠰᠠᠢᠨᠲᠠᠢᠶᠤᠮ ᠪᠤᠢ᠂ ᠶᠠᠭᠠᠬᠢᠭᠠᠳ 《ᠰᠠᠢᠨ ᠪᠣᠯᠬᠤ》ᠶᠤᠮ ᠪᠤᠢ? ᠡᠳᠡ ᠶᠡᠷᠦᠨᠢ ᠬᠥᠮᠦᠨᠢ ᠢᠳᠡᠬᠦᠶᠢ ᠬᠦᠰᠡᠬᠦ ᠠᠲᠠᠯᠠ ᠪᠠᠰᠠ ᠬᠤᠯᠠᠩ ᠬᠠᠯᠠᠩ ᠬᠢᠵᠦ ᠳᠠᠷᠤᠵᠤ ᠳᠠᠯᠳᠠᠯᠠᠬᠤᠶᠢ ᠣᠷᠤᠯᠳᠤᠵᠤ ᠰᠢᠭᠤᠳ ᠭᠠᠷ ᠬᠥᠳᠡᠯᠵᠦ ᠴᠢᠳᠠᠳᠠᠭᠦᠭᠡᠢᠨᠢ ᠦᠨᠡᠬᠡᠷ ᠱᠠᠯ ᠢᠨᠢᠶᠡᠯᠲᠡᠢ ᠬᠡᠷᠡᠭ ᠡ᠃ ᠪᠢ ᠲᠡᠰᠴᠦ ᠶᠠᠳᠠᠨ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠬᠦᠯᠡ ᠰᠡᠳᠭᠢᠯᠮᠢᠨᠢ ᠶᠡᠬᠡ ᠠᠭᠤᠵᠢᠷᠠᠪᠠ᠃ ᠡᠨᠡ ᠢᠨᠢᠶᠡᠳᠦᠮᠢᠨᠢ ᠰᠢᠳᠤᠷᠭᠤ ᠵᠣᠷᠢᠭ ᠠᠷᠢᠭᠤᠨ ᠶᠣᠰᠤᠪᠠᠷ ᠳᠦᠭᠦᠷᠡᠩ ᠪᠠᠢᠬᠤᠶᠢ ᠪᠢ ᠥᠪᠡᠷᠢᠶᠡᠨ ᠮᠡᠳᠡᠵᠦ ᠪᠠᠢᠨᠠ᠃ ᠲᠡᠷᠡ ᠡᠪᠦᠭᠡᠨ ᠠᠬᠠ ᠬᠣᠶᠠᠷ ᠴᠢᠷᠠᠢ ᠠᠯᠳᠠᠵᠤ᠂ ᠮᠢᠨᠦ ᠰᠢᠳᠤᠷᠭᠤ ᠵᠣᠷᠢᠭ ᠠᠷᠢᠭᠤᠨ ᠶᠣᠰᠤᠨᠳᠤ ᠳᠠᠷᠤᠭᠳᠠᠪᠠ᠃
ᠭᠡᠲᠡᠯᠡ ᠪᠢ ᠵᠣᠷᠢᠭᠲᠠᠢ ᠪᠠᠢᠪᠠᠯ ᠲᠡᠳᠡ ᠡᠨᠡ ᠵᠣᠷᠢᠭᠠᠴᠠᠮᠢᠨᠢ ᠬᠤᠪᠢᠶᠠᠯᠴᠠᠬᠤ ᠭᠡᠵᠦ ᠨᠠᠮᠠᠢ ᠤᠯᠠᠮᠴᠤ ᠪᠠᠷᠢᠵᠤ ᠢᠳᠡᠬᠦ ᠭᠡᠨᠡ᠃ ᠡᠪᠦᠭᠡᠨ ᠡᠭᠦᠳᠡ ᠠᠯᠬᠤᠵᠤ ᠭᠠᠷᠤᠭᠠᠳ ᠳᠡᠮᠡᠢ ᠬᠣᠯᠠ ᠶᠠᠪᠤᠯᠦᠭᠡᠢ᠂ ᠠᠬᠠᠳᠤ ᠰᠡᠮᠬᠡᠨᠢᠶᠡᠷ 《ᠪᠤᠰᠢᠭᠤᠬᠠᠨ ᠢᠳᠡᠶᠡ!》 ᠭᠡᠰᠡᠨᠳᠦ᠂ ᠠᠬᠠ ᠲᠣᠯᠤᠭᠠᠢᠪᠠᠨ ᠳᠣᠬᠢᠪᠠ᠃ ᠦᠵᠡᠰᠡ᠂ ᠡᠭᠦᠨᠳᠦᠨᠢ ᠴᠢ ᠪᠠᠰᠠ ᠪᠠᠢᠬᠤᠶᠤᠮᠤᠤ! ᠡᠨᠡ ᠨᠢᠭᠡ ᠶᠡᠬᠡ ᠨᠡᠭᠡᠭᠡᠯᠲᠡ ᠬᠡᠳᠦᠢᠪᠡᠷ ᠰᠠᠨᠠᠮᠰᠠᠷᠦᠭᠡᠢ ᠮᠡᠲᠦ ᠪᠣᠯᠪᠠᠴᠤ᠂ ᠮᠥᠨ ᠰᠠᠨᠠᠭᠠᠨᠳᠤ ᠪᠠᠢᠭᠰᠠᠨ ᠬᠡᠷᠡᠭ ᠡ᠃ ᠬᠠᠮᠵᠢᠨ ᠨᠡᠢᠯᠡᠵᠦ ᠨᠠᠮᠠᠢ ᠢᠳᠡᠬᠦ ᠭᠡᠰᠡᠨ ᠬᠥᠮᠦᠨᠮᠢᠨᠢ ᠬᠠᠷᠢᠨ ᠮᠢᠨᠦ ᠠᠬᠠ ᠪᠠᠢᠵᠠᠢ᠃
ᠬᠥᠮᠦᠨ ᠢᠳᠡᠳᠡᠭᠨᠢ ᠮᠢᠨᠦ ᠠᠬᠠ!
ᠪᠢ ᠪᠣᠯ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨᠦ ᠳᠡᠭᠦᠦ!
ᠪᠢ ᠥᠪᠡᠷᠢᠶᠡᠨ ᠬᠥᠮᠦᠨᠳᠦ ᠢᠳᠡᠭᠳᠡᠭᠰᠡᠨᠴᠦ ᠮᠥᠨ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨᠦ ᠳᠡᠭᠦᠦ ᠰᠢᠦ!
ᠲᠠᠪᠤ
ᠡᠨᠡ ᠬᠡᠳᠦᠨ ᠡᠳᠦᠷ ᠨᠢᠭᠡ ᠠᠯᠬᠤᠮ ᠤᠬᠤᠷᠢᠭᠠᠳ ᠪᠣᠳᠤᠵᠤ ᠦᠵᠡᠯᠡ᠃ ᠬᠡᠷᠪᠡ ᠲᠡᠷᠡ ᠡᠪᠦᠭᠡᠨ ᠵᠢᠰᠦᠪᠡᠨ ᠪᠤᠷᠤᠭᠤᠯᠠᠭᠰᠠᠨ ᠶᠠᠷᠭᠠᠴᠢᠨ ᠪᠢᠰᠢ᠂ ᠦᠨᠡᠨ ᠡᠮᠴᠢ ᠪᠣᠯᠤᠭᠰᠠᠨᠴᠤ ᠮᠥᠨ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠪᠠᠢᠬᠤ ᠶᠣᠰᠤᠲᠠᠢ᠃ ᠲᠡᠳᠡᠨᠦ ᠳᠡᠭᠡᠳᠦ ᠪᠠᠭᠰᠢ ᠯᠢ ᠱᠢ ᠵᠧᠨᠦ ᠵᠣᠬᠢᠶᠠᠭᠰᠠᠨ 《ᠬᠢᠲᠠᠳ ᠡᠮᠦᠨ ᠶᠠᠭᠤ》ᠳᠤ ᠬᠥᠮᠦᠨᠦ ᠮᠢᠬᠠᠶᠢ ᠴᠢᠨᠠᠵᠤ ᠢᠳᠡᠵᠦ ᠪᠣᠯᠤᠨᠠ ᠭᠡᠵᠦ ᠲᠣᠳᠤᠷᠬᠠᠢ ᠪᠢᠴᠢᠭᠡᠳ ᠪᠠᠢᠬᠤᠶᠤᠮᠴᠢᠨᠢ᠂ ᠲᠡᠷᠡ ᠥᠪᠡᠷᠢᠶᠡᠨ ᠬᠥᠮᠦᠨ ᠢᠳᠡᠬᠦᠦᠭᠡᠢ ᠪᠠᠢᠵᠤ ᠴᠢᠳᠠᠨᠠᠤᠤ?ᠮᠢᠨᠦ ᠠᠬᠠᠶᠢᠨ ᠲᠤᠬᠠᠢᠴᠤ ᠭᠡᠰᠡᠨ᠂ ᠲᠡᠭᠦᠨᠢ ᠬᠢᠯᠢᠰᠳᠡᠭᠦᠯᠦᠭᠰᠡᠨ ᠵᠦᠢᠯ ᠣᠭᠲᠤ ᠠᠯᠠᠭᠠ᠃ ᠲᠡᠷᠡ ᠨᠠᠳᠠ ᠪᠢᠴᠢᠭ ᠵᠢᠭᠠᠬᠤᠳᠠᠭᠠᠨ 《ᠬᠡᠦᠬᠡᠳ ᠶᠥᠭᠡᠨ ᠰᠣᠯᠢᠨ ᠢᠳᠡᠵᠦ ᠪᠣᠯᠤᠮᠤᠢ》 ᠭᠡᠵᠦ ᠪᠡᠶᠡᠪᠡᠷᠢᠶᠡᠨ ᠶᠠᠷᠢᠵᠤ ᠪᠠᠢᠭᠰᠠᠨᠶᠤᠮ᠃ ᠪᠠᠰᠠ ᠨᠢᠭᠡ ᠤᠳᠠᠭᠠ ᠪᠢᠳᠡ ᠨᠢᠭᠡᠨ ᠮᠠᠭᠤ ᠬᠥᠮᠦᠨᠦ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠪᠠᠢᠲᠠᠯᠠ ᠲᠡᠭᠦᠨᠦ ᠬᠡᠯᠡᠭᠰᠡᠨᠨᠢ ᠠᠯᠠᠬᠤ ᠶᠣᠰᠤᠲᠠᠢᠪᠠᠷ ᠪᠠᠷᠠᠬᠤᠦᠭᠡᠢ᠂ ᠪᠠᠰᠠ 《ᠮᠢᠬᠠᠶᠢ ᠠᠨᠤ ᠢᠳᠡᠵᠦ᠂ ᠠᠷᠠᠰᠤᠶᠢ ᠠᠨᠤ ᠳᠡᠪᠢᠰᠬᠦ》 ᠶᠣᠰᠤᠲᠠᠢ ᠭᠡᠰᠡᠨ ᠪᠢᠯᠡ᠃ ᠲᠡᠷᠡ ᠦᠶᠡᠳᠦ ᠪᠢ ᠨᠠᠰᠤ ᠪᠠᠭᠠ ᠪᠠᠢᠭᠰᠠᠨ ᠲᠤᠯᠠ ᠵᠢᠷᠦᠬᠡᠮᠢᠨᠢ ᠤᠳᠠᠲᠠᠯᠠ ᠲᠦᠭᠰᠢᠵᠦ ᠪᠢᠯᠡ᠃ ᠤᠷᠢᠳ ᠡᠳᠦᠷ ᠯᠠᠩ ᠽᠢ ᠼᠦᠨ ᠲᠣᠰᠭᠤᠨᠤ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠢᠷᠡᠵᠦ᠂ ᠵᠢᠷᠦᠬᠡ ᠢᠳᠡᠭᠰᠡᠨ ᠶᠠᠪᠤᠳᠠᠯᠢ ᠶᠠᠷᠢᠬᠤᠳᠤ᠂ ᠲᠡᠷᠡ ᠪᠠᠰᠠ ᠠᠵᠢᠭᠴᠤᠦᠭᠡᠢ᠂ ᠲᠣᠯᠤᠭᠠᠢᠪᠠᠨ ᠳᠣᠬᠢᠵᠤᠯᠠ ᠪᠠᠢᠯᠠ᠃ ᠲᠡᠭᠦᠨᠦ ᠰᠡᠳᠭᠢᠯ ᠤᠷᠢᠳᠠᠬᠢᠲᠠᠢᠪᠠᠨ ᠠᠳᠠᠯᠢ ᠬᠣᠣᠷᠲᠠᠢ ᠪᠠᠢᠭᠠᠨᠢ ᠢᠯᠡᠷᠬᠡᠢ ᠮᠡᠳᠡᠭᠳᠡᠨᠡ᠃ 《ᠬᠡᠦᠬᠡᠳ ᠶᠥᠭᠡᠨ ᠰᠣᠯᠢᠨ ᠢᠳᠡᠵᠦ ᠪᠣᠯᠵᠤ》 ᠪᠠᠢᠬᠤ ᠲᠤᠯᠠ ᠶᠠᠭᠤᠶᠢᠴᠤ ᠪᠦᠷ ᠰᠣᠯᠢᠵᠤ ᠪᠣᠯᠤᠨᠠ᠃ ᠬᠡᠨᠢᠴᠦ ᠪᠦᠷ ᠢᠳᠡᠵᠦ ᠪᠣᠯᠤᠨᠠ᠃ ᠤᠷᠢᠳᠤ ᠪᠢ ᠲᠡᠭᠦᠨᠦ ᠶᠣᠰᠤ ᠶᠠᠷᠢᠬᠤᠶᠢᠯᠠ ᠰᠣᠨᠤᠰᠤᠭᠠᠳ᠂ ᠳᠦᠯᠡᠢ ᠪᠠᠯᠠᠢ ᠥᠩᠭᠡᠷᠡᠭᠡᠵᠦ ᠪᠠᠢᠪᠠ᠃ ᠲᠡᠭᠦᠨᠢ ᠶᠣᠰᠤ ᠶᠠᠷᠢᠬᠤ ᠦᠶᠡᠳᠦ ᠤᠷᠤᠭᠤᠯ ᠳᠡᠭᠡᠷᠡᠨᠢ ᠬᠥᠮᠦᠨᠦ ᠲᠣᠰᠤ ᠨᠠᠭᠠᠯᠳᠤᠵᠤ ᠪᠠᠢᠭᠰᠠᠨᠢᠶᠠᠷ ᠦᠯᠦ ᠪᠠᠷᠠᠨ᠂ ᠮᠥᠨ ᠴᠡᠭᠡᠵᠢᠨᠢ ᠬᠥᠮᠦᠨ ᠢᠳᠡᠬᠦ ᠰᠠᠨᠠᠭᠠᠪᠠᠷ ᠳᠦᠭᠦᠷᠡᠩ ᠪᠠᠢᠯᠠ ᠭᠡᠭᠴᠢᠶᠢ ᠣᠳᠣ ᠰᠠᠶᠢ ᠣᠯᠵᠤ ᠮᠡᠳᠡᠯᠡ᠃
ᠵᠢᠷᠭᠤᠭᠠ
ᠡᠳᠦᠷᠴᠦᠶᠦᠮᠦᠦ᠂ ᠰᠥᠨᠢᠴᠦᠶᠦᠮᠦᠦ ᠪᠤᠤ ᠮᠡᠳᠡ᠂ ᠫᠠᠳ ᠬᠠᠷᠠᠩᠭᠤᠢ᠃ ᠵᠣᠣ ᠣᠪᠤᠭᠲᠠᠨᠤ ᠨᠣᠬᠠᠢ ᠪᠠᠰᠠ ᠬᠤᠴᠠᠵᠤ ᠡᠬᠢᠯᠡᠯᠡ᠃
ᠠᠷᠰᠯᠠᠨᠰᠢᠭ᠋ ᠬᠡᠷᠴᠡᠭᠡᠢ᠂ ᠲᠠᠤᠯᠠᠢᠰᠢᠭ᠋ ᠠᠶᠤᠮᠠᠲᠠᠭᠠᠢ᠂ ᠦᠨᠡᠭᠡᠰᠢᠭ ᠬᠤᠢᠬᠤᠷ ᠁
ᠳᠣᠯᠤᠭᠠ
ᠲᠡᠳᠡᠨᠦ ᠠᠷᠭᠠᠶᠢ ᠪᠢ ᠮᠡᠳᠡᠪᠡ᠃ ᠰᠢᠭᠤᠳ ᠠᠯᠠᠬᠤᠦᠭᠡᠢ᠂ ᠴᠢᠩᠭᠢᠵᠦ ᠪᠠᠰᠠ ᠴᠢᠳᠠᠬᠤᠦᠭᠡᠢ᠂ ᠬᠡᠷᠡᠭ ᠪᠣᠯᠬᠤᠠᠴᠠ ᠠᠶᠤᠳᠠᠭ ᠪᠠᠢᠪᠠ᠃ ᠲᠡᠢᠮᠦᠡᠴᠡ ᠲᠡᠳᠡ ᠳᠠᠯᠳᠠᠭᠤᠷ ᠬᠤᠤᠪᠢᠯᠳᠤᠵᠤ᠂ ᠤᠷᠠᠬᠠ ᠲᠣᠣᠷ ᠵᠣᠬᠢᠶᠠᠭᠠᠳ᠂ ᠨᠠᠮᠠᠢ ᠠᠯᠪᠠᠪᠠᠷ ᠬᠣᠷᠤᠭᠠᠬᠤ ᠭᠡᠵᠦ ᠪᠠᠢᠭᠠᠶᠤᠮ ᠪᠠᠢᠨᠠ᠃ ᠤᠷᠢᠳ ᠬᠡᠳᠦᠨ ᠡᠳᠦᠷ ᠭᠤᠳᠤᠮᠵᠢᠨᠳᠤ ᠲᠠᠭᠠᠷᠢᠯᠳᠤᠭᠰᠠᠨ ᠡᠷᠡᠭᠲᠡᠢ ᠡᠮᠡᠭᠲᠡᠢᠴᠦᠳᠦᠨ ᠶᠠᠩᠵᠤ ᠪᠠ ᠠᠬᠠᠶᠢᠨ ᠡᠨᠡ ᠬᠡᠳᠦᠨ ᠡᠳᠦᠷᠦᠨ ᠬᠥᠳᠡᠯᠵᠦ ᠪᠠᠷᠢᠬᠤᠠᠴᠠ ᠦᠵᠡᠪᠡᠯ᠂ ᠨᠠᠷᠢᠨ ᠤᠴᠢᠷᠢᠨᠢ ᠨᠠᠢ᠍ᠮᠠ ᠶᠢᠰᠦᠨ ᠬᠤᠪᠢ ᠪᠠᠷᠲᠠᠭᠠᠪᠠᠷ ᠮᠡᠳᠡᠬᠦᠶᠦᠮ᠃ ᠪᠦᠰᠡᠪᠡᠨ ᠲᠠᠢᠯᠵᠤ ᠪᠠᠢᠰᠢᠩᠤᠨ ᠨᠢᠷᠤᠭᠤᠨᠠᠴᠠ ᠡᠯᠭᠦᠭᠡᠳ ᠶᠠᠷᠭᠢᠲᠠᠯᠠ ᠪᠣᠭᠤᠮᠢᠯᠠᠵᠤ ᠦᠬᠦᠬᠦᠡᠴᠡ ᠢᠯᠡᠭᠦᠦ ᠰᠠᠢᠨ ᠶᠠᠪᠤᠳᠠᠯ ᠠᠯᠠᠭᠠ᠃ ᠢᠩᠭᠢᠪᠡᠯ ᠲᠡᠳᠡ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠᠦᠭᠡᠢ ᠮᠥᠷᠲᠡᠭᠡᠨ ᠪᠠᠰᠠ ᠰᠠᠨᠠᠭᠠᠪᠠᠨ ᠭᠦᠢᠴᠡᠭᠡᠬᠦ ᠲᠤᠯᠠ ᠲᠡᠭᠷᠢᠦᠭᠡᠢ ᠶᠡᠬᠡ ᠪᠠᠶᠠᠷᠯᠠᠵᠤ ᠬᠠᠬᠠᠵᠤ ᠬᠥᠰᠢᠲᠡᠯᠡᠪᠡᠨ ᠢᠨᠢᠶᠡᠯᠳᠦᠬᠦᠨᠢ ᠶᠠᠷᠢᠶᠠᠨᠦᠭᠡᠢ᠃ ᠦᠭᠡᠢᠪᠡᠯ᠂ ᠠᠶᠤᠯᠭᠠᠵᠤ ᠵᠣᠪᠠᠭᠠᠭᠰᠠᠭᠠᠷ ᠦᠬᠦᠭᠦᠯᠦᠨᠡ᠃ ᠢᠩᠭᠢᠪᠡᠯ ᠪᠠᠬᠠᠨ ᠡᠴᠡᠬᠦ ᠪᠣᠯᠪᠠᠴᠤ ᠮᠥᠨ ᠲᠣᠯᠤᠭᠠᠢᠪᠠᠨ ᠬᠡᠳᠦ ᠳᠣᠬᠢᠵᠤ ᠥᠭᠬᠦᠶᠦᠮ᠃
ᠲᠡᠳᠡ ᠪᠣᠯ ᠦᠬᠦᠭᠰᠡᠨ ᠮᠢᠬᠠᠶᠢᠯᠠ ᠢᠳᠡᠵᠦ ᠴᠢᠳᠠᠨᠠ! ᠶᠠᠮᠠᠷᠴᠤ ᠪᠢᠴᠢᠭ ᠳᠡᠭᠡᠷᠡ ᠪᠢᠯᠡ 《ᠬᠠᠢᠶᠧᠨᠠ》 ᠭᠡᠳᠡᠭ ᠨᠢᠭᠡ ᠠᠮᠢᠲᠠᠨ᠂ ᠨᠢᠳᠦ ᠪᠡᠶᠡ ᠪᠠᠢᠳᠠᠯᠨᠢ ᠦᠵᠡᠰᠢᠦᠭᠡᠢ ᠮᠠᠭᠤᠬᠠᠢ᠂ ᠬᠡᠵᠢᠶᠡᠳᠡ ᠦᠬᠦᠭᠰᠡᠨ ᠮᠢᠬᠠ ᠢᠳᠡᠳᠡᠭ ᠪᠥᠭᠡᠳ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠶᠠᠰᠤᠶᠢᠴᠤ ᠪᠠᠯᠪᠠ ᠬᠡᠮᠬᠡ ᠵᠠᠵᠢᠯᠤᠭᠠᠳ ᠵᠠᠯᠭᠢᠳᠠᠭ ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠵᠤ ᠪᠢᠯᠡ᠃ ᠪᠣᠳᠤᠵᠤ ᠦᠵᠡᠪᠡᠯ ᠮᠥᠨ ᠠᠶᠤᠮᠠᠷ ᠰᠠᠨᠠᠭᠳᠠᠬᠤᠶᠤᠮ᠃ 《ᠬᠠᠢᠶᠧᠨᠠ》 ᠪᠣᠯ ᠴᠢᠨᠤᠠᠶᠢᠨ ᠰᠠᠳᠤᠨ᠂ ᠴᠢᠨᠤᠠ ᠪᠣᠯ ᠨᠣᠬᠠᠢᠶᠢᠨ ᠲᠥᠷᠦᠯᠶᠦᠮ᠃ ᠤᠷᠵᠢᠳᠤᠷ ᠵᠣᠣ ᠣᠪᠤᠭᠲᠠᠨᠤ ᠨᠣᠬᠠᠢ ᠨᠠᠮᠠᠢ ᠬᠡᠳᠦ ᠬᠠᠷᠠᠵᠤ ᠠᠪᠤᠯᠠ᠃ ᠪᠣᠳᠤᠪᠠᠯ ᠲᠡᠷᠡ ᠪᠠᠰᠠ ᠦᠭᠡ ᠨᠢᠭᠡᠲᠡᠢ ᠬᠡᠳᠦᠢᠨ ᠣᠴᠢᠭᠠᠳ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠭᠰᠠᠨ ᠪᠠᠢᠯᠭᠦᠢ᠃ ᠡᠪᠦᠭᠡᠨᠦ ᠨᠢᠳᠦ ᠭᠠᠵᠠᠷ ᠱᠠᠭᠠᠢᠵᠤ ᠪᠠᠢᠭᠰᠠᠨᠴᠤ ᠨᠠᠳᠠᠠᠴᠠ ᠶᠠᠭᠠᠬᠢᠵᠤ ᠨᠢᠭᠤᠵᠤ ᠴᠢᠳᠠᠬᠤ ᠪᠤᠢ᠃
ᠠᠬᠠᠯᠠ ᠮᠠᠰᠢ ᠬᠥᠭᠡᠷᠦᠬᠦᠢ ᠪᠠᠢᠨᠠ᠃ ᠲᠡᠷᠡ ᠪᠠᠰᠠ ᠬᠥᠮᠦᠨ ᠪᠠᠢᠲᠠᠯᠠ ᠶᠠᠭᠠᠬᠢᠭᠠᠳ ᠣᠭᠲᠤ ᠠᠶᠤᠵᠤ ᠵᠣᠪᠠᠬᠤᠦᠭᠡᠢᠪᠠᠷ ᠬᠥᠮᠦᠨᠲᠡᠢ ᠨᠡᠢᠯᠡᠵᠦ ᠨᠠᠮᠠᠢ ᠢᠳᠡᠬᠦᠨᠢᠦᠦ? ᠰᠤᠷᠴᠤ ᠵᠠᠩᠰᠢᠯ ᠪᠣᠯᠴᠢᠬᠠᠭᠠᠳ᠂ ᠪᠤᠷᠤᠭᠤ ᠭᠡᠵᠦ ᠪᠣᠳᠤᠬᠤᠦᠭᠡᠢ ᠪᠠᠢᠭᠠᠶᠤᠮᠤᠤ? ᠡᠰᠡᠬᠦᠯᠡ ᠬᠥᠮᠦᠨᠦ ᠴᠢᠨᠠᠷᠢᠶᠠᠨ ᠠᠯᠳᠠᠭᠠᠳ᠂ ᠮᠡᠳᠡᠪᠡᠴᠦ ᠵᠣᠷᠢᠭᠤᠳᠠ ᠦᠢᠯᠡᠳᠴᠦ ᠪᠠᠢᠬᠤᠨᠢ ᠲᠡᠷᠡᠦᠦ?
ᠪᠢ ᠬᠥᠮᠦᠨ ᠢᠳᠡᠭᠴᠢᠳᠢ ᠵᠦᠬᠡᠨ ᠬᠠᠷᠢᠶᠠᠬᠤᠳᠠᠭᠠᠨ ᠲᠡᠭᠦᠨᠡᠴᠡ ᠡᠬᠢᠯᠡᠨᠡ᠃ ᠬᠥᠮᠦᠨ ᠢᠳᠡᠭᠴᠢᠳᠢ ᠢᠳᠭᠠᠬᠤ ᠳᠠᠭᠠᠨᠴᠤ ᠲᠡᠭᠦᠨᠡᠴᠡ ᠡᠬᠢᠯᠡᠨᠡ᠃
ᠨᠠᠢ᠍ᠮᠠ
ᠴᠣᠬᠤᠮᠳᠠᠭᠠᠨ ᠡᠳᠡᠭᠡᠷ ᠶᠣᠰᠤᠶᠢ ᠣᠳᠣ ᠲᠡᠳᠡ ᠬᠡᠳᠦᠢᠨ ᠣᠢᠯᠠᠭᠠᠭᠰᠠᠨ ᠪᠠᠢᠬᠤ ᠶᠣᠰᠤᠲᠠᠢ᠃ ᠁
ᠭᠡᠨᠡᠳᠲᠡ ᠨᠢᠭᠡ ᠬᠥᠮᠦᠨ ᠣᠷᠤᠵᠤ ᠢᠷᠡᠪᠡ᠃ ᠬᠣᠷᠢᠭᠠᠳ ᠨᠠᠰᠤᠨᠤ ᠮᠠᠶᠢᠭᠲᠠᠢ᠂ ᠵᠢᠰᠦ ᠴᠢᠷᠠᠢᠶᠢᠨᠢ ᠲᠣᠳᠤᠷᠬᠠᠢ ᠣᠯᠵᠤ ᠦᠵᠡᠭᠰᠡᠨᠦᠭᠡᠢ᠂ ᠴᠢᠷᠠᠢ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠵᠦ ᠮᠢᠨᠦ ᠵᠦᠭ ᠳᠣᠬᠢᠨᠠ᠃ ᠢᠨᠢᠶᠡᠳᠦᠨᠢ ᠮᠥᠨ ᠦᠨᠡᠨ ᠢᠨᠢᠶᠡᠳᠦ ᠪᠢᠰᠢ ᠶᠠᠩᠵᠤᠲᠠᠢ᠃ ᠪᠢ ᠲᠡᠭᠦᠨᠡᠴᠡ: 《 ᠬᠥᠮᠦᠨᠢ ᠢᠳᠡᠬᠦᠨᠢ ᠲᠠᠭᠠᠷᠠᠨᠠᠤᠤ?》 ᠭᠡᠵᠦ ᠠᠰᠠᠭᠤᠭᠰᠠᠨᠳᠤ ᠲᠡᠷᠡ ᠮᠥᠨ ᠢᠨᠢᠶᠡᠮᠰᠦᠭᠯᠡᠵᠦ: 《ᠭᠠᠴᠢᠭ ᠵᠢᠯ ᠪᠢᠰᠢ ᠪᠠᠢᠲᠠᠯᠠ ᠶᠠᠭᠤᠨᠳᠤ ᠬᠥᠮᠦᠨ ᠢᠳᠡᠬᠦ ᠪᠤᠢ》 ᠭᠡᠪᠡ᠃ ᠡᠨᠡᠴᠦ ᠮᠥᠨ ᠬᠥᠮᠦᠨ ᠢᠳᠡᠬᠦ ᠳᠤᠷᠠᠲᠠᠢ! ᠨᠢᠭᠡ ᠵᠠᠮᠤᠨ ᠴᠢᠳᠭᠦᠷ ᠪᠠᠢᠨᠠ ᠭᠡᠵᠦ ᠪᠢ ᠳᠣᠣᠷᠠᠪᠠᠨ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠪᠢ ᠵᠠᠭᠤᠨ ᠬᠤᠪᠢᠶᠢᠨ ᠵᠣᠷᠢᠭ ᠭᠠᠷᠭᠠᠵᠤ ᠵᠣᠷᠢᠭᠤᠳᠠ ᠲᠡᠭᠦᠨᠡᠴᠡ:
《ᠲᠠᠭᠠᠷᠠᠨᠠᠤᠤ》 ᠭᠡᠵᠦ ᠠᠰᠠᠭᠤᠪᠠ᠃
《ᠡᠳᠡᠭᠡᠷ ᠶᠠᠪᠤᠳᠠᠯᠢ ᠠᠰᠠᠭᠤᠭᠠᠳ ᠶᠠᠭᠠᠬᠢᠬᠤᠶᠤᠮ ᠪᠤᠢ᠃ ᠴᠢ ᠦᠨᠡᠬᠡᠷ ᠁ ᠶᠡᠬᠡ ᠱᠣᠭᠲᠠᠢ ᠬᠥᠮᠦᠨ ᠪᠠᠢᠨᠠ᠃ ᠁ ᠥᠨᠥᠳᠦᠷ ᠲᠡᠭᠷᠢ ᠰᠠᠢᠬᠠᠨ ᠪᠠᠢᠨᠠ ᠰᠢᠤ᠃ 》
ᠲᠡᠭᠷᠢᠴᠦ ᠰᠠᠢᠬᠠᠨ ᠪᠠᠢᠨᠠ᠂ ᠰᠠᠷᠠ ᠪᠠᠰᠠ ᠲᠤᠩᠭᠠᠯᠠᠭ ᠪᠠᠢᠨᠠ᠂᠃ ᠭᠡᠪᠡᠴᠦ ᠪᠢ ᠴᠢᠮᠠᠠᠴᠠ ᠠᠰᠠᠭᠤᠶᠠ: 《 ᠲᠠᠭᠠᠷᠠᠨᠠᠤᠤ?》
ᠲᠡᠷᠡ᠂ ᠦᠯᠦ ᠲᠠᠭᠠᠰᠢᠶᠠᠬᠤᠢᠴᠠ 《ᠲᠠᠭᠠᠷᠠᠬᠤᠦᠭᠡᠢ ᠁》 ᠭᠡᠵᠦ ᠬᠠᠯᠲᠤ ᠮᠥᠯᠲᠦ ᠳᠤᠤᠭᠠᠷᠪᠠ᠃
《ᠲᠠᠭᠠᠷᠠᠬᠤᠦᠭᠡᠢ ᠪᠣᠯ ᠲᠡᠳᠡ ᠶᠠᠭᠤᠨᠳᠤ ᠢᠳᠡᠭᠡᠳ ᠪᠠᠢᠳᠠᠭᠶᠤᠮ ᠪᠤᠢ?!》
《ᠪᠠᠢᠳᠠᠭᠦᠭᠡᠢ ᠬᠡᠷᠡᠭ ᠁》
《ᠪᠠᠢᠳᠠᠭᠦᠭᠡᠢ ᠬᠡᠷᠡᠭ ᠡ? ᠣᠳᠣ ᠯᠠᠩ ᠽᠢ ᠼᠦᠨ ᠲᠣᠰᠭᠤᠨᠳᠤ ᠢᠳᠡᠵᠦ ᠪᠠᠢᠨᠠ᠃ ᠪᠢᠴᠢᠭᠲᠦ ᠪᠠᠰᠠ ᠪᠢᠴᠢᠭᠡᠰᠦᠲᠡᠢ᠂ ᠤᠪ ᠤᠯᠠᠭᠠᠨ ᠰᠢᠪ ᠰᠢᠨᠡᠬᠡᠨ!》
ᠲᠡᠷᠡ ᠬᠥᠮᠦᠨ ᠳᠣᠣᠷᠠᠪᠠᠨ ᠴᠢᠷᠠᠢᠪᠠᠨ ᠲᠡᠮᠦᠷ ᠮᠡᠲᠦ ᠬᠥᠬᠡᠷᠡᠭᠦᠯᠵᠦ᠂ ᠨᠢᠳᠦᠪᠡᠨ ᠪᠦᠯᠲᠡᠢᠯᠭᠡᠨ: 《ᠪᠠᠢᠵᠤᠴᠤ ᠮᠡᠳᠡᠨᠡ᠂ ᠤᠤᠯᠠᠴᠠ ᠡᠢᠮᠦᠯᠡ ᠪᠠᠢᠭᠰᠠᠨ ᠁》 ᠭᠡᠪᠡ᠃
《ᠤᠤᠯᠠᠴᠠ ᠡᠢᠮᠦᠯᠡ ᠪᠠᠢᠭᠰᠠᠨᠨᠢ ᠲᠠᠭᠠᠷᠠᠨᠠᠤᠤ?》
《ᠪᠢ ᠴᠢᠮᠠᠲᠠᠢ ᠡᠳᠡᠭᠡᠷ ᠶᠣᠰᠤᠶᠢ ᠬᠡᠯᠡᠯᠴᠡᠬᠦᠦᠭᠡᠢ᠃ ᠶᠠᠭᠤᠴᠤ ᠭᠡᠰᠡᠨ ᠴᠢ ᠡᠭᠦᠨᠢ ᠬᠡᠯᠡᠬᠦ ᠶᠣᠰᠤᠦᠭᠡᠢ᠂ ᠴᠢ ᠬᠡᠯᠡᠪᠡᠯ ᠴᠢᠨᠦ ᠪᠤᠷᠤᠭᠤ ᠪᠣᠯᠤᠨᠠ!》
ᠪᠢ ᠭᠣᠰ ᠦᠰᠦᠷᠦᠨ ᠪᠣᠰᠴᠤ ᠨᠢᠳᠦᠪᠡᠨ ᠨᠡᠭᠡᠭᠡᠬᠦᠯᠡ ᠲᠡᠷᠡ ᠬᠥᠮᠦᠨ ᠠᠯᠠᠭᠠ ᠪᠣᠯᠪᠠ᠃ ᠬᠠᠮᠤᠭ ᠪᠡᠶᠡᠡᠴᠡᠮᠢᠨᠢ ᠬᠠᠷᠠ ᠬᠥᠯᠦᠰᠦ ᠠᠰᠭᠠᠷᠠᠨᠠ᠃ ᠲᠡᠭᠦᠨᠦ ᠨᠠᠰᠤ ᠮᠢᠨᠦ ᠠᠬᠠᠠᠴᠠ ᠬᠣᠯᠠ ᠪᠠᠭᠠ ᠪᠠᠢᠭᠰᠠᠨᠴᠤ ᠮᠥᠨ ᠨᠢᠭᠡ ᠨᠠᠮ ᠠᠵᠢ᠃ ᠡᠭᠦᠨᠢ ᠯᠠᠪ ᠡᠬᠡ ᠡᠴᠢᠭᠡᠨᠢ ᠤᠷᠢᠳᠠᠰᠠ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠠᠢᠯᠭᠦᠢ᠂ ᠲᠡᠭᠡᠭᠡᠳ ᠲᠡᠷᠡ ᠬᠦᠦᠳᠡᠭᠡᠨ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠢᠵᠡ᠃ ᠢᠩᠭᠢᠬᠦᠯᠡᠷ ᠬᠡᠦᠬᠡᠳ ᠬᠦᠷᠲᠡᠯᠡ ᠴᠥᠮ ᠨᠠᠮᠠᠢ ᠬᠣᠣᠷᠲᠠᠢ ᠬᠠᠷᠠᠵᠤ ᠪᠠᠢᠬᠤᠨᠢ ᠲᠡᠷᠡ ᠪᠢᠵᠡ᠃
ᠶᠢᠰᠦ
ᠥᠪᠡᠷᠢᠶᠡᠨ ᠬᠥᠮᠦᠨᠢ ᠢᠳᠡᠬᠦ ᠭᠡᠨᠡ᠃ ᠪᠠᠰᠠ ᠬᠥᠮᠦᠨᠳᠦ ᠢᠳᠡᠭᠳᠡᠬᠦᠡᠴᠡᠪᠡᠨ ᠠᠶᠤᠭᠠᠳ ᠪᠦᠷᠯᠡ ᠲᠤᠢᠯᠤᠨ ᠶᠡᠬᠡ ᠬᠠᠷᠠᠳᠠᠭᠰᠠᠨ ᠨᠢᠳᠦᠪᠡᠷ ᠨᠢᠭᠡ ᠨᠢᠭᠡᠪᠡᠨ ᠰᠢᠷᠲᠡᠨᠡ᠃ ᠁
ᠡᠨᠡ ᠪᠣᠳᠤᠯᠭᠠᠪᠠᠨ ᠬᠠᠶᠠᠭᠠᠳ ᠰᠠᠨᠠᠭᠠ ᠠᠮᠤᠷ ᠠᠵᠢᠯᠯᠠᠵᠤ ᠤᠨᠲᠠᠵᠤ ᠢᠳᠡᠵᠦ ᠶᠠᠪᠤᠪᠠᠯ ᠬᠡᠴᠢᠨᠡᠨ ᠠᠶᠠᠲᠠᠢ ᠪᠢᠯᠡ᠃ ᠢᠩᠭᠢᠬᠦᠨᠢ ᠬᠠᠲᠠᠪᠴᠢ ᠠᠯᠬᠤᠨ ᠭᠠᠷᠬᠤᠶᠢᠨ ᠲᠡᠳᠦᠢ ᠨᠢᠭᠡᠯᠡ ᠪᠣᠭᠤᠮᠲᠠᠶᠤᠮ᠃ ᠭᠡᠲᠡᠯᠡ ᠲᠡᠳᠡ ᠠᠪᠤ ᠬᠦᠦ᠂ ᠠᠬᠠ ᠳᠡᠭᠦᠦ᠂ ᠡᠷᠡ ᠡᠮᠡ᠂ ᠠᠨᠳᠠ ᠨᠥᠬᠦᠷ᠂ ᠪᠠᠭᠰᠢ ᠱᠠᠪᠢ᠂ ᠥᠰᠲᠡᠨ ᠳᠠᠢᠰᠤᠨ ᠪᠠ ᠦᠯᠦ ᠲᠠᠨᠢᠯᠴᠠᠬᠤ ᠬᠥᠮᠦᠰ ᠬᠦᠷᠲᠡᠯᠡ ᠴᠥᠮ ᠨᠡᠢᠯᠡᠵᠦ ᠨᠢᠭᠡᠳᠦᠭᠡᠳ ᠪᠡᠶᠡ ᠪᠡᠶᠡᠪᠡᠨ ᠬᠣᠷᠢᠵᠤ ᠢᠳᠭᠠᠨ ᠨᠢᠭᠡᠨᠢ ᠨᠢᠭᠡᠪᠡᠨ ᠲᠠᠲᠠᠯᠴᠠᠨ᠂ ᠡᠨᠡ ᠭᠠᠭᠴᠠᠬᠠᠨ ᠠᠯᠬᠤᠮᠢ ᠦᠬᠦᠪᠡᠴᠦ ᠠᠯᠬᠤᠵᠤ ᠥᠭᠬᠦᠦᠭᠡᠢ ᠪᠠᠢᠨᠠ᠃
ᠠᠷᠪᠠ
ᠬᠠᠷᠠ ᠥᠷᠯᠦᠭᠡᠭᠦᠷ ᠪᠢ ᠠᠬᠠᠪᠠᠨ ᠡᠷᠢᠵᠦ ᠣᠴᠢᠪᠠ᠃ ᠲᠡᠷᠡ ᠭᠣᠣᠯ ᠭᠡᠷᠦᠨ ᠡᠭᠦᠳᠡᠨ ᠳᠡᠭᠡᠷᠡᠪᠡᠨ ᠲᠡᠭᠷᠢᠶᠢ ᠰᠢᠷᠲᠡᠨ ᠵᠣᠭᠰᠤᠨᠠ᠃ ᠪᠢ ᠲᠡᠭᠦᠨᠦ ᠠᠷᠤᠳᠤ ᠣᠴᠢᠭᠠᠳ ᠡᠭᠦᠳᠡᠶᠢ ᠬᠠᠰᠢᠨ ᠵᠣᠭᠰᠤᠵᠤ᠂ ᠶᠡᠬᠡ ᠡᠶᠡᠯᠳᠡᠭ ᠳᠥᠯᠭᠡᠨᠢᠶᠡᠷ:
《ᠠᠬᠠ ᠠ᠋᠂ ᠪᠢ ᠴᠢᠮᠠᠳᠤ ᠬᠡᠯᠡᠬᠦ ᠦᠭᠡ ᠪᠠᠢᠨᠠ》 ᠭᠡᠪᠡ᠃
《ᠶᠠᠷᠢᠯᠠ ᠳ᠋ᠠ 》 ᠭᠡᠵᠦ ᠲᠡᠷᠡ ᠲᠦᠷᠭᠡᠨ ᠡᠷᠭᠢᠵᠦ ᠬᠠᠷᠠᠭᠠᠳ ᠲᠣᠯᠤᠭᠠᠢ ᠳᠣᠬᠢᠪᠠ᠃
《ᠪᠢ ᠬᠡᠳᠦᠬᠡᠨ ᠦᠭᠡ ᠬᠡᠯᠡᠬᠦ ᠭᠡᠰᠡᠨᠶᠦᠮ᠂ ᠭᠡᠲᠡᠯᠡ ᠠᠮᠠᠨᠠᠴᠠ ᠭᠠᠷᠴᠤ ᠥᠭᠬᠦᠦᠭᠡᠢ ᠪᠠᠢᠨᠠ᠃ ᠠᠬᠠ ᠠ᠋᠂ ᠤᠷᠢᠳᠤᠶᠢᠨ ᠵᠡᠷᠯᠢᠭ ᠬᠥᠮᠦᠨ ᠪᠠᠷᠤᠭ ᠴᠥᠮᠢᠶᠡᠷᠢᠶᠡᠨ ᠪᠠᠭᠠ ᠰᠠᠭᠠ ᠬᠥᠮᠦᠨ ᠢᠳᠡᠳᠡᠭ ᠪᠠᠢᠭᠰᠠᠨ ᠪᠢᠵᠡ᠃ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠪᠣᠳᠤᠯᠭᠠ ᠰᠠᠨᠠᠭᠠᠨᠢ ᠣᠨᠳᠣᠣ ᠪᠣᠯᠤᠭᠰᠠᠨ ᠤᠴᠢᠷᠠᠴᠠ ᠵᠠᠷᠢᠮᠨᠢ ᠬᠥᠮᠦᠨ ᠢᠳᠡᠬᠦᠪᠡᠨ ᠪᠠᠢᠵᠤ᠂ ᠰᠠᠢᠨᠢ ᠰᠠᠨᠠᠭᠰᠠᠭᠠᠷ ᠬᠥᠮᠦᠨ ᠪᠣᠯᠵᠤ᠂ ᠵᠢᠩᠬᠢᠨᠢ ᠬᠥᠮᠦᠨ ᠪᠣᠯᠵᠠᠢ᠃᠂ ᠵᠠᠷᠢᠮᠨᠢ ᠮᠥᠨ ᠬᠣᠷᠤᠬᠠᠢ ᠰᠢᠪᠠᠵᠢᠰᠢᠭ᠋ ᠢᠳᠡᠭᠰᠡᠭᠡᠷ ᠪᠠᠢᠨᠠ᠃ ᠵᠠᠷᠢᠮᠨᠢ ᠵᠢᠭᠠᠰᠤ᠂ ᠰᠢᠪᠠᠭᠤ᠂ ᠰᠠᠷᠮᠠᠭᠴᠢᠨ ᠪᠣᠯᠤᠭᠰᠠᠭᠠᠷ ᠤᠯᠠᠮᠢᠶᠠᠷ ᠬᠥᠮᠦᠨ ᠪᠣᠯᠵᠤ ᠬᠤᠪᠢᠷᠠᠪᠠ᠃ ᠵᠠᠷᠢᠮᠨᠢ ᠰᠠᠢᠨᠢ ᠬᠦᠰᠡᠬᠦᠦᠭᠡᠢ᠂ ᠣᠳᠣ ᠪᠣᠯᠲᠠᠯᠠ ᠬᠣᠷᠤᠬᠠᠢ ᠰᠢᠪᠠᠵᠢ ᠬᠡᠪᠢᠶᠡᠷ ᠪᠠᠢᠨᠠ᠃ ᠬᠥᠮᠦᠨ ᠢᠳᠡᠳᠡᠭᠨᠢ ᠬᠥᠮᠦᠨ ᠢᠳᠡᠳᠡᠭᠦᠭᠡᠢᠪᠡᠨ ᠪᠣᠳᠤᠪᠠᠯ ᠶᠠᠭᠤᠲᠠᠢ ᠢᠴᠢᠭᠦᠷᠢᠲᠡᠢ ᠠᠵᠢ᠃ ᠯᠠᠪ ᠬᠣᠷᠤᠬᠠᠢ ᠰᠢᠪᠠᠵᠢ᠂ ᠰᠠᠷᠮᠠᠭᠴᠢᠨᠠᠴᠠ ᠢᠴᠡᠩᠭᠦᠷᠡᠬᠦᠡᠴᠡ ᠬᠣᠯᠠ ᠴᠠᠰᠢ ᠪᠠᠢᠬᠤ ᠠ᠋᠃
《ᠢ ᠶᠠ ᠬᠦᠦᠪᠡᠨ ᠵᠢᠩᠨᠡᠵᠦ᠂ ᠵᠢᠶᠧ ᠵᠧᠦ ᠬᠣᠶᠠᠷ ᠬᠠᠭᠠᠨᠳᠤ ᠢᠳᠡᠭᠦᠯᠦᠭᠰᠡᠨ ᠶᠠᠪᠤᠳᠠᠯ ᠪᠣᠯ ᠪᠦᠷ ᠳᠡᠭᠡᠷᠡ ᠦᠶᠡᠶᠢᠨ ᠬᠡᠷᠡᠭ ᠰᠢᠤ ᠳ᠋ᠠ᠃ ᠫᠠᠨ ᠭᠦ᠋ ᠭᠠᠵᠠᠷ ᠳᠡᠯᠡᠬᠡᠢᠶᠢ ᠲᠣᠭᠲᠠᠭᠠᠭᠰᠠᠨᠠᠴᠠ ᠨᠠᠰᠢ᠂ᠢ ᠶᠠᠶᠢᠨ ᠬᠦᠦ ᠬᠦᠷᠴᠦ ᠢᠷᠡᠲᠡᠯᠡ᠂ᠢ ᠶᠠᠶᠢᠨ ᠬᠦᠦᠡᠴᠡ ᠰᠢᠦᠢ ᠰᠢ ᠯᠢᠨ ᠬᠦᠷᠴᠦ ᠢᠷᠡᠲᠡᠯᠡ᠂ ᠰᠢᠦᠢ ᠰᠢ ᠯᠢᠨᠡᠴᠡ ᠪᠠᠰᠠ ᠯᠠᠩ ᠽᠢ ᠼᠦᠨ ᠲᠣᠰᠭᠤᠨᠳᠤ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠬᠦᠷᠴᠦ ᠢᠷᠡᠲᠡᠯᠡ ᠢᠳᠡᠭᠳᠡᠭᠰᠡᠭᠡᠷ ᠢᠷᠡᠭᠰᠡᠨᠢ ᠬᠡᠨ ᠮᠡᠳᠡᠬᠦ ᠪᠤᠢ᠃ ᠨᠢᠳᠤᠨᠤᠨ ᠬᠣᠲᠠᠳᠤ ᠨᠢᠭᠡ ᠶᠠᠯᠠᠲᠠᠨᠢ ᠴᠠᠭᠠᠵᠠᠪᠠᠷ ᠠᠪᠠᠴᠢᠭᠰᠠᠨᠳᠤ᠂ ᠪᠠᠰᠠ ᠨᠢᠭᠡ ᠠᠭᠤᠰᠭᠢᠨᠤ ᠡᠪᠡᠳᠴᠢᠨᠲᠡᠢ ᠬᠥᠮᠦᠨ ᠲᠡᠭᠦᠨᠦ ᠴᠢᠰᠤᠨᠳᠤ ᠮᠠᠨᠲᠠᠤ ᠳᠥᠷᠦᠵᠦ ᠢᠳᠡᠭᠰᠡᠨᠶᠦᠮ᠃
《ᠲᠡᠳᠡ ᠨᠠᠮᠠᠢ ᠢᠳᠡᠬᠦ ᠭᠡᠵᠦ ᠪᠠᠢᠬᠤᠳᠤ ᠭᠠᠭᠴᠠᠬᠠᠨ ᠴᠢ ᠴᠣᠬᠤᠮ ᠶᠠᠮᠠᠷ ᠠᠷᠭᠠ ᠪᠠᠢᠬᠤ ᠪᠤᠢ᠂ ᠭᠡᠲᠡᠯᠡ ᠲᠡᠷᠡ ᠪᠦᠯᠦᠭᠲᠦ ᠣᠴᠢᠵᠤ ᠣᠷᠤᠳᠠᠭᠴᠢᠨᠢ ᠶᠠᠭᠤᠨ ᠪᠢᠯᠡ? ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠰ ᠶᠠᠭᠤ ᠡᠰᠡ ᠦᠢᠯᠡᠳᠬᠦ ᠪᠢᠯᠡ᠃ ᠲᠡᠳᠡ ᠨᠠᠮᠠᠢ ᠢᠳᠡᠬᠦᠪᠡᠷ ᠪᠠᠷᠠᠬᠤᠦᠭᠡᠢ᠂ ᠴᠢᠮᠠᠢ ᠪᠠᠰᠠ ᠢᠳᠡᠨᠡ᠂ ᠪᠦᠯᠦᠭ ᠳᠣᠲᠤᠷᠠᠪᠠᠨ ᠨᠢᠭᠡ ᠨᠢᠭᠡᠪᠡᠨ ᠬᠦᠷᠲᠡᠯᠡ ᠪᠠᠷᠢᠵᠤ ᠢᠳᠡᠬᠦᠶᠦᠮ᠃ ᠭᠡᠲᠡᠯᠡ ᠬᠡᠷᠪᠡ ᠨᠢᠭᠡᠯᠬᠡᠨ ᠠᠯᠬᠤᠮ ᠡᠷᠭᠢᠵᠦ᠂ ᠳᠣᠣᠷᠠᠪᠠᠨ ᠬᠠᠯᠠᠵᠤ ᠵᠠᠰᠠᠷᠠᠬᠤᠶᠤᠮ ᠪᠣᠯ ᠬᠥᠮᠦᠨ ᠪᠦᠬᠦᠨ ᠠᠮᠤᠷ ᠲᠠᠢᠪᠤᠩ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ᠃ ᠬᠡᠳᠦᠢᠪᠡᠷ ᠤᠤᠯᠠᠴᠠ ᠡᠢᠮᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠥᠨᠥᠳᠦᠷ ᠪᠢᠳᠡ ᠣᠨᠴᠠ ᠰᠠᠢᠨ ᠪᠠᠢᠵᠤ ᠪᠣᠯᠬᠤᠶᠢ ᠴᠢᠳᠠᠬᠤᠦᠭᠡᠢᠯᠠ ᠭᠡᠬᠦᠶᠦᠮ! ᠠᠬᠠ ᠴᠢᠮᠠᠢ ᠯᠠᠪ ᠢᠩᠭᠢᠵᠦ ᠬᠡᠯᠡᠨᠡ ᠭᠡᠵᠦ ᠪᠢ ᠢᠲᠡᠭᠡᠵᠦ ᠪᠠᠢᠨᠠ᠃ ᠤᠷᠢᠳ ᠡᠳᠦᠷ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠢᠷᠡᠵᠦ ᠲᠦᠷᠢᠶᠡᠰᠦᠶᠢ ᠬᠥᠩᠭᠡᠯᠡ ᠭᠡᠰᠡᠨᠳᠦ ᠴᠢ ᠴᠢᠳᠠᠬᠤᠦᠭᠡᠢ ᠭᠡᠰᠡᠨ ᠪᠢᠰᠢᠦᠦ?》
ᠲᠡᠷᠡ ᠡᠬᠢᠯᠡᠭᠡᠳ ᠬᠦᠢᠲᠡᠨᠢᠶᠡᠷ ᠢᠨᠢᠶᠡᠵᠦᠯᠡ ᠪᠠᠢᠭᠰᠠᠨ᠂ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠨᠢᠳᠦᠨᠦ ᠬᠢᠨᠢ ᠬᠠᠷᠠᠴᠠ ᠠᠢᠬᠤᠪᠲᠤᠷ ᠮᠠᠭᠤᠬᠠᠢ ᠪᠣᠯᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠳᠣᠲᠤᠭᠠᠳᠤ ᠨᠢᠭᠤᠴᠠᠶᠢᠨᠢ ᠢᠯᠡᠷᠡᠭᠦᠯᠦᠭᠰᠡᠨᠡᠴᠡ ᠥᠩᠭᠡ ᠵᠢᠰᠦᠨᠢ ᠪᠦᠷ ᠵᠢᠪᠡᠷᠡᠵᠦ ᠬᠠᠷᠠᠯᠠᠪᠠ᠃ ᠬᠠᠭᠠᠯᠭᠠᠨᠤ ᠭᠠᠳᠠᠨᠠ ᠣᠯᠠᠨ ᠬᠥᠮᠦᠨ ᠢᠷᠡᠵᠦ ᠵᠣᠭᠰᠤᠭᠰᠠᠨᠤ ᠳᠣᠲᠤᠷᠠ᠂ ᠵᠣᠣ ᠡᠷᠬᠢᠮ ᠨᠣᠬᠠᠢᠲᠠᠢᠪᠠᠨ ᠬᠠᠮᠲᠤ ᠪᠠᠢᠯᠴᠠᠨᠠ᠃ ᠲᠡᠭᠡᠭᠡᠳ ᠱᠠᠭᠠᠢᠵᠤ ᠴᠢᠩᠨᠠᠭᠰᠠᠭᠠᠷ ᠰᠢᠬᠠᠯᠴᠠᠨ ᠣᠷᠤᠵᠤ ᠢᠷᠡᠪᠡ᠃ ᠵᠠᠷᠢᠮᠨᠢ ᠮᠥᠨ ᠬᠦᠢᠲᠡᠨ ᠬᠥᠬᠡ ᠴᠢᠷᠠᠢᠯᠠᠵᠤ ᠠᠮᠠ ᠳᠠᠷᠪᠠᠢᠨ ᠢᠨᠢᠶᠡᠨᠡ᠃ ᠡᠳᠡ ᠪᠣᠯ ᠴᠥᠮ ᠬᠥᠮᠦᠨ ᠢᠳᠡᠳᠡᠭ ᠨᠢᠭᠡ ᠨᠠᠮᠤᠨ ᠠᠮᠢᠲᠠᠨ ᠭᠡᠵᠦ ᠪᠢ ᠮᠡᠳᠡᠪᠡ᠃ ᠭᠡᠲᠡᠯᠡ ᠲᠡᠳᠡᠨᠦ ᠪᠣᠳᠤᠯᠭᠠ ᠰᠠᠨᠠᠭᠠᠨᠢ ᠠᠩᠭᠢᠳᠠ ᠥᠭᠡᠷᠡ ᠪᠠᠢᠬᠤᠶᠢ ᠪᠢ ᠪᠠᠰᠠ ᠮᠡᠳᠡᠯᠡ᠃ ᠨᠢᠭᠡ ᠪᠦᠯᠦᠭᠨᠢ ᠶᠡᠷᠦᠡᠴᠡ ᠡᠢᠮᠦᠯᠡ ᠪᠠᠢᠭᠰᠠᠨ᠂ ᠢᠳᠡᠬᠦᠯᠡ ᠶᠣᠰᠤᠲᠠᠢ ᠭᠡᠵᠦ ᠰᠠᠨᠠᠨᠠ᠃ ᠨᠥᠭᠦᠭᠡ ᠪᠦᠯᠦᠭᠨᠢ ᠢᠳᠡᠬᠦ ᠶᠣᠰᠤᠦᠭᠡᠢ ᠭᠡᠭᠴᠢᠶᠢ ᠮᠡᠳᠡᠬᠦ ᠪᠣᠯᠪᠠᠴᠤ ᠮᠥᠨ ᠢᠳᠡᠬᠦᠶᠢ ᠬᠦᠰᠡᠬᠦ ᠪᠥᠭᠡᠳ ᠪᠠᠰᠠ ᠪᠤᠰᠤᠳᠲᠤ ᠮᠡᠳᠡᠭᠳᠡᠬᠦᠡᠴᠡᠪᠡᠨ ᠠᠶᠤᠨᠠ᠃ ᠲᠡᠢᠨᠬᠦ ᠮᠢᠨᠦ ᠦᠭᠡᠶᠢ ᠰᠣᠨᠤᠰᠤᠭᠠᠳ ᠨᠡᠩ ᠶᠡᠬᠡ ᠠᠭᠤᠷᠯᠠᠬᠤ ᠪᠣᠯᠪᠠᠴᠤ ᠠᠮᠠᠪᠠᠨ ᠠᠩᠭᠠᠢᠵᠤ ᠬᠦᠢᠲᠡᠨᠢᠶᠡᠷ ᠢᠨᠢᠶᠡᠨᠡ᠃
ᠢᠩᠭᠢᠲᠡᠯᠡ ᠠᠬᠠ ᠪᠠᠰᠠ ᠭᠡᠨᠡᠳᠲᠡ ᠬᠡᠷᠴᠡᠭᠡᠢ ᠴᠢᠷᠠᠢᠯᠠᠵᠤ ᠶᠡᠬᠡ ᠳᠠᠭᠤᠨᠢᠶᠠᠷ:
《ᠭᠠᠷᠴᠠᠭᠠ! ᠭᠠᠯᠵᠠᠭᠤ ᠠᠮᠢᠲᠠᠨᠤ ᠶᠠᠭᠤᠶᠢᠨᠢ ᠦᠵᠡᠨᠡ ᠪᠤᠢ!》 ᠭᠡᠵᠦ ᠵᠠᠩᠳᠤᠷᠪᠠ᠃
ᠡᠨᠡ ᠦᠶᠡᠳᠦ ᠪᠢ ᠲᠡᠳᠡᠨᠦ ᠪᠠᠰᠠ ᠨᠢᠭᠡ ᠵᠠᠯᠢᠬᠠᠢ ᠮᠡᠬᠡᠶᠢ ᠣᠯᠵᠤ ᠮᠡᠳᠡᠯᠡ᠃ ᠲᠡᠳᠡ ᠬᠠᠯᠠᠵᠤ ᠵᠠᠰᠠᠷᠠᠬᠤᠶᠢ ᠬᠦᠰᠡᠬᠦᠦᠭᠡᠢ ᠮᠥᠷᠲᠡᠭᠡᠨ ᠬᠠᠷᠢᠨ ᠨᠠᠳᠠ ᠭᠠᠯᠵᠠᠭᠤ ᠨᠡᠷᠡ ᠵᠡᠭᠦᠯᠭᠡᠬᠦᠪᠡᠷ ᠬᠡᠳᠦᠢᠨ ᠪᠡᠯᠡᠳᠦᠭᠰᠡᠨ ᠪᠠᠢᠵᠠᠢ᠃ ᠢᠩᠭᠢᠪᠡᠯ ᠬᠣᠵᠢᠮ ᠪᠠᠷᠢᠵᠤ ᠢᠳᠡᠭᠰᠡᠨᠴᠦ ᠬᠡᠷᠡᠭ ᠭᠠᠷᠬᠤᠦᠭᠡᠢ ᠪᠠᠰᠠ ᠲᠠᠯᠠ ᠣᠯᠵᠤ ᠮᠡᠳᠡᠬᠦᠶᠦᠮ᠃ ᠠᠢᠯ ᠣᠯᠠᠨᠢᠶᠠᠷ ᠨᠢᠭᠡᠨ ᠮᠠᠭᠤ ᠬᠥᠮᠦᠨ ᠪᠠᠷᠢᠵᠤ ᠢᠳᠡᠯᠡ ᠭᠡᠵᠦ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠬᠡᠯᠡᠭᠰᠡᠨᠨᠢ ᠶᠠᠭᠯᠠ ᠡᠨᠡ ᠠᠷᠭᠠᠶᠤᠮ ᠰᠢᠤ᠃ ᠡᠨᠡ ᠪᠣᠯ ᠲᠡᠳᠡᠨᠦ ᠰᠤᠷᠮᠠᠭᠠᠢ ᠠᠷᠭᠠᠶᠤᠮ!
ᠴᠧᠨ ᠯᠣᠣ ᠦ᠋ ᠪᠠᠰᠠ ᠠᠭᠤᠷᠲᠠᠢ ᠰᠢᠭᠤᠳ ᠣᠷᠤᠵᠤ ᠢᠷᠡᠪᠡ᠃ ᠮᠢᠨᠦ ᠠᠮᠠᠶᠢ ᠲᠠᠭᠯᠠᠵᠤ ᠴᠢᠳᠠᠬᠤ ᠪᠤᠢ᠂ ᠪᠢ ᠵᠣᠷᠢᠭᠤᠳᠠ ᠲᠡᠳᠡᠨᠦ ᠵᠦᠭ:
《ᠲᠠᠨᠠᠷ ᠵᠠᠰᠠᠷᠠᠵᠤ ᠦᠵᠡ᠂ ᠦᠨᠡᠨ ᠰᠡᠳᠭᠢᠯ ᠡᠴᠡᠭᠡᠨ ᠵᠠᠰᠠᠷᠠᠬᠤ ᠬᠡᠷᠡᠭᠲᠡᠢ! ᠬᠣᠵᠢᠮ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠪᠠᠢᠯᠭᠠᠬᠤᠦᠭᠡᠢ ᠭᠡᠭᠴᠢᠶᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ᠃
《ᠲᠠᠨᠠᠷ ᠵᠠᠰᠠᠷᠠᠬᠤᠦᠭᠡᠢᠴᠤ ᠭᠡᠰᠡᠨ ᠨᠢᠭᠡᠨᠢ ᠨᠢᠭᠡᠪᠡᠨ ᠢᠳᠡᠵᠦ ᠳᠠᠭᠤᠰᠤᠨᠠ᠂ ᠴᠢᠨᠤᠠ ᠠᠩᠴᠢᠨᠳᠤ ᠠᠯᠠᠭᠳᠠᠵᠤ ᠳᠠᠭᠤᠰᠬᠤᠲᠠᠢ ᠠᠳᠠᠯᠢ! ᠬᠣᠷᠤᠬᠠᠢᠲᠠᠢ ᠠᠳᠠᠯᠢ᠂ ᠵᠢᠩᠬᠢᠨᠢ ᠬᠥᠮᠦᠨᠳᠦ ᠤᠰᠠᠳᠭᠠᠭᠳᠠᠨᠠ!》 ᠭᠡᠪᠡ᠃
ᠲᠡᠳᠡ ᠴᠥᠮ ᠴᠧᠨ ᠯᠣᠣ ᠦ᠋ᠳᠦ ᠬᠥᠭᠡᠭᠡᠭᠳᠡᠵᠦ ᠶᠠᠪᠤᠪᠠ᠃ ᠠᠬᠠᠴᠤ ᠦᠵᠡᠭᠳᠡᠬᠦᠦᠭᠡᠢ ᠪᠣᠯᠪᠠ᠃ ᠴᠧᠨ ᠯᠣᠣ ᠦ᠋ ᠨᠠᠮᠠᠢ ᠭᠡᠷᠲᠦ ᠱᠠᠯᠠᠵᠤ ᠣᠷᠤᠭᠤᠯᠪᠠ᠃ ᠭᠡᠷ ᠳᠣᠲᠤᠷᠠ ᠫᠠᠳ ᠬᠠᠷᠠᠩᠭᠤᠢ᠂ ᠪᠠᠢᠰᠢᠩᠤᠨ ᠨᠢᠷᠤᠭᠤ ᠪᠠ ᠤᠨᠢ ᠴᠥᠮ ᠲᠣᠯᠤᠭᠠᠢ ᠳᠡᠭᠡᠷᠡ ᠴᠡᠴᠡᠷᠡᠨᠡ᠃ ᠲᠦᠷ ᠴᠡᠴᠡᠷᠡᠵᠦ ᠪᠠᠢᠭᠰᠠᠨᠢᠶᠠᠨ ᠪᠦᠳᠦᠭᠦᠷᠡᠭᠰᠡᠭᠡᠷ ᠮᠢᠨᠦ ᠳᠡᠭᠡᠷᠡ ᠢᠷᠡᠵᠦ ᠣᠪᠤᠭᠠᠷᠠᠪᠠ᠃
ᠪᠡᠶᠡ ᠬᠥᠳᠡᠯᠬᠦᠶᠢᠨ ᠠᠷᠭᠠᠦᠭᠡᠢ ᠠᠰᠤᠷᠤ ᠬᠦᠨᠳᠦ ᠪᠠᠢᠪᠠ᠃ ᠨᠠᠮᠠᠢ ᠳᠠᠷᠤᠵᠤ ᠠᠯᠠᠬᠤ ᠭᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠡᠨᠡ ᠬᠦᠨᠳᠦᠨᠢ ᠬᠤᠳᠠᠯ ᠭᠡᠵᠦ ᠪᠢ ᠮᠡᠳᠡᠭᠡᠳ ᠲᠡᠯᠴᠢᠯᠡᠭᠰᠡᠭᠡᠷ ᠭᠠᠷᠴᠤ ᠢᠷᠡᠪᠡ᠃ ᠪᠡᠶᠡ ᠳᠦᠭᠦᠷᠡᠩ ᠬᠥᠯᠦᠰᠦ ᠭᠠᠷᠴᠠᠢ᠃ ᠭᠡᠪᠡᠴᠦ ᠪᠢ ᠵᠣᠷᠢᠭᠤᠳᠠ:
《ᠲᠠᠨᠠᠷ ᠲᠦᠷᠭᠡᠬᠡᠨ ᠵᠠᠰᠠᠷᠠᠵᠤ ᠦᠵᠡ᠂ ᠦᠨᠡᠨ ᠰᠡᠳᠭᠢᠯᠡᠴᠡᠪᠡᠨ ᠵᠠᠰᠠᠷᠠᠬᠤ ᠬᠡᠷᠡᠭᠲᠡᠢ! ᠬᠣᠵᠢᠮ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠪᠠᠢᠯᠭᠠᠬᠤᠦᠭᠡᠢ ᠭᠡᠭᠴᠢᠶᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ ᠁》 ᠭᠡᠪᠡ᠃
ᠠᠷᠪᠠᠨ ᠨᠢᠭᠡ
ᠨᠠᠷᠠᠴᠤ ᠭᠠᠷᠬᠤᠦᠭᠡᠢ᠂ ᠡᠭᠦᠳᠡᠴᠦ ᠨᠡᠭᠡᠭᠡᠭᠳᠡᠬᠦᠦᠭᠡᠢ᠂ ᠡᠳᠦᠷᠲᠦᠷ ᠬᠣᠶᠠᠷ ᠴᠠᠭᠤᠨ ᠬᠣᠭᠤᠯᠠ᠃
ᠪᠢ ᠰᠠᠪᠬᠠ ᠪᠠᠷᠢᠮᠠᠭᠴᠠ ᠠᠬᠠᠪᠠᠨ ᠰᠠᠨᠠᠪᠠ᠃ ᠥᠬᠢᠨ ᠳᠡᠭᠦᠦᠶᠢᠨᠮᠢᠨᠢ ᠦᠬᠦᠭᠰᠡᠨ ᠰᠢᠯᠲᠠᠭᠠᠨ ᠮᠥᠨᠴᠦ ᠲᠡᠭᠦᠨᠳᠦ ᠪᠠᠢᠭᠠ ᠭᠡᠭᠴᠢᠶᠢ ᠪᠢ ᠮᠡᠳᠡᠨᠡ᠃ ᠲᠡᠷᠡ ᠦᠶᠡᠳᠦ ᠥᠬᠢᠨ ᠳᠡᠭᠦᠦᠮᠢᠨᠢ ᠲᠠᠪᠤᠬᠠᠨ ᠨᠠᠰᠤᠲᠠᠢ ᠪᠠᠢᠵᠤ ᠪᠢᠯᠡ᠂ ᠬᠣᠩᠭᠤᠷ ᠬᠥᠭᠡᠷᠦᠬᠦᠨ ᠪᠠᠢᠳᠠᠯᠨᠢ ᠣᠳᠣᠴᠤ ᠨᠢᠳᠦᠨᠳᠦ ᠬᠡᠪᠢᠶᠡᠷᠢᠶᠡᠨ ᠬᠠᠷᠠᠭᠳᠠᠭᠰᠠᠭᠠᠷ᠃ ᠡᠵᠢᠮᠢᠨᠢ ᠤᠬᠢᠯᠠᠭᠠᠳ ᠪᠣᠯᠬᠤᠦᠭᠡᠢ ᠪᠠᠢᠬᠤᠦᠭᠡᠢ ᠪᠠᠢᠬᠤᠳᠤ ᠠᠬᠠ ᠬᠠᠷᠢᠨ ᠡᠵᠢᠶᠢᠨ ᠤᠬᠢᠯᠠᠬᠤᠶᠢ ᠬᠣᠷᠢᠨᠠ᠃ ᠥᠪᠡᠷᠢᠶᠡᠨ ᠪᠠᠷᠢᠭᠠᠳ ᠢᠳᠡᠴᠢᠬᠡᠭᠰᠡᠨ ᠲᠤᠯᠠ ᠤᠬᠢᠯᠠᠬᠤᠯᠠᠷ ᠳᠣᠲᠤᠷᠠᠨᠢ ᠡᠪᠦᠭᠡᠢ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ᠂ ᠬᠡᠷᠪᠡ ᠪᠠᠰᠠ ᠡᠪ ᠦᠭᠡᠢᠳᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠁
ᠥᠬᠢᠨ ᠳᠡᠭᠦᠦᠮᠢᠨᠢ ᠠᠬᠠᠳᠤ ᠢᠳᠡᠭᠳᠡᠵᠡᠢ᠃ ᠡᠵᠢ ᠮᠡᠳᠡᠭᠰᠡᠨ ᠡᠰᠡᠬᠦᠶᠢ ᠪᠢ ᠬᠠᠷᠢᠨ ᠮᠡᠳᠡᠬᠦᠦᠭᠡᠢ᠃
ᠪᠣᠳᠤᠪᠠᠯ ᠡᠵᠢ ᠪᠠᠰᠠ ᠮᠡᠳᠡᠬᠦ ᠪᠠᠢᠯᠭᠦᠢ᠂ ᠭᠡᠪᠡᠴᠦ ᠤᠬᠢᠯᠠᠵᠤ ᠭᠠᠰᠠᠯᠬᠤᠳᠠᠭᠠᠨ ᠶᠠᠭᠤᠮᠠ ᠶᠠᠷᠢᠬᠤᠦᠭᠡᠢ ᠪᠠᠢᠭᠰᠠᠨᠠᠴᠠ ᠦᠵᠡᠪᠡᠯ ᠪᠠᠰᠠ ᠵᠦᠢᠲᠡᠢ ᠭᠡᠵᠦ ᠪᠣᠳᠤᠭᠰᠠᠨᠴᠤ ᠪᠠᠢᠵᠤ ᠮᠡᠳᠡᠨᠡ᠃ ᠨᠠᠮᠠᠢ ᠳᠥᠷᠪᠡ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠬᠤᠳᠤ ᠪᠢᠯᠡ᠂ ᠪᠠᠢᠰᠢᠩᠤᠨ ᠡᠮᠦᠨᠡ ᠰᠡᠷᠢᠭᠦᠴᠡᠨ ᠰᠠᠭᠤᠲᠠᠯᠠ ᠮᠠᠨᠤ ᠠᠬᠠ᠂ ᠡᠴᠢᠭᠡ ᠡᠬᠡᠨᠢ ᠡᠪᠡᠳᠪᠡᠯ ᠬᠡᠦᠬᠡᠳᠨᠢ ᠮᠢᠬᠠᠨᠠᠴᠠᠪᠠᠨ ᠨᠢᠭᠡ ᠵᠦᠰᠦᠮ ᠣᠭᠲᠤᠯᠵᠤ ᠠᠪᠤᠭᠠᠳ ᠴᠢᠨᠠᠵᠤ ᠢᠳᠡᠭᠦᠯᠬᠦ ᠶᠣᠰᠤᠲᠠᠢ᠂ ᠢᠩᠭᠢᠪᠡᠯ ᠰᠠᠶᠢ ᠰᠠᠢᠨ ᠬᠥᠮᠦᠨᠶᠦᠮ ᠭᠡᠵᠡᠢ᠃ ᠡᠵᠢ ᠪᠠᠰᠠ ᠪᠣᠯᠬᠤᠦᠭᠡᠢ ᠭᠡᠰᠡᠨᠦᠭᠡᠢᠶᠦᠮ᠃ ᠨᠢᠭᠡ ᠵᠦᠰᠦᠮ ᠢᠳᠡᠵᠦ ᠪᠣᠯᠪᠠᠯ ᠪᠦᠬᠦᠯᠢᠪᠡᠷᠨᠢ ᠢᠳᠡᠵᠦ ᠪᠣᠯᠬᠤᠨᠢ ᠪᠠᠰᠠ ᠶᠠᠷᠢᠶᠠᠨᠦᠭᠡᠢ᠃ ᠭᠡᠪᠡᠴᠦ ᠲᠡᠷᠡ ᠡᠳᠦᠷᠦᠨ ᠤᠬᠢᠯᠠᠬᠤ ᠶᠠᠩᠵᠤᠶᠢᠨᠢ ᠪᠣᠳᠤᠪᠠᠯ ᠦᠨᠡᠬᠡᠷᠴᠦ ᠡᠯᠢᠭᠡ ᠡᠮᠲᠡᠷᠡᠮᠡᠷ᠂ ᠡᠨᠡ ᠦᠨᠡᠬᠡᠷ ᠲᠤᠢᠯᠤᠨ ᠵᠢᠭᠲᠡᠢ ᠬᠡᠷᠡᠭ ᠡ!
ᠠᠷᠪᠠᠨ ᠬᠣᠶᠠᠷ
ᠴᠠᠰᠢ ᠪᠣᠳᠤᠵᠤ ᠪᠣᠯᠬᠤᠦᠭᠡᠢ ᠪᠣᠯᠵᠠᠢ᠃
ᠳᠥᠷᠪᠡᠨ ᠮᠢᠩᠭᠠᠨ ᠵᠢᠯᠦᠨ ᠲᠤᠷᠰᠢ ᠦᠶᠡ ᠤᠯᠠᠷᠢᠨ ᠢᠷᠡᠭᠰᠡᠨ ᠭᠠᠵᠠᠷ᠂ ᠪᠢᠴᠦ ᠮᠥᠨ ᠣᠯᠠᠨ ᠵᠢᠯ ᠳᠤᠮᠳᠠᠨᠢ ᠬᠤᠳᠭᠤᠯᠳᠤᠭᠰᠠᠭᠠᠷ ᠢᠷᠡᠯᠡ ᠭᠡᠭᠴᠢᠪᠡᠨ ᠥᠨᠥᠳᠦᠷ ᠣᠯᠵᠤ ᠮᠡᠳᠡᠯᠡ᠃ ᠶᠠᠭ ᠠᠬᠠᠶᠢ ᠭᠡᠷᠦᠨ ᠬᠡᠷᠡᠭ ᠡᠷᠬᠢᠯᠡᠵᠦ ᠪᠠᠢᠭᠰᠠᠨ ᠲᠡᠷᠡ ᠦᠶᠡᠳᠦ ᠳᠡᠭᠦᠦᠮᠢᠨᠢ ᠦᠬᠦᠭᠰᠡᠨ ᠲᠤᠯᠠ ᠪᠤᠳᠠᠭᠠ ᠨᠣᠭᠤᠭᠠᠨᠳᠤ ᠬᠣᠯᠢᠭᠳᠠᠵᠤ ᠪᠢᠳᠡᠨᠳᠦ ᠮᠡᠳᠡᠭᠳᠡᠯᠦᠭᠡᠢᠪᠡᠷ ᠢᠳᠡᠭᠳᠡᠭᠰᠡᠨᠦᠭᠡᠢ ᠭᠡᠵᠦ ᠶᠠᠭᠠᠬᠢᠵᠤ ᠬᠡᠯᠡᠵᠦ ᠮᠡᠳᠡᠬᠦ ᠪᠤᠢ᠃
ᠪᠢ ᠥᠬᠢᠨ ᠳᠡᠭᠦᠦᠶᠢᠨᠢᠶᠡᠨ ᠮᠢᠬᠠᠶᠢ ᠰᠠᠨᠠᠮᠰᠠᠷᠦᠭᠡᠢᠪᠠᠷ ᠬᠡᠳᠦᠨ ᠬᠡᠰᠡᠭ ᠢᠳᠡᠭᠰᠡᠨᠦᠭᠡᠢ ᠭᠡᠵᠦ ᠶᠠᠭᠠᠬᠢᠵᠤ ᠬᠡᠯᠡᠵᠦ ᠮᠡᠳᠡᠬᠦ ᠪᠤᠢ᠃ ᠣᠳᠣ ᠬᠠᠷᠢᠨ ᠮᠢᠨᠦ ᠳᠡᠭᠡᠷᠡ ᠬᠦᠷᠦᠭᠡᠳ ᠢᠷᠡᠯᠡ ᠁
ᠳᠥᠷᠪᠡᠨ ᠮᠢᠩᠭᠠᠨ ᠵᠢᠯᠦᠨ ᠬᠥᠮᠦᠨ ᠢᠳᠡᠭᠰᠡᠨ ᠲᠡᠦᠬᠡᠲᠡᠢ ᠪᠢ᠂ ᠵᠢᠩᠬᠢᠨᠢ ᠬᠥᠮᠦᠨ ᠮᠥᠨ ᠭᠡᠬᠦᠳᠦ ᠪᠡᠷᠬᠡ ᠭᠡᠭᠴᠢᠪᠡᠨ ᠲᠡᠷᠡ ᠦᠶᠡᠳᠦ ᠮᠡᠳᠡᠬᠦᠦᠭᠡᠢ ᠪᠠᠢᠭᠰᠠᠨᠴᠤ ᠣᠳᠣ ᠮᠡᠳᠡᠯᠡ!
ᠠᠷᠪᠠᠨ ᠭᠤᠷᠪᠠ
ᠬᠥᠮᠦᠨᠢ ᠢᠳᠡᠭᠡᠳᠦᠢ ᠬᠡᠦᠬᠡᠳ ᠪᠠᠰᠠ ᠪᠠᠢᠬᠤᠶᠤᠮᠤᠤ?
ᠬᠡᠦᠬᠡᠳᠢ ᠠᠪᠤᠷᠠᠬᠤᠰᠠᠨ ᠁
1918 ᠣᠨᠤ ᠳᠥᠷᠪᠡᠳᠦᠭᠡᠷ ᠰᠠᠷᠠ