| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠪᠣᠯᠤᠷ ᠴᠣᠮᠣᠨᠳᠤ ᠰᠥᠩᠨᠡᠭᠰᠡᠨ ᠷᠠᠰᠢᠶᠠᠨ ᠬᠤᠷᠠᠰᠢᠭ᠋ ᠲᠤᠩᠭᠠᠯᠠᠭ ᠪᠢᠴᠢᠬᠠᠨ ᠲᠣᠭᠤᠷᠢᠮ ᠨᠠᠭᠤᠷᠤᠨ ᠤᠰᠤᠨᠳᠤ᠂ ᠬᠥᠪᠡᠭᠡᠨᠦ ᠬᠢᠨᠢ ᠡᠪᠡᠰᠦ ᠮᠣᠳᠤᠨᠤ ᠨᠠᠮᠠᠭᠠᠨᠤᠭᠤᠳ ᠳᠡᠭᠦᠵᠢᠯᠡᠭᠳᠡᠨ ᠤᠷᠭᠤᠭᠰᠠᠨᠰᠢᠭ᠋ ᠲᠤᠨᠤᠷᠠᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡᠬᠦ ᠮᠣᠳᠤᠳᠤᠨ ᠬᠣᠭᠤᠷᠤᠨᠳᠤᠭᠤᠷ ᠬᠠᠯᠵᠠᠨ ᠪᠣᠷᠤ ᠳᠠᠭᠠ ᠳᠠᠭᠠᠭᠤᠯᠤᠭᠰᠠᠨ ᠬᠥᠬᠦᠯᠲᠡᠢ ᠽᠠᠨᠳᠠᠨ ᠬᠦᠷᠡᠩ ᠠᠭᠲᠠ᠂ ᠲᠣᠯᠤᠭᠠᠢᠪᠠᠷᠢᠶᠠᠨ ᠨᠠᠭᠠᠳᠤᠨ ᠢᠳᠡᠰᠢᠯᠡᠬᠦᠨᠢ ᠶᠠᠭᠯᠠ ᠰᠢᠯ ᠰᠠᠪᠠ ᠳᠣᠲᠤᠷᠠᠬᠢ ᠠᠯᠲᠠᠨ ᠵᠢᠭᠠᠰᠤ ᠳᠡᠭᠡᠭᠰᠢ ᠳᠣᠷᠤᠭᠰᠢᠪᠠᠨ ᠢᠷᠠᠭᠠᠯᠠᠨ ᠱᠤᠩᠪᠠᠬᠤᠰᠢᠭ᠋ ᠰᠡᠭᠦᠳᠡᠷᠯᠡᠭᠳᠡᠵᠦ ᠦᠵᠡᠭᠳᠡᠪᠡ᠃ ᠬᠠᠶᠠ ᠨᠢᠭᠡ ᠮᠣᠳᠤᠨᠤ ᠨᠠᠮᠠᠭᠠᠠᠴᠠ ᠱᠠᠭᠰᠢᠷᠠᠨ ᠨᠢᠰᠬᠦ ᠱᠠᠭᠠᠵᠠᠭᠠᠢᠶᠢᠨ ᠳᠠᠭᠤᠨᠳᠤ ᠽᠠᠨᠳᠠᠨ ᠬᠦᠷᠡᠩ ᠰᠣᠴᠢᠰᠬᠢᠮᠠᠭᠴᠠ ᠬᠥᠯ ᠳᠣᠣᠷᠠᠠᠴᠠᠨᠢ ᠪᠥᠮᠪᠦᠷᠢᠭᠰᠡᠨ ᠬᠠᠢᠷ ᠴᠢᠯᠠᠭᠤᠨᠤᠭᠤᠳ ᠲᠣᠭᠤᠷᠢᠮᠤᠨ ᠤᠰᠤᠨᠳᠤ 《ᠫᠣᠯ ᠴᠤᠯ》 ᠳᠤᠤᠭᠠᠷᠤᠨ ᠤᠨᠠᠵᠤ᠂ ᠪᠢᠴᠢᠬᠠᠨ ᠴᠠᠭᠠᠷᠢᠭᠤᠳ ᠨᠠᠮ ᠨᠠᠮ ᠡᠷᠭᠢᠯᠳᠦᠭᠰᠡᠭᠡᠷ ᠳᠠᠯᠳᠠ ᠣᠷᠤᠵᠤ ᠷᠠᠰᠢᠶᠠᠨ ᠬᠤᠷᠠᠶᠢ ᠤᠤᠯ ᠬᠡᠪᠲᠦᠨᠢ ᠪᠣᠯᠭᠠᠵᠤ ᠪᠠᠢᠪᠠ᠃
ᠣᠨᠤᠭᠤ ᠲᠠᠲᠠᠭᠰᠠᠨ ᠲᠡᠭ ᠳᠥᠷᠪᠡᠯᠵᠢᠨ ᠬᠣᠨᠳᠤᠯᠠᠢᠲᠠᠢ ᠽᠠᠨᠳᠠᠨ ᠬᠦᠷᠡᠩ᠂ ᠬᠠᠯᠵᠠᠨ ᠪᠣᠷᠤᠶᠢ ᠦᠨᠦᠷᠲᠦᠬᠦᠳᠦ ᠨᠥᠭᠦᠭᠡᠨᠢ ᠢᠪᠢᠯᠦᠭᠰᠡᠨ ᠬᠥᠬᠦᠪᠡᠨ ᠰᠣᠷᠤᠵᠤ ᠪᠠᠢᠭᠠ ᠬᠤᠰᠠᠷᠠᠩ ᠰᠠᠷᠪᠠᠰᠢᠭ᠋ ᠳᠤᠭ ᠲᠠᠯᠪᠢᠭᠰᠠᠨ ᠰᠡᠭᠦᠯᠢᠶᠡᠨ ᠪᠠᠢᠨ ᠪᠠᠢᠨ ᠰᠢᠷᠪᠠᠵᠤ ᠵᠣᠭᠰᠤᠨᠠ᠃ ᠭᠡᠲᠡᠯᠡ 《ᠫᠢᠩ ᠫᠢᠩ》 ᠭᠡᠵᠦ ᠴᠤᠤᠷᠢᠶᠠᠲᠤᠭᠰᠠᠨ ᠬᠠᠳᠠᠨᠤ ᠱᠤᠤᠭᠢᠶᠠᠶᠢ ᠠᠨᠢᠷᠯᠠᠭᠰᠠᠨ ᠽᠠᠨᠳᠠᠨ ᠬᠦᠷᠡᠩ᠂ ᠥᠨᠳᠦᠷ ᠥᠭᠡᠳᠡ ᠠᠪᠠᠷᠢᠵᠤ᠂ ᠬᠦᠵᠦᠭᠦᠦᠪᠡᠨ ᠰᠤᠩᠭᠠᠨ ᠴᠢᠬᠢᠪᠡᠨ ᠰᠣᠯᠪᠢᠴᠠᠭᠤᠯᠵᠤ ᠬᠡᠳᠦᠨ ᠬᠡᠰᠡᠭ ᠬᠣᠮᠤᠯ ᠤᠨᠠᠭᠠᠭᠠᠳ ᠦᠨᠦᠷᠲᠦᠭᠰᠡᠨᠢᠶᠡᠨ ᠪᠠᠢᠵᠤ᠂ ᠬᠠᠮᠠᠷᠢᠶᠠᠨ ᠰᠡᠷᠲᠡᠯᠵᠡᠭᠦᠯᠦᠨ ᠦᠦᠷᠰᠡᠭᠡᠳ ᠬᠠᠯᠵᠠᠨ ᠪᠣᠷᠤᠶᠢ ᠲᠣᠯᠤᠭᠠᠢᠪᠠᠷᠢᠶᠠᠨ ᠨᠥᠷᠢᠨ ᠳᠠᠪᠬᠢᠵᠤ ᠲᠣᠭᠤᠷᠢᠮᠤᠨ ᠵᠡᠭᠦᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠡᠷᠭᠢᠨ ᠵᠣᠭᠰᠤᠪᠠ᠃ ᠲᠣᠮᠤᠭᠠᠦᠭᠡᠢ ᠳᠠᠭᠠ ᠵᠠᠯᠬᠠᠭᠤᠷᠠᠭᠰᠠᠨ ᠮᠠᠶᠢ᠍ᠭᠲᠠᠢ ᠽᠠᠨᠳᠠᠨ ᠬᠦᠷᠡᠩᠢ ᠬᠦᠬᠦᠲᠦᠨᠡᠨ ᠳᠠᠭᠤᠳᠠᠵᠤ᠂ ᠤᠰᠤᠨᠤ ᠠᠮᠢᠰᠭᠤᠯᠢᠶᠠᠷ ᠤᠷᠭᠤᠭᠰᠠᠨ ᠰᠡᠷᠭᠦᠯᠡᠩ ᠬᠠᠷᠠ ᠬᠢᠶᠠᠭᠢ ᠳᠤᠷᠠᠲᠠᠢ ᠳᠤᠷᠠᠦᠭᠡᠢ ᠴᠢᠮᠬᠢᠯᠡᠵᠦ ᠪᠠᠢᠪᠠ᠃
ᠵᠠᠳᠠᠭᠠᠢᠪᠠᠷ ᠬᠥᠮᠦᠨᠦ ᠭᠠᠷᠲᠤ ᠣᠷᠤᠬᠤ ᠪᠠᠢᠲᠤᠭᠠᠢ ᠥᠷᠦᠭᠡᠯ ᠴᠢᠳᠦᠷᠲᠡᠢᠴᠦ ᠭᠡᠰᠡᠨ ᠡᠵᠡᠨᠡᠴᠡᠪᠡᠨ ᠥᠭᠡᠷᠡ ᠬᠥᠮᠦᠨᠳᠦ ᠪᠠᠷᠢᠭᠳᠠᠳᠠᠭ ᠵᠠᠩᠦᠭᠡᠢ 《ᠣᠷᠤᠭᠠ》 ᠴᠣᠯᠠᠲᠠᠢ ᠽᠠᠨᠳᠠᠨ ᠬᠦᠷᠡᠩ ᠰᠡᠭᠦᠯᠢᠶᠡᠨ ᠬᠠᠳᠭᠤᠨ ᠴᠢᠨᠠᠭᠰᠢ ᠳᠠᠪᠬᠢᠬᠤ ᠭᠡᠰᠡᠨᠢᠶᠡᠨ ᠪᠣᠯᠢᠭᠠᠳ ᠭᠡᠳᠡᠷᠭᠦ ᠬᠠᠯᠵᠠᠨ ᠪᠣᠷᠤᠶᠢᠨ ᠳᠡᠷᠭᠡᠳᠡ ᠳᠠᠪᠬᠢᠵᠤ ᠢᠷᠡᠪᠡ᠃ 《ᠬᠦᠢ! ᠲᠠᠷᠢᠬᠢᠦᠭᠡᠢᠮᠢᠨᠢ!》 ᠭᠡᠬᠦᠰᠢᠭ ᠴᠢᠬᠢᠪᠡᠨ ᠬᠤᠯᠮᠠᠢᠨ ᠣᠴᠢᠵᠤ ᠳᠣᠭᠳᠤᠭᠤᠷ ᠰᠡᠭᠦᠯᠡᠴᠡᠨᠢ ᠬᠠᠵᠠᠬᠤ ᠭᠡᠳ ᠬᠥᠭᠡᠷᠦᠬᠦᠢᠯᠡᠭᠰᠡᠨ ᠪᠣᠯᠤᠯᠲᠠᠢ ᠳᠠᠬᠢᠨ ᠤᠷᠢᠳᠠᠬᠢᠲᠠᠢᠪᠠᠨ ᠠᠳᠠᠯᠢ ᠵᠡᠭᠦᠨ ᠬᠥᠪᠡᠭᠡ ᠥᠭᠡᠳᠡ ᠲᠣᠩᠭᠤᠴᠢᠨ ᠳᠠᠪᠬᠢᠭᠠᠳ ᠡᠷᠭᠢᠨ ᠬᠠᠷᠠᠨᠠ᠃ 《ᠨᠠᠮᠠᠢ ᠳᠣᠮᠤᠭᠯᠠᠵᠤ ᠪᠠᠢᠨᠠ》 ᠭᠡᠬᠦᠰᠢᠭ ᠬᠠᠯᠵᠠᠨ ᠪᠣᠷᠤ ᠳᠠᠭᠠ ᠯᠠᠪᠲᠠᠢᠨ ᠬᠡᠪᠲᠡᠵᠦ ᠬᠥᠷᠪᠡᠭᠰᠡᠭᠡᠷ ᠪᠠᠢᠯᠠ᠃ ᠽᠠᠨᠳᠠᠨ ᠬᠦᠷᠡᠩ ᠡᠨᠡ ᠮᠡᠲᠦ ᠨᠡᠯᠢᠶᠡᠳ ᠬᠣᠯᠬᠢᠵᠠᠢ᠃
《ᠫᠢᠩ᠂ ᠫᠢᠩ᠂ ᠫᠢᠩ᠂ ᠫᠢᠩ》 ᠭᠡᠬᠦ ᠴᠢᠮᠡᠭᠡᠶᠢᠨ ᠵᠠᠪᠰᠠᠷ 《ᠹᠢᠷ ᠹᠢᠷ᠂ ᠹᠢᠷ᠂ ᠹᠢᠷ ᠹᠢᠷ》 ᠭᠡᠰᠡᠨ ᠭᠠᠵᠠᠷ ᠨᠦᠳᠦᠵᠦ ᠳᠣᠷᠭᠢᠭᠤᠯᠬᠤ ᠳᠠᠭᠤᠨᠨᠢ ᠤᠯᠠᠮ ᠲᠣᠳᠤᠷᠠᠨ ᠦᠷᠭᠦᠯᠵᠢᠯᠡᠭᠡᠳ᠂ ᠮᠣᠷᠢᠲᠠᠨᠨᠤᠭᠤᠳ ᠳᠠᠪᠬᠢᠯᠳᠤᠨ ᠢᠷᠡᠵᠦ᠂ ᠵᠡᠭᠦᠨ ᠡᠮᠦᠨᠡᠰᠢᠪᠡᠨ ᠪᠢᠴᠢᠬᠠᠨ ᠨᠠᠷᠢᠨ ᠬᠣᠭᠤᠯᠠᠢ ᠲᠠᠯᠪᠢᠭᠤᠲᠠᠢ ᠥᠨᠳᠦᠷ ᠠᠭᠤᠯᠠᠪᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠲᠣᠭᠤᠷᠢᠮᠤᠨ ᠬᠠᠪᠴᠢᠯᠳᠤ ᠽᠠᠨᠳᠠᠨ ᠬᠦᠷᠡᠩ᠂ ᠬᠠᠯᠵᠠᠨ ᠪᠣᠷᠤ ᠬᠣᠶᠠᠷᠢ ᠬᠠᠰᠢᠵᠤ ᠠᠪᠤᠯᠠ᠃ ᠽᠠᠨᠳᠠᠨ ᠬᠦᠷᠡᠩᠦᠨ ᠴᠢᠬᠢᠨᠳᠦ ᠶᠡᠷᠦ ᠰᠣᠨᠤᠰᠳᠠᠭᠠᠦᠭᠡᠢ 《 ᠢᠦᠢ ᠢᠦᠢ᠂ ᠲᠠᠷ ᠲᠠᠷ》 ᠭᠡᠬᠦ ᠵᠢᠭᠲᠡᠢᠬᠡᠨ ᠳᠠᠭᠤᠨ ᠳᠣᠷᠭᠢᠪᠠ᠃ ᠳᠡᠯᠢᠶᠡᠨ ᠪᠣᠰᠭᠠᠭᠰᠠᠨ ᠽᠠᠨᠳᠠᠨ ᠬᠦᠷᠡᠩ ᠵᠦᠭᠢᠶᠡᠨ ᠰᠠᠮᠪᠠᠭᠠᠲᠠᠢ ᠠᠵᠢᠭᠯᠠᠵᠤ᠂ ᠳᠡᠭᠳᠡᠭᠡᠬᠡᠢᠪᠡᠨ ᠨᠢᠭᠤᠬᠤ ᠭᠡᠵᠦ ᠪᠠᠢᠭᠠ ᠳᠡᠷᠪᠡᠭᠰᠡᠨ ᠲᠣᠭᠤᠷᠤᠤᠰᠢᠭ᠋ ᠬᠠᠯᠵᠠᠨ ᠪᠣᠷᠤ ᠳᠠᠭᠠᠶᠢ ᠡᠭᠡᠮᠳᠡᠭᠡᠨ ᠨᠠᠭᠠᠯᠳᠤᠭᠤᠯᠤᠭᠠᠳ ᠬᠤᠢᠬᠤᠷᠯᠠᠨ ᠡᠷᠭᠢᠯᠳᠦᠵᠦ ᠳᠠᠪᠬᠢᠨᠠ᠃
ᠮᠤᠷᠤᠢ ᠤᠨᠢᠨᠳᠤ ᠦᠵᠦᠭᠦᠷᠲᠦ ᠪᠤᠷᠭᠠᠰᠤ ᠵᠠᠯᠭᠠᠭᠠᠳ᠂ ᠳᠠᠯᠠᠨ ᠪᠤᠯᠲᠤᠷᠤᠤᠲᠠᠢ ᠲᠡᠮᠡᠭᠡᠨ ᠳᠡᠭᠡᠰᠦᠪᠡᠷ ᠬᠤᠢᠪᠢᠯᠠᠭᠰᠠᠨ ᠤᠷᠭᠠᠲᠠᠨᠨᠤᠭᠤᠳ 《ᠵᠢᠷᠭᠤᠭᠠᠨ ᠬᠦᠵᠦᠭᠦᠲᠡᠨ ᠨᠤᠭᠦᠳᠲᠦ ᠤᠷᠭᠠ ᠶᠡᠷᠦᠨᠢ ᠠᠯᠳᠠᠭᠠᠦᠭᠡᠢᠶᠤᠮ》 ᠭᠡᠬᠦᠰᠢᠭ ᠬᠡᠬᠦᠯᠵᠡᠨ ᠪᠠᠢᠵᠤ᠂ ᠣᠯᠠᠨᠢᠶᠠᠷᠢᠶᠠᠨ ᠣᠮᠤᠭ ᠪᠠᠷᠢᠭᠠᠳ ᠽᠠᠨᠳᠠᠨ ᠬᠦᠷᠡᠩᠦᠨ ᠭᠠᠩᠭᠠᠩ ᠰᠠᠢᠬᠠᠨ ᠪᠤᠭᠤᠨ ᠲᠣᠯᠤᠭᠠᠢᠳᠤᠨᠢ ᠪᠤᠵᠠᠷ ᠤᠷᠭᠠᠪᠠᠨ ᠠᠶᠤᠮᠰᠢᠭᠦᠭᠡᠢ ᠳᠦᠷᠦᠬᠦ ᠭᠡᠯᠡ᠃ ᠠᠭᠤᠷᠰᠤᠨ ᠬᠦᠷᠴᠢᠭᠢᠨᠡᠭᠰᠡᠨ ᠪᠠᠷᠰᠰᠢᠭ᠋᠂ ᠠᠭᠤᠯᠠᠨᠠᠴᠠ ᠪᠠᠭᠤᠭᠰᠠᠨ ᠦᠶᠡᠷᠰᠢᠭ ᠣᠮᠤᠭ ᠰᠦᠷᠲᠡᠢ ᠽᠠᠨᠳᠠᠨ ᠬᠦᠷᠡᠩ ᠮᠣᠷᠢ᠂ ᠬᠦᠨᠲᠦᠷᠦᠨ ᠵᠤᠯᠠᠷᠠᠵᠤ᠂ ᠬᠥᠮᠦᠷᠢᠨ ᠳᠠᠪᠬᠢᠮᠠᠭᠴᠠ᠂ ᠤᠷᠤᠭᠤᠲᠠᠢ ᠥᠨᠥᠬᠢ ᠬᠥᠮᠦᠨ ᠤᠷᠭᠠ ᠳᠦᠷᠦᠵᠦ ᠴᠢᠳᠠᠭᠰᠠᠨᠦᠭᠡᠢ ᠮᠥᠷᠲᠡᠭᠡᠨ ᠮᠣᠷᠢᠨ ᠳᠡᠭᠡᠷᠡᠡᠴᠡᠪᠡᠨ ᠭᠤᠳᠤᠷᠴᠤ᠂ ᠡᠯᠢᠭᠡ ᠲᠦᠷᠦᠭᠦᠦᠪᠡᠷᠢᠶᠡᠨ ᠰᠠᠪᠠᠵᠤ ᠤᠨᠠᠭᠠᠳ 《ᠡᠵᠢ ᠡ! ᠦᠬᠦᠯᠡ ᠪᠢ》 ᠭᠡᠵᠦ ᠶᠣᠢᠯᠠᠨ ᠤᠬᠤᠨᠠ ᠴᠢᠷᠠᠢᠯᠠᠵᠤ ᠲᠡᠯᠴᠢᠯᠡᠪᠡ᠃
《ᠪᠤᠤ ᠳᠤᠲᠠᠭᠠᠯᠭᠠ! ᠬᠠᠰᠢ! ᠪᠠᠷᠢ! ᠫᠤᠤᠳᠠ!》 ᠭᠡᠬᠦ ᠶᠠᠩᠵᠤᠪᠠᠷ ᠴᠢᠷᠠᠯᠠᠨ ᠳᠠᠪᠬᠢᠵᠠᠭᠠᠭᠰᠠᠨ ᠮᠣᠷᠢᠲᠠᠨ ᠡᠬᠢ ᠠᠳᠠᠭᠦᠭᠡᠢ ᠰᠠᠮᠠᠭᠤᠷᠠᠨ ᠵᠠᠷᠢᠮᠨᠢ ᠮᠣᠷᠢᠨᠠᠴᠠᠪᠠᠨ ᠬᠠᠶᠠᠭᠳᠠᠵᠤ᠂ ᠵᠠᠷᠢᠮᠨᠢ ᠮᠠᠯᠠᠭᠠᠢᠪᠠᠨ ᠭᠡᠭᠡᠵᠡᠢ᠃
《ᠫᠠᠩ ᠫᠠᠩ᠂ ᠫᠢᠩ ᠫᠠᠩ》 《ᠲᠠᠷ ᠲᠠᠷ ᠲᠠᠷ᠂ ᠲᠠᠷ ᠲᠠᠷ ᠲᠠᠷ》 ᠭᠡᠰᠡᠨ ᠳᠠᠭᠤᠨᠨᠢ ᠪᠠᠢᠯᠳᠤᠭᠠᠨᠤ ᠬᠠᠮᠤᠭᠤᠨ ᠪᠠᠴᠢᠮ ᠦᠶᠡᠰᠢᠭ ᠪᠣᠯᠤᠯᠠ᠃ ᠶᠠᠭᠤᠴᠤ ᠭᠡᠰᠡᠨ ᠽᠠᠨᠳᠠᠨ ᠬᠦᠷᠡᠩᠯᠡ ᠰᠤᠷᠮᠠᠭᠠᠢᠪᠠᠷᠢᠶᠠᠨ ᠵᠡᠭᠦᠨ ᠡᠮᠦᠨᠡᠬᠢ ᠬᠣᠭᠤᠯᠠᠢᠶᠢ ᠳᠠᠭᠠᠵᠤ᠂ ᠬᠤᠢ ᠰᠠᠯᠬᠢᠨᠰᠢᠭ᠋ ᠱᠤᠤᠭᠢᠨ ᠵᠢᠷᠭᠢᠵᠦ ᠪᠠᠢᠪᠠ᠃ ᠲᠡᠭᠦᠨᠦ ᠬᠠᠵᠠᠭᠤᠳᠤᠨᠢ ᠡᠬᠡᠪᠡᠨ ᠳᠠᠭᠠᠵᠤ ᠬᠠᠷᠠᠢᠭᠰᠠᠨ ᠢᠨᠵᠠᠭᠠᠰᠢᠭ᠋ ᠰᠠᠮᠪᠠᠭᠠᠲᠠᠢ ᠭᠦᠶᠦᠵᠦ ᠪᠠᠢᠭᠰᠠᠨ ᠬᠠᠯᠵᠠᠨ ᠪᠣᠷᠤ ᠭᠡᠨᠡᠳᠲᠡ ᠮᠤᠰᠭᠢᠨ ᠲᠡᠮᠡᠦᠯᠳᠦᠵᠦ ᠪᠥᠭᠰᠡᠪᠡᠨ ᠠᠶᠠᠷᠬᠠᠨ ᠭᠠᠵᠠᠷ ᠲᠠᠯᠪᠢᠪᠠ᠃
ᠬᠠᠨᠳᠠᠭᠠᠢ ᠮᠡᠲᠦ ᠠᠭᠤᠯᠠᠶᠢᠨ ᠬᠢᠷᠠ ᠥᠭᠡᠳᠡ ᠳᠠᠪᠬᠢᠭᠰᠠᠨ ᠽᠠᠨᠳᠠᠨ ᠬᠦᠷᠡᠩ᠂ ᠠᠷᠤᠠᠴᠠᠪᠠᠨ ᠨᠡᠬᠡᠬᠦ ᠠᠮᠢᠲᠠᠨᠦᠭᠡᠢ ᠪᠣᠯᠤᠭᠰᠠᠨᠢ ᠮᠡᠳᠡᠭᠰᠡᠨᠶᠦᠮᠦᠦ? ᠥᠨᠳᠦᠷ ᠬᠠᠢᠷᠬᠠᠨᠤ ᠪᠠᠷᠠᠭᠤᠨ ᠬᠣᠢᠲᠤᠬᠢ ᠬᠠᠳᠠᠨ ᠵᠠᠪᠰᠠᠷ ᠭᠡᠳᠡᠷᠭᠦᠪᠡᠨ ᠬᠠᠷᠠᠵᠤ ᠵᠣᠭᠰᠤᠯᠠ᠃ ᠭᠡᠪᠡᠴᠦ ᠬᠠᠯᠵᠠᠨ ᠪᠣᠷᠤ ᠤᠳᠠᠲᠠᠯᠠ ᠠᠯᠠᠭᠠ ᠪᠣᠯᠬᠣᠷ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠵᠤ ᠭᠠᠵᠠᠷ ᠴᠠᠪᠴᠢᠯᠠᠭᠰᠠᠭᠠᠷ ᠪᠤᠴᠠᠪᠠ᠃
* * *
ᠵᠠᠳᠠᠭᠠᠢ ᠠᠷᠤᠪᠴᠢᠲᠠᠢ ᠨᠣᠭᠲᠤ ᠪᠠᠷᠢᠭᠰᠠᠨ ᠬᠡᠰᠢᠭᠲᠣᠭᠲᠠᠬᠤ ᠡᠪᠦᠭᠡᠨ ᠪᠦᠭᠰᠢᠨ ᠠᠮᠢᠰᠭᠤᠯᠯᠠᠭᠰᠠᠭᠠᠷ ᠭᠡᠷᠦᠨᠢᠶᠡᠨ ᠪᠠᠷᠠᠭᠤᠨ ᠡᠮᠦᠨᠡ ᠳᠡᠭᠡᠷᠡ ᠨᠣᠭᠲᠤᠪᠠᠨ 《ᠫᠦᠰ》 ᠭᠡᠲᠡᠯᠡ ᠰᠢᠳᠡᠵᠡᠢ᠃ ᠭᠡᠲᠡᠯᠡ ᠨᠣᠭᠲᠤᠶᠢᠨ ᠬᠢᠨᠢ ᠲᠣᠯᠤᠭᠠᠢ ᠳᠣᠷᠤᠭᠰᠢᠪᠠᠨ ᠳᠡᠭᠦᠵᠢᠯᠡᠭᠳᠡᠵᠦ ᠤᠨᠵᠢᠢᠬᠤᠨᠢ 《ᠬᠡᠢ ᠮᠣᠷᠢᠨᠢ ᠨᠢᠭᠡᠮᠦᠰᠦᠨ ᠬᠠᠵᠠᠢᠵᠠᠢ》 ᠭᠡᠳᠡᠭ ᠰᠡᠵᠢᠭ ᠲᠥᠷᠦᠭᠳᠡᠭᠦᠯᠵᠦ᠂ ᠡᠪᠦᠭᠡᠨᠢ ᠨᠡᠩ ᠵᠣᠪᠠᠭᠠᠨᠠ᠃ ᠨᠢᠳᠦ ᠬᠣᠰᠢᠭᠤᠮᠠᠯᠵᠢᠵᠤ ᠵᠢᠷᠲᠠᠢᠯᠭᠠᠭᠠᠳ ᠨᠣᠭᠲᠤᠶᠢᠨ ᠲᠣᠯᠤᠭᠠᠢᠶᠢ ᠳᠡᠭᠡᠭᠰᠢᠨᠢ ᠲᠠᠯᠪᠢᠬᠤ ᠭᠡᠰᠡᠨ ᠭᠠᠷᠢᠶᠠᠷᠢᠶᠠᠨ ᠨᠢᠰᠤᠪᠠᠨ ᠠᠷᠴᠢᠵᠤ ᠭᠡᠷᠲᠦ ᠣᠷᠤᠪᠠ᠃
ᠵᠤᠯᠠᠢ ᠳᠡᠭᠡᠷᠡᠪᠡᠨ ᠨᠢᠭᠡ ᠭᠠᠤᠯᠢᠨ ᠵᠣᠭᠤᠰ ᠪᠠᠷᠢᠵᠤ᠂ ᠵᠡᠭᠦᠨ ᠭᠠᠷᠢᠶᠠᠨ ᠲᠠᠰᠤ ᠠᠳᠭᠤᠭᠰᠠᠨ ᠡᠮᠡᠭᠡᠨ ᠨᠢᠳᠦᠪᠡᠨ ᠠᠨᠢᠪᠴᠢᠨ ᠰᠢᠪᠰᠢᠨ ᠰᠢᠪᠲᠤᠷᠠᠭᠰᠠᠨᠢᠶᠠᠨ ᠬᠠᠷᠠᠭᠠᠳ:
《ᠡᠪᠦᠭᠡ ᠡ! ᠰᠤᠷᠠᠭᠲᠠᠢᠤᠤ?》 ᠭᠡᠪᠡ᠃
《ᠬᠡᠩ! ᠰᠤᠷᠠᠭᠲᠠᠭᠠᠨ ᠳᠤᠷᠠᠲᠠᠢᠶᠤᠮ᠃ ᠭᠠᠬᠠᠢ ᠶᠠᠪᠠᠭᠠᠨ ᠪᠣᠯᠵᠤ ᠰᠠᠨᠠᠭᠠ ᠠᠮᠤᠷ ᠪᠣᠯᠪᠠᠤᠤ? 〈ᠡᠨᠡ ᠴᠥᠪᠦᠨ ᠴᠠᠭᠲᠤ ᠰᠠᠢᠨ ᠮᠣᠷᠢ ᠬᠡᠷᠡᠭᠦᠭᠡᠢ〉 ᠭᠡᠳ ᠬᠠᠷᠠ ᠨᠢᠳᠦᠪᠡᠨ ᠬᠣᠪᠬᠤ ᠲᠠᠲᠠᠮᠠᠭᠴᠠ ᠶᠠᠩᠰᠢᠭᠠᠳ ᠪᠠᠢᠳᠠᠭ ᠲᠦᠭᠦᠰᠢᠴᠢᠨᠢ ᠴᠢᠯᠦᠭᠡ ᠭᠠᠷᠬᠤ ᠪᠣᠯᠵᠠᠢ᠃ ᠣᠳᠣ ᠬᠣᠶᠠᠷ ᠲᠤᠭᠤᠯᠲᠠᠢ ᠦᠨᠢᠶᠡᠡᠴᠡᠪᠡᠨ ᠰᠠᠯᠪᠠᠯ ᠭᠠᠵᠠᠷ ᠳᠡᠭᠡᠷᠡ ᠭᠢᠰᠭᠢᠬᠦ ᠮᠠᠯᠦᠭᠡᠢ ᠪᠣᠯᠤᠨᠠ》 ᠭᠡᠵᠦ ᠬᠡᠰᠢᠭᠲᠣᠭᠲᠠᠬᠤ ᠬᠥᠨᠳᠡᠯᠡᠨ ᠬᠠᠷᠠᠵᠤ ᠰᠠᠭᠤᠪᠠ᠃
《ᠰᠠᠢᠨ ᠰᠤᠷᠠᠭ ᠰᠣᠨᠤᠰᠤᠮᠠᠷᠶᠤᠮ ᠳ᠋ᠠ᠃ 〈ᠴᠠᠭᠠᠨ ᠬᠡᠷᠢᠶᠡ ᠲᠠᠪᠤᠨ ᠬᠥᠯᠲᠡᠢ〉 ᠪᠠᠭᠤᠵᠤ ᠪᠠᠢᠨᠠ ᠰᠢᠤ᠃ 》
《ᠴᠢ ᠪᠢᠳᠡ ᠬᠣᠶᠠᠷᠤᠨ ᠮᠡᠷᠭᠡᠯᠡᠬᠦᠨᠢ ᠠᠷᠤ ᠳᠡᠭᠡᠷᠡᠪᠡᠨ ᠭᠠᠷᠴᠠᠢ᠃ ᠤᠷᠭᠠᠨᠳᠤᠨᠢ ᠣᠷᠤᠭᠰᠠᠨ ᠪᠣᠯ ᠤᠭᠤᠲᠠᠨᠳᠤᠨᠢ ᠰᠢᠩᠭᠡᠭᠡᠳ᠂ ᠠᠷᠤ ᠬᠣᠷᠮᠤᠢ᠂ ᠬᠠᠷᠠ ᠨᠣᠬᠠᠢ ᠬᠣᠶᠠᠷᠯᠠ ᠦᠵᠡᠭᠡᠳ ᠳᠠᠭᠤᠰᠤᠭᠰᠠᠨ ᠪᠠᠢᠬᠤ! ᠠᠢ! ᠬᠠᠢᠷᠠᠨᠤ ᠮᠣᠷᠢ᠃ ᠬᠡᠰᠢᠭᠲᠣᠭᠲᠠᠬᠤ ᠨᠢᠭᠡᠶᠢᠪᠡᠨ ᠬᠣᠶᠠᠷ᠂ ᠨᠢᠮᠭᠡᠨᠢᠶᠡᠨ ᠵᠤᠵᠠᠭᠠᠨ ᠪᠣᠯᠭᠠᠶᠠ ᠭᠡᠳ ᠨᠢᠭᠡ ᠨᠠᠰᠤᠪᠠᠷᠢᠶᠠᠨ ᠤᠯᠠᠶᠢᠨᠢᠶᠠᠨ ᠬᠥᠯᠦᠰᠦᠶᠢ ᠮᠠᠩᠨᠠᠢᠳᠠᠭᠠᠨ ᠨᠠᠭᠠᠯᠳᠤᠭᠤᠯᠵᠤ ᠪᠠᠢᠭᠠᠳ ᠤᠨᠤᠬᠤᠲᠠᠢ᠂ ᠰᠠᠭᠠᠬᠤᠲᠠᠢ ᠪᠣᠯᠤᠯᠠ ᠭᠡᠵᠦ ᠰᠠᠨᠠᠭᠰᠠᠨᠶᠤᠮᠰᠠᠨ᠃ ᠬᠤᠪᠢᠨᠢ ᠬᠠᠵᠠᠢᠵᠤ᠂ ᠬᠤᠷᠤᠢᠨᠢ ᠡᠷᠭᠢᠬᠦᠪᠡᠨ ᠪᠣᠯᠢᠵᠠᠢ ᠳ᠋ᠠ 》 ᠭᠡᠳ ᠲᠣᠯᠤᠭᠠᠢᠪᠠᠨ ᠲᠦᠰ ᠲᠦᠰ ᠴᠣᠬᠢᠪᠠ᠃
《ᠦᠭᠡᠢ! ᠬᠠᠪᠴᠢᠯ ᠲᠣᠭᠤᠷᠢᠮᠤᠨ ᠬᠠᠪᠢᠳᠤ ᠪᠠ ᠯᠦ ᠳᠠᠢᠰᠤᠨᠲᠠᠢ ᠲᠤᠯᠤᠯᠳᠤᠵᠤ ᠪᠠᠢᠨᠠ ᠭᠡᠰᠡᠨ᠃ ᠲᠡᠳᠡᠨᠳᠦ ᠥᠷᠳᠦᠭᠰᠡᠨ ᠪᠣᠯ ᠭᠠᠢᠭᠤᠢ ᠪᠠᠢᠵᠤᠴᠤ ᠶᠠᠭᠤ ᠮᠠᠭᠠᠳ ᠪᠢᠯᠡ᠃ 〉
《ᠲᠡᠷᠡᠴᠢᠨᠢ ᠪᠢᠳᠡ ᠬᠣᠶᠠᠷᠤᠨ ᠲᠣᠯᠤᠭᠠᠢᠶᠢ ᠡᠷᠭᠢᠭᠦᠯᠵᠦ ᠪᠠᠢᠭᠠ ᠦᠭᠡ ᠰᠢᠦ᠃ ᠪᠠ ᠯᠦ᠂ ᠮᠠ ᠯᠦ ᠭᠡᠬᠦᠶᠦᠮ ᠭᠡᠨᠡ᠃ ᠪᠦᠭᠦᠳᠡᠭᠡᠷᠯᠡ ᠴᠡᠷᠢᠭ ᠰᠢᠤ ᠳ᠋ᠠ᠃ ᠲᠡᠭᠡᠭᠡᠳ ᠪᠠᠰᠠ ᠬᠡᠯᠡ ᠠᠮᠠ ᠮᠡᠳᠡᠬᠦᠦᠭᠡᠢ᠂ ᠭᠡᠷ ᠣᠷᠤᠨᠦᠭᠡᠢ ᠬᠢᠲᠠᠳᠤᠳ ᠪᠠᠢᠨᠠ᠃ ᠲᠡᠳᠡᠨᠳᠦ ᠲᠣᠬᠢᠶᠠᠯᠳᠤᠭᠰᠠᠨ ᠪᠣᠯ 〈ᠰᠠᠮᠵᠠᠶᠢᠨ ᠠᠮᠠᠨᠠᠴᠠ ᠴᠢᠪᠠᠭᠠ ᠪᠤᠯᠢᠶᠠᠬᠤᠲᠠᠢ ᠠᠳᠠᠯᠢ〉 ᠬᠡᠷᠡᠭ ᠪᠣᠯᠤᠨᠠ ᠪᠢᠵᠡ ᠳ᠋ᠠ᠃ 》
《ᠪᠤᠷᠬᠠᠨᠮᠢᠨᠢ ᠡ! ᠦᠵᠡᠭᠡᠦᠭᠡᠢᠪᠡᠷ ᠬᠥᠮᠦᠨᠢ ᠴᠢᠩᠭᠢᠵᠦ ᠪᠢᠲᠡᠭᠡᠢ ᠬᠢᠯᠢᠰᠳᠡᠭᠦᠯ! ᠠᠮᠠᠨ ᠬᠡᠰᠢᠭᠲᠦᠮᠢᠨᠢ ᠮᠠᠭᠤ ᠪᠣᠯᠤᠨᠠ ᠰᠢᠤ》 ᠭᠡᠵᠦ ᠬᠣᠷᠯᠣ ᠡᠮᠡᠭᠡᠨ ᠶᠢᠰᠦᠨ ᠵᠣᠭᠤᠰᠢᠶᠠᠨ ᠤᠯᠠᠭᠠᠨ ᠤᠲᠠᠰᠤᠨᠳᠤ ᠬᠡᠯᠬᠢᠵᠦ ᠳᠠᠯᠳᠠ ᠬᠢᠪᠡ᠃
《ᠶᠣᠬᠤ! ᠠᠮᠠᠨ ᠬᠡᠰᠢᠭ ᠳᠤᠷᠠᠰᠬᠤᠳᠠᠭᠠᠨ ᠳᠤᠷᠠᠲᠠᠢᠶᠤᠮ᠃ ᠲᠡᠢᠮᠦ ᠰᠦᠷᠡᠬᠡᠢ ᠪᠠᠢᠭᠰᠠᠨ ᠪᠣᠯ ᠡᠮᠡᠭᠡᠯᠢᠶᠡᠨ ᠭᠠᠵᠠᠷ ᠬᠠᠶᠠᠵᠤ ᠶᠠᠪᠤᠳᠠᠭᠤᠤ?》 ᠭᠡᠳ ᠬᠡᠰᠢᠭᠲᠣᠭᠲᠠᠬᠤ ᠭᠡᠳᠡᠷᠭᠡᠨ ᠰᠤᠨᠵᠤ ᠤᠨᠠᠪᠠ᠃
ᠭᠢᠯᠤᠢᠵᠤ ᠤᠨᠠᠬᠤ ᠰᠢᠬᠠᠭᠰᠠᠨ ᠪᠠᠢᠯᠭᠦᠢ! ᠲᠣᠭᠤᠭᠠ ᠲᠠᠯᠪᠢᠵᠤ ᠬᠠᠯᠠᠭᠤᠨ ᠶᠠᠭᠤᠮᠠ ᠣᠭᠤᠴᠢᠭᠤᠯᠤᠶᠠ ᠭᠡᠳ ᠬᠣᠷᠯᠣ ᠬᠠᠲᠠᠪᠴᠢ ᠠᠯᠬᠤᠭᠰᠠᠨᠢᠶᠠᠨ:
《ᠵᠠᠢᠯᠠᠭᠤᠯ ᠪᠤᠤ ᠦᠵᠡᠭᠳᠡ!》 ᠭᠡᠵᠦ ᠤᠤᠯᠭᠠ ᠠᠯᠳᠠᠭᠠᠳ ᠲᠣᠭᠤᠭᠠᠨᠤᠪᠠᠨ ᠪᠠᠷᠢᠭᠤᠯᠢ ᠭᠠᠵᠠᠷ ᠤᠨᠠᠭᠠᠭᠠᠳ ᠠᠷᠤ ᠥᠭᠡᠳᠡᠪᠡᠨ ᠤᠬᠤᠷᠢᠵᠠᠢ᠃
《ᠪᠡᠯᠡᠩᠴᠢ ᠡᠮᠡᠭᠡᠨ ᠶᠠᠭᠤ ᠪᠣᠯᠬᠤᠨᠢ ᠪᠤᠢ?》 ᠭᠡᠵᠦ ᠤᠴᠠᠭᠠᠷᠳᠠᠩᠭᠤᠢ ᠴᠢᠷᠠᠢᠯᠠᠭᠰᠠᠨ ᠬᠡᠰᠢᠭᠲᠣᠭᠲᠠᠬᠤ ᠬᠥᠯᠢᠶᠡᠨ ᠨᠤᠬᠤᠴᠢᠭᠰᠠᠭᠠᠷ ᠪᠣᠰᠤᠭᠠᠳ ᠱᠠᠭᠠᠢᠪᠠ᠃ ᠡᠪᠦᠭᠡᠨᠦ ᠭᠠᠭᠴᠠᠬᠠᠨ ᠮᠤᠷᠤᠢ ᠭᠠᠳᠠᠰᠤᠨ ᠤᠶᠠᠭᠠᠨᠳᠤᠨᠢ ᠳᠠᠯᠢᠩᠲᠠᠢ ᠮᠣᠷᠢᠳ ᠳᠦᠭᠦᠷᠴᠦ᠂ ᠥᠨᠳᠦᠷ ᠪᠣᠷᠤ ᠬᠤᠪᠴᠠᠰᠤᠲᠠᠢ ᠤᠯᠤᠰ᠂ ᠤᠶᠠᠭᠠᠨᠤ ᠤᠷᠢᠳᠤᠭᠤᠷ ᠬᠣᠢᠭᠤᠷ ᠮᠣᠷᠢᠳᠢᠶᠠᠨ ᠬᠥᠲᠦᠯᠦᠨ ᠠᠯᠬᠤᠵᠠᠭᠠᠵᠤ᠂ ᠵᠠᠷᠢᠮᠨᠢ ᠲᠡᠩᠨᠡᠭᠡᠪᠡᠨ ᠪᠠᠭᠤᠯᠭᠠᠵᠤ ᠪᠠᠢᠯᠠ᠃ ᠴᠠᠢᠪᠤᠷ ᠪᠣᠷᠤ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠰᠢᠷᠠ ᠨᠣᠭᠤᠭᠠᠨ ᠡᠭᠦᠷᠦᠪᠴᠢ ᠵᠥᠷᠢᠭᠦᠯᠳᠦᠨ ᠳᠠᠷᠤᠭᠤᠯᠤᠭᠰᠠᠨ᠂ ᠳᠠᠯᠪᠢᠭᠠᠷ ᠴᠢᠭᠢᠷᠰᠦᠨ ᠮᠠᠯᠠᠭᠠᠢ ᠠᠷᠤᠳᠠᠭᠠᠨ ᠡᠭᠡᠯᠳᠦᠷᠭᠡᠯᠡᠭᠰᠡᠨ ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ᠂ ᠬᠠᠵᠠᠭᠤᠳᠠᠬᠢᠳᠠᠭᠠᠨ ᠶᠠᠭᠤᠮᠠ ᠵᠠᠬᠢᠬᠤᠰᠢᠭ᠋ ᠭᠠᠷᠢᠶᠠᠨ ᠰᠠᠵᠢᠯᠠᠨ ᠳᠦᠷᠰᠦᠯᠡᠵᠦ ᠣᠯᠠᠨ ᠦᠭᠡ ᠶᠠᠷᠢᠭᠰᠠᠭᠠᠷ ᠵᠣᠭᠰᠤᠨᠠ᠃
ᠬᠡᠰᠢᠭᠲᠣᠭᠲᠠᠬᠤ᠂ ᠬᠠᠭᠠᠯᠭᠠᠪᠠᠨ ᠬᠠᠮᠬᠢᠵᠤ ᠭᠡᠳᠡᠷᠭᠦᠪᠡᠨ ᠤᠬᠤᠷᠢᠬᠤ ᠭᠡᠳ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠪᠣᠳᠤᠭᠰᠠᠨᠶᠤᠮ ᠳ᠋ᠠ ? ᠳᠠᠬᠢᠨ ᠨᠡᠭᠡᠭᠡᠵᠦ ᠣᠷᠬᠢᠭᠠᠳ ᠬᠣᠷᠯᠣᠶᠢᠨ ᠴᠢᠷᠠᠢ ᠥᠭᠡᠳᠡ ᠳᠡᠮᠡᠢᠯᠡ ᠮᠡᠯᠡᠷᠡᠨ ᠭᠥᠯᠢᠢᠪᠡ᠃ ᠬᠣᠷᠯᠣ ᠠᠮᠠᠨ ᠳᠣᠲᠤᠷᠠᠪᠠᠨ
《ᠤᠮ ᠮᠠᠨᠢ ᠪᠠᠳ ᠮᠧ ᠬᠤᠮ》 ᠭᠡᠵᠦ ᠳᠦᠳᠦᠨᠡᠨ ᠵᠣᠭᠰᠤᠭᠰᠠᠨ ᠬᠡᠪᠲᠡᠭᠡᠨ ᠪᠠᠷᠠᠭᠤᠨ ᠭᠠᠷᠢᠶᠠᠨ ᠳᠡᠯᠭᠡᠵᠦ ᠬᠠᠨᠴᠤᠢ ᠳᠣᠲᠤᠷᠠᠪᠠᠨ ᠵᠠᠯᠪᠠᠷᠢᠵᠤ ᠪᠠᠢᠯᠠ᠃ 《 ᠲᠤᠭᠤᠯᠵᠤ ᠭᠠᠷᠬᠤᠠᠴᠠ ᠪᠢᠰᠢ᠂ ᠲᠣᠭᠤᠷᠢᠵᠤ ᠶᠠᠪᠤᠳᠠᠭᠦᠭᠡᠢ》 ᠭᠡᠵᠦ ᠪᠣᠳᠤᠭᠰᠠᠨᠠᠴᠠᠶᠤᠮᠤᠤ? ᠡᠰᠡᠬᠦᠯᠡ ᠲᠡᠳᠦᠢ ᠤᠳᠠᠭᠠᠨ ᠪᠠᠢᠲᠠᠯᠠ ᠨᠠᠮ ᠵᠢᠮᠬᠡᠨ ᠪᠣᠯᠬᠣᠷ ᠭᠠᠢᠭᠤᠢ ᠪᠠᠢᠯᠭᠦᠢ ᠭᠡᠵᠦ ᠭᠠᠳᠠᠷᠯᠠᠭᠰᠠᠨᠶᠤᠮᠤᠤ? ᠪᠤᠤ ᠮᠡᠳᠡ᠂ ᠬᠡᠰᠢᠭᠲᠣᠭᠲᠠᠬᠤ ᠰᠡᠮᠡᠭᠡᠷᠬᠡᠨ ᠭᠠᠷᠴᠤ᠂ ᠠᠯᠬᠤᠮᠢᠶᠠᠨ ᠲᠣᠭᠠᠯᠠᠵᠤ ᠪᠠᠢᠭᠠᠰᠢᠭ᠋ ᠤᠶᠠᠭᠠ ᠥᠭᠡᠳᠡ ᠭᠡᠯᠳᠦᠷᠢᠪᠡ᠃
ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ ᠠᠷᠪᠢᠨ ᠦᠭᠡ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠬᠡᠰᠢᠭᠲᠣᠭᠲᠠᠬᠤ ᠶᠡᠷᠦᠨᠢ ᠣᠢᠯᠠᠭᠠᠭᠰᠠᠨᠦᠭᠡᠢ᠃ ᠭᠠᠭᠴᠠᠬᠦ ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨᠦ ᠵᠥᠭᠡᠯᠡᠨ ᠲᠣᠭᠲᠠᠭᠤᠨ ᠬᠠᠷᠠᠴᠠ ᠬᠢᠭᠡᠳ ᠳᠤᠯᠠᠭᠠᠨ ᠡᠶᠡᠯᠰᠡᠭ ᠴᠢᠷᠠᠢ ᠬᠣᠶᠠᠷᠠᠴᠠᠨᠢ ᠰᠠᠢᠨ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠲᠠᠭᠠᠪᠤᠷᠢᠯᠠᠭᠰᠠᠨ ᠪᠥᠭᠡᠳ ᠳᠠᠷᠤᠭᠠ ᠨᠣᠶᠠᠨᠨᠢᠴᠤᠶᠤᠮᠤᠤ?ᠦᠭᠡᠢ! ᠪᠠ ᠯᠦᠳᠦ ᠨᠣᠶᠠᠨ ᠪᠠᠢᠳᠠᠭᠦᠭᠡᠢ᠂ ᠴᠢ ᠪᠢᠦᠭᠡᠢ ᠠᠳᠠᠯᠢᠬᠠᠨ ᠪᠠᠢᠳᠠᠭ ᠭᠡᠰᠡᠨ ᠰᠢᠤ ᠳ᠋ᠠ ᠭᠡᠵᠦ ᠡᠯᠳᠡᠪᠴᠢᠯᠡᠨ ᠪᠣᠳᠤᠵᠤ ᠶᠠᠪᠤᠯᠠ᠃
ᠬᠡᠰᠢᠭᠲᠣᠭᠲᠠᠬᠤ ᠪᠠᠭᠠᠳᠠᠭᠠᠨ ᠲᠠᠷᠢᠶᠠ ᠲᠣᠰᠭᠤᠨ᠂ ᠪᠡᠭᠡᠵᠢᠩ᠂ ᠤᠲᠠᠢ ᠬᠦᠷᠲᠡᠯᠡ ᠶᠠᠪᠤᠵᠤ ᠪᠠᠢᠭᠰᠠᠨ᠃ ᠨᠢᠳᠦ ᠨᠡᠭᠡᠭᠡᠭᠰᠡᠨ ᠳᠣᠬᠢ ᠲᠣᠯᠤᠭᠠᠢᠶᠢᠨ ᠨᠢᠭᠡᠨᠳᠦ ᠣᠷᠤᠳᠠᠭ ᠬᠥᠮᠦᠨᠶᠦᠮ ᠭᠡᠨᠡ᠃ ᠲᠡᠷᠡ ᠦᠶᠡ ᠬᠡᠯᠡᠮᠦᠷᠴᠢᠨᠡᠴᠡ:
《ᠪᠠᠢ ᠪᠦ ᠵᠠ ᠭᠡᠪᠡᠯ 〈ᠵᠦᠭᠡᠷ ᠵᠦᠭᠡᠷ〉 ᠭᠡᠵᠦ ᠮᠡᠳᠡᠭᠡᠷᠡᠢ》 ᠭᠡᠳ ᠵᠢᠭᠠᠵᠤ ᠪᠠᠢᠭᠰᠠᠨᠢ ᠰᠠᠨᠠᠭᠠᠳ᠂ ᠡᠨᠡ ᠨᠣᠶᠠᠨ ᠥᠷᠦᠰᠢᠶᠡᠯᠲᠡᠢ ᠰᠠᠢᠨ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠪᠣᠳᠤᠵᠠᠢ᠃ ᠲᠡᠭᠡᠭᠡᠳ ᠬᠡᠰᠢᠭᠲᠣᠭᠲᠠᠬᠤ :
《ᠨᠣᠶᠠᠨ ᠠᠮᠤᠷᠬᠠᠨ ᠮᠣᠷᠢᠯᠠᠵᠤ ᠪᠠᠢᠨᠠᠤᠤ?》 ᠭᠡᠵᠦ ᠪᠥᠬᠦᠢᠭᠡᠳ: 《ᠭᠡᠷᠲᠦ ᠮᠣᠷᠢᠯᠠᠵᠤ ᠪᠠᠭᠤ!》 ᠭᠡᠵᠦ ᠬᠣᠶᠠᠷ ᠠᠯᠠᠭᠠᠪᠠᠨ ᠳᠡᠯᠭᠡᠨ ᠴᠣᠮᠴᠤᠰᠬᠢᠵᠤ ᠬᠠᠭᠠᠰ ᠬᠤᠭᠤᠰ ᠢᠨᠢᠶᠡᠮᠰᠦᠭᠯᠡᠬᠦ ᠴᠢᠷᠠᠢ ᠭᠠᠷᠭᠠᠪᠠ᠃
ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ ᠡᠪᠦᠭᠡᠨᠦ ᠭᠠᠷᠢ ᠠᠳᠭᠤᠵᠤ:
《ᠰᠠᠢᠨ ᠪᠠᠢᠨᠠᠤᠤ?》 ᠭᠡᠳ ᠬᠡᠳᠦᠨ ᠮᠣᠩᠭᠤᠯ ᠦᠭᠡ ᠬᠡᠯᠡᠵᠦ᠂ 《ᠮᠠᠨᠤ ᠮᠣᠩᠭᠤᠯ ᠦᠭᠡ ᠣᠯᠠᠨ ᠪᠠᠢᠬᠤᠦᠭᠡᠢ》 ᠭᠡᠳ ᠢᠨᠢᠶᠡᠪᠡ᠃
ᠲᠡᠳᠡ ᠭᠡᠷᠦᠨ ᠰᠡᠭᠦᠳᠡᠷ᠂ ᠬᠣᠷᠤᠭᠠᠨᠤ ᠢᠷᠤᠭᠠᠷᠢ ᠳᠠᠭᠠᠵᠤ ᠰᠠᠭᠤᠵᠠᠭᠠᠭᠰᠠᠨ ᠪᠣᠯᠬᠣᠷ ᠬᠣᠷᠯᠣ ᠳᠡᠪᠦᠷᠡᠲᠡᠢ ᠴᠠᠢ ᠠᠪᠴᠢᠷᠠᠵᠤ ᠥᠨᠳᠦᠷ ᠨᠣᠶᠠᠨᠳᠤ ᠠᠶᠠᠭᠠᠯᠠᠪᠠ᠃ ᠲᠡᠷᠡ ᠥᠪᠡᠷᠢᠶᠡᠨ ᠰᠢᠨᠠᠭᠠ ᠪᠠᠷᠢᠵᠤ ᠬᠦᠢᠲᠡᠨ ᠴᠠᠢᠠᠴᠠ ᠬᠡᠳᠦᠨ ᠠᠶᠠᠭᠠ ᠪᠠᠯᠭᠤᠵᠤ᠂ ᠴᠡᠷᠢᠭᠲᠡᠭᠡᠨ ᠬᠡᠳᠦᠨ ᠦᠭᠡ ᠬᠡᠯᠡᠭᠡᠳ ᠤᠰᠤ ᠳᠠᠮᠨᠠᠭᠤᠯᠲᠠᠯᠠ ᠠᠷᠭᠠᠯ ᠠᠪᠴᠢᠷᠠᠭᠤᠯᠤᠯᠠ᠃ ᠥᠪᠡᠷᠢᠶᠡᠨ ᠬᠠᠯᠠᠭᠤᠨ ᠵᠤᠤᠬᠠᠶᠢᠨ ᠠᠮᠠᠰᠠᠷ ᠳᠡᠭᠡᠷᠡ ᠬᠠᠢᠴᠢ ᠪᠠᠷᠢᠵᠤ ᠭᠠᠯ ᠲᠦᠯᠡᠭᠦ ᠪᠥᠭᠡᠳ ᠬᠣᠷᠯᠣᠶᠢ ᠣᠴᠢᠵᠤ ᠬᠠᠮᠵᠢᠬᠤᠳᠤᠨᠢ
《ᠡᠵᠢ ᠠᠮᠠᠷᠠᠵᠤ ᠪᠠᠢ! ᠪᠢᠳᠡ ᠥᠪᠡᠷᠰᠡᠳᠢᠶᠡᠨ ᠬᠣᠭᠤᠯᠠ ᠬᠢᠶᠡ》 ᠭᠡᠵᠦ ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ ᠢᠨᠢᠶᠡᠨ ᠬᠡᠯᠡᠵᠡᠢ᠃ 《ᠦᠵᠡᠭᠡᠦᠭᠡᠢ ᠬᠥᠮᠦᠨ ᠪᠠᠷᠰ᠂ ᠶᠠᠪᠤᠭᠠᠦᠭᠡᠢ ᠵᠠᠮ ᠲᠠᠮᠤ》 ᠭᠡᠵᠦ ᠨᠠᠰᠤᠲᠠᠨᠤ ᠬᠡᠯᠡᠳᠡᠭᠢᠶᠡᠷ᠂ ᠪᠠ ᠯᠦᠶᠢ 《ᠠᠬᠠ ᠵᠠᠬᠠᠦᠭᠡᠢ᠂ ᠴᠢᠨᠦ ᠮᠢᠨᠦᠬᠢᠦᠭᠡᠢ》 ᠤᠯᠤᠰ ᠭᠡᠵᠦ ᠪᠣᠳᠤᠭᠰᠠᠨᠨᠢ ᠱᠠᠯ ᠣᠨᠳᠣᠣ ᠪᠣᠯᠪᠠ᠃ ᠶᠣᠰᠤᠲᠠᠢ ᠬᠥᠭᠰᠢᠨ ᠨᠠᠰᠤᠲᠠᠢᠴᠤᠳᠢᠶᠠᠨ ᠬᠦᠨᠳᠦᠯᠡᠳᠡᠭ᠂ ᠥᠪᠡᠷᠦᠨ ᠪᠠ ᠪᠤᠰᠤᠳᠤᠨ ᠬᠢᠶᠢ ᠠᠳᠠᠯᠢᠬᠠᠨ ᠬᠠᠢᠷᠠᠯᠠᠳᠠᠭ ᠴᠠᠭᠠᠨ ᠰᠡᠳᠭᠢᠯᠲᠡᠢ ᠤᠯᠤᠰ ᠪᠠᠢᠨᠠ ᠭᠡᠵᠦ ᠬᠣᠷᠯᠣ ᠪᠣᠳᠤᠪᠠ᠃
ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠬᠡᠯᠡᠭᠡᠳ ᠬᠡᠯᠡ ᠠᠮᠠᠨᠳᠤ ᠪᠤᠤ ᠤᠷᠭᠠᠯᠠᠭᠳᠠᠶᠠ! 《ᠲᠡᠨᠡᠭ ᠬᠥᠮᠦᠨ ᠳᠤᠭᠤᠢᠳᠠᠭᠠᠨ ᠰᠦᠷᠲᠡᠢ》 ᠭᠡᠭᠴᠢᠪᠡᠷ ᠠᠷᠭᠠᠴᠠᠵᠤ ᠥᠩᠭᠡᠷᠡᠭᠦᠯᠦᠶᠡ᠃ ᠪᠠ ᠯᠦ ᠭᠡᠳᠡᠭᠴᠢᠨᠢ ᠠᠮᠠᠨ ᠳᠡᠭᠡᠷᠡᠪᠡᠨ ᠵᠥᠭᠡᠯᠡᠨ ᠪᠣᠯᠪᠠᠴᠤ ᠠᠷᠤ ᠬᠣᠢᠨᠠᠪᠠᠨ ᠬᠡᠴᠡᠭᠦᠦ ᠤᠯᠤᠰ ᠭᠡᠵᠦ ᠭᠦᠵᠡᠭᠡ ᠰᠢᠷᠠᠶᠢᠨ ᠶᠠᠷᠢᠭᠰᠠᠨᠢ ᠶᠠᠭ ᠢᠲᠡᠭᠡᠭᠡᠳ ᠵᠢᠷᠦᠬᠡᠰᠢᠵᠦ ᠪᠠᠢᠭᠰᠠᠨ ᠪᠣᠯ ᠣᠳᠣ ᠭᠠᠢᠭᠤᠢ ᠰᠢᠪ ᠳ᠋ᠠ᠃ ᠢᠳᠡᠵᠦ ᠤᠤᠭᠤᠬᠤ ᠬᠦᠨᠡᠰᠦᠪᠡᠨ ᠠᠪᠴᠤ ᠶᠠᠪᠤᠬᠤᠠᠴᠠ ᠭᠠᠳᠠᠨᠠ ᠥᠪᠡᠷᠢᠶᠡᠨ ᠬᠢᠳᠡᠭ ᠤᠯᠤᠰ ᠪᠠᠢᠨᠠ ᠭᠡᠵᠦ ᠬᠡᠰᠢᠭᠲᠣᠭᠲᠠᠬᠤ ᠪᠣᠳᠤᠵᠠᠢ᠃
《ᠲᠠᠨᠢᠯᠴᠠᠬᠤᠠᠴᠠ ᠡᠮᠦᠨᠡ ᠲᠠᠯᠠᠶᠢᠨ ᠭᠤᠷᠪᠠᠨ ᠭᠥᠷᠦᠭᠡᠰᠦ᠂ ᠲᠠᠨᠢᠯᠴᠠᠭᠰᠠᠨ ᠬᠣᠢᠨᠠᠪᠠᠨ ᠲᠠᠩᠨᠠᠢᠶᠢᠨ ᠭᠤᠷᠪᠠᠨ ᠰᠤᠳᠠᠰᠤ》 ᠭᠡᠭᠴᠢᠪᠡᠷ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠡᠭ ᠮᠡᠭ ᠭᠡᠬᠦᠨᠢᠴᠦ ᠠᠶᠠᠳᠠᠵᠤ ᠲᠡᠳᠡᠨᠦ ᠠᠰᠠᠭᠤᠭᠰᠠᠨᠢᠨᠢ ᠮᠡᠳᠡᠬᠦᠪᠡᠷᠢᠶᠡᠨ ᠬᠡᠯᠡᠵᠦ ᠡᠨᠡ ᠲᠡᠷᠡᠭᠦᠷᠨᠢ ᠲᠣᠭᠤᠷᠢᠬᠤ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠤᠶᠠᠭᠠᠲᠠᠢ ᠮᠣᠷᠢᠳ ᠳᠡᠭᠡᠭᠦᠷ ᠣᠴᠢᠲᠠᠯᠠ ᠽᠠᠨᠳᠠᠨ ᠬᠦᠷᠡᠩᠨᠢ ᠳᠡᠭᠡᠰᠦᠨ ᠵᠢᠯᠤᠭᠤᠲᠠᠢ᠂ ᠤᠷᠤᠭ ᠬᠠᠵᠠᠭᠠᠷ ᠬᠠᠵᠠᠭᠠᠷᠯᠠᠭᠰᠠᠨ ᠳᠡᠪᠢᠰᠭᠡᠷᠦᠭᠡᠢ ᠴᠠᠭᠠᠨ ᠮᠣᠳᠤᠨ ᠡᠮᠡᠭᠡᠯᠲᠡᠢ ᠵᠣᠭᠰᠤᠵᠤ ᠪᠠᠢᠯᠠ᠃ ᠪᠦᠬᠦ ᠪᠡᠶᠡᠳᠦᠨᠢ ᠬᠠᠷᠠ ᠬᠥᠯᠦᠰᠦ ᠳᠠᠭᠰᠢᠷᠠᠵᠤ᠂ ᠴᠠᠪᠤᠭ ᠳᠡᠭᠡᠷᠡ ᠴᠠᠪᠠᠤᠲᠠᠢ ᠪᠣᠬᠢ ᠲᠦᠷᠬᠢᠭᠰᠡᠨᠰᠢᠭ ᠬᠠᠷᠠᠭᠳᠠᠪᠠ᠃
ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠳᠣᠲᠤᠷᠠ ᠴᠢᠨᠵᠤᠤᠲᠠᠢ ᠬᠠᠷᠠ ᠠᠷᠢᠬᠢ ᠴᠢᠳᠭᠤᠭᠰᠠᠨᠰᠢᠭ᠋ ᠪᠣᠯᠤᠯᠠ᠃ ᠶᠡᠷᠦᠨᠢ ᠽᠠᠨᠳᠠᠨ ᠬᠦᠷᠡᠩᠦᠨ ᠰᠢᠨᠠᠠᠴᠠ ᠬᠥᠯᠦᠰᠦ ᠳᠤᠰᠤᠯᠠᠲᠠᠯᠠ ᠤᠨᠤᠭᠰᠠᠨ ᠡᠳᠦᠷ ᠬᠡᠰᠢᠭᠲᠣᠭᠲᠠᠬᠤᠳᠤ ᠲᠣᠭᠠᠲᠠᠢᠶᠤᠮ᠃ ᠲᠡᠢᠮᠦᠡᠴᠡ ᠱᠣᠭᠲᠠᠢ ᠤᠯᠤᠰ 《ᠠᠢᠯᠠᠴᠠ ᠶᠠᠪᠤᠬᠤᠳᠤ ᠮᠣᠷᠢᠲᠠᠢ ᠭᠠᠷᠤᠭᠠᠳ ᠠᠯᠤᠰ ᠣᠴᠢᠪᠠᠯ ᠬᠥᠲᠦᠯᠦᠭᠡᠳ ᠭᠦᠶᠦᠳᠡᠭ》 ᠭᠡᠵᠦ ᠶᠠᠷᠢᠯᠴᠠᠳᠠᠭᠶᠤᠮ᠃ ᠬᠡᠰᠢᠭᠲᠣᠭᠲᠠᠬᠤ ᠲᠡᠰᠴᠦ ᠶᠠᠳᠠᠭᠠᠳ:
《ᠮᠢᠨᠦ ᠮᠣᠷᠢᠶᠢ ᠬᠠᠮᠢᠭᠠᠠᠴᠠ ᠪᠠᠷᠢᠵᠤ ᠤᠨᠤᠭᠰᠠᠨ ᠪᠤᠢ?》 ᠭᠡᠯᠡ᠃
《ᠯᠢᠦ ᠲᠤᠸᠠᠨ ᠵᠠᠩᠤᠨ ᠁》 ᠭᠡᠵᠦ ᠥᠨᠳᠦᠷ ᠪᠣᠷᠤ ᠬᠤᠪᠴᠠᠰᠤᠲᠠᠢ ᠫᠠᠭᠳᠠᠭᠠᠷ ᠬᠥᠮᠦᠨᠢ ᠬᠡᠯᠡᠬᠦᠳᠦ 《 ᠲᠠᠨᠠᠷ ᠮᠣᠷᠢᠶᠢ ᠤᠨᠤᠬᠤᠪᠠᠷ ᠪᠠᠷᠠᠬᠤᠦᠭᠡᠢ ᠪᠠᠰᠠ ᠥᠪᠡᠷᠦᠨᠢᠶᠡᠨ ᠭᠡᠨᠡ》 ᠭᠡᠵᠦ ᠪᠤᠷᠤᠭᠤᠪᠠᠷ ᠣᠢᠯᠠᠭᠠᠭᠰᠠᠨ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠠᠭᠤᠷᠨᠢ ᠥᠨᠳᠡᠭᠡᠨ ᠲᠣᠭᠤᠭᠠᠨᠳᠤ ᠪᠤᠴᠠᠯᠭᠠᠭᠰᠠᠨ ᠰᠦ᠋ᠰᠢᠭ ᠠᠮᠠᠪᠠᠷᠢᠶᠠᠨ ᠬᠥᠭᠡᠰᠦᠷᠡᠨ ᠭᠠᠷᠬᠤ ᠰᠢᠬᠠᠪᠠ᠃ ᠲᠡᠭᠡᠭᠡᠳ:
《ᠶᠠᠭᠤ ᠭᠡᠨᠡ?ᠮᠢᠨᠦ ᠮᠣᠷᠢ ᠪᠠᠢᠨᠠ》 ᠭᠡᠵᠦ ᠴᠤᠯᠪᠤᠭᠤᠷᠢᠨᠢ ᠲᠠᠢᠯᠲᠠᠯᠠ᠂
《ᠲᠦ᠋ ᠹᠧᠢ ᠁》 ᠭᠡᠳ ᠰᠠᠶᠢᠶᠢᠨ ᠬᠥᠮᠦᠨ ᠨᠡᠯᠢᠶᠡᠳ ᠦᠭᠡ ᠬᠡᠯᠡᠪᠡ᠃ ᠪᠡᠶᠡᠪᠡᠨ 《ᠬᠤᠯᠠᠭᠠᠢᠴᠢ ᠭᠡᠵᠦ ᠬᠡᠯᠡᠪᠡ》 ᠭᠡᠰᠡᠨ ᠪᠣᠳᠤᠯᠨᠢ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠠᠭᠤᠷᠢ ᠲᠤᠯᠤᠮ ᠬᠥᠭᠡᠷᠭᠡᠰᠢᠭ ᠬᠥᠭᠡᠷᠭᠡᠳᠡᠨ ᠪᠣᠰᠭᠠᠯᠠ᠃
《ᠲᠠᠨᠠᠷ ᠬᠠᠷᠢᠨ ᠲᠦ᠋ ᠹᠧᠢ ᠁》 ᠭᠡᠳ ᠬᠣᠮᠤᠬᠠᠢ ᠬᠤᠷᠤᠭᠤᠪᠠᠨ ᠴᠠᠭᠠᠳᠤᠬᠢᠶᠢᠨ ᠨᠢᠳᠦᠨᠳᠦ ᠬᠢᠲᠡᠯᠡ ᠲᠡᠷᠡ ᠬᠥᠮᠦᠨ᠂ ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ ᠤᠷᠤᠭᠤ ᠡᠪᠦᠭᠡᠨᠢ ᠴᠢᠷᠪᠡ᠃
ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠮᠥᠷᠦᠶᠢ ᠠᠯᠠᠭᠠᠳᠠᠵᠤ᠂
《ᠴᠢᠨᠦ ᠮᠣᠷᠢ ᠶᠠᠮᠠᠷ ᠡᠢᠮᠦ ᠡᠢᠮᠦ ᠪᠠᠢᠨᠠ ᠪᠤᠢ?》 ᠭᠡᠵᠦ ᠵᠡᠭᠦᠨ ᠭᠠᠷᠤᠨᠢᠶᠠᠨ ᠠᠯᠠᠭᠠ ᠳᠡᠭᠡᠷᠡ ᠬᠣᠮᠤᠬᠠᠢ ᠬᠤᠷᠤᠭᠤᠪᠠᠷᠢᠶᠠᠨ ᠵᠢᠷᠤᠬᠤᠳᠤ᠂
《ᠪᠢ ᠪᠢᠴᠢᠭ ᠮᠡᠳᠡᠳᠡᠭᠦᠭᠡᠢ ᠰᠣᠬᠤᠷ ᠬᠥᠮᠦᠨ᠃ ᠮᠠᠨᠤ ᠪᠦᠳᠦᠭᠦᠨ ᠮᠣᠷᠢ᠂ ᠳᠠᠭᠠ ᠬᠣᠶᠠᠷ ᠠᠯᠳᠠᠭᠰᠠᠨ》 ᠭᠡᠵᠦ ᠡᠪᠦᠭᠡᠨ ᠳᠦᠷᠰᠦᠯᠡᠨ ᠪᠡᠭᠴᠡᠩᠨᠡᠪᠡ᠃
《ᠴᠢᠨᠦ ᠮᠣᠷᠢ ᠶᠠᠮᠠᠷ ᠡᠢᠮᠦ ᠡᠢᠮᠦ ᠪᠠᠢᠨᠠ ᠪᠤᠢ?》 ᠭᠡᠵᠦ ᠭᠤᠶᠠᠪᠠᠨ ᠰᠢᠪᠦᠭᠡᠳᠡᠬᠦᠳᠦ ᠬᠡᠰᠢᠭᠲᠣᠭᠲᠠᠬᠤ ᠠᠮᠠᠪᠠᠨ ᠠᠩᠭᠠᠢᠨ ᠮᠡᠯᠡᠷᠡᠭᠰᠡᠨᠢᠶᠡᠨ ᠬᠤᠷᠤᠭᠤᠪᠠᠨ ᠴᠠᠭᠠᠷᠢᠭᠯᠠᠵᠤ ᠭᠤᠷᠪᠠᠶᠢ ᠭᠣᠵᠤᠢᠯᠭᠠᠨ ᠭᠠᠵᠠᠷ ᠳᠡᠭᠡᠷᠡ ᠳᠡᠪᠢᠰᠭᠡᠷᠲᠡᠢ ᠴᠢᠨᠳᠠᠮᠤᠨᠢ ᠲᠠᠮᠠᠭᠠ ᠵᠢᠷᠤᠪᠠ᠃ ᠴᠢᠩᠭᠢᠭᠡᠳ ᠬᠤᠷᠤᠭᠤᠪᠠᠷᠢᠶᠠᠨ ᠬᠠᠢᠴᠢᠯᠠᠨ ᠳᠦᠷᠰᠦᠯᠡᠵᠦ ᠵᠡᠭᠦᠨ ᠴᠢᠬᠢ ᠤᠷᠤᠭᠤᠪᠠᠨ ᠵᠢᠭᠠᠵᠠᠢ᠃ ᠥᠨᠳᠦᠷ ᠬᠥᠮᠦᠨ ᠲᠣᠯᠤᠭᠠᠢᠪᠠᠨ ᠳᠣᠬᠢᠵᠤ:
《ᠳ᠋ᠦᠢ ᠳ᠋ᠦᠢ》 ᠭᠡᠳ ᠨᠥᠭᠦᠭᠡᠳᠡᠬᠢ ᠴᠡᠷᠢᠭᠲᠦ ᠬᠡᠳᠦᠨ ᠦᠭᠡ ᠶᠠᠷᠢᠵᠤ ᠡᠮᠡᠭᠡᠯᠢᠶᠡᠨ ᠰᠣᠯᠢᠭᠤᠯᠪᠠ᠃
《ᠱᠣᠣ ᠳ᠋ᠢ! ᠱᠣᠣ ᠳ᠋ᠢ ᠮᠣᠷᠢ》 ᠭᠡᠵᠦ ᠬᠡᠰᠢᠭᠲᠣᠭᠲᠠᠬᠤ ᠳᠦᠷᠰᠦᠲᠡᠢ ᠳᠦᠷᠰᠦᠦᠭᠡᠢ ᠮᠡᠳᠡᠬᠦᠪᠡᠷᠢᠶᠡᠨ ᠶᠠᠷᠢᠭᠰᠠᠨ ᠪᠣᠯᠪᠠᠴᠤ ᠥᠨᠳᠦᠷ ᠬᠥᠮᠦᠨ:
《ᠲᠦ᠋ ᠹᠧᠢ ᠁》 ᠭᠡᠳ ᠫᠤᠤ ᠬᠠᠷᠠᠭᠠᠯᠠᠬᠤᠰᠢᠭ᠋ ᠶᠠᠩᠵᠤᠪᠠᠷ ᠵᠠᠩᠭᠠᠪᠠ᠃ 《ᠽᠠᠨᠳᠠᠨ ᠬᠦᠷᠡᠩᠢᠶᠡᠨ ᠠᠪᠤᠭᠰᠠᠨᠳᠠᠭᠠᠨ ᠬᠠᠨᠴᠤᠢ ᠳᠣᠲᠤᠷᠠᠪᠠᠨ ᠭᠤᠷᠪᠠ ᠵᠠᠯᠪᠠᠷᠢᠶᠠ》 ᠭᠡᠵᠦ ᠪᠣᠳᠤᠭᠠᠳ ᠨᠣᠭᠲᠤᠶᠢᠨᠢ ᠰᠣᠯᠢᠵᠤ ᠥᠭᠭᠦᠯᠡ᠃
ᠰᠠᠶᠢᠶᠢᠨ ᠦᠭᠡ ᠪᠤᠯᠢᠶᠠᠯᠳᠤᠭᠰᠠᠨ ᠬᠥᠮᠦᠨ ᠳᠡᠪᠲᠡᠷ ᠭᠠᠷᠭᠠᠵᠤ ᠵᠣᠭᠰᠤᠭᠠᠪᠠᠷᠢᠶᠠᠨ ᠬᠡᠳᠦᠨ ᠬᠢᠲᠠᠳ ᠦᠰᠦᠭ ᠲᠠᠲᠠᠯᠠᠵᠤ᠂ ᠨᠢᠭᠡ ᠴᠠᠭᠠᠰᠤ ᠤᠷᠠᠭᠠᠳ ᠡᠪᠦᠭᠡᠨᠳᠦ ᠥᠭᠪᠡ᠃
《ᠲᠠᠨᠠᠷ ᠳᠠᠭᠠᠶᠢᠮᠢᠨᠢ ᠥᠭᠬᠦ ᠡᠰᠡᠬᠦᠪᠡᠨ ᠥᠪᠡᠷᠢᠶᠡᠨ ᠮᠡᠳᠡᠯᠭᠦᠢ᠃ ᠪᠢ ᠭᠠᠷ ᠬᠠᠷᠠᠵᠤ ᠪᠠᠢᠭᠠ ᠬᠥᠮᠦᠨ ᠪᠢᠰᠢ》 ᠭᠡᠪᠡ᠃ ᠥᠨᠳᠦᠷ ᠪᠡᠶᠡᠲᠡᠢ ᠬᠥᠮᠦᠨ:
《ᠮᠠᠨᠠᠢ᠂ ᠠᠷᠠᠳᠤᠨ ᠶᠠᠭᠤᠮᠠᠶᠢ ᠵᠦᠭᠡᠷ ᠠᠪᠬᠤᠦᠭᠡᠢ》 ᠭᠡᠳ ᠥᠨᠥᠬᠢ ᠴᠠᠭᠠᠰᠤᠶᠢ ᠡᠪᠦᠭᠡᠨᠦ ᠡᠪᠦᠷᠲᠦ ᠬᠢᠵᠦ :
《ᠪᠠᠶᠠᠷᠲᠠᠢ》 ᠭᠡᠳ ᠮᠣᠷᠳᠠᠯᠠ᠃ ᠬᠡᠰᠢᠭᠲᠣᠭᠲᠠᠬᠤ 《ᠳᠠᠭᠠᠶᠢᠮᠢᠨᠢ ᠶᠠᠭᠠᠬᠢᠭᠰᠠᠨ ᠪᠣᠯ ᠳ᠋ᠠ᠃ 〈ᠣᠷᠤᠦᠭᠡᠢᠠᠴᠠ ᠥᠬᠢᠨᠲᠡᠢ〉 ᠭᠡᠭᠴᠢᠪᠡᠷ ᠠᠯᠠᠭᠠᠨ ᠴᠢᠨᠡᠭᠡᠨ ᠴᠠᠭᠠᠰᠤᠪᠠᠷ ᠰᠣᠯᠢᠬᠤ ᠪᠣᠯᠵᠠᠢᠤᠤ?》 ᠭᠡᠳ ᠽᠠᠨᠳᠠᠨ ᠬᠦᠷᠡᠩᠦᠨ ᠬᠥᠯᠦᠰᠦᠶᠢ ᠮᠠᠭᠠᠵᠢᠭᠰᠠᠭᠠᠷ ᠲᠡᠳᠡᠨᠢ ᠳᠠᠯᠳᠠ ᠣᠷᠤᠲᠠᠯᠠ ᠭᠥᠯᠢᠷᠡᠨ ᠵᠣᠭᠰᠤᠵᠠᠢ᠃
* * *
ᠵᠠᠬᠠᠶᠢᠨ ᠮᠠᠯᠴᠢᠳ ᠪᠠᠷᠤᠭᠴᠠᠭᠠᠯᠠᠨ ᠡᠯᠡᠰᠦ ᠮᠠᠩᠬᠠᠨᠤ ᠪᠡᠷᠬᠡ ᠪᠣᠢᠳᠠᠳᠤ ᠨᠡᠭᠦᠭᠰᠡᠨ ᠪᠠᠢᠪᠠ᠃ ᠨᠤᠲᠤᠭᠤᠨ ᠰᠢᠷᠠ ᠢᠰᠡᠭᠡᠢ ᠭᠡᠵᠦ ᠪᠣᠳᠤᠳᠠᠭ ᠪᠥᠭᠡᠳ 《ᠳᠠᠢᠨ ᠳᠠᠵᠢᠨ ᠪᠣᠯ ᠭᠦᠷᠦᠨ ᠲᠥᠷᠦᠶᠢᠨ ᠬᠡᠷᠡᠭ》᠂ 《ᠬᠤᠪᠢᠪᠠᠨ ᠬᠥᠭᠡᠭᠡᠵᠦ ᠬᠤᠯᠠᠪᠠᠨ ᠤᠨᠤᠭᠰᠠᠨ ᠮᠠᠨᠳᠤ ᠳᠠᠯᠵᠢᠦᠭᠡᠢ》 ᠭᠡᠳᠡᠭ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠤᠰᠤᠨᠤ ᠲᠠᠪᠤᠨ ᠡᠷᠦᠬᠡ ᠠᠢᠯ ᠵᠠᠬᠠ ᠨᠤᠲᠤᠭᠢᠶᠠᠨ ᠬᠠᠷᠠᠵᠤ ᠬᠣᠴᠤᠷᠤᠭᠰᠠᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠵᠠᠷᠢᠮ ᠠᠢᠯᠨᠢ ᠠᠬᠠ ᠳᠡᠭᠦᠦ᠂ ᠤᠷᠤᠭ ᠲᠥᠷᠦᠯᠳᠡᠭᠡᠨ ᠭᠡᠷ ᠮᠠᠯᠢᠶᠠᠨ ᠢᠯᠡᠭᠡᠭᠰᠡᠨ ᠪᠤᠶᠤ ᠵᠠᠯᠠᠭᠤᠴᠤᠳᠨᠢ ᠮᠠᠯ ᠬᠥᠷᠦᠩᠭᠡᠪᠡᠨ ᠠᠪᠴᠤ ᠵᠠᠢᠯᠠᠭᠰᠠᠨ ᠪᠣᠯᠬᠣᠷ 《ᠳᠡᠭᠡᠳᠦ ᠭᠣᠣᠯ》ᠤᠨ ᠳᠡᠷᠡᠰᠦᠨᠳᠦ ᠬᠡᠳᠦᠨ ᠨᠣᠣᠷᠠᠩᠬᠠᠢ ᠪᠣᠷᠤ ᠭᠡᠷᠡᠴᠡ ᠵᠠᠯᠬᠠᠭᠤᠷᠠᠭᠰᠠᠨ ᠬᠥᠬᠡ ᠤᠲᠤᠭᠠ ᠰᠤᠭᠤᠨᠠᠭᠯᠠᠵᠤ᠂ ᠰᠣᠬᠤᠷ᠂ ᠳᠣᠭᠤᠯᠠᠩ ᠨᠠᠰᠤᠲᠠᠢᠴᠤᠳ ᠬᠡᠨᠵᠡ ᠲᠤᠭᠤᠯ ᠬᠤᠷᠠᠭᠠᠪᠠᠨ ᠠᠷᠭᠠᠮᠵᠢᠭᠠᠳ ᠴᠠᠢᠶᠢᠨ ᠰᠦ᠋ ᠠᠪᠳᠠᠭ ᠠᠵᠢᠯᠲᠠᠢ ᠪᠠᠢᠪᠠ᠃ ᠲᠡᠳᠡ ᠳᠡᠭᠡᠷᠡ ᠨᠠᠷᠠᠲᠠᠢ ᠡᠷᠦᠬᠡᠪᠡᠨ ᠪᠦᠲᠡᠭᠡᠴᠢᠬᠡᠳᠡᠭ ᠪᠣᠯᠬᠣᠷ ᠡᠳᠦᠷ ᠰᠥᠨᠢᠶᠢ ᠢᠯᠭᠠᠬᠤᠦᠭᠡᠢ ᠡᠵᠡᠭᠦᠢ ᠭᠡᠷᠦᠳᠶᠦᠮᠦᠦ? ᠭᠡᠳ ᠤᠯᠤᠰ ᠢᠷᠡᠬᠦᠨᠢ ᠴᠥᠭᠡᠷᠡᠪᠡ᠃
ᠬᠡᠰᠢᠭᠲᠣᠭᠲᠠᠬᠤ ᠡᠳᠦᠷ ᠪᠦᠷᠢ ᠲᠠᠪᠤᠨ ᠦᠬᠡᠷᠢᠶᠡᠨ ᠭᠤᠤ ᠭᠠᠩᠭᠠᠳᠤ ᠢᠳᠡᠰᠢᠯᠡᠭᠦᠯᠦᠭᠡᠳ ᠴᠠᠭᠤᠨ ᠴᠠᠢ ᠪᠤᠳᠠᠭᠠᠪᠠᠷᠢᠶᠠᠨ ᠬᠠᠷᠢᠳᠠᠭ ᠭᠡᠨᠡ᠃ 《ᠳᠡᠭᠡᠳᠦ ᠭᠣᠣᠯ》ᠳᠤ ᠣᠳᠤ ᠰᠣᠳᠤ ᠪᠣᠯᠵᠤ ᠨᠢᠳᠦᠨᠳᠦ ᠳᠤᠯᠠᠭᠠᠬᠠᠨ ᠬᠠᠷᠠᠭᠳᠠᠬᠤᠠᠴᠠ ᠭᠠᠭᠴᠠᠬᠠᠨ ᠽᠠᠨᠳᠠᠨ ᠬᠦᠷᠡᠩ ᠪᠠᠢᠯᠠ᠃ ᠭᠡᠪᠡᠴᠦ 《ᠬᠠᠮᠠᠷᠲᠤᠨᠢ ᠤᠲᠤᠭᠠ ᠰᠠᠭᠤᠭᠰᠠᠨ ᠳᠣᠬᠢ ᠲᠣᠯᠤᠭᠠᠢ》 ᠨᠡᠷᠡᠲᠡᠢ ᠬᠡᠰᠢᠭᠲᠣᠭᠲᠠᠬᠤ ᠰᠥᠨᠢ ᠪᠦᠷᠢ ᠶᠠᠪᠤᠵᠤ ᠬᠡᠭᠡᠷᠡ ᠬᠣᠨᠤᠭᠠᠳ ᠦᠷᠦᠨ ᠰᠢᠪᠠᠭᠤᠰᠢᠭ᠋ ᠡᠷᠭᠢᠳᠡᠭ ᠵᠤᠷᠰᠢᠯᠲᠠᠢ ᠪᠣᠯᠪᠠ᠃ ᠡᠨᠡ ᠡᠳᠦᠷ ᠬᠡᠰᠢᠭᠲᠣᠭᠲᠠᠬᠤ ᠴᠠᠢ ᠬᠣᠭᠤᠯᠠᠪᠠᠨ ᠵᠡᠬᠡᠵᠦ ᠨᠢᠭᠡᠮᠦᠰᠦᠨ ᠨᠠᠷᠠ ᠤᠨᠠᠬᠤᠪᠠᠷ ᠬᠠᠷᠢᠵᠤ ᠢᠷᠡᠬᠦ ᠪᠣᠳᠤᠯᠲᠠᠢ ᠮᠣᠷᠢᠪᠠᠨ ᠡᠮᠡᠭᠡᠯᠯᠡᠵᠦ ᠪᠠᠢᠯᠠ᠃
ᠲᠠᠷᠢᠬᠢ ᠴᠣᠷᠭᠢᠵᠤ ᠴᠣᠭᠤᠯᠤᠮᠠ ᠨᠠᠷᠠ ᠠᠷᠭᠠ ᠠᠭᠠᠰᠢ ᠠᠯᠳᠠᠷᠠᠲᠠᠯᠠ ᠳᠥᠭᠡᠨᠡᠵᠦ ᠪᠠᠢᠪᠠ᠃ ᠠᠮᠢᠲᠠᠳᠤᠨ ᠴᠢᠰᠤ ᠰᠢᠮᠡᠶᠢ ᠰᠣᠷᠤᠯᠠ ᠭᠡᠳ ᠴᠠᠳᠴᠤ ᠬᠠᠩᠬᠤᠪᠠᠨ ᠮᠠᠷᠲᠠᠭᠰᠠᠨ ᠬᠡᠳᠡᠭᠡᠨᠡ᠂ ᠬᠥᠬᠡ ᠲᠦᠷᠦᠭᠦᠦᠯᠡ ᠽᠠᠨᠳᠠᠨ ᠬᠦᠷᠡᠩᠢ ᠠᠮᠤᠷ ᠪᠠᠢᠯᠭᠠᠬᠤᠦᠭᠡᠢ᠃ ᠬᠡᠰᠢᠭᠲᠣᠭᠲᠠᠬᠤ᠂ ᠳᠡᠪᠡᠯᠦᠨᠢᠶᠡᠨ ᠲᠤᠭᠤᠷᠠᠢᠪᠠᠷ ᠰᠠᠪᠠᠵᠤ ᠬᠡᠳᠦᠶᠢ ᠠᠯᠠᠭᠠᠳ ᠠᠷᠭᠠ ᠶᠠᠳᠠᠬᠤᠳᠠᠭᠠᠨ ᠮᠣᠷᠢᠪᠠᠨ ᠬᠣᠷᠤᠭᠠᠨᠤ ᠰᠡᠭᠦᠳᠡᠷᠲᠦ ᠣᠷᠤᠭᠤᠯᠤᠨ ᠤᠶᠠᠵᠠᠢ᠃
ᠬᠣᠷᠯᠣ᠂ ᠰᠢᠷᠠ ᠲᠣᠰᠤ᠂ ᠥᠷᠦᠮᠡ ᠰᠠᠮᠤᠷᠤᠭᠰᠠᠨ ᠬᠦᠷᠡᠩ ᠤᠯᠠᠭᠠᠨ ᠴᠠᠢᠪᠠᠨ ᠠᠭᠤᠳᠠᠯᠵᠤ᠂ ᠳᠠᠷᠤᠵᠤ ᠳᠠᠯᠳᠠᠯᠠᠭᠰᠠᠨ ᠬᠤᠷᠤᠳ᠂ ᠬᠠᠭᠤᠷᠠᠢ ᠪᠤᠳᠠᠭᠠᠠᠴᠠᠪᠠᠨ ᠭᠠᠷᠭᠠᠵᠤ ᠬᠣᠶᠠᠭᠤᠯᠠᠪᠠᠨ ᠬᠥᠯᠦᠰᠦ ᠮᠣᠨᠴᠤᠭᠯᠠᠲᠠᠯᠠ ᠤᠤᠭᠤᠵᠤ ᠰᠠᠭᠤᠯᠠ᠃
《ᠮᠤᠤᠰᠠᠢᠨ ᠳᠡᠭᠡᠷᠡᠮᠦᠳᠦᠨ ᠲᠣᠯᠤᠭᠠᠢᠨᠢ ᠬᠡᠪᠲᠡᠬᠦ ᠴᠠᠭ ᠪᠣᠯᠵᠤ ᠰᠢᠪ ᠳ᠋ᠠ᠃ ᠠᠷᠪᠠ ᠬᠣᠷᠢᠨ ᠡᠳᠦᠷᠲᠦ ᠰᠤᠷᠠᠭᠦᠭᠡᠢ ᠪᠠᠢᠨᠠ》 ᠭᠡᠵᠦ ᠬᠡᠰᠢᠭᠲᠣᠭᠲᠠᠬᠤᠶᠢ ᠰᠠᠬᠠᠯᠢᠶᠠᠨ ᠰᠢᠪᠲᠤᠷᠬᠤᠳᠤ ᠬᠣᠷᠯᠣ ᠵᠢᠷᠲᠠᠭᠠᠢ ᠨᠢᠳᠦᠪᠡᠨ ᠬᠥᠳᠡᠯᠭᠡᠨ ᠢᠨᠢᠶᠡᠮᠰᠦᠭᠯᠡᠵᠦ:
《ᠪᠠ ᠯᠦ ᠭᠡᠰᠡᠨᠴᠢᠨᠢ ᠶᠡᠷᠦᠨᠢ ᠪᠠᠭᠠᠲᠤᠷᠤᠳ ᠭᠡᠰᠡᠨ ᠦᠭᠡ ᠰᠢᠪ ᠳ᠋ᠠ᠃ ᠨᠢᠭᠡ ᠴᠣᠬᠢᠪᠠᠯ ᠨᠢᠭᠡᠶᠢ ᠬᠠᠪᠲᠠᠭᠠᠢᠯᠠᠭᠠᠳ ᠪᠠᠢᠬᠤ ᠰᠤᠷᠠᠭᠲᠠᠢ᠃ 》
《ᠬᠥᠮᠦᠨᠢᠶᠡᠷᠴᠦ ᠰᠠᠢᠨ ᠤᠯᠤᠰᠶᠤᠮᠤᠤ? ᠭᠡᠪᠡᠴᠦ ᠁》 ᠭᠡᠳ ᠠᠯᠴᠢᠭᠤᠷ ᠳᠣᠲᠤᠷᠠ ᠡᠪᠬᠡᠭᠡᠰᠦᠲᠡᠢ ᠴᠠᠭᠠᠰᠤ ᠭᠠᠷᠭᠠᠵᠤ᠂ ᠠᠷᠤ ᠥᠪᠦᠷᠢᠨᠢ ᠪᠠᠬᠠᠨ ᠰᠢᠨᠵᠢᠵᠦ:
《ᠡᠨᠡᠴᠢᠨᠢ ᠬᠡᠷᠡᠭᠲᠡᠢᠶᠦᠮᠦᠦ?》
《ᠬᠡᠷᠡᠭ ᠪᠠᠢᠳᠠᠭᠯᠠ ᠪᠠᠢᠯᠭᠦᠢ! ᠥᠨᠳᠦᠷ ᠨᠣᠶᠠᠨ ᠮᠣᠷᠳᠠᠬᠤᠳᠠᠭᠠᠨ ᠬᠡᠷᠡᠭ ᠪᠣᠯᠭᠠᠵᠤ ᠪᠢᠴᠢᠭᠦᠯᠦᠭᠰᠡᠨ ᠰᠢᠤ》 ᠭᠡᠵᠦ ᠬᠣᠷᠯᠣᠶᠢᠨ ᠶᠠᠷᠢᠬᠤᠶᠢ ᠲᠠᠰᠤᠯᠳᠠᠭᠤᠯᠵᠤ᠂
《ᠳᠡᠮᠡᠢ ᠬᠡᠷᠡᠭ ᠪᠠᠢᠬᠤ ᠠ᠋! ᠬᠠᠯᠵᠠᠨ ᠪᠣᠷᠤᠮᠢᠨᠢ ᠰᠠᠢᠨ ᠮᠣᠷᠢ ᠪᠣᠯᠬᠣᠷᠶᠤᠮ ᠳ᠋ᠠ ᠁》 ᠭᠡᠳ ᠳᠠᠬᠢᠨ ᠪᠣᠭᠤᠵᠤ ᠡᠪᠦᠷᠲᠦᠯᠡᠭᠡᠳ ᠭᠠᠩᠰᠠᠪᠠᠨ 《ᠹᠦᠳ ᠹᠦᠳ》 ᠦᠯᠢᠶᠡᠵᠡᠢ᠃ ᠡᠮᠦᠨᠡ ᠠᠢᠯᠤᠨ ᠶᠠᠨᠵᠢ ᠡᠮᠡᠭᠡᠨ ᠬᠣᠷᠮᠤᠢᠪᠠᠨ ᠪᠠᠷᠢᠭᠰᠠᠭᠠᠷ ᠮᠠᠢᠵᠢᠭᠢ ᠬᠠᠢᠵᠢᠭᠢ ᠭᠦᠶᠦᠨ ᠢᠷᠡᠵᠦ:
《ᠬᠡ - ᠬᠡᠰᠢᠭ! ᠮᠣᠷᠢᠪᠠᠨᠳᠠ - ᠭᠡ - ᠷᠡᠮ》 ᠭᠡᠵᠦ ᠠᠮᠢᠰᠭᠤᠯᠳᠠᠭᠠᠨ ᠬᠠᠬᠠᠨ ᠴᠠᠴᠠᠨ ᠪᠠᠢᠵᠤ ᠪᠠᠷᠠᠭᠤᠨ ᠡᠮᠦᠨᠡᠰᠢᠪᠡᠨ ᠵᠢᠭᠠᠪᠠ᠃ ᠬᠡᠰᠢᠭᠲᠣᠭᠲᠠᠬᠤ ᠮᠠᠯᠠᠭᠠᠢᠪᠠᠨᠴᠤ ᠡᠮᠦᠰᠴᠦ ᠵᠠᠪᠳᠤᠭᠰᠠᠨᠦᠭᠡᠢ ᠳᠡᠪᠬᠡᠷᠦᠨ ᠭᠠᠷᠲᠠᠯᠠ ᠰᠢᠨᠠᠭᠠᠨ ᠪᠠᠷᠢᠭᠤᠯ ᠬᠣᠷᠮᠤᠢᠠᠴᠠᠨᠢ ᠵᠡᠭᠦᠭᠳᠡᠵᠦ᠂ ᠸᠠᠭᠠᠷᠲᠠᠢ ᠴᠠᠢᠪᠠᠨ ᠲᠣᠩᠭᠤᠷᠤᠭᠤᠯᠪᠠ᠃ ᠬᠣᠷᠯᠣ᠂ ᠬᠣᠷᠤᠭᠠᠨᠳᠤ ᠬᠣᠷᠢᠭᠰᠠᠨ ᠪᠥᠵᠦᠩᠰᠢᠭ ᠭᠡᠷ ᠳᠣᠲᠤᠷᠠᠪᠠᠨ ᠡᠷᠭᠢᠯᠳᠦᠨ ᠭᠦᠶᠦᠵᠦ᠂ ᠪᠠᠭᠠ ᠰᠠᠭᠠ ᠶᠠᠭᠤᠮᠠᠪᠠᠨ ᠡᠨᠡ ᠲᠡᠷᠡᠭᠦᠷ ᠴᠢᠬᠢᠵᠦ ᠣᠷᠤᠯᠳᠤᠨᠠ᠃
ᠬᠡᠰᠢᠭᠲᠣᠭᠲᠠᠬᠤᠶᠢ ᠮᠣᠷᠳᠠᠭᠠᠳ ᠳᠠᠪᠢᠷᠠᠮᠠᠭᠴᠠ ᠽᠠᠨᠳᠠᠨ ᠬᠦᠷᠡᠩ ᠴᠢᠬᠢᠪᠡᠨ ᠬᠤᠯᠮᠠᠢᠭᠠᠳ ᠬᠤᠷᠳᠤᠯᠠᠪᠠ᠃ ᠵᠢᠯᠤᠭᠤ ᠲᠠᠯᠪᠢᠮᠠᠭᠴᠠ ᠬᠠᠷᠪᠤᠭᠰᠠᠨ ᠰᠤᠮᠤᠰᠢᠭ᠋ ᠭᠠᠷᠴᠠᠲᠠᠢ ᠪᠣᠯᠬᠣᠷ ᠬᠥᠮᠦᠨ 《ᠫᠤᠤᠵᠢᠩ》 ᠬᠦᠷᠡᠩ ᠭᠡᠳᠡᠭ ᠪᠢᠯᠡ᠃ ᠭᠡᠪᠡᠴᠦ ᠥᠷᠯᠦᠭᠡ ᠠᠮᠠᠭᠠᠢ ᠬᠤᠭᠤᠯᠬᠤ ᠰᠢᠬᠠᠭᠠᠳ᠂ ᠦᠳᠡᠰᠢ ᠲᠠᠰᠢᠭᠤᠷ ᠰᠠᠯᠪᠠᠯᠳᠠᠭ ᠪᠢᠰᠢ᠂ ᠳᠠᠭᠠᠭᠠᠴᠠᠲᠠᠢ ᠮᠣᠷᠢᠰᠠᠨ᠃
ᠳᠠᠢᠰᠤᠨ ᠭᠠᠯᠯᠠᠵᠤ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠬᠣᠰᠢᠭᠤᠷᠠᠨ ᠨᠡᠬᠡᠪᠡ᠃ ᠲᠡᠷᠢᠭᠦᠨᠳᠦᠨᠢ ᠰᠠᠷᠠᠯ ᠮᠣᠷᠢᠲᠠᠢ ᠬᠥᠮᠦᠨ ᠵᠤᠤᠵᠠᠢ ᠬᠣᠯᠪᠤᠭᠠᠳ ᠨᠡᠯᠢᠶᠡᠳ ᠣᠢᠷᠠᠲᠤᠨ ᠳᠥᠬᠦᠵᠦ ᠪᠠᠢᠨᠠ᠃ ᠽᠠᠨᠳᠠᠨ ᠬᠦᠷᠡᠩᠦᠨ ᠭᠠᠩ ᠳᠥᠷᠪᠡᠨ ᠲᠤᠭᠤᠷᠠᠢ ᠭᠠᠵᠠᠷᠤᠨ ᠬᠥᠷᠦᠰᠦᠶᠢ ᠡᠷᠭᠢᠭᠦᠯᠵᠦ ᠪᠠᠢᠭᠠᠰᠢᠭ᠋ ᠤᠯᠠᠭᠠᠨ ᠮᠠᠨᠠᠨ ᠲᠠᠲᠠᠭᠤᠯᠤᠭᠠᠳ᠂ ᠰᠢᠳᠦᠪᠡᠨ ᠢᠷᠵᠠᠢᠨ ᠰᠦᠷᠦᠭ ᠮᠠᠯ ᠤᠷᠤᠭᠤ ᠨᠣᠴᠤᠭᠰᠠᠨ ᠴᠢᠨᠤᠠᠰᠢᠭ᠋ ᠳᠠᠢᠰᠤᠨᠤ ᠠᠮᠠ ᠬᠠᠮᠠᠷᠢ ᠬᠠᠭᠤᠷᠠᠢ ᠰᠢᠷᠤᠢᠪᠠᠷ ᠲᠦᠭᠵᠢᠵᠦ ᠪᠠᠢᠯᠠ᠃ ᠢᠰᠭᠡᠷᠦᠨ ᠱᠤᠤᠭᠢᠬᠤ ᠰᠤᠮᠤ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠴᠢᠬᠢᠨᠦ ᠣᠮᠤᠭᠢ ᠳᠡᠯᠡᠰᠴᠦ ᠥᠩᠭᠡᠷᠡᠵᠦ ᠪᠠᠢᠭᠠᠰᠢᠭ᠋ ᠪᠥᠭᠡᠳ ᠵᠠᠷᠢᠮᠳᠠᠭᠠᠨ ᠪᠦᠷ ᠲᠣᠯᠤᠭᠠᠢ ᠳᠡᠭᠡᠷᠡᠨᠢ ᠬᠠᠭᠠᠷᠠᠵᠤ ᠪᠠᠢᠬᠤᠰᠢᠭ᠋ 《ᠲᠢᠱ ᠨᠢᠱ》 ᠳᠤᠤᠭᠠᠷᠤᠨᠠ᠃ ᠬᠡᠳᠦᠢᠳᠦ ᠬᠠᠨᠠᠰᠠᠨᠢ ᠰᠦᠪᠡᠯᠡᠭᠡᠳ ᠠᠪᠳᠠᠭ ᠪᠣᠯ ᠭᠡᠬᠦᠳᠦ ᠲᠣᠯᠤᠭᠠᠢᠶᠢᠨ ᠦᠰᠦᠨᠢ ᠵᠢᠷᠦᠰ ᠵᠢᠷᠦᠰ ᠬᠥᠳᠡᠯᠬᠦᠰᠢᠭ ᠪᠠᠢᠪᠠ᠃ 《ᠣᠨᠤᠳᠠᠭ ᠪᠣᠯ ᠳᠤᠲᠠᠭᠤ ᠵᠠᠭᠤᠷᠮᠠᠭᠢᠶᠠᠷ ᠶᠠᠭᠤ ᠬᠢᠬᠦ ᠪᠤᠢ? ᠰᠢᠭᠤᠳ ᠭᠣᠣᠯᠢᠶᠠᠷᠮᠢᠨᠢ ᠲᠤᠰᠤᠭ ᠳ᠋ᠠ 》 ᠭᠡᠵᠦ ᠪᠣᠳᠤᠭᠠᠳ ᠪᠦᠭᠦᠷᠭᠡᠨᠳᠡᠭᠡᠨ ᠨᠠᠭᠠᠯᠳᠤᠭᠰᠠᠨᠰᠢᠭ᠋ ᠽᠠᠨᠳᠠᠨ ᠬᠦᠷᠡᠩᠦᠨ ᠮᠤᠨᠳᠠᠭᠠᠶᠢᠨ ᠵᠥᠪ ᠪᠤᠷᠤᠭᠤ ᠲᠠᠯᠠᠪᠠᠷ ᠭᠡᠳᠡᠷᠭᠡᠨ ᠬᠠᠷᠠᠵᠤ᠂ ᠤᠷᠤᠯᠳᠤᠭᠠᠨᠤ ᠬᠡᠦᠬᠡᠳᠰᠢᠭ ᠬᠡᠯᠪᠡᠷᠢᠨ ᠭᠤᠶᠠᠳᠠᠭᠠᠳ ᠤᠷᠤᠭᠰᠢ ᠲᠡᠮᠡᠦᠯᠦᠨᠡ᠃ ᠽᠠᠨᠳᠠᠨ ᠬᠦᠷᠡᠩᠦᠨ ᠰᠠᠮᠤᠷᠳᠠᠵᠤ ᠪᠠᠢᠬᠤᠨᠢ ᠶᠣᠰᠤᠲᠠᠢ 《ᠳᠥᠷᠪᠡᠨ ᠲᠤᠭᠤᠷᠠᠢᠲᠤ ᠳᠠᠪᠬᠢᠭᠠᠳ ᠭᠦᠢᠴᠡᠬᠦ ᠪᠠᠢᠲᠤᠭᠠᠢ᠂ ᠲᠡᠮᠦᠷ ᠰᠤᠮᠤᠴᠤ ᠬᠠᠷᠪᠤᠭᠠᠳ ᠬᠦᠷᠬᠦᠦᠭᠡᠢ》 ᠬᠡᠮᠡᠷ ᠵᠠᠳᠠᠷᠠᠭᠤᠯᠵᠤ ᠪᠠᠢᠨᠠ ᠳ᠋ᠠ᠃ ᠭᠡᠪᠡᠴᠦ ᠥᠨᠥ ᠬᠣᠶᠠᠷ ᠰᠠᠷᠠᠯ ᠮᠣᠷᠢᠲᠠᠨ ᠪᠠᠢᠵᠤ ᠬᠣᠯᠠᠳᠬᠤᠦᠭᠡᠢ᠂ ᠪᠠᠷᠠ ᠲᠠᠰᠤᠷᠠᠬᠤᠦᠭᠡᠢ ᠨᠡᠬᠡᠯ ᠬᠠᠲᠠᠭᠤᠲᠠᠢ ᠬᠥᠭᠡᠭᠡᠵᠦ ᠵᠠᠷᠢᠮᠳᠠᠭᠠᠨ ᠨᠡᠯᠢᠶᠡᠳ ᠣᠢᠷᠠᠲᠤᠬᠤᠰᠢᠭ᠋ ᠬᠠᠷᠠᠭᠳᠠᠪᠠ᠃
ᠽᠠᠨᠳᠠᠨ ᠬᠦᠷᠡᠩᠦᠨ ᠳᠥᠷᠪᠡᠨ ᠬᠥᠯ ᠳᠣᠣᠷᠠ ᠴᠠᠷᠠᠭᠠ ᠲᠠᠲᠠᠬᠤᠪᠠᠨ ᠪᠠᠢᠯᠠ᠃ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠪᠣᠳᠤᠯᠳᠤ 《ᠥᠨᠳᠦᠷ ᠨᠣᠶᠠᠨᠤ ᠤᠨᠤᠭᠰᠠᠨ ᠬᠡᠪᠢᠶᠡᠷᠨᠢ ᠥᠭᠭᠦᠭᠰᠡᠨ ᠪᠣᠯ ᠁》 《ᠲᠣᠰᠤ ᠰᠠᠮᠤᠷᠤᠭᠰᠠᠨ ᠴᠠᠢᠪᠠᠷ ᠲᠣᠯᠤᠭᠠᠢᠪᠠᠨ ᠠᠷᠠᠯᠵᠢᠶᠠ ᠬᠢᠪᠡ?》 ᠭᠡᠬᠦᠨᠢ ᠤᠯᠠᠮ ᠴᠡᠭᠡᠵᠢ ᠬᠦᠨᠳᠦᠷᠡᠭᠦᠯᠬᠦ ᠮᠡᠲᠦ ᠠᠵᠢ᠃
ᠫᠤᠤᠶᠢᠨ ᠳᠠᠭᠤᠨ ᠨᠠᠮᠳᠠᠵᠤ ᠳᠣᠲᠤᠷᠠᠨᠢ ᠪᠠᠬᠠᠨ ᠣᠩᠭᠤᠢᠭᠠᠳ᠂ ᠡᠷᠭᠢᠵᠦ ᠬᠠᠷᠠᠪᠠᠯ ᠬᠣᠶᠠᠷ ᠮᠣᠷᠢᠲᠠᠨᠤ ᠰᠡᠭᠦᠳᠡᠷᠨᠢᠴᠦ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠥᠭᠡᠳ ᠬᠡᠳᠦ ᠬᠡᠳᠦᠨ ᠠᠭᠤᠯᠠ ᠨᠢᠷᠤᠭᠤᠶᠢ ᠳᠠᠮᠵᠢᠭᠰᠠᠨᠢᠶᠠᠨ ᠮᠡᠳᠡᠵᠦ ᠮᠠᠩᠨᠠᠢᠶᠢᠨ ᠬᠥᠯᠦᠰᠦᠪᠡᠨ ᠰᠢᠪᠲᠤᠷᠤᠨ ᠠᠷᠴᠢᠵᠤ ᠪᠠᠭᠤᠪᠠ᠃ ᠽᠠᠨᠳᠠᠨ ᠬᠦᠷᠡᠩᠦᠨ ᠬᠠᠮᠠᠷ ᠠᠶᠠᠭᠠᠨᠤ ᠠᠮᠠᠰᠠᠷ ᠴᠢᠨᠡᠭᠡᠨ ᠬᠠᠷᠠᠭᠳᠠᠬᠤᠳᠤ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠴᠡᠭᠡᠵᠢᠨᠳᠦ ᠠᠢᠷᠠᠭ ᠪᠦᠯᠢᠬᠦ ᠮᠡᠲᠦ ᠪᠠᠢᠯᠠ᠃
ᠦᠳᠡ ᠥᠩᠭᠡᠷᠡᠵᠡᠢ᠃ ᠫᠤᠤᠶᠢᠨ ᠳᠠᠭᠤᠨ ᠲᠠᠭ ᠴᠢᠭ ᠪᠣᠯᠪᠠ᠃ ᠬᠡᠰᠢᠭᠲᠣᠭᠲᠠᠬᠤ ᠠᠭᠤᠯᠠ ᠪᠠᠷᠲᠠᠭᠠ ᠳᠠᠮᠵᠢᠭᠰᠠᠭᠠᠷ ᠦᠬᠡᠷᠢᠶᠡᠨ ᠲᠠᠯᠪᠢᠭᠰᠠᠨ ᠭᠠᠵᠠᠷᠲᠠᠭᠠᠨ ᠢᠷᠡᠪᠡᠯ ᠲᠠᠪᠤᠨ ᠦᠬᠡᠷᠨᠢ ᠭᠣᠷᠤᠬᠠᠨᠳᠤ ᠣᠷᠤᠭᠠᠳ ᠪᠡᠯᠴᠢᠵᠦ ᠪᠠᠢᠨᠠ᠃ ᠭᠤᠤ ᠰᠤᠪᠠᠭᠢᠶᠠᠷ ᠳᠠᠯᠳᠠᠯᠠᠨ ᠭᠡᠷᠦᠨᠢᠶᠡᠨ ᠪᠠᠷᠠᠶᠢ ᠬᠠᠷᠠᠪᠠᠯ ᠵᠤᠨᠤ ᠴᠠᠭᠤᠨ ᠨᠣᠭᠤᠭᠠᠨ ᠥᠷᠮᠦᠭ ᠠᠭᠤᠯᠠ ᠲᠠᠯᠠᠨᠤᠭᠤᠳ ᠠᠯᠤᠰᠤᠨ ᠬᠥᠬᠡ ᠤᠨᠢᠶᠠᠷᠲᠠᠢ ᠨᠡᠢᠯᠡᠭᠡᠳ᠂ ᠡᠪᠡᠰᠦᠨ ᠤᠭᠠᠯᠵᠠᠲᠠᠢ ᠬᠣᠷᠭᠤᠢ ᠮᠠᠩᠨᠤᠭ ᠮᠡᠲᠦ ᠨᠡᠯᠦᠢᠭᠡᠳ ᠬᠠᠶᠠ ᠨᠢᠭᠡ ᠴᠡᠭᠴᠡᠦᠬᠡᠢ ᠲᠡᠭᠦᠨᠳᠦ ᠰᠣᠷᠤᠭᠳᠠᠭᠰᠠᠨᠰᠢᠭ᠋ ᠳᠡᠷᠪᠡᠯᠵᠡᠬᠦᠡᠴᠡ ᠥᠭᠡᠷᠡ ᠰᠣᠨᠢᠨᠦᠭᠡᠢ ᠪᠠᠢᠯᠠ᠃
ᠬᠡᠰᠢᠭᠲᠣᠭᠲᠠᠬᠤ᠂ ᠬᠣᠩᠬᠤᠷ ᠰᠤᠵᠠᠭᠢᠶᠠᠷ ᠬᠠᠯᠬᠠᠪᠴᠢᠯᠠᠨ ᠬᠣᠷᠤᠭᠠᠨᠤᠪᠠᠨ ᠠᠷᠤᠳᠤ ᠢᠷᠡᠭᠡᠳ ᠪᠠᠬᠠᠨ ᠠᠵᠢᠰᠬᠢᠨ ᠠᠨᠢᠷᠯᠠᠵᠤ ᠮᠣᠷᠢᠨᠠᠴᠠᠪᠠᠨ ᠪᠠᠭᠤᠪᠠ᠃ ᠲᠣᠭᠤᠭᠠᠨᠤᠪᠠᠨ ᠪᠦᠬᠡᠭᠡᠭᠢ ᠳᠠᠮᠵᠢᠵᠤ ᠰᠡᠮ ᠰᠡᠮ ᠠᠯᠬᠤᠭᠰᠠᠭᠠᠷ ᠭᠡᠷ ᠵᠦᠭᠢᠶᠡᠨ ᠶᠠᠪᠤᠲᠠᠯᠠ ᠳᠥᠷᠪᠡᠨ ᠨᠢᠳᠦᠲᠡᠢ ᠤᠯᠠᠭᠠᠨ ᠬᠠᠯᠲᠠᠷ 《ᠬᠤᠢᠯᠤᠭ》 ᠭᠡᠳᠡᠭ ᠨᠣᠬᠠᠢᠨᠢ ᠭᠡᠷ ᠥᠭᠡᠳᠡᠪᠡᠨ ᠬᠠᠷᠠᠭᠰᠠᠨ ᠴᠢᠭᠲᠡᠭᠡᠨ ᠰᠠᠷᠪᠠᠢᠵᠤ ᠤᠨᠠᠭᠰᠠᠨ ᠪᠠᠢᠨᠠ᠃ ᠳᠠᠢᠰᠤᠨᠲᠠᠢ ᠡᠴᠦᠰᠲᠡᠯᠡ ᠦᠵᠡᠯᠴᠡᠭᠰᠡᠨᠦᠪᠡᠨ ᠪᠠᠲᠤᠯᠠᠪᠤᠷᠢ ᠪᠣᠯᠬᠤ ᠦᠵᠢᠷᠬᠡᠢ ᠰᠢᠷᠭᠠᠯ ᠪᠦᠰᠦᠨ ᠤᠷᠠᠩᠬᠠᠢᠶᠢ ᠲᠠᠰᠤ ᠵᠠᠭᠤᠭᠰᠠᠨ ᠬᠡᠪᠲᠡᠭᠡᠨ ᠪᠠᠢᠪᠠ᠃
ᠭᠡᠷᠦᠨ ᠬᠢᠨᠢ ᠡᠷᠦᠬᠡ ᠪᠦᠲᠡᠭᠡᠯᠭᠡᠲᠡᠢ᠂ ᠬᠠᠭᠠᠯᠭᠠᠨᠢ ᠭᠣᠬᠠᠳᠠᠭᠳᠠᠵᠤ ᠪᠠᠢᠨᠠ᠃ ᠣᠷᠤᠭᠠᠳ ᠦᠵᠡᠬᠦᠳᠦ ᠠᠪᠳᠠᠷᠠ ᠱᠦᠭᠦᠢᠶᠢᠨ ᠠᠮᠠ ᠬᠠᠮᠠᠷᠨᠢ ᠬᠠᠭᠠᠷᠬᠠᠢ᠂ ᠲᠠᠯᠠ ᠲᠤᠯᠠ ᠠᠶᠠᠭᠠ ᠲᠠᠪᠠᠭ ᠬᠥᠨᠳᠡᠢ ᠳᠣᠭᠤᠤᠷ ᠬᠡᠪᠲᠡᠵᠦ ᠪᠠᠢᠯᠠ᠃ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠴᠢᠷᠠᠢᠳᠤ ᠴᠢᠰᠤ ᠭᠦᠶᠦᠬᠦᠪᠡᠨ ᠪᠠᠢᠭᠠᠳ ᠨᠢᠳᠦᠨᠢ ᠬᠥᠳᠡᠯᠬᠦᠪᠡᠨ ᠮᠠᠷᠲᠠᠪᠠ᠃ 《ᠬᠣᠷᠯᠣ ᠬᠠᠮᠢᠭᠠᠰᠢᠪᠠᠨ ᠡᠴᠢᠪᠡ? ᠳᠡᠭᠡᠷᠡᠮᠳᠦ ᠬᠣᠣᠷᠯᠠᠭᠳᠠᠪᠠᠤᠤ?》 ᠭᠡᠲᠡᠯᠡ ᠭᠡᠷ ᠬᠣᠲᠠᠪᠠᠨ ᠲᠥᠪᠬᠢᠨᠡᠭᠦᠯᠦᠭᠰᠡᠨ ᠮᠠᠶᠢ᠍ᠭᠲᠠᠢ ᠁
ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠬᠠᠭᠤᠴᠢᠨ ᠬᠠᠷᠠ ᠮᠠᠯᠠᠭᠠᠢᠨᠢ ᠰᠡᠲᠡ ᠭᠣᠳ ᠬᠢᠲᠤᠭᠠᠯᠠᠭᠳᠠᠵᠤ ᠵᠡᠭᠦᠨ ᠠᠪᠳᠠᠷᠠ ᠳᠡᠭᠡᠷᠡᠪᠡᠨ ᠭᠤᠨᠢᠭᠲᠠᠢ ᠪᠠᠢᠯᠠ᠃ 《ᠢᠱ᠌ᠢ! ᠬᠠᠢᠷᠠᠨ》 ᠭᠡᠵᠦ ᠳᠠᠭᠤᠨ ᠠᠯᠳᠠᠮᠠᠭᠴᠠ ᠨᠢᠯᠪᠤᠰᠤᠨᠢ ᠪᠥᠮᠪᠦᠷᠢᠪᠡ᠃ ᠲᠡᠷᠡᠬᠦ ᠮᠠᠯᠠᠭᠠᠢᠶᠢ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠡᠵᠢᠨᠢ ᠬᠦᠦᠪᠡᠨ ᠭᠡᠷᠯᠡᠬᠦᠳᠦ ᠰᠥᠨᠢᠵᠢᠨ ᠰᠠᠭᠤᠵᠤ ᠣᠶᠤᠭᠰᠠᠨᠶᠤᠮ᠃ ᠬᠣᠷᠯᠣ ᠲᠡᠳᠡ ᠬᠣᠶᠠᠷ ᠲᠡᠭᠦᠨᠢ ᠪᠡᠶᠡᠡᠴᠡᠪᠡᠨ ᠢᠯᠡᠭᠦᠦ ᠨᠠᠨᠳᠢᠩᠨᠠᠨ ᠡᠷᠬᠢᠮᠯᠡᠳᠡᠭ ᠤᠴᠢᠷᠠᠴᠠ ᠭᠤᠴᠢ ᠭᠠᠷᠤᠢ ᠵᠢᠯ ᠭᠬᠢᠷ ᠲᠣᠭᠤᠰᠤᠨᠳᠤ ᠬᠦᠷᠭᠡᠬᠦᠦᠭᠡᠢ ᠬᠠᠳᠠᠭᠠᠯᠠᠵᠤ᠂ ᠴᠠᠭᠠᠨ ᠰᠠᠷᠠᠶᠢᠨ ᠰᠢᠨᠡᠶᠢᠨ ᠨᠢᠭᠡᠨ ᠪᠦᠷᠢᠳᠦ ᠵᠠᠪᠠᠯ ᠡᠳ᠋ᠯᠡᠳᠡᠭ ᠶᠣᠰᠤᠨᠤ ᠬᠤᠪᠴᠠᠰᠤ ᠪᠣᠯᠵᠠᠢ᠃ ᠬᠡᠰᠢᠭᠲᠣᠭᠲᠠᠬᠤ ᠶᠠᠮᠠᠷᠴᠤ ᠪᠣᠳᠤᠯᠦᠭᠡᠢᠪᠠᠷ ᠮᠠᠯᠠᠭᠠᠢᠪᠠᠨ ᠠᠪᠴᠤ ᠡᠪᠦᠷᠲᠦᠯᠡᠯᠡ᠃ ᠲᠡᠭᠦᠨᠦ ᠳᠣᠣᠷᠠᠠᠴᠠ ᠭᠤᠷᠪᠠᠯᠵᠢᠨ ᠡᠪᠬᠡᠭᠡᠰᠦᠲᠡᠢ ᠴᠠᠭᠠᠰᠤ ᠭᠠᠷᠴᠠᠢ᠃ ᠡᠭᠦᠨᠳᠦ ᠶᠠᠮᠠᠷ ᠨᠢᠭᠡ ᠤᠴᠢᠷ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠪᠣᠳᠤᠭᠰᠠᠨᠶᠤᠮᠤᠤ? ᠬᠠᠮᠲᠤ ᠡᠪᠦᠷᠲᠦᠯᠡᠪᠡ᠃ ᠯᠠᠮᠠᠨᠠᠷᠠᠴᠠ ᠠᠪᠤᠷᠠᠯ ᠰᠤᠨᠳᠠᠭ ᠠᠰᠠᠭᠤᠬᠤᠳᠤ 《ᠬᠡᠯᠡ ᠠᠮᠠᠶᠢᠨ ᠪᠤᠵᠠᠷᠲᠤ》 ᠭᠡᠳ ᠳᠥᠷᠪᠡᠯᠵᠢᠨ ᠭᠤᠷᠪᠠᠯᠵᠢᠨ ᠡᠪᠬᠡᠭᠰᠡᠨ ᠪᠤᠤ ᠳᠠᠷᠴᠤᠭ ᠥᠭᠳᠡᠭ ᠶᠠᠪᠤᠳᠠᠯ ᠰᠠᠨᠠᠭᠳᠠᠵᠠᠢ᠃
ᠬᠡᠰᠢᠭᠲᠣᠭᠲᠠᠬᠤ ᠡᠮᠦᠨᠡ ᠬᠣᠢᠲᠤ ᠠᠢᠯᠤᠳᠢᠶᠠᠷ ᠶᠠᠪᠤᠵᠤ ᠳᠡᠭᠡᠷᠡᠮᠦᠨ ᠶᠠᠭᠠᠬᠢᠭᠰᠠᠨ᠂ ᠬᠣᠷᠯᠣᠶᠢᠨ ᠬᠡᠷᠬᠢᠭᠰᠡᠨ ᠲᠤᠬᠠᠢ ᠠᠰᠠᠭᠤᠬᠤᠳᠤ:
《ᠪᠢᠳᠡᠨᠢ ᠬᠣᠨᠢ ᠢᠮᠠᠭᠠᠰᠢᠭ᠋ ᠭᠡᠷᠲᠦᠮᠢᠨᠢ ᠬᠣᠷᠢᠵᠤ ᠡᠭᠦᠳᠡᠨ ᠳᠡᠭᠡᠷᠡ ᠫᠤᠤᠲᠠᠢ ᠬᠥᠮᠦᠨ ᠵᠣᠭᠰᠤᠭᠠᠳ: 〈 ᠶᠠᠭᠤᠮᠠᠪᠠᠨ ᠭᠠᠷᠭᠠᠵᠤ ᠥᠭ〉 ᠭᠡᠳ ᠫᠤᠤᠪᠠᠨ ᠲᠠᠴᠢᠭᠢᠨᠠᠭᠤᠯᠵᠤ ᠠᠯᠠᠬᠤ ᠰᠢᠬᠠᠪᠠ᠃ ᠬᠤᠪᠴᠠᠰᠤ ᠬᠤᠨᠠᠷᠢᠶᠠᠨ ᠲᠠᠢᠯᠵᠤ ᠰᠢᠳᠡᠭᠰᠡᠭᠡᠷ ᠪᠠᠢᠵᠤ ᠠᠮᠢ ᠮᠡᠨᠳᠦ ᠬᠣᠴᠤᠷᠪᠠ》 ᠭᠡᠵᠦ ᠶᠠᠨᠵᠢ ᠲᠣᠯᠤᠭᠠᠢᠪᠠᠨ ᠰᠡᠭᠰᠦᠷᠦᠨ ᠡᠪᠦᠳᠦᠭ ᠲᠣᠬᠤᠢ ᠭᠠᠷᠤᠭᠰᠠᠨ ᠥᠮᠦᠳᠦ ᠬᠠᠨᠲᠠᠭᠠᠵᠠᠪᠠᠨ ᠦᠵᠡᠭᠦᠯᠵᠡᠢ᠃ ᠵᠠᠷᠢᠮᠨᠢ:
《ᠬᠣᠷᠯᠣᠶᠢ ᠲᠤᠩ ᠬᠠᠷᠠᠲᠠᠢ ᠲᠠᠮᠤᠯᠠᠪᠠ᠃ ᠲᠡᠭᠦᠨᠦ ᠤᠬᠢᠯᠠᠵᠤ ᠪᠠᠷᠬᠢᠷᠠᠬᠤᠳᠤ ᠲᠣᠭᠤᠭᠠ ᠰᠢᠨᠠᠭᠠ ᠬᠠᠩᠭᠢᠨᠠᠵᠤ ᠪᠠᠢᠯᠠ᠃ 》 ᠵᠠᠷᠢᠮᠨᠢ:
《ᠡᠢᠮᠦ ᠣᠯᠠᠨ ᠳᠠᠢᠰᠤᠨ ᠬᠠᠮᠢᠭᠠᠠᠴᠠ ᠢᠷᠡᠭᠰᠡᠨᠢ ᠪᠤᠤ ᠮᠡᠳᠡ᠃ ᠫᠤᠤᠳᠠᠯᠳᠤᠨ ᠬᠠᠪᠬᠢᠯᠳᠤᠵᠤ ᠪᠠᠢᠭᠠᠳ ᠴᠢᠮᠡᠭᠡᠦᠭᠡᠢ ᠪᠣᠯᠤᠭᠰᠠᠨ》 ᠭᠡᠨᠡ᠃ ᠵᠠᠷᠢᠮᠨᠢ: 《ᠲᠠᠨᠤ ᠮᠣᠷᠢᠶᠢ ᠤᠨᠤᠭᠠᠳ ᠢᠷᠡᠳᠡᠭ ᠥᠨᠳᠦᠷ ᠨᠣᠶᠠᠨ ᠪᠣᠯᠤᠯᠲᠠᠢ ᠵᠥᠭᠡᠯᠡᠨ ᠳᠤᠯᠠᠭᠠᠨ ᠴᠢᠷᠠᠢᠲᠠᠢ ᠬᠥᠮᠦᠨ 〈ᠪᠢᠳᠡᠨᠡᠴᠡ ᠪᠤᠤ ᠠᠶᠤ!〉 ᠭᠡᠵᠦ ᠪᠠᠢᠭᠰᠠᠨ》 ᠭᠡᠬᠦ ᠮᠡᠲᠦᠶᠢᠨ ᠡᠬᠢ ᠠᠳᠠᠭᠦᠭᠡᠢ ᠶᠠᠷᠢᠶᠠ ᠰᠣᠨᠤᠰᠴᠠᠢ᠃ ᠬᠡᠰᠢᠭᠲᠣᠭᠲᠠᠬᠤ ᠳᠡᠮᠡᠢᠯᠡ ᠭᠣᠷᠢᠳᠠᠯ ᠪᠣᠯᠵᠤ᠂ ᠬᠣᠷᠤᠭᠠ ᠫᠧᠩᠦᠨ ᠪᠤᠯᠤᠩ᠂ ᠬᠤᠳᠳᠤᠭ᠂ ᠤᠰᠤᠪᠠᠷ ᠡᠷᠢᠵᠦ ᠴᠥᠬᠦᠷᠡᠯᠢᠶᠡᠨ ᠪᠠᠷᠠᠪᠠ᠃ ᠬᠣᠢᠲᠤ ᠠᠢᠯᠤᠨ ᠡᠷᠳᠡᠨᠢ ᠬᠦᠦ :
《ᠪᠦᠳᠦᠭᠦᠨ ᠡᠵᠢᠶᠢ ᠳᠥᠷᠪᠡᠨ ᠬᠥᠮᠦᠨ ᠳᠠᠮᠨᠠᠵᠤ᠂ ᠮᠣᠷᠢᠨ ᠳᠡᠭᠡᠷᠡ ᠠᠴᠢᠭᠠᠳ ᠶᠠᠪᠤᠭᠰᠠᠨ》 ᠭᠡᠬᠦᠳᠦᠨᠢ ᠨᠢᠭᠡ ᠡᠮᠡᠭᠡᠨ:
《ᠮᠠᠭᠤ ᠢᠷᠤᠠ! ᠬᠥᠮᠦᠨᠢ ᠠᠴᠢᠳᠠᠭᠶᠤᠮᠤᠤ? ᠪᠤᠷᠬᠠᠨᠮᠢᠨᠢ ᠡ!》 ᠭᠡᠳ ᠵᠠᠯᠪᠠᠷᠢᠨ ᠭᠥᠯᠢᠢᠵᠡᠢ᠃
ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠳᠣᠲᠤᠷᠠ: 《ᠬᠤᠯᠠᠭᠠᠢ ᠪᠤᠴᠠᠵᠤ ᠢᠷᠡᠭᠡᠳ ᠮᠣᠷᠢᠶᠢᠨᠢ ᠪᠤᠯᠢᠶᠠᠬᠤ᠂ ᠲᠣᠭᠤᠨᠤᠠᠴᠠᠨᠢ ᠳᠡᠭᠦᠵᠢᠯᠡᠭᠡᠳ ᠰᠢᠷᠠᠬᠤ ᠁》 ᠡᠯᠳᠡᠪ ᠠᠶᠤᠮᠰᠢᠭᠲᠤ ᠰᠡᠵᠢᠭ ᠲᠥᠷᠦᠭᠳᠡᠯᠡ᠃ 《ᠣᠳᠣ ᠶᠠᠳᠠᠬᠤᠳᠤ ᠨᠣᠬᠠᠢᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠶᠠᠭᠤᠨᠳᠠᠭᠠᠨ ᠬᠣᠷᠭᠤᠳᠠᠵᠤ ᠰᠠᠭᠤᠬᠤ ᠪᠤᠢ?》 ᠭᠡᠳ ᠬᠡᠳᠦᠨ ᠦᠬᠡᠷᠢᠶᠡᠨ ᠬᠥᠭᠡᠭᠡᠵᠦ ᠦᠶᠡᠯᠢᠳ ᠳᠡᠭᠦᠦᠶᠢᠨᠳᠡᠭᠡᠨ ᠣᠴᠢᠬᠤᠪᠠᠷ ᠰᠢᠭᠤᠳᠤᠭᠠᠳ ᠭᠡᠷ ᠬᠣᠲᠠᠪᠠᠨ ᠰᠠᠭᠠᠬᠠᠯᠲᠠ ᠤᠰᠤᠨᠤ ᠬᠢᠨᠳᠡᠭᠡᠨ ᠵᠠᠬᠢᠵᠤ ᠮᠣᠷᠳᠠᠪᠠ᠃
ᠨᠢᠭᠡ ᠨᠠᠰᠤᠪᠠᠷ ᠬᠠᠶᠠᠭᠠ ᠵᠡᠷᠭᠡᠴᠡᠨ ᠰᠠᠭᠤᠵᠠᠭᠠᠭᠰᠠᠨ ᠡᠮᠡᠭᠡᠳ ᠡᠪᠦᠭᠡᠳ ᠳᠠᠭᠤᠨ ᠲᠠᠯᠪᠢᠨ ᠤᠬᠢᠯᠠᠵᠤ ᠬᠣᠴᠤᠷᠴᠠᠢ᠃
* * *
ᠬᠡᠰᠢᠭᠲᠣᠭᠲᠠᠬᠤ᠂ ᠠᠢᠯ ᠭᠡᠷ᠂ ᠠᠪᠠᠯᠢ ᠡᠬᠡᠨᠡᠷ ᠬᠣᠷᠯᠣᠶᠢᠨᠢᠶᠠᠨ ᠲᠥᠯᠦᠭᠡ ᠡᠳᠦᠷ ᠰᠥᠨᠢᠦᠭᠡᠢ ᠵᠣᠪᠠᠭᠰᠠᠭᠠᠷ ᠨᠣᠢᠷ ᠬᠣᠭᠤᠯᠠᠨᠠᠴᠠ ᠭᠠᠷᠬᠤ ᠰᠢᠬᠠᠵᠠᠢ᠃ ᠳᠠᠢᠰᠤᠨᠳᠤ ᠵᠠᠩᠭᠢᠷᠠᠭᠰᠠᠨ ᠬᠣᠷᠤᠰᠤᠯ ᠪᠤᠴᠠᠯᠵᠤ ᠪᠠᠢᠪᠠᠴᠤ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡᠪᠡᠷ ᠶᠠᠭᠤ ᠬᠢᠬᠦ ᠪᠤᠢ ᠭᠡᠳ ᠴᠡᠭᠡᠵᠢᠪᠡᠨ ᠲᠦᠯᠡᠭᠳᠡᠲᠡᠯᠡ ᠮᠠᠨᠠᠵᠤ ᠶᠠᠪᠤᠳᠠᠭ ᠪᠣᠯᠤᠯᠠ᠃ ᠦᠶᠡᠯᠢᠳ ᠳᠡᠭᠦᠦᠶᠢᠨ ᠬᠢᠨᠢ ᠭᠡᠪᠡᠯ ᠬᠡᠦᠬᠡᠳ ᠪᠡᠷᠢᠶᠡᠳ ᠣᠯᠠᠨᠲᠠᠢ ᠮᠥᠷᠲᠡᠭᠡᠨ ᠮᠠᠯ ᠰᠦᠷᠦᠭᠢᠶᠡᠷ ᠠᠷᠪᠢᠨ ᠪᠣᠯᠬᠣᠷ ᠨᠠᠰᠢ ᠴᠠᠰᠢ ᠶᠠᠪᠤᠯᠴᠠᠬᠤ ᠬᠥᠮᠦᠨ ᠲᠠᠰᠤᠷᠠᠳᠠᠭᠦᠭᠡᠢ ᠬᠥᠯ ᠦᠢᠮᠡᠭᠡᠨᠲᠡᠢ ᠠᠢᠯ ᠪᠠᠢᠵᠠᠢ᠃ ᠲᠡᠷᠡᠴᠢᠯᠡᠨ ᠭᠦᠵᠡᠭᠡ ᠰᠢᠷᠠ ᠭᠡᠳᠡᠭ ᠬᠣᠴᠢᠲᠠᠢ 《ᠬᠠᠷᠠ ᠲᠠᠮᠠᠬᠢᠨᠤ ᠴᠢᠳᠭᠦᠷ》 ᠪᠣᠯᠤᠭᠰᠠᠨ ᠵᠠᠩᠭᠢ ᠨᠣᠶᠠᠨᠨᠢ ᠬᠡᠰᠢᠭᠲᠣᠭᠲᠠᠬᠤᠶᠢ ᠣᠷᠤᠨ ᠨᠤᠲᠤᠭᠠᠴᠠᠪᠠᠨ ᠣᠷᠭᠤᠵᠤ ᠶᠠᠪᠤᠭᠠ ᠬᠠᠪᠴᠢᠭᠤᠷ ᠴᠠᠭᠠᠴᠢᠨ ᠭᠡᠵᠦ ᠪᠣᠱᠤᠭ ᠲᠠᠬᠠᠷᠠ ᠢᠯᠡᠭᠡᠵᠦ ᠬᠡᠳᠦ ᠤᠳᠠᠭᠠ ᠬᠥᠭᠡᠭᠡᠯᠭᠡᠭᠰᠡᠨ ᠪᠠᠢᠯᠠ᠃ ᠲᠡᠭᠡᠭᠡᠳ 《ᠴᠡᠷᠢᠭ ᠠᠯᠪᠠᠨᠤ ᠬᠦᠨᠡᠰᠦᠨ ᠲᠠᠲᠠᠪᠤᠷᠢ》 ᠭᠡᠵᠦ ᠨᠢᠭᠡ ᠰᠤᠪᠠᠢ ᠭᠤᠨᠵᠢᠶᠢᠨᠢ ᠬᠥᠭᠡᠭᠡᠵᠦ ᠠᠪᠠᠴᠢᠪᠠ᠃ ᠠᠩᠬᠠᠨᠳᠠᠭᠠᠨ 《 ᠬᠠᠯᠠᠭᠤᠨ ᠮᠣᠩᠭᠤᠯ ᠪᠣᠯ ᠡᠯᠢᠭᠡ ᠥᠷᠦᠴᠡ ᠨᠢᠭᠡᠲᠡᠢ》 ᠭᠡᠵᠦ ᠢᠲᠡᠭᠡᠭᠰᠡᠨ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠲᠠᠷᠢᠬᠢᠨᠳᠤ ᠮᠣᠩᠭᠤᠯ ᠬᠥᠮᠦᠨᠦ ᠳᠣᠲᠤᠷᠠᠴᠤ ᠭᠦᠵᠡᠭᠡ ᠰᠢᠷᠠᠰᠢᠭ᠋ 《ᠲᠣᠯᠤᠭᠠᠢᠶᠢᠨᠢ ᠢᠯᠪᠢᠵᠦ᠂ ᠲᠠᠷᠢᠬᠢᠶᠢᠨᠢ ᠰᠣᠷᠤᠬᠤ》 ᠡᠲᠡᠭᠡᠳ ᠵᠥᠩᠳᠡᠭᠡᠨ ᠪᠠᠢᠬᠤᠶᠤᠮ ᠳ᠋ᠠ ᠭᠡᠰᠡᠨ ᠰᠡᠷᠡᠯᠲᠡ ᠣᠷᠤᠭᠤᠯᠪᠠ᠃ ᠲᠡᠷᠡᠴᠢᠯᠡᠨ ᠦᠶᠡᠯᠢᠳ ᠳᠡᠭᠦᠦᠨᠢᠴᠦ ᠬᠡᠰᠢᠭᠲᠣᠭᠲᠠᠬᠤᠶᠢ 《ᠬᠣᠭᠤᠰᠤᠨ ᠭᠤᠶᠠᠪᠠᠨ ᠭᠠᠨᠵᠤᠭᠠᠯᠠᠵᠤ ᠢᠷᠡᠪᠡ》 ᠭᠡᠳ ᠲᠥᠷᠦᠯ ᠰᠠᠳᠤᠨᠢᠶᠠᠨ ᠪᠠᠢᠭᠰᠠᠨᠶᠤᠮᠤᠤ? ᠬᠠᠷᠢᠨ 《ᠬᠣᠨᠢᠨᠤ ᠮᠢᠬᠠ ᠬᠣᠰᠢᠮᠠᠭ ᠲᠡᠩᠨᠡᠭᠡᠲᠡᠢ》 ᠢᠷᠡᠭᠰᠡᠨ ᠪᠣᠯ ᠬᠣᠢᠮᠤᠷᠲᠠᠭᠠᠨ ᠵᠠᠯᠠᠵᠤ ᠰᠠᠭᠤᠯᠭᠠᠬᠤ ᠪᠠᠢᠵᠤ ᠮᠠᠭᠠᠳᠦᠭᠡᠢ ᠭᠡᠵᠦ ᠪᠣᠳᠤᠨ ᠪᠣᠳᠤᠭᠰᠠᠭᠠᠷ ᠬᠣᠷᠤᠭᠠᠨᠤ ᠵᠡᠭᠦᠨ ᠬᠣᠢᠲᠤᠬᠢ ᠬᠠᠷᠠ ᠪᠦᠬᠡᠭᠡᠭᠲᠦ ᠬᠣᠨᠢᠴᠢᠨ ᠡᠯ ᠶᠠᠩᠭᠦᠸᠠᠷᠲᠠᠢ ᠨᠠᠢᠵᠠᠯᠠᠭᠰᠠᠨᠨᠢ ᠠᠰᠢᠲᠠᠢ ᠰᠠᠢᠬᠠᠨ ᠰᠠᠨᠠᠭᠳᠠᠪᠠ᠃ ᠡᠯ ᠶᠠᠩᠭᠦᠸᠠᠷᠤᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠨᠣᠮᠤᠬᠠᠨ ᠬᠥᠮᠦᠨ ᠪᠣᠯᠬᠤᠶᠢ ᠬᠣᠷᠢᠭᠠᠳ ᠬᠣᠨᠤᠭᠤᠨ ᠠᠮᠢᠳᠤᠷᠠᠯᠠᠴᠠ ᠲᠠᠨᠢᠵᠤ ᠠᠪᠴᠠᠢ᠃ ᠶᠠᠩᠭᠦᠸᠠᠷ 《 ᠭᠦᠵᠡᠭᠡ ᠰᠢᠷᠠ ᠭᠠᠳᠠᠭᠤᠷ ᠭᠠᠷ ᠨᠡᠢᠯᠡᠵᠦ᠂ ᠬᠥᠳᠡᠭᠡᠭᠦᠷ ᠬᠥᠯ ᠨᠡᠢᠯᠡᠵᠦ ᠳᠠᠢᠰᠤᠨᠢ ᠳᠠᠭᠠᠭᠤᠯᠤᠭᠠᠳ ᠮᠣᠩᠭᠤᠯ ᠲᠣᠭᠠᠲᠠᠨᠢᠶᠠᠨ ᠳᠡᠭᠡᠷᠡᠮᠳᠡᠵᠦ ᠪᠠᠢᠨᠠ》 ᠭᠡᠳᠡᠭ ᠦᠭᠡᠨᠦ ᠵᠠᠬᠠ ᠰᠡᠵᠢᠭᠦᠷᠢ ᠶᠠᠷᠢᠳᠠᠭ ᠪᠥᠭᠡᠳ ᠡᠪᠦᠭᠡᠨᠦ ᠭᠠᠭᠴᠠ ᠮᠣᠷᠢᠨᠳᠤᠨᠢ ᠲᠡᠳᠡᠨᠦ ᠨᠢᠳᠦᠨ ᠬᠣᠣᠷ ᠰᠢᠩᠭᠡᠭᠰᠡᠨᠢ ᠰᠠᠨᠠᠭᠤᠯᠤᠨ ᠬᠡᠯᠡᠳᠡᠭ ᠪᠠᠢᠵᠠᠢ᠃
ᠨᠢᠭᠡᠨ ᠡᠳᠦᠷ ᠬᠡᠰᠢᠭᠲᠣᠭᠲᠠᠬᠤ᠂ ᠰᠢᠷᠠ ᠪᠤᠷᠭᠠᠰᠤᠲᠠᠢ ᠮᠠᠩᠬᠠᠨᠤ ᠬᠣᠩᠬᠤᠷᠲᠤ ᠮᠣᠷᠢᠨᠤᠪᠠᠨ ᠠᠮᠠᠭᠠᠢᠶᠢ ᠭᠠᠷᠭᠠᠵᠤ ᠪᠠᠷᠢᠨ ᠢᠳᠡᠭᠦᠯᠦᠭᠰᠡᠭᠡᠷ ᠦᠬᠡᠷᠢᠶᠡᠨ ᠬᠠᠷᠠᠵᠤ ᠪᠠᠢᠪᠠ᠃ ᠬᠠᠯᠠᠭᠤᠨ ᠰᠦᠨᠳᠡᠭᠡᠨ ᠴᠠᠳᠴᠤ ᠲᠣᠷᠨᠢᠭᠰᠠᠨ ᠬᠣᠶᠠᠷ ᠲᠤᠭᠤᠯᠨᠢ ᠪᠤᠭᠤᠯᠳᠤᠷᠭᠠ ᠬᠡᠪᠢᠶᠡᠨ ᠣᠯᠤᠭᠰᠠᠨ ᠮᠡᠲᠦ ᠰᠠᠢᠬᠠᠨ ᠬᠠᠷᠠᠭᠳᠠᠪᠠᠴᠤ ᠬᠡᠵᠢᠶᠡ ᠮᠠᠷᠭᠠᠰᠢ ᠪᠣᠱᠤᠭᠠ ᠲᠠᠬᠠᠷᠠ ᠳᠠᠪᠬᠢᠵᠤ ᠢᠷᠡᠭᠡᠳ ᠡᠬᠡᠲᠡᠢᠨᠢ ᠲᠠᠭᠤᠵᠤ ᠶᠠᠪᠤᠬᠤ ᠵᠢᠭᠲᠡᠢ ᠢᠷᠤᠠ ᠪᠣᠳᠤᠭᠳᠠᠨᠠ᠃ ᠭᠡᠲᠡᠯᠡ ᠬᠡᠰᠡᠭ ᠬᠡᠰᠡᠭ ᠪᠠᠭᠰᠢᠷᠠᠭᠰᠠᠨ ᠪᠤᠷᠭᠠᠰᠤ ᠮᠣᠳᠤᠨᠤ ᠳᠤᠮᠳᠠᠭᠤᠷᠬᠢ ᠦᠯᠦ ᠮᠡᠳᠡᠭᠳᠡᠮᠡ ᠮᠣᠷᠢᠨ ᠴᠤᠪᠤᠭᠠ ᠵᠠᠮᠢᠶᠠᠷ ᠬᠣᠶᠠᠷ ᠮᠣᠷᠢᠲᠠᠨ ᠰᠡᠭᠡᠭᠦᠯᠦᠨ ᠭᠠᠷᠴᠤ ᠢᠷᠡᠪᠡ᠃
ᠡᠮᠦᠨᠡᠬᠢᠨᠢ ᠴᠠᠭᠠᠨ ᠴᠢᠰᠴᠡᠦ ᠲᠡᠷᠯᠢᠭ ᠳᠡᠭᠡᠷᠡ ᠬᠠᠷᠠ ᠲᠣᠷᠭᠠᠨ ᠬᠠᠨᠵᠢᠶᠠᠷ ᠬᠦᠯᠬᠦᠯᠵᠡᠭᠦᠯᠦᠨ ᠡᠮᠦᠰᠦᠭᠡᠳ ᠴᠠᠢᠪᠤᠷ ᠪᠣᠷᠤ ᠯᠢᠮᠣᠤ ᠮᠠᠯᠠᠭᠠᠢ ᠬᠠᠢᠪᠠᠢᠯᠭᠠᠨ ᠳᠠᠷᠤᠵᠤ᠂ ᠪᠠᠷᠠᠭᠤᠨ ᠭᠠᠷᠲᠠᠭᠠᠨ ᠬᠢᠯᠭᠠᠰᠤᠨ ᠭᠦᠪᠢᠭᠦᠷ ᠪᠠᠷᠢᠭᠰᠠᠨᠨᠢ ᠶᠠᠭᠯᠠ ᠵᠠᠰᠠᠭᠰᠠᠨ ᠵᠣᠯᠢᠭᠰᠢᠭ᠋ ᠬᠠᠷᠠᠭᠳᠠᠵᠠᠢ᠃ ᠠᠷᠤᠶᠢᠨ ᠬᠢᠨᠢ ᠰᠢᠷᠭᠠᠯ ᠨᠣᠭᠤᠭᠠᠨ ᠣᠭᠤᠳᠤᠷ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠤᠷᠲᠤ ᠫᠤᠤ ᠬᠥᠨᠳᠡᠯᠢᠳᠦᠭᠦᠯᠦᠨ ᠡᠭᠦᠷᠦᠭᠡᠳ ᠣᠷᠤᠢᠨᠢ ᠰᠢᠷᠭᠢᠭᠰᠡᠨ ᠬᠠᠪᠰᠢᠭᠠᠷ ᠴᠡᠷᠢᠭᠦᠨ ᠮᠠᠯᠠᠭᠠᠢ ᠲᠣᠬᠤᠯᠠᠵᠤ᠂ ᠬᠥᠭᠰᠢᠨ ᠢᠩᠭᠡᠰᠢᠭ ᠳᠣᠣᠷᠠᠳᠤ ᠤᠷᠤᠭᠤᠯᠢᠶᠠᠨ ᠶᠣᠷᠪᠤᠢᠯᠭᠠᠨ᠂ ᠰᠡᠭᠦᠯᠢᠶᠡᠨ ᠰᠢᠷᠪᠠᠯᠵᠠᠭᠰᠠᠨ ᠬᠠᠪᠠ ᠨᠣᠬᠠᠢᠰᠢᠭ᠋ ᠳᠡᠯᠪᠡᠭᠡᠨᠡᠨ ᠴᠣᠭᠭᠢᠵᠤ ᠠᠢᠰᠤᠢ᠃
ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠳᠣᠲᠤᠷᠠ ᠮᠥᠰᠦ ᠵᠠᠯᠭᠢᠭᠰᠠᠨᠰᠢᠭ᠋ ᠪᠣᠯᠪᠠ᠃ 《ᠦᠬᠡᠷ ᠬᠥᠭᠡᠭᠡᠳᠡᠭ ᠵᠠᠩᠭᠢ ᠨᠣᠶᠠᠨ ᠥᠮᠦᠳᠦ ᠴᠤᠭᠯᠠᠭᠤᠯᠬᠤᠪᠠᠷ ᠢᠷᠡᠵᠦ ᠭᠡᠨᠡ ᠰᠢᠤ》 ᠭᠡᠳ ᠥᠴᠦᠭᠡᠳᠦᠷ ᠦᠳᠡᠰᠢ ᠡᠯ ᠶᠠᠩᠭᠦᠸᠠᠷᠤᠨ ᠰᠢᠪᠡᠨᠡᠭᠰᠡᠨᠨᠢ ᠰᠠᠨᠠᠭᠠᠨᠳᠤᠨᠢ ᠣᠷᠤᠯᠠ᠃ ᠲᠤᠯᠭᠠᠮᠠ ᠤᠴᠠᠷᠠᠭᠰᠠᠨ ᠪᠣᠯᠬᠣᠷ ᠶᠠᠭᠤᠴᠤ ᠪᠣᠯᠲᠤᠭᠠᠢ ᠮᠡᠨᠳᠦᠯᠡᠬᠦ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠴᠠᠭᠠᠳᠤᠬᠢᠨᠢ ᠡᠷᠭᠢᠨᠦ ᠢᠷᠮᠡᠭ ᠳᠡᠭᠡᠷᠡ ᠦᠨᠳᠦᠰᠦᠨᠢ ᠪᠤᠯᠲᠠᠢᠭᠰᠠᠨ ᠰᠢᠷᠠ ᠪᠤᠷᠭᠠᠰᠤᠰᠢᠭ᠋ ᠬᠡᠳᠦᠨ ᠤᠯᠠᠪᠢᠷ ᠰᠠᠬᠠᠯᠢᠶᠠᠨ ᠰᠡᠷᠪᠡᠯᠵᠡᠭᠦᠯᠵᠦ᠂ ᠬᠣᠶᠠᠷ ᠠᠯᠲᠠᠨ ᠰᠢᠳᠦᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠩᠭᠦᠢᠪᠡᠷ:
《ᠬᠡ ᠠᠬᠠ ᠰᠠᠢᠨ ᠪᠠᠢᠨᠠᠤᠤ?》 ᠭᠡᠵᠦ ᠰᠢᠷᠭᠢᠭᠰᠡᠨ ᠨᠢᠳᠦᠪᠡᠨ ᠣᠯᠢᠢᠯᠭᠠᠪᠠ᠃
《ᠵᠠᠩᠭᠢ ᠠᠮᠤᠷᠬᠠᠨ ᠮᠣᠷᠢᠯᠠᠵᠤ ᠪᠠᠢᠨᠠᠤᠤ?》 ᠭᠡᠳ ᠡᠪᠦᠳᠦᠭ ᠰᠥᠭᠦᠳᠬᠦᠳᠦ ᠲᠣᠯᠤᠭᠠᠢ ᠳᠣᠬᠢᠰᠬᠢᠨ :
《ᠬᠡᠵᠢᠶᠡ ᠮᠠᠨᠠᠢᠬᠢᠨᠳᠤ ᠢᠷᠡᠴᠢᠬᠡᠪᠡ ᠳ᠋ᠠ 》 ᠭᠡᠵᠦ ᠲᠣᠭᠤᠭᠠ ᠳᠣᠯᠤᠭᠤᠭᠰᠠᠨ ᠨᠣᠬᠠᠢᠰᠢᠭ᠋ ᠬᠡᠯᠡᠪᠡᠨ ᠪᠤᠯᠲᠠᠯᠵᠠᠭᠤᠯᠤᠨ ᠶᠣᠵᠤᠲᠠᠢ ᠠᠰᠠᠭᠤᠯᠠ᠃
《ᠥᠨᠦᠬᠡᠨ᠃ 》
《ᠲᠡᠭᠡᠭᠡᠳ ᠰᠤᠮᠤ ᠨᠤᠮᠤᠨᠳᠤ ᠮᠡᠳᠡᠭᠦᠯᠬᠦᠦᠭᠡᠢ ᠬᠠᠪᠴᠢᠭᠤᠯᠤᠭᠰᠠᠨ ᠬᠡᠷᠡᠭᠦᠦ?》
《ᠦᠭᠡᠢ! ᠦᠢᠮᠡᠭᠡᠨ ᠬᠤᠯᠠᠭᠠᠢᠲᠠᠢ ᠪᠣᠯᠬᠣᠷ ᠁》 ᠭᠡᠵᠦ ᠡᠪᠦᠭᠡᠨ ᠰᠢᠯᠢᠨ ᠬᠦᠵᠦᠭᠦᠦᠪᠡᠨ ᠮᠠᠭᠠᠵᠢᠪᠠ᠃
《ᠰᠠᠢᠬᠠᠨ ᠡᠮᠡᠭᠡᠯ ᠬᠠᠵᠠᠭᠠᠷᠲᠠᠢ ᠰᠠᠢᠨ ᠮᠣᠷᠢ ᠤᠨᠤᠵᠠᠢ᠃ ᠬᠡ ᠠᠬᠠ ᠮᠥᠨᠴᠦ ᠬᠣᠷᠢᠨ ᠲᠠᠪᠤᠲᠠᠢᠶᠤᠮᠰᠢᠭ᠋ ᠰᠡᠩᠭᠢᠨᠡᠭᠦᠯᠵᠦ ᠪᠠᠢᠭᠠ ᠰᠢᠪ ᠳ᠋ᠠ 》 ᠭᠡᠵᠦ ᠢᠯᠠᠭᠠ ᠵᠠᠯᠭᠢᠬᠤ ᠮᠡᠯᠡᠬᠡᠢᠰᠢᠭ ᠳᠠᠷᠪᠠᠢᠨ ᠢᠨᠢᠶᠡᠵᠦ ᠮᠣᠷᠢᠶᠢᠨᠢ ᠪᠠᠢᠨ ᠪᠠᠢᠨ ᠡᠷᠭᠢᠵᠦ ᠦᠵᠡᠭᠡᠳ:
《ᠭᠦᠶᠦᠳᠡᠭ ᠮᠣᠷᠢᠤᠤ?》 ᠭᠡᠪᠡ᠃
《ᠦᠭᠡᠢ ᠨᠣᠶᠠᠨᠮᠢᠨᠢ᠂ ᠭᠠᠭᠴᠠᠬᠠᠨ ᠤᠨᠤᠭᠠᠷᠲᠠᠢ ᠬᠥᠮᠦᠨ ᠬᠠᠮᠢᠭᠠᠠᠴᠠ ᠤᠷᠤᠯᠳᠤᠭᠠᠨᠳᠤ ᠣᠷᠤᠭᠤᠯᠬᠤ ᠪᠤᠢ᠃ 》
《ᠴᠥᠪᠦᠨ ᠴᠠᠭᠲᠤ ᠡᠪᠦᠭᠡᠨ ᠨᠠᠰᠤᠲᠠᠢ ᠬᠥᠮᠦᠨ᠂ ᠰᠠᠢᠨ ᠮᠣᠷᠢᠪᠠᠷ ᠶᠠᠭᠤ ᠬᠢᠬᠦ ᠪᠤᠢ! ᠠᠭᠡᠳᠡᠭᠡᠨ ᠥᠭᠴᠢᠬᠡ᠂ ᠬᠣᠵᠢᠮ ᠴᠢᠮᠠᠳᠤ ᠡᠬᠡᠶᠢᠨᠢ ᠡᠴᠡᠭᠡᠬᠦᠦᠭᠡᠢ ᠲᠤᠭᠤᠯᠢᠨᠢ ᠲᠤᠷᠠᠭᠠᠬᠤᠦᠭᠡᠢᠪᠠᠷ ᠤᠨᠠᠭᠠᠲᠠᠢ ᠭᠡᠭᠦᠦ ᠥᠭᠭᠦᠶᠡ᠃ 》
《ᠮᠢᠨᠦ ᠬᠥᠯ ᠳᠡᠭᠦᠵᠢᠯᠡᠵᠦ ᠶᠠᠪᠤᠳᠠᠭᠨᠢ ᠡᠨᠡ ᠰᠢᠤ᠃ 》
《ᠶᠠᠭᠤ ᠭᠡᠨᠡ? ᠭᠡᠭᠦᠦ ᠬᠥᠯ ᠳᠡᠭᠦᠵᠢᠯᠡᠵᠦ ᠪᠣᠯᠳᠠᠭᠦᠭᠡᠢᠶᠤᠮᠤᠤ? ᠴᠢ ᠣᠷᠤᠨ ᠨᠤᠲᠤᠭᠠᠴᠠᠪᠠᠨ ᠣᠷᠭᠤᠵᠤ ᠶᠠᠭᠠᠬᠢᠬᠤ ᠪᠣᠳᠤᠯᠲᠠᠢ ᠡᠲᠡᠭᠡᠳ ᠪᠤᠢ? ᠲᠡᠭᠡᠭᠡᠳ ᠡᠨᠡ ᠰᠤᠮᠤᠶᠢ ᠡᠵᠡᠨ ᠡᠰᠢᠦᠭᠡᠢ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠᠤᠤ?》 ᠭᠡᠰᠡᠨ ᠦᠭᠡ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠵᠢᠷᠦᠬᠡᠶᠢ ᠣᠭᠲᠤᠴᠢᠬᠤᠰᠢᠭ᠋ ᠪᠣᠯᠭᠠᠯᠠ᠃
《ᠠᠭᠡᠮᠢᠨᠢ ᠥᠷᠦᠰᠢᠶᠡ》 ᠭᠡᠳ ᠮᠥᠷᠭᠦᠬᠦ ᠭᠡᠲᠡᠯᠡ ᠭᠦᠵᠡᠭᠡ ᠰᠢᠷᠠ ᠨᠥᠭᠦᠭᠡᠳᠡᠬᠢ ᠤᠷᠤᠭᠤᠪᠠᠨ ᠵᠠᠩᠭᠠᠬᠤᠳᠤ ᠴᠡᠷᠢᠭᠨᠢ ᠳᠡᠪᠬᠡᠷᠦᠨ ᠪᠠᠭᠤᠵᠤ ᠢᠷᠡᠭᠡᠳ ᠴᠤᠯᠪᠤᠭᠤᠷᠢᠨᠢ ᠰᠤᠭᠤ ᠲᠠᠲᠠᠪᠠ᠃ ᠬᠡᠰᠢᠭᠲᠣᠭᠲᠠᠬᠤ ᠲᠣᠩᠭᠤᠷᠤᠨ ᠤᠨᠠᠭᠰᠠᠨᠢᠶᠠᠨ ᠭᠠᠵᠠᠷ ᠰᠠᠮᠤᠷᠳᠠᠨ ᠪᠣᠰᠴᠤ ᠭᠦᠵᠡᠭᠡ ᠰᠢᠷᠠᠶᠢᠨ ᠴᠤᠯᠪᠤᠭᠤᠷᠠᠴᠠ ᠠᠳᠭᠤᠨ ᠭᠤᠶᠤᠵᠠᠢ᠃ ᠭᠦᠪᠢᠭᠦᠷᠦᠨ ᠬᠤᠯᠤᠰᠤᠨ ᠡᠰᠢ ᠲᠡᠭᠦᠨᠦ ᠨᠢᠷᠤᠭᠤᠨᠳᠤ ᠬᠡᠴᠢᠨᠡᠨ ᠲᠤᠰᠤᠭᠰᠠᠨᠢ ᠪᠤᠤ ᠮᠡᠳᠡ᠂ ᠡᠪᠦᠭᠡᠨ ᠮᠥᠨᠯᠡ ᠭᠦᠵᠡᠭᠡ ᠰᠢᠷᠠᠶᠢᠨ ᠭᠠᠨᠵᠤᠭᠠᠠᠴᠠ ᠳᠡᠭᠦᠵᠢᠯᠡᠭᠳᠡᠭᠰᠡᠨ ᠬᠡᠪᠲᠡᠭᠡᠨ ᠪᠠᠢᠯᠠ᠃ ᠭᠦᠵᠡᠭᠡ ᠰᠢᠷᠠ᠂ ᠰᠢᠷᠢᠨ ᠤᠯᠠᠲᠠᠢ ᠥᠭᠡᠳᠡᠩ ᠭᠤᠲᠤᠯᠤᠨᠢᠶᠠᠨ ᠬᠣᠩᠰᠢᠶᠠᠷᠢᠶᠠᠷ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠮᠠᠩᠨᠠᠢᠶᠢ ᠬᠠᠯᠵᠠ ᠢᠰᠭᠦᠯᠪᠡ᠃ ᠪᠤᠭᠤᠷᠤᠯ ᠬᠥᠮᠦᠰᠭᠡᠶᠢᠨᠢ ᠳᠠᠭᠠᠵᠤ ᠤᠷᠤᠰᠤᠭᠰᠠᠨ ᠬᠦᠷᠡᠩ ᠤᠯᠠᠭᠠᠨ ᠴᠢᠰᠤ ᠭᠦᠵᠡᠭᠡ ᠰᠢᠷᠠᠶᠢᠨ ᠴᠠᠭᠠᠨ ᠳᠡᠪᠡᠯᠢ ᠴᠣᠬᠤᠷᠯᠠᠨ ᠪᠤᠳᠤᠬᠤᠳᠤ᠂
《ᠨᠢᠭᠤᠷ ᠥᠭᠬᠦᠶᠢ ᠮᠡᠳᠡᠬᠦᠦᠭᠡᠢ ᠡᠨᠡ ᠮᠠᠭᠤ ᠨᠣᠬᠠᠢᠶᠢ ᠬᠣᠯᠠ ᠵᠠᠢᠯᠠᠭᠤᠯ》 ᠭᠡᠵᠦ ᠥᠨᠥᠬᠢ ᠴᠡᠷᠢᠭᠲᠡᠭᠡᠨ ᠲᠤᠰᠢᠶᠠᠯᠠ᠃ ᠲᠡᠷᠡᠨᠢ ᠡᠪᠦᠭᠡᠨᠦ ᠳᠠᠯᠤ ᠮᠥᠷᠦ᠂ ᠵᠠᠭᠠᠮᠠᠶᠢ ᠬᠠᠤ ᠲᠠᠲᠠᠬᠤᠳᠤ ᠬᠡᠰᠢᠭᠲᠣᠭᠲᠠᠬᠤ ᠭᠦᠵᠡᠭᠡ ᠰᠢᠷᠠᠶᠢ ᠬᠣᠷᠮᠤᠢᠳᠠᠭᠰᠠᠨ ᠴᠢᠭᠲᠡᠭᠡᠨ ᠵᠢᠭᠤᠷᠠᠯᠳᠤᠨᠠ᠃ ᠵᠢᠷᠤᠭᠠ ᠰᠠᠷᠠᠯ ᠮᠣᠷᠢ ᠭᠡᠨᠡᠳᠲᠡ ᠬᠠᠯᠤᠷᠢᠰᠬᠢᠲᠠᠯᠠ ᠭᠦᠵᠡᠭᠡ ᠰᠢᠷᠠ᠂ ᠡᠪᠦᠭᠡᠨᠢ ᠳᠠᠷᠤᠵᠤ ᠪᠥᠮᠪᠦᠢᠨ ᠤᠨᠠᠪᠠ᠃ ᠭᠦᠵᠡᠭᠡ ᠰᠢᠷᠠᠶᠢᠨ ᠠᠭᠤᠷ ᠴᠡᠭᠡᠵᠢᠨᠳᠡᠭᠡᠨ ᠪᠠᠭᠲᠠᠵᠤ ᠶᠠᠳᠠᠨ ᠡᠪᠦᠭᠡᠨᠢ ᠢᠰᠭᠦᠯᠬᠦ ᠭᠡᠰᠡᠨᠴᠢᠨᠢ ᠬᠡᠢ ᠲᠡᠢᠷᠦᠭᠡᠳ ᠭᠣᠣᠯᠢᠶᠠᠷᠢᠶᠠᠨ ᠰᠠᠪᠠᠵᠤ ᠤᠨᠠᠯᠠ᠃ ᠨᠣᠭᠤᠭᠠᠨ ᠳᠥᠷᠦᠭᠡᠪᠴᠢᠨ ᠭᠥᠯᠢᠮᠦᠨ ᠰᠢᠷᠢ ᠬᠢᠷᠤᠵᠤ᠂ ᠶᠠᠰᠤᠨ ᠬᠢᠷᠠᠲᠠᠢ ᠡᠮᠡᠭᠡᠯᠦᠨ ᠮᠣᠳᠤᠶᠢ ᠠᠬᠠ ᠪᠣᠯᠲᠠᠯᠠ ᠢᠰᠭᠦᠴᠢᠨ ᠬᠥᠭᠯᠡᠭᠰᠡᠨ ᠵᠢᠷᠤᠭᠠ ᠰᠠᠷᠠᠯ ᠮᠣᠷᠢ ᠲᠣᠭᠤᠰᠤ ᠲᠠᠲᠠᠭᠤᠯᠤᠭᠠᠳ ᠳᠠᠯᠳᠠ ᠣᠷᠤᠪᠠ᠃ ᠽᠠᠨᠳᠠᠨ ᠬᠦᠷᠡᠩ᠂ ᠥᠨᠥᠬᠢ ᠰᠠᠷᠠᠯᠤᠨ ᠰᠢᠪᠰᠢᠭᠲᠦ ᠪᠠᠢᠳᠠᠯᠠᠴᠠ ᠳᠤᠷᠠ ᠪᠤᠯᠭᠢᠭᠰᠠᠨ ᠮᠡᠲᠦ ᠭᠠᠭᠴᠠᠭᠠᠷ ᠵᠡᠭᠦᠨ ᠡᠮᠦᠨᠡᠰᠢᠪᠡᠨ ᠳᠠᠪᠬᠢᠵᠠᠢ᠃
《ᠦᠬᠦᠯ ᠵᠠᠢᠳᠠᠩᠨᠠᠭᠰᠠᠨ ᠲᠤᠯᠤᠮ! ᠬᠤᠷᠳᠤᠨ᠂ ᠮᠣᠷᠢ ᠪᠠᠷᠢᠵᠤ ᠠᠪᠴᠢᠷᠠ》 ᠭᠡᠵᠦ ᠭᠦᠵᠡᠭᠡ ᠰᠢᠷᠠᠶᠢ ᠴᠢᠷᠠᠯᠠᠬᠤᠳᠤ ᠥᠨᠥ ᠴᠡᠷᠢᠭ ᠪᠤᠲᠠ ᠪᠤᠷᠭᠠᠰᠤᠨᠤ ᠳᠡᠭᠡᠭᠦᠷ ᠬᠠᠷᠠᠢᠯᠭᠠᠨ ᠭᠠᠷᠲᠠᠯᠠ ᠬᠥᠯ ᠳᠣᠣᠷᠠᠠᠴᠠᠨᠢ ᠪᠥᠵᠦᠩ ᠳᠡᠪᠬᠡᠷᠦᠮᠡᠭᠴᠡ ᠳᠦᠷᠰᠦᠪᠡᠨ ᠡᠯᠡᠰᠦᠨᠳᠦ ᠬᠡᠪᠯᠡᠵᠦ ᠶᠠᠪᠠᠭᠠᠷᠠᠪᠠ᠃ ᠲᠡᠭᠡᠭᠡᠳ ᠡᠮᠡᠭᠡᠯᠲᠡᠢ ᠬᠥᠭᠯᠡᠭᠰᠡᠨ ᠵᠢᠷᠤᠭᠠ ᠰᠠᠷᠠᠯᠤᠨ ᠠᠷᠤᠠᠴᠠ ᠬᠠᠮᠬᠤᠤᠯᠰᠢᠭ᠋ ᠲᠦᠨᠲᠦᠭᠡᠨᠡᠨ ᠭᠦᠶᠦᠵᠡᠢ᠃
ᠭᠦᠵᠡᠭᠡ ᠰᠢᠷᠠ᠂ ᠡᠪᠦᠭᠡᠨᠢ ᠨᠢᠳᠤᠷᠭᠠᠳᠠᠨ ᠪᠠᠯᠪᠠᠬᠤᠳᠤ ᠲᠡᠭᠦᠨᠦ ᠭᠠᠷᠠᠴᠠ ᠮᠤᠯᠲᠤᠷᠠᠬᠤ ᠭᠡᠰᠡᠨ ᠡᠪᠦᠭᠡᠨ ᠨᠢᠭᠤᠷᠢᠶᠠᠨ ᠪᠤᠷᠤᠭᠤᠯᠠᠨ ᠪᠠᠢᠭᠠᠨᠢ ᠴᠣᠬᠤᠮᠳᠠᠭᠠᠨ ᠬᠡᠨᠨᠢ ᠬᠡᠨᠢᠪᠡᠨ ᠵᠠᠨᠴᠢᠵᠤ ᠪᠠᠢᠬᠤᠨᠢ ᠢᠯᠭᠠᠷᠠᠬᠤᠦᠭᠡᠢ ᠪᠠᠢᠯᠠ᠃ ᠬᠡᠰᠢᠭᠲᠣᠭᠲᠠᠬᠤ ᠪᠣᠯ ᠵᠠᠯᠠᠭᠤᠳᠠᠭᠠᠨ ᠲᠣᠭᠠᠲᠤ ᠪᠥᠬᠡᠶᠢᠨ ᠲᠣᠭᠠᠨᠳᠤ ᠳᠡᠪᠢᠵᠦ᠂ ᠲᠣᠷᠭᠠᠨ ᠵᠣᠳᠤᠭᠤᠨ ᠮᠥᠷᠦᠡᠴᠡ ᠠᠳᠭᠤᠵᠤ ᠪᠠᠢᠭᠰᠠᠨ ᠣᠮᠤᠭ ᠰᠦᠷᠲᠡᠢ ᠲᠦᠷᠭᠡᠨ ᠱᠠᠯᠠᠪ ᠬᠥᠮᠦᠨ ᠪᠠᠢᠵᠠᠢ᠃ ᠣᠳᠣ ᠨᠠᠰᠤᠨᠢ ᠬᠡᠳᠦᠢᠪᠡᠷ ᠲᠠᠪᠢ ᠭᠠᠷᠤᠭᠰᠠᠨᠴᠤ ᠬᠠᠷᠠ ᠲᠠᠮᠠᠬᠢᠨᠤ ᠴᠢᠳᠭᠦᠷ-᠊ ᠰᠡᠭᠦᠳᠡᠷᠨᠢ ᠪᠠᠢᠪᠠᠴᠤ ᠰᠦᠯᠳᠡᠨᠢ ᠵᠠᠢᠯᠠᠭᠰᠠᠨ ᠬᠥᠮᠦᠨᠦ ᠥᠭᠡᠳᠡᠡᠴᠡ ᠭᠠᠷ ᠳᠠᠯᠠᠢᠵᠤ ᠦᠵᠡᠭᠡᠦᠭᠡᠢ ᠵᠠᠩᠨᠢ ᠤᠷᠤᠭᠤ ᠲᠠᠲᠠᠵᠤ 《ᠨᠣᠶᠠᠨᠮᠢᠨᠢ ᠥᠷᠦᠰᠢᠶᠡ》 ᠭᠡᠳᠡᠭ ᠤᠩᠰᠢᠯᠭᠠ ᠤᠩᠰᠢᠭᠰᠠᠭᠠᠷ ᠪᠠᠢᠯᠠ᠃ ᠭᠦᠵᠡᠭᠡ ᠰᠢᠷᠠ ᠠᠷᠠᠢ ᠴᠢᠷᠠᠢ ᠡᠪᠦᠭᠡᠨᠦ ᠭᠠᠷᠠᠴᠠ ᠮᠤᠯᠲᠤᠷᠠᠨ ᠪᠣᠰᠴᠤ᠂ ᠲᠠᠰᠢᠶᠠᠪᠠᠨ ᠰᠤᠢᠯᠠᠨ ᠭᠠᠷ ᠫᠤᠤ ᠭᠠᠷᠭᠠᠭᠠᠳ ᠡᠪᠦᠭᠡᠨᠦ ᠴᠡᠭᠡᠵᠢ ᠤᠷᠤᠭᠤ ᠴᠢᠭᠯᠡᠭᠦᠯᠦᠨ:
《ᠬᠥᠭᠰᠢᠨ ᠠᠮᠢᠴᠢᠨᠢ ᠡᠭᠦᠨ ᠳᠣᠲᠤᠷᠠ ᠪᠠᠢᠨᠠ ᠭᠡᠳᠡᠭᠢᠶᠡᠨ ᠮᠡᠳᠡᠪᠡᠦᠦ?》 ᠭᠡᠵᠦ ᠰᠢᠯᠦᠰᠦᠪᠡᠨ ᠰᠠᠢᠷᠠᠭᠤᠯᠪᠠ᠃
《ᠠᠭᠡᠮᠢᠨᠢ ᠥᠷᠦᠰᠢᠶᠡᠯᠳᠡᠭᠡᠨ ᠪᠠᠭᠲᠠᠭᠠ》 ᠭᠡᠳ ᠬᠣᠷᠮᠤᠢ ᠳᠡᠪᠢᠰᠦᠨ ᠮᠥᠷᠭᠦᠬᠦ ᠭᠡᠲᠡᠯᠡ᠂
《ᠴᠢ ᠬᠤᠷᠳᠤᠨ ᠶᠠᠪᠤᠵᠤ ᠮᠣᠷᠢᠪᠠᠨ ᠪᠠᠷᠢᠵᠤ ᠠᠪᠴᠢᠷᠠ!ᠦᠭᠡᠢ ᠪᠣᠯ ᠷᠢᠯᠤ ᠡᠮᠬᠦᠨᠡ ᠭᠡᠳᠡᠭᠢᠶᠡᠨ ᠮᠡᠳᠡᠭᠡᠷᠡᠢ᠃ ᠮᠤᠤᠰᠠᠢᠨ ᠭᠤᠢᠷᠠᠨᠴᠢᠨᠤᠭᠤᠳ ᠪᠠ ᠯᠦᠳᠦ ᠬᠥᠯ ᠵᠠᠯᠭᠠᠭᠤᠯᠬᠤ ᠰᠠᠨᠠᠭᠠᠲᠠᠢᠤᠤ?》 ᠭᠡᠵᠦ ᠡᠪᠦᠭᠡᠨᠢ ᠤᠷᠤᠭᠰᠢᠪᠠᠨ ᠬᠥᠭᠡᠭᠡᠵᠦ ᠶᠠᠪᠤᠬᠤ ᠭᠡᠲᠡᠯᠡ ᠭᠠᠷᠢᠨᠢ ᠬᠠᠵᠠᠭᠤ ᠲᠡᠰᠢ ᠰᠢᠭᠠᠬᠤᠳᠤ ᠭᠦᠵᠡᠭᠡ ᠰᠢᠷᠠ ᠫᠤᠤᠪᠠᠨ ᠠᠯᠳᠠᠪᠠ᠃ ᠬᠣᠭᠤᠯᠠᠢᠶᠢᠨᠢ ᠣᠭᠲᠤᠯᠬᠤ ᠭᠡᠵᠦ ᠪᠠᠢᠭᠠ ᠢᠮᠠᠭᠠᠰᠢᠭ᠋ ᠴᠢᠷᠠᠯᠠᠲᠠᠯᠠ᠂ ᠬᠡᠰᠢᠭᠲᠣᠭᠲᠠᠬᠤ ᠬᠥᠯᠳᠦᠨᠢ ᠬᠤᠮ ᠲᠠᠯᠪᠢᠵᠤ ᠲᠠᠰᠢᠶᠠᠯᠳᠤᠨ ᠤᠨᠠᠭᠠᠭᠠᠳ ᠠᠮᠠᠪᠠᠷᠨᠢ ᠡᠯᠡᠰᠦ ᠬᠣᠭ ᠳᠦᠭᠦᠷᠲᠡᠯᠡ ᠲᠣᠯᠤᠭᠠᠢᠶᠢᠨᠢ ᠭᠠᠵᠠᠷᠲᠤ ᠨᠦᠳᠦᠪᠡ᠃ ᠬᠥᠯ ᠭᠠᠷᠢᠶᠠᠨ ᠲᠡᠢᠴᠢᠭᠢᠨᠡᠵᠦ ᠪᠠᠢᠭᠰᠠᠨᠨᠢ ᠨᠠᠮ ᠪᠣᠯᠵᠤ ᠪᠡᠶᠡᠨᠢ ᠬᠥᠰᠢᠵᠡᠢ᠃ ᠬᠡᠰᠢᠭᠲᠣᠭᠲᠠᠬᠤ᠂ ᠭᠠᠷ ᠫᠤᠤᠶᠢᠨᠢ ᠠᠪᠴᠤ ᠦᠵᠡᠪᠡᠯ ᠳᠣᠲᠤᠷᠠᠨᠢ ᠭᠤᠷᠪᠠᠬᠠᠨ ᠰᠤᠮᠤᠲᠠᠢ ᠪᠠᠢᠨᠠ᠃ ᠪᠡᠶᠡᠶᠢᠨᠢ ᠨᠡᠩᠵᠢᠵᠦ᠂ ᠲᠡᠷᠯᠢᠭ ᠳᠣᠲᠤᠷᠠᠪᠠᠨ ᠮᠥᠷᠦᠪᠴᠢᠯᠡᠭᠰᠡᠨ ᠰᠢᠷᠢᠨ ᠡᠭᠦᠷᠦᠪᠴᠢᠲᠡᠢ ᠰᠤᠮᠤ ᠣᠯᠪᠠ᠃ ᠲᠡᠭᠡᠭᠡᠳ 《 ᠭᠠᠪᠠᠯᠠ ᠳᠡᠭᠡᠷᠡᠨᠢ ᠴᠢᠭᠯᠡᠭᠦᠯᠵᠦ ᠨᠢᠭᠡᠯᠬᠡᠨ ᠠᠳᠭᠤᠶᠠ》 ᠭᠡᠵᠦ ᠪᠣᠳᠤᠭᠠᠳ ᠰᠤᠮᠤ ᠲᠦᠯᠬᠢᠵᠦ ᠬᠢᠭᠰᠡᠨᠦ ᠳᠠᠷᠠᠭᠠ 《ᠫᠤᠤ ᠳᠤᠤᠭᠠᠷᠬᠤ ᠰᠣᠨᠤᠰᠳᠠᠪᠠᠯ ᠬᠡᠷᠡᠭ ᠮᠠᠭᠤᠬᠠᠢ ᠪᠣᠯᠤᠨᠠ ᠁》 ᠭᠡᠵᠦ ᠨᠢᠷᠤᠭᠤᠨ ᠳᠡᠭᠡᠷᠡᠨᠢ ᠬᠡᠳᠦ ᠬᠡᠳᠦ ᠳᠡᠪᠢᠰᠦᠭᠡᠳ ᠲᠣᠯᠤᠭᠠᠢ ᠳᠡᠭᠡᠷᠡᠨᠢ ᠨᠢᠯᠪᠤᠵᠤ ᠮᠣᠷᠢᠪᠠᠨ ᠪᠠᠷᠢᠬᠤᠪᠠᠷ ᠭᠦᠶᠦᠵᠡᠢ᠃
ᠡᠭᠡᠷᠡᠮᠡ ᠲᠠᠯᠠᠳᠤ ᠡᠵᠡᠨᠢᠶᠡᠨ ᠬᠠᠶᠠᠳᠠᠭᠦᠭᠡᠢ ᠽᠠᠨᠳᠠᠨ ᠬᠦᠷᠡᠩ ᠲᠡᠭᠦᠨᠦ ᠡᠮᠦᠨᠡ ᠬᠣᠩᠬᠤᠷᠲᠤ ᠴᠤᠯᠪᠤᠭᠤᠷᠢᠶᠠᠨ ᠤᠨᠵᠢᠭᠤᠯᠤᠨ ᠶᠠᠪᠤᠵᠤ ᠪᠠᠢᠨᠠ᠃ ᠭᠠᠵᠠᠷ ᠰᠢᠩᠰᠢᠯᠡᠭᠰᠡᠨ ᠨᠣᠬᠠᠢᠰᠢᠭ᠋ ᠳᠠᠭᠠᠵᠤ ᠪᠠᠢᠭᠠ ᠥᠨᠥᠬᠢ ᠴᠡᠷᠢᠭᠢ ᠣᠢᠷᠠᠲᠤᠬᠤ ᠪᠦᠷᠢ ᠰᠡᠭᠦᠯᠢᠶᠡᠨ ᠬᠠᠳᠭᠤᠨ ᠳᠤᠲᠠᠭᠠᠭᠰᠠᠭᠠᠷ ᠪᠠᠢᠯᠠ᠃ ᠬᠡᠰᠢᠭᠲᠣᠭᠲᠠᠬᠤ ᠭᠠᠷ ᠫᠤᠤᠪᠠᠨ ᠬᠠᠨᠴᠤᠢᠯᠠᠨ ᠲᠡᠭᠦᠨᠦ ᠳᠡᠷᠭᠡᠳᠡ ᠬᠦᠷᠴᠦ:
《ᠠᠭᠡ ᠨᠠᠮᠠᠢ ᠲᠠᠨᠢ ᠬᠠᠮᠵᠢᠯᠴᠠᠨ ᠮᠣᠷᠢ ᠪᠠᠷᠢᠭᠠᠳ ᠢᠷᠡ ᠭᠡᠯᠡ᠃ ᠲᠠ ᠬᠣᠶᠠᠷᠤᠨ ᠮᠣᠷᠢᠴᠢᠨᠢ ᠬᠠᠮᠢᠭᠠ ᠪᠤᠢ?》 ᠭᠡᠬᠦᠳᠦ:
《ᠠᠭᠡ ᠵᠠᠩᠭᠢᠶᠢᠨ ᠵᠢᠷᠤᠭᠠ ᠰᠠᠷᠠᠯ ᠮᠣᠷᠢ ᠡᠮᠡᠭᠡᠯᠲᠡᠢᠪᠡᠨ ᠬᠥᠭᠯᠡᠭᠡᠳ ᠮᠢᠨᠦ ᠮᠣᠷᠢᠶᠢ ᠳᠠᠭᠠᠭᠤᠯᠤᠨ ᠠᠯᠠᠭᠠ ᠪᠣᠯᠪᠠ᠃ ᠣᠳᠣ ᠶᠡᠷᠦ ᠶᠠᠭᠠᠬᠢᠳᠠᠭ ᠪᠢᠯᠡ ᠠᠪᠤ ᠠ᠋!》 ᠭᠡᠵᠦ ᠤᠬᠢᠯᠠᠬᠤ ᠰᠢᠬᠠᠵᠤ᠂ ᠫᠤᠤᠪᠠᠨ ᠡᠭᠡᠯᠳᠦᠷᠭᠡᠯᠡᠨ ᠡᠭᠦᠷᠦᠭᠰᠡᠨ ᠬᠡᠪᠲᠡᠭᠡᠨ ᠭᠠᠵᠠᠷᠠᠴᠠ ᠭᠠᠳᠠᠰᠤ ᠰᠤᠭᠤᠯᠵᠤ ᠪᠠᠢᠬᠤᠰᠢᠭ᠋ ᠪᠣᠷᠪᠢᠪᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠠᠯᠬᠤᠨᠠ᠃
《ᠪᠤᠤ ᠬᠥᠳᠡᠯ!》 ᠭᠡᠵᠦ ᠡᠭᠡᠮᠳᠦᠨᠢ ᠫᠤᠤ ᠲᠤᠯᠭᠠᠮᠠᠭᠴᠠ:
《ᠠᠮᠢ ᠠᠪᠤᠷᠠ! ᠠᠪᠤᠮᠢᠨᠢ ᠡ! ᠪᠢ ᠫᠤᠤ ᠰᠤᠮᠤᠪᠠᠨ ᠲᠤᠰᠢᠶᠠᠶᠠ》 ᠭᠡᠵᠦ ᠬᠣᠶᠠᠷ ᠭᠠᠷᠢᠶᠠᠨ ᠰᠤᠷᠮᠠᠭᠠᠢᠬᠠᠨ ᠡᠷᠭᠦᠪᠡ᠃
* * *
ᠲᠡᠷᠭᠡᠯ ᠰᠠᠷᠠᠲᠠᠢ ᠥᠩᠭᠡᠪᠡᠨ ᠬᠠᠷᠰᠢᠭᠤᠯᠤᠭᠰᠠᠨ ᠣᠳᠤᠳᠤᠨ ᠨᠠᠭᠠᠭᠤᠷ ᠲᠡᠮᠡᠦᠯᠦᠨ ᠨᠢᠰᠬᠦ ᠥᠨᠦᠴᠢᠨ ᠴᠠᠭᠠᠨ ᠡᠭᠦᠯᠡ ᠵᠣᠷᠢᠭᠰᠠᠨ ᠵᠦᠭᠦᠭᠡᠢ ᠮᠡᠲᠦ ᠬᠥᠪᠪᠦᠯᠵᠡᠨ ᠨᠡᠭᠦᠬᠦᠳᠦ ᠲᠡᠮᠡᠴᠡᠯᠦᠨ ᠬᠢᠯᠢᠩ ᠣᠷᠭᠢᠯᠤᠭᠰᠠᠨ ᠬᠡᠰᠢᠭᠲᠣᠭᠲᠠᠬᠤ ᠴᠣᠬᠤᠮ ᠬᠠᠮᠢᠭᠠ ᠡᠴᠢᠬᠦᠪᠡᠨ ᠮᠡᠳᠡᠯᠦᠭᠡᠢ ᠳᠡᠮᠡᠢᠯᠡ ᠠᠯᠤᠰᠢ ᠰᠢᠷᠲᠡᠨ ᠶᠠᠪᠤᠨᠠ᠃ ᠪᠤᠲᠠ ᠪᠤᠲᠠᠷᠭᠠᠨᠠ ᠯᠦᠭᠯᠦᠢᠭᠡᠳ ᠮᠣᠷᠢᠲᠠᠢ ᠲᠡᠮᠡᠭᠡᠲᠡᠢ ᠬᠥᠮᠦᠨᠰᠢᠭ ᠰᠠᠨᠠᠭᠳᠠᠬᠤ ᠪᠥᠭᠡᠳ ᠪᠤᠷᠭᠠᠰᠤᠨᠤ ᠨᠠᠮᠠᠭᠠ ᠬᠠᠶᠠ ᠰᠠᠯᠬᠢᠨᠳᠤ ᠰᠠᠷᠴᠢᠭᠢᠨᠠᠬᠤᠨᠢ ᠭᠡᠨᠡᠳᠲᠡ ᠡᠳᠦᠷᠦᠨᠲᠡᠢ ᠠᠳᠠᠯᠢ ᠥᠯᠵᠡᠢ ᠪᠤᠰᠤ ᠬᠡᠷᠡᠭ ᠲᠣᠬᠢᠶᠠᠯᠳᠤᠬᠤᠰᠢᠭ᠋ ᠪᠣᠳᠤᠭᠳᠠᠨᠠ᠃ 《ᠭᠠᠷ ᠬᠣᠭᠤᠰᠤᠨ ᠪᠠᠢᠬᠤᠳᠤ ᠭᠦᠵᠡᠭᠡ ᠰᠢᠷᠠᠠᠴᠠ ᠮᠤᠯᠲᠤᠷᠠᠭᠰᠠᠨᠶᠤᠮᠴᠢᠨᠢ ᠭᠠᠯ ᠵᠠᠮᠤᠭᠤᠨ ᠡᠰᠢ ᠠᠳᠭᠤᠵᠤ ᠪᠠᠢᠭᠠᠳ ᠵᠦᠭᠡᠷ ᠵᠣᠭᠰᠤᠬᠤᠤᠤ?》 ᠭᠡᠳᠡᠭ ᠪᠣᠳᠤᠯᠢᠶᠠᠷ ᠰᠡᠳᠭᠢᠯᠢᠶᠡᠨ ᠲᠡᠵᠢᠭᠡᠵᠦ ᠶᠠᠪᠤᠯᠠ᠃ ᠭᠡᠪᠡᠴᠦ ᠭᠡᠷ ᠣᠷᠤᠨᠦᠭᠡᠢ᠂ ᠮᠠᠯ ᠬᠥᠷᠦᠩᠭᠡᠡᠴᠡᠪᠡᠨ ᠰᠠᠯᠤᠭᠰᠠᠨ ᠬᠥᠮᠦᠨ ᠠᠮᠢᠳᠤᠷᠠᠬᠤᠳᠤ ᠪᠡᠷᠬᠡ ᠠᠵᠢ᠃ ᠲᠡᠷᠡᠴᠢᠯᠡᠨ ᠡᠨᠡ ᠲᠣᠭᠤᠷᠢᠨ ᠪᠠᠢᠳᠠᠯᠤᠨ ᠳᠣᠲᠤᠷᠠ ᠬᠣᠶᠠᠷ ᠫᠤᠤᠲᠠᠢ ᠬᠥᠮᠦᠨ ᠣᠷᠤᠬᠤ ᠭᠠᠵᠠᠷ ᠠᠯᠠᠭᠠᠰᠢᠭ᠋ ᠪᠠᠢᠯᠠ᠃ ᠨᠢᠭᠡ ᠪᠣᠳᠤᠪᠠᠯ ᠭᠦᠵᠡᠭᠡ ᠰᠢᠷᠠᠶᠢ ᠴᠢᠭᠲᠦᠨᠢ ᠣᠷᠤᠭᠤᠯᠤᠭᠠᠳ ᠬᠣᠶᠠᠷ ᠲᠤᠭᠤᠯᠲᠠᠢ ᠦᠨᠢᠶᠡᠪᠡᠨ ᠣᠯᠵᠤ ᠭᠡᠷ ᠣᠷᠤᠨᠳᠠᠭᠠᠨ ᠪᠤᠴᠠᠮᠠᠷ ᠪᠠᠢᠨᠠ᠃ ᠭᠡᠪᠡᠴᠦ ᠡᠯ ᠶᠠᠩᠭᠦᠸᠠᠷᠤᠨ ᠬᠡᠯᠡᠳᠡᠭ 《ᠡᠳᠡ ᠮᠤᠤᠰᠠᠢᠨᠤ ᠥᠮᠦᠭ ᠲᠦᠰᠢᠭᠨᠢ ᠨᠢᠭᠡᠴᠦ ᠪᠢᠰᠢ᠂ ᠬᠥᠮᠦᠨᠦ ᠴᠢᠰᠤ ᠮᠢᠬᠠᠶᠢ ᠵᠤᠯᠭᠠᠭᠠᠳᠠᠭ ᠪᠦᠭᠦᠳᠡᠨᠢ ᠲᠡᠭᠦᠨᠲᠡᠢ ᠠᠮᠢᠰᠭᠤᠭᠠ ᠨᠢᠭᠡᠲᠡᠢ ᠰᠢᠤ》 ᠭᠡᠬᠦᠨᠢ ᠶᠠᠭᠠᠬᠢᠬᠤᠶᠢᠨ ᠠᠷᠭᠠᠦᠭᠡᠢ ᠵᠥᠪ ᠪᠣᠯᠬᠤᠨᠢ ᠰᠠᠨᠠᠭᠳᠠᠯᠠ᠃ 《ᠦᠨᠡᠨᠦ ᠦᠷ ᠡᠮᠦᠨᠡᠡᠴᠡᠪᠡᠨ ᠴᠠᠢᠳᠠᠭ》 ᠭᠡᠭᠴᠢᠪᠡᠷ ᠡᠭᠦᠷᠢᠳᠡ ᠲᠡᠳᠡᠨᠦ ᠰᠠᠯᠲᠠᠭᠠ ᠳᠣᠣᠷᠠ ᠬᠦᠵᠦᠭᠦᠦᠪᠡᠨ ᠪᠥᠬᠦᠢᠬᠦᠦᠭᠡᠢ᠃ ᠮᠣᠩᠭᠤᠯ ᠬᠥᠮᠦᠨᠦ ᠳᠣᠲᠤᠷᠠᠴᠤ 《 ᠬᠥᠮᠦᠨᠦ ᠠᠷᠠᠰᠤᠨᠳᠤ ᠨᠣᠬᠠᠢᠶᠢᠨ ᠮᠢᠬᠠ ᠴᠢᠬᠢᠭᠰᠡᠨ ᠬᠥᠮᠦᠨ》 ᠪᠠᠢᠳᠠᠭᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠤᠬᠤᠳᠤᠨᠢ ᠲᠡᠷᠡ ᠡᠳᠦᠷ ᠥᠨᠳᠦᠷ ᠪᠡᠶᠡᠲᠡᠢ ᠨᠣᠶᠠᠨᠤ ᠢᠨᠢᠶᠡᠮᠰᠦᠭᠯᠡᠩᠭᠦᠢ ᠪᠠᠢᠭᠰᠠᠨ ᠨᠣᠮᠤᠬᠠᠨ ᠠᠭᠠᠰᠢ ᠨᠢᠳᠦᠨᠳᠦᠨᠢ ᠤᠷᠭᠤᠬᠤᠰᠢᠭ᠋ ᠪᠣᠯᠪᠠ᠃ 《 ᠨᠢᠭᠡᠨᠲᠡ ᠬᠡᠷᠡᠭ ᠡᠢᠮᠦ ᠪᠣᠯᠤᠭᠰᠠᠨ᠃ ᠡᠨᠡ ᠲᠣᠯᠤᠭᠠᠢ ᠬᠦᠵᠦᠭᠦᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠴᠠᠭᠲᠤ ᠭᠦᠵᠡᠭᠡ ᠰᠢᠷᠠᠲᠠᠢ ᠲᠡᠭᠷᠢᠶᠢᠨ ᠨᠠᠷᠠᠶᠢ ᠬᠠᠮᠲᠤ ᠦᠵᠡᠬᠦᠦᠭᠡᠢ》 ᠭᠡᠳ ᠨᠢᠯᠪᠤᠵᠤ ᠴᠢᠨᠠᠭᠰᠢ ᠱᠣᠭᠰᠢᠭᠤᠯᠪᠠ᠃
《ᠡᠷᠡ ᠬᠥᠮᠦᠨ ᠤᠯᠠᠢᠪᠠᠯ ᠴᠢᠨᠤᠠ ᠬᠠᠷᠠᠪᠠᠷ ᠴᠢᠴᠠᠭᠠ ᠠᠯᠳᠠᠳᠠᠭ》 ᠭᠡᠵᠦ ᠬᠠᠭᠤᠴᠢᠨᠤ ᠶᠠᠷᠢᠶᠠᠨᠳᠤ ᠪᠠᠢᠳᠠᠭᠰᠠᠨ᠃ ᠬᠡᠰᠢᠭᠲᠣᠭᠲᠠᠬᠤᠶᠢᠨ ᠦᠰᠦ ᠪᠤᠭᠤᠷᠤᠯ ᠪᠣᠯᠤᠭᠰᠠᠨᠠᠴᠠ ᠪᠢᠰᠢ᠂ ᠵᠢᠷᠦᠬᠡᠮᠢᠨᠢ ᠪᠤᠭᠤᠷᠤᠯ ᠪᠣᠯᠤᠭᠠᠳᠤᠢ᠃ ᠣᠳᠣ ᠥᠨᠳᠦᠷ ᠪᠡᠶᠡᠲᠡᠢ ᠨᠣᠶᠠᠨᠢ ᠡᠷᠢᠵᠦ ᠭᠦᠵᠡᠭᠡ ᠰᠢᠷᠠᠶᠢᠨ ᠰᠥᠰᠦ ᠵᠢᠷᠦᠬᠡᠶᠢ ᠬᠡᠮᠬᠡᠯᠳᠡᠭ ᠪᠠ ᠯᠦᠶᠢᠨ ᠴᠡᠷᠢᠭᠲᠦ ᠣᠷᠤᠪᠠᠯ ᠰᠠᠶᠢ ᠮᠢᠨᠦ ᠠᠮᠢᠳᠤᠷᠠᠬᠤ ᠵᠠᠮ᠃ ᠲᠡᠳᠡᠨᠦ ᠳᠣᠲᠤᠷᠠᠴᠤ ᠭᠡᠳ ᠰᠠᠬᠠᠯ ᠰᠠᠨᠴᠢᠭᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠰᠢᠪ ᠳ᠋ᠠ᠂ ᠲᠡᠭᠡᠭᠡᠳ ᠪᠠᠰᠠ ᠮᠠᠨᠠᠢᠬᠢᠨᠤ ᠪᠠᠭᠠᠴᠤᠳ ᠵᠠᠯᠠᠭᠤᠴᠤᠳ ᠪᠠ ᠯᠦ ᠴᠡᠷᠢᠭ ᠪᠣᠯᠤᠭᠠᠳ ᠶᠠᠪᠤᠵᠤᠯᠠ ᠪᠠᠢᠭᠠ ᠭᠡᠵᠦ ᠪᠣᠳᠤᠬᠤᠳᠤ ᠬᠥᠨᠵᠢᠯᠡ ᠳᠣᠲᠤᠭᠤᠷᠢᠶᠠᠨ ᠬᠥᠯ ᠭᠠᠷᠢᠶᠠᠨ ᠨᠡᠢᠯᠡᠭᠦᠯᠵᠦ ᠪᠠᠢᠭᠠ ᠭᠦᠵᠡᠭᠡ ᠰᠢᠷᠠᠶᠢᠨ ᠬᠠᠮᠰᠠᠭᠠᠲᠠᠨᠢ ᠪᠠᠭᠤᠴᠠᠪᠠᠷᠨᠢ ᠡᠷᠭᠢᠭᠦᠯᠦᠮᠡᠷ ᠪᠠᠢᠨᠠ᠃ ᠭᠡᠪᠡᠴᠦ ᠥᠨᠳᠦᠷ ᠨᠣᠶᠠᠨᠢ ᠶᠠᠭᠠᠬᠢᠵᠤ ᠡᠷᠢᠵᠦ᠂ ᠲᠡᠷᠡ ᠴᠡᠷᠢᠭᠲᠦ ᠶᠠᠭᠠᠬᠢᠵᠤ ᠣᠷᠤᠳᠠᠭ ᠵᠡᠷᠭᠡᠶᠢ ᠪᠣᠳᠤᠬᠤᠳᠤ ᠦᠨᠡᠨ ᠬᠦᠴᠢᠷᠰᠢᠭ ᠪᠠᠢᠯᠠ᠃ ᠡᠨᠡ ᠨᠢᠭᠡᠨ ᠵᠠᠮᠢ ᠮᠥᠷᠳᠡᠬᠦᠦᠭᠡᠢ ᠪᠣᠯ 《 ᠳᠡᠭᠡᠳᠦ ᠭᠣᠣᠯ》 ᠤᠰᠤᠨᠳᠤ ᠪᠠᠢᠲᠤᠭᠠᠢ ᠳᠡᠯᠡᠬᠡᠢ ᠳᠡᠭᠡᠷᠡᠴᠦ ᠠᠶᠠᠭᠠᠨ ᠠᠮᠠᠰᠠᠷ ᠡᠮᠬᠦᠵᠦ ᠶᠠᠪᠤᠬᠤ ᠡᠳᠦᠷᠦᠨ ᠨᠠᠷᠠ ᠳᠠᠬᠢᠭᠠᠳ ᠦᠵᠡᠭᠳᠡᠬᠦᠦᠭᠡᠢᠰᠢᠭ ᠪᠣᠯᠤᠨᠠ᠃ 《ᠡᠷᠡ ᠬᠥᠮᠦᠨ ᠪᠣᠳᠤᠭᠰᠠᠨᠳᠠᠭᠠᠨ ᠬᠦᠷᠬᠦᠦᠭᠡᠢ ᠪᠣᠯ ᠴᠢᠰᠤᠪᠠᠷ ᠪᠥᠭᠡᠯᠵᠢᠳᠡᠭ᠂ ᠡᠷᠡ ᠮᠣᠷᠢ ᠪᠣᠯᠵᠤᠭᠰᠠᠨᠳᠠᠭᠠᠨ ᠬᠦᠷᠬᠦᠦᠭᠡᠢ ᠪᠣᠯ ᠴᠢᠰᠤᠪᠠᠷ ᠰᠢᠭᠡᠳᠡᠭ》 ᠭᠡᠵᠦ ᠪᠣᠳᠤᠮᠠᠭᠴᠠ ᠰᠤᠮᠤᠨ ᠪᠦᠷᠢᠶᠡᠲᠡᠢ ᠲᠠᠰᠢᠭᠤᠷᠢᠶᠠᠨ ᠲᠠᠰᠤ ᠠᠳᠭᠤᠵᠤ ᠱᠣᠭᠰᠢᠭᠤᠯᠪᠠ᠃
ᠵᠢᠭᠠᠬᠠᠨ ᠰᠦᠮᠡᠶᠢᠨ ᠬᠠᠪᠢᠳᠤ ᠪᠠ ᠯᠦ ᠴᠡᠷᠢᠭ ᠪᠠᠢᠳᠠᠭ ᠭᠡᠵᠦ ᠳᠠᠮ ᠰᠣᠨᠤᠰᠤᠭᠰᠠᠨᠠᠴᠠ ᠪᠢᠰᠢ᠂ ᠴᠣᠬᠤᠮ ᠶᠠᠮᠠᠷ ᠴᠡᠷᠢᠭ ᠪᠠᠢᠬᠤᠶᠢ ᠬᠡᠷᠬᠢᠨ ᠮᠡᠳᠡᠬᠦ ᠪᠤᠢ! ᠦᠷ ᠲᠡᠮᠲᠡᠷᠢᠬᠦ ᠪᠣᠯᠲᠠᠯᠠ ᠪᠠᠰᠠ ᠨᠡᠯᠢᠶᠡᠳ ᠵᠠᠢᠲᠠᠢ ᠲᠤᠯᠠ ᠮᠣᠷᠢᠪᠠᠨ ᠵᠢᠭᠠᠬᠠᠨ ᠠᠮᠠᠷᠠᠭᠤᠯᠵᠤ ᠢᠳᠡᠭᠦᠯᠬᠦᠪᠡᠷ ᠪᠠᠭᠤᠪᠠ᠃
ᠬᠣᠯᠠᠶᠢᠨ ᠴᠢᠮᠡᠭᠡ ᠠᠨᠢᠷᠯᠠᠭᠰᠠᠨ ᠨᠣᠬᠠᠳ ᠤᠷᠲᠤ ᠤᠷᠲᠤ ᠬᠤᠴᠠᠬᠤᠨᠢ ᠬᠣᠲᠠᠴᠢ ᠤᠯᠠᠭᠠᠨ ᠬᠠᠯᠲᠠᠷᠲᠠᠢ ᠶᠠᠭᠠᠬᠢᠭᠰᠠᠨ ᠲᠥᠰᠲᠡᠢ ᠪᠤᠢ! ᠤᠷᠵᠢᠳᠤᠷ ᠪᠣᠯᠲᠠᠯᠠ 《 ᠬᠣᠷᠯᠣᠶᠢᠨᠢᠶᠠᠨ ᠲᠤᠬᠠᠢ ᠶᠠᠮᠠᠷ ᠨᠢᠭᠡᠨ ᠰᠤᠷᠠᠭ ᠣᠯᠬᠤᠰᠠᠨ᠃ ᠬᠣᠶᠠᠷ ᠲᠤᠭᠤᠯ ᠦᠨᠢᠶᠡᠪᠡᠨ ᠶᠠᠭᠠᠬᠢᠵᠤ ᠲᠣᠭᠠ ᠪᠦᠷᠢᠨ ᠣᠨᠳᠤᠷᠤᠭᠤᠯᠬᠤᠰᠠᠨ》 ᠭᠡᠵᠦ ᠪᠣᠳᠤᠯ ᠪᠣᠯᠵᠤ ᠪᠠᠢᠭᠰᠠᠨ ᠪᠣᠯ ᠣᠳᠣ 《ᠠᠮᠢ ᠨᠠᠰᠤᠪᠠᠨ ᠶᠠᠭᠠᠬᠢᠵᠤ ᠬᠠᠮᠠᠭᠠᠯᠠᠵᠤ ᠶᠠᠪᠤᠳᠠᠭ ᠪᠢᠯᠡ᠃ ᠠᠲᠠᠭᠠᠲᠠᠨ ᠳᠠᠢᠰᠤᠨᠠᠴᠠ ᠬᠡᠷᠬᠢᠨ ᠥᠰᠢᠶᠡᠪᠡᠨ ᠠᠪᠬᠤ ᠪᠢᠯᠡ》 ᠭᠡᠵᠦ ᠰᠠᠨᠠᠬᠤ ᠪᠣᠯᠵᠠᠢ᠃
ᠠᠪᠠᠯᠢ ᠡᠬᠡᠨᠡᠷᠡᠴᠡᠮᠢᠨᠢ ᠬᠠᠭᠠᠴᠠᠭᠤᠯᠵᠤ ᠠᠢᠯ ᠭᠡᠷᠦᠨᠮᠢᠨᠢ ᠡᠷᠦᠬᠡᠶᠢ ᠳᠠᠷᠤᠭᠤᠯᠤᠭᠰᠠᠨᠨᠢᠴᠤ ᠲᠡᠳᠡ᠂ ᠠᠮᠢᠨ ᠲᠡᠵᠢᠭᠡᠯᠡᠴᠡᠮᠢᠨᠢ ᠰᠠᠯᠭᠠᠵᠤ ᠠᠮᠢᠳᠤᠷᠠᠯᠤᠨᠮᠢᠨᠢ ᠡᠭᠦᠳᠡᠶᠢ ᠪᠥᠭᠯᠡᠭᠰᠡᠨᠴᠦ ᠮᠥᠨ ᠲᠡᠳᠡ᠃ᠦᠭᠡᠢ! ᠭᠠᠭᠴᠠᠬᠠᠨ ᠬᠡᠰᠢᠭ ᠨᠠᠮᠠᠢ ᠪᠢᠰᠢ᠂ ᠮᠠᠨᠤ 《ᠳᠡᠭᠡᠳᠦ ᠭᠣᠣᠯ》 ᠤᠰᠤᠨᠤ ᠬᠢᠨᠢ᠂ ᠪᠦᠬᠦ ᠬᠣᠰᠢᠭᠤ ᠬᠣᠲᠠᠯᠠ᠂ ᠬᠦᠷᠦᠨ ᠲᠥᠷᠦᠶᠢ ᠰᠠᠮᠠᠭᠤᠷᠠᠭᠤᠯᠵᠤ ᠪᠠᠢᠬᠤᠨᠢ ᠮᠥᠨ ᠲᠡᠳᠡ! 《ᠮᠣᠳᠤᠨᠤ ᠬᠣᠷᠤᠬᠠᠢ ᠮᠣᠳᠤᠨ ᠳᠣᠲᠤᠷᠠᠠᠴᠠᠪᠠᠨ》 ᠭᠡᠳᠡᠭ ᠦᠨᠡᠨᠳᠡᠭᠡᠨ ᠮᠡᠷᠭᠡᠨ ᠦᠭᠡ ᠪᠠᠢᠬᠤ! ᠬᠡᠷᠪᠡ ᠭᠦᠵᠡᠭᠡ ᠰᠢᠷᠠ ᠮᠡᠲᠦᠶᠢᠨ 《ᠪᠤᠰᠤᠳᠤᠨ ᠬᠣᠭᠤᠯᠠᠢᠶᠢ ᠪᠣᠭᠤᠮᠢᠯᠠᠵᠤ᠂ ᠥᠪᠡᠷᠦᠨᠢᠶᠡᠨ ᠣᠯᠤᠭᠠᠢᠶᠢ ᠬᠡᠯᠪᠢᠳᠡᠭ》 ᠬᠥᠮᠦᠨ ᠪᠠᠢᠭᠠᠦᠭᠡᠢ ᠪᠣᠯ ᠶᠠᠭᠤᠨᠤ ᠡᠢᠮᠦ ᠪᠣᠯᠬᠤ ᠪᠤᠢ? ᠭᠡᠵᠦ ᠮᠣᠷᠢᠪᠠᠨ ᠪᠠᠷᠢᠵᠤ ᠢᠳᠡᠭᠦᠯᠦᠭᠰᠡᠭᠡᠷ ᠶᠠᠪᠤᠨᠠ᠃ 《ᠪᠦᠷᠢᠯᠦᠭᠴᠢ ᠬᠣᠷᠯᠣ ᠡ! ᠪᠢᠳᠡ ᠬᠣᠶᠠᠷᠤᠨ ᠠᠮᠢᠳᠤᠷᠠᠯ ᠡᠨᠳᠡ ᠬᠦᠷᠦᠭᠡᠳ ᠡᠴᠦᠰᠯᠡᠵᠡᠢ᠃ ᠨᠢᠳᠦ ᠠᠨᠢᠲᠠᠯᠠ ᠠᠮᠢᠳᠤᠶᠢᠨᠢᠶᠠᠨ ᠮᠥᠷᠢ ᠬᠥᠭᠡᠭᠡᠨᠡ》 ᠭᠡᠵᠦ ᠲᠣᠬᠤᠢᠯᠠᠭᠰᠠᠨ ᠤᠷᠲᠤ ᠫᠤᠤᠪᠠᠨ ᠲᠡᠭᠰᠢᠯᠡᠨ ᠡᠭᠦᠷᠪᠡ᠃ 《ᠦᠭᠡᠢ!ᠮᠢᠨᠦ ᠠᠮᠢᠰᠭᠤᠭᠠ ᠬᠤᠷᠢᠶᠠᠭᠳᠠᠬᠤᠠᠴᠠ ᠡᠮᠦᠨᠡ ᠵᠢᠷᠦᠬᠡᠨᠳᠦᠮᠢᠨᠢ ᠬᠡᠵᠢᠶᠡᠳᠡᠭᠡᠨ ᠠᠮᠢᠳᠤ ᠶᠠᠪᠤᠨᠠ》 ᠭᠡᠳ ᠰᠢᠷᠠᠯᠠᠵᠤ ᠪᠠᠢᠭᠠ ᠲᠡᠭᠷᠢᠶᠢᠨ ᠬᠠᠶᠠᠭᠠ᠂ ᠰᠠᠴᠤᠷᠠᠵᠤ ᠪᠠᠢᠭᠠ ᠴᠣᠯᠮᠤᠨᠢ ᠬᠠᠷᠠᠭᠰᠠᠭᠠᠷ ᠮᠣᠷᠳᠠᠪᠠ᠃
ᠬᠡᠭᠡᠷᠡ ᠬᠣᠨᠤᠭᠰᠠᠨ ᠪᠣᠯᠤᠯᠲᠠᠢ ᠲᠤᠭᠤᠯ ᠪᠢᠷᠠᠭᠤ ᠨᠡᠢᠯᠡᠭᠦᠯᠦᠭᠡᠳ ᠠᠷᠪᠠᠭᠠᠳ ᠦᠬᠡᠷ ᠬᠥᠭᠡᠭᠡᠭᠰᠡᠨ ᠳᠤᠮᠳᠠᠶᠢᠨ ᠪᠡᠶᠡᠲᠡᠢ᠂ ᠡᠩᠭᠡᠷ ᠲᠣᠬᠤᠢᠨᠢ ᠰᠡᠮᠡᠷᠡᠵᠦ ᠡᠯᠡᠭᠳᠡᠭᠰᠡᠨ ᠰᠠᠭᠠᠯᠢᠶᠢᠨ ᠳᠡᠪᠡᠯᠲᠡᠢ᠂ ᠣᠢᠷᠠᠶᠢᠨ ᠡᠳᠦᠷ ᠨᠣᠢᠷᠦᠭᠡᠢᠶᠤᠮᠤᠤ? ᠬᠡᠮᠡᠷ ᠨᠢᠳᠦᠨᠳᠦᠨᠢ ᠤᠯᠠᠭᠠᠨ ᠰᠤᠳᠠᠰᠤ ᠪᠢᠯᠬᠠᠭᠰᠠᠨ ᠪᠦᠰᠡᠭᠦᠢ᠂ ᠡᠪᠦᠭᠡᠨᠦ ᠣᠴᠢᠬᠤ ᠵᠦᠭᠲᠦ ᠶᠠᠪᠤᠵᠤ ᠪᠠᠢᠯᠠ᠃ ᠥᠨᠥᠬᠢ ᠬᠥᠮᠦᠨ ᠨᠣᠢᠲᠠᠨ ᠪᠤᠷᠭᠠᠰᠤᠪᠠᠷ ᠦᠬᠡᠷᠦᠳᠢ ᠰᠢᠯᠪᠢᠭᠦᠷᠳᠡᠨ ᠪᠠᠷᠤᠭ ᠬᠥᠶᠦᠭᠡᠪᠡᠷᠢᠶᠡᠨ ᠶᠠᠪᠤᠨᠠ᠃ ᠬᠡᠰᠢᠭᠲᠣᠭᠲᠠᠬᠤ ᠥᠨᠳᠡᠢᠵᠦ ᠱᠣᠭᠰᠢᠭᠤᠯᠬᠤ ᠭᠡᠰᠡᠨ ᠮᠣᠷᠢᠨᠤᠪᠠᠨ ᠵᠢᠯᠤᠭᠤᠶᠢ ᠲᠠᠲᠠᠵᠤ 《ᠡᠨᠡᠴᠦ ᠮᠥᠨ ᠨᠠᠳᠠᠰᠢᠭ᠋ ᠬᠥᠮᠦᠨ ᠪᠠᠢᠵᠤ ᠶᠠᠭᠤ ᠮᠠᠭᠠᠳ ᠪᠤᠢ? ᠤᠯᠤᠰ ᠠᠮᠢᠲᠠᠨᠢ ᠰᠣᠴᠢᠭᠠᠵᠤ ᠶᠠᠭᠤ ᠬᠢᠬᠦ ᠪᠤᠢ?》 ᠭᠡᠳ ᠠᠯᠬᠤᠯᠠᠨ ᠬᠦᠷᠴᠡᠢ᠃
《ᠳᠡᠭᠦᠦᠮᠢᠨᠢ ᠰᠠᠢᠨ ᠪᠠᠢᠨᠠᠤᠤ?》 ᠭᠡᠵᠦ ᠮᠡᠨᠳᠦᠯᠡᠭᠰᠡᠨᠳᠦ ᠡᠪᠦᠭᠡᠨᠦ ᠴᠢᠷᠠᠢ ᠤᠷᠤᠭᠤ ᠤᠳᠠᠭᠠᠬᠠᠨ ᠰᠢᠷᠲᠡᠭᠰᠡᠨᠢᠶᠡᠨ᠂
《ᠰᠠᠢᠨ! ᠲᠠ ᠠᠮᠤᠷᠬᠠᠨ ᠮᠣᠷᠢᠯᠠᠵᠤ ᠪᠠᠢᠨᠠᠤᠤ?》 ᠭᠡᠳ ᠴᠢᠮᠡᠭᠡᠦᠭᠡᠢ ᠤᠷᠤᠭᠰᠢ ᠲᠡᠮᠡᠦᠯᠦᠨ ᠠᠯᠬᠤᠯᠠᠭᠰᠠᠭᠠᠷ ᠪᠠᠢᠪᠠ᠃
《ᠵᠢᠭᠠᠬᠠᠨ ᠰᠦᠮᠡ ᠣᠢᠷᠠ ᠪᠠᠢᠨᠠᠤᠤ?》 ᠭᠡᠰᠡᠨᠳᠦ᠂
《ᠰᠠᠢᠨ ᠮᠡᠳᠡᠬᠦᠦᠭᠡᠢ᠃ ᠬᠥᠳᠡᠭᠡ ᠬᠣᠨᠤᠭᠰᠠᠨ ᠦᠬᠡᠷ ᠁》 ᠭᠡᠪᠡ᠃
ᠦᠬᠡᠷᠦᠳᠦᠨ ᠬᠢᠨᠢ ᠰᠤᠭᠤ ᠴᠠᠪᠢᠠᠴᠠ ᠭᠠᠷᠤᠭᠰᠠᠨ ᠬᠥᠯᠦᠰᠦ ᠪᠠ ᠪᠥᠭᠡᠷᠡ ᠠᠯᠠᠭ ᠬᠡᠨᠵᠡ ᠲᠤᠭᠤᠯᠤᠨ ᠬᠢᠨᠢ ᠶᠠᠪᠤᠨ ᠶᠠᠳᠠᠭᠰᠠᠨ ᠪᠠᠢᠳᠠᠯᠠᠴᠠ ᠡᠨᠡ ᠪᠦᠰᠡᠭᠦᠢ ᠪᠣᠯ ᠬᠣᠯᠠᠠᠴᠠ ᠭᠠᠷᠴᠠᠢ ᠭᠡᠳᠡᠭᠢ ᠡᠪᠦᠭᠡᠨ ᠭᠠᠳᠠᠷᠯᠠᠪᠠ᠃
《ᠲᠠ ᠨᠠᠳᠠᠠᠴᠠ ᠠᠶᠤᠵᠤ ᠵᠣᠪᠠᠬᠤ ᠬᠡᠷᠡᠭᠦᠭᠡᠢ᠃ ᠪᠢ ᠪᠣᠯ ᠪᠠ ᠯᠦᠶᠢ ᠡᠷᠢᠵᠦ ᠶᠠᠪᠤᠭᠠ ᠬᠥᠮᠦᠨ᠃ ᠳᠡᠭᠦᠦᠮᠢᠨᠢ ᠳᠥᠲᠡ ᠰᠠᠢᠬᠠᠨ ᠵᠠᠮᠢᠨᠢ ᠵᠢᠭᠠᠵᠤ ᠥᠭᠬᠦ ᠪᠣᠯᠪᠠᠤᠤ》! ᠭᠡᠬᠦᠳᠦ ᠲᠡᠷᠡ ᠬᠥᠮᠦᠨ ᠡᠪᠦᠭᠡᠨᠢ ᠪᠠᠬᠠᠨ ᠭᠠᠢᠬᠠᠰᠬᠢᠨ ᠬᠠᠷᠠᠭᠰᠠᠨᠢᠶᠠᠨ:
《ᠲᠠᠴᠢᠨᠢ ᠴᠡᠷᠢᠭ ᠬᠥᠮᠦᠨᠦᠦ? ᠁》 ᠭᠡᠪᠡ᠃
《ᠴᠡᠷᠢᠭ ᠪᠢᠰᠢ᠂ ᠴᠡᠷᠢᠭᠲᠡᠢ ᠠᠭᠤᠯᠵᠠᠬᠤ ᠤᠴᠢᠷᠲᠠᠢ ᠪᠠᠢᠭᠠᠶᠤᠮ᠃ ᠮᠠᠨᠠᠢᠬᠢᠨᠳᠤ ᠳᠡᠭᠡᠷᠡᠮ ᠬᠤᠯᠠᠭᠠᠢ ᠳᠦᠭᠦᠷᠦᠭᠰᠡᠨ ᠭᠠᠵᠠᠷ ᠪᠠᠢᠭᠠ᠃ 》
《ᠭᠡᠷ ᠬᠠᠮᠢᠭᠠᠭᠤᠷ ᠪᠠᠢᠳᠠᠭ ᠪᠢᠯᠡ?》
《ᠳᠡᠭᠡᠳᠦ ᠭᠣᠣᠯᠳᠤ᠃ 》
《ᠬᠣᠷᠯᠣ ᠡᠵᠢᠶᠢᠨᠡᠴᠡ ᠬᠠᠮᠢᠭᠠᠰᠢ?》 ᠭᠡᠬᠦᠳᠦ ᠡᠪᠦᠭᠡᠨᠦ ᠳᠣᠲᠤᠷᠠ 《ᠫᠠᠯ》 ᠬᠢᠭᠰᠡᠨ ᠪᠣᠯᠪᠠᠴᠤ ᠦᠯᠦ ᠮᠡᠳᠡᠬᠦ ᠪᠣᠯᠵᠤ:
《ᠴᠤᠭ ᠪᠠᠢᠭᠠ᠃ ᠲᠠ ᠲᠡᠭᠦᠨᠢ ᠲᠠᠨᠢᠳᠠᠭ ᠬᠥᠮᠦᠨᠦᠦ?》 ᠭᠡᠪᠡ᠃
《ᠲᠠᠨᠢᠳᠠᠭ᠃ ᠲᠠᠨᠤ ᠠᠯᠳᠠᠷ ᠬᠡᠨ ᠭᠡᠳᠡᠭ ᠪᠤᠢ?》
《ᠬᠡᠰᠢᠭᠲᠣᠭᠲᠠᠬᠤ᠃ 》
《ᠲᠡᠭᠡᠪᠡᠯ ᠬᠣᠷᠯᠣ ᠡᠵᠢᠶᠢᠨ ᠨᠥᠬᠦᠷᠨᠢ ᠪᠢᠰᠢᠦ?》
《ᠲᠡᠢᠮᠦ᠃ 》
《ᠬᠡᠵᠢᠶᠡ ᠭᠡᠷᠡᠴᠡᠪᠡᠨ ᠮᠣᠷᠳᠠᠭᠰᠠᠨ ᠪᠤᠢ?》
《ᠬᠣᠷᠢᠭᠠᠳ ᠬᠣᠨᠤᠭ ᠪᠣᠯᠵᠤ ᠪᠠᠢᠨᠠ᠃ 》
《ᠬᠠᠮᠢᠭᠠᠭᠤᠷ ᠶᠠᠪᠤᠭᠠᠳ ᠲᠡᠷᠡ ᠪᠤᠢ?》
《ᠮᠤᠩᠭᠢᠨᠠᠭᠰᠠᠭᠠᠷ ᠁ ᠪᠠ ᠯᠦ ᠁》
《ᠵᠠ ᠴᠢᠩᠭᠢᠪᠡᠯ ᠪᠢ ᠮᠥᠨ ᠴᠡᠷᠢᠭ ᠳᠡᠭᠡᠷᠡ ᠣᠴᠢᠬᠤ ᠬᠥᠮᠦᠨ᠃ ᠨᠥᠬᠦᠷᠮᠢᠨᠢ ᠰᠠᠮᠪᠤᠤ ᠭᠡᠳᠡᠭ᠂ ᠴᠡᠷᠢᠭᠲᠦ ᠪᠠᠢᠭᠠᠶᠤᠮ᠃ ᠪᠢ ᠨᠤᠲᠤᠭ ᠣᠷᠤᠨᠳᠠᠭᠠᠨ ᠰᠠᠭᠤᠵᠤ ᠴᠢᠳᠠᠬᠤᠪᠠᠨ ᠪᠣᠯᠢᠭᠠᠳ ᠬᠡᠳᠦᠨ ᠮᠠᠯᠢᠶᠠᠨ ᠠᠪᠬᠤᠪᠠᠷ ᠬᠠᠷᠢᠭᠰᠠᠨᠶᠤᠮ ᠳ᠋ᠠ᠃ ᠲᠠ ᠡᠢᠮᠦ ᠡᠷᠲᠡ ᠬᠦᠷᠦᠭᠰᠡᠨᠦ ᠬᠡᠷᠡᠭ ᠠᠯᠠᠭᠠ᠃ ᠴᠡᠷᠢᠭᠦᠨ ᠵᠢᠷᠤᠮ᠂ ᠮᠠᠨᠠᠭᠠ ᠬᠠᠷᠠᠭᠤᠯ ᠭᠠᠭᠴᠠ ᠬᠣᠶᠠᠷ ᠵᠢᠰᠦ ᠪᠤᠷᠤᠭᠤ ᠬᠥᠮᠦᠨᠢ ᠲᠡᠢᠮᠦ ᠬᠢᠯᠪᠠᠷᠬᠠᠨ ᠣᠷᠤᠭᠤᠯᠬᠤᠦᠭᠡᠢ ᠪᠠᠢᠬᠤ ᠳ᠋ᠠ᠃ ᠲᠡᠭᠡᠭᠡᠳ ᠲᠠ ᠪᠠᠰᠠ ᠫᠤᠤ ᠰᠤᠮᠤᠲᠠᠢ ᠬᠥᠮᠦᠨ ᠲᠤᠯᠠ ᠨᠠᠳᠠᠲᠠᠢ ᠴᠤᠭ ᠬᠦᠷ》 ᠭᠡᠬᠦᠳᠦ ᠡᠪᠦᠭᠡᠨ ᠮᠣᠷᠢᠨᠠᠴᠠᠪᠠᠨ ᠪᠠᠭᠤᠵᠤ ᠦᠬᠡᠷᠢᠨᠢ ᠬᠠᠮᠵᠢᠯᠴᠠᠨ ᠬᠥᠭᠡᠭᠡᠵᠡᠢ᠃
* * *
ᠰᠢᠶᠣᠣ ᠴᠢᠨ᠂ ᠳᠡᠪᠦᠷᠡᠲᠡᠢ ᠴᠠᠢ᠂ ᠬᠠᠭᠤᠷᠠᠢ ᠪᠤᠳᠠᠭᠠᠲᠠᠢ ᠠᠪᠴᠢᠷᠠᠭᠠᠳ ᠴᠠᠢᠪᠤᠷ ᠪᠣᠷᠤ ᠬᠦᠷᠮᠡᠶᠢᠨ ᠳᠠᠯᠤ ᠮᠥᠷᠦᠨ ᠳᠡᠭᠡᠷᠡ ᠨᠥᠬᠦᠭᠡᠰᠦ ᠲᠠᠯᠪᠢᠵᠤ ᠡᠨᠳᠡ ᠲᠡᠨᠳᠡᠪᠡᠨ ᠴᠣᠬᠤᠷᠯᠠᠭᠳᠠᠨ ᠲᠣᠰᠤᠷᠬᠠᠵᠤ ᠪᠠᠯᠠᠷᠠᠰᠢᠦᠭᠡᠢ ᠮᠥᠩᠬᠡ ᠬᠠᠳᠠᠭᠳᠠᠭᠰᠠᠨ ᠬᠡᠰᠡᠭ ᠬᠡᠰᠡᠭ ᠴᠢᠰᠤᠶᠢ ᠠᠷᠢᠯᠭᠠᠬᠤᠠᠴᠠᠪᠠᠨ ᠵᠢᠷᠦᠬᠡᠰᠢᠭᠰᠡᠨ ᠮᠡᠲᠦ ᠰᠠᠯᠭᠠᠨᠠᠭᠰᠠᠨ ᠬᠣᠷᠯᠣᠶᠢᠨ ᠭᠠᠷᠢ ᠬᠠᠷᠠᠵᠤ:
《ᠡᠵᠢ ᠡ! ᠬᠠᠯᠠᠭᠤᠨ ᠳᠡᠭᠡᠷᠡᠨᠢ ᠴᠠᠢᠪᠠᠨ ᠤᠤᠭᠤᠴᠢᠬᠠ! ᠡᠮᠴᠢ ᠠᠮᠠᠷᠠᠵᠤ ᠰᠠᠭᠤ ᠭᠡᠰᠡᠨ ᠰᠢᠤ》 ᠭᠡᠪᠡ᠃
《ᠮᠢᠨᠦ ᠬᠥᠯ ᠮᠠᠭᠤ ᠪᠣᠯᠪᠠᠴᠤ ᠴᠡᠭᠡᠵᠢᠨ ᠪᠡᠶᠡ ᠡᠷᠡᠭᠦᠯ ᠪᠣᠯᠤᠭᠰᠠᠨ》 ᠭᠡᠳ ᠤᠤᠯ ᠬᠡᠪᠢᠶᠡᠷᠢᠶᠡᠨ ᠣᠷᠤᠯᠳᠤᠭᠰᠠᠭᠠᠷ ᠪᠠᠢᠪᠠ᠃
《ᠮᠢᠬᠠᠲᠠᠢ ᠪᠤᠳᠠᠭᠠ ᠴᠢᠨᠠᠵᠤ ᠢᠳᠡᠨᠡᠦᠦ?》
《ᠬᠦᠦᠮᠢᠨᠢ ᠡ! ᠪᠢ ᠶᠡᠷᠦᠳᠡ ᠥᠷᠯᠦᠭᠡ ᠡᠷᠲᠡ ᠬᠣᠭᠤᠯᠠ ᠢᠳᠡᠬᠦ ᠪᠠᠢᠲᠤᠭᠠᠢ ᠡᠳᠦᠷ ᠲᠤᠵᠢ ᠬᠣᠭᠤᠰᠤᠨᠴᠤ ᠪᠠᠢᠵᠤ ᠦᠵᠡᠭᠰᠡᠨ ᠬᠥᠮᠦᠨ ᠪᠢᠯᠡ᠃ 》
《ᠬᠣᠭᠤᠯᠠᠦᠭᠡᠢ ᠪᠣᠯ ᠪᠡᠶᠡᠴᠢᠨᠢ ᠲᠦᠷᠭᠡᠨ ᠰᠠᠢᠵᠢᠷᠠᠵᠤ ᠴᠢᠳᠠᠬᠤᠦᠭᠡᠢ᠃ ᠪᠢᠳᠡ ᠣᠢᠷᠠ ᠠᠢᠯᠠᠴᠠ ᠰᠦ᠋ ᠠᠪᠴᠢᠷᠠᠵᠤ ᠮᠥᠳᠳᠦ ᠴᠠᠢ ᠴᠢᠨᠠᠵᠤ ᠥᠭᠭᠦᠶᠡ᠃ ᠡᠨᠡᠴᠢᠨᠢ ᠬᠠᠷᠠ ᠴᠠᠢᠶᠤᠮ ᠳ᠋ᠠ 》 ᠭᠡᠳ ᠰᠢᠶᠣᠣ ᠴᠢᠨ ᠠᠷᠭᠠᠪᠠᠨ ᠪᠠᠷᠠᠭᠰᠠᠨ ᠮᠡᠲᠦ ᠬᠣᠷᠯᠣᠲᠠᠢ ᠬᠠᠮᠵᠢᠯᠴᠠᠨ ᠥᠨᠥ ᠬᠦᠷᠮᠡᠶᠢᠨ ᠴᠢᠰᠤᠶᠢ ᠨᠤᠬᠤᠯᠠᠵᠤ ᠣᠷᠤᠯᠳᠤᠪᠠ᠃ ᠡᠨᠡ ᠪᠣᠯ ᠬᠠᠪᠴᠢᠯ ᠲᠣᠭᠤᠷᠢᠮᠤᠨ ᠡᠬᠢᠨᠳᠦ ᠰᠢᠷᠬᠠᠲᠤᠭᠰᠠᠨ ᠯᠢᠦ ᠬᠤᠷᠢᠶᠠᠨ ᠳᠠᠷᠤᠭᠠᠶᠢᠨ ᠬᠠᠮᠠᠭᠠᠯᠠᠭᠴᠢ ᠳᠤᠩᠭᠠᠷᠤᠨ ᠬᠤᠪᠴᠠᠰᠤ ᠪᠠᠢᠵᠠᠢ᠃ ᠳᠤᠩᠭᠠᠷ ᠳᠠᠢᠰᠤᠨᠠᠴᠠ ᠽᠠᠨᠳᠠᠨ ᠬᠦᠷᠡᠩᠢ ᠪᠤᠯᠢᠶᠠᠨ ᠠᠪᠬᠤᠪᠠᠷ ᠰᠢᠪᠲᠤᠯᠤᠨ ᠣᠷᠤᠬᠤᠳᠠᠭᠠᠨ ᠡᠭᠡᠮᠢᠶᠡᠨ ᠰᠢᠷᠬᠠᠲᠤᠭᠤᠯᠵᠤ ᠬᠣᠷᠯᠣᠲᠠᠢ ᠨᠢᠭᠡ ᠭᠡᠷᠲᠦ ᠰᠠᠭᠤᠵᠤ ᠡᠮᠨᠡᠭᠦᠯᠦᠭᠡᠳ ᠨᠢᠭᠡᠨᠲᠡ ᠰᠠᠢᠨ ᠡᠳᠡᠭᠡᠵᠦ ᠡᠨᠡ ᠡᠳᠦᠷ ᠳᠠᠷᠤᠭᠠᠪᠠᠨ ᠬᠠᠮᠠᠭᠠᠯᠠᠨ ᠶᠠᠪᠤᠵᠤ ᠳᠠᠢᠰᠤᠨᠢ ᠴᠣᠬᠢᠬᠤ ᠡᠭᠦᠷᠭᠡᠲᠡᠢ ᠪᠣᠯᠵᠠᠢ᠃ ᠲᠡᠢᠮᠦᠡᠴᠡ ᠥᠴᠦᠭᠡᠳᠦᠷ ᠦᠳᠡᠰᠢ ᠤᠭᠠᠭᠰᠠᠨ ᠡᠨᠡᠬᠦ ᠬᠦᠷᠮᠡᠶᠢ ᠬᠣᠷᠯᠣ ᠴᠡᠭᠡᠵᠢᠨ ᠳᠣᠣᠷᠠᠪᠠᠨ ᠡᠪᠬᠡᠨ ᠳᠠᠷᠤᠵᠤ ᠬᠠᠲᠠᠭᠠᠭᠠᠳ ᠦᠷ ᠭᠡᠭᠡᠷᠡᠮᠡᠭᠴᠡ ᠨᠥᠬᠦᠵᠦ ᠪᠠᠢᠬᠤᠨᠢ ᠡᠨᠡ ᠪᠣᠯᠤᠨᠠ᠃
ᠴᠣᠬᠤᠮᠳᠠᠭᠠᠨ 《ᠭᠦᠵᠡᠭᠡ ᠰᠢᠷᠠᠶᠢ ᠠᠳᠤᠭᠤ ᠮᠠᠯ ᠳᠡᠭᠡᠷᠡᠮᠳᠡᠬᠦᠪᠡᠷ ᠨᠢᠭᠡ ᠪᠦᠯᠦᠭ ᠬᠤᠯᠠᠭᠠᠢ ᠳᠠᠭᠠᠭᠤᠯᠤᠭᠠᠳ ᠬᠠᠷᠢᠵᠤ ᠢᠷᠡᠪᠡ》 ᠭᠡᠳᠡᠭ ᠮᠡᠳᠡᠭᠡᠶᠢ ᠮᠠᠨᠤ ᠲᠤᠷᠰᠢᠭᠤᠯ ᠡᠨᠡ ᠥᠷᠯᠦᠭᠡ ᠢᠷᠡᠭᠦᠯᠦᠭᠰᠡᠨ ᠪᠣᠯᠬᠣᠷ ᠬᠣᠷᠯᠣ ᠡᠮᠡᠭᠡᠨ ᠳᠤᠩᠭᠠᠷᠢ ᠣᠳᠣ ᠮᠣᠷᠳᠠᠨᠠ ᠭᠡᠵᠦ ᠤᠷᠢᠳᠠᠠᠴᠠ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠤᠢ! ᠭᠡᠪᠡᠴᠦ ᠬᠣᠷᠢᠭᠠᠳ ᠡᠳᠦᠷᠦᠨ ᠠᠮᠢᠳᠤᠷᠠᠯᠠᠴᠠ 《ᠪᠣᠰᠪᠠᠯ ᠶᠠᠪᠤᠬᠤᠨᠢ ᠲᠡᠷᠡ᠂ ᠬᠡᠯᠡᠪᠡᠯ ᠬᠢᠬᠦᠨᠢ ᠲᠡᠷᠡ》᠂ ᠡᠨᠡ ᠪᠣᠯ ᠮᠠᠨᠤ ᠴᠡᠷᠢᠭᠦᠨ ᠰᠠᠢᠨ ᠵᠢᠷᠤᠮ ᠭᠡᠳᠡᠭᠢ ᠪᠠᠭᠠ ᠰᠠᠭᠠ ᠲᠠᠨᠢᠭᠰᠠᠨ ᠪᠠᠢᠯᠠ᠃ ᠢᠯᠠᠩᠭᠤᠶᠠ ᠣᠢᠷᠠᠠᠴᠠ ᠳᠤᠩᠭᠠᠷ ᠫᠤᠤᠪᠠᠨ ᠵᠦᠯᠭᠦᠵᠦ ᠵᠦᠯᠭᠦᠭᠡᠳ ᠬᠡᠵᠢᠶᠡ ᠨᠢᠭᠡ 《ᠳᠤᠩᠭᠠᠷ ᠡ! ᠣᠳᠣ ᠮᠣᠷᠳᠠᠨᠠ》 ᠭᠡᠵᠦ ᠳᠠᠷᠤᠭᠠᠮᠢᠨᠢ ᠬᠡᠯᠡᠬᠦ ᠪᠣᠯ᠂ ᠲᠡᠭᠡᠬᠦᠯᠡᠷ ᠁ ᠭᠡᠳ ᠫᠤᠤᠪᠠᠨ ᠡᠭᠦᠷᠦᠭᠡᠳ ᠬᠥᠰᠡᠷ ᠳᠣᠭᠤᠤᠷ ᠲᠣᠭᠤᠷᠢᠨ ᠠᠯᠬᠤᠭᠰᠠᠭᠠᠷ ᠰᠠᠭᠤᠳᠠᠭᠢ ᠬᠣᠷᠯᠣ ᠪᠠᠬᠠᠷᠬᠠᠨ ᠦᠵᠡᠳᠡᠭ ᠪᠠᠢᠵᠠᠢ᠃ ᠡᠭᠦᠨᠢᠨᠢ ᠥᠴᠦᠭᠡᠳᠦᠷ ᠣᠷᠤᠢ ᠰᠠᠮᠪᠤᠤ ᠳᠠᠷᠤᠭᠠ ᠦᠵᠡᠭᠡᠳ:
《ᠳᠡᠭᠵᠢᠨ ᠲᠠᠷᠢᠬᠢ ᠡ! ᠦᠢᠮᠡᠭᠦᠯᠦᠭᠡᠳ ᠡᠵᠢᠶᠢᠨᠢᠶᠡᠨ ᠪᠡᠶᠡᠶᠢ ᠪᠤᠤ ᠮᠠᠭᠤᠳᠠᠭᠤᠯᠴᠢᠬᠠ!》 ᠭᠡᠵᠦ ᠴᠠᠭᠠᠨ ᠨᠢᠳᠦᠪᠡᠷ ᠬᠠᠷᠠᠬᠤᠳᠤᠨᠢ᠂
《ᠤᠢᠳᠤᠭᠠᠳ ᠪᠠᠢᠬᠤᠯᠠᠷ ᠳᠤᠩᠭᠠᠷᠢᠶᠠᠷ ᠦᠯᠢᠭᠡᠷ ᠬᠡᠯᠡᠭᠦᠯᠵᠦ ᠪᠠᠢᠨᠠ》 ᠭᠡᠵᠦ ᠡᠮᠡᠭᠡᠨ ᠬᠠᠰᠢᠵᠤ ᠬᠡᠯᠡᠨᠡ᠃
ᠽᠠᠨᠳᠠᠨ ᠬᠦᠷᠡᠩᠦᠨ ᠳᠠᠭᠤᠨᠰᠢᠭ᠋ ᠤᠷᠲᠤᠯᠠᠭᠰᠠᠨ ᠥᠳᠭᠡᠨᠢᠶᠡᠷ ᠮᠣᠷᠢ ᠢᠨᠴᠠᠭᠠᠬᠤ ᠰᠣᠨᠤᠰᠳᠠᠪᠠ᠃
《ᠡᠵᠢ ᠡ! ᠠᠪᠤ ᠢᠷᠡᠯᠡ》 ᠁ ᠭᠡᠳ ᠴᠣᠩᠬᠤᠪᠠᠷ ᠱᠠᠭᠠᠢᠭᠰᠠᠨ ᠰᠢᠶᠣᠣ ᠴᠢᠨ ᠭᠠᠳᠠᠭᠠ ᠶᠠᠪᠤᠭᠠ ᠤᠯᠤᠰ ᠲᠥᠷᠦᠶᠢᠨ ᠳᠠᠷᠤᠭᠠ ᠰᠠᠮᠪᠤᠤᠶᠢ ᠦᠵᠡᠮᠡᠭᠴᠡ ᠦᠭᠡᠪᠡᠨ ᠳᠤᠲᠠᠭᠤ ᠬᠡᠯᠡᠵᠦ ᠪᠠᠷᠬᠢᠷᠠᠭᠠᠳ ᠬᠡᠯᠡᠪᠡᠨ ᠪᠤᠯᠲᠠᠢᠯᠭᠠᠨ ᠠᠮᠠᠪᠠᠨ ᠳᠠᠷᠤᠪᠠ᠃
《ᠨᠥᠬᠦᠷ ᠰᠠᠮᠪᠤᠤᠶᠢᠨ ᠡᠮᠡᠭᠲᠡᠢᠲᠡᠢ ᠬᠣᠶᠠᠭᠤᠯᠠ ᠢᠷᠡᠵᠡᠢ》 ᠭᠡᠵᠦ ᠯᠢᠦ ᠬᠤᠷᠢᠶᠠᠨ ᠳᠠᠷᠤᠭᠠᠶᠢ ᠬᠡᠯᠡᠲᠡᠯᠡ ᠦᠬᠡᠷ ᠨᠢᠳᠦᠯᠡᠭᠰᠡᠨ ᠬᠡᠰᠢᠭᠲᠣᠭᠲᠠᠬᠤ :
《ᠴᠢᠮᠠ ᠲᠠᠢᠭᠠᠨ ᠤᠴᠠᠷᠠᠨᠠ ᠭᠡᠵᠦ ᠶᠡᠷᠦ ᠰᠠᠨᠠᠭᠰᠠᠨᠦᠭᠡᠢ》 ᠭᠡᠳ ᠬᠣᠷᠯᠣᠶᠢᠨ ᠮᠥᠷᠦᠶᠢ ᠪᠠᠵᠠᠭᠠᠳ ᠲᠡᠪᠡᠷᠢᠪᠡ᠃
ᠨᠢᠭᠡ ᠮᠡᠳᠡᠬᠦᠳᠦ ᠨᠢᠯᠴᠢᠭᠢᠨᠡᠭᠰᠡᠨ ᠬᠠᠯᠠᠭᠤᠨ ᠭᠠᠷᠢᠶᠠᠷ ᠲᠡᠭᠦᠨᠦ ᠨᠢᠯᠪᠤᠰᠤᠶᠢ ᠠᠷᠴᠢᠵᠤ᠂ ᠮᠠᠩᠨᠠᠢᠶᠢᠨ ᠬᠢᠨᠢ ᠴᠢᠰᠤᠶᠢ ᠠᠷᠴᠢᠨ ᠤᠭᠢᠶᠠᠭᠠᠳ ᠡᠮᠲᠦ ᠪᠥᠰᠢᠶᠡᠷ ᠪᠣᠭᠤᠵᠤ ᠪᠠᠢᠭᠠ ᠯᠢᠦ ᠬᠤᠷᠢᠶᠠᠨ ᠳᠠᠷᠤᠭᠠ:
《ᠴᠠᠢ ᠬᠣᠭᠤᠯᠠ ᠢᠳᠡᠵᠦ ᠤᠤᠭᠤᠭᠠᠳ ᠪᠠᠬᠠᠨ ᠠᠮᠤᠰᠬᠢ!》 ᠭᠡᠵᠦ ᠬᠡᠯᠡᠵᠦ ᠪᠠᠢᠪᠠ᠃
《ᠡᠨᠡ ᠪᠣᠯ ᠠᠪᠤᠷᠠᠭᠴᠢ ᠬᠥᠮᠦᠨ ᠯᠢᠦ ᠬᠤᠷᠢᠶᠠᠨ ᠳᠠᠷᠤᠭᠠ᠂ ᠤᠯᠤᠰ ᠲᠥᠷᠦᠶᠢᠨ ᠳᠠᠷᠤᠭᠠ ᠰᠠᠮᠪᠤᠤ》 ᠭᠡᠳ ᠬᠣᠷᠯᠣ ᠪᠠᠢᠨ ᠪᠠᠢᠨ ᠨᠢᠭᠡ ᠦᠭᠡᠪᠡᠨ ᠳᠠᠪᠲᠠᠬᠤᠠᠴᠠ ᠥᠭᠡᠷᠡ ᠶᠠᠭᠤᠴᠤ ᠬᠡᠯᠡᠬᠦᠪᠡᠨ ᠮᠠᠷᠲᠠᠵᠠᠢ᠃
ᠲᠡᠭᠡᠭᠡᠳ ᠭᠣᠣᠯᠢᠶᠠᠨ ᠳᠠᠷᠤᠵᠤ ᠤᠳᠡᠰᠬᠢᠭᠡᠳ:
《ᠬᠣᠷᠢᠨ ᠭᠤᠷᠪᠠᠨᠳᠤ ᠴᠢᠮᠠᠢ ᠠᠮᠢ ᠵᠤᠯᠪᠠᠨ ᠭᠠᠷᠤᠮᠠᠭᠴᠠ ᠳᠡᠭᠡᠷᠡᠮᠴᠢᠳ ᠭᠡᠷ ᠬᠣᠲᠠᠶᠢᠮᠢᠨᠢ ᠨᠡᠪᠲᠡ ᠰᠢᠪᠲᠡ ᠫᠤᠤᠳᠠᠵᠤ ᠢᠷᠡᠭᠡᠳ 〈ᠲᠠᠨᠠᠢᠬᠢᠨᠠᠴᠠ ᠵᠡᠭᠦᠨᠰᠢᠪᠡᠨ ᠬᠦᠷᠡᠩ ᠮᠣᠷᠢᠲᠠᠢ ᠬᠥᠮᠦᠨ ᠳᠤᠲᠠᠭᠠᠭᠰᠠᠨ᠂ ᠬᠡᠨ ᠪᠤᠢ? ᠲᠦᠷᠭᠡᠨ ᠬᠡᠯᠡᠬᠦᠦᠭᠡᠢ ᠪᠣᠯ ᠪᠠᠭᠠ ᠬᠡᠯᠡᠶᠢᠴᠢᠨᠢ ᠪᠠᠭᠠᠯᠵᠤᠤᠷᠲᠠᠢᠨᠢ ᠰᠤᠭᠤᠯᠤᠨᠠ〉 ᠭᠡᠵᠦ ᠦᠰᠦᠶᠢᠮᠢᠨᠢ ᠬᠠᠭᠤ ᠲᠠᠲᠠᠪᠠ》 ᠭᠡᠳ ᠬᠣᠷᠯᠣ᠂ ᠵᠠᠩᠭᠢᠳᠤᠭᠰᠠᠨ ᠨᠢᠳᠤᠷᠭᠠᠪᠠᠨ ᠠᠶᠠᠷᠬᠠᠨ ᠨᠡᠭᠡᠭᠡᠵᠦ:
《ᠲᠡᠭᠡᠭᠡᠳ ᠠᠪᠳᠠᠷᠠ ᠱᠦᠭᠦᠢ᠂ ᠠᠶᠠᠭᠠ ᠰᠢᠨᠠᠭᠠ ᠲᠠᠴᠢᠭᠢᠨᠠᠭᠤᠯᠤᠨ ᠲᠦᠴᠢᠭᠢᠨᠡᠭᠦᠯᠵᠦ ᠪᠠᠢᠭᠰᠠᠨ᠃ ᠮᠡᠳᠡᠭᠳᠡᠬᠦᠡᠴᠡ ᠲᠡᠳᠡᠨᠦ ᠲᠡᠢᠷᠡᠩ ᠬᠥᠯ᠂ ᠭᠦᠷᠦᠮᠡᠯ ᠲᠠᠰᠢᠭᠤᠷᠠᠴᠠ ᠥᠭᠡᠷᠡ ᠶᠠᠭᠤᠮᠠ ᠨᠠᠳᠠᠲᠠᠢ ᠤᠴᠠᠷᠠᠬᠤᠦᠭᠡᠢ ᠪᠠᠢᠭᠰᠠᠨ᠃ 〈 ᠭᠤᠶᠤᠪᠠ ᠭᠡᠳ ᠥᠷᠦᠰᠢᠶᠡᠬᠦᠦᠭᠡᠢ᠂ ᠭᠤᠲᠤᠷᠠᠪᠠ ᠭᠡᠳ ᠥᠷᠦ ᠡᠪᠡᠳᠬᠦᠦᠭᠡᠢ〉ᠨᠢ ᠮᠠᠭᠠᠳ ᠭᠡᠵᠦ ᠪᠣᠳᠤᠭᠠᠳ ᠰᠢᠳᠦ ᠵᠠᠭᠤᠨ 〈 ᠨᠠᠰᠤᠪᠠᠨ ᠠᠯᠳᠠᠵᠤ ᠶᠠᠰᠤᠪᠠᠨ ᠴᠠᠢᠯᠭᠠᠬᠤᠶᠢᠨᠢ ᠪᠢ ᠦᠵᠡᠬᠦᠦᠭᠡᠢᠴᠦ ᠭᠡᠰᠡᠨ ᠮᠢᠨᠦ ᠦᠷᠡ ᠠᠴᠢᠨᠠᠷ ᠦᠵᠡᠨᠡ》 ᠭᠡᠳ ᠨᠢᠭᠤᠷᠳᠠᠨ ᠵᠣᠭᠰᠤᠭᠰᠠᠨ ᠯᠢᠦ ᠬᠤᠷᠢᠶᠠᠨ ᠳᠠᠷᠤᠭᠠᠶᠢᠨ ᠭᠠᠷᠢ ᠠᠳᠭᠤᠵᠤ:
《ᠴᠢᠨᠦ ᠬᠡᠯᠡᠵᠦ ᠪᠠᠢᠳᠠᠭ 〈ᠠᠮᠢᠳᠤ ᠪᠤᠷᠬᠠᠨ〉 ᠭᠡᠭᠴᠢᠨᠢ ᠶᠣᠰᠤᠲᠠᠢ ᠡᠨᠡ ᠪᠠᠢᠨᠠ᠂ ᠨᠢᠳᠦ ᠨᠡᠭᠡᠭᠡᠬᠦᠳᠦ ᠭᠠᠳᠠᠭᠠ ᠠᠪᠠᠴᠢᠵᠤ ᠰᠠᠯᠬᠢ ᠥᠭᠡᠳᠡ ᠬᠠᠷᠠᠭᠤᠯᠤᠭᠠᠳ ᠬᠡᠳᠦᠨ ᠬᠥᠮᠦᠨ ᠡᠩᠭᠡᠷᠢᠮᠢᠨᠢ ᠲᠠᠢᠯᠵᠤ ᠪᠠᠢᠯᠠ᠃ 〈ᠥᠨᠥ ᠮᠤᠤᠰᠠᠢᠨ ᠨᠣᠬᠠᠳ ᠨᠢᠴᠦᠭᠦᠯᠡᠨ ᠲᠠᠮᠤᠯᠠᠬᠤ ᠪᠣᠯᠵᠤ ᠰᠢᠤ᠂ ᠣᠢᠷᠠᠲᠤᠭᠰᠠᠨ ᠳᠡᠭᠡᠷᠡᠨᠢ ᠲᠦᠭᠦᠰᠢᠯᠡᠶᠡ〉 ᠭᠡᠳ ᠰᠢᠳᠦ ᠵᠠᠭᠤᠨ ᠠᠯᠠᠭᠠᠳᠠᠭᠰᠠᠨᠴᠢᠨᠢ ᠬᠥᠭᠡᠷᠦᠬᠦᠢ!ᠮᠢᠨᠦ ᠠᠪᠤᠷᠠᠭᠴᠢ ᠬᠥᠮᠦᠨ ᠪᠠᠢᠵᠠᠢ》 ᠭᠡᠵᠦ ᠬᠣᠷᠯᠣᠶᠢ ᠵᠣᠪᠠᠭᠰᠠᠨ ᠲᠥᠯᠦᠪᠲᠡᠢ ᠪᠣᠯᠬᠤᠳᠤ ᠯᠢᠦ ᠳᠠᠷᠤᠭᠠᠶᠢᠨ ᠨᠢᠭᠤᠷ ᠳᠡᠭᠡᠷᠡ ᠢᠨᠢᠶᠡᠳᠦ ᠳᠡᠯᠭᠡᠷᠡᠪᠡ᠃
《ᠲᠠᠨᠳᠤ ᠵᠠᠬᠢᠳᠠᠯ ᠦᠯᠡᠳᠡᠭᠡᠵᠦ ᠬᠣᠷᠯᠣ ᠡᠵᠢᠶᠢ ᠠᠪᠴᠢᠷᠠᠨ ᠡᠮᠨᠡᠵᠦ ᠥᠭᠬᠦᠶᠢ ᠪᠢᠴᠢᠭᠰᠡᠨᠶᠦᠮᠰᠡᠨ᠃ ᠲᠠ ᠦᠵᠡᠪᠡᠦᠦ?》 ᠭᠡᠵᠦ ᠯᠢᠦ ᠬᠤᠷᠢᠶᠠᠨ ᠳᠠᠷᠤᠭᠠ ᠬᠡᠯᠡᠬᠦᠳᠦ ᠬᠡᠰᠢᠭᠲᠣᠭᠲᠠᠬᠤ ᠡᠪᠦᠷᠢᠶᠡᠨ ᠠᠭᠤᠳᠠᠯᠵᠤ ᠬᠣᠶᠠᠷ ᠡᠪᠬᠡᠳᠡᠰᠦ ᠭᠠᠷᠭᠠᠯᠠ᠃ ᠰᠠᠮᠪᠤᠤ ᠨᠢᠭᠡᠶᠢᠨᠢ ᠤᠩᠰᠢᠭᠠᠳ:
《ᠡᠨᠡᠴᠢᠨᠢ ᠲᠠᠨᠠᠢᠬᠢᠠᠴᠠ ᠨᠢᠭᠡ ᠴᠢᠳᠦᠷ ᠵᠢᠭᠡᠯᠡᠵᠦ ᠬᠡᠷᠡᠭᠯᠡᠭᠰᠡᠨᠦ ᠪᠠᠷᠢᠮᠲᠠ ᠪᠠᠢᠨᠠ》 ᠭᠡᠪᠡ᠃
ᠲᠡᠷᠡ ᠦᠶᠡᠶᠢᠨ ᠴᠡᠷᠢᠭ᠂ ᠺᠠᠳ᠋ᠷᠤᠳ ᠠᠷᠠᠳ ᠲᠦᠮᠡᠨᠡᠴᠡ ᠬᠦᠨᠡᠰᠦ᠂ ᠮᠣᠷᠢᠨᠤ ᠲᠡᠵᠢᠭᠡᠯ ᠬᠡᠷᠡᠭᠯᠡᠪᠡᠯ ᠡᠷᠬᠡᠪᠰᠢ ᠪᠠᠷᠢᠮᠲᠠ ᠦᠯᠡᠳᠡᠭᠡᠭᠡᠳ᠂ ᠬᠣᠵᠢᠮᠨᠢ ᠨᠡᠢᠭᠡᠮᠦᠨ ᠠᠯᠪᠠᠨ ᠡᠭᠦᠷᠭᠡᠪᠡᠷ ᠪᠣᠳᠤᠳᠠᠭ ᠪᠣᠯᠬᠣᠷ ᠬᠡᠰᠢᠭᠲᠣᠭᠲᠠᠬᠤ ᠡᠨᠡᠬᠦ ᠪᠢᠴᠢᠭᠢ ᠰᠠᠷᠠ ᠬᠠᠳᠠᠭᠠᠯᠠᠬᠤᠳᠠᠭᠠᠨ 《ᠳᠠᠭᠠᠶᠢᠮᠢᠨᠢ ᠡᠰᠡ ᠥᠭᠪᠡᠴᠦ ᠽᠠᠨᠳᠠᠨ ᠬᠦᠷᠡᠩᠢᠶᠡᠨ ᠠᠯᠪᠠᠨ ᠬᠥᠯᠳᠦ ᠣᠷᠤᠭᠤᠯᠬᠤᠦᠭᠡᠢ》 ᠭᠡᠵᠦ ᠠᠷᠭᠠᠯᠠᠬᠤᠪᠠᠷ ᠰᠠᠨᠠᠵᠤ ᠪᠠᠢᠵᠠᠢ᠃ ᠬᠠᠷᠢᠨ ᠰᠡᠭᠦᠯᠴᠢᠶᠢᠨ ᠡᠪᠬᠡᠭᠡᠳᠡᠰᠦᠨᠦ ᠤᠴᠢᠷᠢ ᠶᠡᠷᠦᠳᠡᠭᠡᠨ ᠪᠣᠳᠤᠵᠤ ᠮᠡᠳᠡᠭᠡᠳᠦᠢ ᠪᠥᠭᠡᠳ ᠥᠪᠡᠷᠦᠨ ᠭᠡᠵᠦ ᠢᠲᠡᠭᠡᠬᠦ ᠬᠥᠮᠦᠨᠡᠴᠡ ᠠᠰᠠᠭᠤᠬᠤ ᠲᠣᠬᠢᠶᠠᠯᠴᠤ ᠲᠠᠭᠠᠷᠠᠯᠳᠤᠭᠰᠠᠨᠦᠭᠡᠢ ᠪᠠᠢᠵᠠᠢ᠃ ᠡᠨᠡ ᠵᠠᠬᠢᠳᠠᠯᠤᠳᠤᠨ ᠲᠤᠬᠠᠢ ᠲᠣᠬᠢᠲᠠᠢ ᠦᠭᠡ ᠬᠡᠯᠡᠵᠦ ᠴᠢᠳᠠᠭᠰᠠᠨᠦᠭᠡᠢ ᠪᠣᠯᠪᠠᠴᠤ ᠬᠡᠰᠢᠭᠲᠣᠭᠲᠠᠬᠤ ᠥᠪᠡᠷᠦᠨᠢᠶᠡᠨ ᠪᠣᠳᠤᠵᠤ ᠰᠠᠨᠠᠭᠰᠠᠨ ᠵᠦᠢᠯ ᠪᠠ ᠰᠠᠷᠠ ᠬᠣᠷᠢᠨ ᠬᠣᠨᠤᠭᠤᠨ ᠳᠣᠲᠤᠷᠠ ᠪᠣᠯᠤᠭᠰᠠᠨ ᠶᠠᠪᠤᠳᠠᠯᠤᠳᠨᠢ ᠲᠡᠳᠡ ᠭᠤᠷᠪᠠᠳᠤ ᠲᠣᠭᠠᠴᠢᠨ ᠶᠠᠷᠢᠬᠤ ᠰᠡᠳᠦᠪ ᠪᠣᠯᠵᠠᠢ᠃
《ᠠᠪᠤᠶᠢᠨ ᠣᠯᠵᠠᠯᠠᠭᠰᠠᠨ ᠫᠤᠤᠶᠢ ᠦᠵᠡ!》 ᠭᠡᠵᠦ ᠭᠠᠷ ᠫᠤᠤ ᠡᠭᠡᠯᠳᠦᠷᠭᠡᠯᠡᠨ᠂ ᠤᠷᠲᠤ ᠫᠤᠤ ᠪᠠᠷᠢᠵᠤ ᠢᠷᠡᠭᠰᠡᠨ ᠰᠢᠶᠣᠣ ᠴᠢᠨ ᠬᠠᠮᠠᠷ ᠠᠮᠠᠪᠠᠨ ᠲᠣᠮᠤᠯᠵᠠᠭᠤᠯᠤᠨ: 《ᠪᠤᠳᠠᠭᠠ ᠬᠠᠯᠠᠭᠤᠯᠵᠤ ᠪᠠᠢᠨᠠ᠃ ᠳᠠᠷᠤᠭᠠ ᠡ!》 ᠭᠡᠳ ᠦᠭᠡᠪᠡᠨ ᠬᠤᠷᠢᠶᠠᠯᠠ᠃ ᠬᠡᠰᠢᠭᠲᠣᠭᠲᠠᠬᠤ᠂ ᠴᠡᠷᠢᠭᠲᠦ ᠡᠯᠰᠡᠭᠳᠡᠬᠦᠪᠡᠷ ᠢᠷᠡᠭᠰᠡᠨ ᠲᠤᠬᠠᠢᠪᠠᠨ ᠶᠠᠷᠢᠬᠤᠳᠤ ᠰᠠᠮᠪᠤᠤ᠂ ᠯᠢᠦ ᠨᠥᠬᠦᠷ ᠬᠣᠶᠠᠷ ᠲᠡᠭᠦᠨᠦ ᠭᠠᠷᠢ ᠠᠳᠭᠤᠪᠠ᠃ ᠬᠣᠷᠯᠣᠶᠢᠨ ᠨᠢᠳᠦᠨᠳᠦᠨᠢ ᠬᠡᠦᠬᠡᠨ ᠦᠶᠡᠶᠢᠨ ᠬᠢᠨᠢ ᠣᠴᠢᠲᠤ ᠲᠤᠩᠭᠠᠯᠠᠭ ᠭᠡᠷᠡᠯ ᠣᠷᠭᠭᠢᠯᠤᠨ ᠴᠣᠪᠤᠭᠤ ᠴᠡᠴᠡᠭᠡᠢᠨᠢ ᠮᠦᠰᠢᠶᠡᠭᠰᠡᠭᠡᠷ ᠪᠠᠢᠪᠠ᠃
ᠴᠡᠷᠢᠭ ᠮᠣᠷᠳᠠᠬᠤ ᠳᠣᠬᠢᠶᠠ ᠲᠠᠯᠪᠢᠯᠠ᠃ ᠠᠩᠬᠠᠳᠠᠭᠴᠢᠶᠢᠨ ᠪᠠᠢᠯᠳᠤᠭᠠᠨᠳᠤ ᠲᠥᠪ ᠶᠣᠰᠤᠭᠠᠷ ᠮᠣᠷᠳᠠᠬᠤ ᠭᠡᠰᠡᠨ ᠬᠡᠰᠢᠭᠲᠣᠭᠲᠠᠬᠤ ᠭᠦᠵᠡᠭᠡ ᠰᠢᠷᠠᠲᠠᠢ ᠵᠠᠭᠤᠷᠠᠯᠳᠤᠨ ᠨᠣᠴᠤᠯᠳᠤᠵᠤ ᠪᠠᠢᠭᠠᠳ ᠮᠠᠯᠠᠭᠠᠢᠪᠠᠨ ᠭᠡᠭᠡᠭᠰᠡᠨᠢᠶᠡᠨ ᠦᠭᠡᠢᠯᠡᠵᠡᠢ᠃ ᠰᠢᠶᠣᠣ ᠴᠢᠨ ᠪᠣᠷᠤ ᠮᠠᠯᠠᠭᠠᠢᠪᠠᠨ ᠡᠮᠦᠰᠭᠦᠯᠬᠦᠳᠦ ᠳᠡᠭᠵᠢᠨ ᠳᠤᠩᠭᠠᠷ :
《ᠬᠦᠦᠶᠢᠨᠢᠶᠡᠨ ᠮᠠᠯᠠᠭᠠᠢᠶᠢ ᠡᠮᠦᠰᠦᠭᠡᠳ ᠳᠠᠢᠰᠤᠨᠤ ᠵᠡᠪᠰᠡᠭᠢᠶᠡᠷ ᠬᠤᠶᠠᠭᠯᠠᠭᠰᠠᠨ ᠰᠢᠨᠡ ᠪᠠᠢᠯᠳᠤᠭᠴᠢ 〈ᠬᠣᠷᠢᠨ ᠲᠠᠪᠤ〉ᠲᠠᠢ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠬᠡᠰᠢᠭᠲᠣᠭᠲᠠᠬᠤ》 ᠭᠡᠵᠦ ᠬᠠᠵᠠᠭᠤᠳᠠᠬᠢ ᠨᠥᠬᠦᠷᠲᠡᠭᠡᠨ ᠢᠨᠢᠶᠡᠵᠦ ᠶᠠᠷᠢᠪᠠ᠃
ᠡᠷᠬᠡ ᠴᠢᠯᠦᠭᠡᠨᠦ ᠠᠯᠲᠠᠨ ᠲᠦᠯᠬᠢᠭᠦᠷᠢ ᠠᠳᠭᠤᠬᠤᠪᠠᠷ ᠲᠡᠮᠡᠴᠡᠭᠰᠡᠨ ᠵᠣᠷᠢᠭᠲᠤ ᠪᠠᠭᠠᠲᠤᠷᠤᠳᠢᠶᠠᠨ ᠦᠳᠡᠵᠦ᠂ ᠡᠩᠬᠡ ᠮᠡᠨᠳᠦᠶᠢᠨᠢ ᠵᠥᠩᠨᠡᠨ ᠠᠶᠠᠷᠯᠠᠬᠤ ᠬᠣᠷᠯᠣ᠂ ᠰᠢᠶᠣᠣ ᠴᠢᠨ᠂ ᠰᠠᠮᠪᠤᠤᠶᠢᠨ ᠪᠦᠰᠡᠭᠦᠢ ᠬᠣᠶᠠᠷᠢᠶᠠᠷ ᠲᠦᠰᠢᠭᠦᠯᠵᠦ ᠭᠠᠷᠤᠭᠠᠳ ᠰᠠᠷᠠᠪᠴᠢᠯᠠᠨ ᠬᠠᠷᠠᠵᠤ ᠵᠣᠭᠰᠤᠪᠠ᠃ ᠡᠰᠡᠨ ᠮᠡᠨᠳᠦ ᠠᠮᠢᠳᠤᠷᠠᠯᠤᠨ ᠡᠭᠦᠳᠡᠶᠢ ᠰᠡᠬᠦᠭᠰᠡᠨ ᠬᠡᠰᠢᠭᠲᠣᠭᠲᠠᠬᠤ᠂ ᠡᠯᠢᠭᠡ ᠵᠢᠷᠦᠬᠡ ᠨᠢᠭᠡᠲᠡᠨᠦᠪᠡᠨ ᠡᠩᠨᠡᠭᠡ ᠳᠤᠮᠳᠠ ᠡᠷᠡ ᠴᠢᠳᠠᠯᠲᠤ ᠽᠠᠨᠳᠠᠨ ᠬᠦᠷᠡᠩᠦᠨ ᠠᠭᠰᠤᠮᠨᠠᠨ ᠬᠥᠨᠲᠡᠷᠬᠦ ᠵᠢᠯᠤᠭᠤᠶᠢ ᠳᠠᠷᠤᠭᠰᠠᠭᠠᠷ ᠣᠳᠪᠠ᠃