| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠨᠥᠬᠦᠳᠮᠢᠨᠢ᠂ ᠲᠠᠨᠠᠷ ᠬᠣᠨᠢᠨᠤ ᠨᠣᠣᠰᠤᠪᠠᠷ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠭᠣᠶᠤ ᠰᠠᠢᠬᠠᠨ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ ᠨᠢᠰᠭᠡᠯᠳᠦ ᠰᠠᠭᠤᠵᠤ ᠡᠭᠦᠯᠡᠨ ᠳᠤᠮᠳᠠᠭᠤᠷ ᠠᠶᠠᠯᠠᠬᠤᠳᠠᠭᠠᠨ; ᠭᠢᠯᠲᠠᠭᠠᠨᠠᠭᠰᠠᠨ ᠰᠠᠢᠬᠠᠨ ᠦᠬᠡᠷᠦᠨ ᠠᠷᠠᠰᠤᠨ ᠱᠠᠬᠠᠢ ᠡᠮᠦᠰᠦᠭᠡᠳ ᠴᠠᠷᠳᠠᠮᠠᠯ ᠵᠠᠮᠢᠶᠠᠷ᠂ ᠡᠰᠡᠬᠦᠯᠡ ᠴᠡᠩᠬᠡᠷ ᠤᠰᠤ ᠨᠣᠭᠤᠭᠠᠨ ᠤᠳᠠᠲᠠᠢ ᠴᠡᠴᠡᠷᠯᠢᠭᠢᠶᠡᠷ ᠵᠤᠭᠠᠯᠠᠬᠤᠳᠠᠭᠠᠨ; ᠲᠠᠨᠢᠯ ᠰᠠᠢᠬᠠᠨ ᠨᠠᠢᠵᠠᠲᠠᠢᠪᠠᠨ ᠭᠤᠸᠠᠩᠵᠠᠨᠳᠤ ᠪᠠᠭᠤᠵᠤ ᠬᠠᠯᠠᠭᠤᠨ ᠲᠣᠭᠤᠭᠠᠨᠳᠤ ᠰᠢᠵᠢᠭᠢᠨᠠᠨ ᠪᠤᠴᠠᠯᠵᠤ ᠪᠠᠢᠭᠠ ᠰᠠᠢᠬᠠᠨ ᠠᠮᠲᠠᠲᠠᠢ ᠬᠣᠨᠢᠨ ᠮᠢᠬᠠᠨ ᠱᠥᠯᠦ ᠬᠠᠯᠪᠠᠭᠠᠳᠠᠵᠤ ᠬᠤᠨᠳᠠᠭᠠ ᠡᠷᠭᠦᠬᠦᠳᠡᠭᠡᠨ᠂ ᠡᠳᠡᠭᠡᠷ ᠶᠠᠭᠤᠮᠠ ᠪᠦᠬᠦᠨᠦ ᠲᠦᠭᠦᠬᠡᠢ ᠡᠳ᠋ᠢ ᠬᠠᠩᠭᠠᠬᠤᠶᠢᠨ ᠲᠥᠯᠦᠭᠡ ᠮᠠᠯᠴᠢᠨ ᠬᠥᠮᠦᠨ ᠵᠤᠨᠤ ᠰᠢᠲᠠᠮᠠ ᠨᠠᠷᠠ᠂ ᠬᠠᠪᠤᠷᠤᠨ ᠬᠠᠷᠠ ᠬᠠᠪᠰᠠᠷᠭᠠ᠂ ᠡᠪᠦᠯᠦᠨ ᠬᠦᠢᠲᠡᠨ ᠰᠢᠭᠤᠷᠭᠠᠨᠳᠤ ᠲᠤᠵᠢᠯᠠ ᠮᠠᠯᠤᠨ ᠬᠣᠢᠨᠠᠠᠴᠠ ᠳᠠᠭᠠᠵᠤ᠂ ᠬᠠᠲᠠᠭᠤᠵᠢᠯᠲᠠᠢ ᠬᠥᠳᠡᠯᠮᠦᠷᠢᠯᠡᠵᠦ ᠪᠠᠢᠳᠠᠭ ᠶᠠᠪᠤᠳᠠᠯ ᠰᠡᠳᠭᠢᠯᠳᠦᠴᠢᠨᠢ ᠣᠷᠤᠳᠠᠭᠤᠤ?
ᠬᠦᠴᠢᠷ ᠪᠡᠷᠬᠡᠶᠢ ᠲᠡᠰᠪᠦᠷᠢᠯᠡᠵᠦ ᠦᠭᠡ ᠳᠠᠭᠤᠨᠦᠭᠡᠢ ᠠᠵᠢᠯᠯᠠᠳᠠᠭ ᠮᠠᠯᠴᠢᠳᠤᠨ ᠵᠣᠷᠢᠭ ᠰᠠᠨᠠᠭᠠ ᠭᠡᠭᠴᠢ ᠦᠨᠡᠬᠡᠷ ᠭᠠᠢᠬᠠᠯᠲᠠᠢᠶᠤᠮ᠃ ᠲᠡᠳᠡ ᠡᠪᠦᠯ ᠵᠤᠨᠤ ᠳᠥᠷᠪᠡᠨ ᠤᠯᠠᠷᠢᠯᠳᠤ ᠡᠳᠦᠷ ᠪᠦᠷᠢ ᠦᠷᠦᠨ ᠭᠡᠭᠡ ᠲᠡᠮᠳᠡᠭᠷᠡᠬᠦᠡᠴᠡ ᠦᠳᠡᠰᠢᠶᠢᠨ ᠬᠥᠰᠢᠭᠡ ᠪᠠᠭᠤᠲᠠᠯᠠ ᠰᠦᠷᠦᠭᠦᠨ ᠳᠡᠷᠭᠡᠳᠡ᠂ ᠬᠤᠳᠳᠤᠭᠤᠨ ᠪᠦᠭᠦᠷᠭᠡᠨ ᠳᠡᠭᠡᠷᠡ᠂ ᠲᠥᠯᠦᠨ ᠫᠧᠩᠳᠦ᠂ ᠦᠨᠢᠶᠡᠨ ᠵᠡᠯᠡ ᠳᠡᠭᠡᠷᠡ ᠪᠣᠷᠪᠢ ᠨᠤᠭᠤᠷᠠᠯᠦᠭᠡᠢ ᠠᠵᠢᠯᠯᠠᠵᠤᠯᠠ ᠪᠠᠢᠳᠠᠭ᠃ ᠮᠠᠯᠵᠢᠬᠤ ᠣᠷᠤᠨᠤ ᠠᠵᠢᠯ ᠭᠡᠭᠴᠢ ᠡᠢᠮᠦ ᠬᠠᠲᠠᠭᠤ ᠪᠡᠷᠬᠡᠲᠡᠢ᠂ ᠳᠠᠭᠤᠰᠤᠰᠢᠦᠭᠡᠢ᠂ ᠮᠠᠯᠴᠢᠨ ᠬᠥᠮᠦᠨᠦ ᠵᠣᠷᠢᠭ ᠭᠡᠭᠴᠢ ᠡᠢᠮᠦᠯᠡ ᠳᠠᠭᠠᠭᠠᠴᠠ ᠲᠡᠰᠪᠦᠷᠢᠲᠡᠢ ᠴᠥᠬᠦᠷᠡᠰᠢᠦᠭᠡᠢ᠃
ᠬᠡᠯᠡᠯᠭᠡᠨᠦᠭᠡᠢ ᠮᠠᠯᠴᠢᠨᠤ ᠢᠷᠠᠭᠤ ᠠᠯᠳᠠᠷ ᠡᠨᠡᠬᠡᠨᠢᠶᠡᠷ ᠵᠣᠭᠰᠤᠬᠤ ᠪᠢᠰᠢ᠂ ᠮᠠᠯᠴᠢᠳᠤᠨ ᠦᠢᠯᠡ ᠠᠵᠢᠯᠯᠠᠭᠠ ᠨᠡᠩ ᠬᠥᠮᠦᠰᠦᠨ ᠰᠡᠳᠭᠢᠯ ᠵᠢᠷᠦᠬᠡᠶᠢ ᠳᠣᠭᠳᠤᠯᠤᠭᠤᠯᠤᠮᠠ ᠶᠠᠪᠤᠳᠠᠯ ᠵᠥᠩᠳᠡᠭᠡᠨ ᠳᠤᠭᠤᠯᠳᠠᠨ ᠳᠠᠭᠤᠷᠢᠰᠭᠠᠭᠳᠠᠵᠤ ᠪᠠᠢᠳᠠᠭᠶᠤᠮ᠃ ᠪᠢ ᠣᠳᠣ ᠮᠠᠯᠴᠢᠨ ᠬᠥᠮᠦᠨᠦ ᠣᠮᠤᠭᠰᠢᠯ ᠪᠣᠯᠵᠤ᠂ ᠮᠠᠨᠤ ᠴᠠᠭ ᠦᠶᠡᠶᠢᠨ ᠳᠠᠭᠤᠷᠢᠰᠤᠯ ᠪᠣᠯᠤᠭᠰᠠᠨ ᠲᠠᠯᠠ ᠨᠤᠲᠤᠭᠤᠨ ᠬᠡᠦᠬᠡᠨ - ᠴᠡᠴᠡᠭᠦᠨ ᠲᠤᠬᠠᠢ ᠡᠨᠳᠡ ᠲᠡᠮᠳᠡᠭᠯᠡᠰᠦᠭᠡᠢ᠃
ᠴᠡᠴᠡᠭ ᠬᠡᠦᠬᠡᠨ ᠭᠡᠬᠦᠲᠡᠢ ᠵᠡᠷᠭᠡ ᠬᠣᠶᠠᠷ ᠰᠠᠯᠠᠭᠠ ᠭᠡᠵᠢᠭᠡᠶᠢᠨᠢᠶᠡᠨ ᠦᠵᠦᠭᠦᠷᠢ ᠤᠯᠠᠭᠠᠨ ᠳᠤᠷᠳᠤᠩᠢᠶᠠᠷ ᠡᠷᠪᠡᠬᠡᠢᠴᠢᠯᠡᠨ ᠤᠶᠠᠭᠠᠳ ᠮᠥᠷᠦᠨ ᠳᠡᠭᠡᠭᠦᠷᠢᠶᠡᠨ ᠬᠠᠶᠠᠯᠠᠭᠰᠠᠨ᠂ ᠮᠡᠯᠲᠡᠭᠡᠨᠡᠭᠰᠡᠨ ᠬᠠᠷᠠ ᠨᠢᠳᠦᠲᠡᠢ᠂ ᠲᠣᠭᠤᠷᠢᠭ ᠪᠣᠷᠤ ᠴᠢᠷᠠᠢᠲᠠᠢ᠂ ᠪᠦᠱᠦᠭᠦᠷᠬᠡᠮᠡᠲᠡᠭᠡᠢ ᠪᠣᠯᠪᠠᠴᠤ ᠴᠣᠪᠤᠭᠤ ᠳᠡᠭᠵᠢᠨ ᠵᠠᠩᠲᠠᠢ ᠬᠡᠦᠬᠡᠨ ᠮᠢᠨᠦ ᠨᠢᠳᠦᠨᠡ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠬᠠᠷᠠᠭᠳᠠᠳᠠᠭ᠃ ᠨᠠᠮᠠᠢ ᠰᠢᠬᠢᠷ ᠥᠭᠬᠦᠯᠡᠷ ᠬᠣᠶᠠᠷ ᠭᠠᠷᠢᠶᠠᠷᠢᠶᠠᠨ ᠲᠣᠰᠴᠤ ᠠᠪᠴᠤ ᠪᠠᠢᠭᠰᠠᠨ (ᠠᠷᠪᠠᠨ ᠵᠢᠷᠭᠤᠭᠠ ᠬᠦᠷᠦᠭᠰᠡᠨ ᠬᠡᠦᠬᠡᠨ ᠰᠢᠦ ᠳ᠋ᠠ ) ᠶᠣᠰᠤᠷᠬᠠᠭ ᠪᠣᠯᠪᠠᠰᠤᠨ ᠪᠠᠢᠳᠠᠯ ᠦᠵᠡᠭᠳᠡᠳᠡᠭ᠃ ᠴᠡᠴᠡᠭ ᠬᠠᠷᠠᠬᠠᠨ ᠪᠠᠭᠠᠠᠴᠠᠪᠠᠨ ᠠᠵᠢᠯ ᠬᠥᠳᠡᠯᠮᠦᠷᠢᠳᠦ ᠢᠳᠡᠪᠬᠢᠲᠡᠢ᠂ ᠬᠠᠪᠢ ᠣᠢᠷᠠᠳᠠᠭᠠᠨ 《 ᠠᠵᠢᠯᠴᠢ ᠬᠡᠦᠬᠡᠨ》 ᠬᠡᠮᠡᠨ ᠮᠠᠭᠲᠠᠭᠳᠠᠭᠰᠠᠨᠶᠤᠮ᠃ ᠮᠢᠩᠭᠠᠨ ᠬᠣᠨᠢᠨᠤ ᠳᠤᠮᠳᠠᠠᠴᠠᠴᠤ ᠭᠠᠷᠤᠭᠰᠠᠨ ᠲᠥᠯᠢᠶᠡᠨ ᠠᠯᠳᠠᠯᠦᠭᠡᠢ ᠲᠠᠨᠢᠳᠠᠭ ᠭᠢᠷᠠᠬᠠᠢ ᠨᠢᠳᠦᠲᠡᠢ᠂ ᠵᠤᠨᠤ ᠬᠠᠯᠠᠭᠤᠨ ᠨᠠᠷᠠ᠂ ᠡᠪᠦᠯᠦᠨ ᠲᠠᠰᠭᠢᠮᠠ ᠬᠦᠢᠲᠡᠨᠳᠦᠴᠦ ᠬᠤᠳᠳᠤᠭᠠᠴᠠ ᠤᠰᠤ ᠠᠯᠳᠠᠯᠠᠨ ᠲᠠᠲᠠᠵᠤ᠂ ᠣᠩᠭᠤᠴᠠᠠᠴᠠ ᠬᠠᠮᠤᠭ ᠰᠡᠭᠦᠯᠴᠢᠶᠢᠨ ᠮᠠᠯ ᠰᠢᠮᠡᠨ ᠰᠢᠮᠡᠨ ᠤᠤᠭᠤᠭᠰᠠᠭᠠᠷ ᠰᠠᠯᠲᠠᠯᠠ ᠬᠠᠷᠠᠵᠤ ᠵᠣᠭᠰᠤᠳᠠᠭ ᠮᠠᠯᠴᠢᠨ ᠬᠡᠦᠬᠡᠨᠶᠦᠮ᠃ ᠮᠠᠯᠢᠶᠠᠨ ᠠᠮᠢᠰᠢᠭ᠋ᠢᠶᠠᠨ ᠬᠠᠢᠷᠠᠯᠠᠵᠤ᠂ ᠠᠳᠭᠤ ᠴᠢᠮᠬᠢ ᠡᠪᠡᠰᠦᠶᠢᠴᠦ ᠲᠡᠭᠦᠵᠦ ᠬᠣᠷᠮᠤᠢᠯᠠᠨ ᠶᠠᠪᠤᠳᠠᠭ ᠪᠠ ᠨᠠᠩᠭᠢᠯᠠᠭᠰᠠᠨ ᠰᠢᠬᠢᠷᠢᠶᠡᠨᠴᠦ ᠢᠰᠢᠭᠡ ᠬᠤᠷᠠᠭᠠᠨᠳᠠᠭᠠᠨ ᠥᠭᠳᠡᠭ ᠪᠠᠢᠭᠰᠠᠨ ᠮᠠᠯᠴᠢᠨ ᠬᠡᠦᠬᠡᠨᠶᠦᠮ᠃
ᠨᠢᠳᠤᠨᠤᠨ ᠨᠠᠮᠤᠷ ᠪᠢ ᠬᠣᠰᠢᠭᠤᠨᠤ ᠲᠡᠦᠬᠡ ᠡᠮᠬᠢᠳᠭᠡᠬᠦ ᠠᠵᠢᠯᠢᠶᠠᠷ ᠶᠠᠪᠤᠵᠤ ᠴᠡᠴᠡᠭᠦᠨ ᠠᠪᠤ ᠭᠤᠮᠪᠤᠵᠠᠪ ᠨᠠᠰᠤᠲᠠᠨᠢ ᠰᠤᠷᠪᠤᠯᠵᠢᠯᠠᠬᠤᠪᠠᠷ ᠲᠡᠳᠡᠨᠡᠢᠬᠢᠪᠡᠷ ᠬᠦᠷᠦᠭᠰᠡᠨ ᠪᠢᠯᠡ᠃
ᠨᠠᠮᠤᠷᠤᠨ ᠶᠠᠭᠠᠷᠠᠤ ᠤᠯᠠᠷᠢᠯᠶᠤᠮᠴᠢᠨᠢ᠂ ᠪᠡᠶᠡ ᠮᠠᠭᠤᠲᠠᠢ ᠭᠤᠮᠪᠤᠵᠠᠪ ᠭᠤᠸᠠᠢᠠᠴᠠ ᠪᠤᠰᠤᠳᠨᠢ ᠪᠦᠷ ᠭᠡᠷᠲᠡᠭᠡᠨ ᠪᠠᠢᠬᠤᠦᠭᠡᠢ ᠪᠠᠢᠯᠠ᠃
ᠬᠣᠲᠠ ᠬᠣᠷᠤᠭᠠᠨᠤᠪᠠᠨ ᠡᠩᠭᠡᠷᠢ ᠭᠢᠯᠠᠢᠲᠠᠯᠠ ᠴᠡᠪᠡᠷᠯᠡᠵᠡᠢ᠃ ᠵᠡᠯᠡ ᠳᠡᠭᠡᠷᠡᠨᠢ ᠨᠢᠭᠡᠴᠦ ᠨᠣᠢᠲᠠᠨ ᠬᠦᠢᠲᠡᠨ ᠶᠠᠭᠤᠮᠠ ᠪᠠᠢᠭᠰᠠᠨᠦᠭᠡᠢ᠂ ᠲᠡᠭᠷᠢ ᠵᠢᠭᠳᠡ ᠡᠩᠨᠡᠷᠡᠭᠰᠡᠨ ᠳᠠᠯᠠᠩᠲᠠᠢ ᠠᠷᠭᠠᠯ᠂ ᠰᠢᠯ ᠴᠣᠩᠬᠤᠨᠢ ᠭᠢᠯᠠᠯᠵᠠᠭᠰᠠᠨ ᠪᠠᠢᠰᠢᠩ ᠵᠡᠷᠭᠡᠶᠢᠨᠢ ᠬᠠᠷᠠᠬᠤᠳᠤ ᠠᠵᠢᠯᠴᠢ ᠨᠢᠮᠪᠠᠢ ᠠᠢᠯ ᠭᠡᠳᠡᠭᠨᠢ ᠬᠡᠨᠴᠦ ᠬᠠᠷᠠᠩᠭᠤᠲᠠ ᠮᠡᠳᠡᠵᠦ ᠪᠣᠯᠬᠤ ᠠᠵᠢ᠃
ᠭᠡᠪᠡᠴᠦ ᠡᠨᠡ ᠠᠢᠯᠢ ᠢᠩᠭᠢᠵᠦ ᠡᠵᠡᠩᠨᠡᠵᠦ ᠪᠠᠢᠭᠠᠨᠢ 《 ᠠᠷᠪᠠᠨ ᠵᠢᠯᠦᠨ ᠴᠥᠪ》ᠤᠨ ᠤᠷᠰᠢᠭᠢᠶᠠᠷ ᠬᠠᠢᠷᠠᠲᠤ ᠡᠵᠢᠡᠴᠡᠪᠡᠨ ᠬᠠᠭᠠᠴᠠᠭᠠᠳ᠂ ᠡᠪᠡᠳᠴᠢᠨ ᠬᠠᠭᠤᠴᠢᠨᠲᠠᠢ ᠨᠠᠰᠤᠲᠠᠢ ᠠᠪᠤᠲᠠᠢᠪᠠᠨ ᠬᠠᠷᠠᠬᠠᠨ ᠪᠠᠭᠠᠠᠴᠠᠪᠠᠨ ᠭᠠᠴᠢᠭᠳᠠᠯ ᠵᠣᠪᠠᠯᠠᠩᠤᠨ ᠳᠤᠮᠳᠠ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠬᠡᠳᠦᠨ ᠥᠨᠦᠴᠢᠨ ᠬᠡᠦᠬᠡᠳ ᠭᠡᠵᠦ ᠬᠡᠨ ᠰᠠᠨᠠᠬᠤ ᠪᠢᠯᠡ!
ᠨᠠᠮᠠᠢ ᠣᠴᠢᠭᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ ᠳᠡᠮᠡᠢ ᠤᠳᠠᠭᠰᠠᠨᠦᠭᠡᠢ ᠰᠢᠷᠠ ᠪᠦᠷᠦᠢ ᠪᠣᠯᠵᠤ᠂ ᠡᠮᠦᠨᠡ ᠲᠣᠯᠤᠭᠠᠢ ᠳᠡᠭᠡᠭᠦᠷ ᠬᠣᠨᠢᠨ ᠰᠦᠷᠦᠭ ᠭᠠᠷᠴᠤ ᠢᠷᠡᠪᠡ᠃ ᠲᠠᠷᠬᠠᠨ ᠪᠡᠯᠴᠢᠭᠰᠡᠭᠡᠷ ᠭᠠᠷᠴᠤ ᠢᠷᠡᠭᠰᠡᠨ ᠬᠤᠨ ᠴᠠᠭᠠᠨ ᠬᠣᠨᠢᠳᠤᠨ ᠵᠡᠭᠦᠨ ᠲᠠᠯᠠᠪᠠᠷ ᠲᠡᠩᠨᠡᠭᠡ ᠠᠴᠢᠶᠠᠲᠠᠢ ᠮᠣᠷᠢ ᠬᠥᠲᠦᠯᠵᠦ ᠠᠷᠤᠭ ᠡᠭᠦᠷᠦᠭᠰᠡᠨ ᠬᠥᠮᠦᠨ ᠨᠠᠰᠢᠯᠠᠵᠤ ᠪᠠᠢᠬᠤᠶᠢ ᠭᠤᠮᠪᠤᠵᠠᠪ ᠭᠤᠸᠠᠢ ᠵᠢᠭᠠᠵᠤ: 《ᠲᠡᠷᠡ ᠪᠣᠯ ᠮᠢᠨᠦ ᠬᠣᠶᠠᠳᠤᠭᠠᠷ ᠬᠡᠦᠬᠡᠨ ᠴᠡᠴᠡᠭ ᠰᠢᠦ ᠳ᠋ᠠ᠂ ᠡᠨᠡ ᠵᠢᠯ ᠠᠷᠪᠠᠨ ᠵᠢᠷᠭᠤᠭᠠᠲᠠᠢᠶᠤᠮ᠂ ᠠᠢ ᠳ᠋ᠠ᠂ ᠡᠨᠡ ᠬᠡᠦᠬᠡᠨᠢ ᠬᠡᠯᠡᠭᠡᠳ ᠬᠡᠯᠡᠭᠡᠳ ᠦᠭᠡ ᠰᠣᠨᠤᠰᠬᠤᠦᠭᠡᠢ᠂ ᠬᠣᠨᠢᠨᠳᠤ ᠶᠠᠪᠤᠬᠤᠳᠠᠭᠠᠨ ᠡᠪᠡᠰᠦ ᠬᠠᠮᠤᠬᠤ ᠬᠡᠷᠡᠭᠦᠭᠡᠢ ᠭᠡᠬᠦᠯᠡᠷ᠂ ᠡᠨᠡ ᠵᠢᠯ ᠡᠪᠡᠰᠦ ᠬᠠᠳᠤᠯᠠᠩ ᠮᠠᠭᠤᠲᠠᠢᠶᠤᠮᠴᠢᠨᠢ ᠨᠢᠭᠡ ᠠᠳᠭᠤᠴᠤ ᠭᠡᠰᠡᠨ ᠢᠯᠡᠭᠦᠦ ᠬᠤᠷᠢᠶᠠᠵᠤ ᠪᠠᠢᠪᠠᠯ ᠡᠪᠦᠯ ᠬᠠᠪᠤᠷ ᠬᠡᠷᠡᠭᠲᠡᠢ ᠭᠡᠳ ᠵᠠᠪᠠᠯ ᠮᠠᠳᠠᠢ ᠠᠪᠴᠤ ᠡᠭᠦᠷᠦᠭᠡᠳ ᠶᠠᠪᠤᠬᠤᠶᠤᠮ》 ᠭᠡᠵᠦ ᠵᠢᠮᠡᠯᠡᠭᠰᠡᠨ ᠮᠠᠶᠢᠭᠲᠠᠢ ᠬᠡᠯᠡᠬᠦ ᠪᠣᠯᠪᠠᠴᠤ ᠡᠢᠮᠦ ᠠᠵᠢᠯᠴᠢ ᠬᠥᠳᠡᠯᠮᠦᠷᠢᠴᠢ ᠬᠡᠦᠬᠡᠨ ᠬᠥᠮᠦᠵᠢᠭᠦᠯᠦᠭᠰᠡᠨᠳᠡᠭᠡᠨ ᠪᠠᠶᠠᠷᠲᠠᠢ ᠪᠠᠢᠭᠠᠨᠢ ᠢᠨᠢᠶᠡᠮᠰᠦᠭᠯᠡᠩᠭᠦᠢ ᠨᠢᠳᠦᠨᠳᠦᠨᠢ ᠢᠯᠡᠬᠡᠨ ᠪᠠᠢᠯᠠ᠃
ᠰᠠᠶᠢᠬᠠᠨ ᠡᠪᠡᠰᠦ ᠲᠡᠭᠡᠭᠡᠵᠦ ᠢᠷᠡᠭᠰᠡᠨ ᠴᠡᠴᠡᠭᠦᠨ ᠡᠭᠡᠴᠢᠨᠢ ᠳᠡᠭᠦᠦᠪᠡᠨ ᠲᠣᠰᠴᠤ ᠣᠴᠢᠭᠠᠳ ᠠᠷᠤᠭᠢᠨᠢ ᠬᠠᠪᠰᠤᠷᠤᠨ ᠪᠠᠭᠤᠯᠭᠠᠵᠤ᠂ ᠳᠡᠭᠦᠦᠶᠢᠨᠢᠶᠡᠨ ᠨᠢᠷᠤᠭᠤᠨᠤ ᠲᠣᠭᠤᠰᠤᠶᠢ ᠭᠦᠪᠢᠵᠦ᠂ ᠵᠢᠮᠡᠯᠡᠭᠰᠡᠨ ᠳᠠᠭᠤᠨᠢᠶᠠᠷ: 《ᠴᠢᠮᠠᠢ ᠪᠢᠲᠡᠭᠡᠢ ᠠᠷᠤᠭ ᠠᠪᠴᠤ ᠶᠠᠪᠤ ᠭᠡᠵᠦ ᠪᠠᠢᠬᠤᠳᠤ ᠴᠢ ᠵᠠᠪᠠᠯ ᠵᠣᠷᠢᠭᠢᠶᠠᠷᠢᠶᠠᠨ ᠠᠭᠠᠰᠢᠯᠠᠬᠤᠶᠤᠮ᠂ ᠢᠩᠭᠢᠵᠦ ᠪᠠᠢᠭᠠᠳ ᠪᠣᠷᠰᠤᠴᠢᠬᠠᠪᠠᠯ ᠶᠠᠭᠠᠬᠢᠨᠠ?》 ᠭᠡᠪᠡ᠃
ᠴᠡᠴᠡᠭ 《ᠵᠦᠭᠡᠷ》 ᠭᠡᠵᠦ ᠠᠶᠠᠷᠬᠠᠨ ᠳᠤᠤᠭᠠᠷᠤᠭᠰᠠᠨᠢᠶᠠᠨ ᠭᠡᠷᠲᠡᠭᠡᠨ ᠣᠷᠤᠵᠤ ᠢᠷᠡᠭᠡᠳ ᠨᠠᠳᠠᠲᠠᠢ ᠶᠣᠰᠤᠷᠬᠠᠭ ᠬᠢᠴᠢᠶᠡᠩᠭᠦᠢ ᠮᠡᠨᠳᠦᠯᠡᠪᠡ᠃
ᠪᠢ ᠨᠤᠲᠤᠭᠤᠨ ᠵᠠᠩᠰᠢᠯ ᠶᠣᠰᠤᠭᠠᠷ ᠰᠢᠬᠢᠷ ᠥᠭᠬᠦᠳᠦ ᠴᠡᠴᠡᠭ ᠬᠡᠦᠬᠡᠨ ᠶᠠᠭᠯᠠ ᠵᠢᠭᠠᠬᠠᠨ ᠬᠡᠦᠬᠡᠳᠰᠢᠭ ᠬᠣᠶᠠᠷ ᠭᠠᠷᠢᠶᠠᠷᠢᠶᠠᠨ ᠬᠢᠴᠢᠶᠡᠩᠭᠦᠢ ᠲᠣᠰᠴᠤ ᠠᠪᠬᠤᠨᠢ ᠶᠣᠰᠤ ᠮᠣᠷᠠᠯᠲᠠᠢ ᠬᠥᠮᠦᠵᠢᠭᠰᠡᠨ ᠭᠡᠳᠡᠭᠨᠢ ᠢᠯᠡᠷᠬᠡᠢ ᠪᠠᠢᠯᠠ᠃
ᠦᠳᠡᠰᠢ ᠭᠤᠮᠪᠤᠵᠠᠪ ᠭᠤᠸᠠᠢ ᠪᠢᠳᠡ ᠬᠣᠶᠠᠭᠤᠯᠠ ᠭᠡᠷᠦᠨ ᠡᠭᠦᠳᠡᠨᠳᠦ ᠵᠣᠭᠤᠭ ᠳᠡᠯᠭᠡᠨ ᠪᠠᠢᠲᠠᠯᠠ ᠬᠣᠨᠢᠳᠴᠤ ᠬᠣᠲᠠᠨᠳᠤ ᠣᠷᠤᠵᠤ ᠢᠷᠡᠯᠡ᠃ ᠰᠦᠷᠦᠭᠦᠨ ᠳᠣᠲᠤᠷᠠᠠᠴᠠ ᠨᠢᠭᠡ ᠬᠣᠨᠢ᠂ ᠨᠢᠭᠡ ᠢᠮᠠᠭᠠ ᠰᠢᠭᠤᠳ ᠴᠡᠴᠡᠭᠢ ᠴᠢᠭᠯᠡᠨ ᠭᠦᠶᠦᠵᠦ ᠢᠷᠡᠭᠡᠳ᠂ ᠢᠮᠠᠭᠠᠨᠢ ᠴᠣᠷᠤᠢᠯᠠᠨ ᠬᠣᠨᠢᠨᠢ ᠬᠣᠩᠰᠢᠶᠠᠷᠢᠶᠠᠷᠢᠶᠠᠨ ᠨᠥᠷᠢᠵᠦ ᠴᠡᠴᠡᠭᠦᠨ ᠬᠠᠷᠮᠠᠨᠢ ᠮᠠᠯᠲᠠᠨᠠ᠃ ᠭᠤᠮᠪᠤᠵᠠᠪ ᠭᠤᠸᠠᠢ ᠰᠠᠷᠯᠤᠭᠰᠢᠭ᠋ ᠰᠡᠭᠰᠡᠭᠡᠷ ᠦᠰᠦᠲᠡᠢ ᠴᠠᠭᠠᠨ ᠢᠮᠠᠭᠠ᠂ ᠬᠤᠪᠠ ᠰᠢᠷᠠ ᠬᠣᠨᠢ ᠬᠣᠶᠠᠷᠢ ᠵᠢᠭᠠᠵᠤ: 《ᠡᠨᠡ ᠬᠣᠶᠠᠷᠴᠢᠨᠢ ᠮᠠᠨᠤ ᠴᠡᠴᠡᠭᠦᠨ ᠠᠮᠢ ᠭᠣᠣᠯᠨᠢᠶᠤᠮ ᠰᠢᠤ᠂ ᠵᠤᠳᠤᠨ ᠬᠠᠪᠤᠷ ᠡᠬᠡᠨᠢ ᠦᠬᠦᠴᠢᠬᠡᠭᠡᠳ ᠡᠨᠡ ᠬᠣᠶᠠᠷᠴᠤ ᠦᠬᠦᠮᠡᠷ ᠶᠠᠭᠤᠮᠠ ᠪᠠᠢᠭᠰᠠᠨᠢ ᠴᠡᠴᠡᠭ ᠬᠣᠭᠤᠯᠠ ᠴᠠᠢᠪᠠᠷᠢᠶᠠᠨ ᠲᠡᠵᠢᠭᠡᠵᠦ ᠣᠨᠳᠤᠷᠤᠭᠤᠯᠤᠭᠰᠠᠨᠶᠤᠮ᠃ ᠴᠢᠩᠭᠢᠭᠡᠳ ᠡᠷᠬᠡ ᠪᠣᠯᠴᠢᠬᠠᠭᠰᠠᠨᠨᠢ ᠪᠡᠷᠬᠡ》 ᠭᠡᠪᠡ᠃ ᠴᠡᠴᠡᠭ ᠥᠨᠥ ᠬᠣᠶᠠᠷᠢᠶᠠᠨ ᠥᠬᠦᠭᠡᠷᠳᠡᠨ ᠢᠯᠪᠢᠵᠦ᠂ ᠬᠠᠷᠮᠠᠨᠠᠴᠠᠪᠠᠨ ᠰᠢᠬᠢᠷ ᠭᠠᠷᠭᠠᠨ ᠡᠮᠬᠦᠭᠦᠯᠪᠡ᠃
ᠪᠢ ᠴᠡᠴᠡᠭ ᠬᠡᠦᠬᠡᠨᠲᠡᠢ ᠢᠩᠭᠢᠵᠦ ᠠᠩᠬᠠ ᠤᠳᠠᠭᠠ ᠠᠭᠤᠯᠵᠠᠭᠰᠠᠨ ᠪᠢᠯᠡ᠃ ᠲᠡᠭᠡᠭᠡᠳ ᠲᠡᠭᠦᠨᠦ ᠦᠢᠯᠡ ᠠᠵᠢᠯᠯᠠᠭᠠᠠᠴᠠ ᠦᠵᠡᠵᠦ ᠰᠣᠨᠤᠰᠤᠭᠰᠠᠨ ᠪᠣᠯᠪᠠᠯ ᠳᠠᠬᠢᠨ ᠨᠠᠷᠢᠨ ᠣᠢᠯᠠᠭᠠᠵᠤ ᠪᠠᠢᠭᠠᠳ ᠨᠢᠭᠡ ᠮᠡᠳᠡᠭᠡᠯᠡᠯᠴᠦ ᠭᠡᠰᠡᠨ ᠪᠢᠴᠢᠶᠡ ᠭᠡᠵᠦ ᠪᠣᠳᠤᠵᠤ ᠪᠠᠢᠭᠰᠠᠨᠶᠤᠮ᠃ ᠭᠡᠲᠡᠯᠡ ᠣᠳᠣ ᠬᠠᠭᠠᠰ ᠵᠢᠯᠴᠦ ᠪᠣᠯᠤᠭᠠᠦᠭᠡᠢ᠂ ᠪᠢᠴᠦ ᠳᠠᠬᠢᠵᠤ ᠣᠴᠢᠵᠤ ᠠᠮᠵᠢᠭᠠᠦᠭᠡᠢ ᠪᠠᠢᠲᠠᠯᠠ ᠠᠵᠠ ᠪᠤᠰᠤ ᠴᠢᠮᠡᠭᠡ ᠰᠣᠨᠤᠰᠳᠠᠯᠠ᠃
ᠡᠨᠡ ᠵᠢᠯᠦᠨ ᠬᠣᠶᠠᠳᠤᠭᠠᠷ ᠰᠠᠷᠠᠶᠢᠨ ᠬᠣᠷᠢᠨ ᠳᠥᠷᠪᠡᠨᠦ ᠦᠳᠡᠶᠢᠨ ᠬᠣᠢᠨᠠ ᠪᠢᠯᠡ᠃ ᠠᠯᠪᠠᠨ ᠭᠡᠷᠦᠨ ᠤᠲᠠᠰᠤ ᠲᠠᠷᠴᠢᠭᠢᠨᠠᠨ ᠳᠤᠤᠭᠠᠷᠬᠤᠯᠠᠷ ᠣᠴᠢᠵᠤ ᠲᠣᠰᠪᠠ᠃ ᠴᠠᠭᠠᠲᠤᠬᠢ ᠬᠥᠮᠦᠨᠦ ᠦᠭᠡᠶᠢ ᠰᠣᠨᠤᠰᠤᠭᠠᠳ ᠮᠢᠨᠦ ᠬᠠᠮᠤᠭ ᠪᠡᠶᠡ ᠬᠦᠢᠲᠡᠨ ᠣᠷᠭᠢᠵᠤ᠂ ᠵᠢᠷᠦᠬᠡᠮᠢᠨᠢ ᠪᠠᠵᠠᠯᠠᠬᠤᠰᠢᠭ᠋ ᠪᠣᠯᠪᠠ᠃
《ᠶᠠᠭᠤ ᠭᠡᠨᠡ? ᠴᠡᠴᠡᠭ ᠭᠡᠨᠡᠦᠦ?》 ᠭᠡᠰᠡᠨᠢᠶᠡᠨ ᠬᠣᠭᠤᠯᠠᠢᠮᠢᠨᠢ ᠴᠡᠴᠡᠷᠬᠢᠯᠡᠵᠦ ᠴᠠᠰᠢ ᠶᠠᠷᠢᠵᠤ ᠭᠠᠷᠬᠤᠪᠠᠨ ᠪᠠᠢᠵᠤ᠂ ᠬᠠᠷᠢᠯᠴᠠᠭᠤᠷᠢ ᠲᠠᠯᠪᠢᠩᠭᠤᠲᠠ ᠲᠡᠷᠡ ᠴᠢᠭᠢᠶᠡᠷᠢᠶᠡᠨ ᠨᠣᠭᠤᠭᠠᠨ ᠨᠢᠷᠤᠭᠤ ᠰᠤᠮᠤᠶᠢ ᠴᠢᠭᠯᠡᠪᠡ᠃
ᠠᠢ ᠬᠥᠭᠡᠷᠦᠬᠦᠢ᠂ ᠮᠠᠯᠳᠠᠭᠠᠨ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠮᠠᠯᠴᠢᠨ ᠬᠥᠮᠦᠨᠦ ᠦᠷᠡᠰ ᠭᠡᠭᠴᠢ ᠦᠨᠡᠬᠡᠷ ᠬᠡᠴᠡᠭᠦᠦᠶᠦᠮ᠂ ᠲᠡᠳᠡᠨᠦ ᠪᠣᠳᠤᠯᠳᠤ᠂ ᠮᠠᠯ ᠬᠥᠷᠦᠩᠭᠡᠪᠡᠨ ᠬᠠᠢᠷᠠᠯᠠᠵᠤ ᠬᠠᠮᠠᠭᠠᠯᠠᠳᠠᠭᠯᠠᠶᠤᠮ ᠪᠣᠯ ᠴᠣᠬᠤᠮ ᠰᠠᠢᠨ ᠮᠠᠯᠴᠢᠨ ᠬᠥᠮᠦᠨ᠂ ᠡᠬᠡ ᠣᠷᠤᠨᠳᠠᠭᠠᠨ ᠬᠠᠢᠷᠠᠲᠠᠢ ᠬᠥᠮᠦᠨ᠂ ᠠᠷᠠᠳ ᠲᠦᠮᠡᠨᠳᠡᠭᠡᠨ ᠲᠤᠰᠠᠲᠠᠢ ᠬᠥᠮᠦᠨ᠃ ᠲᠡᠭᠡᠬᠦᠯᠡᠷ ᠬᠣᠨᠢ ᠮᠠᠯᠨᠢ ᠵᠤᠳ ᠭᠠᠮᠰᠢᠭᠲᠤ ᠲᠣᠬᠢᠶᠠᠯᠳᠤᠬᠤ ᠦᠶᠡᠳᠦ ᠠᠮᠢᠪᠠᠨ ᠴᠥᠯᠡᠨ ᠲᠡᠮᠡᠴᠡᠵᠦ ᠬᠠᠮᠠᠭᠠᠯᠠᠵᠤ ᠶᠠᠪᠤᠳᠠᠭᠨᠢᠴᠤ ᠦᠨᠡᠨ᠃ ᠴᠡᠴᠡᠭᠦᠨ ᠠᠵᠠ ᠪᠤᠰᠤ ᠶᠠᠪᠤᠳᠠᠯ ᠮᠠᠯᠴᠢᠨ ᠬᠥᠮᠦᠨᠦ ᠡᠨᠡᠬᠦ ᠠᠷᠢᠭᠤᠨ ᠨᠠᠨᠳᠢᠨ ᠵᠠᠩ ᠴᠢᠨᠠᠷ ᠪᠠ ᠢᠷᠠᠭᠤ ᠠᠯᠳᠠᠷᠢ ᠲᠣᠳᠤᠷᠬᠠᠢ ᠬᠠᠷᠠᠭᠤᠯᠬᠤᠨᠢ ᠯᠠᠪᠲᠠᠢ᠃
ᠥᠩᠭᠡᠷᠡᠬᠦ ᠡᠪᠦᠯᠦᠨ ᠴᠠᠰᠤ ᠭᠡᠭᠴᠢ ᠪᠠᠷᠠᠭᠤᠨ ᠰᠥᠨᠢᠳᠦᠨ ᠨᠣᠭᠤᠭᠠᠨ ᠨᠢᠷᠤᠭᠤ ᠬᠠᠪᠢᠪᠠᠷ ᠨᠡᠩ ᠬᠤᠪᠢ ᠢᠯᠡᠭᠦᠦ ᠪᠣᠯᠤᠭᠰᠠᠨ ᠪᠠᠢᠯᠠ᠃
ᠨᠦᠭᠦᠭᠡᠨᠴᠡᠭᠡᠯ ᠪᠠᠭᠤᠨ ᠶᠡᠬᠡᠩᠬᠢ ᠨᠤᠲᠤᠭᠨᠢ ᠮᠠᠩᠬᠠᠨᠳᠤ ᠪᠠᠢᠳᠠᠭ᠂ ᠭᠡᠲᠡᠯᠡ ᠵᠤᠨ ᠨᠠᠮᠤᠷᠨᠢ ᠭᠠᠩᠳᠠᠵᠤ᠂ ᠡᠪᠦᠯᠵᠢᠨ ᠪᠠᠰᠠ ᠮᠠᠯ ᠰᠠᠭᠤᠭᠰᠠᠨ ᠲᠤᠯᠠ ᠪᠡᠯᠴᠢᠭᠡᠷᠦᠭᠡᠢ ᠪᠣᠯᠵᠤ᠂ ᠬᠠᠪᠤᠷᠵᠢᠶᠠᠨᠳᠤ ᠡᠷᠲᠡ ᠰᠢᠯᠵᠢᠬᠦ ᠴᠢᠬᠤᠯᠠᠲᠠᠢ ᠪᠣᠯᠤᠭᠠᠳ᠂ ᠴᠡᠴᠡᠭᠦᠨ ᠬᠣᠨᠢᠨ ᠰᠦᠷᠦᠭ ᠪᠣᠯᠤᠨ ᠣᠢᠷᠠ ᠬᠠᠪᠢᠶᠢᠨ ᠬᠡᠳᠦᠨ ᠰᠦᠷᠦᠭ ᠬᠣᠨᠢ ᠲᠠᠯᠠᠶᠢᠨ ᠬᠠᠪᠤᠷᠵᠢᠶᠠᠳᠤ ᠭᠠᠷᠬᠤᠪᠠᠷ ᠪᠣᠯᠵᠠᠢ᠃
ᠤᠳᠤᠷᠢᠳᠤᠯᠭᠠᠨᠢ ᠲᠡᠳᠡᠨᠦ ᠬᠢᠶᠢ ᠡᠭᠡᠴᠢᠨᠢ ᠨᠢᠯᠬᠠᠲᠠᠢ᠂ ᠬᠦᠷᠭᠡᠨ ᠠᠬᠠᠨᠢ ᠪᠠᠰᠠ ᠠᠳᠤᠭᠤ ᠬᠠᠷᠢᠭᠤᠯᠵᠤ ᠪᠠᠢᠨᠠ᠂ ᠴᠡᠴᠡᠭ ᠪᠠᠽᠠᠷ ᠠᠬᠠ ᠥᠬᠢᠨ ᠳᠡᠭᠦᠦ ᠬᠣᠶᠠᠭᠤᠯᠠ ᠨᠠᠰᠤ ᠪᠠᠭᠠ ᠲᠤᠯᠠ ᠬᠣᠨᠢᠶᠢᠨᠢ ᠣᠨᠳᠣᠣ ᠠᠢᠯᠳᠤ ᠥᠭᠴᠦ ᠶᠠᠪᠤᠭᠤᠯᠤᠶᠠ ᠭᠡᠰᠡᠨ ᠪᠣᠯᠪᠠᠴᠤ ᠮᠠᠯᠳᠠᠭᠠᠨ ᠬᠠᠢᠷᠠᠲᠠᠢ᠂ ᠬᠠᠮᠲᠤ ᠨᠡᠢᠲᠡᠳᠡᠭᠡᠨ ᠬᠠᠷᠢᠭᠤᠴᠠᠯᠭᠠᠲᠠᠢ ᠲᠡᠳᠡ 《ᠡᠨᠡ ᠭᠠᠮᠰᠢᠭᠲᠠᠢ ᠦᠶᠡᠳᠦ ᠳᠠᠭᠠᠭᠠᠭᠰᠠᠨ ᠮᠠᠯᠢᠶᠠᠨ ᠪᠤᠰᠤᠳᠲᠤ ᠥᠭᠴᠦ ᠳᠠᠷᠤᠭᠠᠰᠤ ᠨᠡᠮᠡᠵᠦ ᠪᠣᠯᠬᠤᠦᠭᠡᠢ᠂ ᠪᠢᠳᠡ ᠥᠪᠡᠷᠰᠡᠳᠢᠶᠡᠨ ᠶᠠᠪᠤᠶᠠ》 ᠭᠡᠵᠦ ᠵᠢᠳᠭᠦᠵᠡᠢ᠃
ᠬᠡᠳᠦᠢᠪᠡᠷ ᠬᠣᠶᠠᠷ ᠰᠠᠷᠠᠶᠢᠨ ᠬᠠᠭᠤᠴᠢᠳ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠲᠡᠭᠷᠢ ᠵᠠᠰᠠᠷᠠᠬᠤ ᠮᠠᠶᠢ᠍ᠭᠦᠭᠡᠢ ᠬᠣᠶᠠᠷ ᠬᠣᠨᠤᠭᠠᠳᠯᠠ ᠣᠭᠲᠠᠷᠭᠤᠢ ᠪᠦᠷᠬᠦᠢᠨ ᠡᠭᠦᠯᠡ ᠨᠡᠲᠦᠢᠵᠦ᠂ ᠲᠣᠮᠤ ᠲᠣᠮᠤ ᠯᠠᠪᠰᠠ ᠴᠠᠰᠤ ᠬᠠᠶᠠᠯᠠᠨ ᠮᠥᠩᠭᠦᠨ ᠴᠠᠭᠠᠨᠢᠶᠠᠷ ᠭᠥᠯᠢᠢᠭᠰᠡᠨ ᠲᠠᠯᠠᠳᠤ ᠨᠡᠷᠮᠡᠭᠡᠰᠦᠯᠡᠵᠦᠯᠡ ᠪᠠᠢᠯᠠ᠃
ᠴᠡᠴᠡᠭᠦᠨ ᠬᠢᠨ᠂ ᠬᠣᠰᠢᠭᠤᠨᠠᠴᠠ ᠭᠠᠮᠰᠢᠭᠲᠠᠢ ᠣᠷᠤᠨᠳᠤ ᠲᠤᠰᠠᠯᠠᠬᠤᠪᠠᠷ ᠢᠷᠡᠭᠰᠡᠨ ᠮᠠᠰᠢᠨᠢᠶᠠᠷ ᠭᠡᠷᠢᠶᠡᠨ ᠨᠡᠭᠦᠯᠭᠡᠭᠡᠳ᠂ ᠵᠡᠷᠭᠡᠯᠡᠳᠡᠭᠡ ᠬᠣᠲᠠᠲᠠᠢᠪᠠᠨ ᠬᠠᠮᠲᠤᠷᠠᠨ ᠬᠣᠨᠢᠪᠠᠨ ᠨᠡᠢᠯᠡᠭᠦᠯᠵᠦ ᠵᠠᠩᠭᠤᠲᠤ ᠭᠡᠳᠡᠭ ᠭᠠᠵᠠᠷ ᠤᠷᠤᠭᠤ ᠠᠪᠠᠴᠢᠭᠰᠠᠨ ᠪᠠᠢᠨᠠ᠃
ᠬᠣᠶᠠᠳᠤᠭᠠᠷ ᠰᠠᠷᠠᠶᠢᠨ ᠬᠣᠷᠢᠨ ᠨᠢᠭᠡᠨᠳᠦ ᠰᠢᠨᠡ ᠪᠠᠭᠤᠭᠰᠠᠨ ᠬᠠᠪᠤᠷᠵᠢᠶᠠ - ᠴᠠᠭᠠᠨ ᠲᠣᠯᠤᠭᠠᠢ ᠭᠡᠳᠡᠭ ᠭᠠᠵᠠᠷᠲᠤ ᠭᠡᠷ ᠪᠠᠷᠢᠵᠤ ᠲᠥᠪᠬᠢᠨᠡᠭᠦᠯᠪᠡ᠃ ᠦᠳᠡᠶᠢᠨ ᠬᠣᠢᠨᠠᠨᠢ ᠴᠡᠴᠡᠭ ᠬᠦᠷᠭᠡᠨ ᠠᠬᠠᠲᠠᠢᠪᠠᠨ ᠬᠣᠶᠠᠭᠤᠯᠠ ᠬᠣᠨᠢᠪᠠᠨ ᠢᠯᠭᠠᠵᠤ ᠠᠪᠴᠢᠷᠠᠬᠤᠪᠠᠷ ᠵᠠᠩᠭᠤᠲᠤ ᠬᠦᠷᠲᠡᠯᠡ ᠲᠠᠪᠢ ᠰᠢᠬᠠᠮ ᠭᠠᠵᠠᠷ ᠵᠠᠢᠲᠠᠢ ᠲᠤᠯᠠ ᠠᠬᠠ ᠳᠡᠭᠦᠦ ᠬᠣᠶᠠᠷ᠂ ᠬᠠᠭᠠᠰ ᠲᠣᠬᠤᠢ ᠰᠢᠬᠠᠮ ᠵᠤᠵᠠᠭᠠᠨ ᠴᠠᠰᠤᠨᠳᠤ ᠮᠠᠴᠤᠯᠬᠢᠯᠠᠨ ᠠᠯᠬᠤᠭᠰᠠᠭᠠᠷ ᠲᠡᠷᠡ ᠡᠳᠦᠷᠲᠡᠭᠡᠨ ᠤᠤᠯ ᠵᠡᠷᠭᠡᠯᠡᠳᠡᠭᠡ ᠬᠣᠲᠠ ᠠᠢᠯᠤᠨ ᠪᠠᠭᠤᠭᠰᠠᠨ ᠬᠠᠪᠤᠷᠵᠢᠶᠠ - ᠳᠠᠪᠬᠤᠷ ᠣᠪᠤᠭᠠ ᠭᠡᠳᠡᠭ ᠭᠠᠵᠠᠷᠲᠤ ᠬᠦᠷᠴᠦ ᠬᠣᠨᠤᠭᠠᠳ ᠮᠠᠷᠭᠠᠰᠢ ᠥᠷᠯᠦᠭᠡᠨᠢ ᠭᠤᠷᠪᠠᠨ ᠴᠠᠭᠲᠤ ᠪᠣᠰᠴᠤ ᠴᠠᠢ ᠤᠤᠭᠤᠭᠠᠳ ᠲᠡᠷᠡ ᠬᠣᠲᠠᠨᠤ ᠬᠥᠮᠦᠨᠲᠡᠢ ᠬᠠᠮᠲᠤ ᠭᠤᠷᠪᠠᠭᠤᠯᠠ ᠬᠥᠳᠡᠯᠪᠡ᠃ ᠵᠠᠩᠭᠤᠲᠤ ᠬᠦᠷᠬᠦᠳᠦ ᠥᠷᠯᠦᠭᠡ ᠳᠣᠯᠤᠭᠠᠨ ᠴᠠᠭ ᠪᠣᠯᠵᠤ ᠪᠠᠢᠪᠠ᠃
ᠥᠷᠯᠦᠭᠡ ᠲᠡᠭᠷᠢ ᠲᠤᠩ ᠰᠠᠢᠬᠠᠨ ᠪᠠᠢᠯᠠ᠃ ᠮᠥᠩᠭᠦᠨ ᠴᠠᠭᠠᠨ ᠲᠠᠯᠠ ᠬᠥᠪᠡᠭᠡ ᠬᠢᠵᠠᠭᠠᠷᠦᠭᠡᠢ᠂ ᠴᠠᠰᠤᠨᠤ ᠳᠣᠣᠷᠠᠠᠴᠠ ᠪᠤᠯᠲᠠᠢᠨ ᠭᠢᠯᠲᠠᠭᠠᠨᠠᠬᠤ ᠬᠢᠶᠠᠭ ᠬᠢᠯᠭᠠᠨᠠ ᠥᠷᠯᠦᠭᠡᠶᠢᠨ ᠨᠠᠷᠠᠨᠤ ᠰᠢᠷᠭᠠᠯ ᠲᠤᠶᠠᠭᠠᠨᠳᠤ ᠭᠠᠩᠬᠤᠨ ᠳᠣᠬᠢᠯᠵᠠᠬᠤᠨᠢ ᠴᠡᠴᠡᠭᠦᠨ ᠨᠢᠳᠦᠨᠳᠦ ᠣᠨᠴᠠ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠴᠣᠪᠤᠭᠤ ᠳᠡᠭᠵᠢᠨ ᠵᠠᠩᠲᠠᠢ ᠴᠡᠴᠡᠭ ᠬᠡᠦᠬᠡᠨ ᠳᠠᠭᠤᠤ ᠠᠶᠠᠯᠤᠨ ᠭᠦᠶᠦᠵᠦ ᠶᠠᠪᠤᠩᠭᠤᠲᠠᠪᠠᠨ ᠨᠢᠭᠡ ᠪᠤᠲᠠ ᠬᠢᠯᠭᠠᠨᠠ ᠲᠠᠰᠤᠳᠠᠵᠤ ᠠᠪᠤᠭᠠᠳ ᠬᠦᠷᠭᠡᠨ ᠠᠬᠠᠪᠠᠨ ᠳᠠᠭᠤᠳᠠᠵᠤ 《ᠬᠦᠷᠭᠡᠨ ᠠᠬᠠ ᠡ᠂ ᠡᠨᠡ ᠪᠡᠯᠴᠢᠭᠡᠷᠢ ᠦᠵᠡ᠂ ᠣᠳᠣ ᠮᠠᠨᠤ ᠬᠣᠨᠢ ᠠᠷᠭᠠᠲᠠᠢ ᠪᠣᠯᠤᠯᠠ ᠰᠢᠤ᠂ ᠳᠥᠩᠭᠡᠭᠡᠳᠯᠡ ᠡᠨᠡ ᠴᠠᠰᠤ ᠬᠠᠭᠵᠠᠷᠠᠳᠠᠭ ᠪᠣᠯ ᠪᠡᠯᠴᠢᠭᠡᠷ ᠭᠡᠳᠡᠭᠴᠦ ᠡᠨᠳᠡ ᠬᠠᠯᠢᠭᠤᠷᠠᠭᠠᠳ ᠭᠠᠷᠤᠨᠠ ᠰᠢᠤ᠂ ᠲᠡᠷᠡ ᠦᠶᠡᠳᠦ ᠮᠢᠨᠦ 〈ᠰᠡᠭᠰᠡᠭᠡᠷ ᠴᠠᠭᠠᠨ〉᠂ 〈ᠬᠤᠪᠠ ᠰᠢᠷᠠ〉 ᠬᠣᠶᠠᠷ ᠪᠠᠰᠠ ᠲᠥᠯᠯᠡᠴᠢᠬᠡᠨᠡ᠂ ᠶᠠᠮᠠᠷ ᠰᠠᠢᠬᠠᠨ ᠢᠰᠢᠭᠡ ᠬᠤᠷᠠᠭᠠ ᠭᠠᠷᠳᠠᠭ ᠪᠣᠯ? ᠲᠡᠭᠡᠪᠡᠯ ᠪᠢ ᠪᠠᠰᠠᠯᠠ ᠡᠨᠡ ᠬᠣᠶᠠᠷᠰᠢᠭ᠋ᠢᠶᠠᠨ ᠡᠷᠬᠡᠯᠡᠭᠦᠯᠵᠦ ᠪᠠᠢᠭᠠᠳ ᠪᠡᠶᠡᠳᠡᠭᠡᠨ ᠳᠠᠰᠭᠠᠨᠠ》 ᠭᠡᠵᠦ ᠢᠨᠢᠶᠡᠨ ᠬᠡᠯᠡᠬᠦᠳᠦ ᠪᠤᠯᠪᠠᠷᠠᠢ ᠪᠣᠷᠤ ᠴᠢᠷᠠᠢᠨᠢ ᠳᠡᠯᠭᠡᠷᠡᠵᠦ ᠪᠠᠢᠭᠠ ᠴᠡᠴᠡᠭᠰᠢᠭ ᠤᠯᠠᠯᠵᠠᠨᠠ᠃
ᠴᠡᠴᠡᠭᠦᠨᠮᠢᠨᠢ ᠪᠠᠶᠠᠰᠭᠤᠯᠠᠩ ᠡᠭᠦᠨᠳᠦ ᠪᠠᠢᠬᠤᠶᠤᠮ᠃ ᠲᠡᠷᠡ ᠠᠷᠢᠭᠤᠨ ᠴᠠᠭᠠᠨ ᠬᠥᠳᠡᠯᠮᠦᠷᠢᠪᠡᠷ ᠵᠣᠷᠢᠯᠭᠠᠪᠠᠨ ᠪᠣᠯᠭᠠᠵᠤ᠂ ᠡᠯᠪᠡᠭ ᠪᠠᠶᠠᠨ᠂ ᠡᠷᠬᠡ ᠲᠡᠭᠰᠢ ᠠᠮᠢᠳᠤᠷᠠᠯᠢᠶᠠᠷ ᠬᠦᠰᠡᠯᠡᠩᠢᠶᠡᠨ ᠪᠣᠯᠭᠠᠭᠰᠠᠨ ᠲᠤᠯᠠ ᠬᠥᠷ ᠴᠠᠰᠤᠨᠤ ᠳᠤᠮᠳᠠᠭᠤᠷ ᠬᠥᠮᠦᠨᠦ ᠠᠮᠢᠳᠤᠷᠠᠯᠤᠨ ᠵᠢᠷᠭᠠᠯᠤᠨ ᠲᠥᠯᠦᠭᠡ ᠪᠡᠭᠡᠷᠡᠵᠦ᠂ ᠶᠠᠳᠠᠷᠠᠵᠤ ᠵᠦᠳᠡᠷᠡᠨ ᠲᠡᠮᠡᠴᠡᠬᠦᠳᠡᠭᠡᠨ ᠵᠢᠷᠭᠠᠯᠲᠠᠢᠯᠠ ᠭᠡᠵᠦ ᠪᠣᠳᠤᠵᠤ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠴᠡᠴᠡᠭ ᠬᠦᠷᠭᠡᠨ ᠠᠬᠠᠲᠠᠢᠪᠠᠨ ᠬᠣᠶᠠᠭᠤᠯᠠ ᠵᠠᠩᠭᠤᠲᠤᠠᠴᠠ ᠬᠣᠨᠢ ᠢᠯᠭᠠᠵᠤ ᠠᠪᠤᠭᠠᠳ ᠠᠶᠠᠭᠠ ᠴᠠᠢ ᠤᠤᠭᠤᠭᠠᠳ ᠭᠠᠷᠴᠤ ᠢᠷᠡᠲᠡᠯᠡ ᠦᠳᠡᠶᠢᠨ ᠡᠮᠦᠨᠡᠶᠢᠨ ᠠᠷᠪᠠᠨ ᠴᠠᠭ ᠪᠣᠯᠴᠢᠬᠠᠪᠠ᠃
《ᠬᠠᠪᠤᠷᠤᠨ ᠲᠡᠭᠷᠢ ᠬᠠᠭᠠᠰᠲᠠᠢ ᠬᠤᠭᠤᠰᠲᠠᠢ》 ᠭᠡᠳᠡᠭᠴᠢᠯᠡᠨ ᠠᠬᠠ ᠳᠡᠭᠦᠦ ᠬᠣᠶᠠᠷᠢ ᠬᠣᠨᠢᠪᠠᠨ ᠭᠡᠯᠢᠭᠡᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠰᠢᠭᠤᠷᠭᠠᠨ ᠳᠡᠭᠳᠡᠯᠡ᠃ ᠠᠩᠬᠠᠨᠳᠠᠭᠠᠨ ᠬᠡᠰᠡᠭ ᠬᠠᠷᠠᠩᠭᠤᠢᠯᠠᠵᠤ ᠬᠡᠰᠡᠭ ᠭᠡᠢᠵᠦ ᠪᠠᠢᠭᠰᠠᠨᠢᠶᠠᠨ ᠰᠡᠭᠦᠯᠳᠡᠭᠡᠨ ᠪᠦᠷ ᠲᠡᠭᠷᠢ ᠭᠠᠵᠠᠷᠢ ᠨᠡᠢᠯᠡᠭᠦᠯᠦᠮᠡᠷ ᠬᠠᠷᠠᠩᠭᠤᠢᠯᠠᠵᠤ᠂ ᠬᠣᠨᠢᠨᠤ ᠬᠣᠶᠠᠷ ᠲᠠᠯᠠᠳᠤᠨᠢ ᠶᠠᠪᠤᠵᠤ ᠪᠠᠢᠭᠰᠠᠨ ᠠᠬᠠ ᠥᠬᠢᠨ ᠳᠡᠭᠦᠦ ᠬᠣᠶᠠᠷ ᠪᠡᠶᠡ ᠪᠡᠶᠡᠪᠡᠨ ᠣᠯᠵᠤ ᠦᠵᠡᠬᠦᠪᠡᠨ ᠪᠠᠢᠪᠠ᠃ ᠬᠦᠴᠦᠲᠦ ᠰᠢᠭᠤᠷᠭᠠᠨ ᠬᠥᠨᠦᠭᠡᠯᠲᠦ ᠮᠠᠩᠭᠤᠰᠰᠢᠭ᠋ ᠦᠩᠭᠢᠨᠡᠨ ᠱᠦᠩᠭᠢᠨᠡᠵᠦ ᠭᠠᠯᠵᠠᠭᠤᠷᠠᠨ ᠠᠷᠬᠢᠷᠠᠵᠤ᠂ ᠭᠡᠳᠡᠰᠦ ᠬᠣᠭᠤᠰᠤᠨ ᠬᠣᠨᠢᠳᠢ ᠬᠣᠷᠭᠤᠯᠰᠢᠭ᠋ ᠰᠢᠪᠬᠠᠳᠠᠭᠠᠳ᠂ ᠲᠡᠳᠡ ᠬᠣᠶᠠᠷ ᠶᠠᠭᠠᠬᠢᠵᠤ ᠬᠣᠷᠢᠭᠰᠠᠨᠴᠤ ᠳᠡᠢᠯᠬᠦᠪᠡᠨ ᠪᠣᠯᠢᠵᠤ ᠤᠷᠤᠭᠤᠳᠠᠨ ᠪᠠᠢᠪᠠ᠃ ᠲᠡᠷᠡ ᠬᠣᠶᠠᠷ 《ᠬᠣᠨᠢᠠᠴᠠᠪᠠᠨ ᠶᠠᠭᠠᠬᠢᠭᠰᠠᠨᠴᠤ ᠰᠠᠯᠵᠤ ᠪᠣᠯᠬᠤᠦᠭᠡᠢ》 ᠭᠡᠳᠡᠭ ᠪᠣᠳᠤᠯᠢ ᠴᠢᠩᠭᠠ ᠪᠠᠷᠢᠵᠤ᠂ ᠬᠣᠨᠢᠪᠠᠨ ᠬᠠᠰᠢᠨ ᠲᠡᠮᠡᠴᠡᠯᠳᠦᠵᠦ ᠶᠠᠪᠤᠯᠠ᠃ ᠰᠢᠭᠤᠷᠭᠠ ᠤᠯᠠᠮ ᠰᠢᠷᠦᠭᠦᠰᠴᠦ ᠴᠠᠰᠤ ᠪᠠᠰᠠ ᠨᠡᠮᠡᠨ ᠣᠷᠤᠵᠤ ᠤᠯᠠᠮᠢᠶᠠᠷ ᠲᠡᠭᠷᠢ ᠭᠠᠵᠠᠷ ᠨᠡᠢᠯᠡᠮᠡᠷ ᠪᠣᠯᠵᠤ᠂ ᠨᠠᠷᠠ ᠬᠠᠮᠢᠭᠠ ᠪᠠᠢᠬᠤᠨᠢᠴᠤ ᠮᠡᠳᠡᠭᠳᠡᠬᠦᠦᠭᠡᠢ ᠪᠣᠯᠪᠠ᠃ ᠲᠡᠭᠡᠵᠦ ᠲᠡᠮᠡᠴᠡᠯᠳᠦᠵᠦ ᠶᠠᠪᠤᠭᠰᠠᠭᠠᠷ ᠰᠢᠭᠤᠷᠭᠠ ᠨᠢᠭᠡ ᠵᠢᠭᠠᠬᠠᠨ ᠨᠠᠮᠳᠠᠬᠤᠰᠢᠭ᠋ ᠪᠣᠯᠬᠤᠳᠤ᠂ ᠬᠠᠷᠠᠪᠠᠯ ᠳᠠᠪᠬᠤᠷ ᠣᠪᠤᠭᠠᠨᠤ ᠠᠢᠯ ᠪᠠᠷᠠᠭᠤᠨᠲᠠᠢᠬᠠᠨᠨᠢ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠦᠷᠭᠡᠨ ᠠᠬᠠᠨᠢ ᠴᠠᠭᠢᠶᠠᠨ ᠦᠵᠡᠪᠡᠯ ᠨᠢᠭᠡᠨᠲᠡ ᠲᠠᠪᠤᠨ ᠴᠠᠭ ᠪᠣᠯᠴᠢᠬᠠᠭᠰᠠᠨ ᠪᠠᠢᠪᠠ᠃
ᠲᠡᠳᠡ ᠬᠣᠶᠠᠭᠤᠯᠠ ᠥᠷᠯᠦᠭᠡᠶᠢᠨ ᠲᠠᠪᠤᠨ ᠴᠠᠭᠲᠤ ᠵᠢᠭᠠᠬᠠᠨ ᠶᠠᠭᠤᠮᠠ ᠢᠳᠡᠵᠦ ᠴᠠᠢ ᠤᠤᠭᠤᠭᠠᠳ ᠭᠠᠷᠤᠭᠰᠠᠨᠠᠴᠠ ᠬᠣᠢᠰᠢ ᠠᠷᠪᠠᠨ ᠴᠠᠭᠤᠨ ᠠᠯᠲᠠᠳᠤ ᠵᠠᠩᠭᠤᠲᠤᠶᠢᠨ ᠠᠢᠯᠳᠤ ᠠᠶᠠᠭᠠ ᠴᠠᠢ ᠤᠤᠭᠤᠭᠰᠠᠨᠠᠴᠠ ᠥᠭᠡᠷᠡ ᠬᠡᠯᠡᠨ ᠳᠡᠭᠡᠷᠡᠪᠡᠨ ᠶᠠᠭᠤᠮᠠ ᠲᠠᠯᠪᠢᠭᠠᠳᠤᠢ ᠶᠠᠪᠤᠭᠠ ᠳᠡᠭᠡᠷᠡ ᠲᠤᠷᠰᠢᠯᠭᠠᠦᠭᠡᠢᠠᠴᠠ ᠬᠠᠭᠤᠮᠠᠭᠠᠢᠳᠠᠨ᠂ ᠲᠡᠭᠷᠢᠶᠢᠨ ᠰᠠᠢᠬᠠᠨᠳᠤ ᠬᠠᠭᠤᠷᠲᠠᠵᠤ ᠬᠤᠪᠴᠠᠰᠤ ᠨᠢᠮᠭᠡᠨᠲᠡᠢ ᠭᠠᠷᠴᠤ ᠢᠷᠡᠭᠰᠡᠨ ᠲᠤᠯᠠ ᠥᠯᠦᠰᠴᠦ ᠶᠠᠳᠠᠷᠠᠬᠤ ᠬᠣᠣᠰᠯᠠᠭᠠᠳ ᠪᠠᠷᠤᠭ ᠬᠥᠯᠢᠶᠡᠨ ᠡᠷᠭᠦᠬᠦ ᠲᠡᠩᠬᠡᠭᠡᠦᠭᠡᠢ ᠪᠣᠯᠵᠠᠢ᠃
ᠶᠠᠭ ᠡᠨᠡ ᠦᠶᠡᠳᠦ ᠠᠢᠯ ᠬᠠᠷᠠᠭᠳᠠᠬᠤ ᠭᠡᠳᠡᠭᠴᠢᠨᠢ! ᠠᠢᠯ᠂ ᠨᠢᠯᠴᠢᠭᠢᠨᠡᠨ ᠤᠯᠠᠢᠵᠤ ᠬᠦᠷᠴᠢᠭᠢᠨᠡᠨ ᠳᠤᠯᠠᠯᠵᠠᠭᠰᠠᠨ ᠭᠠᠯᠲᠠᠢ ᠵᠤᠤᠬᠠ᠂ ᠠᠭᠤᠷ ᠰᠠᠪᠰᠠᠮᠠ ᠬᠣᠭᠤᠯᠠ ᠴᠠᠢ᠂ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠣᠷᠤᠨᠵᠢᠨᠢ ᠴᠠᠰᠤ ᠮᠥᠰᠦᠨᠳᠦ ᠥᠯᠦᠨ ᠬᠣᠭᠤᠰᠤᠨᠢᠶᠠᠷ ᠡᠳᠦᠷᠵᠢᠨ ᠬᠣᠨᠢᠲᠠᠢ ᠨᠣᠴᠤᠯᠳᠤᠵᠤ᠂ ᠲᠠᠭᠠᠷᠠᠵᠤ ᠪᠡᠭᠡᠷᠡᠵᠦ ᠵᠦᠳᠡᠷᠡᠭᠰᠡᠨ ᠬᠥᠮᠦᠰᠲᠦ ᠶᠠᠭᠤᠲᠠᠢ ᠰᠠᠢᠬᠠᠨ ᠰᠠᠨᠠᠭᠳᠠᠬᠤᠨᠢ ᠪᠤᠢ! ᠶᠠᠭᠤᠲᠠᠢ ᠶᠡᠬᠡ ᠲᠠᠲᠠᠬᠤ ᠬᠦᠴᠦᠨᠲᠡᠢ ᠠᠵᠢ!
ᠠᠬᠠ ᠥᠬᠢᠨ ᠳᠡᠭᠦᠦ ᠬᠣᠶᠠᠭᠤᠯᠠ ᠬᠣᠨᠢᠪᠠᠨ ᠡᠷᠭᠢᠭᠦᠯᠵᠦ ᠲᠡᠷᠡ ᠠᠢᠯᠳᠤ ᠣᠴᠢᠬᠤᠪᠠᠷ ᠰᠢᠭᠤᠳᠤᠨ ᠬᠣᠨᠢᠪᠠᠨ ᠥᠭᠡᠳᠡᠨᠢ ᠭᠡᠯᠢᠵᠦ ᠡᠬᠢᠯᠡᠪᠡ᠃
ᠭᠡᠪᠡᠴᠦ ᠭᠠᠢᠲᠠᠢ ᠲᠡᠭᠷᠢ ᠪᠠᠰᠠᠯᠠ ᠳᠠᠬᠢᠭᠠᠳ ᠭᠠᠯᠵᠠᠭᠤᠷᠠᠵᠤ᠂ ᠰᠠᠯᠬᠢᠨᠳᠤ ᠤᠯᠠᠮ ᠰᠢᠷᠦᠭᠦᠰᠦᠭᠡᠳ ᠰᠢᠭᠤᠷᠭᠠ ᠲᠡᠭᠷᠢ ᠭᠠᠵᠠᠷᠢ ᠨᠡᠢᠯᠡᠭᠦᠯᠦᠨ ᠪᠠᠳᠯᠠᠵᠤ᠂ ᠲᠡᠳᠡ ᠬᠣᠶᠠᠷ ᠪᠡᠶᠡᠪᠡᠨ ᠪᠦᠷ ᠣᠯᠵᠤ ᠦᠵᠡᠬᠦᠪᠡᠨ ᠪᠣᠯᠢᠵᠤ᠂ ᠬᠣᠨᠢᠳᠨᠢ ᠰᠢᠭᠤᠷᠭᠠᠨᠤ ᠤᠷᠤᠭᠤ ᠪᠥᠮᠪᠦᠷᠢᠯᠳᠦᠨ ᠤᠷᠤᠭᠤᠳᠠᠵᠤ ᠡᠬᠢᠯᠡᠪᠡ᠃ ᠴᠠᠰᠤ ᠣᠷᠤᠨ ᠰᠢᠭᠤᠷᠴᠤ ᠤᠯᠠᠮ ᠵᠤᠵᠠᠭᠠᠨ ᠪᠣᠯᠤᠭᠠᠳ᠂ ᠠᠯᠬᠤᠬᠤ ᠪᠦᠷᠢ ᠭᠤᠳᠤᠷᠴᠤ᠂ ᠱᠠᠬᠠᠢ ᠡᠮᠦᠰᠦᠭᠰᠡᠨ ᠴᠡᠴᠡᠭᠦᠨ ᠰᠢᠷᠬᠤᠨᠠᠭᠢᠶᠠᠷᠨᠢ ᠴᠠᠰᠤ ᠴᠢᠬᠢᠭᠡᠳ᠂ ᠬᠢᠩᠭᠠᠷᠠ ᠰᠢᠯᠪᠢᠶᠢ ᠳᠠᠭᠠᠵᠤ ᠬᠠᠢᠯᠤᠨ ᠭᠡᠰᠴᠦ᠂ ᠳᠠᠬᠢᠨ ᠬᠥᠯᠳᠡᠭᠡᠳ᠂ ᠮᠥᠰᠦᠨ ᠭᠤᠲᠤᠯ ᠡᠮᠦᠰᠦᠭᠰᠡᠨᠰᠢᠭ ᠪᠣᠯᠵᠤ᠂ ᠬᠥᠯᠢᠨᠢ ᠲᠠᠰᠤ ᠵᠢᠮᠵᠢᠭᠢᠨᠡᠭᠦᠯᠵᠦ ᠪᠠᠢᠯᠠ᠃ ᠨᠠᠰᠤ ᠪᠠᠯᠴᠢᠷ᠂ ᠭᠡᠳᠡᠰᠦ ᠬᠣᠭᠤᠰᠤᠨ ᠴᠡᠴᠡᠭᠦᠨ ᠲᠠᠮᠢᠷ ᠲᠡᠩᠬᠡᠭᠡ ᠨᠢᠭᠡᠮᠦᠰᠦᠨ ᠪᠠᠷᠠᠭᠳᠠᠵᠤ ᠵᠢᠮᠵᠢᠭᠢᠨᠡᠵᠦ ᠪᠠᠢᠭᠰᠠᠨ ᠬᠥᠯᠨᠢ ᠨᠢᠭᠡᠨᠲᠡ ᠮᠡᠳᠡᠭᠡᠦᠭᠡᠢ ᠪᠣᠯᠵᠤ᠂ ᠠᠯᠬᠤᠮ ᠪᠦᠷᠢᠳᠦᠴᠦ ᠪᠦᠷ ᠪᠦᠬᠦ ᠪᠡᠶᠡᠡᠴᠡᠨᠢ ᠬᠦᠢᠲᠡᠨ ᠬᠥᠯᠦᠰᠦ ᠴᠢᠬᠠᠷᠠᠵᠤ ᠪᠠᠢᠯᠠ᠃
ᠬᠦᠷᠭᠡᠨ ᠠᠬᠠᠨᠢ ᠴᠡᠴᠡᠭᠢᠪᠡᠨ ᠦᠵᠡᠭᠡᠳ 《 ᠴᠢ ᠬᠤᠷᠳᠤᠨ ᠡᠨᠡ ᠠᠢᠯᠳᠤ ᠣᠴᠢᠵᠤ ᠶᠠᠭᠤᠮᠠ ᠬᠡᠦᠮᠡ ᠢᠳᠡᠵᠦ ᠳᠤᠯᠠᠭᠠᠴᠠᠭᠠᠳ ᠬᠤᠪᠴᠠᠰᠤ ᠵᠤᠵᠠᠭᠠᠯᠠᠵᠤ ᠡᠮᠦᠰᠦᠭᠡᠳ ᠢᠷᠡ᠂ ᠪᠢ ᠭᠠᠭᠴᠠᠭᠠᠷ ᠬᠣᠨᠢᠪᠠᠨ ᠬᠣᠷᠢᠭᠠᠵᠤ ᠪᠠᠢᠶᠠ》 ᠭᠡᠵᠦ ᠱᠠᠭᠠᠷᠳᠠᠪᠠ᠃ ᠴᠡᠴᠡᠭ ᠮᠥᠨ ᠥᠪᠡᠷᠲᠡᠢᠨᠢ ᠠᠳᠠᠯᠢᠬᠠᠨ ᠬᠥᠯᠳᠡᠵᠦ ᠪᠡᠭᠡᠷᠡᠵᠦ ᠥᠯᠦᠰᠴᠦ ᠶᠠᠳᠠᠷᠠᠭᠰᠠᠨ ᠬᠦᠷᠭᠡᠨ ᠠᠬᠠᠪᠠᠨ ᠬᠠᠷᠠᠵᠤ ᠲᠣᠯᠤᠭᠠᠢᠪᠠᠨ ᠰᠠᠵᠢᠨ ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦᠪᠡᠨ ᠪᠦᠯᠲᠡᠭᠡᠨᠡᠭᠦᠯᠵᠦ 《ᠪᠣᠯᠬᠤᠦᠭᠡᠢ᠂ ᠠᠬᠠ ᠭᠠᠭᠴᠠᠭᠠᠷᠢᠶᠠᠨ ᠶᠠᠭᠠᠬᠢᠵᠤ ᠬᠣᠨᠢᠪᠠᠨ ᠳᠡᠢᠯᠬᠦ ᠪᠤᠢ? ᠶᠠᠭᠠᠬᠢᠭᠰᠠᠨᠴᠤ ᠬᠣᠨᠢᠪᠠᠨ ᠠᠯᠳᠠᠵᠤ ᠪᠣᠯᠬᠤᠦᠭᠡᠢ᠂ ᠪᠢ ᠶᠠᠪᠤᠬᠤᠦᠭᠡᠢ》 ᠭᠡᠪᠡ᠃ ᠬᠦᠷᠭᠡᠨ ᠠᠬᠠᠨᠢ ᠴᠡᠴᠡᠭᠦᠨ ᠳᠠᠭᠠᠷᠠᠵᠤ ᠪᠡᠭᠡᠷᠡᠭᠡᠳ ᠪᠣᠯᠬᠤᠪᠠᠨ ᠪᠠᠢᠭᠰᠠᠨᠢ ᠦᠵᠡᠵᠦ ᠮᠠᠭᠤ ᠴᠢᠷᠠᠢ ᠭᠠᠷᠭᠠᠨ ᠳᠡᠭᠦᠦᠪᠡᠨ ᠵᠠᠩᠨᠠᠵᠤ᠂ 《ᠪᠢ ᠮᠡᠳᠡᠵᠦ ᠪᠠᠢᠨᠠ᠂ ᠴᠢ ᠬᠤᠷᠳᠤᠨ ᠶᠠᠪᠤ》 ᠭᠡᠵᠦ ᠵᠠᠩᠳᠤᠷᠤᠭᠠᠳ ᠤᠷᠤᠭᠤᠳᠠᠵᠤ ᠪᠠᠢᠭᠠ ᠬᠣᠨᠢᠳᠤᠨᠢᠶᠠᠨ ᠠᠷᠤᠠᠴᠠ ᠭᠦᠶᠦᠪᠡ᠃ ᠴᠡᠴᠡᠭ ᠠᠷᠭᠠᠦᠭᠡᠢ ᠬᠥᠯᠳᠡᠭᠰᠡᠨ ᠬᠥᠯᠢᠶᠡᠨ ᠴᠢᠷᠴᠦ ᠠᠢᠯ ᠤᠷᠤᠭᠤ ᠡᠪᠦᠳᠦᠭ ᠲᠤᠯᠤᠮᠠ ᠴᠠᠰᠤᠨ ᠳᠤᠮᠳᠠᠭᠤᠷ ᠠᠷᠠᠢ ᠴᠢᠮᠠᠢ ᠠᠯᠬᠤᠵᠤ ᠪᠠᠢᠭᠰᠠᠨᠢᠶᠠᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠬᠣᠨᠢᠳᠨᠢ ᠰᠠᠯᠬᠢᠨᠤ ᠤᠷᠤᠭᠤ ᠪᠥᠮᠪᠦᠷᠢᠯᠳᠦᠨ ᠭᠦᠶᠦᠯᠳᠦᠵᠦ᠂ ᠬᠦᠴᠦᠲᠦ ᠰᠢᠭᠤᠷᠭᠠᠨ ᠬᠣᠨᠢᠨ ᠰᠦᠷᠦᠭᠢᠨᠢ ᠪᠦᠬᠦᠯᠢᠪᠡᠷᠨᠢ ᠵᠠᠯᠭᠢᠮᠠᠷ ᠰᠢᠪᠬᠠᠳᠠᠨ ᠢᠰᠭᠡᠷᠴᠦ᠂ ᠬᠦᠷᠭᠡᠨ ᠠᠬᠠᠨᠢ ᠬᠣᠨᠢᠨᠤᠪᠠᠨ ᠤᠷᠳᠤᠭᠤᠷᠨᠢ ᠨᠠᠰᠢ ᠴᠠᠰᠢ ᠭᠦᠶᠦᠵᠦ ᠶᠠᠭᠠᠬᠢᠵᠤ ᠬᠣᠷᠢᠭᠠᠪᠠᠴᠤ ᠳᠡᠢᠯᠬᠦᠦᠭᠡᠢ ᠪᠠᠢᠯᠠ᠃
ᠴᠡᠴᠡᠭ ᠡᠭᠦᠨᠢ ᠬᠠᠷᠠᠩᠭᠤᠲᠠᠪᠠᠨ ᠬᠥᠮᠦᠬᠡᠢᠪᠡᠨ ᠲᠠᠰᠤ ᠵᠠᠭᠤᠵᠤ᠂ ᠬᠣᠷᠮᠤᠢᠪᠠᠨ ᠰᠢᠭᠤᠭᠠᠳ᠂ ᠡᠪᠦᠳᠦᠭ ᠲᠤᠯᠤᠮᠠ ᠴᠠᠰᠤᠶᠢ ᠲᠣᠭᠤᠴᠢᠨ᠂ ᠬᠣᠨᠢᠨᠤᠪᠠᠨ ᠵᠦᠭ ᠬᠠᠷᠠ ᠬᠤᠷᠳᠤᠪᠠᠷᠢᠶᠠᠨ ᠭᠦᠶᠦᠪᠡ᠃ ᠬᠠᠮᠢᠭᠠᠠᠴᠠ ᠢᠷᠡᠭᠰᠡᠨ ᠲᠡᠢᠮᠦ ᠶᠡᠬᠡ ᠬᠦᠴᠦ ᠵᠣᠷᠢᠭ ᠪᠤᠢ? ᠶᠠᠮᠠᠷ ᠬᠦᠴᠦᠨ ᠴᠢᠨᠦ ᠬᠥᠯᠳᠡᠭᠰᠡᠨ ᠬᠥᠯᠢ ᠴᠢᠩᠭᠢᠵᠦ ᠬᠤᠷᠳᠤᠨ ᠬᠥᠳᠡᠯᠭᠡᠪᠡ? ᠪᠠᠭᠠᠲᠤᠷ ᠵᠣᠷᠢᠭᠲᠤ ᠮᠠᠯᠴᠢᠨ ᠬᠡᠦᠬᠡᠨ ᠴᠡᠴᠡᠭᠮᠢᠨᠢ!
ᠴᠡᠴᠡᠭ ᠬᠣᠨᠢ ᠤᠷᠤᠭᠤᠪᠠᠨ ᠭᠦᠶᠦᠵᠦ ᠶᠠᠪᠤᠲᠠᠯᠠ ᠬᠥᠯᠳᠦᠨᠢ ᠵᠥᠭᠡᠯᠡᠨ ᠶᠠᠭᠤᠮᠠ ᠲᠡᠭᠡᠭᠯᠡᠬᠦᠳᠦ ᠲᠣᠷᠴᠤ ᠣᠢᠴᠢᠪᠠ᠃ ᠲᠡᠮᠲᠡᠷᠬᠢᠯᠡᠨ ᠮᠠᠴᠤᠯᠬᠢᠯᠠᠵᠤ ᠪᠣᠰᠤᠭᠠᠳ ᠦᠵᠡᠪᠡᠯ᠂ ᠴᠡᠴᠡᠭᠦᠨ ᠬᠠᠮᠤᠭᠤᠨ ᠬᠠᠢᠷᠠᠲᠠᠢ ᠡᠷᠬᠡ ᠢᠮᠠᠭᠠ 《ᠰᠡᠭᠰᠡᠭᠡᠷ ᠴᠠᠭᠠᠨ》ᠨᠢ ᠲᠠᠷᠳᠠᠭᠠᠳ ᠣᠢᠴᠢᠭᠰᠠᠨ ᠪᠠᠢᠯᠠ᠃ ᠬᠡᠭᠡᠯᠨᠢ ᠬᠦᠨᠳᠦᠷᠡᠭᠰᠡᠨ ᠡᠨᠡ ᠬᠥᠭᠡᠷᠦᠬᠦᠢ ᠠᠮᠢᠲᠠᠨᠢ ᠴᠡᠴᠡᠭ ᠦᠵᠡᠩᠭᠦᠲᠡᠪᠡᠨ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠵᠢᠷᠦᠬᠡᠨᠢ ᠡᠮᠲᠡᠷᠡᠵᠦ ᠡᠷᠭᠦᠵᠦ ᠪᠣᠰᠭᠠᠪᠠᠯ ᠥᠨᠦᠬᠢᠨᠢ ᠨᠢᠭᠡᠮᠦᠰᠦᠨ ᠲᠠᠷᠳᠠᠭᠰᠠᠨ ᠲᠤᠯᠠ ᠳᠠᠬᠢᠭᠠᠳ ᠣᠢᠴᠢᠴᠢᠬᠠᠯᠠ᠃ 《 ᠶᠠᠭᠠᠬᠢᠬᠤ ᠪᠤᠢ? ᠬᠠᠶᠠᠭᠠᠳ ᠶᠠᠪᠤᠬᠤᠤᠤ?ᠦᠭᠡᠢ᠂ 〈ᠰᠡᠭᠰᠡᠭᠡᠷ ᠴᠠᠭᠠᠨ〉ᠢᠶᠡᠨ ᠶᠠᠭᠠᠬᠢᠭᠰᠠᠨᠴᠤ ᠬᠠᠶᠠᠬᠤᠦᠭᠡᠢ》 ᠭᠡᠵᠦ ᠵᠣᠷᠢᠭ ᠰᠢᠭᠤᠳᠤᠭᠠᠳ ᠢᠮᠠᠭᠠᠪᠠᠨ ᠠᠪᠴᠤ ᠡᠭᠦᠷᠦᠮᠡᠭᠴᠡᠪᠡᠨ ᠬᠣᠨᠢᠨᠤᠪᠠᠨ ᠠᠷᠤᠠᠴᠠ ᠶᠠᠪᠤᠪᠠ᠃ ᠭᠡᠪᠡᠴᠦ ᠳᠡᠮᠡᠢ ᠶᠠᠪᠤᠭᠰᠠᠨᠦᠭᠡᠢ ᠴᠡᠴᠡᠭ ᠥᠪᠡᠷᠢᠶᠡᠨᠴᠦ ᠶᠠᠪᠤᠵᠤ ᠳᠡᠢᠯᠬᠦᠦᠭᠡᠢ ᠪᠣᠯᠵᠤ ᠴᠠᠰᠤᠨᠳᠤ ᠭᠤᠳᠤᠷᠤᠨ ᠣᠢᠴᠢᠪᠠ᠃ ᠴᠡᠴᠡᠭ ᠭᠦᠶᠦᠵᠦ ᠪᠣᠰᠤᠭᠠᠳ ᠢᠮᠠᠭᠠᠪᠠᠨ ᠬᠠᠷᠠᠵᠤ ᠮᠡᠳᠡᠷᠡᠯᠦᠭᠡᠢ ᠪᠣᠯᠤᠭᠰᠠᠨ ᠬᠥᠯᠢᠶᠡᠨ ᠬᠥᠳᠡᠯᠭᠡᠨ ᠦᠵᠡᠭᠡᠳ ᠲᠦᠷ ᠡᠷᠡᠭᠡᠯᠵᠡᠪᠡ᠃ ᠡᠨᠡ ᠦᠶᠡᠳᠦ 《ᠰᠡᠭᠰᠡᠭᠡᠷ ᠴᠠᠭᠠᠨ》ᠨᠢ 《ᠮᠠᠢ᠂ ᠮᠠᠢ》 ᠭᠡᠵᠦ ᠮᠠᠢᠯᠠᠭᠠᠳ ᠥᠭᠡᠳᠡᠡᠴᠡᠨᠢ ᠮᠡᠯᠲᠡᠭᠡᠨᠡᠨ ᠬᠠᠷᠠᠬᠤᠨᠢ ᠶᠠᠭᠯᠠ 《ᠡᠵᠡᠨᠮᠢᠨᠢ ᠨᠠᠮᠠᠢ ᠪᠢᠲᠡᠭᠡᠢ ᠬᠠᠶᠠᠭᠠᠴᠢ ᠳ᠋ᠠ 》 ᠭᠡᠵᠦ ᠪᠠᠢᠬᠤᠰᠢᠭ᠋ ᠰᠠᠨᠠᠭᠳᠠᠵᠠᠢ᠃ ᠴᠡᠴᠡᠭ ᠬᠠᠮᠤᠭ ᠬᠦᠴᠦᠨᠢᠶᠡᠨ ᠰᠢᠪᠬᠠᠨ 《ᠰᠡᠭᠰᠡᠭᠡᠷ ᠴᠠᠭᠠᠨ》ᠢᠶᠡᠨ ᠡᠭᠦᠷᠦᠭᠡᠳ ᠶᠠᠪᠤᠯᠠ᠃
ᠰᠢᠭᠤᠷᠭᠠ ᠤᠯᠠᠮ ᠬᠦᠴᠦᠲᠡᠢ ᠰᠢᠭᠤᠷᠤᠭᠰᠠᠭᠠᠷ᠂ ᠬᠣᠶᠠᠷ ᠤᠯᠠᠭᠠᠨ ᠵᠢᠷᠦᠬᠡ ᠴᠣᠬᠢᠯᠠᠭᠰᠠᠭᠠᠷ᠂ ᠦᠬᠦᠯ ᠪᠠ ᠠᠮᠢᠳᠤᠷᠠᠯ ᠲᠡᠮᠡᠴᠡᠯᠳᠦᠭᠰᠡᠭᠡᠷ ᠪᠠᠢᠨᠠ᠃ ᠫᠠᠳ ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠰᠥᠨᠢ ᠪᠣᠯᠤᠯᠠ ᠪᠣᠯᠤᠯᠲᠠᠢ᠃ ᠭᠡᠪᠡᠴᠦ ᠪᠠᠰᠠᠯᠠ ᠲᠡᠭᠷᠢ ᠭᠠᠵᠠᠷ ᠨᠡᠢᠯᠡᠭᠰᠡᠨ ᠬᠡᠪᠢᠶᠡᠷᠢᠶᠡᠨ᠃
ᠰᠥᠨᠢᠶᠢᠨ ᠭᠤᠷᠪᠠᠨ ᠴᠠᠭᠤᠨ ᠦᠶᠡᠳᠦ ᠰᠢᠭᠤᠷᠭᠠ ᠵᠢᠭᠠᠬᠠᠨ ᠨᠠᠮᠳᠠᠬᠤᠳᠤ ᠲᠡᠷᠡ ᠨᠢᠭᠡ ᠡᠵᠡᠭᠦᠢ ᠬᠠᠭᠤᠴᠢᠨ ᠡᠪᠦᠯᠵᠢᠶᠡᠨᠳᠦ ᠬᠦᠷᠴᠦ ᠬᠣᠨᠢᠪᠠᠨ ᠲᠣᠭᠲᠠᠭᠠᠪᠠ᠃
ᠡᠨᠡ ᠦᠶᠡᠳᠦ ᠠᠬᠠ ᠥᠬᠢᠨ ᠳᠡᠭᠦᠦ ᠬᠣᠶᠠᠭᠤᠯᠠ ᠨᠢᠭᠡᠨᠲᠡ ᠳᠠᠭᠠᠷᠠᠵᠤ ᠥᠯᠦᠰᠦᠭᠡᠳ ᠶᠠᠳᠠᠷᠠᠨ ᠲᠤᠢᠯᠳᠠᠵᠤ᠂ ᠴᠡᠴᠡᠭᠦᠨ ᠬᠥᠯᠨᠢ ᠪᠦᠷ ᠮᠡᠳᠡᠭᠡᠦᠭᠡᠢ ᠪᠣᠯᠤᠭᠠᠳ ᠠᠯᠬᠤᠵᠤ ᠳᠡᠢᠯᠬᠦᠦᠭᠡᠢ ᠪᠣᠯᠢᠵᠠᠢ᠃ ᠭᠡᠪᠡᠴᠦ ᠪᠠᠭᠠᠲᠤᠷ ᠥᠬᠢᠨ ᠴᠡᠴᠡᠭᠮᠢᠨᠢ ᠮᠡᠨᠳᠦ ᠠᠪᠴᠤ ᠢᠷᠡᠭᠰᠡᠨ ᠰᠦᠷᠦᠭᠢᠶᠡᠨ ᠬᠠᠷᠠᠵᠤ 《 ᠰᠡᠭᠰᠡᠭᠡᠷ ᠴᠠᠭᠠᠨ》ᠢᠶᠡᠨ ᠲᠡᠪᠡᠷᠢᠨ ᠰᠠᠭᠤᠬᠤᠳᠠᠭᠠᠨ ᠬᠥᠯᠳᠡᠵᠦ ᠪᠣᠷᠤᠯᠠᠭᠰᠠᠨ ᠴᠢᠷᠠᠢᠳᠤᠨᠢ ᠢᠯᠠᠭᠴᠢᠶᠢᠨ ᠣᠮᠤᠭᠰᠢᠯ ᠳᠦᠭᠦᠷᠴᠦ ᠪᠠᠢᠯᠠ᠃
ᠬᠦᠷᠭᠡᠨ ᠠᠬᠠᠨᠢ ᠳᠡᠪᠡᠯᠢᠶᠡᠷᠢᠶᠡᠨ ᠬᠥᠯᠢᠨᠢ ᠬᠤᠴᠢᠵᠤ᠂ ᠲᠡᠭᠦᠨᠢ ᠲᠦᠰᠢᠵᠦ ᠬᠣᠷᠤᠭᠠ ᠲᠣᠭᠤᠷᠢᠭᠤᠯᠬᠤ ᠵᠡᠷᠭᠡᠪᠡᠷ ᠣᠷᠤᠯᠳᠤᠭᠰᠠᠭᠠᠷ ᠦᠷ ᠴᠠᠢᠯᠭᠠᠪᠠ᠃
ᠭᠡᠭᠡ ᠣᠷᠤᠯᠠ᠃ ᠰᠢᠭᠤᠷᠭᠠ ᠨᠠᠮᠳᠠᠯᠠ᠃ ᠭᠡᠷᠴᠦ ᠣᠢᠷᠠᠲᠤᠯᠠ᠂ ᠬᠣᠨᠢᠪᠠᠨ ᠠᠯᠳᠠᠭᠰᠠᠨᠦᠭᠡᠢ᠃ ᠬᠡᠯᠡᠨᠳᠡᠭᠡᠨ ᠶᠠᠭᠤᠮᠠ ᠲᠠᠯᠪᠢᠭᠠᠦᠭᠡᠢ᠃ ᠪᠣᠷᠪᠢ ᠨᠤᠭᠤᠯᠤᠭᠠᠳᠤᠢᠪᠠᠷ ᠪᠦᠬᠦᠯᠢ ᠬᠣᠷᠢᠨ ᠳᠥᠷᠪᠡᠨ ᠴᠠᠭ ᠲᠡᠮᠡᠴᠡᠭᠰᠡᠨ ᠪᠠᠭᠠᠲᠤᠷ ᠠᠬᠠ ᠥᠬᠢᠨ ᠳᠡᠭᠦᠦ ᠬᠣᠶᠠᠷᠤᠨ ᠰᠡᠳᠭᠢᠯᠳᠦ 《ᠪᠢᠳᠡ ᠢᠯᠠᠯᠠ》 ᠭᠡᠰᠡᠨ ᠣᠮᠤᠭ ᠵᠣᠷᠢᠭ ᠪᠢᠯᠬᠠᠵᠤ᠂ ᠬᠣᠨᠢ ᠭᠡᠯᠢᠵᠦ ᠭᠡᠷ ᠵᠦᠭᠢᠶᠡᠨ ᠬᠥᠳᠡᠯᠪᠡ᠃
ᠭᠡᠷᠨᠢ ᠠᠷᠪᠠ ᠰᠢᠬᠠᠮ ᠭᠠᠵᠠᠷ ᠵᠠᠢᠲᠠᠢ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠴᠡᠴᠡᠭᠦᠨ ᠬᠥᠯᠨᠢ ᠬᠥᠯᠳᠡᠵᠦ ᠲᠠᠮᠢᠷ ᠲᠡᠩᠬᠡᠯᠨᠢ ᠪᠠᠷᠠᠭᠳᠠᠭᠠᠳ ᠠᠯᠬᠤᠵᠤ ᠳᠡᠢᠯᠬᠦᠪᠡᠨ ᠪᠣᠯᠢᠭᠰᠠᠨ ᠲᠤᠯᠠ ᠬᠦᠷᠭᠡᠨ ᠠᠬᠠᠨᠢ ᠡᠭᠦᠷᠦᠭᠡᠳ ᠬᠣᠨᠢᠪᠠᠨ ᠭᠡᠯᠢᠵᠦ ᠶᠠᠪᠤᠪᠠ᠃
ᠳᠡᠮᠡᠢ ᠶᠠᠪᠤᠭᠰᠠᠨᠦᠭᠡᠢ ᠨᠢᠭᠦᠯᠲᠦ ᠰᠢᠭᠤᠷᠭᠠᠨ ᠳᠠᠬᠢᠭᠠᠳ ᠬᠥᠳᠡᠯᠵᠦ ᠬᠣᠨᠢᠨ ᠰᠦᠷᠦᠭᠨᠢ ᠳᠠᠬᠢᠭᠠᠳᠯᠠ ᠤᠷᠤᠭᠤᠳᠠᠯᠠ᠃
ᠴᠡᠴᠡᠭ ᠬᠥᠯᠳᠡᠵᠦ ᠬᠥᠰᠢᠭᠰᠡᠨ ᠤᠷᠤᠭᠤᠯᠢᠶᠠᠨ ᠳᠥᠩᠭᠡᠵᠢ ᠬᠥᠳᠡᠯᠭᠡᠨ᠂ ᠥᠪᠡᠷᠢᠨᠢ ᠡᠭᠦᠷᠦᠭᠡᠳ ᠵᠦᠳᠡᠨ ᠶᠠᠳᠠᠨ ᠠᠯᠬᠤᠵᠤ ᠪᠠᠢᠭᠠ ᠬᠦᠷᠭᠡᠨ ᠠᠬᠠᠳᠠᠭᠠᠨ 《ᠨᠠᠮᠠᠢ ᠡᠭᠦᠷᠦᠭᠡᠳ ᠶᠠᠪᠤᠪᠠᠯ ᠬᠣᠨᠢᠪᠠᠨ ᠠᠯᠳᠠᠨᠠ᠂ ᠪᠢ ᠬᠣᠨᠢᠪᠠᠨ ᠬᠠᠷᠠᠵᠤ ᠪᠠᠢᠶᠠ᠂ ᠠᠬᠠ ᠬᠤᠷᠳᠤᠨ ᠬᠠᠷᠢᠵᠤ ᠬᠥᠮᠦᠨ ᠳᠠᠭᠤᠳᠠ》 ᠭᠡᠵᠡᠢ᠃
ᠬᠦᠷᠭᠡᠨ ᠠᠬᠠᠨᠢ ᠡᠩᠭᠦᠷᠡᠢ ᠬᠠᠢᠷᠠᠲᠤ ᠳᠡᠭᠦᠦᠪᠡᠨ ᠲᠠᠯᠪᠢᠵᠤ ᠶᠠᠳᠠᠬᠤ ᠪᠣᠯᠪᠠᠴᠤ ᠲᠡᠭᠦᠨᠦ ᠬᠡᠯᠡᠬᠦᠶᠢ ᠠᠷᠭᠠᠦᠭᠡᠢ ᠵᠥᠪ ᠭᠡᠵᠦ ᠰᠠᠨᠠᠨᠠ᠃ ᠴᠢᠩᠭᠢᠭᠡᠳ ᠬᠡᠦᠬᠡᠨ ᠳᠡᠭᠦᠦᠪᠡᠨ ᠭᠠᠵᠠᠷᠲᠤ ᠵᠥᠭᠡᠯᠡᠨ ᠭᠡᠭᠴᠢ ᠲᠠᠯᠪᠢᠭᠠᠳ ᠡᠷᠭᠢᠨ ᠡᠷᠭᠢᠨ ᠬᠠᠷᠠᠭᠰᠠᠭᠠᠷ ᠬᠠᠮᠤᠭ ᠬᠦᠴᠦᠨᠢᠶᠡᠨ ᠰᠢᠪᠬᠠᠨ ᠭᠦᠶᠦᠨᠡ᠃
ᠰᠥᠨᠢᠵᠢᠨ ᠰᠡᠳᠭᠢᠯ ᠵᠣᠪᠠᠵᠤ ᠪᠠᠷᠠ ᠬᠠᠷᠠᠭᠰᠠᠭᠠᠷ ᠪᠠᠢᠭᠰᠠᠨ ᠭᠡᠷᠦᠨ ᠬᠢᠨᠨᠢ ᠪᠠᠲᠤᠮᠥ᠋ᠩᠬᠡᠶᠢ ᠦᠵᠡᠮᠡᠭᠴᠡ ᠭᠦᠶᠦᠯᠳᠦᠵᠦ ᠢᠷᠡᠯᠡ᠃
ᠴᠡᠴᠡᠭᠦᠨ ᠠᠬᠠ ᠪᠠᠽᠠᠷ ᠲᠡᠷᠡ ᠳᠣᠣᠷᠠᠪᠠᠨ ᠭᠠᠳᠠᠨᠠ ᠪᠠᠢᠭᠰᠠᠨ ᠲᠡᠮᠡᠭᠡᠶᠢ ᠤᠨᠤᠵᠤ ᠭᠦᠶᠦᠯᠭᠡᠪᠡ᠃
ᠬᠣᠨᠢᠳᠨᠢ ᠤᠷᠤᠭᠤᠳᠠᠭᠰᠠᠭᠠᠷ ᠨᠡᠯᠢᠶᠡᠳ ᠶᠠᠪᠤᠴᠢᠬᠠᠵᠠᠢ᠃ ᠰᠢᠨᠡᠬᠡᠨ ᠰᠢᠭᠤᠷᠤᠭᠰᠠᠨ ᠴᠠᠰᠤᠨ ᠳᠡᠭᠡᠭᠦᠷ ᠬᠥᠮᠦᠨ ᠮᠥᠯᠬᠦᠭᠰᠡᠨ ᠨᠢᠭᠡᠨ ᠵᠤᠷᠪᠤᠰ ᠮᠥᠷ ᠭᠦᠨ ᠳᠤᠷᠠᠢᠭᠰᠠᠭᠠᠷ ᠪᠠᠢᠯᠠ᠃ ᠨᠢᠭᠡ ᠮᠧᠲᠷ᠂ ᠬᠣᠶᠠᠷ ᠮᠧᠲᠷ ᠁ ᠠᠷᠪᠠᠨ ᠮᠧᠲᠷ ᠬᠣᠷᠢᠨ ᠮᠧᠲᠷ ᠁ ᠵᠠᠭᠤᠨ ᠮᠧᠲᠷ ᠁ ᠠ᠂ ᠴᠡᠴᠡᠭ ᠡᠴᠦᠰᠲᠡᠭᠡᠨ ᠡᠨᠡ ᠵᠠᠭᠤᠨ ᠮᠧᠲᠷᠢ ᠰᠢᠪᠲᠤᠯᠵᠠᠢ᠃ ᠭᠡᠪᠡᠴᠦ ᠬᠡᠳᠦᠬᠡᠨ ᠰᠧᠺᠦ᠋ᠨ᠋ᠳ᠋ᠦᠨ ᠳᠠᠭᠠᠷᠢᠯᠲᠠᠪᠠᠷ ᠪᠢᠰᠢ᠂ ᠬᠠᠷᠢᠨ ᠬᠠᠮᠤᠭ ᠰᠡᠭᠦᠯᠴᠢᠶᠢᠨ ᠠᠮᠢᠰᠭᠤᠭᠠᠪᠠᠨ ᠬᠤᠷᠢᠶᠠᠲᠠᠯᠠ ᠵᠢᠳᠭᠦᠭᠰᠡᠨ᠂ ᠲᠠᠯᠠ ᠨᠤᠲᠤᠭᠤᠨ ᠮᠠᠯᠴᠢᠨ ᠠᠷᠠᠳᠤᠨ ᠰᠠᠢᠨ ᠦᠷᠡᠰ᠂ ᠨᠠᠮᠤᠨ ᠬᠥᠮᠦᠵᠢᠯᠦᠨ ᠳᠣᠣᠷᠠ ᠥᠰᠦᠨ ᠪᠣᠢᠵᠢᠭᠰᠠᠨ ᠵᠠᠯᠠᠭᠤ ᠨᠢᠭᠡ ᠦᠶᠡᠶᠢᠨ ᠰᠢᠯᠢᠳᠡᠭ ᠲᠥᠯᠦᠭᠡᠯᠡᠭᠴᠢ᠂ ᠨᠢᠭᠡᠨ ᠮᠠᠯᠴᠢᠨ ᠬᠡᠦᠬᠡᠨ ᠭᠠᠯ ᠬᠠᠯᠠᠭᠤᠨ ᠵᠢᠷᠦᠬᠡ ᠪᠠ ᠭᠠᠢᠬᠠᠮᠰᠢᠭᠲᠤ ᠪᠠᠭᠠᠲᠤᠷ ᠵᠣᠷᠢᠭᠢᠶᠠᠷᠢᠶᠠᠨ ᠲᠤᠭᠤᠯᠤᠭᠰᠠᠨᠶᠤᠮ᠃
ᠪᠠᠽᠠᠷᠢ ᠲᠡᠮᠡᠭᠡᠨᠡᠴᠡᠪᠡᠨ ᠪᠠᠭᠤᠵᠤ ᠬᠠᠢᠷᠠᠲᠤ ᠳᠡᠭᠦᠦᠶᠢᠨᠢᠶᠡᠨ ᠨᠡᠷᠡᠪᠡᠷ ᠳᠠᠭᠤᠳᠠᠨ ᠲᠡᠪᠡᠷᠢᠨ ᠠᠪᠬᠤᠳᠤ᠂ ᠴᠡᠴᠡᠭ ᠨᠢᠭᠡᠨᠲᠡ ᠬᠠᠯᠠᠭᠤᠨ ᠠᠮᠢᠰᠭᠤᠭᠠᠪᠠᠨ ᠬᠤᠷᠢᠶᠠᠴᠢᠬᠠᠭᠰᠠᠨ ᠪᠠᠢᠯᠠ᠃ ᠦᠷᠭᠦᠯᠵᠢ ᠠᠳᠭᠤᠵᠤ ᠶᠠᠪᠤᠳᠠᠭ ᠪᠢᠴᠢᠬᠠᠨ ᠰᠢᠯᠪᠢᠭᠦᠷᠨᠢ ᠭᠠᠷᠲᠤᠨᠢ ᠠᠳᠭᠤᠭᠠᠲᠠᠢ ᠬᠡᠪᠢᠶᠡᠷᠢᠶᠡᠨ᠂ ᠬᠡᠵᠢᠶᠡᠳᠡ ᠰᠠᠯᠳᠠᠭᠦᠭᠡᠢ 《ᠰᠡᠭᠰᠡᠭᠡᠷ ᠴᠠᠭᠠᠨ》ᠨᠢ ᠳᠡᠷᠭᠡᠳᠡᠨᠢ ᠮᠠᠢᠯᠠᠭᠰᠠᠭᠠᠷ᠂ ᠢᠮᠠᠭᠲᠠ ᠢᠨᠢᠶᠡᠮᠰᠦᠭᠯᠡᠵᠦ ᠶᠠᠪᠤᠳᠠᠭ ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦᠨᠢ ᠬᠣᠨᠢᠨ ᠰᠦᠷᠦᠭᠦᠨᠢᠶᠡᠨ ᠬᠣᠢᠨᠠᠠᠴᠠ ᠰᠢᠷᠲᠡᠵᠦ ᠥᠨᠢᠳᠡ ᠠᠨᠢᠰᠢᠦᠭᠡᠢ ᠬᠡᠪᠢᠶᠡᠷ ᠁
ᠠᠷᠪᠠᠨ ᠳᠣᠯᠤᠭᠠᠨ ᠨᠠᠰᠤᠲᠠᠢ ᠪᠠᠭᠠᠲᠤᠷ ᠬᠡᠦᠬᠡᠨ ᠴᠡᠴᠡᠭᠮᠢᠨᠢ ᠢᠩᠭᠢᠭᠡᠳ ᠬᠠᠮᠲᠤᠶᠢᠨ ᠰᠦᠷᠦᠭᠦᠨᠢᠶᠡᠨ ᠲᠥᠯᠦᠭᠡ ᠬᠠᠯᠠᠭᠤᠨ ᠠᠮᠢᠪᠠᠨ ᠦᠷᠡᠭᠳᠡᠭᠦᠯᠪᠡ᠃
ᠲᠡᠷᠡ ᠣᠬᠤᠷᠬᠠᠨ ᠨᠢᠭᠡ ᠨᠠᠰᠤᠨᠳᠠᠭᠠᠨ ᠶᠠᠮᠠᠷᠴᠤ ᠰᠦᠷ ᠵᠢᠪᠬᠤᠭᠠᠲᠠᠢ ᠦᠭᠡ ᠶᠠᠷᠢᠶᠠ ᠶᠠᠷᠢᠭᠰᠠᠨᠦᠭᠡᠢ᠂ ᠭᠡᠪᠡᠴᠦ ᠬᠥᠮᠦᠰᠦᠨ ᠰᠡᠳᠭᠢᠯᠢ ᠬᠥᠳᠡᠯᠭᠡᠮᠡ ᠠᠤᠭᠠ ᠬᠦᠴᠦᠨᠲᠡᠢ ᠡᠭᠡᠯ ᠪᠤᠰᠤ ᠨᠠᠨᠳᠢᠨ ᠦᠢᠯᠡᠰᠢ ᠪᠦᠲᠦᠭᠡᠪᠡ᠃ ᠪᠢᠳᠡ ᠴᠡᠴᠡᠭᠦᠨᠢᠶᠡᠨ ᠦᠷᠡᠭᠳᠡᠭᠰᠡᠨᠳᠦ ᠡᠮᠭᠡᠨᠢᠨ ᠭᠠᠰᠢᠭᠤᠳᠠᠨᠠ᠃
ᠭᠡᠪᠡᠴᠦ ᠪᠢᠳᠡ ᠡᠢᠮᠦ ᠪᠠᠭᠠᠲᠤᠷ ᠥᠬᠢᠨᠲᠡᠢ ᠪᠠᠢᠭᠰᠠᠨᠳᠠᠭᠠᠨ ᠣᠮᠤᠭᠰᠢᠨᠠ᠃
ᠣᠳᠣ ᠴᠡᠴᠡᠭᠦᠨ ᠬᠠᠮᠤᠭᠤᠨ ᠡᠴᠦᠰᠦᠨ ᠦᠨᠦᠰᠴᠦ ᠥᠩᠭᠡᠷᠡᠭᠰᠡᠨ᠂ ᠬᠥᠯᠦᠰᠦᠪᠡᠨ ᠳᠤᠰᠤᠯᠠᠭᠤᠯᠤᠭᠰᠠᠨ ᠲᠡᠷᠡ ᠬᠡᠰᠡᠭ ᠭᠠᠵᠠᠷ ᠳᠡᠭᠡᠷᠡ ᠨᠢᠭᠡ ᠪᠤᠲᠠ ᠴᠠᠬᠢᠷᠮᠠ ᠴᠡᠴᠡᠭ ᠰᠢᠨᠡ ᠬᠠᠪᠤᠷᠢ ᠤᠭᠲᠤᠨ ᠮᠢᠷᠠᠯᠵᠠᠨ ᠳᠡᠯᠭᠡᠷᠡᠭᠡᠳ ᠪᠠᠢᠨᠠ᠃