| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠪᠠᠲᠤᠥ᠌ᠯᠵᠡᠢ ᠡᠨᠡ ᠥᠷᠯᠦᠭᠡ᠂ ᠨᠠᠷᠠ ᠪᠢᠲᠡᠭᠦᠦ ᠪᠣᠰᠤᠭᠠᠳ᠂ ᠲᠠᠪᠰᠠᠭᠠᠴᠠᠪᠠᠨ ᠬᠥᠬᠡ ᠴᠢᠰᠴᠡᠦ ᠲᠡᠷᠯᠢᠭ ᠭᠠᠷᠭᠠᠨ ᠡᠮᠦᠰᠴᠦ᠂ ᠰᠢᠷᠭᠠᠯ ᠳᠤᠷᠳᠤᠩ ᠪᠦᠰᠡᠪᠡᠨ ᠴᠢᠪᠬᠢᠲᠡᠯᠡ ᠪᠦᠰᠡᠯᠡᠵᠦ᠂ ᠨᠠᠷᠢᠨ ᠬᠢᠴᠡᠲᠡᠢ ᠨᠢᠮᠪᠠᠢ ᠬᠠᠳᠠᠭᠠᠯᠠᠭᠰᠠᠨ ᠲᠣᠯᠢ ᠭᠠᠷᠭᠠᠵᠤ ᠲᠣᠯᠢᠳᠠᠪᠠ᠃ ᠲᠡᠭᠡᠭᠡᠳ ᠡᠨᠡ ᠬᠡᠳᠦᠨ ᠰᠠᠷᠠ ᠨᠢᠭᠤᠷ ᠴᠢᠷᠠᠢᠶᠢᠨᠢᠶᠠᠨ ᠴᠣᠩᠬᠢᠢᠭᠰᠠᠨᠢ ᠦᠵᠡᠭᠡᠳ 《ᠡᠷᠳᠡᠮᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠬᠦᠨᠢ ᠡᠮᠨᠢᠭᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠬᠦᠡᠴᠡ ᠬᠣᠯᠠ ᠴᠠᠰᠢ ᠳ᠋ᠠ 》 ᠭᠡᠵᠦ ᠪᠣᠳᠤᠭᠠᠳ ᠬᠡᠦᠬᠡᠨ ᠬᠥᠮᠦᠨᠰᠢᠭ ᠵᠢᠰᠦᠪᠡᠨ ᠨᠢᠮᠪᠠᠢᠬᠠᠨ ᠦᠵᠡᠭᠡᠳ᠂ ᠲᠣᠯᠢᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠤ᠂ ᠵᠠᠢᠯᠠᠰᠬᠢᠨ ᠪᠦᠬᠦ ᠪᠡᠶᠡᠪᠡᠨ ᠦᠵᠡᠭᠰᠡᠨᠳᠦ ᠳᠡᠪᠡᠯ ᠪᠦᠰᠡᠨᠦᠪᠡᠨ ᠵᠢᠪᠬᠤᠭᠠᠳᠤ ᠥᠨᠳᠦᠷ ᠳᠡᠩᠬᠡᠭᠡᠷ ᠪᠡᠶᠡ᠂ ᠥᠷᠭᠡᠨ ᠬᠠᠩᠬᠠᠭᠠᠷ ᠮᠥᠷᠦ᠂ ᠲᠡᠨᠢᠭᠦᠨ ᠴᠡᠭᠡᠵᠢ᠂ ᠭᠤᠨᠠᠭᠠᠷ ᠭᠤᠸᠠᠯᠢᠭ ᠨᠢᠷᠤᠭᠤᠨᠢ ᠤᠯᠠᠮ ᠰᠦᠷ ᠰᠦᠯᠳᠡᠲᠡᠢ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠬᠤᠳᠤ ᠵᠤᠤᠮᠠᠰᠬᠢᠨ ᠢᠨᠢᠶᠡᠵᠦ 《ᠨᠠᠰᠤᠲᠠᠢ ᠬᠥᠮᠦᠨᠦ ᠦᠭᠡ ᠵᠥᠪᠴᠦᠶᠦᠮᠦᠦ ᠳ᠋ᠠ ! 〈ᠡᠷᠡ ᠬᠥᠮᠦᠨ ᠪᠦᠰᠡᠪᠡᠨ ᠪᠦᠰᠡᠯᠡᠪᠡᠯ ᠬᠡᠢ ᠮᠣᠷᠢ ᠰᠡᠷᠭᠦᠨᠡ〉 ᠭᠡᠳᠡᠭᠨᠢ》 ᠭᠡᠵᠦ ᠡᠪᠦᠭᠡ ᠠᠪᠤᠶᠢᠨᠢᠶᠠᠨ ᠦᠷᠭᠦᠯᠵᠢ ᠶᠠᠷᠢᠳᠠᠭ ᠦᠭᠡ - ᠥᠨᠦᠬᠡᠨ ᠪᠠᠰᠠ ᠵᠠᠬᠢᠳᠠᠯᠳᠠᠭᠠᠨ: ᠠᠰᠫᠢᠷᠠᠨᠲᠢᠶᠠᠷ ᠰᠢᠯᠭᠠᠭᠤᠯᠬᠤᠳᠠᠭᠠᠨ ᠶᠠᠭᠠᠬᠢᠭᠰᠠᠨᠴᠤ ᠳᠡᠪᠡᠯᠢᠶᠡᠨ ᠡᠮᠦᠰᠴᠦ ᠪᠦᠰᠡᠪᠡᠨ ᠪᠦᠰᠡᠯᠡᠭᠡᠷᠡᠢ! ᠭᠡᠵᠦ ᠵᠠᠬᠢᠭᠰᠠᠨᠨᠢ ᠪᠣᠳᠤᠭᠳᠠᠪᠠ᠃ ᠲᠡᠭᠡᠭᠡᠳ ᠡᠨᠡᠴᠦ ᠮᠥᠨ ᠦᠨᠳᠦᠰᠦᠲᠡᠨᠦ ᠳᠠᠳᠭᠠᠯ᠂ ᠦᠵᠡᠯ ᠰᠠᠨᠠᠭᠠᠨᠤ ᠦᠢᠯᠡᠳᠦᠯ ᠰᠢᠦ ᠳ᠋ᠠ᠂ ᠵᠠ ᠶᠠᠭᠠᠬᠢᠬᠤ ᠪᠤᠢ᠂ ᠨᠠᠰᠤᠲᠠᠢ ᠬᠥᠮᠦᠨᠦ ᠵᠠᠬᠢᠶᠠᠪᠠᠷ ᠶᠠᠪᠤᠵᠤ ᠪᠠᠢᠶᠠ! ᠭᠡᠵᠦ ᠭᠠᠭᠴᠠᠭᠠᠷ ᠰᠢᠪᠡᠨᠡᠬᠦᠳᠦ ᠶᠡᠬᠡ ᠰᠤᠷᠭᠠᠭᠤᠯᠢᠪᠠᠨ ᠰᠢᠯᠢᠳᠡᠭ ᠪᠦᠲᠦᠮᠵᠢᠲᠡᠢ ᠲᠡᠭᠦᠰᠦᠮᠡᠭᠴᠡᠪᠡᠨ ᠡᠨᠡ ᠡᠳᠦᠷᠦᠨ ᠨᠠᠢ᠍ᠮᠠᠨ ᠴᠠᠭᠠᠴᠠ ᠠᠰᠫᠢᠷᠠᠨᠲᠤᠨ ᠰᠢᠯᠭᠠᠯᠲᠠᠳᠤ ᠣᠷᠤᠬᠤ ᠭᠡᠵᠦ ᠪᠠᠢᠭᠠ ᠪᠠᠲᠤᠥ᠌ᠯᠵᠡᠢᠶᠢᠨ ᠰᠡᠳᠭᠢᠯᠦᠨ ᠭᠦᠨᠳᠦ ᠬᠠᠭᠠᠰ ᠵᠢᠯ ᠢᠯᠡᠭᠦᠦ ᠤᠴᠠᠷᠠᠭᠠᠦᠭᠡᠢ ᠬᠠᠢᠷᠠᠲᠤ ᠪᠤᠭᠤᠷᠤᠯ ᠡᠪᠦᠭᠡ ᠠᠪᠤ᠂ ᠡᠮᠡᠭᠡ ᠡᠵᠢᠨᠢ ᠮᠥᠷᠦᠭᠡᠳᠦᠭᠳᠡᠵᠦ ᠳᠤᠷᠠᠰᠤᠨ ᠰᠠᠨᠠᠬᠤ ᠤᠢᠯ ᠪᠣᠰᠪᠠ᠃ ᠴᠣᠬᠤᠮ ᠬᠡᠯᠡᠪᠡᠯ᠂ ᠬᠣᠶᠠᠷ ᠴᠠᠭᠤᠨ ᠳᠠᠷᠠᠭᠠ ᠠᠰᠫᠢᠷᠠᠨᠲᠢᠶᠠᠷ ᠰᠢᠯᠭᠠᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠰᠲᠦ ᠰᠢᠯᠭᠠᠭᠤᠯᠬᠤ ᠵᠦᠢᠯᠢᠶᠡᠨ ᠪᠣᠳᠤᠯᠲᠠᠢᠠᠴᠠ ᠪᠢᠰᠢ ᠥᠭᠡᠷᠡ ᠤᠴᠢᠷᠢ ᠪᠣᠳᠤᠬᠤᠨᠢ ᠳᠠᠩᠴᠢ ᠵᠣᠬᠢᠮᠵᠢᠦᠭᠡᠢᠶᠤᠮ᠃ ᠭᠡᠪᠡᠴᠦ ᠬᠥᠮᠦᠨᠳᠦᠴᠢᠨᠢ ᠡᠯᠳᠡᠪᠦᠨ ᠴᠠᠭᠲᠤ ᠡᠯᠳᠡᠪᠦᠨ ᠤᠴᠢᠷ ᠪᠣᠳᠤᠭᠳᠠᠳᠠᠭᠯᠠᠶᠤᠮ ᠪᠠᠢᠨᠠ᠃ ᠪᠠᠲᠤᠥ᠌ᠯᠵᠡᠢ᠂ ᠮᠣᠩᠭᠤᠯ ᠬᠥᠮᠦᠨᠦ ᠪᠦᠰᠡ ᠪᠦᠰᠡᠯᠡᠬᠦᠶᠢ ᠲᠤᠩᠴᠤ ᠬᠦᠨᠳᠦᠳᠭᠡᠨ ᠡᠷᠬᠢᠮᠯᠡᠵᠦ᠂ ᠰᠦᠯᠳᠡ ᠬᠡᠢ ᠮᠣᠷᠢᠲᠠᠢᠪᠠᠨ ᠵᠡᠷᠭᠡᠴᠡᠭᠦᠯᠦᠨ ᠦᠵᠡᠳᠡᠭ ᠡᠪᠦᠭᠡ ᠠᠪᠤᠪᠠᠨ ᠪᠣᠳᠤᠬᠤᠳᠤ ᠨᠢᠭᠡᠨ ᠶᠠᠪᠤᠳᠠᠯ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠰᠠᠨᠠᠭᠳᠠᠪᠠ:
ᠡᠪᠦᠭᠡ ᠠᠪᠤᠨᠢ ᠨᠢᠭᠡ ᠤᠳᠠᠭᠠ ᠬᠠᠯᠠᠭᠤᠨ ᠲᠠᠬᠤᠯᠳᠤ ᠨᠡᠷᠪᠡᠭᠳᠡᠭᠡᠳ ᠶᠠᠭᠠᠬᠢᠬᠤᠶᠢᠨ ᠠᠷᠭᠠᠦᠭᠡᠢ ᠬᠡᠪᠲᠡᠷᠢᠳᠦ ᠣᠷᠤᠭᠰᠠᠨᠴᠤ ᠵᠠᠪᠠᠯ ᠥᠨᠳᠡᠢᠨ ᠪᠣᠰᠴᠤ᠂ ᠰᠠᠭᠤᠭᠠᠪᠠᠷᠢᠶᠠᠨᠴᠤ ᠭᠡᠰᠡᠨ ᠳᠡᠪᠡᠯᠢᠶᠡᠨ ᠰᠤᠭᠤᠯᠠᠭᠠᠳ ᠪᠦᠰᠡᠪᠡᠨ ᠪᠦᠰᠡᠯᠡᠵᠦ ᠪᠦᠬᠦᠯᠢᠪᠡᠷ ᠬᠡᠪᠲᠡᠬᠦᠡᠴᠡ ᠪᠢᠰᠢ᠂ ᠶᠠᠭᠠᠬᠢᠭᠰᠠᠨᠴᠤ ᠨᠥᠮᠦᠭᠡᠨ ᠬᠡᠪᠲᠡᠳᠡᠭᠦᠭᠡᠢ ᠪᠠᠢᠵᠠᠢ᠃ ᠪᠠᠲᠤᠥ᠌ᠯᠵᠡᠢ ᠭᠠᠭᠴᠠᠭᠠᠷᠢᠶᠠᠨ ᠢᠨᠢᠶᠡᠮᠰᠦᠭᠯᠡᠵᠦ 《ᠮᠢᠨᠦ ᠡᠪᠦᠭᠡ ᠠᠪᠤ ᠭᠡᠵᠦ ᠡᠢᠮᠦᠯᠡ ᠴᠢᠩᠭᠠ ᠰᠤᠷᠲᠠᠯᠲᠠᠢ ᠬᠥᠮᠦᠨᠶᠦᠮ ᠳ᠋ᠠᠭ᠃ ᠨᠠᠮᠠᠢ ᠬᠥᠮᠦᠵᠢᠭᠦᠯᠵᠦ᠂ ᠬᠥᠯᠢᠮᠢᠨᠢ ᠳᠥᠷᠦᠭᠡᠨᠳᠦ᠂ ᠭᠠᠷᠢᠮᠢᠨᠢ ᠭᠠᠨᠵᠤᠭᠠᠨᠳᠤ ᠬᠦᠷᠭᠡᠭᠰᠡᠨᠢᠶᠡᠷ ᠪᠠᠷᠠᠬᠤᠦᠭᠡᠢ ᠡᠷᠳᠡᠮᠦᠨ ᠶᠡᠬᠡ ᠰᠦᠷᠦᠭᠲᠦ ᠪᠠᠷᠢᠬᠤ ᠤᠷᠭᠠᠶᠢᠮᠢᠨᠢᠴᠤ ᠵᠠᠰᠠᠵᠤ ᠵᠠᠯᠠᠵᠤ ᠥᠭᠭᠦᠭᠰᠡᠨ ᠪᠢᠯᠡ》 ᠭᠡᠵᠦ ᠪᠣᠳᠤᠬᠤᠳᠤ ᠡᠮᠦᠰᠦᠭᠰᠡᠨ ᠳᠡᠪᠡᠯ᠂ ᠡᠮᠦᠨᠡ ᠪᠠᠢᠭᠠ ᠲᠣᠯᠢᠠᠴᠠ ᠡᠬᠢᠯᠡᠨ ᠥᠩᠭᠡᠷᠡᠭᠰᠡᠨ ᠬᠡᠷᠡᠭᠦᠳ ᠦᠵᠡᠭᠳᠡᠵᠦ ᠪᠠᠢᠬᠤᠰᠢᠭ᠋ ᠪᠣᠯᠪᠠ᠃
ᠪᠠᠲᠤᠥ᠌ᠯᠵᠡᠢ ᠪᠣᠯ ᠠᠢᠮᠠᠭᠤᠨ ᠵᠠᠬᠢᠷᠭᠠᠳᠤ ᠠᠵᠢᠯᠯᠠᠳᠠᠭ ᠡᠴᠢᠭᠡᠪᠡᠨ ᠳᠠᠭᠠᠵᠤ ᠬᠣᠲᠠᠳᠤ ᠰᠠᠭᠤᠵᠤ ᠪᠢᠴᠢᠭ ᠦᠵᠡᠵᠦ ᠪᠠᠢᠵᠠᠢ᠃ ᠠᠷᠪᠠᠨ ᠵᠢᠯᠦᠨ ᠴᠥᠪᠦᠨ ᠳᠤᠮᠳᠠ ᠬᠢᠯᠢᠰ ᠬᠡᠷᠡᠭᠲᠦ ᠡᠴᠢᠭᠡ ᠡᠬᠡᠪᠡᠨ ᠠᠯᠳᠠᠭᠠᠳ ᠣᠷᠤᠨ ᠭᠡᠷᠦᠭᠡᠢ ᠵᠡᠭᠡᠯᠢ ᠳᠡᠭᠡᠷᠡ ᠲᠡᠨᠦᠵᠦ ᠪᠠᠢᠲᠠᠯᠠ ᠡᠪᠦᠭᠡ ᠠᠪᠤᠨᠢ ᠬᠡᠳᠦᠨ ᠡᠳᠦᠷ ᠲᠤᠵᠢ ᠡᠷᠢᠵᠦ ᠪᠠᠢᠭᠠᠳ ᠣᠯᠵᠤ ᠠᠪᠴᠠᠢ᠃ ᠲᠡᠭᠡᠭᠡᠳ ᠡᠪᠦᠭᠡ ᠠᠪᠤᠨᠢ ᠤᠴᠠᠷᠠᠮᠠᠭᠴᠠᠪᠠᠨ ᠮᠠᠩᠨᠠᠢ ᠳᠡᠭᠡᠷᠡᠨᠢ ᠬᠡᠳᠦ ᠲᠠᠭᠠᠯᠠᠭᠠᠳ ᠳᠣᠭᠤᠯᠠᠩ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠨ᠂ ᠬᠦᠷᠡᠯ ᠴᠢᠷᠠᠢᠯᠠᠨ ᠬᠥᠮᠦᠬᠡᠢ ᠵᠠᠭᠤᠭᠠᠳ:
《ᠵᠠ ᠶᠠᠪᠤᠶᠠ! ᠬᠦᠦᠮᠢᠨᠢ》 ᠭᠡᠳ ᠲᠡᠷᠭᠡᠨ ᠥᠷᠲᠡᠭᠡ ᠤᠷᠤᠭᠤ ᠬᠥᠲᠦᠯᠦᠨ ᠠᠯᠬᠤᠬᠤᠳᠤ ᠠᠷᠪᠠᠨ ᠭᠤᠷᠪᠠᠲᠠᠢ ᠪᠠᠲᠤᠥ᠌ᠯᠵᠡᠢ᠂ ᠡᠪᠦᠭᠡᠶᠢᠨᠢᠶᠡᠨ ᠰᠠᠨᠠᠭᠠᠶᠢ ᠮᠡᠳᠡᠭᠡᠳ:
《ᠡᠪᠦᠭᠡ ᠠᠪᠤ ᠡ᠂ ᠮᠠᠨᠤ ᠭᠡᠷᠦᠨ ᠭᠠᠳᠠᠭᠠ ᠬᠠᠶᠠᠭᠠᠲᠠᠢ ᠰᠢᠤ!》 ᠭᠡᠳ ᠣᠳᠣ ᠢᠩᠭᠢᠭᠡᠳ ᠶᠠᠪᠤᠴᠢᠬᠠᠪᠠᠯ ᠲᠡᠭᠦᠨᠢ ᠶᠠᠭᠠᠬᠢᠯᠲᠠᠢ ᠪᠤᠢ? ᠭᠡᠰᠡᠨ ᠮᠠᠶᠢᠭᠲᠠᠢ ᠡᠪᠦᠭᠡ ᠠᠪᠤᠪᠠᠨ ᠴᠢᠷᠠᠢᠳᠠᠬᠤᠳᠤ ᠡᠪᠦᠭᠡ ᠠᠪᠤᠨᠢ ᠠᠯᠤᠰᠢ ᠬᠠᠷᠠᠨ ᠠᠯᠬᠤᠵᠤ ᠪᠠᠢᠭᠰᠠᠨ ᠴᠢᠭᠢᠶᠡᠷᠢᠶᠡᠨ:
《ᠠᠯᠲᠠᠪᠠᠨ ᠠᠯᠳᠠᠭᠰᠠᠨ ᠬᠥᠮᠦᠨᠳᠦ ᠠᠪᠳᠠᠷᠠᠨᠢ ᠶᠠᠮᠠᠷ ᠬᠡᠷᠡᠭ ᠪᠠᠢᠨᠠ ᠪᠤᠢ!》 ᠭᠡᠵᠦ ᠬᠡᠯᠡᠭᠡᠳ ᠪᠠᠲᠤᠥ᠌ᠯᠵᠡᠢᠶᠢ ᠡᠷᠭᠢᠨ ᠬᠠᠷᠠᠵᠤ: 《ᠭᠡᠪᠡᠴᠦ ᠦᠷᠡᠨᠢ ᠪᠣᠯᠤᠭᠰᠠᠨ ᠴᠢᠮᠠᠳᠤ ᠡᠭᠦᠷᠢᠳᠡᠶᠢᠨ ᠳᠤᠷᠠᠰᠭᠠᠯ ᠪᠣᠯᠭᠠᠬᠤᠶᠢᠨ ᠲᠤᠰᠠᠳᠤ ᠡᠴᠢᠭᠡᠶᠢᠨᠴᠢᠨᠢ ᠳᠡᠪᠡᠯ ᠪᠦᠰᠡ᠂ ᠡᠬᠡᠶᠢᠨᠴᠢᠨᠢ ᠨᠢᠭᠤᠷᠤᠨ ᠲᠣᠯᠢᠶᠢ ᠠᠪᠤᠭᠰᠠᠨ》 ᠭᠡᠵᠡᠢ᠃
ᠪᠠᠲᠤᠥ᠌ᠯᠵᠡᠢᠶᠢ ᠡᠪᠦᠭᠡᠶᠢᠨᠳᠡᠭᠡᠨ ᠢᠷᠡᠭᠰᠡᠨᠦ ᠳᠠᠷᠠᠭᠠ ᠵᠢᠯᠨᠢ ᠬᠣᠰᠢᠭᠤᠨᠤ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢᠨ ᠬᠢᠴᠢᠶᠡᠯ ᠰᠡᠷᠭᠦᠭᠰᠡᠨᠳᠦ ᠡᠪᠦᠭᠡ ᠠᠪᠤᠨᠢ ᠰᠤᠷᠭᠠᠭᠤᠯᠢᠲᠠᠢᠨᠢ ᠬᠡᠯᠡᠯᠴᠡᠵᠦ ᠲᠣᠬᠢᠷᠠᠭᠠᠳ ᠬᠦᠦᠪᠡᠨ ᠬᠦᠷᠭᠡᠵᠦ ᠥᠭᠬᠦᠳᠡᠭᠡᠨ:
《ᠮᠠᠯᠴᠢᠨ ᠬᠥᠮᠦᠨ ᠵᠤᠳᠲᠠᠢ ᠲᠡᠮᠡᠴᠡᠬᠦᠳᠡᠭᠡᠨ ᠴᠠᠰᠤ ᠰᠢᠭᠤᠷᠭᠠᠨᠢ ᠴᠢᠯᠦᠭᠡᠳᠡᠵᠦ ᠮᠠᠯᠢᠶᠠᠨ ᠭᠡᠳᠡᠰᠦᠯᠡᠭᠦᠯᠵᠦ ᠵᠠᠪᠳᠤᠳᠠᠭᠶᠤᠮ᠃ ᠲᠡᠭᠦᠨᠲᠡᠢ ᠠᠳᠠᠯᠢᠪᠠᠷ ᠡᠷᠳᠡᠮᠢ ᠰᠤᠷᠬᠤᠳᠤ ᠡᠳᠦᠭᠡ ᠪᠠᠰᠠ ᠴᠢᠯᠦᠭᠡᠳᠡᠬᠦ ᠬᠡᠷᠡᠭᠲᠡᠢ᠃ ᠠᠪᠤᠶᠢᠨᠴᠢᠨᠢ ᠨᠢᠭᠡ ᠰᠠᠢᠨ ᠨᠠᠢᠵᠠᠶᠢᠨ ᠬᠦᠴᠦᠪᠡᠷ ᠴᠢᠮᠠᠢ ᠡᠨᠡ ᠰᠤᠷᠭᠠᠭᠤᠯᠢᠳᠤ ᠣᠷᠤᠭᠤᠯᠪᠠ᠃ ᠶᠠᠭᠠᠬᠢᠬᠤᠪ᠂ ᠵᠢᠭᠠᠬᠠᠨ ᠶᠠᠭᠤᠮᠠ ᠰᠤᠷᠴᠤ ᠪᠠᠢᠪᠠᠯ ᠪᠣᠯᠬᠤᠨᠢ ᠲᠡᠷᠡ》 ᠭᠡᠵᠦ ᠬᠡᠯᠡᠵᠡᠢ᠃ ᠤᠤᠯᠨᠢ ᠪᠠᠲᠤᠥ᠌ᠯᠵᠡᠢᠶᠢᠨ ᠡᠪᠦᠭᠡᠶᠢ ᠰᠤᠷᠭᠠᠭᠤᠯᠢᠲᠠᠢᠨᠢ ᠬᠡᠯᠡᠯᠴᠡᠬᠦᠳᠦ ᠰᠤᠷᠭᠠᠭᠤᠯᠢᠶᠢᠨ ᠲᠠᠯᠠᠠᠴᠠ ᠠᠷᠪᠢᠨ ᠶᠣᠰᠤ᠂ ᠣᠨᠤᠯ ᠶᠠᠷᠢᠵᠤ᠂ ᠡᠢᠮᠦ ᠬᠡᠦᠬᠡᠳᠢ ᠪᠣᠯ 《ᠤᠬᠠᠮᠰᠠᠷᠨᠢ ᠦᠵᠡᠨᠡ᠂ ᠡᠴᠢᠭᠡ ᠡᠬᠡᠲᠡᠢᠪᠡᠨ ᠦᠨᠡᠩᠬᠦ ᠵᠠᠭᠠᠭᠢᠶᠠᠨ ᠢᠯᠭᠠᠭᠰᠠᠨ ᠪᠠᠢᠬᠤ ᠬᠡᠷᠡᠭᠲᠡᠢ》 ᠭᠡᠰᠡᠨ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠪᠠᠲᠤᠥ᠌ᠯᠵᠡᠢ᠂ ᠬᠣᠶᠠᠷ ᠰᠠᠷᠠᠶᠢᠨᠢ ᠪᠢᠴᠢᠭ ᠦᠵᠡᠪᠡᠯ᠂ ᠬᠣᠶᠠᠷ ᠰᠠᠷᠠᠶᠢᠨᠢ ᠪᠠᠷᠤᠭ ᠬᠥᠳᠡᠯᠮᠦᠷᠢᠳᠦ ᠣᠷᠤᠯᠴᠠᠨ᠂ ᠨᠠᠰᠢ ᠴᠠᠰᠢ ᠭᠦᠶᠦᠵᠦ ᠳᠥᠩᠭᠡᠨ ᠳᠠᠩᠭᠠᠨ ᠳᠥᠷᠪᠡᠨ ᠵᠢᠯ ᠪᠢᠴᠢᠭ ᠦᠵᠡᠭᠰᠡᠨ ᠨᠡᠷᠡᠲᠡᠢ᠂ ᠠᠩᠬᠠ ᠵᠡᠷᠭᠡᠶᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢ ᠲᠡᠭᠦᠰᠭᠡᠵᠡᠢ᠃ ᠲᠡᠭᠡᠭᠡᠳ ᠥᠨᠥᠬᠢ 《ᠳᠠᠬᠢᠨ ᠬᠥᠮᠦᠵᠢᠯ》ᠢ ᠬᠦᠯᠢᠶᠡᠬᠦᠪᠡᠷ ᠨᠤᠲᠤᠭᠲᠠᠭᠠᠨ ᠪᠤᠴᠠᠵᠤ ᠠᠵᠢᠯ ᠬᠥᠳᠡᠯᠮᠦᠷᠢᠳᠦ ᠣᠷᠤᠯᠴᠠᠪᠠ᠃
ᠪᠠᠲᠤᠥ᠌ᠯᠵᠡᠢᠶᠢᠨ ᠡᠪᠦᠭᠡᠶᠢᠨ ᠨᠡᠷᠡ ᠪᠤᠶᠠᠨ ᠭᠡᠳᠡᠭ᠃ ᠪᠤᠶᠠᠨ ᠵᠠᠯᠠᠭᠤᠳᠠᠭᠠᠨ ᠠᠳᠤᠭᠤ ᠮᠠᠯᠲᠠᠢ ᠨᠣᠴᠤᠯᠳᠤᠵᠤ᠂ ᠠᠷᠳᠠᠭ ᠳᠣᠭᠰᠢᠨᠢ ᠰᠤᠷᠭᠠᠵᠤ ᠶᠠᠪᠤᠬᠤᠳᠠᠭᠠᠨ ᠠᠢᠯ ᠠᠢᠮᠠᠭᠲᠠᠭᠠᠨ ᠰᠠᠢᠰᠢᠶᠠᠭᠳᠠᠵᠤ᠂ 《ᠰᠠᠢᠨ ᠡᠷᠡ ᠨᠤᠲᠤᠭᠤᠨ ᠴᠢᠮᠡᠭ》 ᠭᠡᠳᠡᠭ ᠤᠯᠠᠮᠵᠢᠯᠠᠯᠲᠤ ᠰᠠᠢᠬᠠᠨ ᠴᠣᠯᠠ ᠬᠦᠷᠲᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨᠶᠦᠮ ᠭᠡᠨᠡ᠃ ᠲᠡᠢᠮᠦᠡᠴᠡ ᠪᠠᠲᠤᠥ᠌ᠯᠵᠡᠢᠶᠢ ᠬᠣᠵᠢᠮ ᠯᠠᠪ ᠡᠪᠦᠭᠡ ᠡᠴᠢᠭᠡᠲᠡᠢᠪᠡᠨ ᠠᠳᠠᠯᠢ ᠰᠠᠢᠨ ᠠᠳᠤᠭᠤᠴᠢᠨ ᠪᠣᠯᠬᠤ ᠪᠤᠢ ᠭᠡᠵᠦ ᠪᠠᠷᠢᠭᠠᠳᠠᠠᠴᠠᠨᠢ ᠠᠳᠤᠭᠤ ᠬᠠᠷᠢᠭᠤᠯᠤᠭᠤᠯᠬᠤᠪᠠᠷ ᠲᠣᠭᠲᠠᠵᠠᠢ᠃
ᠪᠠᠲᠤᠥ᠌ᠯᠵᠡᠢ ᠠᠳᠤᠭᠤ ᠬᠠᠷᠢᠭᠤᠯᠤᠯᠠ᠃ ᠪᠠᠲᠤᠥ᠌ᠯᠵᠡᠢᠶᠢ ᠠᠳᠤᠭᠤᠨᠳᠤ ᠠᠩᠬᠠ ᠮᠣᠷᠳᠠᠬᠤᠳᠤ ᠡᠪᠦᠭᠡ ᠠᠪᠤᠨᠢ ᠨᠢᠭᠡ ᠰᠠᠢᠬᠠᠨ ᠬᠤᠰᠤᠨ ᠤᠷᠭᠠ ᠵᠠᠰᠠᠵᠤ ᠪᠠᠷᠢᠭᠤᠯᠤᠭᠠᠳ:
《ᠵᠠ ᠬᠦᠦᠮᠢᠨᠢ᠂ ᠠᠯᠢᠴᠤ ᠠᠵᠢᠯᠳᠤ ᠡᠵᠡᠮᠰᠢᠪᠡᠯ ᠵᠣᠬᠢᠬᠤ ᠡᠷᠳᠡᠮ ᠪᠠᠢᠬᠤᠶᠤᠮ᠃ ᠡᠨᠡ ᠤᠷᠭᠠᠶᠢ ᠪᠠᠷᠢᠵᠤ ᠠᠳᠤᠭᠤ ᠬᠠᠷᠢᠭᠤᠯᠬᠤᠶᠢ ᠰᠤᠷᠤᠭᠠᠷᠠᠢ》 ᠭᠡᠵᠦ ᠵᠠᠬᠢᠵᠠᠢ᠃
ᠪᠠᠲᠤᠥ᠌ᠯᠵᠡᠢ ᠪᠣᠯ ᠬᠣᠲᠠᠳᠤ ᠥᠰᠦᠭᠰᠡᠨ ᠬᠡᠦᠬᠡᠳ ᠪᠣᠯᠬᠣᠷ ᠮᠣᠷᠢ ᠤᠨᠤᠭᠠᠨᠳᠤ ᠪᠠᠷᠤᠭᠲᠠᠢ ᠲᠤᠯᠠ ᠠᠳᠤᠭᠤ ᠬᠠᠷᠢᠭᠤᠯᠬᠤᠳᠤ ᠲᠤᠩ ᠶᠡᠬᠡ ᠪᠦᠯᠢᠳᠴᠦ ᠪᠠᠢᠪᠠ᠃ ᠨᠢᠭᠡ ᠡᠳᠦᠷ ᠤᠨᠤᠭᠰᠠᠨ ᠮᠣᠷᠢᠪᠠᠨ ᠶᠡᠭᠦᠯᠡᠬᠦ ᠭᠡᠳ ᠤᠷᠭᠠᠪᠠᠨ ᠠᠯᠳᠠᠵᠤ᠂ ᠮᠣᠷᠢᠨᠠᠴᠠᠪᠠᠨ ᠬᠠᠶᠠᠭᠳᠠᠭᠠᠳ᠂ ᠭᠡᠷᠲᠡᠭᠡᠨ ᠤᠬᠢᠯᠠᠭᠰᠠᠭᠠᠷ ᠭᠦᠶᠦᠵᠦ ᠢᠷᠡᠭᠡᠳ ᠥᠯᠪᠡᠷᠴᠦ ᠦᠬᠦᠭᠰᠡᠨᠴᠦ ᠠᠳᠤᠭᠤ ᠬᠠᠷᠢᠭᠤᠯᠬᠤᠦᠭᠡᠢ ᠭᠡᠵᠦ ᠠᠭᠤᠷᠯᠠᠵᠠᠢ᠃
ᠠᠴᠢᠶᠢᠨᠢᠶᠠᠨ ᠠᠭᠤᠷ ᠪᠤᠬᠢᠨᠢᠳᠤᠯᠢ ᠨᠠᠮᠳᠠᠭᠰᠠᠨ ᠬᠣᠢᠨᠠ ᠡᠪᠦᠭᠡ ᠠᠪᠤᠨᠢ ᠤᠷᠭᠠ ᠠᠯᠳᠠᠵᠤ ᠵᠣᠷᠢᠭ ᠮᠣᠬᠤᠭᠰᠠᠨᠳᠤᠨᠢ ᠨᠡᠯᠢᠶᠡᠳ ᠠᠭᠤᠷᠲᠠᠢ ᠪᠠᠢᠭᠰᠠᠨᠴᠤ ᠬᠠᠷᠢᠨ ᠡᠶᠡᠯᠰᠡᠭᠢᠶᠡᠷ:
《ᠠᠳᠤᠭᠤ ᠬᠠᠷᠢᠭᠤᠯᠬᠤ ᠪᠣᠯ ᠦᠨᠡᠨᠳᠡᠭᠡᠨ ᠡᠷᠡ ᠲᠡᠩᠴᠡᠪᠡᠯ ᠰᠠᠢᠬᠠᠨ ᠠᠵᠢᠯᠶᠤᠮ᠂ ᠴᠢᠮᠠᠳᠤ ᠡᠢᠮᠦ ᠨᠥᠬᠦᠴᠡᠯ ᠪᠠᠢᠨᠠ᠂ ᠴᠢ ᠵᠣᠷᠢᠭᠯᠠᠪᠠᠯ ᠪᠦᠲᠦᠨᠡ᠃ ᠲᠡᠭᠡᠬᠦᠦᠭᠡᠢ ᠪᠣᠯ ᠡᠪᠦᠭᠡ ᠠᠪᠤᠨᠢ ᠶᠠᠭᠤᠨᠳᠤ ᠴᠢᠮᠠᠪᠠᠷ ᠡᠢᠮᠦ ᠠᠵᠢᠯ ᠬᠢᠯᠭᠡᠬᠦᠶᠦᠮ》 ᠭᠡᠳ ᠭᠠᠩᠰᠠᠷᠠᠲᠠᠯᠠ ᠰᠠᠨᠠᠭᠠ ᠠᠯᠳᠠᠵᠤ: 《ᠠᠵᠢᠯᠤᠨ ᠪᠡᠷᠬᠡᠡᠴᠡ ᠪᠢᠲᠡᠭᠡᠢ ᠠᠶᠤ᠃ ᠡᠨᠡ ᠬᠢᠷᠢ ᠪᠢᠳᠡᠨᠳᠦ ᠥᠭᠡᠷᠡ ᠵᠠᠮᠦᠭᠡᠢ ᠰᠢᠦ᠃ ᠳᠠᠬᠢᠭᠠᠳ ᠬᠡᠯᠡᠪᠡᠯ ᠡᠳᠦᠭᠡ ᠴᠢ ᠠᠵᠢᠯ ᠬᠢᠬᠦᠦᠭᠡᠢ ᠪᠣᠯ ᠡᠪᠦᠭᠡ ᠠᠪᠤ ᠡᠮᠡᠭᠡ ᠡᠵᠢ ᠪᠢᠳᠡ ᠬᠣᠶᠠᠷᠴᠢᠨᠢ ᠬᠡᠨᠢ ᠲᠦᠰᠢᠭᠯᠡᠬᠦ ᠪᠤᠢ?》 ᠭᠡᠪᠡ ᠁
ᠪᠠᠲᠤᠥ᠌ᠯᠵᠡᠢ ᠳᠠᠭᠤᠨᠦᠭᠡᠢ ᠪᠣᠰᠴᠤ᠂ ᠬᠣᠶᠠᠷ ᠨᠠᠰᠤᠲᠠᠨᠢᠶᠠᠷᠢᠶᠠᠨ ᠨᠢᠭᠡ ᠨᠢᠭᠡ ᠲᠠᠭᠠᠯᠠᠭᠤᠯᠤᠭᠠᠳ ᠳᠥᠷᠪᠡᠨ ᠬᠣᠷᠮᠤᠢᠪᠠᠨ ᠲᠠᠰᠤ ᠰᠢᠭᠤᠵᠤ᠂ ᠲᠠᠰᠢᠭᠤᠷᠢᠶᠠᠨ ᠪᠠᠷᠢᠭᠠᠳ᠂ ᠠᠳᠤᠭᠤᠨᠤᠪᠠᠨ ᠬᠣᠢᠨᠠᠠᠴᠠ ᠠᠯᠬᠤᠵᠠᠢ᠃ ᠲᠡᠭᠡᠬᠦᠳᠡᠭᠡᠨ ᠪᠡᠶᠡᠪᠡᠨ ᠦᠬᠡᠨᠴᠡ ᠳᠣᠷᠤᠢ᠂ ᠤᠬᠠᠭᠠᠨ ᠰᠡᠬᠡᠭᠡᠦᠭᠡᠢ ᠣᠯᠳᠤᠢ ᠠᠮᠢᠲᠠᠨ᠂ ᠬᠣᠶᠠᠷ ᠨᠠᠰᠤᠲᠠᠨᠢᠶᠠᠨ ᠰᠠᠢᠬᠠᠨ ᠠᠰᠠᠷᠠᠬᠤᠦᠭᠡᠢ ᠮᠥᠷᠲᠡᠭᠡᠨ ᠬᠠᠷᠢᠨ ᠰᠡᠳᠭᠢᠯᠢᠨᠢ ᠵᠣᠪᠠᠭᠠᠳᠠᠭᠨᠢ ᠶᠠᠭᠤ ᠭᠡᠭᠴᠢᠶᠢᠨ ᠲᠡᠨᠡᠭ ᠲᠣᠯᠤᠭᠠᠢ ᠪᠤᠢ! ᠭᠡᠵᠦ ᠪᠤᠷᠤᠭᠤᠰᠢᠶᠠᠵᠤ ᠪᠤᠬᠢᠨᠢᠳᠤᠵᠤ ᠶᠠᠪᠤᠬᠤᠳᠠᠭᠠᠨ ᠡᠳᠦᠷᠵᠢᠨ ᠶᠠᠪᠠᠭᠠᠨ ᠭᠦᠶᠦᠭᠡᠳᠴᠦ ᠭᠡᠰᠡᠨ ᠡᠨᠡ ᠮᠠᠭᠤ ᠲᠡᠨᠡᠭ ᠲᠣᠯᠤᠭᠠᠢᠶᠢ ᠳᠡᠭᠦᠵᠢᠯᠡᠭᠰᠡᠨ ᠪᠡᠶᠡᠪᠡᠨ ᠲᠤᠢᠯᠳᠠᠲᠠᠯᠠ ᠶᠠᠳᠠᠷᠠᠭᠠᠨ ᠶᠠᠯᠠᠳᠠᠯᠲᠠᠢ ᠰᠠᠨᠠᠭᠳᠠᠯᠠ᠃
ᠬᠣᠶᠠᠷ ᠵᠢᠯᠦᠨ ᠳᠠᠷᠠᠭᠠ ᠪᠠᠲᠤᠥ᠌ᠯᠵᠡᠢ ᠰᠢᠯᠭᠠᠷᠠᠭᠰᠠᠨ ᠭᠠᠷᠮᠠᠭᠠᠢ ᠠᠳᠤᠭᠤᠴᠢᠨ ᠪᠣᠯᠪᠠ᠃ ᠤᠨᠤᠨᠠᠤᠤ᠂ ᠤᠷᠭᠠᠯᠠᠨᠠᠤᠤ ᠠᠯᠢᠨᠢᠴᠤ ᠲᠡᠭᠰᠢ᠃ ᠠᠳᠤᠭᠤᠪᠠᠨ ᠬᠠᠪᠤᠷᠨᠢ ᠶᠠᠮᠠᠷ ᠪᠡᠯᠴᠢᠭᠡᠷᠲᠦ ᠭᠠᠷᠭᠠᠬᠤ᠂ ᠵᠤᠨᠨᠢ ᠶᠠᠮᠠᠷ ᠤᠰᠤᠨᠳᠤ ᠤᠰᠤᠯᠠᠵᠤ᠂ ᠨᠠᠮᠤᠷᠨᠢ ᠶᠠᠭᠠᠬᠢᠵᠤ ᠰᠠᠯᠬᠢ ᠵᠦᠭᠢᠨᠢ ᠲᠠᠭᠠᠷᠠᠭᠤᠯᠬᠤ᠂ ᠡᠪᠦᠯᠨᠢ ᠶᠠᠮᠠᠷ ᠭᠠᠵᠠᠷ ᠵᠠᠰᠠᠬᠤ ᠵᠡᠷᠭᠡᠳᠦ ᠪᠦᠷᠢᠨ ᠮᠡᠷᠭᠡᠰᠢᠵᠡᠢ᠃ ᠡᠨᠡ ᠪᠣᠯ ᠪᠦᠷ ᠡᠪᠦᠭᠡ ᠠᠪᠤᠶᠢᠨ ᠬᠢᠨᠢ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠠᠳᠤᠭᠤ ᠬᠠᠷᠢᠭᠤᠯᠬᠤ ᠡᠷᠳᠡᠮᠶᠦᠮ᠃ ᠭᠡᠪᠡᠴᠦ ᠡᠪᠦᠯ ᠬᠠᠪᠤᠷᠤᠨ ᠵᠤᠳ ᠰᠢᠭᠤᠷᠭᠠᠨᠳᠤ ᠶᠠᠮᠠᠷ ᠭᠠᠵᠠᠷ ᠬᠠᠰᠢᠨ ᠵᠠᠰᠠᠵᠤ ᠲᠠᠯᠪᠢᠭᠰᠠᠨ᠂ ᠲᠦᠷᠦᠭᠦᠦ ᠦᠳᠡᠰᠢᠶᠢᠨ ᠠᠳᠤᠭᠤᠶᠢ ᠮᠠᠷᠭᠠᠰᠢ ᠥᠷᠯᠦᠭᠡᠨᠢ ᠬᠠᠮᠢᠭᠠᠭᠤᠷ ᠲᠣᠰᠴᠤ ᠡᠷᠢᠬᠦ ᠪᠤᠶᠤ ᠶᠠᠭᠠᠬᠢᠵᠤ ᠮᠥᠷᠳᠡᠬᠦ ᠲᠠᠯᠠᠪᠠᠷ ᠪᠠᠬᠠᠨ ᠣᠨᠤᠪᠴᠢᠦᠭᠡᠢ ᠪᠠᠢᠳᠠᠭ᠃ ᠬᠠᠷᠢᠨ ᠡᠪᠦᠭᠡ ᠠᠪᠤᠠᠴᠠᠪᠠᠨ ᠠᠰᠠᠭᠤᠭᠠᠳ ᠮᠣᠷᠳᠠᠪᠠᠯ ᠪᠠᠷᠤᠭᠯᠠ ᠲᠠᠯᠪᠢᠭᠰᠠᠨ ᠭᠠᠵᠠᠷᠠᠴᠠᠪᠠᠨ ᠬᠤᠷᠢᠶᠠᠬᠤ ᠮᠡᠲᠦ ᠪᠠᠢᠳᠠᠭ᠃ ᠢᠩᠭᠢᠬᠦᠳᠦ ᠪᠠᠷᠢᠭᠠᠳᠠᠶᠢᠨ ᠬᠢᠨᠢ ᠠᠷᠠᠳ ᠣᠯᠠᠨ 《ᠡᠪᠦᠭᠡ ᠠᠪᠤᠲᠠᠢᠪᠠᠨ ᠠᠳᠠᠯᠢᠬᠠᠨ ᠰᠠᠢᠨ ᠠᠳᠤᠭᠤᠴᠢᠨ ᠪᠣᠯᠵᠠᠢ》᠂ 《ᠪᠠᠷᠢᠭᠠᠳᠠᠳᠠᠭᠠᠨ ᠨᠢᠭᠡ ᠰᠠᠢᠨ ᠠᠳᠤᠭᠤᠴᠢᠨᠲᠠᠢ ᠪᠣᠯᠤᠯᠠ》 ᠭᠡᠵᠦ ᠬᠡᠯᠡᠯᠴᠡᠳᠡᠭ ᠪᠠᠢᠨᠠ᠃ ᠥᠪᠡᠷᠢᠶᠡᠨᠴᠦ ᠪᠠᠰᠠ ᠡᠨᠡ ᠠᠵᠢᠯᠳᠤ ᠲᠤᠩ ᠶᠡᠬᠡ ᠪᠠᠬᠠᠲᠠᠢ ᠪᠣᠯᠵᠠᠢ᠃
ᠨᠢᠭᠡ ᠤᠳᠠᠭᠠ ᠬᠡᠳᠦᠨ ᠵᠠᠯᠠᠭᠤ ᠠᠳᠤᠭᠤᠨ ᠳᠡᠭᠡᠷᠡ ᠠᠮᠠ ᠤᠷᠤᠯᠳᠤᠨ ᠲᠣᠬᠤᠭᠤᠷᠬᠠᠵᠤ ᠪᠠᠢᠭᠠᠳ᠂ ᠡᠳᠡᠨᠦ ᠠᠳᠤᠭᠤᠨᠳᠤ ᠤᠨᠠᠭᠠᠨ ᠵᠢᠷᠭᠤᠭᠠᠨ ᠬᠦᠵᠦᠭᠦᠨᠳᠡᠭᠡᠨ ᠤᠷᠭᠠ ᠣᠯᠠᠨ ᠬᠦᠷᠭᠡᠭᠦᠯᠦᠭᠡᠦᠭᠡᠢ᠂ ᠣᠭᠲᠠᠷᠭᠤᠢᠶᠢᠨ ᠰᠠᠯᠬᠢᠠᠴᠠ ᠥᠭᠡᠷᠡ ᠶᠠᠭᠤᠮᠠᠶᠢ ᠨᠢᠷᠤᠭᠤᠨ ᠳᠡᠭᠡᠷᠡᠪᠡᠨ ᠣᠭᠲᠤ ᠭᠠᠷᠭᠠᠭᠠᠦᠭᠡᠢ᠂ ᠬᠢᠵᠠᠯᠠᠩ ᠦᠷᠢᠶᠡᠨᠳᠦᠨᠢ ᠬᠡᠳᠦᠪᠡᠷ ᠤᠷᠭᠠᠨ ᠮᠣᠷᠢ ᠬᠥᠰᠢᠭᠡᠨ ᠪᠠᠢᠵᠤ ᠠᠭᠲᠠᠯᠠᠭᠤᠯᠤᠭᠰᠠᠨᠠᠴᠠ ᠨᠠᠰᠢ ᠮᠣᠷᠢᠨᠳᠤ ᠬᠣᠷᠤᠬᠠᠢᠲᠠᠢ ᠰᠠᠢᠨ ᠡᠷᠡᠰᠦᠳᠦᠨ ᠳᠤᠷᠠᠶᠢ ᠲᠠᠲᠠᠵᠤ᠂ ᠳᠤᠬᠤᠶᠢᠨᠢ ᠮᠠᠭᠠᠵᠢᠭᠤᠯᠤᠨ ᠶᠠᠪᠤᠭᠰᠠᠨ ᠭᠠᠩᠭᠠᠩ ᠰᠠᠷᠠᠯᠲᠠᠢ᠂ ᠬᠣᠶᠠᠷ ᠨᠢᠳᠦᠨᠢ ᠮᠣᠢᠯᠰᠢᠭ᠋᠂ ᠳᠥᠷᠪᠡᠨ ᠲᠤᠭᠤᠷᠠᠢᠨᠢ ᠲᠠᠰᠤ ᠬᠠᠷᠠ᠂ ᠳᠠᠩᠴᠢ ᠰᠠᠢᠬᠠᠨ ᠶᠠᠰᠤᠨᠤ ᠣᠷᠤᠭᠠ ᠬᠠᠩᠭᠠᠯ ᠮᠣᠷᠢ ᠪᠠᠢᠳᠠᠭᠢ ᠪᠠᠲᠤᠥ᠌ᠯᠵᠡᠢ ᠭᠠᠭᠴᠠᠭᠠᠷᠢᠶᠠᠨ ᠪᠠᠷᠢᠵᠤ᠂ ᠭᠠᠭᠴᠠᠭᠠᠷᠢᠶᠠᠨ ᠡᠮᠡᠭᠡᠯᠯᠡᠨ ᠤᠨᠤᠵᠤ᠂ ᠡᠷᠡ ᠰᠢᠯᠭᠠᠬᠤᠪᠠᠷ ᠮᠥᠷᠦᠢᠴᠡᠨ ᠲᠣᠭᠲᠠᠵᠠᠢ᠃ ᠭᠠᠩᠭᠠᠩ ᠰᠠᠷᠠᠯ ᠪᠣᠯ ᠦᠨᠡᠬᠡᠷ ᠬᠣᠪᠤᠷ ᠰᠠᠢᠬᠠᠨ ᠠᠳᠤᠭᠤ ᠭᠡᠨᠡ᠃ ᠪᠠᠷᠢᠵᠤᠯᠠ ᠴᠢᠳᠠᠭᠠᠳ ᠰᠤᠷᠭᠠᠵᠤᠯᠠ ᠴᠢᠳᠠᠪᠠᠯ ᠪᠠᠰᠠᠴᠤ ᠬᠣᠪᠤᠷ ᠰᠠᠢᠬᠠᠨ ᠮᠣᠷᠢ ᠪᠣᠯᠬᠤᠶᠢ ᠲᠤᠷᠰᠢᠯᠭᠠᠲᠠᠢ ᠮᠠᠯᠴᠢᠳ ᠪᠦᠷ ᠠᠨᠳᠤᠬᠤᠦᠭᠡᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠪᠠᠷᠢᠵᠤ ᠰᠤᠷᠭᠠᠬᠤᠶᠢᠨᠢ ᠬᠦᠰᠡᠯᠢᠶᠡᠨ ᠪᠣᠯᠭᠠᠨ ᠬᠡᠯᠡᠯᠴᠡᠳᠡᠭ ᠪᠠᠢᠵᠠᠢ᠃ ᠪᠠᠲᠤᠥ᠌ᠯᠵᠡᠢᠶᠢᠨ ᠡᠪᠦᠭᠡ ᠠᠪᠤ ᠨᠢᠭᠡ ᠡᠳᠦᠷ ᠠᠳᠤᠭᠤᠨᠤ ᠤᠰᠤᠨ ᠳᠡᠭᠡᠷᠡ ᠢᠷᠡᠭᠡᠳ ᠭᠠᠩᠭᠠᠩ ᠰᠠᠷᠠᠯᠢ ᠦᠵᠡᠭᠡᠳ ᠪᠠᠷᠤᠭ ᠬᠠᠭᠠᠰ ᠡᠳᠦᠷ ᠬᠢᠷᠢᠲᠡᠢ ᠳᠠᠭᠠᠨ ᠶᠠᠪᠤᠵᠤ᠂ ᠲᠥᠷᠦᠴᠡ ᠣᠨᠴᠠᠯᠢᠭᠤᠳᠢᠨᠢ ᠨᠢᠭᠡ ᠨᠢᠭᠡᠪᠡᠷ ᠲᠣᠭᠠᠴᠢᠵᠤ᠂ ᠰᠠᠢᠬᠠᠨ ᠰᠤᠷᠭᠠᠵᠤ ᠴᠢᠳᠠᠪᠠᠯ ᠭᠠᠩᠭᠠᠩ ᠰᠠᠷᠠᠯᠴᠤ ᠬᠤᠢᠯᠠᠷᠠᠨ ᠨᠡᠭᠦᠬᠦ ᠬᠤᠷᠮᠤᠰᠲᠠᠶᠢᠨ ᠴᠠᠭᠠᠨ ᠡᠭᠦᠯᠡᠯᠡ ᠭᠡᠵᠦ ᠮᠡᠳᠡᠭᠡᠷᠡᠢ ᠭᠡᠪᠡ᠃ ᠲᠡᠢᠮᠦᠡᠴᠡ ᠪᠠᠲᠤᠥ᠌ᠯᠵᠡᠢᠴᠦ ᠲᠣᠮᠤᠭᠠᠲᠠᠨᠨᠠᠷᠤᠨ ᠪᠠ ᠢᠯᠠᠩᠭᠤᠶᠠ ᠡᠪᠦᠭᠡᠶᠢᠨᠢᠶᠡᠨ ᠦᠭᠡᠶᠢ ᠪᠠᠲᠤ ᠢᠲᠡᠭᠡᠵᠦ᠂ ᠢᠷᠡᠭᠡᠳᠦᠢᠶᠢᠨ ᠬᠤᠢᠯᠠᠷᠠᠨ ᠨᠡᠭᠦᠬᠦ ᠬᠤᠷᠮᠤᠰᠲᠠᠶᠢᠨ ᠴᠠᠭᠠᠨ ᠡᠭᠦᠯᠡ ᠮᠡᠲᠦ ᠬᠤᠷᠳᠤᠨ ᠬᠦᠯᠦᠭ ᠪᠣᠯᠬᠤ ᠭᠠᠩᠭᠠᠩ ᠰᠠᠷᠠᠯᠢ ᠤᠨᠤᠵᠤ ᠰᠤᠷᠭᠠᠬᠤᠪᠠᠷ ᠵᠣᠷᠢᠭᠯᠠᠵᠠᠢ᠃
ᠪᠠᠲᠤᠥ᠌ᠯᠵᠡᠢᠶᠢᠨ ᠭᠠᠩᠭᠠᠩ ᠰᠠᠷᠠᠯᠢ ᠪᠠᠷᠢᠵᠤ ᠤᠨᠤᠬᠤ ᠴᠢᠮᠡᠭᠡ ᠵᠢᠭᠦᠷ ᠤᠷᠭᠤᠭᠰᠠᠨᠶᠤᠮᠰᠢᠭ᠋ ᠲᠠᠷᠬᠠᠵᠤ᠂ ᠠᠳᠤᠭᠤᠨᠳᠤ ᠪᠠᠬᠠ ᠬᠡᠢᠲᠡᠢ ᠡᠪᠦᠭᠡᠳ ᠬᠥᠭᠰᠢᠳᠡᠴᠡ ᠲᠦᠷᠦᠭᠦᠯᠡᠨ ᠵᠠᠯᠠᠭᠤᠴᠤᠳ ᠢᠳᠡᠷᠴᠦᠳ᠂ ᠥᠬᠢᠳ ᠪᠡᠷᠢᠶᠡᠳ ᠬᠦᠷᠲᠡᠯᠡ ᠰᠠᠢᠨ ᠰᠠᠢᠬᠠᠨ ᠬᠤᠪᠴᠠᠰᠤᠪᠠᠨ ᠡᠮᠦᠰᠴᠦ᠂ ᠶᠠᠮᠠᠷ ᠨᠢᠭᠡᠨ ᠰᠣᠨᠢᠨ ᠰᠠᠢᠬᠠᠨ ᠲᠣᠭᠯᠠᠭᠠᠮ ᠦᠵᠡᠬᠦ ᠭᠡᠰᠡᠨᠶᠦᠮᠰᠢᠭ ᠶᠠᠭ ᠡᠨᠡ ᠡᠳᠦᠷᠨᠢ ᠴᠤᠭᠯᠠᠷᠠᠨ ᠢᠷᠡᠵᠡᠢ᠃
ᠪᠠᠷᠢᠭᠠᠳᠠᠶᠢᠨ ᠭᠤᠷᠪᠠᠨ ᠰᠦᠷᠦᠭ ᠠᠳᠤᠭᠤ ᠭᠠᠵᠠᠷᠤᠨ ᠲᠡᠭᠰᠢ ᠳᠡᠭᠡᠷᠡ ᠪᠥᠭᠡᠮᠨᠡᠷᠡᠵᠦ᠂ ᠠᠳᠤᠭᠤᠴᠢᠨ ᠰᠦᠯᠵᠢᠯᠳᠦᠨ ᠳᠠᠪᠬᠢᠵᠤ᠂ ᠠᠳᠤᠭᠤᠪᠠᠨ ᠬᠠᠰᠢᠨ ᠰᠣᠷᠲᠤᠭᠤᠯᠠᠵᠠᠭᠠᠨᠠ᠃
ᠪᠠᠲᠤᠥ᠌ᠯᠵᠡᠢ ᠪᠦᠰᠡᠪᠡᠨ ᠴᠢᠩᠭᠠᠯᠠᠵᠤ᠂ ᠰᠣᠢᠵᠤ ᠬᠥᠩᠭᠡᠯᠡᠭᠰᠡᠨ ᠮᠣᠷᠢᠨᠤᠪᠠᠨ ᠡᠮᠡᠭᠡᠯᠢ ᠵᠠᠰᠠᠵᠤ᠂ ᠤᠷᠭᠠ ᠲᠤᠯᠤᠨ ᠮᠣᠷᠳᠠᠬᠤᠳᠤ ᠬᠥᠮᠦᠰ ᠠᠯᠠᠭᠠ ᠲᠠᠰᠢᠨ ᠵᠣᠷᠢᠭᠵᠢᠭᠤᠯᠪᠠ᠃ ᠪᠠᠲᠤᠥ᠌ᠯᠵᠡᠢ ᠠᠳᠤᠭᠤᠨ ᠳᠤᠮᠳᠠᠭᠤᠷ ᠬᠠᠭᠠ ᠵᠦᠰᠦᠵᠦ ᠭᠠᠩᠭᠠᠩ ᠰᠠᠷᠠᠯᠳᠤ ᠣᠢᠷᠠᠲᠤᠮᠠᠭᠴᠠ ᠤᠷᠭᠠ ᠰᠤᠩᠭᠠᠪᠠ᠃ ᠤᠷᠭᠠᠨ ᠮᠣᠷᠢᠴᠤ ᠭᠠᠩᠭᠠᠩ ᠰᠠᠷᠠᠯ ᠤᠷᠤᠭᠤ ᠳᠠᠭᠠᠷᠢᠪᠠ᠃ ᠭᠡᠲᠡᠯᠡ ᠭᠠᠩᠭᠠᠩ ᠰᠠᠷᠠᠯ ᠣᠯᠠᠨ ᠠᠳᠤᠭᠤᠨᠤ ᠳᠡᠭᠡᠭᠦᠷ ᠴᠢᠬᠢ ᠪᠣᠰᠭᠠᠨ ᠰᠡᠷᠲᠡᠯᠵᠡᠵᠦ ᠪᠠᠢᠭᠰᠠᠨᠢᠶᠠᠨ ᠬᠡᠳᠦᠢᠨ ᠠᠵᠢᠭ ᠠᠪᠴᠤ᠂ ᠣᠯᠠᠨ ᠵᠠᠭᠤᠨ ᠠᠳᠤᠭᠤᠨᠤ ᠳᠤᠮᠳᠠᠠᠴᠠ ᠭᠠᠳᠠᠭᠰᠢ ᠰᠢᠪᠲᠤᠯᠬᠤᠳᠤ ᠮᠠᠭᠤᠬᠠᠨ ᠭᠦᠢᠴᠡᠯᠲᠡ ᠳᠡᠭᠡᠷᠡᠡᠴᠡ ᠪᠠᠲᠤᠥ᠌ᠯᠵᠡᠢ ᠴᠡᠭᠡᠵᠢ ᠲᠦᠷᠢᠨ ᠭᠠᠷ ᠰᠤᠩᠭᠠᠵᠤ ᠤᠷᠭᠠ ᠬᠠᠶᠠᠭᠰᠠᠨᠳᠤ ᠭᠤᠷᠮᠤᠰᠤᠨ ᠬᠤᠢᠪᠢ ᠭᠣᠭᠴᠤᠭᠠᠷᠠᠵᠤ ᠭᠠᠩᠭᠠᠩ ᠰᠡᠷᠡᠯᠦᠨ ᠬᠦᠵᠦᠭᠦᠨᠳᠦ ᠣᠷᠤᠬᠤᠲᠠᠢ ᠵᠡᠷᠭᠡ ᠭᠠᠩᠭᠠᠩ ᠰᠡᠷᠡᠯᠦᠨ ᠬᠠᠷᠠᠢᠯᠲᠠ ᠬᠤᠷᠳᠤᠰᠴᠤ᠂ ᠪᠤᠯᠭᠢᠯᠠᠨ ᠵᠢᠳᠭᠦᠬᠦᠨᠢ ᠰᠢᠷᠦᠭᠦᠰᠬᠦᠳᠦ ᠪᠠᠷᠢᠮᠠ ᠤᠷᠭᠠᠲᠠᠢ ᠮᠣᠷᠢ ᠱᠠᠯᠠᠨ ᠨᠡᠬᠡᠵᠦ ᠭᠠᠷᠤᠯᠠ᠃ ᠬᠥᠮᠦᠰ ᠠᠯᠠᠭᠠ ᠲᠠᠰᠢᠨ 《ᠭᠠᠩᠭᠠᠩ ᠤᠷᠭᠠᠴᠢᠨ》 ᠭᠡᠵᠦ ᠠᠮᠠ ᠠᠮᠠᠨᠳᠠᠭᠠᠨ ᠬᠠᠰᠭᠢᠷᠤᠯᠴᠠᠨᠠ᠃ ᠣᠯᠠᠨ ᠵᠠᠭᠤᠨ ᠠᠳᠤᠭᠤᠶᠢ ᠨᠢᠭᠡ ᠲᠣᠭᠤᠷᠢᠵᠤ ᠢᠷᠡᠬᠦᠳᠦ ᠤᠷᠭᠠᠪᠠᠨ ᠤᠷᠤᠭᠰᠢ ᠳᠡᠪᠰᠢᠭᠦᠯᠦᠨ ᠴᠢᠬᠢᠯᠵᠢᠭᠦᠷᠢᠶᠡᠷᠨᠢ ᠴᠢᠭᠲᠠᠯᠠᠵᠤ ᠠᠪᠤᠮᠠᠭᠴᠠᠪᠠᠨ ᠡᠮᠡᠭᠡᠯᠦᠨᠢᠶᠡᠨ ᠠᠷᠤᠳᠤ ᠭᠠᠷᠴᠤ ᠭᠠᠵᠠᠷᠤᠨ ᠲᠡᠭᠰᠢᠶᠢ ᠠᠵᠢᠨ ᠪᠠᠢᠵᠤ ᠨᠢᠭᠡᠯᠡ ᠲᠠᠲᠠᠨ ᠰᠠᠭᠤᠯᠭᠠᠭᠰᠠᠨᠳᠤ ᠤᠷᠭᠠᠨ ᠮᠣᠷᠢᠨᠤ ᠬᠢᠨᠢ ᠬᠣᠢᠲᠤ ᠬᠣᠶᠠᠷ ᠬᠥᠯ ᠬᠣᠶᠠᠷ ᠭᠤᠷᠪᠠᠨ ᠬᠣᠣᠰ ᠠᠯᠲᠠ ᠭᠠᠵᠠᠷᠢ ᠠᠨᠵᠢᠰᠤᠰᠢᠭ᠋ ᠬᠠᠭᠤᠯᠤᠨ ᠶᠠᠪᠤᠵᠤ᠂ ᠭᠠᠩᠭᠠᠩ ᠰᠡᠷᠡᠯᠦᠨ ᠤᠨᠠᠭᠠᠨ ᠵᠢᠷᠭᠤᠭᠠᠨ ᠬᠦᠵᠦᠭᠦᠦᠶᠢ ᠤᠭᠵᠠ ᠲᠠᠲᠠᠨ ᠡᠷᠭᠢᠭᠦᠯᠪᠡ᠃ ᠬᠥᠮᠦᠰ ᠪᠠᠰᠠ ᠨᠢᠭᠡ ᠤᠳᠠᠭᠠ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠠᠰᠢᠵᠤ 《ᠮᠣᠷᠢᠴᠤ ᠮᠣᠷᠢ ᠪᠠᠢᠨᠠ᠂ ᠡᠷᠡᠴᠦ ᠡᠷᠡ ᠪᠠᠢᠨᠠ》 ᠭᠡᠵᠦ ᠤᠷᠭᠠᠨ ᠮᠣᠷᠢ᠂ ᠤᠷᠭᠠᠴᠢ ᠬᠣᠶᠠᠷᠢ ᠮᠠᠭᠲᠠᠵᠤ ᠪᠠᠢᠯᠠ᠃ ᠤᠨᠤᠭᠰᠠᠨ ᠡᠵᠡᠨᠦᠪᠡᠨ ᠡᠪᠦᠳᠦᠭᠦᠨ ᠠᠶᠠᠪᠠᠷ ᠰᠠᠨᠠᠭᠠᠶᠢᠨᠢ ᠮᠡᠳᠡᠵᠦ ᠶᠠᠪᠤᠭᠠ ᠤᠷᠭᠠᠨ ᠮᠣᠷᠢᠨᠤ ᠬᠥᠩᠭᠡᠨ ᠱᠠᠯᠠᠮᠠᠭᠠᠢ ᠳᠠᠪᠬᠢᠯᠲᠠ ᠤᠷᠠᠨ ᠪᠤᠰᠢᠭᠤ ᠬᠥᠳᠡᠯᠦᠯ᠂ ᠤᠬᠤᠰᠬᠢᠨ ᠲᠠᠲᠠᠬᠤᠳᠤ ᠡᠷᠡ ᠴᠢᠳᠠᠯᠢ ᠢᠯᠡᠷᠡᠭᠦᠯᠦᠭᠰᠡᠨ ᠡᠷᠡᠮᠡᠬᠡᠢ ᠰᠠᠭᠤᠯᠲᠠ ᠵᠡᠷᠭᠡᠶᠢᠨ ᠡᠭᠡᠯ ᠪᠤᠰᠤ ᠮᠡᠷᠭᠡᠵᠢᠯᠨᠢ ᠬᠥᠮᠦᠰᠢ ᠦᠨᠡᠬᠡᠷ ᠭᠠᠢᠬᠠᠭᠤᠯᠤᠮᠠ ᠰᠠᠢᠬᠠᠨ ᠪᠠᠢᠪᠠ᠃ ᠡᠨᠡ ᠪᠣᠯ ᠪᠠᠲᠤᠥ᠌ᠯᠵᠡᠢᠶᠢᠨ ᠰᠤᠷᠭᠠᠭᠰᠠᠨ ᠮᠣᠷᠢ᠂ ᠡᠵᠡᠨᠦ ᠬᠢᠨᠢ ᠤᠬᠠᠭᠠᠨ ᠰᠠᠮᠪᠠᠭᠠ᠂ ᠢᠳᠡ ᠴᠢᠳᠠᠯ᠂ ᠵᠠᠩ ᠠᠭᠠᠰᠢ ᠬᠦᠷᠲᠡᠯᠡ ᠢᠯᠡᠷᠡᠳᠡᠭ ᠪᠢᠯᠡ᠃ ᠲᠡᠢᠮᠦᠡᠴᠡ ᠬᠥᠮᠦᠰ᠂ ᠤᠷᠭᠠᠨ ᠮᠣᠷᠢ ᠤᠷᠭᠠᠴᠢ ᠬᠣᠶᠠᠷᠢ ᠵᠡᠷᠭᠡ ᠮᠠᠭᠲᠠᠵᠤ ᠪᠠᠢᠭᠠᠨᠢ ᠡᠨᠡ᠃ ᠲᠡᠭᠡᠭᠡᠳ ᠭᠠᠩᠭᠠᠩ ᠰᠠᠷᠠᠯᠢ ᠲᠠᠲᠠᠨ ᠰᠠᠭᠤᠯᠭᠠᠵᠤ᠂ ᠤᠷᠭᠠᠨ ᠮᠣᠷᠢᠪᠠᠨ ᠵᠡᠷᠭᠡᠴᠡᠭᠦᠯᠦᠨ ᠣᠴᠢᠭᠤᠯᠵᠤ᠂ ᠮᠣᠷᠢᠨ ᠳᠡᠭᠡᠷᠡᠡᠴᠡ ᠨᠣᠭᠲᠤ ᠬᠠᠶᠠᠨ ᠨᠣᠭᠲᠤᠯᠠᠵᠤ ᠠᠪᠤᠮᠠᠭᠴᠠᠪᠠᠨ ᠮᠣᠷᠢᠨᠠᠴᠠᠪᠠᠨ ᠪᠠᠭᠤᠵᠤ᠂ ᠴᠣᠮᠴᠤᠭᠳᠠᠨ ᠠᠪᠤᠭᠰᠠᠨᠢᠶᠠᠨ ᠥᠷᠦᠭᠡᠰᠦᠨ ᠭᠠᠷᠢᠶᠠᠷᠢᠶᠠᠨ ᠴᠢᠬᠢᠳᠡᠨ᠂ ᠲᠠᠯᠠ ᠭᠠᠷᠢᠶᠠᠷᠢᠶᠠᠨ ᠴᠢᠳᠦᠷᠯᠡᠵᠦ ᠲᠠᠯᠪᠢᠵᠠᠢ᠃ ᠡᠨᠡᠬᠦ ᠤᠰᠤᠨᠤ ᠲᠤᠩᠭᠠᠯᠠᠭᠢ ᠤᠤᠭᠤᠵᠤ᠂ ᠡᠪᠡᠰᠦᠨᠦ ᠰᠣᠷᠭᠤᠭᠢ ᠢᠳᠡᠵᠦ᠂ ᠰᠡᠭᠦᠯᠢᠶᠡᠷᠢᠶᠡᠨ ᠨᠠᠭᠠᠳᠤᠨ ᠰᠡᠭᠦᠳᠡᠷᠡᠴᠡᠪᠡᠨ ᠪᠣᠰᠭᠠᠵᠤ᠂ ᠲᠣᠯᠤᠭᠠᠢᠪᠠᠷᠢᠶᠠᠨ ᠨᠠᠭᠠᠳᠤᠨ ᠲᠣᠭᠤᠰᠤᠨᠠᠴᠠᠪᠠᠨ ᠪᠤᠯᠭᠢᠵᠤ ᠶᠠᠪᠤᠳᠠᠭ ᠭᠠᠩᠭᠠᠩ ᠰᠠᠷᠠᠯ ᠡᠳᠦᠭᠡ ᠬᠥᠮᠦᠨᠦ ᠭᠠᠷᠲᠤ ᠣᠷᠤᠴᠢᠬᠠᠭᠠᠳ ᠴᠣᠪᠬᠤᠴᠢᠨ ᠰᠠᠮᠤᠷᠳᠠᠵᠤ᠂ ᠵᠤᠯᠠᠷᠠᠨ ᠳᠠᠭᠠᠷᠢᠵᠤ᠂ ᠢᠰᠭᠦᠯᠦᠨ ᠬᠠᠢᠷᠴᠤ ᠪᠠᠢᠬᠤᠨᠢ ᠪᠠᠰᠠᠴᠤ ᠮᠣᠷᠢᠨ ᠡᠷᠳᠡᠮ ᠲᠡᠭᠦᠰ ᠪᠦᠷᠢᠳᠦᠭᠰᠡᠨ ᠠᠮᠢᠲᠠᠨ ᠠᠵᠢ᠃
ᠪᠠᠲᠤᠥ᠌ᠯᠵᠡᠢ᠂ ᠭᠠᠩᠭᠠᠩ ᠰᠠᠷᠠᠯᠢ ᠡᠮᠡᠭᠡᠯᠯᠡᠵᠦ ᠪᠠᠷᠠᠭᠠᠳ ᠴᠢᠳᠦᠷᠢᠶᠡᠨ ᠠᠪᠴᠤ ᠳᠠᠳᠭᠠᠯ ᠶᠣᠰᠤᠭᠠᠷ ᠪᠦᠰᠡᠯᠡᠬᠦᠳᠦ ᠬᠥᠮᠦᠰᠦᠨ ᠳᠤᠮᠳᠠᠠᠴᠠ ᠨᠢᠭᠡ ᠵᠠᠯᠠᠭᠤ:
《ᠪᠠᠲᠤᠥ᠌ᠯᠵᠡᠢ ᠡ! ᠴᠢᠳᠦᠷᠢᠶᠡᠨ ᠪᠦᠰᠡᠯᠡᠭᠡᠳ ᠶᠠᠭᠠᠬᠢᠬᠤᠶᠤᠮ?ᠮᠠᠨᠢ ᠬᠥᠮᠦᠨ ᠣᠳᠣ ᠵᠢᠭᠠᠬᠠᠨ ᠵᠢᠷᠦᠬᠡᠰᠢᠴᠢᠬᠡᠯᠡ ᠪᠣᠯᠤᠯᠲᠠᠢ》 ᠭᠡᠵᠦ ᠬᠡᠯᠡᠭᠡᠳ ᠢᠨᠢᠶᠡᠪᠡ᠃
ᠪᠠᠲᠤᠥ᠌ᠯᠵᠡᠢ ᠢᠨᠢᠶᠡᠮᠰᠦᠭᠯᠡᠭᠰᠡᠭᠡᠷ:
《ᠳᠠᠳᠴᠢᠬᠠᠵᠠᠢ》 ᠭᠡᠳ ᠴᠢᠳᠦᠷᠢᠶᠡᠨ ᠠᠪᠴᠤ ᠲᠡᠷᠡ ᠵᠠᠯᠠᠭᠤᠶᠢᠨ ᠵᠦᠭ ᠲᠠᠶᠠᠭᠳᠠᠵᠤ ᠶᠠᠪᠤᠭᠤᠯᠬᠤᠳᠤ ᠣᠯᠠᠨᠤ ᠳᠤᠮᠳᠠᠠᠴᠠ ᠪᠠᠰᠠ ᠨᠢᠭᠡ ᠬᠥᠮᠦᠨ ᠤᠤᠯᠭᠠ ᠠᠯᠳᠠᠨ:
《ᠲᠡᠭᠡᠵᠦ ᠪᠣᠯᠬᠤᠦᠭᠡᠢ᠂ ᠴᠢᠳᠦᠷᠢᠶᠡᠨ ᠶᠠᠭᠠᠬᠢᠭᠰᠠᠨᠴᠤ ᠪᠦᠰᠡᠯᠡᠬᠦ ᠬᠡᠷᠡᠭᠲᠡᠢ ᠰᠢᠦ᠂ ᠬᠡᠦᠬᠡ ᠡ -》 ᠭᠡᠭᠰᠡᠭᠡᠷ ᠴᠢᠳᠦᠷᠢᠨᠢ ᠠᠪᠴᠢᠷᠠᠵᠤ ᠥᠭᠪᠡ᠃ ᠡᠨᠡ ᠬᠥᠮᠦᠨ ᠪᠣᠯ ᠡᠪᠦᠭᠡ ᠠᠪᠤᠶᠢᠨ ᠬᠢᠨᠢ ᠰᠠᠢᠨ ᠨᠠᠢᠵᠠ ᠳᠣᠷᠵᠢ ᠨᠠᠰᠤᠲᠠᠨ ᠪᠠᠢᠯᠠ᠃
ᠡᠮᠨᠢᠭ ᠤᠨᠤᠬᠤ ᠬᠥᠮᠦᠨ ᠴᠢᠳᠦᠷᠢᠶᠡᠨ ᠪᠦᠰᠡᠯᠡᠪᠡᠯ ᠡᠮᠨᠢᠭᠡᠴᠡ ᠬᠠᠶᠠᠭᠳᠠᠭᠰᠠᠨᠴᠤ ᠶᠠᠰᠤ ᠪᠡᠷᠳᠡᠳᠡᠭᠦᠭᠡᠢᠶᠦᠮ ᠭᠡᠨᠡ᠃ ᠡᠨᠡᠨᠢ ᠲᠡᠭᠡᠭᠡᠳ ᠨᠢᠭᠡ ᠵᠦᠢᠯᠦᠨ ᠳᠣᠮ ᠪᠠᠢᠭᠰᠠᠨᠠᠴᠠᠪᠠᠨ ᠳᠠᠳᠭᠠᠯ ᠪᠣᠯᠵᠠᠢ᠃ ᠪᠠᠲᠤᠥ᠌ᠯᠵᠡᠢ ᠪᠦᠰᠡᠪᠡᠨ ᠵᠠᠰᠠᠵᠤ᠂ ᠴᠢᠳᠦᠷᠢᠶᠡᠨ ᠪᠦᠰᠡᠯᠡᠭᠡᠳ ᠵᠢᠯᠤᠭᠤ ᠬᠤᠷᠢᠶᠠᠨ ᠮᠣᠷᠳᠠᠵᠤ ᠪᠤᠷᠤᠭᠤ ᠲᠠᠯᠠᠶᠢᠨ ᠳᠥᠷᠦᠭᠡᠪᠡᠨ ᠠᠪᠴᠤ ᠵᠠᠪᠳᠤᠭᠠᠦᠭᠡᠢᠪᠠᠷ ᠭᠠᠩᠭᠠᠩ ᠰᠠᠷᠠᠯ ᠲᠤᠢᠯᠠᠵᠤ ᠭᠠᠷᠴᠠᠢ᠃ ᠠᠳᠤᠭᠤᠨᠤ 《ᠬᠦᠦ》 ᠬᠡᠢᠯᠡᠭᠰᠡᠨᠶᠦᠮᠰᠢᠭ ᠳᠥᠷᠪᠡᠨ ᠲᠤᠭᠤᠷᠠᠢᠨᠢ ᠭᠠᠵᠠᠷ ᠬᠦᠷᠬᠦᠲᠡᠢᠦᠭᠡᠢᠲᠡᠢ ᠴᠢᠬᠢᠷᠦᠨ ᠪᠤᠯᠭᠢᠨᠠ᠃ ᠠᠪᠤᠶᠢᠨ ᠬᠦᠦ ᠤᠷᠭᠤᠭᠰᠠᠨᠶᠤᠮᠰᠢᠭ᠋ ᠨᠢᠷᠤᠭᠤᠨ ᠳᠡᠭᠡᠷᠡᠨᠢ ᠰᠠᠭᠤᠵᠤ᠂ ᠲᠠᠰᠢᠭᠤᠷ ᠨᠡᠮᠡᠨᠡ᠃ ᠦᠵᠡᠭᠰᠡᠨ ᠣᠯᠠᠨ ᠤᠤᠬᠠᠢᠯᠠᠵᠤ ᠪᠠᠢᠭᠰᠠᠨᠠᠴᠠᠪᠠᠨ ᠳᠤᠭᠤᠢ ᠪᠣᠯᠤᠨ ᠮᠡᠯᠡᠷᠡᠨᠡ᠃ ᠥᠳᠦᠭᠡᠵᠦ ᠲᠣᠪᠬᠤᠷᠤᠯᠳᠤᠭᠰᠠᠨ ᠦᠶᠡᠶᠢᠨ ᠨᠥᠬᠦᠳᠨᠢ ᠢᠨᠢᠶᠡᠯᠳᠦᠵᠦ ᠪᠠᠢᠭᠰᠠᠨᠠᠴᠠᠪᠠᠨ ᠵᠠᠷᠢᠮᠨᠢ ᠮᠣᠷᠢᠨᠤᠪᠠᠨ ᠣᠯᠤᠩ ᠴᠠᠪᠢᠯᠤᠤᠷᠢ ᠲᠠᠲᠠᠨ ᠮᠣᠷᠳᠠᠵᠤ᠂ ᠬᠠᠰᠢᠬᠤᠪᠠᠷ ᠪᠡᠯᠡᠳᠭᠡᠨᠡ᠃ ᠵᠠᠷᠢᠮᠨᠢ ᠬᠤᠢᠪᠢᠪᠠᠨ ᠲᠠᠯᠪᠢᠨ ᠰᠢᠯᠪᠢᠭᠦᠷᠳᠡᠵᠦ᠂ ᠭᠠᠩᠭᠠᠩ ᠰᠠᠷᠠᠯᠢ ᠳᠠᠪᠬᠢᠭᠤᠯᠬᠤ ᠭᠡᠵᠦ ᠰᠠᠨᠳᠤᠷᠤᠯᠳᠤᠨᠠ᠃ ᠶᠠᠭ ᠰᠠᠢᠬᠠᠨ ᠭᠠᠵᠠᠷ ᠲᠡᠭᠷᠢᠶᠢ ᠬᠣᠯᠪᠤᠨ ᠲᠤᠢᠯᠠᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ 《ᠨᠢᠰ》 ᠬᠢᠭᠰᠡᠨ ᠴᠢᠮᠡᠭᠡ ᠭᠠᠷᠴᠤ ᠪᠠᠲᠤᠥ᠌ᠯᠵᠡᠢ ᠰᠠᠭᠤᠳᠠᠯ ᠠᠯᠲᠠᠨ ᠤᠨᠠᠬᠤ ᠰᠢᠬᠠᠵᠤ ᠠᠷᠠᠢ ᠬᠡᠮᠡᠨ ᠳᠠᠬᠢᠨ ᠲᠣᠭᠲᠠᠪᠠ᠃ ᠦᠵᠡᠵᠦ ᠪᠠᠢᠭᠰᠠᠨ ᠬᠥᠮᠦᠰᠦᠨ ᠳᠣᠲᠤᠷᠠᠠᠴᠠ 《ᠨᠢᠰ》 ᠬᠢᠬᠦ ᠴᠢᠮᠡᠭᠡᠨᠢᠶᠡᠷ ᠨᠠᠰᠤᠲᠠᠢᠴᠤᠳ 《ᠪᠤᠷᠬᠠᠨᠮᠢᠨᠢ!》 ᠭᠡᠵᠦ ᠬᠠᠰᠭᠢᠷᠤᠨ ᠠᠯᠠᠭᠠᠪᠠᠨ ᠳᠡᠯᠭᠡᠴᠢᠬᠡᠭᠡᠳ ᠳᠠᠬᠢᠨ ᠪᠠᠲᠤᠥ᠌ᠯᠵᠡᠢᠶᠢᠨ ᠰᠠᠭᠤᠳᠠᠯᠢᠶᠠᠨ ᠣᠯᠵᠤ ᠲᠣᠭᠲᠠᠬᠤᠶᠢ ᠦᠵᠡᠮᠡᠭᠴᠡᠪᠡᠨ ᠨᠢᠳᠤᠷᠭᠠ ᠵᠠᠩᠭᠢᠳᠤᠨ 《ᠤᠤᠬᠠᠢᠰ ᠳ᠋ᠠ 》 ᠭᠡᠵᠦ ᠬᠠᠰᠭᠢᠷᠤᠨᠠ᠃ ᠬᠡᠦᠬᠡᠨᠴᠦᠳ ᠠᠯᠴᠢᠭᠤᠷᠢᠶᠠᠷᠢᠶᠠᠨ ᠨᠢᠳᠦᠪᠡᠨ ᠳᠠᠷᠤᠭᠰᠠᠨᠢᠶᠠᠨ 《ᠤᠤᠬᠠᠢᠰ ᠳ᠋ᠠ 》 ᠭᠡᠬᠦ ᠴᠢᠮᠡᠭᠡᠨᠢᠶᠡᠷ ᠳᠠᠬᠢᠨ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠨᠡ᠃ ᠰᠠᠶᠢᠶᠢᠨ 《ᠨᠢᠰ》 ᠬᠢᠭᠰᠡᠨ ᠳᠠᠭᠤ ᠪᠣᠯ ᠡᠮᠡᠭᠡᠯᠨᠢ ᠪᠠᠯᠪᠠᠷᠠᠭᠰᠠᠨ ᠪᠣᠯᠬᠤᠶᠢ ᠮᠠᠯᠴᠢᠳ ᠠᠰᠠᠭᠤᠯᠦᠭᠡᠢ ᠮᠡᠳᠡᠬᠦᠶᠦᠮ᠃ ᠦᠶᠡᠶᠢᠨ ᠨᠥᠬᠦᠳᠦᠨ ᠬᠢᠨᠢ ᠰᠢᠯᠪᠢᠭᠦᠷᠳᠡᠵᠦ ᠬᠥᠭᠡᠭᠡᠭᠰᠡᠨᠦ ᠬᠦᠴᠦᠪᠡᠷ ᠭᠠᠩᠭᠠᠩ ᠰᠠᠷᠠᠯ ᠨᠢᠭᠡᠯᠡ ᠴᠢᠭᠢᠶᠡᠷ ᠲᠤᠢᠯᠠᠬᠤᠪᠠᠨ ᠪᠣᠯᠢᠵᠤ᠂ ᠳᠠᠪᠬᠢᠨ ᠲᠤᠢᠯᠠᠭᠰᠠᠭᠠᠷ ᠶᠠᠪᠤᠵᠤ ᠪᠠᠢᠭᠰᠠᠨᠠᠴᠠᠪᠠᠨ ᠰᠤᠨᠲᠠᠯᠠ ᠳᠠᠪᠬᠢᠪᠠ᠃ ᠭᠠᠩᠭᠠᠩ ᠰᠠᠷᠠᠯᠢ ᠨᠡᠯᠢᠶᠡᠳ ᠵᠥᠭᠡᠯᠡᠷᠡᠭᠦᠯᠦᠭᠡᠳ ᠪᠤᠴᠠᠵᠤ ᠢᠷᠡᠬᠦᠳᠦ ᠬᠥᠮᠦᠰ ᠲᠠᠷᠬᠠᠭᠠᠳᠤᠢ ᠪᠠᠢᠭᠰᠠᠨ ᠮᠥᠷᠲᠡᠭᠡᠨ ᠤᠯᠠᠮ ᠪᠥᠭᠡᠮᠨᠡᠷᠡᠵᠦ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨᠦ ᠶᠠᠷᠢᠶᠠᠶᠢ ᠪᠠᠬᠠᠲᠠᠢᠬᠠᠨ ᠰᠣᠨᠤᠰᠴᠤ ᠪᠠᠢᠯᠠ᠃ ᠪᠠᠲᠤᠥ᠌ᠯᠵᠡᠢᠶᠢ ᠮᠣᠷᠢᠪᠠᠨ ᠴᠢᠳᠦᠷᠯᠡᠵᠦ ᠲᠠᠯᠪᠢᠭᠠᠳ ᠪᠣᠰᠬᠤ ᠦᠶᠡᠳᠦ ᠳᠣᠷᠵᠢ ᠨᠠᠰᠤᠲᠠᠨ ᠳᠡᠷᠭᠡᠳᠡᠨᠢ ᠢᠷᠡᠭᠡᠳ:
《ᠰᠠᠢᠨ ᠡᠷᠡ! ᠦᠨᠡᠬᠡᠷ ᠰᠠᠢᠨ ᠡᠷᠡ᠂ 〈ᠰᠠᠢᠨ ᠡᠷᠡ ᠨᠤᠲᠤᠭᠤᠨ ᠴᠢᠮᠡᠭ〉 ᠭᠡᠳᠡᠭ ᠰᠢᠦ ᠳ᠋ᠠ᠂ ᠴᠢᠨᠦ ᠥᠨᠦᠳᠦᠷᠦᠨ ᠡᠮᠨᠢᠭ ᠰᠤᠷᠭᠠᠭᠰᠠᠨᠢ ᠠᠢᠯ ᠬᠣᠲᠠᠨᠤ ᠬᠢᠨᠴᠢᠨᠢ ᠦᠵᠡᠭᠡᠳ ᠬᠡᠢ ᠮᠣᠷᠢ ᠰᠡᠷᠭᠦᠨ ᠪᠠᠶᠠᠷᠯᠠᠭᠰᠠᠨᠢ ᠪᠤᠤ ᠬᠡᠯᠡ᠂ ᠨᠤᠲᠤᠭ ᠤᠰᠤᠴᠢᠨᠢ ᠬᠦᠷᠲᠡᠯᠡ ᠪᠠᠶᠠᠰᠬᠤᠶᠤᠮ 》 ᠭᠡᠵᠦ ᠬᠡᠯᠡᠭᠡᠳ ᠬᠦᠩᠭᠢᠨᠡᠲᠡᠯᠡ ᠢᠨᠢᠶᠡᠪᠡ᠃ ᠦᠶᠡᠶᠢᠨ ᠨᠥᠬᠦᠳᠨᠢᠴᠦ ᠭᠡᠳ ᠪᠦᠭᠦᠳᠡᠭᠡᠷ ᠭᠠᠩᠭᠠᠩ ᠰᠡᠷᠡᠯᠦᠨ ᠨᠢᠷᠤᠭᠤᠨᠠᠴᠠ ᠬᠠᠮᠲᠤᠳᠠᠭᠠᠨ ᠪᠠᠭᠤᠭᠠᠳ ᠢᠷᠡᠭᠰᠡᠨᠶᠦᠮᠰᠢᠭ ᠬᠥᠭᠡᠷᠦᠯᠳᠦᠨ ᠪᠠᠶᠠᠷᠯᠠᠵᠠᠭᠠᠵᠤ ᠪᠠᠢᠪᠠ᠃ ᠳᠣᠷᠵᠢ ᠨᠠᠰᠤᠲᠠᠨ ᠦᠭᠡᠪᠡᠨ ᠦᠷᠭᠦᠯᠵᠢᠯᠡᠭᠦᠯᠵᠦ:
《ᠥᠨᠥᠳᠦᠷ ᠪᠢ ᠴᠢᠮᠠᠢ ᠦᠵᠡᠭᠰᠡᠨᠴᠢᠨᠢ ᠤᠷᠢᠳᠤ ᠡᠪᠦᠭᠡ ᠠᠪᠤᠶᠢᠴᠢᠨᠢ ᠦᠵᠡᠵᠦ ᠪᠠᠢᠭᠰᠠᠨᠮᠢᠨᠢ ᠰᠠᠨᠠᠭᠳᠠᠯᠠ᠃ ᠴᠢ ᠮᠥᠨ ᠡᠪᠦᠭᠡ ᠠᠪᠤᠶᠢᠪᠠᠨ ᠰᠦᠷᠡᠬᠡᠢ ᠳᠠᠭᠤᠷᠢᠶᠠᠵᠠᠢ᠃ ᠡᠪᠦᠭᠡ ᠠᠪᠤᠴᠢᠨᠢ ᠤᠷᠢᠳᠤ ᠪᠠᠰᠠ ᠮᠠᠨᠤ ᠨᠤᠲᠤᠭᠤᠨ ᠴᠢᠮᠡᠭ ᠪᠣᠯᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠰᠢᠦ ᠳ᠋ᠠ᠃ ᠤᠷᠢᠳᠤ ᠭᠤᠮᠪᠤ ᠪᠠᠶᠠᠨᠤ ᠰᠡᠲᠡᠷᠢᠨᠢ ᠰᠡᠷᠭᠦᠬᠦᠳᠡᠭᠡᠨ ᠵᠢᠯᠳᠦ ᠨᠢᠭᠡᠯᠡ ᠤᠳᠠᠭᠠ ᠪᠠᠷᠢᠳᠠᠭ ᠣᠩᠭᠤᠨ ᠪᠣᠷᠤ ᠮᠣᠷᠢᠶᠢ ᠪᠣᠯ ᠮᠠᠨᠤ ᠪᠤᠶᠠᠨᠯᠠ ᠲᠣᠭᠲᠠᠭᠠᠳᠠᠭ ᠪᠠᠢᠭᠰᠠᠨᠶᠤᠮ᠃ ᠨᠢᠭᠡ ᠵᠢᠯ ᠲᠡᠭᠦᠨᠢ ᠪᠠᠷᠢᠬᠤᠳᠤᠨᠢ ᠭᠣᠣᠯᠤᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠠᠳᠤᠭᠤᠪᠠᠨ ᠬᠤᠷᠢᠶᠠᠭᠠᠳ ᠪᠤᠶᠠᠨᠮᠢᠨᠢ ᠴᠢᠮᠠᠰᠢᠭ᠋ ᠰᠠᠢᠬᠠᠨ ᠤᠷᠭᠠᠯᠠᠲᠠᠯᠠ ᠣᠩᠭᠤᠨ ᠪᠣᠷᠤᠴᠤ ᠨᠢᠵᠢᠭᠢᠨᠠᠨ ᠵᠤᠯᠠᠷᠠᠪᠠ᠃ ᠪᠤᠶᠠᠨᠮᠢᠨᠢ ᠡᠭᠡᠭᠡᠯᠡ ᠰᠠᠶᠢᠶᠢᠨ ᠴᠢᠮᠠᠰᠢᠭ᠋ ᠪᠠᠷᠢᠮᠠ ᠤᠷᠭᠠᠲᠠᠢ ᠮᠣᠷᠢ ᠱᠠᠯᠠᠨ ᠨᠡᠬᠡᠵᠦ ᠭᠠᠷᠤᠭᠰᠠᠨᠶᠤᠮ᠃ ᠡᠨᠡ ᠭᠣᠣᠯ ᠲᠡᠷᠡ ᠬᠠᠪᠢᠳᠠᠭᠠᠨ ᠬᠡᠳᠦᠢᠪᠡᠷ ᠨᠠᠷᠢᠬᠠᠨ ᠪᠣᠯᠪᠠᠴᠤ ᠤᠯᠤᠰᠠᠴᠠᠪᠠᠨ ᠪᠤᠰᠤᠳ ᠭᠠᠵᠠᠷᠨᠢ ᠪᠦᠷ ᠬᠥᠯᠦᠭᠡᠢᠶᠦᠮ᠃ ᠥᠨᠥ ᠣᠩᠭᠤᠨ ᠪᠣᠷᠤ ᠡᠭᠦᠨᠢ ᠶᠠᠭᠤ ᠭᠡᠵᠦ ᠬᠠᠢᠬᠤᠷᠬᠤ ᠪᠤᠢ! ᠰᠢᠭᠤᠳᠯᠠ ᠭᠣᠣᠯ ᠳᠡᠭᠡᠷᠡ ᠲᠤᠯᠵᠤ ᠬᠦᠷᠬᠦᠳᠦ ᠦᠵᠡᠵᠦ ᠪᠠᠢᠭᠰᠠᠨ ᠪᠢᠳᠡᠨᠦ ᠨᠢᠳᠦ ᠬᠠᠷᠠᠯᠠᠭᠠᠳ ᠶᠠᠪᠤᠴᠢᠬᠠᠯᠠ᠃ ᠵᠠ᠂ ᠣᠳᠣᠴᠤ ᠬᠥᠮᠦᠨᠲᠡᠢ ᠮᠣᠷᠢᠲᠠᠢᠪᠠᠨ ᠬᠣᠢᠲᠤ ᠨᠠᠭᠤᠷᠠᠴᠠ ᠭᠠᠷᠬᠤ ᠪᠣᠯᠵᠠᠢ ᠭᠡᠵᠦ ᠪᠣᠳᠤᠵᠤ ᠪᠠᠢᠪᠠ᠃ ᠬᠠᠷᠢᠨ ᠶᠠᠭ ᠭᠱᠠᠨᠳᠤ ᠮᠠᠨᠤ ᠪᠤᠶᠠᠨᠳᠤ ᠰᠠᠮᠪᠠᠭᠠ ᠣᠷᠤᠵᠤ᠂ ᠤᠷᠭᠠᠪᠠᠨ ᠰᠤᠯᠠᠳᠭᠠᠨ ᠤᠷᠭᠠᠯᠬᠠᠰᠠ ᠮᠣᠷᠢᠪᠠᠨ ᠭᠣᠣᠯ ᠬᠠᠷᠠᠢᠯᠭᠠᠵᠤ᠂ ᠳᠠᠷᠠᠭᠠᠨᠢ ᠤᠨᠤᠭᠰᠠᠨ ᠮᠣᠷᠢᠪᠠᠨ ᠭᠣᠣᠯ ᠬᠠᠷᠠᠢᠯᠭᠠᠭᠰᠠᠨᠳᠤ ᠡᠮᠦᠨᠡ ᠬᠥᠯᠨᠢ ᠴᠠᠭᠠᠲᠤ ᠢᠷᠮᠡᠭ ᠳᠡᠭᠡᠷᠡ ᠲᠤᠰᠴᠤ ᠠᠷᠤ ᠬᠥᠯᠨᠢ ᠤᠰᠤᠨᠳᠤ ᠰᠠᠭᠤᠲᠠᠯᠠ ᠤᠷᠭᠠᠯᠠᠭᠰᠠᠨ ᠮᠣᠷᠢᠪᠠᠨ ᠭᠠᠭᠴᠠᠬᠠᠨ ᠭᠠᠷᠢᠶᠠᠷᠢᠶᠠᠨ ᠲᠠᠲᠠᠵᠤ ᠰᠠᠭᠤᠯᠭᠠᠵᠠᠢ᠃ ᠲᠡᠭᠡᠭᠰᠡᠨᠴᠢᠨᠢ ᠮᠣᠷᠢᠲᠠᠢ ᠬᠥᠮᠦᠨᠲᠡᠢᠪᠡᠨ ᠴᠢᠷᠦᠭᠳᠡᠵᠦ ᠭᠣᠣᠯᠤᠨ ᠲᠡᠷᠲᠡᠭᠡ ᠡᠷᠭᠢ ᠳᠡᠭᠡᠷᠡ ᠭᠠᠷᠴᠤ᠂ ᠣᠩᠭᠤᠨ ᠪᠣᠷᠤᠶᠢ ᠪᠠᠷᠢᠵᠤ ᠠᠪᠤᠭᠰᠠᠨ ᠪᠠᠢᠪᠠ ᠰᠢᠤ》 ᠭᠡᠵᠦ ᠬᠡᠯᠡᠭᠡᠳ ᠪᠠᠲᠤᠥ᠌ᠯᠵᠡᠢᠶᠢᠨ ᠮᠥᠷᠦᠶᠢ ᠲᠠᠪᠰᠢᠵᠤ ᠢᠨᠢᠶᠡᠪᠡ᠃
ᠭᠠᠩᠭᠠᠩ ᠰᠡᠷᠡᠯᠦᠨ ᠡᠮᠡᠭᠡᠯᠢ ᠠᠵᠢᠵᠤ ᠪᠠᠢᠭᠰᠠᠨ ᠬᠥᠮᠦᠰᠦᠨ ᠳᠣᠲᠤᠷᠠᠠᠴᠠ ᠨᠢᠭᠡ ᠵᠠᠯᠠᠭᠤ:
《ᠡᠮᠡᠭᠡᠯᠦᠨᠴᠢᠨᠢ ᠠᠷᠤ ᠪᠦᠭᠦᠷᠭᠡ ᠬᠤᠭᠤᠷᠠᠭᠠᠳ ᠬᠣᠩᠭᠤᠪᠠᠷᠢᠶᠠᠨ ᠪᠠᠰᠠ ᠬᠠᠭᠠᠷᠠᠵᠠᠢ》 ᠭᠡᠪᠡ᠃ ᠪᠠᠲᠤᠥ᠌ᠯᠵᠡᠢ :
《ᠪᠠᠷᠤᠭ ᠲᠡᠢᠮᠦ ᠪᠣᠯᠤᠭᠰᠠᠨ ᠪᠠᠢᠬᠤ》 ᠭᠡᠵᠦ ᠤᠷᠮᠠ ᠦᠭᠡᠢᠬᠡᠨ ᠬᠡᠯᠡᠬᠦᠳᠦ ᠳᠣᠷᠵᠢ ᠨᠠᠰᠤᠲᠠᠨ:
《ᠲᠡᠷᠡ ᠬᠠᠮᠢᠶᠠᠦᠭᠡᠢ᠂ ᠲᠡᠷᠡᠴᠢᠨᠢ ᠰᠠᠢᠨ ᠡᠷᠡᠶᠢᠨ ᠴᠢᠳᠠᠯᠢ ᠤᠯᠠᠮ ᠭᠠᠢᠬᠠᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠰᠢᠤ》 ᠭᠡᠵᠦ ᠮᠠᠭᠲᠠᠪᠠ᠃
ᠪᠠᠲᠤᠥ᠌ᠯᠵᠡᠢ᠂ ᠭᠠᠩᠭᠠᠩ ᠰᠠᠷᠠᠯᠢᠶᠠᠨ ᠲᠡᠨᠳᠡᠨᠢ ᠴᠢᠳᠦᠷᠯᠡᠵᠦ ᠣᠷᠬᠢᠭᠠᠳ ᠠᠳᠤᠭᠤᠪᠠᠨ ᠵᠠᠯᠠᠵᠤ᠂ ᠤᠷᠭᠠᠨ ᠮᠣᠷᠢᠪᠠᠨ ᠶᠡᠭᠦᠯᠡᠭᠡᠳ ᠭᠡᠷᠲᠡᠭᠡᠨ ᠬᠠᠷᠢᠬᠤᠳᠤ ᠡᠪᠦᠭᠡ ᠠᠪᠤᠶᠢᠨ ᠬᠢᠨᠢ ᠤᠯᠠᠭᠠᠨ ᠪᠤᠭᠤᠷᠤᠯ ᠮᠣᠷᠢ ᠬᠥᠯᠦᠰᠦᠲᠡᠢᠬᠡᠨᠰᠢᠭ ᠤᠶᠠᠭᠠᠨ ᠳᠡᠭᠡᠷᠡᠪᠡᠨ ᠢᠨᠴᠠᠭᠠᠵᠤ ᠪᠠᠢᠪᠠ᠃
ᠪᠠᠲᠤᠥ᠌ᠯᠵᠡᠢ᠂ ᠮᠣᠷᠢᠪᠠᠨ ᠤᠶᠠᠭᠠᠳ᠂ ᠪᠠᠯᠪᠠᠷᠬᠠᠢ ᠡᠮᠡᠭᠡᠯᠢᠶᠡᠨ ᠠᠪᠴᠤ ᠭᠡᠷ ᠤᠷᠤᠭᠤᠪᠠᠨ ᠠᠯᠬᠤᠬᠤᠳᠠᠭᠠᠨ 《ᠣᠳᠣᠴᠤ ᠡᠪᠦᠭᠡ ᠠᠪᠤᠪᠠᠷᠢᠶᠠᠨ ᠨᠢᠭᠡ ᠰᠠᠢᠨ ᠵᠠᠩᠨᠠᠭᠤᠯᠬᠤ ᠪᠠᠢᠬᠤ᠂ ᠶᠠᠮᠠᠷ ᠠᠷᠭᠠ ᠪᠠᠢᠨᠠ ᠳ᠋ᠠ᠂ ᠡᠭᠦᠨᠢ ᠦᠳᠡᠵᠦ ᠬᠠᠳᠠᠵᠤ ᠴᠢᠳᠠᠬᠤᠨᠢ ᠪᠠᠰᠠᠯᠠ ᠡᠪᠦᠭᠡ ᠠᠪᠤᠮᠢᠨᠢ ᠪᠣᠯᠬᠤᠠᠴᠠ ᠬᠣᠢᠰᠢ ᠨᠢᠭᠤᠭᠠᠳ ᠭᠠᠷᠴᠢᠬᠠᠵᠤ ᠴᠢᠳᠠᠬᠤᠦᠭᠡᠢ ᠳ᠋ᠠ 》 ᠭᠡᠵᠦ ᠪᠣᠳᠤᠭᠰᠠᠭᠠᠷ ᠡᠮᠡᠭᠡᠯ ᠤᠷᠤᠭᠤᠪᠠᠨ ᠨᠢᠭᠡ ᠬᠠᠷᠠᠵᠤ᠂ ᠭᠡᠷ ᠤᠷᠤᠭᠤᠪᠠᠨ ᠨᠢᠭᠡ ᠬᠠᠷᠠᠵᠤ ᠶᠠᠪᠤᠨᠠ᠃ ᠪᠠᠲᠤᠥ᠌ᠯᠵᠡᠢᠶᠢ ᠭᠡᠷᠲᠡᠭᠡᠨ ᠣᠷᠤᠬᠤᠳᠤ ᠡᠪᠦᠭᠡ ᠠᠪᠤᠨᠢ ᠬᠣᠢᠮᠤᠷᠠᠴᠠᠪᠠᠨ:
《ᠶᠠᠭᠠᠬᠢᠴᠢᠬᠠᠪᠠ? ᠡᠮᠡᠭᠡᠯᠢᠶᠡᠨ ᠪᠠᠯᠪᠠᠴᠢᠬᠠᠪᠠᠤᠤ?》 ᠭᠡᠵᠦ ᠠᠭᠤᠷᠲᠠᠢᠦᠭᠡᠢᠶᠢᠨ ᠬᠣᠭᠤᠷᠤᠨᠳᠤᠭᠤᠷ ᠠᠰᠠᠭᠤᠪᠠ᠃
《ᠲᠡᠭᠡᠯᠡ》 ᠭᠡᠵᠦ ᠪᠠᠲᠤᠥ᠌ᠯᠵᠡᠢ ᠬᠠᠷᠢᠭᠤᠯᠤᠭᠠᠳ ᠠᠵᠢᠭᠰᠠᠨᠴᠢᠨᠢ ᠡᠮᠡᠭᠡ ᠡᠵᠢ ᠭᠡᠷᠲᠦᠦᠭᠡᠢᠳᠦ ᠤᠯᠠᠮ ᠠᠢᠳᠠᠰ ᠬᠦᠷᠪᠡ᠃
《ᠭᠠᠩᠭᠠᠩ ᠰᠠᠷᠠᠯᠢ ᠤᠨᠤᠭᠠᠳᠤᠤ?》
《ᠲᠡᠢᠮᠦ ᠡ!》 ᠭᠡᠵᠦ ᠬᠠᠷᠢᠭᠤᠯᠤᠭᠠᠳ: 《ᠬᠡᠨᠨᠢ ᠠᠯᠢ ᠵᠠᠪᠢᠶᠠᠷᠨᠢ ᠦᠭᠡ ᠬᠦᠷᠭᠡᠭᠡᠳ ᠵᠠᠪᠳᠤᠴᠢᠬᠠᠭᠰᠠᠨᠶᠤᠮ》 ᠭᠡᠵᠦ ᠪᠠᠲᠤᠥ᠌ᠯᠵᠡᠢ ᠪᠣᠳᠤᠨᠠ᠃
《ᠣᠢᠴᠢᠭᠠᠳ ᠡᠮᠡᠭᠡᠯᠢᠶᠡᠨ ᠬᠥᠭᠯᠡᠭᠦᠯᠦᠭᠰᠡᠨ ᠪᠠᠢᠯᠭᠦᠢ᠃ 》
《ᠦᠭᠡᠢ ᠲᠤᠢᠯᠠᠭᠠᠨᠳᠤᠨᠢ᠃ 》
《ᠲᠤᠢᠯᠠᠭᠠᠨᠳᠤᠨᠢ?》 ᠭᠡᠵᠦ ᠡᠪᠦᠭᠡ ᠠᠪᠤᠨᠢ ᠯᠠᠪᠯᠠᠭᠠᠳ᠂ ᠰᠠᠬᠠᠯᠢᠶᠠᠨ ᠵᠠᠰᠠᠨ ᠢᠨᠢᠶᠡᠮᠰᠦᠭᠯᠡᠵᠦ 《ᠲᠡᠭᠡᠪᠡᠯ ᠮᠥᠨᠴᠦ ᠵᠢᠭᠲᠡᠢᠬᠡᠨ ᠲᠤᠢᠯᠠᠳᠠᠭ ᠠᠮᠢᠲᠠᠨ ᠪᠠᠢᠨᠠ ᠳ᠋ᠠ 》 ᠭᠡᠵᠦ ᠵᠠᠯᠠᠭᠤ ᠦᠶᠡᠶᠢᠨ ᠬᠢᠨᠢ ᠡᠮᠨᠢᠭ ᠳᠣᠭᠰᠢᠨᠲᠠᠢ ᠣᠷᠤᠯᠳᠤᠵᠤ ᠶᠠᠪᠤᠭᠰᠠᠨ ᠬᠣᠷᠤᠬᠠᠢᠨᠢ ᠬᠥᠳᠡᠯᠬᠦ ᠮᠡᠲᠦ ᠪᠠᠶᠠᠷᠲᠠᠢᠬᠠᠨ ᠬᠡᠯᠡᠪᠡ᠃
ᠡᠭᠦᠨᠢ ᠰᠣᠨᠤᠰᠤᠭᠠᠳ ᠪᠠᠲᠤᠥ᠌ᠯᠵᠡᠢᠶᠢᠨ ᠳᠣᠲᠤᠷᠠ ᠠᠱ᠌ᠢᠭᠦᠢ ᠠᠭᠤᠵᠢᠷᠠᠵᠤ᠂ ᠣᠳᠣ ᠳᠣᠷᠵᠢ ᠨᠠᠰᠤᠲᠠᠨᠢ ᠪᠤᠰᠢᠭᠤᠬᠠᠨ ᠡᠮᠦᠨᠡᠪᠡᠨ ᠪᠠᠷᠢᠶᠠ ᠭᠡᠵᠦ ᠪᠣᠳᠤᠩᠭᠤᠲᠠᠪᠠᠨ:
《ᠳᠣᠷᠵᠢ ᠨᠠᠰᠤᠲᠠᠨ ᠭᠤᠸᠠᠢ ᠪᠠᠰᠠ ᠥᠨᠦᠳᠦᠷ ᠠᠳᠤᠭᠤᠨ ᠳᠡᠭᠡᠷᠡ ᠬᠦᠷᠴᠡᠢ᠃ ᠲᠡᠭᠡᠭᠡᠳ ᠁》 ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠭᠡᠳ: 《ᠨᠠᠮᠠᠢ ᠶᠡᠬᠡᠯᠡ ᠮᠠᠭᠲᠠᠵᠤ᠂ ᠡᠪᠦᠭᠡ ᠠᠪᠤᠲᠠᠢᠪᠠᠨ ᠡᠭᠡᠭᠡ ᠠᠳᠠᠯᠢᠬᠠᠨ᠂ ᠠᠳᠤᠭᠤ ᠮᠠᠯᠳᠤ ᠳᠡᠮᠲᠡᠢ ᠰᠠᠢᠨ ᠡᠷᠡ ᠪᠣᠯᠵᠠᠢ ᠭᠡᠯᠡ᠃ ᠲᠡᠭᠡᠭᠡᠳ ᠪᠠᠰᠠ ᠣᠩᠭᠤᠨ ᠪᠣᠷᠤ ᠭᠡᠳᠡᠭ ᠮᠣᠷᠢᠶᠢ ᠭᠣᠣᠯ ᠬᠠᠷᠠᠢᠯᠭᠠᠨ ᠪᠠᠷᠢᠵᠤ ᠪᠠᠢᠭᠰᠠᠨ ᠡᠪᠦᠭᠡ ᠠᠪᠤᠶᠢᠨ ᠵᠠᠯᠠᠭᠤᠶᠢᠨ ᠦᠯᠢᠭᠡᠷᠢ ᠣᠯᠠᠨᠳᠤ ᠶᠠᠷᠢᠵᠤ᠂ ᠲᠠᠨᠢ 〈ᠨᠤᠲᠤᠭᠤᠨ ᠴᠢᠮᠡᠭ ᠪᠣᠯᠵᠤ ᠶᠠᠪᠤᠭᠰᠠᠨ ᠰᠠᠢᠨ ᠡᠷᠡᠶᠦᠮ ᠰᠢᠤ -〉 ᠭᠡᠵᠦ ᠮᠠᠭᠲᠠᠯᠠ》 ᠭᠡᠰᠡᠨᠳᠦ ᠡᠪᠦᠭᠡ ᠠᠪᠤᠨᠢ ᠬᠠᠷᠢᠨ ᠪᠠᠶᠠᠷᠯᠠᠭᠰᠠᠨᠦᠭᠡᠢ ᠮᠥᠷᠲᠡᠭᠡᠨ ᠳᠤᠷᠠᠦᠭᠡᠢᠨᠢ ᠬᠦᠷᠴᠦ:
《ᠠᠢ᠂ ᠮᠠᠭᠤ ᠬᠠᠷᠠ ᠵᠥᠨᠦᠭ! ᠪᠢ ᠲᠠᠯᠠᠳᠤᠨᠢ ᠪᠠᠢᠭᠰᠠᠨ ᠪᠣᠯ ᠬᠣᠩᠰᠢᠶᠠᠷᠢᠨᠢ ᠰᠢᠯᠪᠤ ᠴᠣᠬᠢᠬᠤ ᠪᠠᠢᠭᠰᠠᠨᠶᠤᠮ》 ᠭᠡᠵᠦ ᠳᠣᠷᠵᠢᠶᠢ ᠴᠠᠭᠠᠬᠠᠨ ᠰᠡᠳᠭᠢᠯᠢᠶᠡᠷ ᠬᠠᠷᠢᠶᠠᠵᠤ 《ᠶᠠᠮᠠᠷᠯᠠ ᠰᠠᠢᠨ ᠡᠷᠡ ᠪᠣᠯᠵᠤ ᠶᠠᠪᠤᠭᠰᠠᠨᠳᠤᠨᠢ ᠨᠤᠲᠤᠭᠤᠨ ᠴᠢᠮᠡᠭ ᠭᠡᠬᠦᠶᠦᠮ ᠪᠤᠢ! ᠵᠠᠬᠢᠳᠠᠯ ᠤᠩᠰᠢᠵᠤ ᠴᠢᠳᠠᠬᠤᠦᠭᠡᠢ ᠵᠠᠵᠢᠶᠢᠨ ᠦᠰᠦ ᠴᠠᠢᠯᠭᠠᠭᠰᠠᠨ ᠰᠣᠬᠤᠷ》 ᠭᠡᠵᠦ ᠬᠡᠯᠡᠭᠡᠳ ᠢᠴᠢᠵᠦ ᠬᠠᠷᠠᠮᠰᠠᠭᠰᠠᠨ ᠪᠠᠢᠳᠠᠯᠲᠠᠢ ᠰᠠᠨᠠᠭᠠ ᠠᠯᠳᠠᠨ ᠪᠣᠳᠤᠯᠭᠠᠰᠢᠷᠠᠵᠤ ᠰᠠᠭᠤᠪᠠ᠃
ᠨᠥᠭᠦᠭᠡ ᠭᠡᠷᠡᠴᠡ 《ᠡᠮᠡᠭᠡᠯᠢᠶᠡᠨ ᠪᠠᠯᠪᠠᠯᠴᠢᠬᠠᠯᠠ》 ᠭᠡᠬᠦ ᠦᠭᠡᠶᠢ ᠬᠠᠯᠲᠤ ᠰᠣᠨᠤᠰᠤᠭᠰᠠᠨ ᠡᠮᠡᠭᠡ ᠡᠵᠢᠨᠢ ᠪᠠᠷᠢᠵᠤ ᠲᠠᠯᠪᠢᠭᠰᠠᠨᠢᠶᠠᠨ ᠬᠠᠶᠠᠭᠠᠳ ᠰᠠᠮᠭᠠᠷᠳᠠᠨ ᠭᠦᠶᠦᠵᠦ ᠢᠷᠡᠬᠦᠳᠦᠨᠢ 《ᠲᠤᠢᠯᠠᠭᠠᠨᠳᠤᠨᠢ ᠁ ᠣᠢᠴᠢᠭᠰᠠᠨᠦᠭᠡᠢ》 ᠭᠡᠵᠦ ᠡᠪᠦᠭᠡ ᠠᠪᠤ᠂ ᠠᠴᠢ ᠬᠦᠦ ᠬᠣᠶᠠᠭᠤᠯᠠ ᠬᠡᠯᠡᠯᠴᠡᠵᠦ ᠪᠠᠢᠪᠠ᠃ ᠲᠡᠭᠡᠭᠡᠳ ᠬᠦᠦᠶᠢᠨᠢᠶᠡᠨ ᠮᠡᠨᠳᠦ ᠰᠠᠢᠬᠠᠨ ᠪᠠᠢᠬᠤᠶᠢ ᠦᠵᠡᠭᠡᠳ ᠡᠮᠡᠭᠡ ᠡᠵᠢᠨᠢ ᠵᠦᠭᠡᠷᠯᠡ 《ᠬᠦᠦᠮᠢᠨᠢ! ᠦᠷᠡᠮᠢᠨᠢ!》 ᠭᠡᠬᠦᠡᠴᠡ ᠥᠭᠡᠷᠡ ᠦᠭᠡᠦᠭᠡᠢᠪᠡᠷ ᠪᠠᠲᠤᠥ᠌ᠯᠵᠡᠢᠪᠡᠨ ᠬᠠᠷᠠᠨ ᠵᠣᠭᠰᠤᠵᠤ ᠪᠠᠢᠭᠰᠠᠨᠢᠶᠠᠨ ᠭᠡᠨᠡᠳᠲᠡ ᠤᠬᠠᠭᠠᠷᠠᠭᠰᠠᠨ ᠮᠡᠲᠦᠪᠡᠷ ᠰᠠᠩᠳᠠ ᠮᠡᠩᠳᠡ ᠴᠠᠢ ᠠᠶᠠᠭᠠᠯᠠᠵᠤ ᠥᠭᠪᠡ᠃
ᠡᠪᠦᠭᠡ ᠠᠪᠤᠨᠢ ᠲᠠᠮᠠᠬᠢ ᠲᠠᠲᠠᠵᠤ ᠪᠠᠷᠠᠭᠠᠳ ᠭᠠᠩᠰᠠᠪᠠᠨ ᠵᠦᠯᠭᠦᠨ ᠲᠥᠪᠯᠡᠭᠦᠨᠢᠶᠡᠷ:
《ᠵᠠ ᠬᠦᠦᠮᠢᠨᠢ᠂ ᠴᠢ ᠰᠣᠨᠤᠰ!》 ᠭᠡᠳ ᠬᠥᠭᠰᠢᠨ ᠤᠷᠤᠭᠤᠪᠠᠨ ᠬᠠᠷᠠᠵᠤ: 《ᠡᠮᠡᠭᠡ ᠡᠵᠢᠨᠢ ᠪᠠᠰᠠ ᠰᠠᠭᠤᠵᠤ ᠪᠠᠢ!》 ᠭᠡᠪᠡ᠃
ᠪᠠᠲᠤᠥ᠌ᠯᠵᠡᠢ 《ᠵᠠ!》 ᠭᠡᠵᠦ ᠠᠶᠠᠭᠠᠪᠠᠨ ᠲᠠᠯᠪᠢᠪᠠ᠃
ᠡᠪᠦᠭᠡ ᠠᠪᠤᠨᠢ ᠡᠨᠡ ᠡᠳᠦᠷ ᠬᠣᠰᠢᠭᠤᠨ ᠳᠡᠭᠡᠷᠡ ᠬᠦᠷᠴᠦ᠂ ᠪᠠᠲᠤᠥ᠌ᠯᠵᠡᠢᠶᠢᠨ ᠡᠴᠢᠭᠡ ᠡᠬᠡᠶᠢᠨᠢ ᠨᠢᠭᠡᠨᠲᠡ ᠴᠠᠭᠠᠳᠭᠠᠭᠰᠠᠨ ᠲᠤᠯᠠ ᠡᠨᠡ ᠵᠢᠯ ᠪᠠᠲᠤᠥ᠌ᠯᠵᠡᠢᠪᠡᠨ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠶᠠᠪᠤᠭᠤᠯᠪᠠᠯ ᠪᠣᠯᠳᠠᠭᠶᠤᠮ ᠪᠣᠯᠤᠤ? ᠭᠡᠵᠦ ᠬᠡᠴᠢᠨᠡᠨ ᠵᠢᠯᠢᠶᠡᠷ ᠡᠪᠡᠳᠴᠢᠨ ᠪᠣᠯᠲᠠᠯᠠᠪᠠᠨ ᠪᠣᠳᠤᠵᠤ ᠶᠠᠪᠤᠭᠰᠠᠨ ᠦᠭᠡᠪᠡᠨ ᠰᠤᠷᠭᠠᠨ ᠬᠥᠮᠦᠵᠢᠯᠦᠨ ᠲᠣᠪᠴᠢᠶᠠᠳᠤ ᠠᠵᠢᠯᠯᠠᠳᠠᠭ ᠬᠦᠦᠶᠢᠨᠢᠶᠡᠨ ᠨᠢᠭᠡ ᠨᠠᠢᠵᠠᠳᠤ ᠶᠠᠷᠢᠵᠤ᠂ ᠪᠣᠯᠪᠠᠯ ᠠᠴᠢ ᠬᠦᠦᠪᠡᠨ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠬᠦᠷᠭᠡᠯᠭᠡᠬᠦ ᠲᠤᠬᠠᠢ ᠨᠢᠭᠡᠨ ᠰᠠᠢᠨ ᠠᠷᠭᠠ ᠵᠥᠪᠳᠡᠯᠴᠡᠬᠦ ᠰᠠᠨᠠᠭᠠᠲᠠᠢ ᠪᠠᠢᠵᠠᠢ᠃ ᠭᠡᠲᠡᠯᠡ ᠡᠨᠡ ᠵᠢᠯᠡᠴᠡ ᠡᠬᠢᠯᠡᠵᠦ ᠶᠡᠬᠡ ᠰᠤᠷᠭᠠᠭᠤᠯᠢ ᠰᠤᠷᠤᠭᠴᠢ ᠰᠢᠯᠭᠠᠵᠤ᠂ ᠰᠠᠢᠨᠢᠨᠢ ᠰᠣᠩᠭᠤᠨ ᠠᠪᠬᠤ ᠪᠣᠯᠤᠭᠰᠠᠨᠢ ᠰᠣᠨᠤᠰᠤᠭᠠᠳ ᠲᠡᠰᠭᠡᠯᠦᠭᠡᠢ ᠪᠠᠶᠠᠷᠯᠠᠵᠤ: 《ᠲᠡᠢᠮᠦ ᠪᠣᠯᠤᠭᠰᠠᠨᠴᠤ ᠪᠣᠯ ᠭᠠᠢᠭᠤᠢ᠂ ᠠᠪᠠᠭᠠᠨᠢ ᠲᠠ ᠪᠠᠰᠠ ᠳᠠᠪᠲᠠᠯᠭᠠ ᠬᠢᠬᠦᠳᠦᠨᠢ ᠬᠠᠪᠰᠤᠷᠴᠤ ᠠᠯᠢ ᠳ᠋ᠠ !》 ᠭᠡᠵᠦ ᠭᠤᠶᠤᠭᠠᠳ ᠭᠠᠷᠴᠤ ᠢᠷᠡᠵᠡᠢ᠃ ᠡᠭᠦᠨᠢᠶᠡᠨ ᠶᠠᠷᠢᠵᠤ ᠪᠠᠷᠠᠭᠠᠳ:
《ᠵᠠ ᠬᠦᠦᠮᠢᠨᠢ᠂ ᠡᠨᠡ ᠵᠢᠯ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠰᠢᠯᠭᠠᠭᠤᠯ! ᠡᠮᠨᠢᠭᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠳᠡᠭᠲᠡᠢᠪᠡᠨ ᠠᠳᠠᠯᠢᠪᠠᠷ ᠡᠷᠳᠡᠮᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡ!》 ᠭᠡᠵᠡᠢ᠃ ᠪᠠᠲᠤᠥ᠌ᠯᠵᠡᠢ ᠲᠦᠷ ᠪᠣᠳᠤᠯᠬᠢᠯᠠᠭᠠᠳ:
《ᠪᠢ ᠶᠠᠪᠤᠴᠢᠬᠠᠭᠠᠳ ᠡᠪᠦᠭᠡ ᠠᠪᠤ᠂ ᠡᠮᠡᠭᠡ ᠡᠵᠢᠮᠢᠨᠢ᠁》 ᠭᠡᠲᠡᠯᠡ ᠡᠪᠦᠭᠡ ᠠᠪᠤᠨᠢ ᠲᠣᠰᠴᠤ:
《ᠪᠢᠳᠡ ᠬᠣᠶᠠᠷ᠂ ᠨᠠᠰᠤ ᠠᠬᠢᠭᠰᠠᠨ ᠪᠣᠯᠪᠠᠴᠤ ᠴᠢᠳᠠᠯ ᠲᠡᠩᠬᠡᠯᠲᠡᠢ ᠪᠠᠢᠭᠰᠠᠭᠠᠷ ᠡ᠃ ᠬᠡᠳᠦᠨ ᠮᠠᠯ ᠮᠠᠯᠵᠢᠴᠢᠬᠠᠪᠠᠯ ᠪᠣᠯᠬᠤᠨᠢ ᠲᠡᠷᠡ! ᠬᠠᠷᠢᠨ ᠲᠠᠨᠠᠷ ᠪᠤᠰᠤᠳᠲᠠᠢ ᠠᠳᠠᠯᠢ ᠲᠡᠭᠰᠢ ᠶᠠᠪᠤᠶᠠ ᠭᠡᠪᠡᠯ ᠶᠠᠭᠠᠬᠢᠭᠰᠠᠨᠴᠤ ᠡᠷᠳᠡᠮ ᠮᠡᠳᠡᠯᠭᠡ ᠰᠤᠷᠴᠤ ᠡᠵᠡᠮᠰᠢᠬᠦ ᠬᠡᠷᠡᠭᠲᠡᠢ᠃ ᠢᠩᠭᠢᠪᠡᠯ ᠥᠪᠡᠷᠦᠨ ᠪᠡᠶᠡᠴᠢᠨᠢ ᠬᠥᠮᠦᠨᠳᠦ ᠳᠠᠷᠤᠯᠠᠭᠳᠠᠬᠤᠦᠭᠡᠢ ᠪᠣᠯᠬᠤ ᠪᠥᠭᠡᠳ ᠡᠷᠳᠡᠮᠲᠡᠨ ᠬᠥᠮᠦᠨ ᠣᠯᠠᠨ ᠪᠣᠯᠪᠠᠯ ᠤᠭᠰᠠᠭᠠ ᠦᠨᠳᠦᠰᠦᠲᠡᠨᠴᠢᠨᠢ ᠪᠠᠰᠠ ᠪᠤᠰᠤᠳᠲᠤ ᠳᠣᠷᠤᠮᠵᠢᠯᠠᠭᠳᠠᠬᠤᠦᠭᠡᠢ ᠪᠣᠯᠤᠨᠠ᠃ ᠡᠭᠦᠨᠢ ᠮᠡᠳᠡᠵᠦ ᠠᠪᠬᠤ ᠬᠡᠷᠡᠭᠲᠡᠢ᠃ ᠮᠠᠨᠠᠢᠬᠢᠨᠤ ᠬᠡᠯᠡᠳᠡᠭ 〈ᠰᠠᠢᠨ ᠡᠷᠡ ᠨᠤᠲᠤᠭᠤᠨ ᠴᠢᠮᠡᠭ〉 ᠭᠡᠳᠡᠭᠨᠢ ᠠᠮᠢᠳᠤᠷᠠᠯᠤᠨ ᠲᠠᠯᠠᠠᠴᠠ ᠬᠡᠯᠡᠪᠡᠯ: ᠰᠠᠢᠨ ᠪᠥᠬᠡᠴᠢᠨ᠂ ᠰᠠᠢᠨ ᠠᠳᠤᠭᠤᠴᠢᠨ᠂ ᠡᠮᠨᠢᠭᠴᠢᠨᠢᠶᠡᠨ ᠬᠦᠨᠳᠦᠳᠭᠡᠨ ᠬᠡᠯᠡᠭᠰᠡᠨ ᠲᠡᠳᠦᠢᠶᠦᠮ᠃ ᠬᠠᠷᠢᠨ ᠡᠷᠳᠡᠮ ᠮᠡᠳᠡᠯᠭᠡᠲᠡᠢ ᠬᠥᠮᠦᠨ ᠪᠣᠯᠴᠢᠬᠠᠪᠠᠯ ᠨᠤᠲᠤᠭᠤᠨ ᠴᠢᠮᠡᠭ ᠪᠣᠯᠬᠤᠪᠠᠷ ᠪᠠᠷᠠᠬᠤᠦᠭᠡᠢ᠂ ᠦᠨᠳᠦᠰᠦᠲᠡᠨᠦᠪᠡᠨ ᠴᠢᠮᠡᠭ᠂ ᠡᠬᠡ ᠣᠷᠤᠨᠤᠪᠠᠨ ᠴᠢᠮᠡᠭ ᠪᠣᠯᠵᠤ ᠴᠢᠳᠠᠬᠤᠶᠤᠮ》 ᠭᠡᠵᠦ ᠤᠳᠭᠠ ᠲᠡᠭᠦᠯᠳᠡᠷ ᠦᠭᠡᠶᠢ ᠭᠦᠨ ᠪᠣᠳᠤᠯᠭᠠᠲᠠᠢ ᠶᠠᠷᠢᠵᠠᠢ᠃
ᠪᠠᠲᠤᠥ᠌ᠯᠵᠡᠢ ᠨᠡᠭᠡᠷᠡᠨ 《ᠡᠮᠨᠢᠭᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠳᠡᠭᠲᠡᠢᠪᠡᠨ ᠠᠳᠠᠯᠢ ᠡᠷᠳᠡᠮᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠬᠦ》ᠪᠡᠷ ᠲᠡᠮᠡᠴᠡᠭᠰᠡᠨᠦ ᠳ᠋ᠦᠩᠳᠦ ᠲᠡᠷᠡ ᠵᠢᠯᠳᠡᠭᠡᠨ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠰᠢᠯᠭᠠᠭᠳᠠᠨ ᠣᠷᠤᠪᠠ᠃ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠶᠠᠪᠤᠬᠤᠳᠤᠨᠢ ᠡᠪᠦᠭᠡ ᠠᠪᠤᠨᠢ ᠤᠯᠠᠭᠠᠨ ᠪᠤᠭᠤᠷᠤᠯᠢᠶᠠᠨ ᠤᠨᠤᠵᠤ᠂ ᠪᠠᠲᠤᠥ᠌ᠯᠵᠡᠢᠳᠦ ᠭᠠᠩᠭᠠᠩ ᠰᠠᠷᠠᠯᠢᠨᠢ ᠤᠨᠤᠭᠤᠯᠤᠭᠠᠳ ᠲᠡᠷᠭᠡᠨ ᠥᠷᠲᠡᠭᠡᠨᠳᠦ ᠬᠦᠷᠭᠡᠪᠡ᠃ ᠬᠠᠢᠷᠠᠲᠤ ᠡᠮᠡᠭᠡ ᠡᠵᠢᠨᠢ ᠠᠷᠤᠳᠤᠨᠢ ᠰᠦ᠋ ᠡᠷᠭᠦᠵᠦ ᠠᠯᠤᠰᠤᠨ ᠵᠠᠮᠳᠠᠭᠠᠨ ᠥᠯᠵᠡᠢ ᠮᠥᠷᠲᠡᠢ ᠶᠠᠪᠤᠭᠠᠷᠠᠢ ᠭᠡᠵᠦ ᠪᠡᠯᠭᠡᠳᠡᠨ ᠨᠢᠯᠪᠤᠰᠤ ᠠᠰᠭᠠᠷᠠᠭᠤᠯᠤᠨ ᠬᠣᠴᠤᠷᠴᠠᠢ᠃
ᠭᠠᠩᠭᠠᠩ ᠰᠡᠷᠡᠯᠨᠢ ᠪᠠᠲᠤᠥ᠌ᠯᠵᠡᠢᠶᠢᠨ ᠡᠷᠳᠡᠮᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠬᠦᠪᠡᠷ ᠮᠣᠷᠳᠠᠬᠤ ᠠᠶᠠᠨᠤ ᠠᠩᠬᠠᠨᠤ ᠬᠦᠯᠦᠭ ᠪᠣᠯᠵᠤ᠂ ᠬᠤᠢᠯᠠᠷᠠᠨ ᠨᠡᠭᠦᠬᠦ ᠬᠤᠷᠮᠤᠰᠲᠠᠶᠢᠨ ᠴᠠᠭᠠᠨ ᠡᠭᠦᠯᠡᠰᠢᠭ ᠬᠥᠩᠭᠡᠨ ᠬᠤᠷᠳᠤᠨ ᠶᠠᠪᠤᠭᠰᠠᠨ ᠪᠥᠭᠡᠳ ᠰᠡᠭᠦᠯᠡᠷᠨᠢ ᠬᠣᠰᠢᠭᠤ ᠨᠤᠲᠤᠭᠤᠨᠢᠶᠠᠨ ᠨᠠᠢᠷ ᠨᠠᠭᠠᠳᠤᠮᠳᠤ ᠲᠣᠭᠤᠰᠤᠪᠠᠨ ᠡᠷᠭᠦᠵᠦ᠂ ᠴᠣᠯᠠᠪᠠᠨ ᠳᠠᠭᠤᠳᠠᠭᠤᠯᠵᠤ ᠶᠠᠪᠤᠵᠠᠢ᠃
ᠪᠠᠲᠤᠥ᠌ᠯᠵᠡᠢ ᠡᠪᠦᠯ᠂ ᠵᠤᠨᠤ ᠠᠮᠠᠷᠠᠯᠲᠠᠶᠢᠨ ᠴᠢᠯᠦᠭᠡᠨᠳᠡᠭᠡᠨ ᠬᠠᠷᠢᠳᠠᠭ᠃ ᠡᠪᠦᠭᠡ ᠠᠪᠤᠨᠢ ᠮᠥᠨ ᠲᠡᠷᠭᠡᠨ ᠥᠷᠲᠡᠭᠡᠨᠳᠦ ᠬᠦᠷᠭᠡᠵᠦ᠂ ᠡᠮᠡᠭᠡ ᠡᠵᠢᠨᠢ ᠠᠷᠤᠳᠤᠨᠢ ᠰᠦ᠋ᠪᠡᠨ ᠡᠷᠭᠦᠵᠦ ᠬᠣᠴᠤᠷᠳᠠᠭ ᠪᠠᠢᠯᠠ᠃ ᠭᠡᠲᠡᠯᠡ ᠥᠩᠭᠡᠷᠡᠬᠦ ᠡᠪᠦᠯ ᠬᠠᠷᠢᠬᠤᠳᠤᠨᠢ ᠡᠪᠦᠭᠡ ᠠᠪᠤᠨᠢ 《ᠶᠡᠬᠡ ᠰᠤᠷᠭᠠᠭᠤᠯᠢᠪᠠᠨ ᠲᠡᠭᠦᠰᠭᠡᠪᠡᠯ ᠴᠠᠰᠢᠨᠢ ᠥᠭᠡᠷᠡ ᠰᠤᠷᠬᠤ ᠭᠠᠵᠠᠷ ᠪᠠᠢᠳᠠᠭᠤᠤ?》 ᠭᠡᠵᠦ ᠠᠰᠠᠭᠤᠵᠠᠢ᠃ 《ᠴᠠᠰᠢᠨᠢ ᠰᠤᠷᠤᠯᠴᠠᠪᠠᠯ᠂ ᠠᠰᠫᠢᠷᠠᠨᠲ ᠰᠢᠯᠭᠠᠭᠤᠯᠤᠨᠠ ᠰᠢᠤ》 ᠭᠡᠵᠦ ᠪᠠᠲᠤᠥ᠌ᠯᠵᠡᠢ ᠬᠠᠷᠢᠭᠤᠯᠤᠭᠠᠳ᠂ ᠬᠡᠷᠪᠡ ᠲᠡᠭᠦᠨᠢᠶᠡᠨ ᠰᠢᠯᠢᠳᠡᠭ ᠠᠮᠵᠢᠯᠲᠠᠲᠠᠢ ᠲᠡᠭᠦᠰᠭᠡᠪᠡᠯ ᠶᠠᠮᠠᠷ ᠵᠦᠢᠯᠦᠨ ᠡᠷᠳᠡᠮᠦᠨ ᠴᠣᠯᠠ ᠬᠠᠮᠠᠭᠠᠯᠠᠬᠤ ᠵᠡᠷᠭᠡᠶᠢ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠵᠠᠢ᠃ ᠡᠪᠦᠭᠡ ᠠᠪᠤᠨᠢ ᠡᠨᠡ ᠲᠤᠬᠠᠢ ᠪᠠᠬᠠᠨ ᠠᠰᠠᠭᠤᠵᠤ ᠯᠠᠪᠯᠠᠭᠠᠳ᠂ ᠪᠠᠰᠠ ᠨᠢᠭᠡ ᠤᠳᠠᠭᠠ ᠬᠣᠰᠢᠭᠤᠨ ᠳᠡᠭᠡᠭᠦᠷ ᠶᠠᠪᠤᠵᠤ ᠢᠷᠡᠭᠡᠳ ᠪᠠᠲᠤᠥ᠌ᠯᠵᠡᠢᠶᠢ ᠰᠤᠷᠭᠠᠭᠤᠯᠢᠳᠠᠭᠠᠨ ᠶᠠᠪᠤᠬᠤᠶᠢᠨ ᠶᠠᠭ ᠲᠦᠷᠦᠭᠦᠦ ᠣᠷᠤᠢ ᠭᠡᠷ ᠪᠦᠯᠢᠶᠢᠨ ᠬᠤᠷᠠᠯ ᠬᠢᠵᠦ᠂ ᠪᠠᠲᠤᠥ᠌ᠯᠵᠡᠢᠶᠢ ᠶᠡᠬᠡ ᠰᠤᠷᠭᠠᠭᠤᠯᠢᠪᠠᠨ ᠲᠡᠭᠦᠰᠭᠡᠮᠡᠭᠴᠡ ᠠᠰᠫᠢᠷᠠᠨᠲ ᠰᠢᠯᠭᠠᠭᠤᠯᠬᠤᠶᠢ ᠬᠡᠯᠡᠯᠴᠡᠨ ᠲᠣᠭᠲᠠᠵᠠᠢ᠃ ᠲᠡᠢᠮᠦᠡᠴᠡ ᠪᠠᠲᠤᠥ᠌ᠯᠵᠡᠢ ᠠᠰᠫᠢᠷᠠᠨᠲ ᠰᠢᠯᠭᠠᠭᠤᠯᠬᠤᠶᠢᠨ ᠲᠥᠯᠦᠭᠡ ᠰᠤᠷᠭᠠᠭᠤᠯᠢ ᠲᠡᠭᠦᠰᠬᠦ ᠥᠭᠦᠯᠡᠯᠲᠡᠢᠪᠡᠨ ᠵᠡᠷᠭᠡᠴᠡᠭᠦᠯᠵᠦ ᠬᠠᠭᠠᠰ ᠵᠢᠯ ᠢᠯᠡᠭᠦᠦᠶᠢᠨ ᠰᠢᠷᠭᠠᠭᠤ ᠪᠡᠯᠡᠳᠭᠡᠯ ᠬᠢᠪᠡ᠃ ᠡᠨᠡ ᠬᠤᠭᠤᠴᠠᠭᠠᠨᠳᠤ ᠡᠷᠲᠡ ᠪᠣᠰᠴᠤ ᠣᠷᠤᠢ ᠤᠨᠲᠠᠨ᠂ ᠬᠢᠴᠢᠶᠡᠯᠦᠨ ᠭᠡᠷ᠂ ᠨᠣᠮ ᠤᠩᠰᠢᠬᠤ ᠲᠠᠰᠤᠯᠭᠠᠠᠴᠠ ᠡᠬᠢᠯᠡᠨ ᠮᠣᠳᠤᠨᠤ ᠰᠡᠭᠦᠳᠡᠷ᠂ ᠬᠦᠷᠢᠶᠡᠨ ᠪᠤᠯᠤᠩ᠂ ᠬᠠᠮᠢᠭᠠ ᠰᠡᠯᠡᠭᠦᠦ ᠪᠣᠯ ᠲᠡᠨᠳᠡ ᠣᠴᠢᠵᠤ᠂ ᠤᠩᠰᠢᠬᠤ ᠴᠡᠭᠡᠵᠢᠯᠡᠬᠦ ᠰᠤᠷᠬᠤ ᠰᠤᠳᠤᠯᠬᠤ ᠵᠡᠷᠭᠡᠳᠦ ᠬᠣᠭᠤᠯᠠ ᠨᠣᠢᠷᠦᠭᠡᠢ ᠲᠡᠮᠡᠴᠡᠭᠰᠡᠨ ᠠᠵᠢ᠃
ᠴᠠᠬᠢᠯᠭᠠᠨ ᠬᠣᠩᠬᠤ ᠲᠠᠷᠴᠢᠭᠢᠨᠠᠨ ᠳᠤᠤᠭᠠᠷᠪᠠ᠃ ᠪᠠᠲᠤᠥ᠌ᠯᠵᠡᠢ ᠴᠠᠭᠢᠶᠠᠨ ᠦᠵᠡᠭᠰᠡᠨᠳᠦ ᠲᠡᠷᠡᠨᠢ ᠰᠢᠯᠭᠠᠯᠲᠠᠶᠢᠨ ᠲᠠᠯᠠᠪᠤᠷᠲᠤ ᠣᠷᠤᠬᠤ ᠪᠡᠯᠡᠳᠭᠡᠯᠦᠨ ᠳᠣᠬᠢᠶᠠ ᠪᠠᠢᠪᠠ᠃ ᠪᠠᠲᠤᠥ᠌ᠯᠵᠡᠢ ᠰᠠᠨᠠᠭᠠᠯᠵᠠᠯᠠᠯᠠᠴᠠᠪᠠᠨ ᠰᠡᠷᠭᠦᠵᠦ᠂ ᠭᠦᠶᠦᠨ ᠪᠣᠰᠤᠭᠠᠳ ᠨᠠᠷᠢᠨ ᠬᠢᠴᠡᠲᠡᠢ ᠨᠢᠮᠪᠠᠢ ᠬᠠᠳᠠᠭᠠᠯᠠᠭᠰᠠᠨ ᠲᠣᠯᠢᠨᠳᠠᠭᠠᠨ ᠪᠡᠶᠡᠪᠡᠨ ᠲᠣᠯᠢᠳᠠᠵᠤ ᠪᠦᠰᠡᠪᠡᠨ ᠵᠠᠰᠠᠪᠠ᠃ ᠲᠡᠭᠡᠭᠡᠳ ᠮᠠᠨᠤ ᠵᠠᠯᠠᠭᠤ ᠡᠷᠳᠡᠮᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠬᠦᠪᠡᠷ ᠡᠮᠨᠢᠭᠦᠨ ᠨᠢᠷᠤᠭᠤᠨᠳᠤ ᠡᠷᠡᠯᠬᠡᠭᠯᠡᠵᠦ ᠶᠠᠪᠤᠭᠰᠠᠨ ᠢᠳᠡᠷᠡᠭᠦᠨ ᠬᠥᠯᠢᠶᠡᠷᠢᠶᠡᠨ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠰᠠᠷᠠᠭᠤᠯ ᠭᠡᠭᠡᠨ ᠰᠢᠯᠭᠠᠯᠲᠠᠶᠢᠨ ᠲᠠᠩᠬᠢᠮᠤᠨ ᠶᠡᠨᠳᠡᠷᠢ ᠡᠷᠡᠮᠡᠬᠡᠢ ᠴᠢᠮᠪᠠᠢ ᠠᠯᠬᠤᠴᠠᠪᠠᠷ ᠠᠪᠠᠷᠢᠪᠠ᠃