| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠳᠣᠯᠤᠭᠠ
ᠪᠠᠲᠤᠰᠦ᠋ᠬᠡ ᠨᠢᠳᠦᠪᠡᠨ ᠠᠯᠭᠤᠷ ᠨᠡᠭᠡᠭᠡᠪᠡ᠃ ᠪᠠᠢᠰᠢᠩ ᠭᠡᠷᠦᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠯᠠᠪᠤᠨ ᠭᠡᠷᠡᠯ ᠰᠠᠴᠤᠷᠠᠵᠤ᠂ ᠴᠠᠭᠠᠨ ᠬᠤᠪᠴᠠᠰᠤᠲᠠᠢ ᠡᠮᠴᠢ ᠬᠠᠵᠠᠭᠤᠳᠤᠨᠢ ᠵᠣᠭᠰᠤᠵᠤ ᠪᠠᠢᠪᠠ᠃ ᠰᠠᠨᠴᠢᠭᠤᠨ ᠦᠰᠦᠨᠢ ᠬᠤᠢᠬᠠᠯᠠᠭᠳᠠᠭᠰᠠᠨ ᠰᠠᠢᠬᠠᠨ ᠬᠡᠦᠬᠡᠨ ᠠᠶᠠᠭᠠᠲᠠᠢ ᠤᠰᠤ ᠪᠠᠷᠢᠭᠠᠳ ᠪᠠᠲᠤᠰᠦ᠋ᠬᠡᠶᠢᠨ ᠳᠡᠷᠭᠡᠳᠡ ᠵᠣᠭᠰᠤᠨᠠ᠃
ᠲᠡᠷᠲᠡᠭᠡ ᠬᠠᠨᠵᠤᠨ ᠪᠤᠯᠤᠩᠳᠤ ᠬᠥᠭᠰᠢᠨ ᠡᠵᠢ ᠬᠦᠦᠪᠡᠨ ᠲᠡᠪᠡᠷᠢᠵᠦ ᠰᠠᠭᠤᠨᠠ᠃ ᠲᠣᠯᠤᠭᠠᠢᠳᠠᠭᠠᠨ ᠴᠠᠭᠠᠨ ᠣᠷᠢᠶᠠᠯᠲᠠᠲᠠᠢ ᠬᠡᠦᠬᠡᠳ ᠪᠢᠴᠢᠬᠠᠨ ᠭᠠᠷᠢᠶᠠᠨ ᠰᠠᠪᠠᠯᠵᠠᠭᠤᠯᠤᠨ ᠪᠠᠲᠤᠰᠦ᠋ᠬᠡᠶᠢᠨ ᠵᠦᠭ ᠬᠠᠷᠠᠵᠤ ᠵᠤᠤᠮᠠᠭ ᠵᠤᠤᠮᠠᠭ ᠢᠨᠢᠶᠡᠬᠦᠳᠦ ᠪᠠᠲᠤᠰᠦ᠋ᠬᠡ ᠬᠡᠳᠦᠢᠪᠡᠷ ᠪᠦᠬᠦ ᠪᠡᠶᠡᠨᠢ ᠬᠠᠯᠠᠭᠤᠨ ᠣᠷᠭᠢᠵᠤ ᠰᠢᠲᠠᠭᠳᠠᠭᠰᠠᠨ ᠰᠢᠷᠬᠠᠨᠢ ᠬᠠᠳᠭᠤᠯᠠᠨ ᠡᠪᠡᠳᠪᠡᠴᠦ ᠴᠢᠷᠠᠢᠳᠤᠨᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠳᠦᠷᠢ ᠣᠷᠤᠪᠠ᠃ ᠲᠡᠷᠡ᠂ ᠡᠨᠡ ᠦᠶᠡᠳᠦ ᠳᠠᠢᠰᠤᠨᠤ ᠬᠦᠨᠳᠦ ᠫᠦᠯᠧᠮᠧᠲᠢ ᠣᠯᠵᠠᠯᠠᠭᠰᠠᠨᠠᠴᠠ ᠳᠣᠷᠤᠦᠭᠡᠢ ᠪᠠᠶᠠᠷᠯᠠᠵᠤ ᠴᠡᠭᠡᠵᠢᠨ ᠳᠣᠲᠤᠷᠠᠨᠢ ᠲᠤᠢᠯᠤᠨ ᠰᠠᠷᠠᠭᠤᠯ ᠲᠤᠩᠭᠠᠯᠠᠭ ᠰᠠᠨᠠᠭᠳᠠᠪᠠ᠃ ᠲᠡᠷᠡ᠂ ᠬᠣᠶᠠᠷ ᠭᠠᠷᠢᠶᠠᠨ ᠰᠠᠷᠪᠠᠢᠵᠤ ᠠᠶᠠᠭᠠᠲᠠᠢ ᠤᠰᠤᠶᠢ ᠠᠪᠬᠤᠳᠤ᠂ ᠵᠡᠭᠦᠨ ᠭᠠᠷᠢᠨᠢ ᠬᠦᠨᠳᠦ ᠶᠠᠭᠤᠮᠠᠪᠠᠷ ᠳᠠᠷᠤᠭᠰᠠᠨᠰᠢᠭ᠋ ᠰᠠᠨᠠᠭᠠᠶᠢᠨᠢ ᠳᠠᠭᠠᠬᠤᠦᠭᠡᠢ ᠪᠣᠯᠵᠠᠢ᠃ ᠪᠠᠷᠠᠭᠤᠨ ᠭᠠᠷᠢᠶᠠᠷᠢᠶᠠᠨ ᠠᠶᠠᠭᠠᠨᠤ ᠬᠥᠪᠡᠭᠡᠨᠡᠴᠡ ᠠᠳᠭᠤᠭᠠᠳ᠂ ᠬᠣᠶᠠᠷ ᠭᠠᠷ ᠲᠣᠯᠤᠭᠠᠢ ᠲᠦᠷᠦᠭᠦᠦᠶᠢᠨᠢ ᠴᠥᠮ ᠴᠠᠭᠠᠨ ᠪᠥᠰᠢᠶᠡᠷ ᠣᠷᠢᠶᠠᠭᠰᠠᠨᠢ ᠣᠯᠵᠤ ᠮᠡᠳᠡᠪᠡ᠃
ᠨᠢᠭᠡ ᠪᠠᠢᠯᠳᠤᠭᠴᠢ ᠲᠡᠭᠦᠨᠦ ᠬᠠᠵᠠᠭᠤᠳᠤ ᠰᠠᠭᠤᠵᠤ᠂ ᠡᠨᠡ ᠡᠳᠦᠷᠦᠨ ᠪᠠᠢᠯᠳᠤᠭᠠᠨᠤ ᠥᠩᠭᠡᠷᠡᠭᠡᠯᠢ ᠶᠠᠷᠢᠵᠤ ᠪᠠᠢᠪᠠ᠃ ᠭᠠᠯᠳᠤ ᠦᠰᠦᠷᠦᠨ ᠣᠷᠤᠵᠤ ᠲᠡᠷᠡ ᠬᠡᠦᠬᠡᠳᠢ ᠠᠪᠤᠷᠠᠭᠰᠠᠨ ᠪᠠ ᠰᠤᠮᠤᠨᠠᠴᠠᠪᠠᠨ ᠰᠠᠯᠵᠤ ᠳ᠋ᠢᠸᠢᠽᠢᠶᠢᠨ ᠡᠮᠨᠡᠯᠭᠡᠶᠢᠨ ᠭᠠᠵᠠᠷ ᠢᠷᠡᠵᠦ ᠡᠮᠨᠡᠭᠦᠯᠦᠭᠰᠡᠨ ᠵᠡᠷᠭᠡ ᠶᠠᠪᠤᠳᠠᠯᠤᠳᠨᠢ ᠪᠠᠲᠤᠰᠦ᠋ᠬᠡᠳᠦ ᠵᠡᠭᠦᠳᠦ ᠵᠡᠷᠭᠡᠯᠭᠡᠨᠰᠢᠭ ᠪᠣᠳᠤᠭᠳᠠᠪᠠ᠃ ᠰᠥᠨᠢ ᠭᠦᠨ ᠪᠣᠯᠵᠤ ᠬᠦᠴᠦᠲᠡᠢ ᠰᠠᠯᠬᠢᠨ ᠴᠣᠩᠬᠤᠨᠤ ᠴᠠᠭᠠᠰᠤᠶᠢ ᠦᠯᠢᠶᠡᠨᠡ᠃ ᠪᠠᠲᠤᠰᠦ᠋ᠬᠡᠶᠢᠨ ᠬᠠᠯᠠᠭᠠᠭᠳᠠᠭᠰᠠᠨ ᠰᠢᠷᠬᠠ ᠵᠢᠮᠵᠢᠭᠢᠨᠡᠨ ᠬᠠᠳᠭᠤᠯᠠᠨ ᠡᠪᠡᠳᠴᠦ᠂ ᠬᠠᠪᠤᠷᠤᠨ ᠰᠥᠨᠢ ᠲᠡᠭᠦᠨᠳᠦ ᠣᠨᠴᠠ ᠤᠷᠲᠤ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠪᠠ᠃
ᠪᠠᠲᠤᠰᠦ᠋ᠬᠡ ᠪᠠᠢᠨ ᠪᠠᠢᠨ ᠥᠨᠳᠡᠢᠵᠦ ᠲᠡᠷᠡ ᠥᠬᠢᠨᠢ ᠤᠨᠲᠠᠭᠠᠷᠠᠢ ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠶᠡᠷᠦ ᠨᠢᠳᠦ ᠠᠨᠢᠭᠰᠠᠨᠦᠭᠡᠢᠪᠠᠷ ᠪᠠᠲᠤᠰᠦ᠋ᠬᠡᠶᠢᠨ ᠳᠡᠷᠭᠡᠳᠡ ᠵᠣᠭᠰᠤᠵᠤ ᠬᠥᠨᠵᠢᠯᠡᠶᠢᠨᠢ ᠬᠤᠴᠢᠬᠤ ᠪᠤᠶᠤ ᠤᠰᠤᠶᠢᠨᠢ ᠪᠤᠴᠠᠯᠭᠠᠵᠤ ᠠᠰᠠᠷᠠᠨ ᠪᠠᠢᠭᠰᠠᠭᠠᠷ ᠴᠣᠩᠬᠤᠨ ᠳᠡᠭᠡᠷᠡ ᠨᠠᠷᠠ ᠲᠤᠰᠭᠠᠪᠠ᠃
ᠡᠨᠡ ᠥᠬᠢᠨ ᠪᠣᠯ ᠮᠥᠨ ᠭᠡᠷᠦᠨ ᠬᠥᠭᠰᠢᠨ ᠡᠵᠢᠶᠢᠨ ᠬᠡᠦᠬᠡᠨ ᠪᠣᠯᠤᠨᠠ᠃ ᠨᠡᠷᠡ ᠪᠠᠳᠮᠠ᠂ ᠨᠠᠰᠤ ᠠᠷᠪᠠᠨ ᠨᠠᠢ᠍ᠮᠠ᠂ ᠲᠠᠰ ᠬᠠᠷᠠ ᠭᠡᠵᠢᠭᠡᠲᠡᠢ᠂ ᠮᠣᠢᠯ ᠬᠠᠷᠠ ᠨᠢᠳᠦᠲᠡᠢ᠂ ᠮᠢᠬᠠᠯᠢᠭ ᠰᠠᠢᠬᠠᠨ ᠪᠡᠶᠡᠲᠡᠢ᠂ ᠦᠢᠯᠡ ᠠᠵᠢᠯᠳᠠᠭᠠᠨ ᠰᠠᠢᠨ ᠭᠡᠵᠦ ᠬᠣᠯᠠ ᠣᠢᠷᠠᠳᠠᠭᠠᠨ ᠠᠯᠳᠠᠷᠰᠢᠵᠠᠢ᠃
ᠲᠡᠭᠦᠨᠦ ᠡᠴᠢᠭᠡ ᠪᠥᠬᠡ ᠭᠡᠳᠡᠭ ᠡᠪᠦᠭᠡᠨ ᠪᠣᠯ ᠪᠠᠭᠤᠨ ᠳᠠᠷᠤᠭᠠᠶᠢᠨ ᠲᠤᠰᠢᠶᠠᠯᠲᠠᠢ᠂ ᠬᠤᠪᠢᠰᠭᠠᠯᠤᠨ ᠲᠠᠨᠢᠯᠲᠠᠪᠠᠷ ᠥᠨᠳᠦᠷ᠂ ᠰᠠᠢᠨ ᠮᠠᠯᠴᠢᠨ ᠪᠢᠯᠡ᠃ ᠪᠥᠬᠡ᠂ ᠬᠣᠰᠢᠭᠤᠨᠤ ᠴᠡᠷᠢᠭᠢ ᠬᠠᠪᠰᠤᠷᠴᠤ ᠬᠤᠪᠢᠰᠭᠠᠯᠤᠨ ᠡᠰᠡᠷᠭᠦᠴᠦᠳᠢ ᠳᠠᠷᠤᠩᠭᠤᠢᠯᠠᠵᠤ᠂ ᠳᠠᠢᠰᠤᠨᠲᠠᠢ ᠬᠣᠯᠪᠤᠯᠳᠤᠵᠤ ᠪᠠᠢᠭᠰᠠᠨ ᠬᠥᠮᠦᠰᠢ ᠦᠯᠡᠳᠡᠭᠡᠯᠦᠭᠡᠢ ᠪᠠᠷᠢᠪᠴᠢᠯᠠᠭᠰᠠᠨ ᠪᠥᠭᠡᠳ ᠳᠠᠢᠰᠤᠨᠤ ᠰᠤᠷᠠᠭ ᠴᠢᠮᠡᠭᠡᠶᠢ ᠴᠠᠭ ᠰᠠᠭᠠᠲᠠᠯᠦᠭᠡᠢᠪᠠᠷ ᠬᠤᠪᠢᠰᠭᠠᠯᠲᠤ ᠴᠡᠷᠢᠭᠲᠡᠭᠡᠨ ᠬᠦᠷᠭᠡᠵᠦ ᠬᠡᠳᠦᠨ ᠠᠷᠪᠠᠪᠠᠷ ᠰᠥᠨᠦᠭᠡᠳᠡᠭ ᠲᠤᠯᠠ ᠳᠣᠯᠤᠨ ᠨᠠᠭᠤᠷᠤᠨ ᠭᠣᠮᠢᠨᠳᠠᠩ ᠪᠠ ᠪᠤᠷᠢᠶᠠᠳᠤᠨ ᠬᠤᠯᠠᠭᠠᠢᠨᠤᠭᠤᠳ ᠲᠡᠭᠦᠨᠳᠦ ᠲᠤᠢᠯᠢᠶᠠᠷ ᠬᠣᠷᠤᠰᠴᠤ ᠪᠠᠢᠵᠠᠢ᠃
ᠥᠷᠯᠦᠭᠡ ᠴᠡᠷᠢᠭ ᠮᠣᠷᠳᠠᠬᠤ ᠳᠣᠬᠢᠶᠠ ᠲᠠᠯᠪᠢᠪᠠ᠃ ᠳ᠋ᠢᠸᠢᠽᠢᠶᠢᠨ ᠺᠣᠮᠢᠰᠰᠠᠷ᠂ ᠪᠠᠲᠤᠰᠦ᠋ᠬᠡᠶᠢᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠭᠡᠷᠦᠨ ᠬᠠᠭᠠᠯᠭᠠᠶᠢ ᠠᠯᠭᠤᠷ ᠨᠡᠭᠡᠭᠡᠨ ᠣᠷᠤᠵᠤ ᠢᠷᠡᠪᠡ᠃ ᠪᠠᠲᠤᠰᠦ᠋ᠬᠡ ᠺᠣᠮᠢᠰᠰᠠᠷᠤᠨ ᠭᠡᠷᠡᠯᠲᠡᠢ ᠨᠢᠭᠤᠷᠢ ᠦᠵᠡᠭᠡᠳ ᠥᠨᠳᠡᠢᠬᠦ ᠭᠡᠲᠡᠯᠡ ᠺᠣᠮᠢᠰᠰᠠᠷ ᠲᠡᠭᠦᠨᠦ ᠴᠡᠭᠡᠵᠢᠨ ᠳᠡᠭᠡᠷᠡ ᠳᠠᠷᠤᠵᠤ ᠬᠡᠪᠲᠡᠭᠦᠯᠦᠭᠡᠳ:
《ᠪᠢᠲᠡᠭᠡᠢ ᠬᠥᠳᠡᠯ᠂ ᠪᠢᠲᠡᠭᠡᠢ ᠬᠥᠳᠡᠯ!》 ᠭᠡᠵᠦ ᠮᠠᠭᠤᠬᠠᠨ ᠮᠣᠩᠭᠤᠯ ᠬᠡᠯᠡᠪᠡᠷ ᠶᠠᠷᠢᠪᠠ᠃
ᠺᠣᠮᠢᠰᠰᠠᠷ᠂ ᠡᠬᠡ ᠬᠥᠮᠦᠨ ᠬᠡᠦᠬᠡᠳᠢᠶᠡᠨ ᠰᠢᠷᠲᠡᠵᠦ ᠪᠠᠢᠭᠠᠰᠢᠭ᠋ ᠪᠠᠲᠤᠰᠦ᠋ᠬᠡᠶᠢ ᠡᠨᠡᠷᠢᠯᠲᠦ ᠬᠠᠷᠠᠴᠠᠪᠠᠷ ᠠᠩᠬᠠᠷᠤᠨ ᠦᠵᠡᠵᠦ᠂ ᠪᠠᠰᠠ ᠲᠡᠷᠲᠡᠭᠡ ᠬᠠᠨᠵᠤᠨ ᠳᠡᠭᠡᠷᠡᠬᠢ ᠡᠬᠡ ᠬᠦᠦ ᠬᠣᠶᠠᠷᠢ ᠲᠣᠬᠤᠨᠢᠭᠤᠯᠤᠨ ᠠᠰᠠᠭᠤᠬᠤᠳᠠᠭᠠᠨ᠂ ᠨᠥᠮᠦᠷᠭᠡᠶᠢᠨ ᠤᠭᠤᠲᠠᠨᠠᠴᠠᠪᠠᠨ ᠬᠡᠳᠦᠨ ᠵᠣᠭᠤᠰ ᠭᠠᠷᠭᠠᠵᠤ᠂ ᠪᠢᠴᠢᠬᠠᠨ ᠬᠦᠦᠳᠦ ᠠᠳᠭᠤᠭᠤᠯᠤᠭᠠᠳ ᠮᠣᠩᠭᠤᠯᠴᠤᠳᠤᠨ ᠵᠠᠩᠰᠢᠯᠢᠶᠠᠷ 《ᠪᠣᠭᠤᠷᠰᠤᠭ ᠠᠪᠴᠤ ᠢᠳᠡᠭᠡᠷᠡᠢ》 ᠭᠡᠪᠡ᠃ ᠬᠥᠭᠰᠢᠨ ᠲᠠᠯᠠᠷᠬᠠᠬᠤ ᠰᠡᠳᠭᠢᠯᠭᠡᠪᠡᠨ ᠪᠦᠷᠢᠨ ᠢᠯᠡᠳᠭᠡᠵᠦ ᠴᠢᠳᠠᠬᠤᠦᠭᠡᠢ ᠠᠷᠭᠠᠪᠠᠨ ᠪᠠᠷᠠᠵᠤ ᠨᠢᠳᠦᠨ ᠨᠢᠯᠪᠤᠰᠤ ᠪᠥᠮᠪᠦᠷᠢᠭᠦᠯᠦᠨ:
《ᠲᠠᠨᠤ ᠰᠠᠢᠨᠢ ᠪᠢ ᠦᠬᠦᠪᠡᠴᠦ ᠮᠠᠷᠲᠠᠬᠤᠦᠭᠡᠢ᠂ ᠲᠠ ᠪᠣᠯ ᠮᠢᠨᠦ ᠠᠮᠢ ᠭᠣᠣᠯᠢ ᠦᠬᠦᠯᠦᠨ ᠠᠶᠤᠯᠠᠴᠠ ᠠᠪᠤᠷᠠᠭᠰᠠᠨ ᠰᠢᠤ》 ᠭᠡᠬᠦᠳᠦ ᠺᠣᠮᠢᠰᠰᠠᠷ ᠢᠨᠢᠶᠡᠮᠰᠦᠭᠯᠡᠨ:
《ᠡᠨᠡ ᠪᠣᠯ ᠲᠡᠷᠢᠭᠦᠯᠡᠭᠴᠢ ᠮᠠᠤ ᠽᠧ ᠳ᠋ᠦᠩᠦᠨ ᠠᠴᠢᠶᠤᠮ ᠡ᠃ ᠲᠡᠷᠡ᠂ ᠪᠢᠳᠡᠨᠡᠷᠲᠦ ᠠᠷᠠᠳ ᠲᠦᠮᠡᠨᠦ ᠠᠰᠢᠭ ᠲᠤᠰᠠᠶᠢ ᠠᠮᠢ ᠪᠡᠶᠡᠡᠴᠡᠪᠡᠨ ᠢᠯᠡᠭᠦᠦ ᠬᠠᠢᠷᠠᠯᠠᠭᠠᠷᠠᠢ ᠭᠡᠵᠦ ᠰᠤᠷᠭᠠᠭᠰᠠᠨᠢᠶᠠᠷ ᠮᠠᠨᠤ ᠪᠠᠢᠯᠳᠤᠭᠴᠢ ᠥᠷᠭᠡᠨ ᠣᠯᠠᠨ ᠲᠦᠮᠡᠨᠦ ᠡᠭᠦᠷᠢᠳᠡᠶᠢᠨ ᠡᠷᠬᠡ ᠴᠢᠯᠦᠭᠡᠨᠦ ᠲᠥᠯᠦᠭᠡ ᠪᠠᠢᠯᠳᠤᠬᠤᠪᠠᠨ ᠶᠠᠭᠤᠨᠠᠴᠠᠴᠤ ᠡᠷᠬᠢᠮ ᠳᠡᠭᠡᠳᠦ ᠢᠷᠠᠭᠤ ᠠᠯᠳᠠᠷᠲᠠᠢ ᠦᠢᠯᠡᠰ ᠭᠡᠵᠦ ᠦᠵᠡᠳᠡᠭᠶᠦᠮ᠃ ᠡᠢᠮᠦ ᠤᠴᠢᠷᠠᠴᠠ ᠠᠷᠠᠳᠤᠨ ᠴᠡᠷᠢᠭ ᠡᠭᠦᠷᠢᠳᠡ ᠪᠠᠭᠠᠲᠤᠷ ᠵᠣᠷᠢᠭᠲᠠᠢ ᠢᠯᠠᠭᠳᠠᠰᠢᠦᠭᠡᠢ ᠬᠦᠴᠦᠨᠲᠡᠢ ᠪᠣᠯᠤᠭᠰᠠᠨᠶᠤᠮ》 ᠭᠡᠪᠡ᠃ ᠴᠢᠩᠭᠢᠭᠡᠳ ᠺᠣᠮᠢᠰᠰᠠᠷ᠂ ᠳᠠᠢᠰᠤᠨ ᠲᠡᠭᠦᠨᠦ ᠭᠡᠷᠢ ᠶᠠᠭᠤᠨᠤ ᠤᠴᠢᠷᠲᠤ ᠭᠠᠯᠳᠠᠭᠰᠠᠨᠢ ᠬᠥᠭᠰᠢᠨᠡᠴᠡ ᠠᠰᠠᠭᠤᠭᠰᠠᠨᠳᠤ᠂ ᠬᠥᠭᠰᠢᠨ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠭᠠᠳ:
《ᠬᠠᠭᠠᠰ ᠰᠠᠷᠠᠶᠢᠨ ᠡᠮᠦᠨᠡ᠂ ᠬᠣᠶᠠᠳᠤᠭᠠᠷ ᠰᠠᠷᠠᠶᠢᠨ ᠬᠣᠷᠢᠨᠤ ᠰᠥᠨᠢ ᠭᠤᠴᠢ ᠭᠠᠷᠤᠢ ᠳᠡᠭᠡᠷᠡᠮ ᠭᠡᠷᠢᠮᠢᠨᠢ ᠪᠦᠰᠡᠯᠡᠨ ᠠᠪᠴᠤ᠂ ᠠᠷᠰᠯᠠᠨ ᠱᠣᠩᠬᠤᠷ ᠬᠣᠶᠠᠷ ᠨᠣᠬᠠᠢᠶᠢᠮᠢᠨᠢ ᠫᠤᠤᠳᠠᠵᠤ ᠠᠯᠠᠭᠠᠳ ᠭᠡᠷᠲᠦ ᠣᠷᠤᠵᠤ ᠢᠷᠡᠪᠡ᠃ 〈ᠮᠠᠨᠤ ᠠᠷᠪᠠᠨ ᠨᠠᠢ᠍ᠮᠠᠨ ᠬᠥᠮᠦᠨᠢ ᠨᠠᠢ᠍ᠮᠠᠨ ᠵᠠᠮᠳᠤ ᠮᠡᠳᠡᠭᠦᠯᠵᠦ ᠪᠠᠷᠢᠭᠤᠯᠤᠭᠰᠠᠨ ᠪᠥᠬᠡ ᠭᠡᠳᠡᠭ ᠬᠥᠮᠦᠨ ᠴᠢ ᠮᠥᠨᠦᠦ?〉 ᠭᠡᠵᠦ ᠬᠢᠲᠠᠳ᠂ ᠮᠣᠩᠭᠤᠯ ᠬᠡᠯᠡᠪᠡᠷ ᠠᠰᠠᠭᠤᠭᠠᠳ ᠮᠠᠨᠤ ᠭᠡᠷᠦᠨ ᠡᠵᠡᠨᠦ ᠲᠣᠯᠤᠭᠠᠢ ᠤᠷᠤᠭᠤ ᠲᠠᠰᠢᠭᠤᠷ ᠣᠷᠤᠭᠤᠯᠵᠤ᠂ ᠬᠣᠶᠠᠷ ᠭᠠᠷᠢᠨᠢ ᠠᠷᠤᠳᠤᠨᠢ ᠰᠣᠯᠪᠢᠨ ᠬᠦᠯᠢᠵᠦ᠂ ᠮᠣᠩᠭᠤᠯ ᠭᠡᠷᠦᠨ ᠲᠣᠭᠤᠨᠤᠠᠴᠠ ᠳᠡᠭᠦᠵᠢᠯᠡᠪᠡ᠃ ᠴᠢᠩᠭᠢᠭᠡᠳ ᠵᠦᠢᠯ ᠵᠦᠢᠯᠦᠨ ᠶᠠᠭᠤᠮᠠ ᠠᠰᠠᠭᠤᠬᠤᠳᠤ᠂ ᠡᠪᠦᠭᠡᠨᠮᠢᠨᠢ 〈ᠮᠡᠳᠡᠬᠦᠦᠭᠡᠢ᠂ ᠪᠢ ᠨᠢᠭᠡᠨ ᠮᠠᠯᠴᠢᠨ ᠠᠷᠠᠳ ᠶᠠᠭᠤ ᠮᠡᠳᠡᠬᠦ ᠪᠤᠢ?〉 ᠭᠡᠰᠡᠨᠡᠴᠡ ᠥᠭᠡᠷᠡ ᠶᠠᠭᠤᠴᠤ ᠬᠡᠯᠡᠭᠰᠡᠨᠦᠭᠡᠢ ᠪᠠᠢᠪᠠ᠃ ᠴᠢᠩᠭᠢᠭᠡᠳ ᠳᠡᠭᠡᠷᠡᠮᠴᠢᠳ ᠶᠠᠪᠤᠬᠤ ᠦᠶᠡᠰᠲᠡᠭᠡᠨ ᠪᠠᠢᠳᠠᠭ ᠶᠠᠭᠤᠮᠠᠶᠢᠮᠢᠨᠢ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠭᠡᠳ᠂ ᠡᠪᠦᠭᠡᠨᠢᠮᠢᠨᠢ ᠵᠠᠢᠳᠠᠩ ᠮᠣᠷᠢ ᠤᠨᠤᠭᠤᠯᠤᠨ ᠳᠣᠯᠤᠨ ᠨᠠᠭᠤᠷᠲᠤ ᠠᠪᠠᠴᠢᠪᠠ᠃ ᠣᠳᠣ ᠶᠠᠭᠤᠨᠤ ᠠᠮᠢᠳᠤ ᠪᠠᠢᠬᠤ ᠪᠤᠢ》 ᠭᠡᠵᠦ ᠨᠢᠯᠪᠤᠰᠤᠪᠠᠨ ᠠᠷᠴᠢᠵᠤ ᠤᠬᠢᠯᠠᠭᠰᠠᠭᠠᠷ ᠪᠠᠰᠠ:
《ᠥᠴᠦᠭᠡᠳᠦᠷᠦᠨ ᠢᠷᠡᠭᠰᠡᠨ ᠳᠡᠭᠡᠷᠡᠮᠴᠢᠳ ᠥᠬᠢᠨ ᠪᠢᠳᠡ ᠬᠣᠶᠠᠷᠢ ᠮᠣᠷᠢᠨ ᠤᠶᠠᠭᠠᠨᠠᠴᠠ ᠤᠶᠠᠵᠤ ᠪᠢᠴᠢᠬᠠᠨ ᠬᠦᠦᠶᠢ ᠬᠣᠷᠢᠵᠤ ᠣᠨᠢᠰᠤᠯᠠᠭᠠᠳ ᠭᠠᠯ ᠲᠠᠯᠪᠢᠵᠤ ᠳᠤᠲᠠᠭᠠᠪᠠ᠃ ᠤᠴᠢᠷᠨᠢ᠂ ᠮᠠᠨᠤ ᠭᠡᠷᠦᠨ ᠡᠵᠡᠨ ᠪᠠᠭᠤᠨ ᠳᠠᠷᠤᠭᠠ ᠶᠠᠪᠤᠵᠤ᠂ ᠳᠡᠭᠡᠷᠡᠮᠴᠢᠳᠦᠨ ᠴᠢᠮᠡᠭᠡᠶᠢ ᠨᠠᠢ᠍ᠮᠠᠨ ᠵᠠᠮᠤᠨ ᠴᠡᠷᠢᠭᠲᠦ ᠬᠦᠷᠭᠡᠳᠡᠭ ᠭᠡᠵᠦ ᠬᠣᠷᠤᠰᠤᠭᠰᠠᠨᠳᠠᠭᠠᠨᠶᠤᠮ》 ᠭᠡᠪᠡ᠃
《ᠬᠣᠵᠢᠮ ᠳᠣᠯᠤᠨ ᠨᠠᠭᠤᠷᠢ ᠴᠢᠯᠦᠭᠡᠯᠡᠭᠰᠡᠨᠦ ᠬᠣᠢᠨᠠ᠂ ᠮᠡᠨᠳᠦ ᠰᠠᠢᠬᠠᠨᠢᠶᠠᠷ ᠬᠠᠷᠢᠵᠤ ᠢᠷᠡᠬᠦ ᠪᠢᠵᠡ》 ᠭᠡᠵᠦ ᠺᠣᠮᠢᠰᠰᠠᠷ ᠲᠠᠢᠳᠭᠤᠷᠠᠭᠤᠯᠤᠨ ᠬᠡᠯᠡᠬᠦᠳᠦ᠂
《ᠵᠠ᠂ ᠲᠠᠮᠢᠨᠢ ᠳᠣᠯᠤᠨ ᠨᠠᠭᠤᠷᠢ ᠲᠦᠷᠭᠡᠬᠡᠨ ᠴᠢᠯᠦᠭᠡᠯᠡᠵᠦ᠂ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠰᠦᠨᠮᠢᠨᠢ ᠠᠮᠢᠶᠢ ᠠᠪᠤᠭᠠᠷᠠᠢ ᠳ᠋ᠠ᠂ ᠵᠠ ᠠᠮᠢᠳᠤᠯᠠ ᠪᠠᠢᠭᠠᠰᠠᠢ》 ᠭᠡᠵᠦ ᠬᠥᠭᠰᠢᠨ ᠬᠡᠯᠡᠪᠡ᠃ ᠪᠠᠳᠮᠠ ᠬᠠᠵᠠᠭᠤᠠᠴᠠᠨᠢ:
《ᠴᠢᠯᠦᠭᠡᠯᠡᠬᠦ ᠴᠡᠷᠢᠭᠦᠨ ᠨᠥᠬᠦᠳ ᠡ᠂ ᠲᠠ ᠲᠡᠷᠡ ᠵᠠᠩ ᠢᠦᠢ ᠯᠢᠨ ᠭᠡᠳᠡᠭ ᠬᠤᠯᠠᠭᠠᠢᠶᠢ ᠪᠠᠷᠢᠪᠠᠯ ᠵᠠᠪᠠᠯ ᠮᠠᠨᠤ ᠡᠨᠳᠡ ᠠᠪᠴᠢᠷᠠᠵᠤ ᠥᠭᠭᠦᠭᠡᠷᠡᠢ᠃ ᠮᠢᠨᠦ ᠡᠴᠢᠭᠡᠶᠢ ᠪᠠᠷᠢᠭᠰᠠᠨ᠂ ᠮᠠᠨᠤ ᠭᠡᠷᠢ ᠭᠠᠯᠳᠠᠭᠰᠠᠨᠨᠢ ᠴᠥᠮ ᠲᠡᠷᠡ ᠬᠤᠯᠠᠭᠠᠢ ᠪᠢᠯᠡ》 ᠭᠡᠬᠦᠳᠦ ᠪᠠᠲᠤᠰᠦ᠋ᠬᠡ ᠥᠨᠳᠡᠢᠨ ᠪᠣᠰᠴᠤ:
《ᠵᠠᠩ ᠢᠦᠢ ᠯᠢᠨ ᠭᠡᠨᠡ? ᠶᠠᠮᠠᠷ ᠶᠠᠩᠵᠤᠲᠠᠢ ᠬᠥᠮᠦᠨᠶᠦᠮ ᠪᠤᠢ?》 ᠭᠡᠵᠦ ᠶᠡᠬᠡ ᠰᠣᠨᠢᠷᠬᠠᠨ ᠠᠰᠠᠭᠤᠪᠠ᠃
《ᠥᠨᠳᠦᠷ ᠪᠡᠶᠡᠲᠡᠢ᠂ ᠬᠠᠷᠠ ᠴᠣᠬᠤᠷ ᠴᠢᠷᠠᠢᠲᠠᠢ᠂ ᠵᠡᠭᠦᠨ ᠭᠠᠵᠠᠷᠤᠨ ᠮᠣᠩᠭᠤᠯ ᠬᠡᠯᠡᠲᠡᠢ ᠬᠥᠮᠦᠨ》 ᠭᠡᠬᠦᠳᠦ᠂
《ᠠᠯᠲᠠᠨ ᠰᠢᠳᠦᠲᠡᠢᠦᠦ?》 ᠭᠡᠵᠦ ᠪᠠᠲᠤᠰᠦ᠋ᠬᠡ ᠯᠠᠪᠯᠠᠨ ᠠᠰᠠᠭᠤᠪᠠ᠃
《ᠠᠯᠲᠠᠨ ᠰᠢᠳᠦᠲᠡᠢ᠂ ᠠᠮᠠ ᠳᠦᠭᠦᠷᠡᠩ ᠠᠯᠲᠠᠨ ᠰᠢᠳᠦᠲᠡᠢ》 ᠭᠡᠵᠦ ᠪᠠᠳᠮᠠ ᠥᠴᠢᠲᠡᠯᠡ ᠪᠠᠲᠤᠰᠦ᠋ᠬᠡ ᠰᠢᠷᠡᠭᠡᠶᠢ ᠠᠯᠠᠭᠠᠳᠠᠵᠤ:
《ᠮᠢᠨᠦ ᠥᠰᠢᠶᠡᠲᠡᠢ ᠬᠥᠮᠦᠨ ᠵᠠᠩ ᠪᠠ ᠫᠢ ᠶᠠᠭ ᠮᠥᠨ᠂ ᠨᠢᠳᠤᠨᠤᠨ ᠵᠢᠯ ᠺᠠᠢᠯᠦᠶᠢ ᠴᠢᠯᠦᠭᠡᠯᠡᠬᠦ ᠦᠶᠡᠰᠲᠦ ᠠᠷᠠᠯᠵᠢᠶᠠᠴᠢᠨᠤ ᠶᠠᠩᠵᠤᠪᠠᠷ ᠵᠠᠰᠠᠵᠤ ᠣᠷᠭᠤᠭᠰᠠᠨᠶᠤᠮ》 ᠭᠡᠪᠡ᠃
《ᠲᠡᠳᠡ ᠬᠡᠵᠢᠶᠡ ᠪᠣᠯᠪᠠᠴᠤ ᠠᠷᠠᠳ ᠲᠦᠮᠡᠨᠦ ᠭᠠᠷᠠᠴᠠ ᠭᠠᠷᠬᠤᠦᠭᠡᠢᠶᠤᠮ》 ᠭᠡᠳ ᠺᠣᠮᠢᠰᠰᠠᠷ ᠠᠯᠭᠤᠷ ᠪᠣᠰᠴᠤ ᠪᠠᠲᠤᠰᠦ᠋ᠬᠡᠶᠢᠨ ᠭᠠᠷᠢ ᠠᠳᠭᠤᠭᠠᠳ:
《ᠳ᠋ᠢᠸᠢᠽᠢᠶᠢᠨ ᠨᠠᠮᠤᠨ ᠬᠣᠷᠢᠶᠠ᠂ ᠴᠢᠨᠦ ᠠᠷᠠᠳ ᠲᠦᠮᠡᠨᠦ ᠲᠥᠯᠦᠭᠡ ᠠᠮᠢ ᠪᠡᠶᠡᠪᠡᠨ ᠴᠥᠯᠡᠵᠦ ᠲᠡᠮᠡᠴᠡᠭᠰᠡᠨᠳᠦ ᠶᠡᠬᠡ ᠭᠠᠪᠢᠶᠠ ᠲᠡᠮᠳᠡᠭᠯᠡᠨ ᠥᠭᠪᠡ》 ᠭᠡᠬᠦᠳᠦ ᠪᠠᠲᠤᠰᠦ᠋ᠬᠡ ᠪᠠᠶᠠᠷᠯᠠᠬᠤᠶᠢᠨ ᠶᠡᠬᠡᠪᠡᠷ ᠪᠠᠶᠠᠷᠯᠠᠪᠠ᠃ ᠺᠣᠮᠢᠰᠰᠠᠷ ᠶᠠᠪᠤᠬᠤ ᠦᠶᠡᠳᠡᠭᠡᠨ ᠭᠠᠷᠢᠨᠢ ᠳᠠᠬᠢᠨ ᠠᠳᠭᠤᠵᠤ:
《ᠵᠠ᠂ ᠪᠠᠲᠤᠰᠦ᠋ᠬᠡᠮᠢᠨᠢ᠂ ᠴᠢ ᠡᠨᠳᠡ ᠬᠣᠴᠤᠷᠴᠤ ᠰᠠᠢᠬᠠᠨ ᠰᠤᠪᠢᠯᠠᠭᠠᠷᠠᠢ!》 ᠭᠡᠳ ᠬᠥᠭᠰᠢᠨᠦ ᠵᠦᠭ ᠬᠠᠷᠠᠵᠤ:
《ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢᠭᠠᠷᠠᠢ᠂ ᠭᠣᠮᠢᠨᠳᠠᠩᠤᠨ ᠳᠠᠢᠰᠤᠨ ᠦᠶᠡᠷᠦᠨ ᠤᠰᠤ ᠠᠳᠠᠯᠢ ᠥᠩᠭᠡᠷᠡᠭᠡᠳ ᠣᠳᠣ ᠡᠭᠦᠷᠢᠳᠡ ᠡᠭᠡᠵᠦ ᠢᠷᠡᠬᠦᠦᠭᠡᠢᠶᠦᠮ》 ᠭᠡᠪᠡ᠃
ᠪᠠᠲᠤᠰᠦ᠋ᠬᠡ ᠺᠣᠮᠢᠰᠰᠠᠷᠤᠨᠢᠶᠠᠨ ᠶᠡᠬᠡ ᠠᠯᠬᠤᠮᠢᠶᠠᠷ ᠠᠯᠭᠤᠷᠬᠠᠨ ᠭᠠᠷᠬᠤᠶᠢ ᠬᠣᠢᠨᠠᠠᠴᠠᠨᠢ ᠬᠠᠷᠠᠬᠤᠳᠤ᠂ ᠠᠷᠢᠯᠤᠭᠰᠠᠨ ᠲᠡᠭᠷᠢ ᠡᠭᠦᠳᠡᠨᠦ ᠵᠠᠪᠰᠠᠷᠢᠶᠠᠷ ᠴᠡᠩᠬᠡᠷᠯᠡᠨ ᠬᠠᠷᠠᠭᠳᠠᠭᠠᠳ᠂ ᠤᠷᠤᠭᠰᠢᠯᠠᠵᠤ ᠪᠠᠢᠭᠠ ᠮᠣᠷᠢᠲᠤ ᠴᠡᠷᠢᠭ ᠤᠷᠲᠤ ᠯᠣᠣᠰᠢᠭ᠋ ᠭᠦᠷᠪᠡᠯᠵᠡᠭᠰᠡᠭᠡᠷ ᠬᠣᠯᠠᠳᠪᠠ᠃ ᠬᠥᠭᠰᠢᠨ ᠡᠵᠢ ᠬᠦᠦᠪᠡᠨ ᠲᠡᠪᠡᠷᠢᠵᠦ᠂ ᠬᠡᠦᠬᠡᠨᠢᠶᠡᠨ ᠳᠠᠭᠠᠭᠤᠯᠤᠨ ᠬᠣᠭᠤᠨ ᠣᠪᠤᠭᠠ ᠳᠡᠭᠡᠷᠡᠪᠡᠨ ᠬᠣᠶᠠᠷ ᠨᠢᠳᠦᠪᠡᠨ ᠪᠠᠢᠨ ᠪᠠᠢᠨ ᠠᠷᠴᠢᠵᠤ᠂ ᠪᠠᠷᠠ ᠲᠠᠰᠤᠷᠠᠲᠠᠯᠠ ᠬᠠᠷᠠᠵᠤ ᠵᠣᠭᠰᠤᠪᠠ᠃
ᠨᠠᠢ᠍ᠮᠠ
ᠵᠡᠭᠦᠨ ᠡᠮᠦᠨᠡ ᠵᠦᠭᠡᠴᠡ ᠰᠠᠶᠢᠬᠠᠨ ᠰᠢᠷᠠᠯᠠᠪᠠ᠃ ᠪᠠᠳᠮᠠ ᠬᠡᠳᠦᠢᠨ ᠪᠣᠰᠴᠤ᠂ ᠪᠠᠲᠤᠰᠦ᠋ᠬᠡᠶᠢᠨ ᠰᠠᠷᠠᠯ ᠮᠣᠷᠢᠶᠢ ᠭᠣᠣᠯᠤᠨ ᠲᠣᠬᠤᠢᠶᠢᠨ ᠵᠦᠯᠭᠡᠨᠳᠦ ᠴᠢᠳᠦᠷᠯᠡᠨ ᠲᠠᠯᠪᠢᠭᠠᠳ᠂ ᠡᠷᠦᠬᠡᠪᠡᠨ ᠰᠡᠬᠦᠵᠦ ᠭᠠᠯᠢᠶᠠᠨ ᠨᠣᠴᠤᠭᠠᠭᠠᠳ᠂ ᠬᠥᠪᠦᠩᠲᠡᠢ ᠳᠡᠪᠡᠯᠢᠶᠡᠨ ᠪᠠᠲᠤᠰᠦ᠋ᠬᠡᠶᠢᠨ ᠳᠡᠭᠡᠷᠡ ᠰᠡᠮᠬᠡᠨ ᠬᠤᠴᠢᠵᠤ ᠥᠭᠭᠦᠨ᠂ ᠭᠠᠵᠠᠷ ᠬᠥᠰᠡᠷᠢᠶᠡᠨ ᠰᠠᠢᠬᠠᠨ ᠱᠦᠭᠦᠷᠳᠡᠭᠡᠳ ᠥᠷᠯᠦᠭᠡᠶᠢᠨ ᠴᠠᠢᠪᠠᠨ ᠪᠤᠴᠠᠯᠭᠠᠪᠠ᠃
ᠪᠠᠲᠤᠰᠦ᠋ᠬᠡ ᠪᠣᠰᠤᠭᠠᠳ ᠲᠠᠶᠠᠭᠢᠶᠠᠨ ᠲᠤᠯᠵᠤ᠂ ᠮᠣᠷᠢᠨᠤᠪᠠᠨ ᠵᠦᠭ ᠠᠯᠬᠤᠲᠠᠯᠠ᠂ ᠪᠠᠳᠮᠠ ᠡᠮᠦᠨᠡᠡᠴᠡ ᠤᠰᠤ ᠳᠠᠮᠨᠠᠭᠠᠳ ᠠᠢᠰᠤᠢ᠃ ᠤᠷᠭᠤᠬᠤ ᠨᠠᠷᠠᠨᠤ ᠭᠡᠷᠡᠯ ᠤᠯᠠᠭᠠᠨ ᠴᠢᠷᠠᠢ ᠳᠡᠭᠡᠷᠡᠨᠢ ᠲᠤᠰᠴᠤ ᠤᠯᠠᠮᠴᠤ ᠰᠠᠢᠬᠠᠨ ᠭᠡᠷᠡᠯᠲᠦᠭᠦᠯᠦᠭᠡᠳ᠂ ᠬᠡᠵᠢᠶᠡᠴᠦ ᠪᠠᠶᠠᠷᠲᠠᠢ ᠪᠠᠢᠳᠠᠭ ᠨᠢᠳᠦᠨᠢ ᠪᠠᠲᠤᠰᠦ᠋ᠬᠡ ᠳᠡᠭᠡᠷᠡ ᠲᠤᠰᠴᠤ:
《ᠰᠦᠬᠡ ᠠᠬᠠ ᠡ᠂ ᠮᠣᠷᠢᠶᠢᠴᠢᠨᠢ ᠭᠡᠭᠡᠷᠡᠬᠦᠡᠴᠡ ᠡᠮᠦᠨᠡ ᠲᠠᠯᠪᠢᠭᠰᠠᠨᠶᠤᠮ᠃ ᠬᠡᠳᠦᠢᠨ ᠢᠳᠡᠵᠦ ᠴᠠᠳᠤᠭᠰᠠᠨ ᠪᠢᠯᠡ᠂ ᠴᠢ ᠣᠴᠢᠬᠤ ᠬᠡᠷᠡᠭᠦᠭᠡᠢ》 ᠭᠡᠬᠦᠳᠦ ᠪᠠᠲᠤᠰᠦ᠋ᠬᠡ :
《ᠡᠨᠡ ᠥᠷᠯᠦᠭᠡ ᠪᠢ ᠪᠠᠰᠠ ᠴᠢᠮᠠᠠᠴᠠ ᠬᠣᠵᠢᠭᠳᠠᠵᠠᠢ᠃ ᠵᠠ᠂ ᠮᠠᠷᠭᠠᠳᠠ ᠡᠷᠲᠡ ᠮᠡᠳᠡᠶᠡ》 ᠭᠡᠵᠦ ᠢᠨᠢᠶᠡᠪᠡ᠃
《ᠪᠢᠳᠡ ᠪᠣᠯ ᠢᠩᠭᠢᠵᠦ ᠡᠷᠲᠡ ᠪᠣᠰᠤᠭᠠᠳ ᠳᠠᠳᠤᠭᠰᠠᠨᠶᠤᠮ》 ᠭᠡᠳ ᠪᠠᠳᠮᠠ ᠪᠠᠲᠤᠰᠦ᠋ᠬᠡᠶᠢᠨ ᠬᠠᠵᠠᠭᠤᠪᠠᠷ ᠰᠡᠷᠴᠢᠭᠢᠨᠡᠨ ᠥᠩᠭᠡᠷᠡᠪᠡ᠃
ᠪᠠᠳᠮᠠᠶᠢᠨ ᠬᠥᠮᠦᠨᠳᠦ ᠬᠤᠪᠢᠲᠠᠢ᠂ ᠬᠥᠳᠡᠯᠮᠦᠷᠢᠳᠦ ᠢᠳᠡᠪᠬᠢᠲᠡᠢ᠂ ᠤᠷᠭᠠᠨ ᠮᠣᠷᠢᠰᠢᠭ᠋ ᠲᠦᠷᠭᠡᠨ᠂ ᠣᠷᠤᠭᠠ ᠮᠣᠷᠢᠰᠢᠭ᠋ ᠰᠡᠴᠡᠨᠨᠢ ᠪᠠᠲᠤᠰᠦ᠋ᠬᠡᠶᠢᠨ ᠵᠢᠷᠦᠬᠡᠨᠦ ᠬᠠᠢᠷᠠᠶᠢ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠲᠠᠲᠠᠵᠤ᠂ ᠦᠨᠡᠬᠡᠷ ᠬᠥᠳᠡᠭᠡᠶᠢᠨ ᠥᠬᠢᠳᠦᠨ ᠠᠯᠢᠪᠠ ᠰᠠᠢᠬᠠᠨ ᠵᠠᠩᠰᠢᠯᠢ ᠴᠥᠮ ᠪᠡᠶᠡᠳᠡᠭᠡᠨ ᠪᠠᠭᠴᠠᠯᠠᠭᠠᠳ ᠲᠥᠷᠦᠭᠰᠡᠨᠰᠢᠭ ᠬᠠᠯᠠᠭᠤᠨ ᠢᠨᠠᠭ ᠰᠠᠨᠠᠭᠳᠠᠪᠠ᠃
ᠪᠠᠳᠮᠠ ᠥᠷᠯᠦᠭᠡ ᠬᠠᠮᠤᠭᠠᠴᠠ ᠡᠷᠲᠡ ᠪᠣᠰᠴᠤ᠂ ᠦᠳᠡᠰᠢ ᠬᠠᠮᠤᠭᠠᠴᠠ ᠣᠷᠤᠢ ᠤᠨᠲᠠᠵᠤ᠂ ᠮᠠᠯᠳᠤ ᠶᠠᠪᠤᠬᠤ᠂ ᠦᠨᠢᠶᠡ ᠰᠠᠭᠠᠬᠤ᠂ ᠪᠤᠳᠠᠭᠠ ᠴᠠᠢᠯᠭᠠᠬᠤ᠂ ᠲᠣᠭᠤᠭᠠ ᠨᠡᠷᠡᠬᠦ᠂ ᠦᠢᠯᠡ ᠣᠶᠤᠬᠤ ᠵᠡᠷᠭᠡᠶᠢᠨ ᠨᠢᠭᠡ ᠭᠡᠷᠦᠨ ᠬᠦᠨᠳᠦ ᠬᠥᠩᠭᠡᠨ ᠠᠵᠢᠯᠢ ᠭᠠᠭᠴᠠᠭᠠᠷ ᠬᠢᠵᠦ᠂ ᠠᠪᠤᠳᠠᠭᠠᠨ ᠬᠦᠦᠰᠢᠭ᠂ ᠡᠵᠢᠳᠡᠭᠡᠨ ᠬᠡᠦᠬᠡᠨᠰᠢᠭ ᠲᠦᠰᠢᠭ ᠲᠤᠯᠠ ᠤᠷᠤᠭ ᠬᠡᠯᠡᠯᠴᠡᠬᠦ ᠬᠥᠮᠦᠨ ᠥᠨᠵᠢᠵᠦ ᠬᠣᠨᠤᠬᠤᠦᠭᠡᠢ ᠢᠷᠡᠳᠡᠭ ᠪᠣᠯᠪᠠᠴᠤ ᠡᠵᠢ ᠠᠪᠤᠨᠢ ᠠᠮᠠ ᠠᠯᠳᠠᠭᠠᠳᠤᠢ ᠪᠠᠢᠭᠰᠠᠭᠠᠷᠶᠤᠮ᠃
ᠡᠳᠦᠷ ᠬᠣᠨᠤᠭ ᠥᠩᠭᠡᠷᠡᠵᠦ᠂ ᠡᠪᠦᠭᠡᠨ ᠶᠡᠷᠦ ᠢᠷᠡᠬᠦᠦᠭᠡᠢᠳᠦ ᠡᠵᠢ᠂ ᠥᠬᠢᠨ ᠭᠤᠷᠪᠠᠭᠤᠯᠠ ᠤᠯᠠᠮ ᠰᠠᠨᠠᠭᠠ ᠵᠣᠪᠠᠵᠤ᠂ ᠣᠷᠤᠵᠤ ᠭᠠᠷᠬᠤ ᠪᠦᠷᠢᠳᠦ ᠤᠷᠳᠤ ᠬᠥᠲᠦᠯᠢᠶᠡᠨ ᠬᠠᠷᠠᠵᠤ᠂ ᠵᠠᠮᠤᠨ ᠬᠥᠮᠦᠨᠢ ᠦᠵᠡᠪᠡᠯ᠂ ᠵᠠ ᠮᠥᠨᠦᠦ ᠭᠡᠵᠦ ᠲᠠᠭᠠᠵᠤ᠂ ᠪᠢᠴᠢᠬᠠᠨ ᠴᠢᠮᠡᠳᠢᠶᠡᠨ ᠨᠠᠢᠲᠠᠭᠠᠪᠠᠴᠤ ᠪᠠᠶᠠᠷ ᠪᠣᠯᠪᠠᠤᠤ? ᠭᠡᠵᠦ ᠢᠷᠦᠭᠡᠵᠦ᠂ ᠪᠦᠷᠦᠢ ᠪᠣᠯᠲᠠᠯᠠ ᠢᠷᠡᠬᠦᠦᠭᠡᠢ ᠪᠣᠯ᠂ ᠪᠤᠷᠤᠭᠤ ᠮᠠᠭᠤ ᠲᠠᠯᠠ ᠤᠷᠤᠭᠤᠨᠢ ᠪᠣᠳᠤᠵᠤ ᠪᠤᠬᠢᠨᠢᠳᠤᠨ ᠰᠠᠭᠤᠭᠰᠠᠭᠠᠷ ᠪᠠᠷᠤᠭ ᠰᠠᠷᠠ ᠢᠯᠡᠭᠦᠦ ᠪᠣᠯᠤᠭᠰᠠᠨ ᠠᠵᠢ᠃
ᠡᠨᠡ ᠥᠷᠯᠦᠭᠡ ᠬᠥᠭᠰᠢᠨ ᠡᠵᠢᠶᠢᠨ ᠴᠢᠷᠠᠢ ᠡᠩᠦᠨ ᠡᠳᠦᠷᠡᠴᠡ ᠮᠠᠭᠤ᠂ ᠴᠠᠢᠴᠤ ᠳᠡᠮᠡᠢ ᠤᠤᠭᠤᠭᠰᠠᠨᠦᠭᠡᠢᠪᠠᠷ ᠤᠬᠢᠯᠠᠵᠤ ᠰᠠᠭᠤᠪᠠ᠃ ᠡᠵᠢᠨᠢ ᠰᠡᠳᠭᠢᠯ ᠵᠣᠪᠠᠬᠤᠳᠤ᠂ ᠪᠠᠳᠮᠠᠶᠢᠨ ᠴᠢᠷᠠᠢ ᠪᠠᠰᠠ ᠬᠤᠪᠢᠷᠠᠵᠤ᠂ ᠡᠴᠢᠭᠡᠪᠡᠨ ᠰᠠᠨᠠᠵᠤ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠪᠠ᠃ ᠪᠠᠲᠤᠰᠦ᠋ᠬᠡ ᠡᠨᠳᠡ ᠰᠢᠷᠬᠠ ᠰᠤᠪᠢᠯᠠᠵᠤ᠂ ᠬᠠᠭᠠᠰ ᠰᠠᠷᠠ ᠢᠯᠡᠭᠦᠦ ᠰᠠᠭᠤᠵᠤ᠂ ᠡᠨᠡ ᠭᠡᠷ ᠲᠡᠭᠦᠨᠳᠦ ᠲᠥᠷᠦᠭᠰᠡᠨ ᠭᠡᠷ ᠮᠡᠲᠦ ᠳᠣᠲᠤᠨᠤ ᠬᠠᠯᠠᠭᠤᠨ ᠪᠣᠯᠤᠭᠰᠠᠨ ᠲᠤᠯᠠ ᠲᠡᠷᠡ ᠪᠠᠰᠠ ᠰᠡᠳᠭᠢᠯ ᠠᠮᠤᠷᠦᠭᠡᠢ ᠪᠣᠯᠵᠤ᠂ ᠬᠡᠦᠬᠡᠨ ᠬᠥᠮᠦᠨᠰᠢᠭ ᠨᠣᠮᠤᠬᠠᠷᠠᠵᠤ ᠳᠤᠪ ᠳᠤᠭᠤᠢ ᠭᠠᠷᠢᠶᠠᠨ ᠨᠤᠬᠤᠯᠠᠨ ᠰᠠᠭᠤᠯᠠ᠃ ᠭᠡᠷ ᠳᠣᠲᠤᠷᠠ ᠭᠱᠠᠨ ᠵᠠᠭᠤᠷᠠ ᠨᠠᠮ ᠰᠡᠯᠡᠭᠦᠨ᠂ ᠭᠠᠭᠴᠠ ᠭᠤᠷᠪᠠᠨ ᠨᠠᠰᠤᠲᠠᠢ ᠨᠢᠯᠬᠠ ᠴᠢᠮᠡᠳᠯᠡ ᠰᠠᠨᠠᠭᠠ ᠠᠮᠤᠷ ᠨᠠᠭᠠᠳᠤᠨᠠ᠃
ᠬᠥᠭᠰᠢᠨ ᠡᠵᠢ ᠰᠠᠨᠠᠭᠠ ᠵᠣᠪᠠᠬᠤ ᠪᠦᠷᠢ ᠪᠠᠲᠤᠰᠦ᠋ᠬᠡ ᠠᠷᠭᠠ ᠠᠭᠠᠰᠢᠪᠠᠨ ᠪᠠᠷᠠᠵᠤ᠂ ᠡᠯᠳᠡᠪ ᠵᠦᠢᠯᠦᠨ ᠢᠨᠢᠶᠡᠳᠦᠮ ᠱᠣᠭ ᠦᠯᠢᠭᠡᠷ ᠬᠣᠯᠪᠤᠭᠠ ᠬᠡᠯᠡᠵᠦ᠂ ᠡᠵᠢᠶᠢᠨᠢᠶᠡᠨ ᠰᠡᠳᠭᠢᠯᠢ ᠲᠠᠢᠳᠭᠤᠷᠠᠭᠤᠯᠳᠠᠭ ᠪᠢᠯᠡ᠃ ᠭᠡᠪᠡᠴᠦ ᠪᠠᠲᠤᠰᠦ᠋ᠬᠡ ᠪᠠᠰᠠ ᠨᠠᠰᠤ ᠪᠠᠭᠠ ᠲᠤᠯᠠ ᠦᠵᠡᠵᠦ ᠰᠣᠨᠤᠰᠤᠭᠰᠠᠨ ᠵᠦᠢᠯ ᠥᠩᠭᠡᠷᠡᠦᠴᠦ ᠠᠷᠪᠢᠨ ᠪᠠᠢᠬᠤᠦᠭᠡᠢ᠃ ᠪᠠᠭᠠ ᠰᠠᠭᠠ ᠮᠡᠳᠡᠭᠰᠡᠨᠢᠶᠡᠨ ᠬᠡᠳᠦᠢᠨᠡᠢ ᠶᠠᠷᠢᠵᠤ ᠪᠠᠷᠠᠭᠠᠳ᠂ ᠶᠠᠭᠤᠴᠤ ᠬᠡᠯᠡᠶᠡ ᠭᠡᠵᠦ ᠠᠷᠭᠠᠪᠠᠨ ᠪᠠᠷᠠᠵᠤ ᠰᠠᠭᠤᠲᠠᠯᠠ᠂ ᠪᠠᠳᠮᠠ ᠬᠠᠵᠠᠭᠤᠠᠴᠠᠨᠢ:
《ᠰᠦᠬᠡ ᠠᠬᠠ ᠡ᠂ ᠴᠢ ᠨᠢᠭᠡ ᠦᠯᠢᠭᠡᠷ ᠬᠡᠯᠡᠵᠦ ᠥᠭᠬᠦᠦᠭᠡᠢᠦᠦ? ᠡᠵᠢ ᠶᠡᠬᠡ ᠳᠤᠷᠠᠲᠠᠢᠶᠤᠮ》 ᠭᠡᠪᠡ᠃
《ᠣᠳᠣ ᠶᠠᠭᠤ ᠬᠡᠯᠡᠳᠡᠭ ᠪᠢᠯᠡ! ᠶᠡᠷᠦ ᠬᠡᠯᠡᠬᠦ ᠶᠠᠭᠤᠮᠠ ᠣᠯᠳᠠᠬᠤᠦᠭᠡᠢ ᠳ᠋ᠠ 》 ᠭᠡᠵᠦ ᠪᠠᠲᠤᠰᠦ᠋ᠬᠡ ᠤᠯᠠᠮ ᠠᠷᠭᠠᠪᠠᠨ ᠪᠠᠷᠠᠨᠠ᠃
《ᠠᠩᠬᠠ ᠤᠳᠠᠭᠠᠶᠢᠨ ᠪᠠᠢᠯᠳᠤᠭᠠᠨᠤ ᠲᠤᠬᠠᠢ ᠬᠡᠯᠡᠭᠡᠷᠡᠢ᠂ ᠲᠡᠷᠡ ᠶᠠᠭᠤᠨᠠᠴᠠᠴᠤ ᠢᠯᠡᠭᠦᠦ ᠰᠣᠨᠤᠰᠤᠯᠲᠠᠢᠶᠤᠮ》 ᠭᠡᠵᠦ ᠪᠠᠳᠮᠠ ᠱᠠᠭᠠᠷᠳᠠᠪᠠ᠃ ᠪᠠᠲᠤᠰᠦ᠋ᠬᠡ ᠥᠪᠡᠷᠦᠨ ᠰᠠᠢᠨᠢᠶᠠᠨ ᠬᠥᠮᠦᠨᠦ ᠡᠮᠦᠨᠡ ᠭᠠᠢᠬᠠᠭᠤᠯᠤᠨ ᠶᠠᠷᠢᠬᠤᠠᠴᠠ ᠪᠠᠬᠠᠨ ᠲᠦᠪᠡᠭᠰᠢᠶᠡᠳᠡᠭ ᠪᠣᠯᠪᠠᠴᠤ ᠪᠠᠳᠮᠠᠶᠢᠨ ᠱᠠᠭᠠᠷᠳᠠᠯᠭᠠ ᠳᠣᠣᠷᠠ ᠪᠠᠰᠠ ᠡᠵᠢᠶᠢᠨᠢᠶᠡᠨ ᠵᠣᠪᠠᠵᠤ ᠪᠠᠢᠬᠤᠶᠢ ᠦᠵᠡᠭᠡᠳ:
《ᠵᠠ᠂ ᠴᠢᠩᠭᠢᠪᠡᠯ ᠪᠣᠯᠤᠨᠠ᠂ ᠡᠵᠢ ᠰᠣᠨᠤᠰᠬᠤ ᠳᠤᠷᠠᠲᠠᠢ ᠪᠣᠯ ᠪᠣᠯᠬᠤᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ》 ᠭᠡᠳ ᠪᠠᠲᠤᠰᠦ᠋ᠬᠡ ᠴᠠᠭᠠᠨ ᠮᠠᠩᠬᠠᠨᠤ ᠣᠷᠤᠢ ᠳᠡᠭᠡᠷᠡ ᠳᠠᠢᠰᠤᠨᠤ ᠬᠦᠨᠳᠦ ᠫᠦᠯᠧᠮᠧᠲᠢ ᠪᠤᠯᠢᠶᠠᠭᠰᠠᠨᠢᠶᠠᠨ ᠦᠯᠢᠭᠡᠷ ᠬᠡᠯᠡᠬᠦᠰᠢᠭ ᠡᠬᠢᠯᠡᠨ ᠶᠠᠷᠢᠪᠠ᠃ ᠴᠢᠩᠭᠢᠭᠡᠳ ᠬᠥᠬᠡ ᠳᠡᠪᠡᠯᠲᠡᠢ ᠡᠪᠦᠭᠡᠨ ᠲᠡᠭᠦᠨᠳᠦ ᠲᠤᠰᠠᠯᠠᠭᠰᠠᠨᠢ ᠶᠠᠷᠢᠬᠤ ᠦᠶᠡᠰᠲᠦ᠂ ᠪᠠᠳᠮᠠ ᠶᠡᠬᠡᠯᠡ ᠰᠣᠨᠢᠷᠬᠠᠭᠰᠠᠨ ᠪᠠᠢᠳᠠᠯᠲᠠᠢ ᠤᠷᠤᠭᠰᠢ ᠲᠠᠪᠰᠢᠵᠤ ᠰᠢᠮᠡᠲᠡᠢ ᠰᠣᠨᠤᠰᠴᠤ ᠪᠠᠷᠠᠭᠠᠳ:
《ᠥᠨᠳᠦᠷ ᠪᠡᠶᠡᠲᠡᠢ ᠬᠠᠷᠠ ᠡᠪᠦᠭᠡᠨ ᠭᠡᠨᠡ? ᠰᠠᠬᠠᠯᠲᠠᠢᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃
《ᠰᠠᠬᠠᠯᠲᠠᠢ᠂ ᠰᠡᠷᠪᠡᠢᠭᠰᠡᠨ ᠬᠠᠷᠠ ᠰᠠᠬᠠᠯᠲᠠᠢ》 ᠭᠡᠵᠦ ᠪᠠᠲᠤᠰᠦ᠋ᠬᠡ ᠬᠠᠷᠢᠭᠤᠯᠪᠠ᠃
《ᠰᠣᠨᠢᠨᠶᠤᠮ ᠳ᠋ᠠ᠂ ᠠᠪᠤᠴᠢᠨᠢ ᠪᠢᠰᠢᠦᠦ ᠳ᠋ᠠ ᠬᠡᠦᠬᠡᠨ?》 ᠭᠡᠵᠦ ᠬᠥᠭᠰᠢᠨ ᠶᠡᠬᠡᠯᠡ ᠰᠣᠨᠢᠷᠬᠠᠪᠠ᠃
《ᠠᠪᠤᠶᠢᠮᠢᠨᠢ ᠳᠠᠢᠰᠤᠨ ᠳᠣᠯᠤᠨ ᠨᠠᠭᠤᠷᠲᠤ ᠪᠠᠷᠢᠵᠤ ᠠᠪᠠᠴᠢᠴᠢᠬᠠᠭᠰᠠᠨᠶᠤᠮ ᠪᠢᠯᠡ᠂ ᠶᠠᠭᠤᠨᠤ ᠮᠥᠨ ᠪᠣᠯᠬᠤ ᠪᠤᠢ》 ᠭᠡᠵᠦ ᠪᠠᠳᠮᠠ ᠤᠷᠮᠠᠦᠭᠡᠢ ᠬᠡᠯᠡᠨᠡ᠃
《ᠬᠤᠪᠢ ᠵᠠᠶᠠᠭᠠᠨᠢ ᠪᠠᠢᠭᠠᠳ ᠳᠣᠯᠤᠨ ᠨᠠᠭᠤᠷᠲᠤ ᠠᠪᠠᠴᠢᠭᠰᠠᠨᠦᠭᠡᠢᠴᠤ ᠪᠠᠢᠵᠤ ᠮᠠᠭᠠᠳᠲᠠᠢᠤᠤ ᠳ᠋ᠠ 》 ᠭᠡᠵᠦ ᠬᠥᠭᠰᠢᠨ ᠭᠣᠷᠢᠳᠠᠵᠤ ᠰᠠᠭᠤᠨᠠ᠃ 《 ᠨᠡᠷᠡᠶᠢᠨᠢ ᠲᠠ ᠮᠡᠳᠡᠨᠡᠦᠦ?》 ᠭᠡᠵᠦ ᠪᠠᠳᠮᠠ ᠤᠯᠠᠮ ᠯᠠᠪᠯᠠᠪᠠ᠃
《ᠬᠠᠷᠠᠯᠠ᠂ ᠬᠠᠷᠠᠯᠠ᠂ ᠪᠢ ᠨᠡᠷᠡᠶᠢᠨᠢ ᠶᠡᠷᠦ ᠠᠰᠠᠭᠤᠵᠤ ᠠᠮᠵᠢᠭᠰᠠᠨᠦᠭᠡᠢ ᠰᠢᠤ ᠳ᠋ᠠ᠂ ᠪᠢᠳᠡ ᠲᠡᠭᠦᠨᠢ ᠶᠡᠷᠦ ᠵᠠᠮᠴᠢ ᠠᠪᠤᠯᠠ ᠭᠡᠵᠦ ᠳᠠᠭᠤᠳᠠᠳᠠᠭᠠᠴᠠ ᠪᠢᠰᠢ᠂ ᠨᠡᠷᠡᠶᠢᠨᠢ ᠬᠡᠨᠴᠦ ᠮᠡᠳᠡᠭᠰᠡᠨᠦᠭᠡᠢ》 ᠭᠡᠪᠡ᠃
《ᠮᠥᠨ ᠪᠣᠯᠤᠭᠠᠳ ᠮᠡᠨᠳᠦ ᠰᠠᠢᠬᠠᠨ ᠢᠷᠡᠭᠡᠷᠡᠢ ᠳ᠋ᠠ᠂ ᠠᠪᠤᠮᠢᠨᠢ》 ᠭᠡᠵᠦ ᠪᠠᠳᠮᠠ ᠬᠦᠰᠡᠵᠦ ᠬᠡᠯᠡᠲᠡᠯᠡ᠂ ᠭᠡᠨᠡᠳᠲᠡ ᠡᠭᠦᠳᠡᠨᠦ ᠵᠠᠪᠰᠠᠷᠢᠶᠠᠷ ᠬᠥᠬᠡ ᠳᠡᠪᠡᠯᠦᠨ ᠬᠣᠷᠮᠤᠢ ᠬᠠᠯᠲᠤ ᠦᠵᠡᠭᠳᠡᠵᠦ ᠨᠢᠭᠡ ᠬᠥᠮᠦᠨ ᠣᠷᠤᠵᠤ ᠢᠷᠡᠪᠡ᠃ ᠭᠡᠷᠲᠡᠬᠢ ᠬᠥᠮᠦᠰ ᠨᠢᠭᠡᠯᠡ ᠵᠡᠷᠭᠡᠪᠡᠷ:
《ᠠᠪᠤ ᠡ᠂ ᠠᠪᠤ ᠡ!》 ᠭᠡᠳ ᠭᠦᠶᠦᠯᠴᠡᠨ ᠪᠣᠰᠲᠠᠯᠠ᠂ ᠪᠢᠴᠢᠬᠠᠨ ᠴᠢᠮᠡᠳᠨᠢ ᠤᠭᠲᠤᠨ ᠣᠴᠢᠵᠤ ᠠᠪᠤᠶᠢᠨᠢᠶᠠᠨ ᠬᠦᠵᠦᠭᠦᠦᠪᠡᠷᠨᠢ ᠲᠡᠪᠡᠷᠢᠪᠡ᠃ ᠡᠪᠦᠭᠡᠨ ᠬᠦᠦᠪᠡᠨ ᠲᠡᠪᠡᠷᠢᠵᠦ ᠠᠪᠤᠭᠠᠳ᠂ ᠦᠭᠡ ᠳᠠᠭᠤᠨᠦᠭᠡᠢ ᠬᠦᠷᠴᠦ ᠢᠷᠠᠨ᠂ ᠪᠠᠲᠤᠰᠦ᠋ᠬᠡᠶᠢᠨ ᠭᠠᠷᠢ ᠠᠳᠭᠤᠭᠠᠳ ᠨᠢᠳᠦ ᠳᠦᠭᠦᠷᠡᠩ ᠵᠠᠢᠷ ᠭᠦᠶᠦᠯᠭᠡᠵᠦ ᠨᠡᠯᠢᠶᠡᠳ ᠤᠳᠠᠲᠠᠯᠠ ᠦᠭᠡ ᠬᠡᠯᠡᠵᠦ ᠭᠠᠷᠬᠤᠦᠭᠡᠢ ᠪᠥᠭᠯᠡᠷᠡᠭᠰᠡᠨᠢᠶᠡᠨ:
《ᠵᠠ᠂ ᠪᠠᠲᠤᠰᠦ᠋ᠬᠡ ᠬᠦᠦᠮᠢᠨᠢ᠂ ᠴᠢ ᠰᠠᠢᠨ ᠰᠠᠭᠤᠪᠠᠤᠤ? ᠰᠢᠷᠬᠠᠴᠢᠨᠢ ᠶᠠᠭᠠᠬᠢᠵᠤ ᠪᠠᠢᠬᠤ ᠪᠤᠢ?》 ᠭᠡᠵᠦ ᠪᠠᠲᠤᠰᠦ᠋ᠬᠡᠶᠢ ᠲᠣᠯᠤᠭᠠᠢᠠᠴᠠᠨᠢ ᠬᠥᠯᠳᠦᠨᠢ ᠲᠤᠯᠲᠠᠯᠠ ᠨᠢᠭᠡᠨ ᠵᠡᠷᠭᠡ ᠠᠩᠬᠠᠷᠤᠨ ᠰᠢᠷᠲᠡᠵᠦ ᠪᠠᠢᠪᠠ᠃ ᠪᠠᠳᠮᠠ ᠶᠠᠭᠠᠷᠠᠨ:
《ᠠᠪᠤ ᠡ᠂ ᠡᠨᠡ ᠠᠬᠠ ᠪᠠᠢᠭᠰᠠᠨᠦᠭᠡᠢ ᠪᠣᠯ ᠴᠢᠮᠡᠳᠴᠢᠨᠢ ᠪᠠᠰᠠ ᠪᠠᠢᠵᠤ ᠴᠢᠳᠠᠬᠤᠦᠭᠡᠢ ᠰᠢᠤ》 ᠭᠡᠵᠦ ᠪᠠᠲᠤᠰᠦ᠋ᠬᠡᠶᠢᠨ ᠴᠢᠮᠡᠳᠢ ᠠᠪᠤᠷᠠᠭᠰᠠᠨᠢ ᠶᠠᠷᠢᠬᠤ ᠭᠡᠲᠡᠯᠡ᠂ ᠬᠥᠭᠰᠢᠨ ᠬᠠᠵᠠᠭᠤᠠᠴᠠᠨᠢ ᠬᠡᠦᠬᠡᠨᠢᠶᠡᠨ ᠪᠦᠷᠢᠨ ᠬᠡᠯᠡᠵᠦ ᠥᠭᠴᠦ ᠴᠢᠳᠠᠬᠤᠦᠭᠡᠢ ᠠᠶᠤᠭᠰᠠᠨᠰᠢᠭ᠋:
《ᠪᠢ ᠬᠡᠯᠡᠵᠦ ᠥᠭᠭᠦᠶᠡ᠂ ᠪᠢ ᠬᠡᠯᠡᠵᠦ ᠥᠭᠭᠦᠶᠡ ᠁》 ᠭᠡᠵᠦ ᠡᠬᠢᠯᠡᠨ ᠶᠠᠷᠢᠲᠠᠯᠠ ᠡᠪᠦᠭᠡᠨ ᠢᠨᠢᠶᠡᠨ:
《ᠪᠢ ᠳ᠋ᠢᠸᠢᠽᠢᠶᠢᠨ ᠺᠣᠮᠢᠰᠰᠠᠷ ᠨᠥᠬᠦᠷᠡᠴᠡ ᠬᠡᠳᠦᠢᠨ ᠰᠣᠨᠤᠰᠤᠭᠰᠠᠨᠶᠤᠮ᠃ ᠲᠠ ᠶᠠᠭᠠᠷᠠᠵᠤ ᠶᠠᠷᠢᠬᠤ ᠬᠡᠷᠡᠭᠦᠭᠡᠢ》 ᠭᠡᠳ ᠬᠡᠦᠬᠡᠳᠢᠶᠡᠨ ᠬᠠᠵᠠᠭᠤᠳᠠᠭᠠᠨ ᠠᠪᠴᠢᠷᠠᠨ ᠳᠠᠬᠢᠨ ᠳᠠᠬᠢᠨ ᠦᠨᠦᠰᠦᠨᠡ᠃ ᠡᠨᠡ ᠬᠣᠭᠤᠷᠤᠨᠳᠤ ᠬᠥᠭᠰᠢᠨ ᠬᠡᠵᠢᠶᠡᠨᠡᠢ ᠭᠠᠳᠠᠨᠠᠪᠠᠨ ᠭᠦᠶᠦᠨ ᠭᠠᠷᠴᠤ᠂ ᠰᠣᠯᠢᠶᠠᠷᠠᠭᠰᠠᠨᠶᠤᠮᠰᠢᠭ᠋:
《ᠬᠦᠢ᠂ ᠲᠠ ᠪᠦᠭᠦᠳᠡᠭᠡᠷ ᠰᠣᠨᠤᠰᠤᠭᠠᠷᠠᠢ᠂ ᠪᠠᠶᠠᠷ ᠪᠣᠯᠵᠠᠢ᠃ ᠪᠠᠭᠤᠨ ᠳᠠᠷᠤᠭᠠ ᠡᠪᠦᠭᠡᠨᠴᠢᠨᠢ ᠬᠠᠷᠢᠵᠤ ᠢᠷᠡᠵᠡᠢ᠃ ᠪᠠᠭᠤᠨ ᠳᠠᠷᠤᠭᠠ ᠡᠪᠦᠭᠡᠨᠴᠢᠨᠢ ᠬᠠᠷᠢᠵᠤ ᠢᠷᠡᠵᠡᠢ᠃ ᠬᠤᠷᠳᠤᠨ ᠢᠷᠡᠵᠡᠭᠡ》 ᠭᠡᠵᠦ ᠡᠷᠢᠶᠡᠨ ᠮᠢᠷᠢᠶᠡᠨ ᠳᠠᠭᠤᠨᠢᠶᠠᠷ ᠵᠡᠭᠦᠨ ᠪᠠᠷᠠᠭᠤᠨ ᠭᠡᠷᠲᠡᠭᠡᠨ ᠨᠡᠪᠲᠡᠷᠡᠭᠦᠯᠪᠡ᠃ ᠠᠢᠯᠤᠨ ᠬᠥᠮᠦᠰ ᠰᠣᠨᠤᠰᠤᠭᠠᠳ᠂ ᠭᠡᠷ ᠭᠡᠷᠡᠴᠡᠪᠡᠨ ᠪᠠᠷᠬᠢᠷᠠᠯᠴᠠᠭᠰᠠᠭᠠᠷ ᠭᠦᠶᠦᠯᠴᠡᠨ ᠢᠷᠡᠪᠡ᠃ ᠪᠠᠳᠮᠠ ᠬᠡᠵᠢᠶᠡᠨᠡᠢ ᠬᠥᠬᠡ ᠴᠠᠢᠪᠠᠨ ᠪᠤᠴᠠᠯᠭᠠᠵᠤ ᠢᠳᠡᠭᠡᠰᠢᠲᠡᠯᠡ ᠰᠦᠯᠡᠭᠡᠳ᠂ ᠮᠣᠩᠭᠤᠯ ᠭᠡᠷᠢ ᠡᠷᠭᠦᠵᠦ ᠠᠪᠤᠮᠠᠷ ᠨᠠᠷᠭᠢᠯᠴᠠᠨ ᠦᠢᠮᠡᠯᠳᠦᠵᠦ ᠪᠠᠶᠠᠷᠤᠨ ᠴᠠᠢᠪᠠᠨ ᠤᠤᠭᠤᠯᠴᠠᠪᠠ᠃ ᠬᠥᠭᠰᠢᠨ ᠶᠠᠭᠠᠷᠠᠨ ᠪᠣᠰᠴᠤ ᠬᠡᠵᠢᠶᠡᠨᠡᠢ ᠪᠡᠯᠡᠳᠭᠡᠭᠡᠳ ᠪᠠᠢᠭᠰᠠᠨ ᠴᠥᠭᠦᠴᠡᠲᠡᠢ ᠵᠤᠯᠠᠪᠠᠨ ᠪᠤᠷᠬᠠᠨᠤᠪᠠᠨ ᠡᠮᠦᠨᠡ ᠠᠰᠠᠭᠠᠭᠠᠳ᠂ ᠡᠪᠦᠭᠡᠨᠦ ᠬᠢᠨᠢ ᠮᠡᠨᠳᠦ ᠰᠠᠢᠬᠠᠨ ᠬᠠᠷᠢᠵᠤ ᠢᠷᠡᠭᠰᠡᠨᠨᠢ ᠴᠥᠮ ᠪᠤᠷᠬᠠᠨ ᠰᠢᠲᠦᠭᠡᠨᠦ ᠠᠪᠤᠷᠠᠯᠠᠴᠠ ᠪᠣᠯᠤᠭᠰᠠᠨᠰᠢᠭ᠋ ᠴᠠᠢᠶᠢᠨᠢᠶᠠᠨ ᠳᠡᠭᠡᠵᠢᠶᠢ ᠲᠠᠬᠢᠯ ᠳᠦᠭᠦᠷᠭᠡᠨ ᠡᠷᠭᠦᠪᠡ᠃
ᠡᠪᠦᠭᠡᠨ ᠭᠡᠨᠡᠳᠲᠡ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠭᠠᠨᠳᠤ ᠣᠷᠤᠭᠰᠠᠨᠰᠢᠭ᠋ ᠡᠪᠦᠷᠢᠶᠡᠨ ᠠᠭᠤᠳᠠᠯᠵᠤ᠂ ᠨᠢᠭᠡᠨ ᠪᠣᠭᠤᠳᠠᠯᠢ ᠨᠡᠭᠡᠭᠡᠭᠡᠳ᠂ ᠳᠣᠲᠤᠷᠠᠠᠴᠠᠨᠢ ᠬᠣᠶᠠᠷ ᠴᠠᠭᠠᠰᠤᠨ ᠬᠥᠷᠦᠭ ᠭᠠᠷᠭᠠᠪᠠ᠃ ᠲᠡᠭᠦᠨᠦ ᠨᠢᠭᠡᠨᠢ ᠲᠡᠷᠢᠭᠦᠯᠡᠭᠴᠢ ᠮᠠᠤ ᠽᠧ ᠳ᠋ᠦᠩᠦᠨ ᠬᠥᠷᠦᠭ ᠪᠥᠭᠡᠳ ᠨᠥᠭᠦᠭᠡ ᠨᠢᠭᠡᠨᠢ ᠥᠪᠦᠷ ᠮᠣᠩᠭᠤᠯᠤᠨ ᠠᠷᠠᠳ ᠲᠦᠮᠡᠨᠦ ᠬᠠᠢᠷᠠᠲᠤ ᠤᠳᠤᠷᠢᠳᠤᠭᠴᠢ ᠨᠥᠬᠦᠷ ᠤᠯᠠᠭᠠᠨᠬᠦᠦᠶᠢᠨ ᠬᠥᠷᠦᠭ ᠪᠢᠯᠡ᠃ ᠭᠡᠷ ᠳᠦᠭᠦᠷᠡᠩ ᠬᠥᠮᠦᠰ ᠥᠨᠳᠡᠢᠯᠴᠡᠨ ᠪᠣᠰᠤᠯᠴᠠᠵᠤ ᠭᠠᠷ ᠳᠠᠮᠵᠢᠭᠤᠯᠤᠨ ᠪᠤᠯᠢᠶᠠᠯᠳᠤᠨ ᠦᠵᠡᠨᠡ᠃ ᠬᠥᠮᠦᠨ ᠪᠦᠷᠢᠶᠢᠨ ᠨᠢᠭᠤᠷᠲᠤ ᠪᠠᠶᠠᠷ ᠴᠡᠩᠭᠡᠯ ᠳᠦᠭᠦᠷᠴᠦ᠂ ᠬᠡᠨ ᠠᠯᠢᠨᠨᠢᠴᠤ ᠦᠵᠡᠭᠡᠳ ᠬᠠᠩᠬᠤᠦᠭᠡᠢᠰᠢᠭ᠋ ᠪᠠᠢᠪᠠ᠃
ᠡᠪᠦᠭᠡᠨ: 《ᠡᠨᠡ ᠬᠥᠷᠦᠭᠢ ᠺᠣᠮᠢᠰᠰᠠᠷ ᠨᠥᠬᠦᠷ ᠬᠠᠮᠤᠭᠤᠨ ᠰᠠᠢᠨ ᠪᠡᠯᠡᠭ ᠪᠣᠯᠭᠠᠨ ᠨᠠᠳᠠ ᠥᠭᠭᠦᠭᠰᠡᠨᠶᠦᠮ》 ᠭᠡᠳ ᠪᠠᠰᠠ ᠨᠢᠭᠡ ᠠᠷᠪᠢᠨ ᠪᠢᠲᠡᠭᠦᠮᠵᠢ ᠵᠠᠬᠢᠳᠠᠯ ᠭᠠᠷᠭᠠᠨ ᠪᠠᠲᠤᠰᠦ᠋ᠬᠡᠳᠦ ᠥᠭᠭᠦᠭᠡᠳ:
《ᠮᠠᠢ! ᠬᠦᠦᠮᠢᠨᠢ᠃ ᠰᠤᠮᠤᠨ ᠳᠠᠷᠤᠭᠠ᠂ ᠵᠢᠭᠠᠨ ᠤᠳᠤᠷᠢᠳᠤᠭᠴᠢ ᠬᠣᠶᠠᠷᠠᠴᠠᠴᠢᠨᠢ ᠲᠡᠷᠢᠭᠦᠯᠡᠨ ᠣᠯᠠᠨ ᠨᠥᠬᠦᠳᠴᠢᠨᠢ ᠴᠢᠮᠠᠳᠤ ᠥᠭᠭᠦᠭᠰᠡᠨ ᠵᠠᠬᠢᠳᠠᠯ᠂ ᠠᠪᠤᠨᠢᠴᠤ ᠢᠯᠭᠠᠵᠤ ᠴᠢᠳᠠᠬᠤᠦᠭᠡᠢ》 ᠭᠡᠳ ᠪᠠᠭᠯᠠᠭᠠᠲᠠᠢᠪᠠᠷᠨᠢ ᠲᠤᠰᠢᠶᠠᠪᠠ᠃
ᠪᠥᠬᠡ ᠡᠪᠦᠭᠡᠨᠦ ᠬᠠᠷᠢᠵᠤ ᠢᠷᠡᠭᠰᠡᠨ ᠴᠢᠮᠡᠭᠡ᠂ ᠦᠬᠡᠷᠴᠢᠨᠡᠴᠡ ᠬᠣᠨᠢᠴᠢᠨᠳᠤ᠂ ᠬᠣᠨᠢᠴᠢᠨᠠᠴᠠ ᠠᠳᠤᠭᠤᠴᠢᠨᠳᠤ ᠵᠠᠯᠭᠠᠮᠵᠢᠯᠠᠵᠤ ᠴᠠᠬᠢᠯᠭᠠᠨ ᠮᠡᠳᠡᠭᠡᠰᠢᠭ ᠲᠦᠷᠭᠡᠨᠢᠶᠡᠷ ᠳᠥᠷᠪᠡᠨ ᠵᠦᠭᠲᠦ ᠨᠡᠪᠲᠡᠷᠡᠵᠦ᠂ ᠣᠢᠷᠠ ᠬᠣᠯᠠᠶᠢᠨ ᠬᠥᠮᠦᠰ ᠵᠠᠯᠭᠠᠪᠠᠷ ᠢᠷᠡᠵᠦ ᠠᠶᠠᠨᠳᠠᠭᠠᠨ ᠴᠤᠭᠯᠠᠷᠠᠭᠰᠠᠨ ᠶᠡᠬᠡ ᠬᠤᠷᠢᠮᠰᠢᠭ᠋ ᠬᠡᠳᠦᠨ ᠡᠳᠦᠷ ᠦᠷᠭᠦᠯᠵᠢᠯᠡᠪᠡ᠃
ᠶᠢᠰᠦ
ᠪᠠᠳᠮᠠ᠂ ᠪᠠᠲᠤᠰᠦ᠋ᠬᠡᠶᠢᠨ ᠬᠠᠨᠲᠠᠭᠠᠵᠠᠶᠢ ᠴᠠᠪ ᠴᠠᠭᠠᠨ ᠪᠣᠯᠲᠠᠯᠠ ᠤᠭᠠᠵᠤ ᠭᠡᠷ ᠳᠡᠭᠡᠷᠡᠪᠡᠨ ᠳᠡᠯᠭᠡᠭᠡᠳ᠂ ᠲᠡᠭᠦᠨᠦ ᠫᠤᠤᠶᠢᠨ ᠡᠭᠦᠷᠦᠪᠴᠢᠪᠡᠷᠨᠢ ᠴᠣᠭᠤᠷᠤᠭᠰᠠᠨ ᠬᠥᠬᠡ ᠳᠡᠪᠡᠯᠦᠨ ᠮᠥᠷᠦᠶᠢᠨᠢ ᠨᠥᠬᠦᠨᠡ᠃
ᠪᠥᠬᠡ ᠡᠪᠦᠭᠡᠨ᠂ ᠪᠠᠲᠤᠰᠦ᠋ᠬᠡᠶᠢᠨ ᠭᠡᠷᠲᠦ ᠣᠷᠤᠭᠰᠠᠨ ᠬᠣᠭᠤᠷᠤᠨᠳᠤ ᠵᠠᠪᠳᠤᠵᠤ᠂ ᠤᠶᠠᠵᠤ ᠪᠠᠢᠭᠰᠠᠨ ᠬᠠᠷᠠ ᠲᠦᠷᠦᠭᠦᠦ ᠬᠣᠨᠢᠪᠠᠨ ᠳᠠᠷᠤᠨ ᠤᠨᠠᠭᠠᠵᠤ ᠡᠳ᠋ ᠪᠣᠯᠭᠠᠪᠠ᠃ ᠬᠥᠭᠰᠢᠨ ᠬᠠᠵᠠᠭᠤᠳᠤᠨᠢ ᠰᠠᠭᠤᠵᠤ ᠬᠣᠨᠢᠨ ᠭᠡᠳᠡᠰᠦ ᠠᠷᠢᠯᠭᠠᠨᠠ᠃ ᠪᠠᠲᠤᠰᠦ᠋ᠬᠡᠶᠢᠨ ᠰᠠᠢᠬᠠᠨ ᠰᠠᠷᠠᠯ ᠮᠣᠷᠢ ᠢᠵᠠᠷᠠᠲᠠᠯᠠ ᠲᠠᠷᠭᠤᠯᠠᠭᠠᠳ᠂ ᠮᠥᠩᠭᠦᠨ ᠳᠠᠷᠤᠭᠤᠯᠭᠠᠲᠠᠢ ᠪᠤᠯᠢᠭᠠᠷᠢ ᠭᠥᠯᠢᠮ ᠬᠢᠭᠰᠡᠨ ᠲᠤᠯᠤᠨ ᠨᠠᠭᠤᠷ ᠶᠠᠩᠵᠤᠶᠢᠨ ᠱᠠᠪᠢ ᠡᠮᠡᠭᠡᠯ ᠲᠣᠬᠤᠵᠤ ᠤᠶᠠᠭᠠᠨ ᠳᠡᠭᠡᠷᠡ ᠤᠶᠠᠭᠰᠠᠨᠨᠢ᠂ ᠵᠢᠷᠤᠭᠤᠨ ᠮᠣᠷᠢ ᠮᠡᠲᠦ ᠬᠠᠷᠠᠭᠳᠠᠨᠠ᠃ ᠬᠣᠯᠠᠭᠤᠷ ᠭᠠᠷᠬᠤ ᠬᠥᠮᠦᠨᠴᠦ ᠬᠠᠵᠠᠭᠤᠳᠤᠨᠢ ᠣᠴᠢᠵᠤ ᠦᠵᠡᠪᠡᠯ ᠡ! ᠬᠡᠮᠡᠷ ᠬᠡᠪ ᠶᠠᠩᠵᠤᠲᠠᠢ ᠲᠤᠯᠠ ᠮᠣᠷᠢᠨᠳᠤ ᠳᠤᠷᠠᠲᠠᠢ ᠠᠢᠯᠤᠨ ᠪᠠᠭᠠᠴᠤᠳ ᠢᠷᠠᠨ ᠢᠷᠠᠨ ᠪᠠᠬᠠᠷᠬᠠᠨᠠ᠃
ᠪᠥᠬᠡ ᠡᠪᠦᠭᠡᠨᠦ ᠨᠢᠭᠡ ᠭᠡᠷᠢᠶᠡᠷᠢᠶᠡᠨ ᠬᠤᠷᠢᠮ ᠬᠢᠵᠦ ᠪᠠᠢᠭᠠᠰᠢᠭ᠋ ᠶᠠᠭᠠᠷᠠᠨ᠂ ᠣᠷᠤᠵᠤ ᠭᠠᠷᠴᠤ ᠶᠡᠬᠡᠯᠡ ᠶᠠᠪᠤᠳᠠᠯ ᠪᠣᠯᠪᠠ᠃ ᠪᠠᠲᠤᠰᠦ᠋ᠬᠡ ᠡᠪᠦᠷ ᠳᠣᠲᠤᠷᠠᠠᠴᠠᠪᠠᠨ ᠨᠢᠭᠡᠨ ᠵᠠᠬᠢᠳᠠᠯ ᠭᠠᠷᠭᠠᠨ ᠦᠵᠡᠭᠰᠡᠭᠡᠷ ᠲᠡᠰᠭᠡᠯᠦᠭᠡᠢ ᠢᠨᠢᠶᠡᠮᠰᠦᠭᠯᠡᠨ ᠳᠣᠣᠷᠠ ᠳᠠᠭᠤᠨᠢᠶᠠᠷ ᠤᠩᠰᠢᠭᠰᠠᠨᠨᠢ:
《ᠨᠥᠬᠦᠷ ᠪᠠᠲᠤᠰᠦ᠋ᠬᠡ ᠲᠠᠨᠠ: ᠬᠠᠢᠷᠠᠲᠤ ᠨᠥᠬᠦᠷᠮᠢᠨᠢ ᠴᠢ ᠰᠠᠢᠨ ᠰᠠᠭᠤᠵᠤ ᠪᠠᠢᠨᠠᠤᠤ?》 ᠭᠡᠵᠦ ᠡᠬᠢᠯᠡᠭᠰᠡᠨ᠂ ᠶᠠᠪᠤᠭᠤᠯᠤᠨ ᠬᠥᠮᠦᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯᠨᠢ ᠲᠡᠭᠦᠨᠦ ᠰᠡᠳᠭᠢᠯᠢ ᠬᠥᠳᠡᠯᠭᠡᠪᠡ᠃ ᠵᠠᠯᠭᠠᠭᠠᠳ ᠤᠩᠰᠢᠬᠤᠳᠤ:
《ᠳᠠᠢᠰᠤᠨᠤ ᠰᠤᠮᠤᠨ ᠪᠣᠷᠤᠭᠠᠨᠤ ᠳᠣᠭᠤᠤᠷ ᠰᠢᠨᠲᠠᠷᠠᠯᠦᠭᠡᠢ ᠰᠢᠷᠭᠤᠯᠠᠨ ᠣᠷᠤᠵᠤ᠂ ᠶᠡᠬᠡ ᠢᠯᠠᠯᠲᠠᠶᠢᠨ ᠡᠭᠦᠳᠡᠶᠢ ᠨᠡᠭᠡᠭᠡᠭᠰᠡᠨ ᠪᠠ ᠠᠷᠠᠳ ᠲᠦᠮᠡᠨᠦ ᠲᠥᠯᠦᠭᠡ ᠪᠡᠶᠡᠪᠡᠨ ᠬᠠᠢᠬᠤᠷᠤᠯᠦᠭᠡᠢ ᠭᠠᠯ ᠳᠣᠲᠤᠷᠠᠠᠴᠠ ᠬᠡᠦᠬᠡᠳᠦᠨ ᠠᠮᠢᠶᠢ ᠠᠪᠤᠷᠠᠭᠰᠠᠨ ᠢᠷᠠᠭᠤ ᠭᠠᠪᠢᠶᠠ ᠵᠢᠳᠭᠦᠯᠳᠦᠴᠢᠨᠢ ᠳ᠋ᠢᠸᠢᠽᠢᠶᠢᠨ ᠤᠯᠤᠰ ᠲᠥᠷᠦᠶᠢᠨ ᠭᠠᠵᠠᠷᠠᠴᠠ ᠶᠡᠬᠡ ᠭᠠᠪᠢᠶᠠ ᠲᠡᠮᠳᠡᠭᠯᠡᠵᠦ ᠰᠠᠢᠰᠢᠶᠠᠯᠤᠨ ᠲᠡᠮᠳᠡᠭᠢᠶᠡᠷ ᠱᠠᠩᠨᠠᠪᠠ᠃ ᠬᠤᠷᠢᠶᠠᠨ ᠠᠪᠤᠭᠠᠷᠠᠢ! ᠪᠢᠳᠡᠨᠦ ᠰᠤᠮᠤᠨᠤ ᠳᠠᠷᠤᠭᠠ ᠴᠡᠷᠢᠭ ᠪᠦᠬᠦᠨᠢᠶᠡᠷ ᠲᠠᠨᠤ ᠢᠷᠠᠭᠤ ᠠᠯᠳᠠᠷᠲᠤ ᠬᠠᠯᠠᠭᠤᠨ ᠪᠠᠶᠠᠷ ᠬᠦᠷᠭᠡᠶᠡ》 ᠭᠡᠵᠡᠢ᠃
ᠪᠠᠲᠤᠰᠦ᠋ᠬᠡ ᠡᠨᠳᠡ ᠬᠦᠷᠲᠡᠯᠡ ᠤᠩᠰᠢᠭᠠᠳ ᠡᠩᠭᠡᠷ ᠳᠡᠭᠡᠷᠡᠪᠡᠨ ᠵᠡᠭᠦᠭᠰᠡᠨ ᠰᠠᠢᠰᠢᠶᠠᠯᠤᠨ ᠲᠡᠮᠳᠡᠭᠢᠶᠡᠨ ᠬᠠᠷᠠᠪᠠ᠃ ᠲᠡᠭᠦᠨᠦ ᠡᠷᠲᠡ ᠡᠳᠦᠷᠦᠨ ᠵᠡᠭᠦᠳᠦ᠂ ᠡᠨᠡ ᠡᠳᠦᠷ ᠦᠨᠡᠨ ᠪᠣᠯᠤᠭᠰᠠᠨᠳᠤ ᠢᠲᠡᠭᠡᠵᠦ ᠶᠠᠳᠠᠬᠤᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠡᠭᠦᠨᠦ ᠬᠠᠮᠲᠤ᠂ ᠥᠪᠡᠷᠦᠨ ᠠᠮᠢ ᠪᠡᠶᠡ᠂ ᠡᠴᠦᠰᠦᠨ ᠨᠢᠭᠡᠨ ᠳᠤᠰᠤᠯ ᠴᠢᠰᠤᠪᠠᠨ ᠠᠷᠢᠭᠤᠨ ᠦᠢᠯᠡᠰᠦᠨᠢᠶᠡᠨ ᠲᠥᠯᠦᠭᠡ ᠡᠷᠭᠦᠭᠰᠡᠨ ᠪᠠᠯᠠᠷᠠᠰᠢᠦᠭᠡᠢ ᠪᠠᠭᠠᠲᠤᠷ ᠬᠠᠢᠷᠠᠲᠤ ᠨᠥᠬᠦᠷ ᠪᠤᠯᠲᠤ ᠰᠠᠨᠠᠭᠠᠨᠳᠤᠨᠢ ᠣᠷᠤᠪᠠ᠃ ᠬᠠᠮᠤᠭᠤᠨ ᠶᠡᠬᠡ ᠥᠩᠭᠡ ᠭᠡᠷᠡᠯ ᠭᠠᠪᠢᠶᠠ ᠵᠢᠳᠭᠦᠯ ᠴᠥᠮ ᠲᠡᠭᠦᠨᠦ ᠬᠢ ᠪᠣᠯᠬᠤ ᠶᠣᠰᠤᠲᠠᠢ᠃ ᠲᠡᠷᠡ ᠪᠣᠯ ᠴᠣᠬᠤᠮ ᠡᠪ ᠬᠠᠮᠲᠤ ᠨᠠᠮᠤᠨ ᠭᠡᠰᠢᠭᠦᠨᠦ ᠢᠷᠠᠭᠤ ᠰᠠᠢᠨ ᠴᠢᠨᠠᠷᠢ ᠦᠵᠡᠭᠦᠯᠦᠨ ᠴᠢᠳᠠᠭᠰᠠᠨ ᠪᠥᠭᠡᠳ ᠮᠠᠨᠤ ᠠᠭᠤᠤ ᠶᠡᠬᠡ ᠢᠯᠠᠯᠲᠠ ᠪᠣᠯ ᠲᠦᠮᠡ ᠪᠤᠮᠠᠨ ᠪᠤᠯᠲᠤᠰᠢᠭ᠋ ᠪᠠᠭᠠᠲᠤᠷᠤᠳᠤᠨ ᠭᠠᠪᠢᠶᠠ ᠵᠢᠳᠭᠦᠯ ᠢᠷᠠᠭᠤ ᠠᠯᠳᠠᠷᠠᠴᠠ ᠰᠠᠯᠵᠤ ᠪᠣᠯᠬᠤᠦᠭᠡᠢᠶᠤᠮ ᠭᠡᠵᠦ ᠪᠣᠳᠤᠬᠤᠳᠠᠭᠠᠨ ᠥᠪᠡᠷᠦᠨ ᠪᠡᠶᠡᠪᠡᠨ ᠬᠢᠨᠠᠵᠤ ᠦᠵᠡᠪᠡ᠃ 《ᠪᠢ ᠡᠬᠡ ᠣᠷᠤᠨ ᠠᠷᠠᠳ ᠲᠦᠮᠡᠨᠳᠡᠭᠡᠨ ᠶᠠᠮᠠᠷ ᠵᠡᠷᠭᠡ ᠵᠢᠳᠭᠦᠭᠰᠡᠨ ᠪᠤᠢ? ᠳᠠᠷᠤᠭᠠᠨᠠᠷᠤᠨ ᠶᠠᠷᠢᠳᠠᠭ ᠦᠯᠢᠭᠡᠷ ᠵᠢᠱ᠋ᠢᠶᠡ ᠪᠠ ᠪᠤᠯᠲᠤ ᠨᠥᠬᠦᠷᠰᠢᠭ ᠪᠠᠭᠠᠲᠤᠷᠤᠳᠲᠠᠢ ᠠᠳᠠᠯᠢᠳᠭᠠᠪᠠᠯ ᠶᠠᠮᠠᠷᠴᠤ ᠭᠠᠪᠢᠶᠠ ᠵᠢᠳᠭᠦᠯᠦᠭᠡᠢ ᠪᠢᠰᠢᠦᠦ? ᠁》 ᠭᠡᠵᠦ ᠪᠣᠳᠤᠭᠰᠠᠭᠠᠷ ᠨᠡᠯᠢᠶᠡᠳ ᠤᠳᠠᠪᠠ᠃
《ᠳᠣᠭᠤᠭᠰᠢᠪᠠᠨ ᠤᠩᠰᠢᠭᠠᠷᠠᠢ》 ᠭᠡᠵᠦ ᠪᠠᠳᠮᠠ ᠬᠠᠵᠠᠭᠤᠠᠴᠠᠨᠢ ᠬᠡᠯᠡᠲᠡᠯᠡ ᠳᠠᠬᠢᠨ ᠵᠠᠯᠭᠠᠵᠤ:
《ᠭᠠᠷ ᠪᠠᠷᠢᠯᠴᠠᠨ ᠰᠠᠯᠤᠭᠰᠠᠨᠠᠴᠠ ᠢᠨᠠᠭᠰᠢ ᠬᠣᠶᠠᠷ ᠰᠠᠷᠠ ᠢᠯᠡᠭᠦᠦ ᠪᠣᠯᠪᠠ᠂ ᠬᠡᠰᠢᠭᠲᠡᠨ ᠬᠣᠰᠢᠭᠤᠨᠤ ᠵᠠᠰᠠᠭᠤᠨ ᠣᠷᠳᠤᠨᠤ ᠨᠥᠬᠦᠳᠡᠴᠡ ᠴᠢᠨᠦ ᠰᠢᠷᠬᠠ ᠮᠠᠰᠢ ᠲᠦᠷᠭᠡᠨ ᠰᠠᠢᠨ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠰᠣᠨᠤᠰᠤᠭᠠᠳ ᠪᠢᠳᠡ ᠲᠤᠢᠯᠢᠶᠠᠷ ᠪᠠᠶᠠᠷᠯᠠᠪᠠ᠃ ᠪᠢᠳᠡ ᠴᠢᠮᠠᠢ ᠬᠥᠮᠦᠨ ᠪᠣᠯᠤᠨᠠ ᠭᠡᠵᠦ ᠶᠡᠷᠦ ᠪᠣᠳᠤᠭᠰᠠᠨᠦᠭᠡᠢ ᠪᠠᠢᠪᠠ᠃ ᠴᠢ ᠶᠡᠷᠦ ᠲᠡᠮᠦᠷᠰᠢᠭ ᠬᠦᠦᠶᠦᠮ ᠪᠠᠢᠨᠠ᠃
ᠵᠠ᠂ ᠪᠤᠤ ᠮᠠᠷᠲᠠᠭᠠᠷᠠᠢ᠂ ᠡᠨᠡ ᠪᠣᠯ ᠴᠢᠮᠠᠢ ᠰᠤᠪᠢᠯᠠᠵᠤ ᠪᠠᠢᠭᠠ ᠠᠷᠠᠳᠤᠨ ᠬᠠᠢᠷᠠᠯᠠᠨ ᠬᠠᠷᠠᠭᠠᠯᠵᠠᠭᠰᠠᠨᠤ ᠠᠴᠢ ᠰᠢᠤ ᠳ᠋ᠠ᠃ ᠴᠢ ᠮᠠᠨᠤ ᠲᠤᠯᠤᠯᠳᠤᠭᠠᠨᠤ ᠲᠤᠬᠠᠢ ᠰᠣᠨᠤᠰᠤᠶᠠ ᠭᠡᠵᠦ ᠶᠡᠬᠡ ᠳᠤᠷᠠᠯᠠᠵᠤ ᠪᠠᠢᠬᠤ ᠪᠢᠵᠡ᠂ ᠡᠨᠡ ᠣᠷᠴᠢᠮ ᠶᠡᠬᠡ ᠪᠠᠢᠯᠳᠤᠭᠠᠨ ᠭᠠᠷᠤᠭᠰᠠᠨᠦᠭᠡᠢ᠃ ᠲᠦᠷᠦᠭᠦᠦ ᠤᠳᠠᠭᠠᠶᠢᠨ ᠪᠠᠢᠯᠳᠤᠭᠠᠨᠤ ᠢᠯᠠᠯᠲᠠᠶᠢ ᠠᠩᠬᠠ ᠤᠳᠠᠭᠠᠶᠢᠨ ᠵᠠᠬᠢᠳᠠᠯ ᠳᠡᠭᠡᠷᠡ ᠬᠡᠯᠡᠭᠰᠡᠨ ᠲᠤᠯᠠ ᠡᠨᠳᠡ ᠳᠠᠪᠲᠠᠬᠤᠶᠢ ᠵᠣᠭᠰᠤᠶᠠ᠂ ᠪᠢᠳᠡ ᠣᠳᠣ ᠬᠦᠴᠦᠪᠡᠨ ᠭᠠᠷᠭᠠᠨ ᠳᠣᠯᠤᠨ ᠨᠠᠭᠤᠷᠢ ᠴᠣᠬᠢᠬᠤ ᠪᠠᠢᠯᠳᠤᠭᠠᠨᠤ ᠪᠡᠯᠡᠳᠭᠡᠯ ᠬᠢᠵᠦ ᠪᠠᠢᠨᠠ᠃ ᠠᠭᠤᠤ ᠶᠡᠬᠡ ᠢᠯᠠᠯᠲᠠ ᠨᠢᠳᠦᠨ ᠡᠮᠦᠨᠡ ᠪᠣᠯᠵᠤ ᠪᠠᠢᠨᠠ᠃ ᠳᠣᠯᠤᠨ ᠨᠠᠭᠤᠷᠢ ᠴᠢᠯᠦᠭᠡᠯᠡᠭᠰᠡᠨᠦ ᠳᠠᠷᠠᠭᠠ ᠪᠣᠯ ᠵᠠᠩ ᠵᠢᠶᠠ ᠺᠧᠦ᠂ ᠵᠠᠩ ᠵᠢᠶᠠ ᠺᠧᠦᠶᠢᠨ ᠳᠠᠷᠠᠭᠠ ᠪᠡᠭᠡᠵᠢᠩ᠂ ᠲᠡᠭᠦᠨᠡᠴᠡ ᠵᠠᠯᠭᠠᠯᠳᠤᠯᠭᠠᠪᠠᠷ ᠪᠦᠬᠦ ᠤᠯᠤᠰᠢ ᠴᠢᠯᠦᠭᠡᠯᠡᠬᠦ ᠴᠠᠭ ᠣᠢᠷᠠᠳᠴᠤ ᠪᠠᠢᠨᠠ ᠰᠢᠤ᠃ ᠵᠠ᠂ ᠨᠥᠬᠦᠷ ᠴᠢᠮᠢᠨᠢ ᠰᠢᠷᠬᠠᠪᠠᠨ ᠰᠠᠢᠨ ᠰᠤᠪᠢᠯᠠᠭᠠᠳ᠂ ᠬᠣᠭᠦᠭᠡᠢ ᠰᠠᠢᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠢᠷᠡᠭᠡᠷᠡᠢ᠃ ᠪᠢᠲᠡᠭᠡᠢ ᠶᠠᠭᠠᠷᠠ ᠳ᠋ᠠ᠃ ᠪᠦᠬᠦ ᠤᠯᠤᠰᠤᠨ ᠶᠡᠬᠡ ᠬᠠᠭᠠᠰᠨᠢ ᠪᠠᠰᠠ ᠴᠢᠯᠦᠭᠡᠯᠡᠭᠳᠡᠭᠡᠳᠦᠢ ᠪᠠᠢᠭᠰᠠᠭᠠᠷ᠂ ᠴᠢᠨᠦ ᠣᠷᠤᠬᠤ ᠲᠤᠯᠤᠯᠳᠤᠭᠠᠨ ᠪᠠᠢᠬᠤᠯᠠ᠂ ᠭᠠᠪᠢᠶᠠ ᠪᠠᠢᠭᠤᠯᠬᠤ ᠲᠣᠬᠢᠶᠠᠯᠴᠤ ᠪᠠᠰᠠ ᠪᠠᠢᠬᠤᠯᠠ᠃ ᠡᠭᠦᠨᠦ ᠲᠤᠯᠠ᠂ ᠪᠠᠶᠠᠷᠲᠠᠢ᠃
ᠥᠯᠵᠡᠢ
ᠷᠢᠨᠴᠢᠨᠡᠴᠡ
ᠲᠠᠪᠤᠳᠤᠭᠠᠷ ᠰᠠᠷᠠᠶᠢᠨ ᠲᠠᠪᠤᠨᠠ᠃ 》
ᠪᠠᠲᠤᠰᠦ᠋ᠬᠡ ᠵᠠᠬᠢᠳᠠᠯᠢᠶᠠᠨ ᠤᠩᠰᠢᠵᠤ ᠲᠡᠭᠦᠰᠭᠡᠭᠡᠳ᠂ ᠨᠢᠭᠡᠨ ᠬᠣᠪᠤᠷ ᠡᠷᠳᠡᠨᠢᠰᠢᠭ ᠬᠡᠳᠦᠨ ᠳᠠᠪᠬᠤᠷ ᠪᠠᠭᠯᠠᠭᠠᠳ ᠤᠭᠤᠲᠠᠨᠳᠠᠭᠠᠨ ᠬᠤᠷᠢᠶᠠᠪᠠ᠃ ᠪᠠᠳᠮᠠ ᠣᠶᠤᠳᠠᠯᠢᠶᠠᠨ ᠲᠦᠷ ᠵᠣᠭᠰᠤᠭᠠᠳ ᠨᠢᠭᠡ ᠶᠠᠭᠤᠮᠠ ᠪᠣᠳᠤᠭᠰᠠᠨᠰᠢᠭ᠋ ᠳᠤᠪ ᠳᠤᠭᠤᠢ ᠪᠠᠢᠪᠠ᠃ ᠴᠢᠩᠭᠢᠭᠡᠳ ᠪᠠᠲᠤᠰᠦ᠋ᠬᠡᠡᠴᠡ:
《ᠪᠢᠳᠡ ᠬᠡᠵᠢᠶᠡ ᠳᠠᠬᠢᠵᠤ ᠠᠭᠤᠯᠵᠠᠬᠤᠶᠤᠮ ᠪᠣᠯᠪᠠ?》 ᠭᠡᠵᠦ ᠳᠣᠣᠷᠠ ᠳᠠᠭᠤᠨᠢᠶᠠᠷ ᠠᠰᠠᠭᠤᠪᠠ᠃
《ᠬᠡᠨ ᠬᠡᠯᠡᠵᠦ ᠮᠡᠳᠡᠬᠦ ᠪᠤᠢ? ᠪᠠᠳᠮᠠ ᠡ᠂ ᠪᠢ ᠵᠢᠶᠠᠩ ᠵᠢᠶᠧ ᠱ᠋ᠢᠶᠢ ᠪᠦᠷᠢᠮᠦᠰᠦᠨ ᠰᠥᠨᠦᠭᠡᠭᠡᠳ ᠪᠦᠬᠦ ᠤᠯᠤᠰᠢ ᠴᠢᠯᠦᠭᠡᠯᠡᠭᠰᠡᠨ ᠬᠣᠢᠨᠠ ᠵᠠᠪᠠᠯ ᠴᠢᠯᠦᠭᠡ ᠭᠤᠶᠤᠵᠤ ᠢᠷᠡᠭᠡᠳ ᠲᠠᠨᠢ ᠦᠵᠡᠶᠡ᠃ ᠵᠠ᠂ ᠲᠡᠷᠡ ᠦᠶᠡᠳᠦ ᠴᠢ ᠲᠤᠭᠤᠯ ᠬᠠᠷᠢᠭᠤᠯᠵᠤ ᠪᠠᠢᠳᠠᠭ ᠪᠣᠯᠪᠠᠤᠤ? ᠲᠥᠷᠦᠶᠢᠨ ᠲᠥᠯᠦᠭᠡ ᠶᠠᠪᠤᠵᠤ ᠪᠠᠢᠳᠠᠭ ᠪᠣᠯᠪᠠᠤᠤᠳᠠ ?》 ᠭᠡᠳ ᠢᠨᠢᠶᠡᠮᠰᠦᠭᠯᠡᠨᠡ᠃ ᠭᠡᠲᠡᠯᠡ ᠪᠠᠳᠮᠠ ᠡᠯᠢᠭᠡᠰᠡᠭ ᠵᠥᠭᠡᠯᠡᠨ ᠬᠠᠷᠠᠴᠠᠪᠠᠷ ᠪᠠᠲᠤᠰᠦ᠋ᠬᠡᠶᠢᠨ ᠴᠢᠷᠠᠢᠶᠢ ᠰᠢᠷᠲᠡᠵᠦ:
《ᠰᠦᠬᠡ ᠡ (ᠲᠡᠷᠡ ᠠᠩᠬᠠ ᠤᠳᠠᠭᠠ ᠰᠦᠬᠡ ᠭᠡᠵᠦ ᠰᠢᠭᠤᠳ ᠨᠡᠷᠡᠪᠡᠷᠨᠢ ᠳᠠᠭᠤᠳᠠᠪᠠ)᠂ ᠴᠢ ᠬᠠᠷᠠᠵᠤ ᠪᠠᠢᠭᠠᠷᠠᠢ! ᠪᠢ ᠶᠠᠭᠠᠬᠢᠪᠠᠴᠤ 〈ᠬᠠᠷᠢᠳᠤ ᠬᠠᠳᠠᠭᠠᠰᠤ᠂ ᠬᠠᠨᠴᠤᠢᠶᠢᠨ ᠨᠥᠬᠦᠭᠡᠰᠦ〉 ᠪᠣᠯᠵᠤ ᠨᠢᠭᠡᠨ ᠨᠠᠰᠤᠪᠠᠨ ᠪᠠᠷᠠᠬᠤᠦᠭᠡᠢ᠃ ᠪᠢ ᠥᠴᠦᠭᠡᠳᠦᠷ ᠰᠥᠨᠢ᠂ ᠰᠥᠨᠢ ᠳᠤᠮᠳᠠ ᠥᠩᠭᠡᠷᠡᠲᠡᠯᠡ ᠤᠨᠲᠠᠭᠰᠠᠨᠦᠭᠡᠢ᠂ ᠣᠯᠠᠨ ᠶᠠᠭᠤᠮᠠ ᠪᠣᠳᠤᠵᠤ ᠬᠡᠪᠲᠡᠭᠰᠡᠨ ᠰᠢᠤ》 ᠭᠡᠪᠡ᠃
《ᠶᠠᠭᠤ ᠪᠣᠳᠤᠭᠰᠠᠨᠶᠤᠮ ᠪᠤᠢ? ᠨᠠᠳᠠ ᠬᠡᠯᠡᠭᠡᠷᠡᠢ!》
《ᠪᠠᠢᠬᠤᠯᠠ᠂ ᠪᠠᠢᠬᠤᠯᠠ᠂ ᠴᠢᠨᠦ ᠬᠡᠯᠡᠭᠰᠡᠨ ᠦᠭᠡᠶᠢ ᠭᠡᠭᠡᠯᠲᠡᠦᠭᠡᠢ ᠬᠢᠨᠠᠵᠤ ᠪᠣᠳᠤᠪᠠ᠃ ᠨᠢᠭᠡᠳᠦᠭᠡᠷᠲᠦ ᠪᠢᠴᠢᠭ ᠦᠰᠦᠭ ᠴᠢᠷᠮᠠᠢᠨ ᠰᠤᠷᠤᠯᠴᠠᠨᠠ᠃ ᠢᠩᠭᠢᠭᠡᠳ ᠠᠵᠢᠯ ᠬᠥᠳᠡᠯᠮᠦᠷᠢᠶᠢᠨ ᠲᠠᠯᠠᠪᠠᠷ ᠪᠠᠰᠠ ᠶᠡᠬᠡ ᠪᠦᠲᠦᠭᠡᠯ ᠭᠠᠷᠭᠠᠶᠠ ᠭᠡᠵᠦ ᠪᠣᠳᠤᠵᠤ ᠪᠠᠢᠨᠠ᠃ ᠶᠠᠮᠠᠷ ᠪᠤᠢ? ᠪᠢ ᠴᠢᠨᠦ ᠬᠡᠯᠡᠭᠰᠡᠨᠢᠶᠡᠷ ᠶᠠᠪᠤᠵᠤ ᠴᠢᠳᠠᠨᠠ ᠭᠡᠵᠦ ᠴᠢ ᠨᠠᠮᠠᠢ ᠢᠲᠡᠭᠡᠨᠡᠦᠦ?》
《ᠶᠡᠬᠡ ᠰᠠᠢᠨ᠂ ᠶᠡᠬᠡ ᠰᠠᠢᠨ᠂ ᠪᠢ ᠴᠢᠮᠠᠢ ᠪᠠᠲᠤ ᠢᠲᠡᠭᠡᠨᠡ ᠁》 ᠭᠡᠵᠦ ᠪᠠᠲᠤᠰᠦ᠋ᠬᠡ ᠢᠨᠢᠶᠡᠭᠰᠡᠭᠡᠷ ᠬᠡᠯᠡᠪᠡ᠃
ᠭᠡᠲᠡᠯᠡ ᠬᠥᠭᠰᠢᠨ ᠡᠵᠢ ᠣᠷᠤᠵᠤ ᠢᠷᠡᠭᠡᠳ ᠲᠡᠷᠡ ᠬᠣᠶᠠᠷᠤᠨ ᠦᠭᠡᠶᠢ ᠲᠠᠰᠤᠯᠪᠠ᠃ ᠪᠠᠲᠤᠰᠦ᠋ᠬᠡ ᠢᠴᠡᠩᠭᠦᠷᠡᠭᠰᠡᠨᠶᠦᠮᠰᠢᠭ ᠬᠠᠵᠠᠭᠤᠳᠤᠨᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠢᠴᠢᠬᠠᠨ ᠴᠢᠮᠡᠳᠢ ᠲᠡᠪᠡᠷᠢᠨ ᠠᠪᠴᠤ ᠬᠤᠪᠠᠨ ᠰᠢᠷᠠ ᠲᠣᠯᠤᠭᠠᠢᠶᠢᠨᠢ ᠢᠯᠪᠢᠵᠦ ᠮᠠᠨᠲᠠᠭᠠᠷ ᠤᠯᠠᠭᠠᠨ ᠬᠠᠴᠠᠷᠢᠨᠢ ᠦᠨᠦᠰᠦᠨᠡ᠃
ᠴᠢᠮᠡᠳ ᠪᠠᠲᠤᠰᠦ᠋ᠬᠡᠶᠢᠨ ᠡᠪᠦᠷ ᠳᠡᠭᠡᠷᠡᠨᠢ ᠰᠠᠭᠤᠭᠠᠳ᠂ ᠲᠡᠭᠦᠨᠦ ᠡᠩᠭᠡᠷ ᠳᠡᠭᠡᠷᠡᠪᠡᠨ ᠵᠡᠭᠦᠭᠰᠡᠨ ᠣᠳᠤᠨ ᠲᠡᠮᠳᠡᠭᠢ ᠪᠠᠷᠢᠵᠤ ᠳᠤᠷᠠᠯᠠᠭᠰᠠᠨᠰᠢᠭ᠋ ᠪᠠᠬᠠᠷᠬᠠᠨ ᠠᠭᠠᠰᠢᠯᠠᠨᠠ᠃
ᠪᠠᠲᠤᠰᠦ᠋ᠬᠡ᠂ ᠪᠢᠴᠢᠬᠠᠨ ᠴᠢᠮᠡᠳᠢ ᠬᠠᠢᠷᠠᠯᠠᠨ ᠲᠠᠭᠠᠯᠠᠬᠤᠳᠠᠭᠠᠨ ᠲᠡᠭᠦᠨᠦ ᠥᠰᠦᠭᠰᠡᠨ ᠬᠣᠢᠨᠠᠪᠠᠨ ᠶᠠᠮᠠᠷ ᠬᠥᠮᠦᠨ ᠪᠣᠯᠵᠤ᠂ ᠶᠠᠮᠠᠷ ᠶᠡᠬᠡ ᠬᠡᠷᠡᠭ ᠦᠢᠯᠡᠰᠢ ᠪᠦᠲᠦᠭᠡᠬᠦᠶᠢᠨᠢ ᠪᠣᠳᠤᠵᠤ᠂ ᠪᠠᠷᠠᠭᠤᠨ ᠬᠣᠢᠨᠠ ᠬᠠᠨᠠᠳᠤ ᠡᠯᠭᠦᠵᠦ ᠪᠠᠢᠬᠤ ᠳᠤᠮᠳᠠᠳᠤ ᠤᠯᠤᠰᠤᠨ ᠠᠷᠠᠳ ᠲᠦᠮᠡᠨᠦ ᠵᠣᠯ ᠵᠢᠷᠭᠠᠯᠤᠨ ᠵᠠᠮᠢ ᠭᠡᠷᠡᠯᠲᠦᠭᠦᠯᠦᠨ ᠵᠢᠭᠠᠭᠰᠠᠨ ᠪᠥᠭᠡᠳ ᠳᠣᠷᠤᠢ ᠪᠠᠭᠠ ᠦᠨᠳᠦᠰᠦᠲᠡᠨᠦ ᠠᠪᠤᠷᠠᠭᠴᠢ ᠣᠳᠤᠨ ᠠᠭᠤᠤ ᠶᠡᠬᠡ ᠪᠠᠭᠰᠢ᠂ ᠮᠠᠨᠤ ᠦᠶᠡᠶᠢᠨ ᠭᠠᠢᠬᠠᠮᠰᠢᠭᠲᠤ ᠲᠡᠮᠡᠴᠡᠯᠦᠨ ᠵᠢᠯᠤᠭᠤᠳᠤᠭᠴᠢ ᠬᠠᠢᠷᠠᠲᠠᠢ ᠤᠳᠤᠷᠢᠳᠤᠭᠴᠢ ᠲᠡᠷᠢᠭᠦᠯᠡᠭᠴᠢ ᠮᠠᠤ ᠽᠧ ᠳ᠋ᠦᠩᠦᠨ ᠬᠥᠷᠦᠭᠢ ᠬᠠᠷᠠᠪᠠ᠃
ᠲᠡᠷᠢᠭᠦᠯᠡᠭᠴᠢᠶᠢᠨ ᠠᠭᠤᠳᠠᠮ ᠥᠷᠭᠡᠨ ᠮᠠᠩᠨᠠᠢ᠂ ᠶᠡᠬᠡᠮᠰᠦᠭ ᠵᠢᠪᠬᠤᠯᠠᠩᠲᠠᠢ ᠳᠦᠷᠢ᠂ ᠥᠷᠦᠰᠢᠶᠡᠯ ᠬᠠᠢᠷᠠᠯᠠᠯᠲᠠᠢ ᠨᠢᠳᠦᠨᠢ ᠰᠠᠨᠠᠭᠠ ᠰᠠᠢᠲᠠᠢ ᠪᠢᠴᠢᠬᠠᠨ ᠴᠢᠮᠡᠳ᠂ ᠪᠠᠳᠮᠠ᠂ ᠪᠠᠲᠤᠰᠦ᠋ᠬᠡ ᠭᠤᠷᠪᠠᠭᠤᠯᠠᠶᠢ ᠬᠠᠷᠠᠭᠠᠳ ᠢᠨᠢᠶᠡᠮᠰᠦᠭᠯᠡᠭᠰᠡᠨᠰᠢᠭ ᠰᠠᠨᠠᠭᠳᠠᠨᠠ᠃ ᠪᠠᠲᠤᠰᠦ᠋ᠬᠡ᠂ ᠥᠴᠦᠭᠡᠳᠦᠷ ᠰᠤᠮᠤᠨ ᠳᠠᠷᠤᠭᠠ᠂ ᠵᠢᠭᠠᠨ ᠤᠳᠤᠷᠢᠳᠤᠭᠴᠢ ᠬᠣᠶᠠᠷᠤᠨᠢᠶᠠᠨ ᠵᠠᠬᠢᠳᠠᠯᠢ ᠣᠯᠤᠭᠰᠠᠨᠠᠴᠠ ᠨᠠᠰᠢ ᠰᠥᠨᠢ ᠤᠨᠲᠠᠭᠠᠳ ᠨᠣᠢᠷᠦᠭᠡᠢ᠂ ᠡᠳᠦᠷ ᠪᠣᠰᠤᠭᠠᠳ ᠰᠠᠭᠤᠳᠠᠯᠦᠭᠡᠢ ᠪᠣᠯᠵᠤ᠂ ᠵᠠᠪᠠᠯ ᠴᠡᠷᠢᠭ ᠳᠡᠭᠡᠷᠡᠪᠡᠨ ᠶᠠᠪᠤᠨᠠ ᠭᠡᠬᠦᠳᠦ᠂ ᠪᠥᠬᠡ ᠡᠪᠦᠭᠡᠨ ᠬᠥᠭᠰᠢᠨ ᠬᠣᠶᠠᠷ᠂ ᠪᠠᠳᠮᠠ ᠪᠢᠴᠢᠬᠠᠨ ᠴᠢᠮᠡᠳᠲᠡᠢᠪᠡᠨ ᠰᠢᠷᠬᠠᠪᠠᠨ ᠡᠳᠡᠭᠡᠭᠡᠳ ᠶᠠᠪᠤᠭᠠᠷᠠᠢ! ᠭᠡᠵᠦ ᠬᠣᠷᠢᠭᠯᠠᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠪᠣᠯᠤᠭᠰᠠᠨᠦᠭᠡᠢ᠃ ᠲᠡᠷᠡ᠂ ᠥᠨᠥ ᠥᠷᠯᠦᠭᠡ ᠭᠡᠭᠡᠷᠡᠬᠦᠶᠢᠨ ᠬᠢᠷᠢᠳᠦ ᠮᠣᠷᠢᠨᠳᠠᠭᠠᠨ ᠡᠮᠡᠭᠡᠯ ᠳᠠᠷᠤᠭᠠᠳ᠂ ᠰᠣᠯᠢᠶᠠᠲᠠᠢ ᠬᠥᠮᠦᠨᠰᠢᠭ ᠭᠦᠶᠦᠨ ᠭᠦᠶᠦᠨ ᠪᠣᠰᠴᠤ ᠪᠠᠢᠪᠠ᠃
ᠡᠪᠦᠭᠡᠨ ᠬᠥᠭᠰᠢᠨ ᠬᠣᠶᠠᠷ ᠬᠣᠨᠢᠪᠠᠨ ᠲᠠᠪᠠᠭᠯᠠᠵᠤ ᠬᠦᠦ ᠪᠠᠲᠤᠰᠦ᠋ᠭᠡᠪᠡᠨ ᠳᠠᠢᠯᠠᠪᠠ᠃ ᠪᠥᠬᠡ ᠡᠪᠦᠭᠡᠨ᠂ ᠮᠥᠩᠭᠦᠨ ᠠᠶᠠᠭᠠᠨᠳᠠᠭᠠᠨ ᠰᠠᠭᠠᠯᠢᠶᠢᠨ ᠠᠷᠢᠬᠢᠪᠠᠨ ᠳᠦᠭᠦᠷᠭᠡᠵᠦ ᠪᠠᠲᠤᠰᠦ᠋ᠬᠡᠳᠦ ᠥᠭᠬᠦᠳᠡᠭᠡᠨ: 《ᠳᠠᠢᠰᠤᠨᠢᠶᠠᠨ ᠳᠠᠷᠤᠭᠠᠳ᠂ ᠳᠠᠷᠬᠠᠨ ᠴᠣᠯᠠᠶᠢ ᠣᠯᠤᠭᠠᠳ᠂ ᠳᠠᠭᠠᠷᠢᠭᠠᠳ ᠢᠷᠡᠬᠦᠳᠦᠴᠢᠨᠢ ᠳᠠᠬᠢᠵᠤ ᠪᠠᠶᠠᠷᠲᠠᠢ ᠠᠭᠤᠯᠵᠠᠵᠠᠭᠠᠶᠠ》 ᠭᠡᠵᠦ ᠠᠪᠤ ᠬᠥᠮᠦᠨᠦ ᠵᠠᠩᠰᠢᠯᠢᠶᠠᠷ ᠢᠷᠦᠭᠡᠲᠡᠯᠡ᠂ ᠬᠥᠭᠰᠢᠨ ᠡᠵᠢᠨᠢ ᠪᠠᠰᠠ ᠴᠠᠪᠠᠦᠭᠡᠢ ᠴᠠᠭᠠᠨ ᠱᠠᠵᠠᠩᠳᠠᠭᠠᠨ ᠠᠷᠢᠭᠤᠨ ᠰᠦ᠋ᠪᠡᠨ ᠳᠦᠭᠦᠷᠭᠡᠭᠡᠳ: 《ᠬᠡᠢ ᠮᠣᠷᠢᠴᠢᠨᠢ ᠳᠡᠭᠳᠡᠵᠦ᠂ ᠬᠠᠨᠳᠤᠭᠰᠠᠨ ᠵᠦᠭᠲᠡᠭᠡᠨ ᠳᠡᠢᠯᠦᠭᠡᠳ᠂ ᠬᠡᠰᠢᠭ ᠪᠤᠶᠠᠨᠴᠢᠨᠢ ᠨᠡᠮᠡᠭᠳᠡᠵᠦ᠂ ᠬᠡᠵᠢᠶᠡᠳᠡᠭᠡᠨ ᠮᠡᠨᠳᠦ ᠶᠠᠪᠤ ᠳ᠋ᠠ ᠬᠦᠦᠮᠢᠨᠢ》 ᠭᠡᠵᠦ ᠢᠷᠦᠭᠡᠭᠡᠳ ᠨᠢᠯᠪᠤᠰᠤᠪᠠᠨ ᠠᠷᠴᠢᠵᠤ ᠰᠠᠭᠤᠨᠠ᠃
ᠪᠠᠲᠤᠰᠦ᠋ᠬᠡ ᠥᠪᠡᠷᠦᠨ ᠲᠥᠷᠦᠭᠰᠡᠨᠢᠶᠡᠨᠰᠢᠭ ᠰᠠᠨᠠᠭᠰᠠᠨ ᠡᠵᠢ᠂ ᠠᠪᠤ᠂ ᠳᠡᠭᠦᠦᠨᠡᠷᠦᠨᠢᠶᠡᠨ ᠦᠨᠡᠨ ᠵᠢᠷᠦᠬᠡᠨᠦ ᠡᠨᠡᠷᠢᠯ ᠬᠠᠢᠷᠠᠳᠤᠨᠢ ᠰᠡᠳᠭᠢᠯ ᠬᠥᠳᠡᠯᠵᠦ:
《ᠠᠷᠢᠭᠤᠨ ᠴᠠᠭᠠᠨ ᠰᠦ᠋ᠪᠡᠨ ᠰᠢᠮᠡᠭᠦᠯᠦᠨ ᠥᠰᠭᠡᠭᠰᠡᠨ ᠡᠬᠡ ᠣᠷᠤᠨ ᠠᠷᠠᠳ ᠲᠦᠮᠡᠨᠦᠪᠡᠨ ᠲᠥᠯᠦᠭᠡ᠂ ᠡᠴᠢᠭᠡ ᠡᠬᠡᠲᠡᠢᠮᠢᠨᠢ ᠠᠳᠠᠯᠢ ᠡᠨᠡᠷᠢᠨ ᠬᠠᠢᠷᠠᠯᠠᠭᠰᠠᠨ ᠲᠠᠨᠠᠷᠤᠨᠢᠶᠠᠨ ᠡᠭᠦᠷᠢᠳᠡᠶᠢᠨ ᠵᠣᠯ ᠵᠢᠷᠭᠠᠯᠤᠨ ᠲᠥᠯᠦᠭᠡ᠂ ᠤᠯᠠᠭᠠᠨ ᠴᠢᠰᠤᠪᠠᠨ ᠬᠠᠢᠷᠠᠯᠠᠬᠤᠦᠭᠡᠢᠪᠠᠷ ᠵᠢᠳᠭᠦᠨᠡ》 ᠭᠡᠵᠦ ᠬᠡᠯᠡᠬᠦᠳᠡᠭᠡᠨ ᠨᠢᠳᠦᠨᠳᠦᠨᠢ ᠨᠢᠯᠪᠤᠰᠤ ᠪᠦᠷᠬᠦᠵᠦ ᠪᠠᠢᠪᠠ᠃ ᠭᠡᠲᠡᠯᠡ ᠵᠡᠭᠦᠨ ᠪᠠᠷᠠᠭᠤᠨ ᠭᠡᠷᠦᠨ ᠬᠢᠨᠢ ᠡᠪᠦᠭᠡᠳ ᠬᠥᠭᠰᠢᠳ ᠢᠷᠡᠵᠦ᠂ ᠬᠣᠢᠲᠤ ᠤᠷᠲᠤ ᠠᠢᠯᠤᠳᠤᠨ ᠦᠶᠡᠶᠢᠨ ᠵᠠᠯᠠᠭᠤᠴᠤᠳ ᠴᠤᠭᠯᠠᠷᠠᠵᠤ᠂ ᠥᠪᠡᠷᠦᠨ ᠦᠷᠡ ᠬᠡᠦᠬᠡᠳᠢᠶᠡᠨ ᠦᠳᠡᠵᠦ ᠮᠣᠷᠳᠠᠭᠤᠯᠬᠤᠪᠠᠷ ᠰᠠᠭᠤᠯᠴᠠᠪᠠ᠃
ᠪᠠᠳᠮᠠ᠂ ᠪᠠᠲᠤᠰᠦ᠋ᠬᠡᠶᠢᠨ ᠵᠠᠮᠤᠨ ᠬᠦᠨᠡᠰᠦ᠂ ᠴᠠᠭᠠᠨ ᠢᠳᠡᠭᠡ ᠵᠡᠷᠭᠡᠶᠢ ᠪᠠᠭᠯᠠᠵᠤ ᠬᠤᠪᠴᠠᠰᠤ ᠬᠤᠨᠠᠷᠢᠨᠢ ᠤᠭᠠᠵᠤ ᠨᠥᠬᠦᠭᠡᠳ ᠴᠢᠪ ᠴᠠᠪ ᠬᠢᠲᠡᠯᠡ ᠪᠡᠯᠡᠳᠭᠡᠪᠡ᠃ ᠨᠠᠷᠠᠨ ᠦᠳᠡ ᠰᠢᠬᠠᠪᠠ᠃ ᠪᠠᠲᠤᠰᠦ᠋ᠬᠡ᠂ ᠴᠡᠷᠢᠭᠲᠦ ᠣᠷᠤᠬᠤᠪᠠᠷ ᠣᠴᠢᠬᠤ ᠠᠷᠪᠠᠨ ᠬᠡᠳᠦᠨ ᠵᠠᠯᠠᠭᠤᠴᠤᠳᠲᠠᠢᠪᠠᠨ ᠮᠣᠷᠳᠠᠪᠠ᠃ ᠠᠢᠯᠤᠨ ᠣᠯᠠᠨᠢᠶᠠᠷᠢᠶᠠᠨ ᠳᠠᠭᠠᠵᠤ ᠭᠠᠵᠠᠷ ᠢᠯᠡᠭᠦᠦ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠮᠥᠨᠴᠦ ᠪᠤᠴᠠᠬᠤᠦᠭᠡᠢ᠂ ᠵᠠᠮ ᠣᠷᠴᠢᠮᠤᠨ ᠠᠢᠯᠤᠨ ᠬᠥᠭᠰᠢᠳ ᠬᠤᠷᠤᠳ ᠲᠣᠰᠤᠪᠠᠨ ᠪᠠᠷᠢᠵᠤ᠂ ᠲᠣᠰᠤᠨ ᠲᠣᠰᠤᠨ ᠢᠷᠡᠵᠦ ᠬᠤᠪᠢ ᠬᠤᠪᠢᠪᠠᠷᠢᠶᠠᠨ ᠢᠷᠦᠭᠡᠵᠦ᠂ ᠲᠤᠰ ᠲᠤᠰᠢᠶᠠᠷᠢᠶᠠᠨ ᠪᠡᠯᠡᠭᠯᠡᠨᠡ᠃ ᠪᠠᠲᠤᠰᠦ᠋ᠬᠡ᠂ ᠪᠢᠴᠢᠬᠠᠨ ᠴᠢᠮᠡᠳᠢ ᠲᠡᠪᠡᠷᠢᠬᠦᠳᠦ ᠲᠡᠷᠡ᠂ ᠪᠠᠲᠤᠰᠦ᠋ᠬᠡᠶᠢᠨ ᠬᠦᠵᠦᠭᠦᠦᠪᠡᠷᠨᠢ ᠴᠢᠩᠭᠠ ᠲᠡᠪᠡᠷᠢᠵᠦ ᠪᠤᠮᠪᠠᠭᠠᠷ ᠤᠯᠠᠭᠠᠨ ᠬᠠᠴᠠᠷᠢᠶᠠᠨ ᠵᠠᠪᠰᠠᠷᠦᠭᠡᠢ ᠨᠠᠭᠠᠯᠳᠤᠭᠤᠯᠪᠠ᠃ ᠪᠠᠲᠤᠰᠦ᠋ᠬᠡ ᠪᠠᠢᠨ ᠪᠠᠢᠨ ᠵᠣᠭᠰᠤᠵᠤ: 《ᠪᠠᠭᠠ ᠬᠣᠯᠠ ᠶᠠᠪᠤᠭᠰᠠᠨᠦᠭᠡᠢ᠂ ᠣᠳᠣ ᠪᠤᠴᠠ᠂ ᠣᠳᠣ ᠪᠤᠴᠠᠭᠠᠷᠠᠢ!》 ᠭᠡᠵᠦ ᠱᠠᠯᠠᠪᠠᠴᠤ᠂ ᠬᠥᠮᠦᠰ ᠶᠡᠷᠦ ᠰᠠᠯᠬᠤ ᠳᠤᠷᠠᠦᠭᠡᠢᠰᠢᠭ᠋ ᠶᠠᠪᠤᠭᠰᠠᠭᠠᠷ ᠪᠠᠰᠠ ᠬᠠᠭᠠᠰ ᠭᠠᠵᠠᠷ ᠬᠢᠷᠢᠲᠡᠢ ᠦᠳᠡᠪᠡ᠃ ᠬᠥᠭᠰᠢᠨ ᠡᠵᠢ ᠭᠦᠶᠦᠨ ᠢᠷᠡᠵᠦ᠂ ᠪᠠᠲᠤᠰᠦ᠋ᠬᠡᠶᠢᠨ ᠬᠦᠵᠦᠭᠦᠦᠪᠡᠷᠨᠢ ᠲᠡᠪᠡᠷᠢᠨ:
《ᠬᠦᠦᠮᠢᠨᠢ!》 ᠭᠡᠳ ᠦᠭᠡ ᠬᠡᠯᠡᠵᠦ ᠭᠠᠷᠬᠤᠦᠭᠡᠢ ᠨᠡᠯᠢᠶᠡᠳ ᠤᠳᠠᠭᠠᠳ: 《ᠮᠡᠨᠳᠦ ᠰᠠᠢᠨ ᠶᠠᠪᠤᠭᠠᠷᠠᠢ》 ᠭᠡᠳ ᠤᠬᠢᠯᠠᠭᠰᠠᠭᠠᠷ ᠦᠨᠦᠰᠦᠨᠡ᠃ ᠪᠠᠳᠮᠠᠶᠢᠨ ᠴᠢᠷᠠᠢ ᠤᠪ ᠤᠯᠠᠭᠠᠨ ᠪᠣᠯᠤᠭᠠᠳ ᠨᠢᠳᠦᠨᠳᠦᠨᠢ ᠨᠢᠯᠪᠤᠰᠤ ᠪᠦᠷᠬᠦᠪᠡ᠃ ᠬᠥᠮᠦᠰ ᠬᠠᠮᠤᠭᠤᠨ ᠰᠡᠭᠦᠯᠳᠦᠨᠢ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠢᠷᠦᠭᠡᠯᠴᠡᠵᠦ ᠰᠠᠯᠪᠠ᠃
ᠠᠢᠯᠤᠨ ᠣᠯᠠᠨ ᠬᠡᠳᠦ ᠬᠡᠳᠦᠪᠡᠷᠢᠶᠡᠨ ᠪᠤᠲᠠᠷᠠᠨ ᠭᠡᠷ ᠭᠡᠷ ᠵᠦᠭᠢᠶᠡᠨ ᠶᠠᠪᠤᠪᠠ᠃ ᠪᠠᠳᠮᠠ ᠭᠠᠭᠴᠠᠭᠠᠷ ᠦᠯᠡᠳᠡᠵᠦ ᠪᠠᠰᠠ ᠬᠠᠮᠲᠤ ᠠᠯᠬᠤᠭᠰᠠᠭᠠᠷ᠃ ᠲᠡᠷᠡ ᠦᠶᠡᠳᠦ᠂ ᠲᠡᠭᠦᠨᠦ ᠵᠢᠷᠦᠬᠡᠨᠢ ᠲᠦᠭ ᠲᠦᠭ ᠴᠣᠬᠢᠯᠠᠨ ᠳᠣᠲᠤᠷᠠᠨᠢ ᠬᠠᠯᠠᠭᠤᠨ ᠣᠷᠭᠢᠪᠠ᠃ ᠪᠠᠰᠠ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠪᠠᠲᠤᠰᠦ᠋ᠬᠡ ᠶᠠᠭ ᠮᠣᠷᠳᠠᠬᠤ ᠦᠶᠡᠰᠲᠦ᠂ ᠪᠠᠳᠮᠠ ᠡᠪᠦᠷᠡᠴᠡᠪᠡᠨ ᠨᠢᠭᠡᠨ ᠬᠠᠳᠭᠤᠮᠠᠯ ᠬᠤᠸᠠᠷᠲᠠᠢ ᠲᠠᠮᠠᠬᠢᠨᠤ ᠤᠭᠤᠲᠠ ᠭᠠᠷᠭᠠᠵᠤ ᠪᠠᠲᠤᠰᠦ᠋ᠬᠡᠳᠦ ᠥᠭᠭᠦᠭᠡᠳ:
《ᠰᠦᠬᠡ ᠡ!》 ᠭᠡᠳ ᠬᠡᠯᠡᠵᠦ ᠭᠠᠷᠤᠭᠰᠠᠨᠦᠭᠡᠢ᠂ ᠴᠢᠷᠠᠢᠨᠢ ᠴᠢᠰᠤ ᠮᠡᠲᠦ ᠤᠯᠠᠢᠵᠤ ᠢᠴᠡᠩᠭᠦᠷᠡᠭᠰᠡᠨᠰᠢᠭ ᠳᠣᠷᠤᠭᠰᠢ ᠬᠠᠷᠠᠭᠠᠳ:
《ᠪᠢ ᠠᠮᠢᠳᠤ ᠪᠠᠢᠭᠰᠠᠨ ᠴᠠᠭᠲᠤ ᠴᠢᠮᠠᠢ ᠶᠠᠭᠠᠬᠢᠪᠠᠴᠤ ᠮᠠᠷᠲᠠᠬᠤᠦᠭᠡᠢ᠂ ᠴᠢ ᠪᠠᠰᠠ ᠨᠠᠮᠠᠢ ᠪᠤᠤ ᠮᠠᠷᠲᠠᠭᠠᠷᠠᠢ》 ᠭᠡᠳ ᠮᠡᠯᠲᠡᠭᠡᠨᠡᠵᠦ ᠪᠠᠢᠭᠠ ᠨᠢᠯᠪᠤᠰᠤᠪᠠᠨ ᠬᠣᠷᠢᠭᠯᠠᠬᠤ ᠭᠡᠵᠦ ᠡᠭᠦᠯᠡᠨᠦ ᠲᠣᠯᠤᠭᠠᠢᠶᠢ ᠬᠠᠷᠠᠪᠠ᠃ ᠭᠡᠪᠡᠴᠦ ᠨᠢᠯᠪᠤᠰᠤᠨᠢ ᠲᠡᠭᠦᠨᠦ ᠰᠠᠨᠠᠭᠠᠶᠢ ᠳᠠᠭᠠᠭᠰᠠᠨᠦᠭᠡᠢ ᠤᠯᠠᠭᠠᠨ ᠬᠠᠴᠠᠷ ᠤᠷᠤᠭᠤᠨᠢ ᠪᠥᠮᠪᠦᠷᠢᠪᠡ᠃
ᠪᠠᠲᠤᠰᠦ᠋ᠬᠡ᠂ ᠪᠠᠳᠮᠠᠶᠢᠨ ᠭᠠᠷᠢ ᠴᠢᠩᠭᠠ ᠠᠳᠭᠤᠵᠤ᠂ ᠨᠥᠭᠦᠭᠡ ᠭᠠᠷᠢᠶᠠᠷᠢᠶᠠᠨ ᠮᠥᠷᠦᠨ ᠳᠡᠭᠡᠷᠡᠨᠢ ᠳᠠᠷᠤᠵᠤ:
《ᠪᠠᠳᠮᠠ ᠡ᠂ ᠪᠢ ᠴᠢᠮᠠᠢᠪᠠᠨ ᠦᠬᠦᠪᠡᠴᠦ ᠮᠠᠷᠲᠠᠬᠤᠦᠭᠡᠢ》 ᠭᠡᠪᠡ᠃
ᠬᠣᠶᠠᠭᠤᠯᠠ ᠭᠠᠷ ᠭᠠᠷᠢᠶᠠᠨ ᠴᠢᠩᠭᠠ ᠠᠳᠭᠤᠯᠴᠠᠨ ᠠᠯᠬᠤᠬᠤᠳᠤ᠂ ᠲᠡᠳᠡᠨᠦ ᠡᠮᠦᠨᠡ ᠬᠢᠵᠠᠭᠠᠷᠦᠭᠡᠢ ᠠᠭᠤᠳᠠᠮ ᠰᠠᠷᠠᠭᠤᠯ ᠵᠡᠭᠡᠷᠭᠡᠨᠡᠲᠡᠢᠶᠢᠨ ᠲᠠᠯᠠ ᠤᠨᠢᠶᠠᠷᠲᠤᠨ᠂ ᠠᠷᠢᠭᠤᠨ ᠲᠤᠩᠭᠠᠯᠠᠭ ᠭᠦᠩᠭᠡᠷᠦᠨ ᠭᠣᠣᠯᠤᠨ ᠤᠰᠤ ᠴᠠᠢᠯᠵᠠᠨ ᠬᠠᠷᠠᠭᠳᠠᠵᠤ᠂ ᠥᠩᠭᠡ ᠪᠦᠷᠢᠶᠢᠨ ᠴᠡᠴᠡᠭ ᠬᠤᠸᠠᠷ ᠭᠣᠣᠯᠤᠨ ᠲᠣᠬᠤᠢᠶᠢ ᠳᠠᠭᠠᠵᠤ ᠳᠡᠯᠭᠡᠷᠡᠭᠡᠳ ᠬᠠᠯᠠᠭᠤᠨ ᠵᠢᠪᠠᠷᠲᠤ ᠰᠠᠢᠬᠠᠨ ᠦᠨᠦᠷ ᠠᠩᠬᠢᠯᠤᠨᠠ᠃ ᠳᠡᠨᠵᠢ ᠳᠠᠭᠠᠵᠤ ᠰᠠᠭᠤᠭᠰᠠᠨ ᠵᠤᠰᠠᠯᠠᠩᠤᠨ ᠠᠢᠯᠤᠨ ᠥᠨᠳᠡᠭᠡᠨ ᠴᠠᠭᠠᠨ ᠭᠡᠷᠦᠳ ᠵᠢᠭᠳᠡᠯᠡᠨ ᠬᠠᠷᠠᠭᠳᠠᠭᠠᠳ᠂ ᠠᠳᠤᠭᠤ ᠬᠣᠨᠢᠨ ᠰᠦᠷᠦᠭ ᠡᠪᠡᠰᠦᠲᠦ ᠲᠠᠯᠠᠶᠢ ᠳᠦᠭᠦᠷᠡᠩ ᠴᠢᠮᠡᠭᠯᠡᠵᠡᠢ᠃
ᠪᠠᠲᠤᠰᠦ᠋ᠬᠡ᠂ ᠪᠠᠳᠮᠠ ᠬᠣᠶᠠᠷᠲᠤ ᠲᠡᠳᠡᠨᠦ ᠲᠥᠷᠦᠭᠰᠡᠨ ᠨᠤᠲᠤᠭ᠂ ᠮᠣᠩᠭᠤᠯᠤᠨ ᠰᠠᠢᠬᠠᠨ ᠣᠷᠤᠨᠨᠢ ᠶᠠᠭᠤᠨᠠᠴᠠᠴᠤ ᠬᠠᠯᠠᠭᠤᠨ᠂ ᠶᠠᠭᠤᠨᠠᠴᠠᠴᠤ ᠢᠨᠠᠭ ᠪᠣᠳᠤᠭᠳᠠᠵᠠᠢ᠃
ᠵᠠᠮᠤᠨ ᠨᠥᠬᠦᠳᠨᠢ ᠦᠵᠡᠵᠦ ᠪᠠᠢᠲᠠᠯᠠ ᠬᠣᠯᠠᠳᠪᠠ᠃ ᠲᠡᠷᠡ ᠬᠣᠶᠠᠷ ᠨᠢᠭᠡᠨᠦᠪᠡᠨ ᠭᠠᠷᠢ ᠴᠢᠩᠭᠠ ᠠᠳᠭᠤᠵᠤ ᠬᠡᠨ ᠠᠯᠢᠨᠴᠤ ᠲᠠᠯᠪᠢᠬᠤ ᠳᠤᠷᠠᠦᠭᠡᠢ ᠨᠡᠯᠢᠶᠡᠳ ᠤᠳᠠᠪᠠ᠃
ᠪᠠᠲᠤᠰᠦ᠋ᠬᠡ᠂ ᠲᠠᠷᠭᠤᠨ ᠰᠠᠷᠠᠯ ᠮᠣᠷᠢᠨᠳᠠᠭᠠᠨ ᠮᠣᠷᠳᠠᠬᠤ ᠦᠶᠡᠰᠲᠦ᠂ ᠲᠡᠭᠦᠨᠦ ᠡᠩᠭᠡᠷ ᠳᠡᠭᠡᠷᠡᠪᠡᠨ ᠵᠡᠭᠦᠭᠰᠡᠨ ᠣᠳᠤᠨᠨᠢ ᠨᠠᠷᠠᠨᠳᠤ ᠭᠢᠯᠠᠯᠵᠠᠨ ᠰᠢᠵᠢᠷ ᠭᠡᠷᠡᠯ ᠰᠠᠴᠤᠷᠠᠪᠠ᠃ ᠲᠡᠭᠦᠨᠦ ᠥᠷᠭᠡᠨ ᠰᠠᠢᠬᠠᠨ ᠮᠥᠷᠦ᠂ ᠲᠥᠷᠦᠯᠬᠢ ᠲᠠᠮᠢᠷᠯᠢᠭ ᠪᠡᠶᠡ᠂ ᠮᠣᠢᠯ ᠬᠠᠷᠠ ᠬᠥᠮᠦᠰᠭᠡᠨᠢ ᠬᠣᠢᠨᠠᠠᠴᠠᠨᠢ ᠪᠠᠬᠠᠷᠬᠠᠨ ᠰᠢᠷᠲᠡᠵᠦ ᠪᠠᠢᠭᠠ ᠪᠠᠳᠮᠠᠳᠤ ᠲᠤᠢᠯᠤᠨ ᠰᠠᠢᠬᠠᠨ ᠰᠠᠨᠠᠭᠳᠠᠪᠠ᠃
ᠮᠣᠷᠢᠲᠠᠢ ᠬᠥᠮᠦᠨ ᠤᠯᠠᠮ ᠬᠣᠯᠠᠳᠴᠤ ᠮᠠᠩᠬᠠᠨᠤ ᠬᠥᠲᠦᠯᠢ ᠳᠠᠪᠠᠪᠠ᠃ ᠪᠠᠲᠤᠰᠦ᠋ᠬᠡ᠂ ᠪᠠᠢᠨ ᠪᠠᠢᠨ ᠡᠷᠭᠢᠵᠦ ᠬᠠᠷᠠᠬᠤᠳᠤ ᠪᠠᠳᠮᠠᠶᠢᠨ ᠴᠡᠩᠬᠡᠷ ᠬᠥᠬᠡ ᠪᠦᠰ ᠴᠠᠮᠴᠠᠶᠢᠨ ᠬᠢᠨᠢ ᠬᠣᠷᠮᠤᠢ ᠬᠣᠲᠠ ᠬᠣᠩᠭᠤᠷ ᠰᠠᠯᠬᠢᠨᠳᠤ ᠳᠠᠷᠪᠠᠯᠵᠠᠵᠤ ᠤᠯᠠᠭᠠᠨ ᠳᠤᠷᠳᠤᠩ ᠠᠯᠴᠢᠭᠤᠷᠨᠢ ᠰᠠᠨᠴᠢᠭᠤᠨ ᠦᠰᠦᠲᠡᠢᠨᠢ ᠬᠡᠢᠰᠦᠭᠡᠳ᠂ ᠴᠠᠭᠠᠨ ᠲᠣᠷᠭᠠᠨ ᠭᠠᠷ ᠠᠯᠴᠢᠭᠤᠷᠢᠶᠠᠷᠢᠶᠠᠨ ᠨᠢᠳᠦᠪᠡᠨ ᠠᠷᠴᠢᠵᠤ ᠪᠠᠢᠬᠤᠨᠢ ᠢᠪ ᠢᠯᠡᠬᠡᠨ ᠬᠠᠷᠠᠭᠳᠠᠪᠠ᠃
1954. 3