| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
-ᠦᠯᠦ ᠰᠢᠲᠠᠬᠤ ᠰᠢᠷ ᠪᠦᠲᠦᠭᠡᠭᠴᠢ ᠦᠬᠡᠷᠦᠨ ᠲᠤᠬᠠᠢ
ᠪᠦᠬᠦ ᠤᠯᠤᠰᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠶᠡᠬᠡ ᠬᠤᠷᠠᠯᠤᠨ ᠱᠠᠩᠨᠠᠯ ᠥᠭᠬᠦ ᠶᠣᠰᠤᠯᠠᠯ ᠳᠡᠭᠡᠷᠡ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠣᠷᠭᠢᠯᠳᠤ ᠠᠪᠠᠷᠢᠭᠴᠢ ᠪᠠᠭᠠᠲᠤᠷᠤᠳ ᠴᠡᠭᠡᠵᠢ ᠳᠦᠭᠦᠷᠡᠩ ᠪᠠᠶᠠᠷᠲᠠᠢ ᠪᠠᠢᠨᠠ᠃ ᠮᠣᠩᠭᠤᠯ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠢᠳᠡᠷ ᠨᠠᠰᠤᠨᠤ ᠡᠷᠡᠭᠲᠡᠢ ᠪᠠᠶᠠᠰᠭᠤᠯᠠᠩᠲᠤ ᠰᠠᠢᠬᠠᠨ ᠬᠥᠭᠵᠢᠮᠦᠨ ᠠᠶᠠᠯᠭᠤᠨ ᠳᠤᠮᠳᠠᠭᠤᠷ ᠲᠡᠷᠢᠭᠦᠯᠡᠭᠴᠢᠶᠢᠨ ᠲᠠᠢᠰᠠᠨ ᠳᠡᠭᠡᠷᠡ ᠭᠠᠷᠴᠤ ᠱᠠᠩᠨᠠᠯ ᠠᠪᠬᠤ ᠦᠶᠡᠳᠦ᠂ ᠠᠯᠠᠭᠠ ᠲᠠᠰᠢᠬᠤ ᠳᠠᠭᠤ ᠳᠠᠯᠠᠢᠶᠢᠨ ᠳᠠᠪᠠᠯᠭᠠᠨ ᠮᠡᠲᠦ ᠨᠢᠵᠢᠭᠢᠨᠡᠪᠡ᠃ ᠲᠡᠷᠢᠭᠦᠯᠡᠭᠴᠢᠳᠦᠨ ᠲᠠᠢᠰᠠᠨᠤ ᠡᠮᠦᠨᠡ ᠮᠥᠷᠲᠦ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠢᠭᠡ ᠤᠳᠤᠷᠢᠳᠤᠭᠴᠢ ᠨᠥᠬᠦᠷ ᠰᠡᠩᠳᠡ ᠮᠡᠩᠳᠡ ᠨᠢᠳᠦᠪᠡᠨ ᠨᠤᠬᠤᠯᠠᠵᠤ ᠱᠠᠩ ᠬᠦᠷᠲᠡᠭᠴᠢᠶᠢ ᠳᠠᠬᠢᠨ ᠳᠠᠬᠢᠨ ᠠᠵᠢᠭᠯᠠᠭᠠᠳ ᠲᠣᠯᠤᠭᠠᠢᠪᠠᠨ ᠳᠣᠬᠢᠪᠠ᠃
ᠡᠨᠡ ᠤᠤᠭᠠᠨ ᠺᠠᠳ᠋ᠷ ᠬᠡᠨ ᠪᠤᠢ? ᠭᠡᠪᠡᠯ᠂ ᠳᠤᠮᠳᠠᠳᠤ ᠤᠯᠤᠰᠤᠨ ᠡᠪ ᠬᠠᠮᠲᠤ ᠨᠠᠮᠤᠨ ᠲᠥᠪ ᠬᠣᠷᠢᠶᠠᠨᠤ ᠤᠯᠤᠰ ᠲᠥᠷᠦᠶᠢᠨ ᠲᠣᠪᠴᠢᠶᠠᠨᠤ ᠭᠡᠰᠢᠭᠦᠨ᠂ ᠳᠡᠳ᠋ ᠶᠡᠷᠦᠩᠬᠡᠢ ᠰᠠᠢᠳ ᠨᠥᠬᠦᠷ ᠤᠯᠠᠭᠠᠨᠬᠦᠦᠶᠦᠮ᠃
ᠲᠡᠷᠡ ᠮᠣᠩᠭᠤᠯ ᠳᠡᠪᠡᠯᠲᠡᠢᠨᠢ ᠤᠯᠠᠭᠠᠨᠬᠦᠦᠶᠢᠨ ᠬᠦᠦ ᠦᠬᠡᠷ ᠪᠠᠢᠵᠠᠢ᠃
ᠦᠬᠡᠷ ᠱᠠᠩᠨᠠᠯᠤᠨ ᠪᠢᠴᠢᠭᠢᠶᠡᠨ ᠪᠠᠷᠢᠭᠠᠳ᠂ ᠴᠡᠭᠡᠵᠢ ᠳᠦᠭᠦᠷᠡᠩ ᠪᠠᠶᠠᠷᠯᠠᠵᠤ᠂ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢᠶᠢᠨ ᠳᠤᠮᠳᠠ ᠤᠷᠤᠰᠤᠭᠰᠠᠭᠠᠷ ᠢᠷᠡᠭᠰᠡᠨ ᠬᠥᠯᠦᠰᠦᠨᠢ ᠪᠠᠶᠠᠷᠤᠨ ᠨᠢᠯᠪᠤᠰᠤ ᠪᠣᠯᠤᠨ ᠳᠤᠰᠤᠯᠠᠪᠠ ᠁
ᠤᠯᠠᠭᠠᠨ ᠥᠯᠦᠭᠡᠢᠳᠦ ᠥᠰᠦᠭᠰᠡᠨ 《ᠲᠤᠭᠤᠯ》
ᠦᠬᠡᠷ ᠭᠡᠳᠡᠭ ᠨᠡᠷᠡᠶᠢ ᠡᠨᠡ ᠬᠥᠮᠦᠨ ᠲᠥᠬᠦᠭᠡ ᠣᠷᠤᠭᠰᠠᠨ ᠬᠣᠢᠨᠠᠪᠠᠨ ᠥᠪᠡᠷᠢᠶᠡᠨ ᠠᠪᠤᠭᠰᠠᠨᠶᠤᠮ᠃
1939 ᠣᠨᠤ ᠡᠪᠦᠯ᠂ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠦᠬᠡᠷ᠂ ᠡᠯᠵᠢᠭᠡ ᠤᠨᠤᠵᠤ ᠥᠨᠳᠦᠷ ᠠᠭᠤᠯᠠᠶᠢ ᠳᠠᠪᠠᠵᠤ ᠥᠷᠭᠡᠨ ᠡᠯᠡᠰᠦᠶᠢ ᠲᠤᠭᠤᠯᠵᠤ᠂ ᠥᠪᠦᠷ ᠮᠣᠩᠭᠤᠯᠤᠨ ᠶᠡᠬᠡ ᠵᠤᠤ ᠠᠢᠮᠠᠭᠠᠴᠠ ᠬᠤᠪᠢᠰᠭᠠᠯᠤᠨ ᠠᠷᠢᠭᠤᠨ ᠭᠣᠯᠤᠮᠲᠠ ᠶᠠᠨ ᠠᠨᠳᠤ ᠣᠴᠢᠵᠠᠢ᠃
ᠡᠨᠡ ᠪᠢᠴᠢᠬᠠᠨ 《ᠲᠤᠭᠤᠯ》 ᠬᠢᠲᠠᠳ ᠦᠭᠡᠨᠳᠦ ᠲᠤᠩ ᠠᠨᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠨᠥᠬᠦᠷ ᠰᠦᠩ ᠴᠢᠩ ᠯᠢᠩᠦᠨ ᠳᠡᠮᠵᠢᠯᠭᠡᠪᠡᠷ ᠪᠠᠢᠭᠤᠯᠤᠭᠳᠠᠭᠰᠠᠨ ᠠᠨ ᠰᠢ ᠰᠢᠶᠠᠨᠤ ᠥᠰᠭᠡᠨ ᠬᠥᠮᠦᠵᠢᠭᠦᠯᠬᠦ ᠰᠤᠷᠭᠠᠭᠤᠯᠢᠳᠤ ᠠᠪᠢᠶᠠᠰᠢᠶᠠᠨ ᠭᠠᠢᠬᠠᠭᠤᠯᠵᠠᠢ᠃ ᠪᠠᠭᠠ ᠰᠤᠷᠭᠠᠭᠤᠯᠢᠳᠤ ᠪᠣᠯᠤᠭᠰᠠᠨ ᠨᠢᠭᠡ ᠤᠳᠠᠭᠠᠨᠤ ᠵᠣᠬᠢᠶᠠᠨ ᠪᠢᠴᠢᠯᠭᠡᠶᠢᠨ ᠤᠷᠤᠯᠳᠤᠭᠠᠨᠳᠤ᠂ 《ᠮᠢᠨᠦ ᠡᠬᠡ ᠰᠤᠷᠭᠠᠭᠤᠯᠢ》 ᠭᠡᠳᠡᠭ ᠨᠠᠶᠠ ᠶᠡᠷᠡᠨ ᠮᠥᠷᠲᠡᠢ ᠤᠷᠲᠤ ᠰᠢᠯᠦᠭ ᠪᠢᠴᠢᠭᠡᠳ ᠪᠠᠭᠰᠢᠶᠢᠨᠢᠶᠠᠨ ᠠᠩᠬᠠᠷᠤᠯᠢ ᠲᠠᠲᠠᠵᠠᠢ᠃ ᠪᠠᠭᠰᠢᠨᠢ ᠳᠠᠬᠢᠨ ᠤᠩᠰᠢᠭᠠᠳ᠂ 《 ᠰᠢᠯᠦᠭᠴᠢᠨ》 ᠭᠡᠳᠡᠭᠴᠢᠨᠢ ᠪᠠᠭᠠ ᠰᠤᠷᠭᠠᠭᠤᠯᠢᠶᠢᠨ ᠬᠣᠶᠠᠳᠤᠭᠠᠷ ᠣᠨᠤ ᠰᠤᠷᠤᠭᠴᠢ ᠪᠠᠢᠳᠠᠭᠶᠤᠮᠤᠤ? ᠭᠡᠵᠦ ᠭᠠᠢᠬᠠᠰᠢ ᠠᠯᠲᠠᠨ ᠨᠢᠳᠦᠪᠡᠨ ᠢᠲᠡᠭᠡᠬᠦᠦᠭᠡᠢ ᠪᠠᠢᠯᠠ᠃
ᠲᠡᠷᠡ ᠦᠶᠡᠳᠦ ᠪᠢᠴᠢᠬᠠᠨ ᠦᠬᠡᠷ ᠮᠡᠳᠡᠶᠡ ᠰᠤᠷᠤᠶᠠ ᠭᠡᠵᠦ ᠠᠢᠬᠤᠪᠲᠤᠷ ᠶᠡᠬᠡ ᠬᠦᠰᠡᠵᠦ ᠪᠠᠢᠵᠠᠢ᠃ ᠰᠤᠷᠭᠠᠭᠤᠯᠢᠶᠢᠨ ᠥᠭᠭᠦᠭᠰᠡᠨ ᠰᠤᠷᠬᠤ ᠪᠢᠴᠢᠭᠨᠢ ᠪᠠᠭᠠᠳᠠᠭᠠᠳ᠂ ᠪᠠᠭᠰᠢᠶᠢᠨ ᠥᠭᠭᠦᠭᠰᠡᠨ ᠳᠠᠰᠭᠠᠯ ᠳᠠᠭᠠᠭᠠᠯᠭᠠᠪᠤᠷᠢᠨᠢᠴᠤ ᠬᠤᠷᠤᠭᠤᠨ ᠦᠵᠦᠭᠦᠷ ᠬᠤᠮ ᠫᠠᠳ᠃ ᠠᠷᠪᠠᠨ ᠨᠢᠭᠡ ᠬᠣᠶᠠᠷᠲᠠᠢᠠᠴᠠᠪᠠᠨ ᠡᠬᠢᠯᠡᠭᠡᠳ 《ᠱᠦᠢ ᠾᠦᠶᠢᠨ ᠦᠯᠢᠭᠡᠷ》᠂ 《ᠠᠷᠢᠭᠤᠨ ᠵᠢᠷᠤᠮᠲᠠᠨᠤ ᠦᠯᠢᠭᠡᠷ》᠂ 《ᠯᠦᠸᠧ ᠲᠦᠩ ᠤᠮᠠᠷᠠᠰᠢ ᠳᠠᠢᠯᠠᠭᠰᠠᠨ》 ᠵᠡᠷᠭᠡᠶᠢᠨ ᠡᠷᠲᠡᠨᠦ ᠪᠢᠴᠢᠭᠢ ᠴᠤᠭᠯᠠᠭᠤᠯᠤᠭᠠᠳ ᠲᠣᠯᠤᠭᠠᠢ ᠥᠨᠳᠡᠢᠯᠦᠭᠡᠢ ᠦᠵᠡᠳᠡᠭ ᠪᠠᠢᠵᠠᠢ᠃ ᠢᠩᠭᠢᠭᠡᠳ ᠡᠨᠡ ᠵᠣᠬᠢᠶᠠᠯᠤᠳᠢ ᠳᠠᠭᠤᠷᠢᠶᠠᠵᠤ 《ᠲᠤᠭᠤᠯ ᠪᠡᠬᠢᠯᠡᠯᠲᠡ ᠡᠪᠳᠡᠭᠰᠡᠨ》 ᠭᠡᠳᠡᠭ ᠵᠣᠬᠢᠶᠠᠯ ᠪᠢᠴᠢᠭᠰᠡᠨᠳᠦ ᠡᠴᠢᠭᠡᠨᠢ ᠬᠦᠷᠲᠡᠯᠡ ᠶᠡᠬᠡ ᠭᠠᠢᠬᠠᠭᠰᠠᠨ ᠪᠢᠯᠡ᠃
ᠳᠠᠢᠨᠤ ᠦᠶᠡᠳᠦ ᠦᠬᠡᠷ ᠨᠢᠭᠡ ᠤᠷᠲᠤ ᠫᠤᠤ ᠮᠥᠷᠦᠯᠡᠵᠦ᠂ ᠨᠢᠭᠡ ᠳᠡᠪᠲᠡᠷ ᠨᠣᠮ ᠪᠠᠷᠢᠭᠠᠳ᠂ ᠴᠡᠷᠢᠭ ᠠᠮᠠᠷᠠᠮᠠᠭᠴᠠ᠂ ᠡᠨᠡ 《ᠪᠢᠴᠢᠬᠠᠨ ᠫᠠᠷᠲ᠋ᠢᠽᠠᠨ》 ᠲᠣᠪ ᠳᠤᠭᠤᠢ ᠨᠣᠮᠢᠶᠠᠨ ᠤᠩᠰᠢᠵᠤ ᠰᠠᠭᠤᠳᠠᠭᠶᠤᠮ᠃
ᠪᠡᠭᠡᠵᠢᠩᠢ ᠴᠢᠯᠦᠭᠡᠯᠡᠭᠰᠡᠨ ᠬᠣᠢᠨᠠ᠂ ᠦᠬᠡᠷ ᠪᠡᠭᠡᠵᠢᠩ ᠬᠣᠲᠠᠶᠢᠨ ᠵᠠᠭᠤ ᠨᠢᠭᠡᠳᠦᠭᠡᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠳᠤ ᠰᠢᠯᠭᠠᠭᠤᠯᠵᠤ ᠣᠷᠤᠵᠠᠢ᠃ ᠠᠷᠪᠠᠨ ᠵᠢᠷᠭᠤᠭᠠᠲᠠᠢ ᠦᠬᠡᠷ ᠡᠩᠬᠡ ᠲᠠᠢᠪᠤᠩ ᠴᠠᠭ ᠢᠷᠠᠨᠠ ᠭᠡᠭᠴᠢ ᠲᠤᠩ ᠠᠮᠠᠷᠦᠭᠡᠢ ᠭᠡᠳᠡᠭᠢ ᠪᠠᠭᠠᠠᠴᠠᠪᠠᠨ ᠰᠠᠢᠨ ᠮᠡᠳᠡᠳᠡᠭ ᠲᠤᠯᠠ ᠳᠠᠢᠨᠤ ᠵᠢᠯᠦᠳᠲᠦ ᠠᠯᠳᠠᠵᠤ ᠶᠠᠪᠤᠭᠤᠯᠤᠭᠰᠠᠨ ᠠᠯᠲᠠᠨ ᠮᠢᠨ᠋ᠦ᠋ᠲᠢᠶᠡᠨ ᠤᠷᠲᠤ ᠡᠭᠡᠭᠦᠯᠵᠦ ᠠᠪᠤᠨᠠ ᠭᠡᠵᠦ ᠵᠣᠷᠢᠭ ᠰᠢᠭᠤᠳᠪᠠ᠃ ᠦᠬᠡᠷ ᠶᠠᠨ ᠠᠨᠤ ᠪᠠᠭᠠ ᠰᠤᠷᠭᠠᠭᠤᠯᠢᠳᠤ ᠳᠥᠷᠪᠡᠬᠡᠨ ᠵᠢᠯ ᠪᠢᠴᠢᠭ ᠦᠵᠡᠭᠰᠡᠨ ᠲᠤᠯᠠ ᠠᠩᠬᠠ ᠵᠡᠷᠭᠡᠶᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢᠨ ᠬᠣᠶᠠᠳᠤᠭᠠᠷ ᠣᠨᠳᠤ ᠣᠷᠤᠭᠠᠳ ᠪᠠᠬᠠᠨ ᠵᠦᠳᠡᠷᠡᠯᠡ᠃ ᠪᠠᠶᠠᠷ ᠨᠠᠢᠷ ᠪᠤᠶᠤ ᠠᠮᠠᠷᠠᠯᠲᠠᠶᠢᠨ ᠡᠳᠦᠷ ᠪᠣᠯᠬᠤ ᠪᠦᠷᠢ ᠣᠯᠠᠩᠬᠢ ᠨᠥᠬᠦᠳᠨᠢ ᠭᠡᠷᠲᠡᠭᠡᠨ ᠬᠠᠷᠢᠭᠰᠠᠨ ᠪᠠᠢᠬᠤᠳᠤ᠂ ᠦᠬᠡᠷ ᠰᠤᠷᠭᠠᠭᠤᠯᠢᠳᠠᠭᠠᠨ ᠦᠯᠡᠳᠡᠭᠡᠳ ᠬᠢᠴᠢᠶᠡᠨ ᠰᠢᠮᠳᠠᠨ ᠰᠤᠷᠤᠯᠴᠠᠵᠤ᠂ ᠨᠥᠬᠦᠳᠢᠶᠡᠨ ᠬᠥᠭᠡᠭᠡᠵᠦ ᠭᠦᠢᠴᠡᠬᠦᠪᠡᠷ ᠴᠢᠷᠮᠠᠢᠳᠠᠭ ᠪᠠᠢᠵᠠᠢ᠃
ᠳᠡᠭᠡᠳᠦ ᠵᠡᠷᠭᠡᠶᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠶᠢᠨ ᠬᠣᠶᠠᠳᠤᠭᠠᠷ ᠣᠨ ᠪᠣᠯᠬᠤᠳᠤ᠂ ᠣᠷᠤᠰ ᠬᠡᠯᠡ ᠳᠡᠭᠡᠷᠡ ᠤᠷᠠᠨ ᠵᠣᠬᠢᠶᠠᠯ ᠤᠩᠰᠢᠵᠤ᠂ ᠣᠷᠤᠰᠢᠶᠠᠷ ᠰᠢᠯᠦᠭ ᠵᠠᠬᠢᠳᠠᠯ ᠪᠢᠴᠢᠵᠦ ᠴᠢᠳᠠᠬᠤ ᠪᠣᠯᠵᠠᠢ᠃ ᠳᠡᠭᠡᠳᠦ ᠵᠡᠷᠭᠡᠶᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠠᠴᠠ ᠲᠡᠭᠦᠰᠬᠦ ᠦᠶᠡᠳᠦ ᠦᠬᠡᠷᠦᠨ ᠣᠷᠤᠰ ᠬᠡᠯᠡᠨᠢ ᠠᠩᠭᠢᠳᠠᠭᠠᠨ ᠣᠷᠤᠢᠯᠠᠭᠰᠠᠨ ᠪᠠᠢᠨᠠ᠃ ᠲᠡᠭᠦᠨᠦ ᠲᠣᠭᠠ᠂ ᠬᠢᠮᠢ᠂ ᠹᠢᠽᠢᠺ ᠪᠠ ᠬᠡᠯᠡ ᠪᠢᠴᠢᠭ ᠪᠦᠷ ᠲᠠᠪᠤᠨ ᠬᠤᠪᠢ᠂ ᠲᠡᠦᠬᠡ ᠭᠠᠵᠠᠷ ᠵᠦᠢᠨᠢ ᠳᠥᠷᠪᠡᠨ ᠬᠤᠪᠢ᠂ ᠳᠠᠭᠤᠤᠨᠢ ᠳᠥᠩᠭᠡᠵᠢ ᠭᠤᠷᠪᠠᠨ ᠬᠤᠪᠢ ᠣᠯᠵᠠᠢ᠃ ᠪᠠᠭᠰᠢ ᠪᠠ ᠨᠥᠬᠦᠳᠨᠢ ᠲᠡᠭᠦᠨᠢ 《ᠭᠤᠷᠪᠠᠨ ᠰᠠᠢᠨᠲᠠᠢ》 ᠰᠤᠷᠤᠭᠴᠢ ᠪᠣᠯᠵᠤ ᠴᠢᠳᠠᠭᠰᠠᠨᠦᠭᠡᠢ ᠭᠡᠵᠦ ᠬᠠᠷᠠᠮᠰᠠᠵᠤ ᠪᠠᠢᠬᠤᠳᠤ ᠦᠬᠡᠷ ᠪᠢᠯᠢᠭ ᠲᠡᠭᠦᠰ ᠬᠥᠮᠦᠨ ᠭᠡᠵᠦ ᠪᠠᠢᠳᠠᠭᠦᠭᠡᠢ ᠭᠡᠳᠡᠭᠢ ᠪᠠᠲᠤ ᠢᠲᠡᠭᠡᠳᠡᠭ ᠪᠣᠯᠬᠣᠷ ᠬᠠᠷᠢᠨ ᠠᠵᠢᠭᠴᠤᠦᠭᠡᠢ ᠪᠠᠢᠯᠠ᠃
ᠦᠬᠡᠷᠢ ᠤᠯᠤᠰᠠᠴᠠ ᠣᠷᠤᠰ ᠬᠡᠯᠡᠨᠦ ᠮᠡᠷᠭᠡᠵᠢᠯᠲᠡᠨ ᠪᠣᠯᠤᠭᠠᠰᠠᠢ ᠭᠡᠵᠦ ᠬᠦᠰᠡᠳᠡᠭ ᠪᠠᠢᠲᠠᠯᠠ ᠦᠬᠡᠷ᠂ ᠭᠠᠳᠠᠭᠠᠳᠤ ᠬᠡᠯᠡᠶᠢ ᠵᠥᠪᠬᠡᠨ ᠬᠢᠵᠠᠭᠠᠷᠦᠭᠡᠢ ᠡᠷᠳᠡᠮᠦᠨ ᠳᠠᠯᠠᠢᠳᠤ ᠨᠡᠪᠲᠡᠷᠡᠬᠦ ᠬᠥᠭᠦᠷᠭᠡᠯᠡ ᠭᠡᠵᠦ ᠦᠵᠡᠳᠡᠭ ᠪᠠᠢᠭᠰᠠᠨᠶᠤᠮ᠃
ᠡᠭᠦᠯᠡ ᠪᠣᠷᠤᠭᠠᠨᠢ ᠤᠷᠢᠭᠴᠢ 《ᠪᠢᠯᠢᠭᠦᠨ ᠫᠤᠤᠵᠢᠩ》
ᠦᠬᠡᠷ ᠪᠣᠯ ᠪᠠᠭᠠᠠᠴᠠᠪᠠᠨ ᠦᠯᠢᠭᠡᠷ ᠳᠣᠮᠤᠭᠲᠤ ᠶᠡᠬᠡ ᠳᠤᠷᠠᠲᠠᠢ᠃ ᠰᠣᠨᠢᠨ ᠰᠡᠪᠡᠬᠦᠨ ᠦᠯᠢᠭᠡᠷᠢ ᠤᠬᠠᠭᠠ ᠠᠯᠳᠠᠲᠠᠯᠠ ᠪᠠᠬᠠᠷᠬᠠᠳᠠᠭᠶᠤᠮ᠃ ᠲᠠᠩᠰᠤᠭ ᠯᠠᠮᠠ ᠪᠠᠷᠠᠭᠤᠨ ᠭᠠᠵᠠᠷᠠᠴᠠ ᠨᠣᠮ ᠵᠠᠯᠠᠬᠤᠪᠠᠷ ᠶᠠᠪᠤᠭᠠᠳ᠂ ᠲᠡᠭᠷᠢᠶᠢᠨ ᠣᠷᠤᠨᠤ ᠠᠷᠰᠢᠶᠢᠨ ᠨᠤᠲᠤᠭᠲᠤ ᠬᠦᠷᠦᠭᠰᠡᠨᠳᠦ᠂ ᠲᠡᠨᠳᠡ ᠭᠤᠷᠪᠠᠨ ᠵᠢᠯ ᠭᠠᠩᠳᠠᠭᠠᠳ ᠡᠪᠡᠰᠦ ᠬᠤᠯᠤᠰᠤ ᠬᠠᠲᠠᠵᠤ᠂ ᠲᠠᠪᠤᠨ ᠲᠠᠷᠢᠶᠠ ᠦᠷᠡ ᠲᠠᠰᠤᠷᠠᠭᠠᠳ᠂ ᠬᠠᠮᠤᠭ ᠠᠮᠢᠲᠠᠨ ᠭᠠᠴᠢᠭᠳᠠᠵᠤ ᠪᠠᠢᠭᠰᠠᠨᠳᠤ᠂ ᠪᠡᠴᠢᠨ ᠪᠠᠭᠰᠢ ᠡᠭᠦᠯᠡ ᠬᠥᠯᠭᠡᠯᠡᠨ ᠶᠠᠪᠤᠵᠤ᠂ ᠬᠣᠪᠤᠷ ᠲᠠᠷᠨᠢ ᠤᠩᠰᠢᠵᠤ ᠬᠤᠷᠠ ᠪᠣᠷᠤᠭᠠᠨ ᠤᠷᠢᠵᠠᠢ᠃ ᠢᠩᠭᠢᠭᠰᠡᠨᠳᠦ ᠰᠠᠯᠬᠢ᠂ ᠡᠭᠦᠯᠡ᠂ ᠪᠣᠷᠤᠭᠠᠨᠤ ᠣᠯᠠᠨ ᠪᠤᠷᠬᠠᠳ ᠭᠠᠷᠴᠤ ᠢᠷᠠᠨ ᠡᠭᠦᠯᠡ ᠪᠥᠬᠦᠭᠦᠯᠦᠨ ᠠᠶᠤᠩᠭᠠ ᠨᠢᠵᠢᠭᠢᠨᠡᠭᠦᠯᠵᠦ᠂ ᠭᠤᠷᠪᠠᠨ ᠲᠣᠬᠤᠢ ᠭᠦᠨ ᠪᠣᠷᠤᠭᠠ ᠣᠷᠤᠭᠤᠯᠵᠠᠢ᠃ ᠢᠩᠭᠢᠭᠰᠡᠨᠡᠴᠡ ᠲᠠᠷᠢᠶᠠ ᠲᠥᠮᠦᠰᠦ ᠲᠥᠷᠦᠵᠦ ᠠᠮᠢᠲᠠᠨ ᠭᠣᠣᠯᠲᠠᠨ ᠦᠷᠡᠵᠢᠵᠡᠢ᠃
ᠦᠬᠡᠷ ᠡᠭᠦᠨᠢ ᠰᠣᠨᠤᠰᠬᠤ ᠪᠦᠷᠢ ᠡᠢᠮᠦ ᠶᠡᠬᠡ ᠴᠢᠳᠠᠯᠲᠠᠢ ᠪᠣᠯᠪᠠᠯ ᠬᠡᠳᠦᠢ ᠰᠠᠢᠬᠠᠨ ᠪᠤᠢ ᠭᠡᠵᠦ ᠪᠣᠳᠤᠳᠠᠭ ᠪᠠᠢᠵᠠᠢ᠃
1954 ᠣᠨᠳᠤ ᠦᠬᠡᠷ ᠳᠡᠭᠡᠳᠦ ᠵᠡᠷᠭᠡᠶᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢᠠᠴᠠ ᠲᠡᠭᠦᠰᠦᠭᠡᠳ᠂ ᠬᠠᠷᠪᠢᠨᠤ ᠴᠡᠷᠢᠭ ᠳᠠᠢᠨᠤ ᠠᠵᠤ ᠦᠢᠯᠡᠳᠪᠦᠷᠢᠶᠢᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠳᠤ ᠣᠷᠤᠵᠤ ᠠᠭᠠᠷᠤᠨ ᠵᠡᠪᠰᠡᠭᠦᠨ ᠮᠡᠷᠭᠡᠵᠢᠯ ᠰᠤᠷᠴᠠᠢ᠃ 1958 ᠣᠨᠳᠤ ᠳᠤᠮᠳᠠᠳᠤ ᠤᠯᠤᠰᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠮᠡᠷᠭᠡᠵᠢᠯᠦᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠤᠭᠳᠠᠬᠤᠳᠤ᠂ ᠡᠨᠡ ᠰᠤᠷᠭᠠᠭᠤᠯᠢᠳᠤ ᠰᠣᠩᠭᠤᠭᠳᠠᠨ ᠣᠷᠤᠵᠤ᠂ ᠠᠭᠠᠷᠤᠨ ᠬᠦᠴᠦᠨᠦ ᠤᠬᠠᠭᠠᠨᠤ ᠰᠠᠯᠪᠤᠷᠢᠳᠤ ᠭᠦᠨᠵᠡᠭᠡᠢᠷᠡᠨ ᠰᠤᠷᠤᠯᠴᠠᠵᠤ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠡᠨᠡᠬᠦ ᠤᠤᠭᠠᠨ ᠥᠯᠦᠭᠡᠢᠳᠦ᠂ ᠦᠬᠡᠷ ᠵᠣᠷᠢᠭᠲᠠᠢ ᠰᠢᠨᠵᠢᠯᠡᠭᠡᠪᠡᠨ ᠡᠬᠢᠯᠡᠵᠡᠢ᠃
ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠶᠡᠬᠡ ᠰᠤᠷᠭᠠᠭᠤᠯᠢ ᠪᠣᠷᠤᠭᠠ ᠣᠷᠤᠭᠤᠯᠬᠤ ᠫᠤᠤᠵᠢᠩ ᠬᠢᠵᠦ ᠬᠥᠳᠡᠭᠡ ᠠᠵᠤ ᠠᠬᠤᠢᠳᠤ ᠦᠢᠯᠡᠴᠢᠯᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠰᠤᠷᠭᠠᠭᠤᠯᠢᠶᠢᠨ ᠨᠠᠮᠤᠨ ᠬᠣᠷᠢᠶᠠ ᠳᠤᠷᠠᠳᠤᠯᠠ᠃ ᠲᠡᠷᠡ ᠦᠶᠡᠳᠦ ᠠᠮᠧᠷᠢᠺᠠ ᠵᠥᠪᠯᠡᠯᠲᠦ ᠮᠡᠲᠦᠶᠢᠨ ᠶᠡᠬᠡ ᠤᠯᠤᠰᠤᠳ ᠪᠦᠷ ᠡᠭᠦᠨᠢ ᠰᠤᠳᠤᠯᠵᠤ ᠣᠷᠤᠯᠳᠤᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠶᠠᠫᠤᠨ ᠪᠣᠯ ᠡᠬᠢᠯᠡᠭᠡᠴᠦᠦᠭᠡᠢ ᠪᠠᠢᠯᠠ᠃ ᠭᠡᠲᠡᠯᠡ ᠦᠬᠡᠷ ᠨᠥᠬᠦᠳᠲᠡᠢᠪᠡᠨ ᠡᠨᠡ ᠬᠦᠨᠳᠦ ᠡᠭᠦᠷᠭᠡᠶᠢ ᠬᠦᠯᠢᠶᠡᠨ ᠠᠪᠴᠤ᠂ ᠮᠡᠷᠭᠡᠵᠢᠯᠦᠨ ᠳᠤᠭᠤᠢᠯᠠᠩᠢ ᠬᠠᠷᠢᠭᠤᠴᠠᠵᠤ᠂ ᠬᠦᠴᠦᠨᠦ ᠮᠠᠰᠢᠨᠠᠶᠢ ᠲᠥᠯᠦᠪᠯᠡᠵᠦ᠂ ᠥᠨᠳᠦᠷ ᠳᠤᠯᠠᠭᠠᠨᠳᠤ ᠢᠯᠴᠢ ᠬᠥᠨᠳᠡᠢᠷᠡᠭᠦᠯᠬᠦ ᠰᠢᠷᠢ ᠪᠣᠯᠪᠠᠰᠤᠷᠠᠭᠤᠯᠬᠤᠪᠠᠷ ᠪᠣᠯᠵᠠᠢ᠃
ᠲᠡᠷᠡ ᠦᠶᠡᠳᠦ ᠶᠠᠭᠤᠴᠤᠦᠭᠡᠢ᠂ ᠯᠠᠪᠯᠠᠯᠲᠠᠶᠢᠨ ᠮᠠᠲᠧᠷᠢᠶᠠᠯ ᠭᠡᠵᠦ ᠫᠠᠳ᠃ ᠵᠢᠷᠤᠭ ᠲᠥᠯᠦᠪᠯᠡᠭᠡᠶᠢ ᠥᠪᠡᠷᠢᠶᠡᠨ ᠵᠣᠬᠢᠶᠠᠬᠤᠠᠴᠠ ᠭᠠᠳᠠᠨᠠ᠂ ᠨᠠᠢᠷᠠᠭᠤᠯᠬᠤ ᠪᠣᠯᠪᠠᠰᠤᠷᠠᠭᠤᠯᠬᠤ ᠮᠡᠷᠭᠡᠵᠢᠯ ᠭᠡᠪᠡᠯ ᠨᠡᠩᠴᠦ ᠠᠷᠭᠠᠦᠭᠡᠢ ᠪᠠᠢᠵᠠᠢ᠃ ᠨᠢᠭᠡ ᠤᠳᠠᠭᠠ ᠫᠤᠤᠵᠢᠩ ᠬᠢᠵᠦ ᠣᠷᠤᠯᠳᠤᠵᠤ ᠪᠠᠢᠲᠠᠯᠠ 《 ᠲᠦᠩ!》 ᠬᠢᠵᠦ ᠶᠡᠬᠡ ᠳᠤᠤᠭᠠᠷᠤᠭᠠᠳ᠂ ᠪᠥᠭᠡᠮ ᠬᠠᠷᠠ ᠤᠲᠤᠭᠠ ᠮᠠᠨᠠᠷᠠᠨ ᠪᠣᠰᠪᠠ᠃ ᠡᠨᠡ ᠳᠠᠭᠤᠨᠤ ᠬᠠᠮᠲᠤ ᠨᠢᠭᠡ ᠨᠥᠬᠦᠷᠨᠢ ᠰᠠᠪᠠᠵᠤ ᠤᠨᠠᠭᠠᠳ᠂ ᠭᠤᠷᠪᠠᠨ ᠬᠤᠷᠤᠭᠤᠨᠢ ᠲᠠᠰᠤ ᠦᠰᠦᠷᠴᠦ᠂ ᠭᠠᠷᠠᠴᠠᠨᠢ ᠴᠢᠰᠤ ᠰᠠᠳᠠᠭᠠᠨᠠᠵᠤ ᠪᠠᠢᠯᠠ᠃
ᠰᠠᠭᠠᠳ ᠬᠠᠷᠰᠢ ᠰᠠᠷᠠᠭᠤᠯ ᠨᠢᠳᠦᠶᠢᠨᠢ ᠬᠠᠯᠬᠠᠯᠠᠪᠠ᠃ ᠣᠳᠣ ᠶᠠᠭᠠᠬᠢᠬᠤ ᠪᠢᠯᠡ?
ᠰᠠᠯᠪᠤᠷᠢᠶᠢᠨ ᠡᠷᠬᠢᠯᠡᠭᠴᠢ ᠴᠢᠶᠠᠨ ᠰᠢᠤᠸᠠᠢ ᠰᠧᠨ ᠲᠡᠳᠡᠨᠦ ᠳᠡᠷᠭᠡᠳᠡ ᠢᠷᠡᠭᠡᠳ᠂ ᠥᠪᠡᠷᠦᠨ ᠰᠤᠷᠴᠤ ᠮᠡᠳᠡᠭᠰᠡᠨ ᠲᠤᠷᠰᠢᠯᠭᠠᠪᠠᠷᠢᠶᠠᠨ ᠰᠤᠷᠤᠭᠴᠢᠪᠠᠨ ᠵᠣᠷᠢᠭᠵᠢᠭᠤᠯᠵᠤ: ᠬᠦᠴᠢᠷ ᠪᠡᠷᠬᠡᠶᠢᠨ ᠥᠭᠡᠳᠡᠡᠴᠡ ᠳᠠᠭᠠᠷᠢᠭᠠᠳ ᠭᠠᠷᠪᠠᠯ ᠢᠯᠠᠯᠲᠠ ᠪᠣᠯᠤᠨᠠ᠂ ᠤᠬᠤᠷᠢᠭᠠᠳ ᠪᠤᠴᠠᠪᠠᠯ ᠣᠯᠤᠯᠲᠠ ᠠᠮᠵᠢᠯᠲᠠᠪᠠᠨ ᠣᠷᠤᠦᠭᠡᠢ ᠪᠣᠯᠭᠠᠨᠠ ᠭᠡᠵᠡᠢ᠃
ᠡᠨᠡ ᠦᠶᠡᠳᠦ ᠦᠬᠡᠷᠲᠦ᠂ ᠤᠷᠢᠳᠤᠶᠢᠨ ᠡᠯᠡᠰᠦ ᠮᠠᠩᠬᠠ ᠡᠭᠡᠷᠡᠮᠡ ᠲᠠᠯᠠᠶᠢ ᠲᠠᠭᠤᠯᠤᠭᠰᠠᠨ ᠲᠡᠦᠬᠡᠨᠢ ᠰᠠᠨᠠᠭᠳᠠᠯᠠ:
1946 ᠣᠨᠤ ᠵᠤᠨ᠂ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠᠠᠴᠠ ᠤᠬᠤᠷᠢᠨ ᠭᠠᠷᠤᠭᠰᠠᠨ ᠨᠢᠭᠡ ᠪᠦᠯᠦᠭ 《ᠬᠡᠦᠬᠡᠳᠦᠨ ᠠᠩᠭᠢ》 ᠡᠯᠡᠰᠦᠨ ᠳᠠᠯᠠᠢᠳᠤ ᠣᠷᠤᠵᠤ ᠣᠴᠢᠯᠠ᠃ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠦᠬᠡᠷ ᠬᠡᠳᠦᠨ ᠠᠷᠪᠠᠨ ᠬᠡᠦᠬᠡᠳᠦᠨ ᠬᠠᠮᠲᠤ᠂ ᠦᠬᠡᠷ ᠲᠡᠷᠭᠡᠪᠡᠷ ᠬᠣᠶᠠᠷ ᠭᠤᠷᠪᠠᠨ ᠡᠳᠦᠷ ᠮᠤᠩᠭᠠᠨᠢᠭᠰᠠᠨ ᠪᠣᠯᠪᠠᠴᠤ ᠡᠯᠡᠰᠦᠨᠡᠴᠡ ᠭᠠᠷᠴᠤ ᠴᠢᠳᠠᠭᠰᠠᠨᠦᠭᠡᠢ᠃ ᠡᠯᠡᠰᠦᠨᠳᠦ ᠳᠤᠰᠤᠯ ᠤᠰᠤᠴᠤ ᠣᠯᠳᠠᠬᠤᠦᠭᠡᠢ ᠴᠠᠩᠭᠠᠭᠠᠳ ᠰᠠᠨᠳᠤᠷᠴᠠᠭᠠᠪᠠ᠃ ᠲᠡᠷᠭᠡᠨ ᠦᠬᠡᠷᠨᠢ ᠰᠢᠭᠡᠬᠦᠯᠡᠷ ᠲᠡᠳᠡ ᠰᠡᠩᠳᠡ ᠮᠡᠩᠳᠡ ᠠᠶᠠᠭᠠᠪᠠᠷᠢᠶᠠᠨ ᠲᠤᠰᠴᠤ ᠠᠪᠤᠭᠠᠳ᠂ ᠬᠤᠩᠬᠤᠭᠤᠨ ᠮᠠᠭᠤᠬᠠᠢ ᠰᠢᠭᠡᠰᠦᠶᠢ ᠬᠣᠶᠠᠷ ᠭᠤᠷᠪᠠ ᠣᠭᠤᠴᠢᠵᠠᠭᠠᠵᠤ ᠶᠠᠪᠤᠵᠠᠢ᠃ ᠨᠢᠭᠡ ᠡᠳᠦᠷ ᠭᠡᠨᠡᠳᠲᠡ ᠪᠣᠷᠤᠭᠠ ᠣᠷᠤᠭᠰᠠᠨᠳᠤ ᠪᠦᠭᠦᠳᠡᠭᠡᠷ ᠪᠠᠢᠳᠠᠭ ᠬᠤᠪᠴᠠᠰᠤ ᠪᠠ ᠬᠥᠨᠵᠢᠯᠡ ᠳᠡᠪᠢᠰᠭᠡᠷᠢᠶᠡᠨ ᠳᠡᠯᠭᠡᠵᠦ ᠪᠣᠷᠤᠭᠠᠨᠤ ᠤᠰᠤᠶᠢ ᠲᠤᠰᠴᠤ ᠠᠪᠤᠭᠠᠳ᠂ ᠮᠤᠰᠭᠢᠨ ᠰᠢᠪᠬᠠᠵᠤ ᠤᠤᠭᠤᠴᠢᠬᠠᠵᠠᠢ᠃ ᠁ ᠦᠬᠡᠷ ᠣᠯᠠᠨ ᠵᠢᠯᠦᠨ ᠠᠮᠢᠳᠤᠷᠠᠯᠠᠴᠠᠪᠠᠨ: ᠪᠡᠷᠬᠡᠰᠢᠶᠡᠯᠦᠨ ᠡᠮᠦᠨᠡ ᠡᠪᠦᠳᠦᠭ ᠨᠤᠭᠤᠷᠠᠵᠤ ᠪᠣᠯᠬᠤᠦᠭᠡᠢ ᠭᠡᠳᠡᠭ ᠢᠲᠡᠭᠡᠯᠲᠡᠢ ᠪᠣᠯᠵᠠᠢ᠃ ᠦᠬᠡᠷ ᠨᠥᠬᠦᠳᠲᠡᠢᠪᠡᠨ ᠳᠠᠬᠢᠵᠤ ᠡᠷᠴᠢ ᠵᠣᠷᠢᠭᠢᠶᠠᠨ ᠬᠥᠪᠴᠢᠯᠡᠵᠦ᠂ ᠲᠤᠷᠰᠢᠯᠲᠠᠪᠠᠨ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠭᠡᠷ ᠪᠠᠢᠭᠠᠳ᠂ ᠣᠯᠠᠨ ᠣᠯᠠᠨ ᠪᠡᠷᠬᠡ ᠠᠰᠠᠭᠤᠳᠠᠯᠢ ᠰᠢᠢᠳᠪᠦᠷᠢᠯᠡᠭᠰᠡᠨ ᠪᠠᠢᠨᠠ᠃
ᠠᠭᠤᠯᠠᠨᠤ ᠴᠠᠭᠠᠨᠠ ᠤᠰᠤ᠂ ᠤᠰᠤᠨᠤ ᠴᠠᠭᠠᠨᠠ ᠠᠭᠤᠯᠠ᠃ ᠫᠤᠤᠵᠢᠩ ᠦᠢᠯᠡᠳᠬᠦᠶᠢᠨ ᠪᠠᠰᠠ ᠨᠢᠭᠡ ᠪᠡᠷᠬᠡ ᠪᠣᠭᠤᠮᠲᠠ ᠪᠣᠯ ᠫᠤᠤᠵᠢᠩᠢ ᠥᠨᠳᠦᠷ ᠨᠢᠰᠭᠡᠬᠦᠳᠦ ᠲᠦᠯᠬᠢᠬᠦ ᠬᠦᠴᠦᠶᠢ ᠶᠡᠬᠡ ᠪᠠᠢᠯᠭᠠᠵᠤ᠂ ᠲᠦᠯᠡᠰᠢ ᠶᠡᠬᠡᠬᠡᠨ ᠰᠠᠪᠠᠯᠠᠬᠤ ᠬᠡᠷᠡᠭᠲᠡᠢ ᠪᠠᠢᠵᠠᠢ᠃ ᠫᠤᠤᠵᠢᠩ ᠭᠤᠷᠪᠠᠨ ᠮᠢᠩᠭᠠᠨ ᠮᠧᠲᠷᠡᠴᠡ ᠳᠡᠭᠡᠭᠰᠢ ᠥᠨᠳᠦᠷᠲᠦ ᠭᠠᠷᠪᠠᠯ ᠬᠥᠳᠡᠯᠭᠡᠭᠦᠷᠦᠨ ᠬᠠᠲᠠᠭᠤ ᠲᠦᠯᠡᠰᠢᠡᠴᠡ ᠮᠢᠩᠭᠠ ᠨᠠᠢ᠍ᠮᠠᠨ ᠵᠠᠭᠤᠠᠴᠠ ᠬᠣᠶᠠᠷ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠷᠡᠳ᠋ᠦ᠋ᠰᠦᠨ ᠶᠡᠬᠡ ᠢᠯᠴᠢ ᠡᠭᠦᠰᠦᠨᠡ᠃ ᠭᠡᠲᠡᠯᠡ ᠬᠥᠳᠡᠯᠭᠡᠭᠦᠷᠦᠨ ᠲᠡᠮᠦᠷᠯᠢᠭ ᠭᠠᠳᠠᠷᠨᠢ ᠮᠢᠩᠭᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠭᠷᠡᠳ᠋ᠦ᠋ᠰ ᠬᠦᠷᠪᠡᠯ ᠬᠠᠢᠯᠴᠢᠬᠠᠨᠠ᠃ ᠡᠨᠡ ᠵᠥᠷᠢᠴᠡᠯᠢ ᠰᠢᠢᠳᠪᠦᠷᠢᠯᠡᠬᠦᠳᠦ ᠰᠢᠷ ᠲᠦᠷᠬᠢᠵᠦ ᠢᠯᠴᠢ ᠬᠥᠨᠳᠡᠢᠷᠡᠭᠦᠯᠬᠦᠡᠴᠡ ᠥᠭᠡᠷᠡ ᠠᠷᠭᠠ ᠪᠠᠢᠬᠤᠦᠭᠡᠢ᠃
ᠦᠬᠡᠷ ᠨᠥᠬᠦᠳᠲᠡᠢᠪᠡᠨ ᠨᠠᠶᠠ ᠶᠡᠷᠡᠨ ᠵᠦᠢᠯᠦᠨ ᠣᠷᠭᠠᠨᠢᠭ ᠪᠤᠰᠤ ᠬᠦᠳᠡᠷᠦᠨ ᠨᠤᠨᠲᠠᠭ ᠣᠯᠵᠤ ᠠᠪᠴᠢᠷᠠᠨ ᠨᠠᠢᠷᠠᠭᠤᠯᠤᠨ᠂ ᠮᠣᠳᠤᠨ ᠬᠠᠪᠲᠠᠰᠤ᠂ ᠬᠥᠩᠭᠡᠨ ᠴᠠᠭᠠᠨ᠂ ᠪᠣᠯᠤᠳ ᠬᠠᠪᠲᠠᠰᠤᠨ ᠳᠡᠭᠡᠷᠡ ᠲᠦᠷᠬᠢᠭᠡᠳ ᠲᠤᠷᠰᠢᠯᠲᠠ ᠬᠢᠵᠡᠢ᠃ ᠦᠬᠡᠷᠦᠨ ᠪᠠᠷᠢᠭᠰᠠᠨ ᠴᠣᠷᠭᠢᠭᠤᠯ ᠳ᠋ᠧᠩᠡᠴᠡ ᠭᠠᠯ ᠯᠣᠣ ᠣᠯᠤᠭᠤᠢᠳᠴᠤ᠂ ᠭᠠᠯᠳᠤ ᠬᠠᠢᠯᠴᠢᠬᠠᠪᠠᠯ ᠳᠠᠬᠢᠭᠠᠳ ᠨᠠᠢᠷᠠᠭᠤᠯᠵᠤ ᠰᠢᠲᠠᠭᠠᠬᠤ ᠮᠡᠲᠦᠪᠡᠷ ᠣᠯᠠᠨ ᠳᠠᠬᠢᠨ ᠣᠷᠤᠯᠳᠤᠵᠤ ᠦᠵᠡᠪᠡ᠃ ᠰᠢᠷᠦᠨ ᠬᠠᠮᠠᠷ ᠭᠠᠳᠠᠮᠠ ᠮᠠᠭᠤᠬᠠᠢ ᠦᠨᠦᠷᠲᠦ ᠨᠢᠯᠪᠤᠰᠤ ᠠᠰᠭᠠᠷᠠᠨᠠ᠃ ᠦᠬᠡᠷ ᠡᠨᠡ ᠪᠦᠬᠦᠨᠢ ᠲᠡᠰᠪᠦᠷᠢᠯᠡᠵᠦ ᠲᠤᠷᠰᠢᠯᠲᠠᠪᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃ ᠭᠤᠨᠠᠨ ᠦᠬᠡᠷᠦᠨ ᠡᠪᠡᠷ ᠬᠠᠭᠠ ᠬᠥᠯᠳᠡᠬᠦ ᠭᠤᠷᠪᠠ ᠶᠢᠰᠦᠶᠢᠨ ᠬᠦᠢᠲᠡᠨᠳᠦ᠂ ᠭᠠᠳᠠᠨᠠ ᠬᠦᠢᠲᠡᠨ ᠰᠢᠭᠤᠷᠭᠠ ᠲᠠᠴᠢᠭᠢᠨᠠᠵᠤ ᠪᠠᠢᠬᠤᠳᠤ᠂ ᠭᠡᠷᠲᠦ ᠬᠠᠷᠢᠨ ᠠᠮᠢᠰᠭᠤᠯ ᠪᠦᠲᠡᠮᠡ ᠬᠠᠯᠠᠭᠤᠨ ᠪᠠᠢᠳᠠᠭ᠃ ᠬᠡᠴᠢᠨᠡᠨ ᠰᠥᠨᠢᠶᠢ ᠨᠢᠳᠦ ᠴᠠᠪᠴᠢᠯᠦᠭᠡᠢ ᠥᠩᠭᠡᠷᠡᠭᠦᠯᠵᠦ᠂ ᠲᠠᠮᠢᠷ ᠲᠡᠩᠬᠡᠭᠡ ᠪᠠᠷᠠᠭᠳᠠᠯᠠ᠃ ᠦᠬᠡᠷ ᠬᠠᠶᠠ ᠲᠦᠭᠡᠭᠡᠯ ᠤᠰᠤᠨᠤ ᠴᠣᠷᠭᠤᠶᠢ ᠮᠤᠰᠭᠢᠵᠤ ᠶᠠᠰᠤ ᠶᠠᠩᠭᠢᠨᠠᠮᠠ ᠬᠦᠢᠲᠡᠨ ᠤᠰᠤᠪᠠᠷ ᠴᠢᠯᠡᠭᠡᠪᠡᠨ ᠭᠠᠷᠭᠠᠵᠤ ᠨᠣᠢᠷᠢᠶᠠᠨ ᠰᠡᠷᠭᠦᠭᠡᠭᠡᠳ ᠠᠵᠢᠯᠢᠶᠠᠨ ᠥᠷᠭᠦᠯᠵᠢᠯᠡᠭᠦᠯᠳᠡᠭ ᠪᠠᠢᠯᠠ᠃
ᠡᠨᠡ ᠡᠳᠦᠷ ᠫᠷᠣᠹᠧᠰᠰᠣᠷ ᠴᠢᠶᠠᠨ ᠰᠢᠤᠸᠠᠢ ᠰᠧᠨᠴᠦ ᠮᠥᠨ ᠰᠤᠷᠤᠭᠴᠢᠲᠠᠢᠪᠠᠨ ᠠᠳᠠᠯᠢᠪᠠᠷ ᠬᠡᠳᠦᠨ ᠮᠠᠨᠲᠠᠤ᠂ ᠬᠡᠳᠦᠨ ᠬᠡᠰᠡᠭ ᠳᠠᠪᠤᠰᠤᠲᠠᠢ ᠨᠣᠭᠤᠭᠠ ᠰᠠᠪᠠᠯᠠᠭᠠᠳ ᠳᠤᠭᠤᠢᠪᠠᠷ ᠬᠣᠯᠠᠶᠢᠨ ᠲᠡᠭᠦᠷᠭᠡᠳᠦ ᠢᠷᠡᠵᠦ ᠲᠤᠷᠰᠢᠯᠲᠠ ᠦᠵᠡᠪᠡ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠭᠠᠩ ᠳᠤᠭᠤᠯᠠᠭᠠ ᠡᠮᠦᠰᠴᠦ᠂ ᠬᠣᠷᠢ ᠭᠠᠷᠤᠢ ᠮᠧᠲᠷ ᠬᠣᠯᠠᠶᠢᠨ ᠭᠤᠤ ᠳᠣᠲᠤᠷᠠ ᠬᠡᠪᠲᠡᠵᠦ ᠫᠤᠤᠵᠢᠩ ᠬᠠᠷᠪᠤᠬᠤᠶᠢ ᠬᠦᠯᠢᠶᠡᠵᠦ ᠪᠠᠢᠯᠠ᠃
《ᠪᠡᠯᠡᠳᠭᠡᠭᠡᠳ - ᠨᠣᠴᠤᠭᠠ!》 ᠭᠡᠵᠦ ᠲᠤᠰᠢᠶᠠᠮᠠᠭᠴᠠ᠂ ᠭᠠᠷᠳᠠᠨ ᠠᠵᠢᠯᠯᠠᠭᠴᠢ ᠨᠡᠭᠡᠭᠡᠯᠭᠡᠶᠢ ᠳᠠᠷᠤᠯᠠ᠃ ᠪᠦᠭᠦᠳᠡᠭᠡᠷ ᠠᠮᠢᠰᠭᠤᠯᠢᠶᠠᠨ ᠳᠠᠷᠤᠨ ᠴᠢᠩᠨᠠᠵᠤ ᠪᠠᠢᠲᠠᠯᠠ᠂ ᠫᠤᠤᠵᠢᠩᠤᠨ ᠭᠠᠯᠤᠨ ᠱᠠᠷᠴᠢᠭᠢᠨᠠᠨ ᠨᠣᠴᠤᠬᠤ ᠳᠠᠭᠤᠨᠢ ᠲᠣᠳᠤᠬᠠᠨ ᠰᠣᠨᠤᠰᠳᠠᠯᠠ᠃ ᠭᠱᠠᠨ ᠵᠠᠭᠤᠷᠠ ᠫᠤᠤᠵᠢᠩ ᠠᠶᠤᠩᠭᠠ ᠮᠡᠲᠦ ᠨᠢᠵᠢᠭᠢᠨᠡᠵᠦ᠂ ᠠᠭᠠᠷᠲᠤ ᠬᠠᠷᠪᠤᠨ ᠭᠠᠷᠬᠤᠳᠤ᠂ ᠫᠤᠤᠵᠢᠩᠤᠨ ᠣᠯᠤᠭᠤᠢᠳᠤᠭᠤᠯᠤᠨ ᠬᠠᠷᠪᠤᠭᠰᠠᠨ ᠤᠷᠲᠤᠠᠴᠠ ᠤᠷᠲᠤ ᠭᠠᠯᠤᠨ ᠳᠥᠯᠦᠳᠦ ᠭᠠᠵᠠᠷ ᠳᠡᠯᠡᠬᠡᠢ ᠤᠪ ᠤᠯᠠᠭᠠᠨ ᠪᠣᠯᠪᠠ᠃
ᠡᠭᠦᠨᠲᠡᠢ ᠵᠡᠷᠭᠡ ᠠᠭᠠᠷᠤᠨ ᠴᠡᠷᠢᠭᠦᠨ ᠷᠠᠳᠠᠷ ᠬᠡᠮᠵᠢᠯᠲᠡᠶᠢᠨ ᠠᠩᠭᠢ ᠫᠤᠤᠵᠢᠩᠤᠨ ᠬᠥᠭᠡᠷᠦᠯᠲᠡᠶᠢᠨ ᠬᠡᠮᠵᠢᠶᠡᠶᠢ ᠳ᠋ᠢᠶᠠᠩᠬᠤᠸᠠᠪᠠᠷ: 《ᠮᠢᠩᠭᠠᠨ ᠮᠧᠲᠷ᠂ ᠬᠣᠶᠠᠷ ᠮᠢᠩᠭᠠᠨ ᠮᠧᠲᠷ᠂ ᠲᠠᠪᠤᠨ ᠮᠢᠩᠭᠠᠨ ᠮᠧᠲᠷ᠂ ᠨᠠᠢ᠍ᠮᠠᠨ ᠮᠢᠩᠭᠠᠨ ᠮᠧᠲᠷ ᠁》 ᠭᠡᠵᠦ ᠲᠠᠰᠤᠷᠠᠯᠦᠭᠡᠢ ᠮᠡᠳᠡᠭᠦᠯᠵᠦ ᠪᠠᠢᠯᠠ᠃
ᠬᠠᠷᠠᠮᠰᠠᠯᠲᠠᠢᠨᠢ ᠲᠡᠷᠡ ᠦᠶᠡᠶᠢᠨ ᠮᠠᠨᠤ ᠠᠭᠠᠷᠤᠨ ᠴᠡᠷᠢᠭᠦᠨ 《ᠳᠤᠷᠠᠨ》ᠤ ᠬᠠᠷᠠᠬᠤ ᠲᠤᠢᠯᠨᠢ ᠨᠠᠢ᠍ᠮᠠᠬᠠᠨ ᠮᠢᠩᠭᠠᠨ ᠮᠧᠲᠷ ᠪᠠᠢᠵᠠᠢ᠃ ᠫᠤᠤᠵᠢᠩ ᠡᠨᠡ ᠥᠨᠳᠦᠷᠦᠨ ᠬᠡᠮᠵᠢᠶᠡᠡᠴᠡ ᠳᠠᠪᠠᠭᠰᠠᠨ ᠲᠤᠯᠠ ᠮᠥᠷᠳᠡᠨ ᠳᠠᠭᠠᠵᠤ ᠳᠡᠢᠯᠦᠭᠰᠡᠨᠦᠭᠡᠢ᠂ ᠠᠷᠤ ᠠᠷᠤᠠᠴᠠᠨᠢ ᠳᠥᠷᠪᠡᠨ ᠫᠤᠤᠵᠢᠩ ᠬᠠᠷᠪᠤᠭᠰᠠᠨᠨᠢ ᠪᠦᠷ ᠨᠠᠢ᠍ᠮᠠᠨ ᠮᠢᠩᠭᠠᠨ ᠮᠧᠲᠷᠡᠴᠡ ᠳᠡᠭᠡᠭᠰᠢ ᠭᠠᠷᠤᠭᠰᠠᠨ ᠪᠠᠢᠯᠠ᠃ ᠭᠡᠲᠡᠯᠡ ᠶᠡᠷᠦᠶᠢᠨ ᠬᠢᠮᠡᠯ ᠪᠣᠷᠤᠭᠠᠨ ᠣᠷᠤᠭᠤᠯᠬᠤᠳᠤ᠂ ᠬᠣᠶᠠᠷ ᠭᠤᠷᠪᠠᠨ ᠮᠢᠩᠭᠠᠨ ᠮᠧᠲᠷᠦᠨ ᠥᠨᠳᠦᠷᠲᠦ ᠭᠠᠷᠪᠠᠯ ᠪᠣᠯᠴᠢᠬᠠᠬᠤᠶᠤᠮ᠃
ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠮᠡᠷᠭᠡᠵᠢᠯᠦᠨ ᠶᠡᠬᠡ ᠰᠤᠷᠭᠠᠭᠤᠯᠢ᠂ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠤᠭᠳᠠᠭᠰᠠᠨ ᠨᠢᠭᠡ ᠵᠢᠯᠦᠨ ᠣᠢᠪᠠᠨ ᠪᠡᠯᠭᠡᠯᠡᠬᠦ ᠶᠡᠬᠡ ᠬᠤᠷᠠᠯ ᠬᠢᠪᠡ᠃ ᠰᠤᠷᠤᠭᠴᠢᠳ᠂ ᠠᠭᠠᠷᠲᠤ ᠭᠤᠷᠪᠠᠨ ᠫᠤᠤᠵᠢᠩ ᠬᠠᠷᠪᠤᠵᠤ ᠭᠠᠷᠭᠠᠨ᠂ ᠶᠡᠬᠡ ᠬᠤᠷᠠᠯᠳᠤ ᠪᠡᠯᠡᠭᠯᠡᠭᠰᠡᠨᠳᠦ᠂ ᠰᠤᠷᠭᠠᠭᠤᠯᠢᠶᠢᠨ ᠳᠠᠷᠤᠭᠠ ᠭᠦᠸᠧ ᠮᠦᠸᠧ ᠿᠦᠸᠧ ᠪᠣᠯᠤᠨ ᠰᠠᠯᠪᠤᠷᠢᠶᠢᠨ ᠡᠷᠬᠢᠯᠡᠭᠴᠢ ᠴᠢᠶᠠᠨ ᠰᠢᠤᠸᠠᠢ ᠰᠧᠨ ᠪᠠᠶᠠᠷᠲᠠᠢ ᠢᠨᠢᠶᠡᠮᠰᠦᠭᠯᠡᠵᠦ᠂ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠠᠰᠢᠵᠤ ᠪᠠᠶᠠᠷ ᠬᠦᠷᠭᠡᠪᠡ᠃
1959 ᠣᠨᠤ ᠨᠠᠮᠤᠷ᠂ ᠭᠠᠨᠰᠦ ᠮᠤᠵᠢ ᠶᠡᠬᠡ ᠭᠠᠩᠳᠠᠪᠠ᠃ ᠭᠠᠵᠠᠷ ᠬᠠᠭᠠᠷᠠᠵᠤ ᠲᠠᠷᠢᠶᠠ ᠲᠥᠮᠦᠰᠦ ᠬᠣᠷᠪᠤᠢᠨ᠂ ᠠᠮᠠᠨᠤ ᠤᠰᠤᠴᠤ ᠣᠯᠳᠠᠬᠤᠦᠭᠡᠢ ᠰᠠᠨᠳᠤᠷᠴᠠᠭᠠᠪᠠ᠃ ᠠᠷᠠᠳ ᠣᠯᠠᠨ ᠠᠭᠠᠷ ᠲᠡᠭᠷᠢᠶᠢ ᠪᠠᠷᠠᠯᠠᠵᠤ ᠬᠤᠷᠠ ᠪᠣᠷᠤᠭᠠᠨ ᠬᠠᠢᠷᠠᠯᠠᠬᠤ ᠪᠣᠯᠤᠭᠠᠰᠠᠢ ᠭᠡᠵᠦ ᠵᠠᠯᠪᠠᠷᠢᠨᠠ᠃ ᠰᠠᠯᠪᠤᠷᠢ ᠠᠩᠭᠢ ᠡᠨᠳᠡ ᠢᠷᠡᠵᠦ ᠦᠢᠯᠡᠳᠦᠯᠭᠡ ᠳᠡᠭᠡᠷᠡ ᠲᠤᠷᠰᠢᠯᠲᠠ ᠬᠢᠬᠦ ᠪᠣᠯᠪᠠ᠃ ᠪᠥᠭᠡᠮ ᠬᠠᠷᠠ ᠡᠭᠦᠯᠡ ᠬᠦᠷᠴᠦ ᠢᠷᠡᠭᠰᠡᠨᠳᠦ᠂ ᠦᠬᠡᠷ ᠨᠥᠬᠦᠳᠲᠡᠢᠪᠡᠨ ᠡᠨᠡ ᠲᠣᠬᠢᠶᠠᠯᠢ ᠠᠯᠳᠠᠯᠦᠭᠡᠢ ᠵᠠᠪᠳᠤᠵᠤ᠂ ᠫᠤᠤᠵᠢᠩᠢᠶᠠᠨ ᠪᠣᠰᠭᠠᠨ ᠬᠠᠷᠠ ᠡᠭᠦᠯᠡᠶᠢ ᠬᠠᠷᠠᠭᠤᠯᠵᠤ᠂ ᠬᠡᠳᠦᠨᠲᠡ ᠬᠠᠷᠪᠤᠭᠰᠠᠨᠳᠤ᠂ ᠫᠤᠤᠵᠢᠩ ᠳᠡᠭᠳᠡᠵᠦ ᠭᠠᠷᠤᠭᠠᠳ ᠡᠭᠦᠯᠡᠶᠢ ᠣᠨᠤᠲᠠᠯᠠ᠂ ᠴᠠᠬᠢᠯᠭᠠᠨ ᠴᠠᠬᠢᠯᠵᠤ ᠠᠶᠤᠩᠭᠠ ᠨᠢᠵᠢᠭᠢᠨᠡᠨ᠂ ᠭᠱᠠᠨ ᠵᠠᠭᠤᠷᠠ ᠶᠡᠬᠡ ᠪᠣᠷᠤᠭᠠᠨ ᠱᠠᠭᠢᠨ ᠪᠠᠭᠤᠪᠠ᠃
ᠤᠳᠠᠲᠠᠯᠠ ᠭᠠᠩᠳᠠᠭᠠᠳ ᠷᠠᠰᠢᠶᠠᠨ ᠬᠤᠷᠠᠲᠠᠢ ᠵᠣᠯᠭᠠᠭᠰᠠᠨ ᠠᠷᠠᠳᠤᠳ ᠰᠠᠷᠠᠪᠴᠢᠨ ᠳᠣᠭᠤᠤᠷ ᠭᠦᠶᠦᠯᠳᠦᠨ ᠭᠠᠷᠴᠤ᠂ ᠡᠷᠡᠭᠲᠡᠢᠴᠦᠳᠨᠢ ᠭᠠᠷᠴᠤ ᠢᠷᠡᠭᠡᠳ ᠪᠡᠶᠡ ᠤᠭᠢᠶᠠᠬᠤᠳᠤ ᠡᠮᠡᠭᠲᠡᠢᠴᠦᠳᠴᠦ ᠪᠣᠷᠤᠭᠠᠨ ᠳᠤᠮᠳᠠ ᠪᠠᠶᠠᠷᠯᠠᠨ ᠦᠢᠮᠡᠯᠳᠦᠵᠦ᠂ ᠬᠡᠦᠬᠡᠳᠦᠳ ᠨᠡᠩᠴᠦ ᠤᠰᠤᠪᠠᠷ ᠠᠯᠢᠶᠠᠷᠬᠠᠨ ᠨᠠᠭᠠᠳᠴᠠᠭᠠᠨᠠ᠃ ᠡᠪᠦᠭᠡᠨ ᠲᠠᠷᠢᠶᠠᠴᠢᠳ ᠥᠨᠳᠦᠷ ᠲᠡᠭᠷᠢᠶᠢ ᠬᠠᠷᠠᠵᠤ: 《ᠯᠤᠤᠰᠤᠨ ᠬᠠᠭᠠᠨ ᠦᠨᠡᠬᠡᠷ ᠪᠢᠳᠡᠨᠢ ᠥᠷᠦᠰᠢᠶᠡᠯᠡ!》 ᠭᠡᠵᠦ ᠵᠠᠯᠪᠠᠷᠢᠨᠠ᠃
ᠦᠬᠡᠷ ᠳᠠᠢᠴᠢᠨ ᠨᠥᠬᠦᠳᠲᠡᠢᠪᠡᠨ ᠨᠢᠩᠰᠢᠶᠠ᠂ ᠰᠧᠴᠤᠸᠠᠨ᠂ ᠯᠢᠶᠣᠣᠨᠢᠩ ᠵᠡᠷᠭᠡ ᠭᠠᠵᠠᠷᠤᠳᠢᠶᠠᠷ ᠶᠠᠪᠤᠵᠤ ᠲᠤᠷᠰᠢᠯᠲᠠ ᠬᠢᠭᠡᠳ ᠪᠦᠷ ᠳᠦᠭᠦᠷᠡᠩ ᠠᠮᠵᠢᠯᠲᠠ ᠣᠯᠵᠠᠢ᠃
ᠡᠭᠦᠯᠡ ᠪᠣᠷᠤᠭᠠᠨ ᠤᠷᠢᠳᠠᠭ ᠡᠷᠲᠡᠨᠦ ᠳᠣᠮᠤᠭ ᠣᠳᠣ ᠳᠤᠮᠳᠠᠳᠤ ᠤᠯᠤᠰᠤᠨ ᠡᠬᠡ ᠭᠠᠵᠠᠷᠲᠤ ᠪᠣᠳᠠᠲᠤ ᠦᠨᠡᠨ ᠶᠠᠪᠤᠳᠠᠯ ᠪᠣᠯᠤᠭᠠᠳ᠂ ᠦᠬᠡᠷ ᠨᠥᠬᠦᠷ ᠰᠡᠯᠲᠡᠶᠢᠨ ᠬᠠᠮᠲᠤ ᠡᠭᠦᠯᠡ ᠪᠣᠷᠤᠭᠠᠨᠢ ᠤᠷᠢᠨ ᠳᠠᠯᠠᠯᠵᠤ᠂ ᠠᠷᠠᠳ ᠣᠯᠠᠨᠳᠠᠭᠠᠨ ᠥᠭᠭᠢᠶᠡᠮᠦᠷ ᠬᠤᠷᠠ ᠢᠪᠡᠭᠡᠭᠴᠢ 《ᠪᠢᠯᠢᠭᠦᠨ ᠵᠠᠩᠵᠤᠨ》 ᠪᠣᠯᠵᠠᠢ᠃
ᠰᠢᠩᠭᠡᠯᠢᠭᠲᠦ ᠬᠣᠷᠢᠭᠳᠠᠭᠰᠠᠨ 《ᠠᠯ ᠰᠡᠭᠦᠯ》
1963 ᠣᠨᠳᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠮᠡᠷᠭᠡᠵᠢᠯᠦᠨ ᠶᠡᠬᠡ ᠰᠤᠷᠭᠠᠭᠤᠯᠢᠠᠴᠠ ᠲᠡᠭᠦᠰᠦᠭᠰᠡᠨ ᠦᠬᠡᠷ ᠮᠦᠭᠳᠡᠨᠦ ᠤᠯᠤᠰᠤᠨ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠯᠲᠠᠶᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠺᠣᠮᠢᠰᠤᠨ ᠵᠢᠷᠤᠭ ᠲᠥᠯᠦᠪᠯᠡᠭᠡᠨᠦ ᠭᠠᠵᠠᠷ ᠣᠴᠢᠵᠤ ᠠᠵᠢᠯᠯᠠᠵᠠᠢ᠃ ᠲᠡᠭᠡᠭᠡᠳ ᠰᠥᠨᠦᠭᠡᠭᠴᠢ ᠭᠣᠳᠤᠯᠢ ᠬᠡᠯᠪᠡᠢᠵᠦ ᠪᠠᠢᠯᠳᠤᠭᠠᠨᠤ ᠨᠢᠰᠬᠦ ᠣᠩᠭᠤᠴᠠᠨᠤ ᠲᠧᠭᠨᠢᠭᠦᠨ ᠮᠠᠭᠠᠳᠯᠠᠯᠳᠤ ᠣᠷᠤᠯᠴᠠᠭᠠᠳ᠂ ᠤᠳᠠᠭᠰᠠᠨᠦᠭᠡᠢ ᠲᠧᠭᠨᠢᠭᠦᠨ ᠳᠤᠭᠤᠢᠯᠠᠩᠤᠨ ᠳᠠᠷᠤᠭᠠᠶᠢᠨ ᠠᠵᠢᠯᠢ ᠬᠠᠷᠢᠭᠤᠴᠠᠪᠠ᠃ ᠲᠡᠭᠦᠨᠢ ᠬᠥᠬᠡ ᠮᠥᠩᠭᠦᠨ ᠲᠡᠭᠷᠢᠳᠦ ᠬᠦᠯᠦᠭᠦᠨ ᠵᠢᠭᠦᠷ ᠳᠡᠯᠭᠡᠬᠦ ᠭᠡᠵᠦ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠤᠭᠠᠯᠵᠠ ᠰᠢᠭᠤᠷᠭᠠ ᠤᠤᠯᠭᠠᠯᠠᠨ ᠳᠠᠭᠠᠷᠢᠯᠠ᠃
ᠡᠬᠢᠨᠦ ᠦᠶᠡᠳᠦ ᠣᠯᠠᠨᠢᠶᠠᠷᠢᠶᠠᠨ ᠦᠬᠡᠷᠢ 《 ᠰᠣᠶᠤᠯᠤᠨ ᠬᠤᠪᠢᠰᠭᠠᠯᠤᠨ ᠠᠯᠪᠠᠨ ᠭᠡᠷ》ᠤᠨ ᠳᠡᠳ᠋ ᠡᠷᠬᠢᠯᠡᠭᠴᠢᠪᠡᠷ ᠰᠣᠩᠭᠤᠪᠠ᠃ ᠤᠳᠠᠭᠰᠠᠨᠦᠭᠡᠢ ᠣᠯᠠᠨᠢᠶᠠᠷᠢᠶᠠᠨ ᠬᠣᠶᠠᠷ ᠪᠦᠯᠦᠭ ᠪᠣᠯᠤᠨ ᠬᠠᠭᠠᠷᠠᠭᠰᠠᠨ ᠲᠤᠯᠠ ᠡᠨᠡ 《ᠬᠠᠷᠠ ᠪᠦᠯᠦᠭ》ᠤᠨ ᠦᠷᠡ ᠠᠴᠢᠷ ᠠᠷᠭᠠᠦᠭᠡᠢ 《 ᠬᠤᠪᠢᠪᠠᠨ ᠬᠥᠭᠡᠭᠡᠬᠦ》ᠳᠦ ᠬᠦᠷᠴᠡᠢ᠃ ᠦᠬᠡᠷ ᠦᠵᠡᠯ ᠵᠣᠷᠢᠯᠭᠠ ᠨᠢᠭᠡᠲᠡᠢ ᠬᠡᠳᠦᠨ ᠨᠥᠬᠦᠳᠲᠡᠢᠪᠡᠨ ᠨᠡᠢᠯᠡᠭᠡᠳ ᠪᠡᠭᠡᠵᠢᠩᠦᠨ ᠠᠭᠠᠷᠤᠨ ᠠᠶᠠᠯᠠᠯᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠳᠤ ᠣᠴᠢᠵᠤ ᠪᠠᠢᠴᠠᠭᠠᠨ ᠰᠤᠳᠤᠯᠤᠯᠲᠠ ᠬᠢᠵᠦ᠂ ᠲᠤᠰᠭᠠᠢ ᠮᠡᠷᠭᠡᠵᠢᠯᠲᠡᠨᠢ ᠵᠠᠯᠠᠵᠤ ᠭᠠᠳᠠᠭᠠᠳᠤᠶᠢᠨ ᠣᠩᠭᠤᠴᠠᠨᠤ ᠬᠡᠯᠪᠡᠷᠢᠶᠢᠨ ᠬᠥᠭᠵᠢᠯᠲᠡᠶᠢ ᠰᠤᠳᠤᠯᠪᠠ᠃
ᠦᠬᠡᠷ ᠨᠥᠬᠦᠳᠲᠡᠢᠪᠡᠨ ᠵᠣᠷᠢᠭ ᠲᠡᠭᠦᠯᠳᠡᠷ ᠠᠵᠢᠯᠯᠠᠵᠤ ᠪᠠᠢᠲᠠᠯᠠ ᠪᠠᠢᠭᠤᠯᠭᠠᠶᠢᠨ ᠬᠢᠨᠢ ᠤᠷᠪᠠᠯᠭᠠ ᠭᠠᠷᠭᠠᠭᠴᠢᠳ ᠴᠠᠬᠢᠯᠭᠠᠨ ᠮᠡᠳᠡᠭᠡ ᠢᠷᠡᠭᠦᠯᠵᠦ᠂ ᠬᠠᠷᠢᠵᠤ ᠠᠵᠢᠯᠢᠶᠠᠨ ᠮᠡᠳᠡᠭᠦᠯ ᠭᠡᠵᠦ ᠳᠠᠭᠤᠳᠠᠪᠠ᠃ ᠦᠬᠡᠷ ᠭᠠᠯ ᠲᠡᠷᠭᠡᠪᠡᠷ ᠮᠦᠭᠳᠡᠨᠳᠦ ᠬᠦᠷᠴᠦ ᠲᠡᠷᠭᠡᠨᠡᠴᠡ ᠪᠠᠭᠤᠲᠠᠯᠠ ᠤᠯᠤᠰ ᠭᠦᠶᠦᠯᠳᠦᠨ ᠢᠷᠡᠵᠦ ᠭᠠᠷᠢᠨᠢ ᠠᠷᠤᠳᠤᠨᠢ ᠬᠦᠯᠢᠴᠢᠬᠡᠪᠡ᠃
《ᠪᠢ ᠶᠠᠮᠠᠷ ᠶᠠᠯᠠ ᠬᠢᠴᠢᠬᠡᠪᠡ?》
《ᠴᠢ ᠤᠷᠪᠠᠭᠴᠢ ᠡᠴᠢᠭᠡᠪᠡᠨ ᠥᠮᠦᠭᠯᠡᠭᠰᠡᠨ᠃ 》
ᠤᠴᠢᠷ ᠵᠦᠢᠶᠢ ᠠᠰᠠᠭᠤᠯᠦᠭᠡᠢᠪᠠᠷ ᠦᠬᠡᠷᠢ ᠪᠠᠷᠢᠵᠤ ᠬᠣᠷᠢᠪᠠ᠃
《ᠴᠠᠭ ᠮᠥᠴᠡᠶᠢ ᠲᠠᠯᠠᠭᠠᠷ ᠨᠥᠭᠴᠢᠭᠡᠬᠦᠡᠴᠡ ᠢᠯᠡᠭᠦᠦ ᠵᠣᠪᠠᠯᠠᠩ ᠭᠡᠵᠦ ᠪᠠᠢᠬᠤᠦᠭᠡᠢ》 ᠭᠡᠳᠡᠭ ᠲᠦᠷᠭᠧᠨ᠋ᠸᠧᠶᠢᠨ ᠠᠯᠳᠠᠷᠲᠤ ᠰᠤᠷᠭᠠᠯᠢ ᠦᠬᠡᠷ ᠣᠯᠠᠨ ᠵᠢᠯ ᠮᠠᠷᠲᠠᠯᠦᠭᠡᠢ ᠴᠡᠭᠡᠵᠢᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠲᠤᠯᠠ ᠡᠨᠡ ᠦᠭᠡᠪᠡᠷ ᠠᠵᠢᠯ ᠰᠤᠷᠤᠯᠭᠠᠪᠠᠨ ᠰᠢᠪᠠᠳᠠᠭᠰᠠᠭᠠᠷ ᠢᠷᠡᠭᠰᠡᠨᠶᠦᠮ᠃ 《ᠲᠡᠦᠬᠡᠶᠢᠨ ᠡᠨᠳᠡᠭᠦᠷᠡᠯᠳᠦ ᠬᠤᠮᠤᠷᠭᠠᠯᠠᠭᠳᠠᠬᠤ ᠦᠶᠡᠳᠦ ᠲᠥᠪ ᠵᠣᠷᠢᠭ ᠰᠢᠨᠲᠠᠷᠠᠵᠤ ᠪᠣᠯᠬᠤᠦᠭᠡᠢ》 ᠭᠡᠵᠦ ᠦᠬᠡᠷ ᠰᠡᠳᠭᠢᠯᠢᠶᠡᠨ ᠴᠢᠩᠭᠠᠯᠠᠭᠠᠳ᠂ ᠡᠨᠡ ᠭᠢᠨᠳᠠᠨᠤ ᠪᠤᠯᠤᠩᠳᠤ ᠶᠠᠭᠤ ᠬᠢᠬᠦ ᠬᠡᠷᠡᠭᠲᠡᠢ ᠪᠤᠢ ᠭᠡᠵᠦ ᠡᠷᠭᠢᠴᠡᠭᠦᠯᠵᠦ ᠪᠣᠳᠤᠯᠠ᠃ ᠦᠬᠡᠷᠦᠨ ᠭᠠᠷ ᠳᠣᠣᠷᠠᠨᠢ ᠨᠢᠭᠡ ᠳᠡᠪᠲᠡᠷ ᠭᠧᠷᠮᠠᠨ ᠬᠡᠯᠡᠨᠦ ᠦᠭᠡᠶᠢᠨ ᠲᠡᠭᠦᠪᠦᠷᠢ᠂ ᠪᠠᠰᠠ ᠨᠢᠭᠡ ᠳᠡᠪᠲᠡᠷ ᠰᠤᠷᠤᠭᠴᠢᠶᠢᠨ ᠲᠣᠯᠢ ᠪᠢᠴᠢᠭ ᠪᠠᠢᠭᠰᠠᠨ ᠲᠤᠯᠠ ᠡᠳᠦᠷᠨᠢ ᠲᠡᠮᠦᠷ ᠰᠠᠷᠠᠯᠵᠢ ᠴᠣᠩᠬᠤᠪᠠᠷ ᠳᠣᠰᠤᠭᠰᠠᠨ ᠪᠦᠳᠡᠭᠢ ᠭᠡᠷᠡᠯᠳᠦ ᠭᠧᠷᠮᠠᠨ ᠬᠡᠯᠡ ᠪᠣᠯᠪᠠᠰᠤᠷᠠᠵᠤ᠂ ᠰᠥᠨᠢᠶᠢᠨ ᠬᠠᠷᠠᠩᠭᠤᠢᠳᠤ ᠬᠠᠷᠠ ᠴᠡᠭᠡᠵᠢᠪᠡᠷ ᠳᠠᠪᠲᠠᠨ ᠪᠢᠰᠢᠯᠭᠠᠳᠠᠭ ᠪᠠᠢᠯᠠ᠃
ᠦᠬᠡᠷ ᠦᠯᠦ ᠰᠢᠲᠠᠬᠤ ᠰᠢᠷᠦᠨ ᠲᠤᠷᠰᠢᠯᠲᠠ ᠬᠢᠵᠦ ᠦᠵᠡᠭᠰᠡᠨ ᠨᠢᠭᠡ ᠮᠧᠩ ᠴᠢᠩ ᠫᠢᠩ ᠭᠡᠳᠡᠭ ᠬᠥᠮᠦᠨᠲᠡᠢ ᠲᠠᠨᠢᠯᠴᠠᠭᠠᠳ᠂ ᠬᠣᠶᠠᠭᠤᠯᠠ ᠦᠭᠡ ᠲᠠᠭᠠᠷᠠᠨ ᠶᠠᠷᠢᠯᠴᠠᠵᠠᠢ᠃ ᠡᠨᠡ ᠬᠣᠷᠢᠭᠤᠯᠤᠨ ᠭᠠᠵᠠᠷᠨᠢ ᠡᠷᠳᠡᠮ ᠮᠡᠳᠡᠯᠭᠡᠪᠡᠨ ᠰᠣᠯᠢᠯᠴᠠᠬᠤ ᠡᠩᠬᠡᠵᠢᠨᠦ ᠣᠷᠤᠨ ᠪᠣᠯᠵᠠᠢ᠃ ᠡᠨᠡ ᠭᠠᠵᠠᠷ ᠲᠤᠷᠰᠢᠯᠲᠠ ᠬᠢᠬᠦ ᠪᠣᠯᠤᠯᠴᠠᠭᠠᠦᠭᠡᠢ᠂ ᠪᠣᠳᠤᠯᠭᠠ ᠪᠣᠳᠤᠬᠤᠳᠤ ᠴᠠᠭᠠᠰᠤᠦᠭᠡᠢ᠂ ᠭᠠᠭᠴᠠᠬᠠᠨ ᠡᠰᠢᠦᠭᠡᠢ ᠲᠣᠰᠤᠨ ᠪᠢᠷᠦᠨ ᠭᠣᠣᠯᠯᠠ ᠪᠠᠢᠭᠰᠠᠨ ᠲᠤᠯᠠ 《ᠡᠷᠳᠡᠮ ᠰᠢᠨᠵᠢᠯᠡᠭᠡᠶᠢᠨ ᠰᠣᠯᠢᠯᠴᠠᠭᠠ》 ᠬᠢᠬᠦᠳᠦ ᠵᠥᠪᠬᠡᠨ ᠠᠮᠠᠪᠠᠷ ᠬᠡᠯᠡᠵᠦ ᠭᠠᠷᠢᠶᠠᠷ ᠵᠠᠩᠭᠠᠬᠤᠠᠴᠠ ᠥᠭᠡᠷᠡ ᠠᠷᠭᠠ ᠠᠯᠠᠭᠠ᠃ ᠲᠡᠨᠳᠡ ᠡᠳᠦᠷᠲᠦ ᠬᠥᠮᠦᠨ ᠨᠢᠭᠡᠪᠦᠷᠢᠳᠦ ᠨᠣᠶᠠᠨ ᠰᠢᠰᠢᠶᠢᠨ ᠪᠠᠵᠠᠮᠠᠯ ᠬᠣᠶᠠᠷ᠂ ᠳᠠᠪᠤᠰᠤᠲᠠᠢ ᠨᠣᠭᠤᠭᠠ ᠬᠣᠶᠠᠷ ᠬᠡᠰᠡᠭ᠂ ᠨᠢᠭᠡ ᠴᠣᠮᠣ ᠤᠰᠤᠯᠠ ᠥᠭᠳᠡᠭ ᠪᠠᠢᠭᠰᠠᠨ ᠲᠤᠯᠠ ᠪᠡᠶᠡ ᠪᠢᠯᠳᠠᠷ ᠶᠡᠬᠡᠲᠡᠢ ᠦᠬᠡᠷ ᠥᠯᠦᠰᠴᠦ ᠤᠮᠳᠠᠭᠠᠰᠤᠭᠠᠳ᠂ ᠳᠡᠮᠡᠢ ᠬᠡᠳᠦᠨ ᠦᠭᠡ ᠶᠠᠷᠢᠯᠦᠭᠡᠢᠪᠠᠷ ᠨᠢᠳᠦᠨᠢ ᠬᠠᠷᠠᠯᠠᠨ᠂ ᠤᠷᠤᠭᠤᠯ ᠲᠠᠩᠨᠠᠢᠨᠢ ᠬᠠᠲᠠᠵᠤ ᠠᠭᠤᠰᠭᠢ ᠵᠢᠷᠦᠬᠡᠨᠡᠴᠡᠨᠢ ᠤᠲᠤᠭᠠ ᠮᠠᠨᠠᠷᠠᠳᠠᠭ ᠪᠠᠢᠵᠠᠢ᠃ ᠦᠬᠡᠷ ᠦᠷᠭᠦᠯᠵᠢ ᠤᠷᠤᠭᠤᠯᠢᠶᠠᠨ ᠲᠠᠰᠤ ᠬᠠᠮᠬᠢᠨ ᠨᠢᠳᠦᠪᠡᠨ ᠠᠨᠢᠵᠤ᠂ ᠰᠠᠭᠤᠵᠤ ᠰᠠᠭᠤᠭᠠᠳ ᠠᠷᠠᠭᠠ ᠰᠢᠳᠦᠨᠡᠴᠡᠨᠢ ᠳᠤᠰᠤᠯᠤᠨ ᠲᠡᠳᠦᠢ ᠰᠢᠯᠦᠰᠦ ᠬᠤᠷᠠᠪᠠᠯ 《ᠡᠷᠳᠡᠮ ᠰᠢᠨᠵᠢᠯᠡᠭᠡᠶᠢᠨ ᠰᠣᠯᠢᠯᠴᠠᠭᠠ》 ᠶᠠᠪᠤᠭᠤᠯᠳᠠᠭ ᠪᠠᠢᠵᠠᠢ᠃
ᠡᠳᠡ ᠬᠣᠶᠠᠭᠤᠯᠠ ᠬᠣᠷᠢᠭᠤᠯᠤᠨ ᠭᠠᠵᠠᠷ ᠬᠠᠭᠠᠰ ᠵᠢᠯ ᠬᠠᠮᠲᠤ ᠰᠠᠭᠤᠬᠤᠳᠠᠭᠠᠨ᠂ 《ᠡᠷᠳᠡᠮ ᠰᠢᠨᠵᠢᠯᠡᠭᠡᠶᠢᠨ ᠰᠣᠯᠢᠯᠴᠠᠭᠠ》ᠪᠡᠨ ᠡᠨᠡ ᠮᠡᠲᠦᠪᠡᠷ ᠬᠠᠭᠠᠰ ᠵᠢᠯ ᠦᠷᠭᠦᠯᠵᠢᠯᠡᠭᠦᠯᠵᠡᠢ᠃ 1969 ᠣᠨᠤ ᠲᠠᠪᠤᠳᠤᠭᠠᠷ ᠰᠠᠷᠠᠳᠤ᠂ ᠦᠬᠡᠷ ᠡᠨᠡ ᠭᠢᠨᠳᠠᠨᠠᠴᠠ ᠠᠶᠠᠷᠯᠠᠨ ᠰᠠᠯᠬᠤ ᠦᠶᠡᠳᠦ᠂ ᠥᠨᠳᠦᠷ ᠢᠯᠴᠢᠲᠦ ᠰᠢᠷᠦᠭᠦᠨ ᠭᠠᠯᠲᠠᠢ ᠵᠣᠯᠭᠠᠵᠤ ᠪᠣᠯᠪᠠᠰᠤᠷᠠᠭᠰᠠᠨ ᠬᠣᠶᠠᠷ ᠬᠣᠣᠰ ᠬᠦᠳᠡᠷ ᠭᠠᠷ ᠴᠢᠩᠭᠠ ᠠᠳᠭᠤᠯᠴᠠᠵᠠᠢ᠃
ᠠᠷᠭᠠ ᠮᠤᠬᠤᠷᠳᠠᠭᠰᠠᠨ 《ᠭᠠᠯ ᠯᠣᠣ》
ᠦᠬᠡᠷ ᠬᠣᠷᠢᠭᠤᠯᠤᠨ ᠭᠠᠵᠠᠷᠠᠴᠠ ᠭᠠᠷᠤᠭᠰᠠᠨᠤ ᠳᠠᠷᠠᠭᠠ 《ᠣᠯᠠᠨ ᠲᠦᠮᠡᠨᠦ ᠳᠠᠷᠤᠩᠭᠤᠢᠯᠠᠯᠤᠨ ᠠᠩᠭᠢ》ᠳᠤ ᠬᠣᠷᠢᠭᠳᠠᠵᠤ᠂ ᠲᠠᠷᠢᠶᠠᠯᠠᠩᠤᠨ ᠲᠠᠯᠠᠪᠠᠢᠳᠤ ᠣᠴᠢᠵᠤ ᠬᠥᠳᠡᠯᠮᠦᠷᠢᠯᠡᠬᠦᠪᠡᠷ ᠪᠣᠯᠵᠠᠢ᠃
ᠨᠢᠭᠡ ᠡᠳᠦᠷ ᠵᠢᠷᠤᠭ ᠲᠥᠯᠦᠪᠯᠡᠭᠡᠶᠢᠨ ᠭᠠᠵᠠᠷᠠᠴᠠ ᠣᠨᠴᠤᠭᠤᠢ ᠴᠠᠬᠢᠯᠭᠠᠨ ᠮᠡᠳᠡᠭᠡ ᠢᠷᠡᠪᠡ: 《ᠪᠢ ᠵᠧᠦ ᠶᠡᠷᠦᠩᠬᠡᠢ ᠰᠠᠢᠳᠲᠠᠢ ᠠᠭᠤᠯᠵᠠᠯᠠ᠂ ᠬᠤᠷᠳᠤᠨ ᠪᠡᠭᠡᠵᠢᠩᠳᠦ ᠢᠷᠡᠵᠦ ᠠᠪᠤ ᠡᠵᠢᠲᠡᠢ ᠠᠭᠤᠯᠵᠠ᠃ 》 ᠡᠨᠡ ᠴᠠᠬᠢᠯᠭᠠᠨ ᠮᠡᠳᠡᠭᠡᠶᠢ ᠦᠬᠡᠷᠦᠨ ᠳᠡᠭᠦᠦ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠵᠧᠦ ᠶᠡᠷᠦᠩᠬᠡᠢ ᠰᠠᠢᠳᠲᠠᠢ ᠠᠭᠤᠯᠵᠠᠬᠤᠳᠠᠭᠠᠨ ᠠᠬᠠᠶᠢᠨᠢᠶᠠᠨ ᠪᠠᠢᠳᠠᠯᠢ ᠶᠠᠷᠢᠵᠤ ᠥᠭᠭᠦᠭᠰᠡᠨᠳᠦ᠂ ᠵᠧᠦ ᠶᠡᠷᠦᠩᠬᠡᠢ ᠰᠠᠢᠳ ᠲᠡᠭᠦᠨᠳᠦ ᠨᠥᠬᠦᠷ ᠤᠯᠠᠭᠠᠨᠬᠦᠦ ᠠᠰᠠᠭᠤᠳᠠᠯᠦᠭᠡᠢ᠂ ᠦᠬᠡᠷᠲᠦ ᠴᠢᠷᠦᠭᠳᠡᠯ ᠪᠣᠯᠬᠤ ᠶᠣᠰᠤᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠥᠭᠴᠡᠢ᠃
ᠦᠬᠡᠷ ᠵᠢᠷᠤᠭ ᠲᠥᠯᠦᠪᠯᠡᠭᠡᠶᠢᠨ ᠭᠠᠵᠠᠷᠲᠠᠭᠠᠨ ᠡᠷᠭᠢᠵᠦ ᠢᠷᠡᠬᠦᠳᠦ᠂ ᠤᠯᠤᠰᠤᠨ ᠰᠡᠳᠭᠢᠯ ᠰᠠᠮᠠᠭᠤᠷᠠᠵᠤ᠂ ᠠᠭᠠᠷᠤᠨ ᠵᠡᠪᠰᠡᠭ ᠲᠥᠯᠦᠪᠯᠡᠨ ᠰᠤᠳᠤᠯᠬᠤ ᠠᠵᠢᠯ ᠶᠠᠪᠤᠭᠳᠠᠬᠤᠶᠢᠨ ᠠᠷᠭᠠᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ ᠦᠬᠡᠷ ᠦᠯᠦ ᠰᠢᠲᠠᠬᠤ ᠰᠢᠷᠦᠨ ᠲᠤᠷᠰᠢᠯᠲᠠ ᠬᠢᠵᠦ᠂ ᠬᠠᠮᠲᠤᠷᠠᠯᠤᠨ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠤᠭᠠᠳ᠂ ᠠᠵᠢᠯᠦᠭᠡᠢ ᠵᠠᠯᠠᠭᠤᠴᠤᠳᠲᠤ ᠠᠵᠢᠯ ᠣᠯᠭᠤᠬᠤ ᠭᠡᠵᠦ ᠰᠠᠨᠠᠯ ᠳᠤᠷᠠᠳᠪᠠ᠃ ᠭᠡᠲᠡᠯᠡ ᠡᠨᠡᠨᠢ 《ᠦᠢᠯᠡᠳᠪᠦᠷᠢᠯᠡᠬᠦ ᠬᠦᠴᠦᠨᠢᠯᠡ ᠡᠷᠬᠢᠮᠯᠡᠬᠦ ᠣᠨᠤᠯ》 ᠭᠡᠵᠦ ᠪᠤᠷᠤᠭᠤᠰᠢᠶᠠᠭᠳᠠᠭᠰᠠᠨ ᠪᠠᠢᠨᠠ᠃
ᠦᠬᠡᠷ ᠥᠪᠡᠷᠢᠶᠡᠨ ᠨᠢᠭᠡ ᠵᠠᠮ ᠡᠷᠢᠵᠦ᠂ ᠠᠷᠠᠳ ᠲᠦᠮᠡᠨᠳᠦ ᠪᠤᠶᠠᠨ ᠦᠢᠯᠡᠳᠬᠦᠪᠡᠷ ᠵᠣᠷᠢᠭ ᠰᠢᠭᠤᠳᠪᠠ᠃ ᠲᠡᠭᠡᠭᠡᠳ ᠥᠪᠡᠷᠢᠶᠡᠨ ᠵᠠᠮᠤᠨ ᠵᠠᠷᠤᠳᠠᠯ ᠭᠠᠷᠭᠠᠵᠤ ᠬᠥᠬᠡᠬᠣᠲᠠᠳᠤ ᠬᠦᠷᠦᠭᠰᠡᠨᠳᠦ᠂ ᠭᠠᠳᠠᠭᠠᠳᠤ ᠠᠷᠠᠯᠵᠢᠶᠠᠨᠤ ᠲᠣᠪᠴᠢᠶᠠᠨᠤ ᠳᠠᠷᠤᠭᠠ ᠲᠡᠭᠦᠨᠢ ᠳᠠᠭᠠᠭᠤᠯᠤᠨ ᠲᠣᠭᠤᠷᠢᠨ ᠦᠵᠡᠭᠦᠯᠬᠦᠳᠡᠭᠡᠨ ᠠᠭᠤᠯᠠ ᠮᠡᠲᠦ ᠣᠪᠤᠭᠠᠯᠠᠭᠰᠠᠨ ᠴᠠᠭᠠᠰᠤᠨ ᠬᠠᠢᠷᠴᠠᠭᠢ ᠵᠢᠭᠠᠭᠠᠳ: 《ᠢᠩᠭᠢᠵᠦ ᠶᠡᠬᠡ ᠣᠪᠤᠭᠠᠯᠠᠪᠠᠯ ᠳᠣᠣᠷᠠᠬᠢᠨᠢ ᠪᠦᠷ ᠡᠪᠳᠡᠷᠡᠴᠢᠬᠡᠨᠡ》 ᠭᠡᠵᠦ ᠬᠡᠯᠡᠵᠦ ᠥᠭᠴᠡᠢ᠃
《ᠠᠷᠭᠠ ᠪᠠᠢᠨᠠ᠂ ᠭᠠᠳᠠᠭᠤᠷᠨᠢ 〈ᠴᠢᠯᠠᠭᠤᠨ ᠬᠠᠯᠢᠰᠤ〉 ᠲᠠᠭᠠᠷᠠᠭᠤᠯᠴᠢᠬᠠᠪᠠᠯ᠂ ᠬᠠᠲᠠᠭᠤ ᠪᠡᠬᠢ ᠪᠣᠯᠬᠤ ᠮᠥᠷᠲᠡᠭᠡᠨ ᠭᠠᠯᠳᠤ ᠰᠢᠲᠠᠬᠤᠦᠭᠡᠢ᠃ 》
ᠲᠣᠪᠴᠢᠶᠠᠨᠤ ᠳᠠᠷᠤᠭᠠ ᠶᠡᠬᠡ ᠪᠠᠶᠠᠷᠯᠠᠪᠠ᠃
ᠭᠢᠨᠳᠠᠨᠳᠤ ᠲᠠᠨᠢᠯᠴᠠᠭᠰᠠᠨ ᠮᠧᠩ ᠴᠢᠩ ᠫᠢᠩᠨᠢ ᠤᠳᠠᠯᠦᠭᠡᠢ ᠬᠥᠬᠡᠬᠣᠲᠠᠳᠤ ᠢᠷᠡᠵᠦ ᠦᠬᠡᠷᠲᠡᠢ ᠠᠭᠤᠯᠵᠠᠪᠠ᠃ ᠮᠦᠭᠳᠡᠨ ᠬᠣᠲᠠᠶᠢᠨ ᠱᠢ ᠬᠠᠢ ᠴᠢᠩ ᠭᠡᠳᠡᠭ ᠠᠬᠠᠮᠠᠳ ᠠᠵᠢᠯᠴᠢᠨ ᠰᠢᠷ ᠨᠠᠢᠷᠠᠭᠤᠯᠬᠤ ᠣᠷᠭᠠᠨᠢᠭ ᠪᠤᠰᠤ ᠬᠦᠳᠡᠷ ᠠᠪᠤᠭᠠᠳ ᠬᠦᠷᠴᠦ ᠢᠷᠡᠭᠡᠳ ᠰᠢᠷᠦᠭᠦᠨ ᠭᠠᠯᠲᠠᠢ ᠦᠵᠡᠯᠴᠡᠬᠦ ᠳᠠᠢᠨᠤ ᠬᠥᠰᠢᠭᠡᠶᠢ ᠰᠡᠬᠦᠯᠡ᠃
ᠳᠥᠭᠦᠮᠬᠡᠨ ᠲᠤᠷᠰᠢᠯᠲᠠᠶᠢᠨ ᠭᠠᠵᠠᠷᠲᠤᠨᠢ ᠦᠯᠦ ᠰᠢᠲᠠᠬᠤ ᠬᠦᠳᠡᠷᠢ ᠬᠡᠮᠬᠡᠯᠬᠦ ᠮᠠᠰᠢᠨᠠ ᠪᠠᠢᠭᠰᠠᠨᠦᠭᠡᠢ ᠲᠤᠯᠠ ᠦᠬᠡᠷ ᠪᠦᠳᠦᠭᠦᠨ ᠯᠠᠨᠲᠤᠤᠪᠠᠷ ᠪᠠᠯᠪᠠᠯᠠ᠃ ᠰᠢᠷ ᠨᠠᠢᠷᠠᠭᠤᠯᠬᠤᠳᠤ ᠬᠡᠷᠡᠭᠯᠡᠬᠦ ᠰᠠᠪᠠ ᠰᠠᠭᠠᠯᠢ ᠪᠠᠢᠭᠰᠠᠨᠦᠭᠡᠢ ᠲᠤᠯᠠ ᠬᠡᠳᠦᠨ ᠪᠦᠳᠦᠭᠦᠨ ᠲᠣᠭᠤᠭᠠ ᠣᠯᠵᠤ ᠢᠷᠡᠭᠡᠳ᠂ ᠦᠨᠡᠰᠦ ᠲᠣᠭᠤᠰᠤ ᠮᠠᠨᠠᠷᠠᠭᠤᠯᠵᠤ ᠬᠠᠮᠠᠷ ᠭᠠᠳᠠᠮᠠ ᠮᠠᠭᠤᠬᠠᠢ ᠦᠨᠦᠷᠢᠴᠦ ᠬᠠᠢᠬᠤᠷᠤᠯᠦᠭᠡᠢ ᠭᠠᠷᠢᠶᠠᠷᠢᠶᠠᠨ ᠵᠢᠭᠤᠷᠠᠯᠠ᠃
ᠦᠬᠡᠷᠢ ᠴᠢᠳᠠᠯ ᠮᠡᠳᠡᠨ ᠲᠤᠷᠰᠢᠯᠲᠠ ᠬᠢᠵᠦ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠨᠢᠭᠡ ᠮᠠᠭᠤ ᠢᠷᠤᠠᠶᠢᠨ ᠴᠢᠮᠡᠭᠡ ᠭᠠᠷᠴᠠᠢ᠃ ᠥᠪᠦᠷ ᠮᠣᠩᠭᠤᠯᠤᠨ 《ᠠᠢᠮᠠᠭ ᠪᠦᠯᠦᠭᠦᠨ ᠡᠲᠡᠭᠡᠳ》 ᠮᠦᠭᠳᠡᠨᠳᠦ ᠰᠡᠮᠡᠭᠡᠷᠬᠡᠨ ᠣᠴᠢᠵᠤ 《 ᠨᠢᠭᠤᠴᠠᠪᠠᠷ ᠪᠠᠢᠴᠠᠭᠠᠭᠠᠳ》᠂ ᠲᠤᠷᠰᠢᠯᠲᠠᠶᠢᠨ ᠳᠤᠭᠤᠢᠯᠠᠩᠳᠤ ᠨᠡᠯᠢᠶᠡᠳ ᠬᠡᠳᠦᠨ 《ᠶᠠᠯᠠᠲᠠᠨ》 ᠪᠠᠢᠬᠤ ᠪᠥᠭᠡᠳ ᠡᠳᠡᠨ ᠣᠯᠠᠨ ᠲᠦᠮᠡᠨᠦ 《ᠬᠢᠨᠠᠯᠲᠠ》ᠡᠴᠡ ᠵᠠᠢᠯᠠᠵᠤ᠂ 《ᠠᠮᠤᠷ ᠲᠠᠢᠪᠤᠩ ᠣᠷᠤᠨ》ᠢᠶᠡᠷ 《ᠪᠤᠯᠲᠠᠵᠤ ᠶᠠᠪᠤᠵᠤ》 ᠪᠠᠢᠨᠠ ᠭᠡᠵᠦ ᠵᠠᠭᠠᠯᠳᠤᠵᠠᠢ᠃
ᠥᠪᠦᠷ ᠮᠣᠩᠭᠤᠯᠤᠨ ᠭᠠᠳᠠᠭᠠᠳᠤ ᠠᠷᠠᠯᠵᠢᠶᠠᠨᠤ ᠲᠣᠪᠴᠢᠶᠠ ᠪᠠ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠺᠣᠮᠢᠰᠤᠨ ᠤᠳᠤᠷᠢᠳᠬᠤ ᠺᠠᠳ᠋ᠷᠴᠤᠳ ᠴᠡᠭᠡᠵᠢ ᠲᠦᠷᠢᠨ ᠪᠣᠰᠴᠤ᠂ ᠡᠨᠡ ᠮᠠᠭᠤ ᠢᠷᠤᠠᠶᠢᠨ ᠴᠢᠮᠡᠭᠡᠶᠢ ᠡᠰᠡᠷᠭᠦᠴᠡᠪᠡ᠃
ᠦᠬᠡᠷᠦᠨ ᠵᠣᠷᠢᠭ ᠤᠯᠠᠮ ᠴᠢᠩᠭᠠᠷᠠᠵᠤ᠂ ᠰᠠᠭᠤᠯᠭᠠᠭᠰᠠᠨ ᠰᠢᠷᠢᠶᠡᠨ ᠭᠠᠯ ᠯᠤᠤᠪᠠᠷ ᠳᠠᠬᠢᠨ ᠳᠠᠬᠢᠨ ᠳᠣᠯᠢᠶᠠᠯᠭᠠᠵᠤ᠂ ᠰᠢᠷᠢᠶᠡᠨ ᠡᠷᠭᠢᠨ ᠡᠷᠭᠢᠨ ᠰᠣᠯᠢᠵᠤ ᠭᠠᠯ ᠯᠤᠤᠲᠠᠢ ᠦᠵᠡᠯᠴᠡᠭᠦᠯᠵᠦ᠂ ᠬᠠᠯᠠᠭᠤᠨ ᠭᠠᠯᠠᠴᠠ ᠬᠠᠯᠠᠰᠢᠷᠠᠯᠦᠭᠡᠢ ᠠᠵᠢᠯᠯᠠᠵᠠᠢ᠃ ᠲᠤᠷᠰᠢᠯᠲᠠ ᠶᠠᠭ ᠢᠳᠡ ᠳᠤᠮᠳᠠᠳᠠᠭᠠᠨ ᠶᠠᠪᠤᠭᠳᠠᠵᠤ ᠪᠠᠢᠲᠠᠯᠠ᠂ ᠦᠬᠡᠷᠲᠦ ᠪᠠᠰᠠ ᠨᠢᠭᠡ ᠵᠣᠪᠠᠯᠠᠩ ᠲᠤᠯᠭᠠᠷᠠᠵᠤ᠂ 《ᠡᠵᠢ ᠨᠠᠰᠤ ᠪᠠᠷᠠᠪᠠ》 ᠭᠡᠰᠡᠨ ᠭᠤᠷᠪᠠᠨ ᠲᠣᠮᠤ ᠦᠰᠦᠭ ᠦᠬᠡᠷᠦᠨ ᠵᠢᠷᠦᠬᠡᠨ ᠳᠡᠭᠡᠷᠡ ᠨᠢᠳᠤᠷᠭᠠ ᠮᠡᠲᠦ ᠪᠠᠭᠤᠪᠠ᠃ ᠶᠠᠮᠠᠷ ᠰᠠᠢᠨ ᠡᠵᠢ ᠪᠠᠢᠵᠠᠢ ᠪᠢᠯᠡ᠃ ᠲᠦᠷᠦᠭᠦᠬᠡᠨ᠂ ᠬᠦᠦᠶᠢᠨᠢᠶᠡᠨ ᠡᠮᠦᠰᠴᠦ ᠢᠳᠡᠬᠦᠪᠡᠨ ᠠᠷᠪᠢᠯᠠᠵᠤ ᠪᠠᠢᠬᠤᠶᠢ ᠦᠵᠡᠭᠡᠳ ᠭᠠᠴᠢᠭ ᠵᠣᠪᠠᠯᠠᠩ ᠳᠤᠮᠳᠠᠭᠤᠷ ᠬᠤᠷᠢᠶᠠᠵᠤ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠵᠣᠭᠤᠰᠢᠶᠠᠨ ᠦᠬᠡᠷᠦᠨ ᠡᠪᠦᠷᠲᠦ ᠬᠦᠴᠦᠯᠡᠨ ᠴᠢᠬᠢᠵᠦ ᠵᠠᠮᠤᠨ ᠵᠠᠷᠤᠳᠠᠯ ᠪᠣᠯᠭᠠᠨ᠂ ᠰᠢᠷᠦᠨ ᠲᠤᠷᠰᠢᠯᠲᠠ ᠬᠢᠬᠦᠶᠢᠨᠢ ᠳᠡᠮᠵᠢᠵᠦ ᠪᠠᠢᠵᠠᠢ᠃
ᠦᠬᠡᠷ ᠬᠡᠷᠪᠡ ᠲᠣᠭᠤᠰ ᠰᠢᠪᠠᠭᠤ ᠪᠣᠯᠤᠭᠰᠠᠨ ᠪᠣᠯ ᠲᠦᠩᠯᠢᠶᠣᠣ ᠬᠣᠲᠠᠳᠤ ᠨᠢᠰᠴᠦ ᠣᠴᠢᠭᠠᠳ ᠡᠵᠢᠲᠡᠢᠪᠡᠨ ᠨᠢᠭᠡ ᠠᠭᠤᠯᠵᠠᠬᠤ ᠪᠠᠢᠭᠰᠠᠨᠶᠤᠮ᠃ ᠭᠡᠲᠡᠯᠡ ᠣᠳᠣ ᠶᠠᠭ 《ᠠᠰ ᠲᠤᠯᠤᠨ ᠠᠪᠤᠯᠴᠠᠵᠤ》 ᠪᠠᠢᠭᠠ ᠲᠤᠯᠠ ᠶᠠᠭᠠᠬᠢᠵᠤ ᠤᠬᠤᠷᠢᠵᠤ ᠪᠣᠯᠬᠤ ᠪᠤᠢ᠃ ᠬᠠᠲᠠᠭᠤ ᠪᠡᠷᠬᠡ ᠦᠶᠡᠳᠦ᠂ ᠭᠠᠴᠢᠭ ᠵᠣᠪᠠᠯᠠᠩ ᠳᠤᠮᠳᠠ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠦᠵᠡᠭᠡᠳᠦᠢ ᠡᠨᠡ ᠰᠠᠢᠨ ᠡᠷᠡ᠂ ᠣᠳᠣ ᠲᠡᠰᠭᠡᠯᠦᠭᠡᠢ ᠨᠢᠯᠪᠤᠰᠤ ᠪᠥᠮᠪᠦᠷᠢᠭᠦᠯᠪᠡ᠃ ᠦᠬᠡᠷ ᠣᠢ ᠭᠠᠰᠢᠭᠤᠪᠠᠨ ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨᠳᠡᠭᠡᠨ ᠳᠠᠷᠤᠭᠠᠳ ᠰᠢᠷᠦᠨ ᠲᠤᠷᠰᠢᠯᠲᠠᠪᠠᠨ ᠦᠷᠭᠦᠯᠵᠢᠯᠡᠭᠦᠯᠪᠡ᠃
ᠤᠳᠠᠭᠠᠨ ᠳᠠᠭᠠᠭᠠᠮᠠᠭᠠᠢ ᠪᠠᠢᠯᠳᠤᠵᠤ᠂ ᠣᠯᠠᠨ ᠵᠠᠭᠤᠨ ᠤᠳᠠᠭᠠ ᠲᠤᠷᠰᠢᠯᠲᠠ ᠬᠢᠵᠦ᠂ ᠬᠡᠳᠦᠨ ᠵᠠᠭᠤᠨ ᠵᠦᠢᠯᠦᠨ ᠰᠢᠷ ᠨᠠᠢᠷᠠᠭᠤᠯᠵᠤ ᠣᠷᠤᠯᠳᠤᠭᠰᠠᠨᠤ ᠡᠴᠦᠰᠲᠦ᠂ ᠭᠠᠢᠬᠠᠮᠰᠢᠭᠲᠤ ᠵᠣᠷ ᠵᠣᠬᠢᠶᠠᠵᠤ ᠶᠡᠬᠡ ᠢᠯᠴᠢᠨᠳᠦ ᠦᠯᠦ ᠰᠢᠲᠠᠬᠤ ᠣᠷᠭᠠᠨᠢᠭ ᠪᠤᠰᠤ ᠰᠢᠷᠢ ᠪᠦᠲᠦᠭᠡᠵᠡᠢ᠃
1974 ᠣᠨᠤ ᠬᠣᠶᠠᠳᠤᠭᠠᠷ ᠰᠠᠷᠠᠳᠤ᠂ ᠥᠪᠦᠷ ᠮᠣᠩᠭᠤᠯᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠺᠣᠮᠢᠰ ᠡᠨᠡ ᠰᠢᠷᠲᠦ ᠮᠡᠷᠭᠡᠵᠢᠯᠦᠨ ᠲᠠᠯᠠᠪᠠᠷ ᠬᠢᠨᠠᠯᠲᠠ ᠶᠠᠪᠤᠭᠤᠯᠤᠭᠠᠳ᠂ ᠮᠢᠩᠭᠠ ᠬᠣᠶᠠᠷ ᠵᠠᠭᠤ ᠭᠷᠡᠳ᠋ᠦ᠋ᠰᠦᠨ ᠭᠠᠰᠤᠨ ᠭᠠᠯᠢᠶᠠᠷ ᠬᠣᠷᠢᠨ ᠮᠢᠨ᠋ᠦ᠋ᠲ ᠰᠢᠭᠤᠳ ᠴᠣᠷᠭᠢᠬᠤᠶᠢ ᠳᠠᠭᠠᠭᠠᠨᠠ ᠭᠡᠳᠡᠭᠢ ᠭᠡᠷᠡᠴᠢᠯᠡᠪᠡ᠃ ᠬᠢᠨᠠᠯᠲᠠᠶᠢᠨ ᠬᠤᠷᠠᠯ ᠳᠡᠭᠡᠷᠡ ᠦᠬᠡᠷ ᠲᠤᠰᠭᠠᠢ ᠮᠡᠷᠭᠡᠵᠢᠯᠦᠨ ᠶᠠᠷᠢᠶᠠ ᠲᠠᠯᠪᠢᠵᠤ᠂ ᠡᠷᠳᠡᠮ ᠰᠢᠨᠵᠢᠯᠡᠭᠡᠨᠦ ᠰᠢᠭᠦᠯᠲᠡ ᠬᠢᠵᠡᠢ᠃ ᠮᠡᠷᠭᠡᠵᠢᠯᠦᠨ ᠬᠢᠨᠠᠯᠲᠠ ᠬᠢᠬᠦᠳᠦ ᠢᠷᠡᠵᠦ ᠣᠷᠤᠯᠴᠠᠭᠰᠠᠨ ᠳᠤᠮᠳᠠᠳᠤ ᠤᠯᠤᠰᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠬᠦᠷᠢᠶᠡᠯᠡᠩᠦᠨ ᠲᠥᠯᠦᠭᠡᠯᠡᠭᠴᠢ ᠳᠣᠲᠤᠷᠠ᠂ ᠦᠬᠡᠷᠲᠡᠢ ᠬᠠᠮᠲᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠮᠡᠷᠭᠡᠵᠢᠯᠦᠨ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠰᠤᠷᠤᠯᠴᠠᠭᠰᠠᠨ ᠬᠥᠮᠦᠨ ᠬᠣᠶᠠᠷ ᠪᠠᠢᠪᠠ᠃ ᠲᠡᠳᠡ ᠦᠬᠡᠷᠦᠨ ᠭᠠᠷᠢ ᠴᠢᠩᠭᠠ ᠠᠳᠭᠤᠵᠤ: 《ᠴᠢᠮᠠᠢ ᠴᠢᠩᠭᠢᠵᠦ ᠦᠢᠯᠡ ᠲᠠᠮᠤᠪᠠᠨ ᠦᠵᠡᠭᠰᠡᠨ ᠪᠠᠢᠲᠠᠯᠠᠪᠠᠨ ᠡᠢᠮᠦ ᠭᠠᠢᠬᠠᠮᠰᠢᠭᠲᠤ ᠦᠢᠯᠡᠶᠢ ᠪᠦᠲᠦᠭᠡᠬᠦᠳᠦ ᠣᠷᠤᠯᠴᠠᠵᠤ ᠴᠢᠳᠠᠨᠠ ᠭᠡᠵᠦ ᠰᠠᠨᠠᠭᠰᠠᠨᠦᠭᠡᠢ》 ᠭᠡᠵᠦ ᠱᠠᠭᠰᠢᠨ ᠭᠠᠢᠬᠠᠯᠠ᠃
1975 ᠣᠨᠤ ᠶᠢᠰᠦᠳᠦᠭᠡᠷ ᠰᠠᠷᠠᠶᠢᠨ ᠨᠢᠭᠡ ᠡᠳᠦᠷ᠂ ᠦᠬᠡᠷ ᠴᠠᠩᠴᠦ᠋ᠨ ᠬᠣᠲᠠᠳᠤ ᠮᠡᠷᠭᠡᠵᠢᠯᠦᠨ ᠰᠢᠯᠭᠠᠯᠲᠠ ᠬᠢᠵᠦ ᠦᠵᠡᠭᠦᠯᠪᠡ᠃ ᠭᠠᠵᠠᠷ ᠰᠢᠨᠵᠢᠯᠡᠭᠡᠨᠦ ᠣᠷᠳᠤᠨᠤ ᠠᠭᠤᠳᠠᠮ ᠲᠠᠯᠠᠪᠠᠢᠳᠤ᠂ ᠮᠠᠰᠢ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠵᠤ᠂ ᠠᠮᠤᠷ ᠬᠠᠮᠠᠭᠠᠯᠠᠬᠤ ᠶᠠᠮᠤᠨ ᠪᠠ ᠭᠢᠷᠢᠨ ᠮᠤᠵᠢᠶᠢᠨ ᠨᠠᠮ ᠵᠠᠰᠠᠭᠤᠨ ᠪᠠᠢᠭᠤᠯᠭᠠ᠂ ᠮᠤᠵᠢᠶᠢᠨ ᠠᠮᠤᠷᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨᠤ ᠤᠳᠤᠷᠢᠳᠤᠭᠴᠢᠳ ᠪᠦᠷ ᠢᠷᠡᠵᠡᠢ᠃
ᠣᠯᠠᠨᠤ ᠨᠢᠳᠦ ᠨᠢᠭᠡ ᠮᠠᠰᠢᠨ ᠲᠡᠷᠭᠡᠨᠦ ᠠᠷᠤᠳᠠᠬᠢ ᠴᠢᠷᠭᠡᠦᠯ ᠲᠡᠷᠭᠡᠨ ᠳᠡᠭᠡᠷᠡ ᠲᠥᠪᠯᠡᠷᠡᠪᠡ᠃ ᠴᠢᠷᠭᠡᠦᠯ ᠲᠡᠷᠭᠡᠨ ᠳᠡᠭᠡᠷᠡ ᠵᠢᠷᠭᠤᠭᠠᠨ ᠮᠣᠳᠤᠨ ᠠᠪᠳᠠᠷᠠ ᠪᠠ ᠴᠠᠭᠠᠰᠤᠨ ᠬᠠᠢᠷᠴᠠᠭ ᠲᠠᠯᠪᠢᠵᠠᠢ᠃ ᠲᠠᠢᠯᠪᠤᠷᠢᠯᠠᠭᠴᠢᠠᠴᠠ: ᠮᠣᠳᠤᠨ ᠠᠪᠳᠠᠷᠠ ᠳᠣᠲᠤᠷᠠ ᠣᠶᠤᠳᠠᠯᠤᠨ ᠮᠠᠰᠢᠨ᠂ ᠬᠤᠪᠴᠠᠰᠤ᠂ ᠭᠤᠲᠤᠯ ᠱᠠᠬᠠᠢ᠂ ᠪᠢᠴᠢᠭ ᠮᠠᠲᠧᠷᠢᠶᠠᠯ ᠪᠠᠢᠬᠤᠠᠴᠠ ᠭᠠᠳᠠᠨᠠ᠂ ᠪᠠᠰᠠ ᠨᠢᠭᠡ ᠠᠪᠳᠠᠷᠠ ᠭᠠᠷᠨᠠᠲᠠ᠂ ᠨᠢᠭᠡ ᠲᠦᠩᠰᠡ ᠴᠢᠯᠠᠭᠤᠨ ᠲᠣᠰᠤ ᠪᠠᠢᠨᠠ ᠭᠡᠵᠦ ᠬᠡᠯᠡᠲᠡᠯᠡ᠂ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠬᠥᠮᠦᠨ ᠳᠠᠯᠠᠢᠶᠢᠨ ᠳᠠᠪᠠᠯᠭᠠᠨ ᠮᠡᠲᠦ ᠦᠢᠮᠡᠯᠳᠦᠵᠦ᠂ ᠵᠠᠷᠢᠮᠨᠢ ᠬᠡᠯᠡᠪᠡᠨ ᠭᠠᠷᠭᠠᠨ ᠬᠣᠢᠰᠢ ᠤᠬᠤᠷᠢᠨᠠ᠃ ᠤᠳᠤᠷᠢᠳᠬᠤ ᠨᠥᠬᠦᠳ: 《ᠢᠲᠡᠭᠡᠯᠲᠡᠢᠦᠦ?》 ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠠᠰᠠᠭᠤᠯᠠ᠃
《ᠢᠲᠡᠭᠡᠯᠲᠡᠢ!》 ᠭᠡᠵᠦ ᠦᠬᠡᠷ ᠪᠠᠲᠤᠲᠠᠢ ᠬᠠᠷᠢᠭᠤ ᠥᠭᠪᠡ᠃
ᠮᠠᠰᠢᠨ ᠠᠯᠭᠤᠷᠬᠠᠨ ᠬᠦᠷᠴᠦ ᠢᠷᠡᠲᠡᠯᠡ᠂ ᠴᠢᠯᠦᠭᠡᠯᠡᠬᠦ ᠴᠡᠷᠢᠭᠦᠨ ᠨᠠᠢ᠍ᠮᠠᠨ ᠪᠠᠢᠯᠳᠤᠭᠴᠢ ᠰᠦᠷᠴᠢᠭᠦᠷᠢᠶᠡᠷ ᠴᠢᠷᠭᠡᠦᠯ ᠲᠡᠷᠭᠡᠶᠢ ᠬᠣᠶᠠᠷ ᠲᠠᠯᠠᠠᠴᠠᠨᠢ ᠬᠠᠪᠴᠢᠨ ᠭᠠᠯᠯᠠᠪᠠ᠃ ᠬᠡᠳᠦᠨ ᠠᠷᠪᠠᠨ ᠭᠠᠯ ᠯᠣᠣ ᠴᠢᠷᠭᠡᠦᠯ ᠲᠡᠷᠭᠡᠶᠢ ᠨᠥᠮᠦᠷᠦᠨ ᠠᠪᠴᠤ᠂ ᠲᠡᠯᠡᠨ ᠺᠢᠯᠤᠮᠧᠲᠷ ᠬᠠᠲᠠᠭᠤ ᠲᠣᠰᠤᠨᠤ ᠶᠡᠬᠡ ᠭᠠᠯ ᠲᠡᠭᠷᠢ ᠲᠤᠯᠲᠠᠯᠠ ᠳᠤᠸᠠᠯᠠᠪᠠ᠃ ᠴᠢᠷᠭᠡᠦᠯ ᠲᠡᠷᠭᠡ ᠶᠡᠬᠡ ᠭᠠᠯ ᠤᠲᠤᠭᠠᠨ ᠳᠤᠮᠳᠠ ᠦᠵᠡᠭᠳᠡᠬᠦᠦᠭᠡᠢ ᠪᠣᠯᠵᠠᠢ᠃ ᠶᠡᠬᠡ ᠭᠠᠯ ᠬᠣᠷᠢᠨ ᠮᠢᠨ᠋ᠦ᠋ᠲ ᠦᠷᠭᠦᠯᠵᠢᠯᠡᠨ ᠠᠭᠠᠵᠢᠮᠢᠶᠠᠷ ᠤᠨᠲᠠᠷᠠᠵᠤ᠂ ᠴᠢᠷᠭᠡᠦᠯ ᠲᠡᠷᠭᠡ ᠢᠯᠡ ᠭᠠᠷᠴᠤ ᠢᠷᠡᠬᠦᠳᠦ᠂ ᠲᠡᠷᠭᠡ ᠪᠠ ᠠᠪᠳᠠᠷᠠ ᠬᠠᠢᠷᠴᠠᠭᠤᠳ ᠬᠡᠪᠢᠶᠡᠷᠢᠶᠡᠨ ᠪᠠᠢᠯᠠ᠃ ᠲᠠᠢᠯᠪᠤᠷᠢᠯᠠᠭᠴᠢ ᠠᠪᠳᠠᠷᠠᠶᠢ ᠰᠡᠬᠦᠬᠦᠳᠦ ᠣᠶᠤᠳᠠᠯᠤᠨ ᠮᠠᠰᠢᠨᠠ ᠭᠢᠯᠠᠯᠵᠠᠵᠤ᠂ ᠳᠡᠪᠡᠯ ᠬᠤᠪᠴᠠᠰᠤ᠂ ᠭᠤᠲᠤᠯ ᠱᠠᠬᠠᠢ᠂ ᠪᠢᠴᠢᠭ ᠮᠠᠲᠧᠷᠢᠶᠠᠯ ᠮᠥᠨ ᠬᠡᠪᠢᠶᠡᠷᠢᠶᠡᠨ ᠪᠠᠢᠵᠤ᠂ ᠭᠠᠷᠨᠠᠲᠠ ᠪᠣᠯᠤᠨ ᠴᠢᠯᠠᠭᠤᠨ ᠲᠣᠰᠤᠨᠤ ᠲᠦᠩᠰᠡᠨᠢ ᠶᠠᠭᠠᠬᠢᠭᠰᠠᠨᠴᠤᠦᠭᠡᠢ ᠪᠠᠢᠯᠠ᠃