ᠮᠣᠩᠭᠣᠯ ᠪᠢᠴᠢᠭ ᠬᠢᠲᠠᠳ
ᠠᠩᠭᠯᠢ
ᠶᠠᠫᠣᠨ
ᠪᠤᠴᠠᠬᠤ

ᠡᠮ

ᠯᠦ ᠰᠢᠶᠦ᠋ᠨ

ᠨᠢᠭᠡ

ᠨᠠᠮᠤᠷ᠎ᠤᠨ ᠨᠢᠭᠡᠨ ᠰᠥᠨᠢ ᠪᠢᠯᠡ᠃ ᠰᠥᠨᠢ ᠳᠦᠯᠢ ᠥᠩᠭᠡᠷᠡᠵᠦ᠂ ᠰᠠᠷᠠ ᠰᠢᠩᠭᠡᠭᠡᠳ ᠨᠠᠷᠠᠨ ᠪᠠᠰᠠ ᠭᠠᠷᠤᠭᠠᠳᠤᠢ ᠲᠤᠯᠠ ᠪᠠᠷᠠᠭᠠᠨ ᠬᠥᠬᠡ ᠣᠭᠲᠠᠷᠭᠤᠢ ᠭᠠᠵᠠᠷ ᠳᠡᠯᠡᠬᠡᠢ᠎ᠶᠢ ᠪᠦᠷᠬᠦᠵᠦ᠂ ᠰᠥᠨᠢ ᠲᠣᠭᠤᠷᠢᠳᠠᠭ ᠠᠮᠢᠲᠠᠳ᠎ᠠᠴᠠ ᠪᠤᠰᠤᠳ᠎ᠨᠢ ᠴᠥᠮ ᠤᠨᠲᠠᠵᠤ ᠪᠠᠢᠯ᠎ᠠ᠃ ᠬᠤᠸᠠ ᠯᠣᠣ ᠱᠤᠸᠠᠨ᠂ ᠭᠡᠨᠡᠳᠲᠡ ᠥᠨᠳᠡᠢᠵᠦ ᠴᠦᠢᠳᠡᠩ ᠵᠤᠷᠠᠵᠤ᠂ ᠲᠣᠰᠤ ᠵᠤᠩᠭᠠᠭ᠎ᠢᠶᠠᠷ ᠪᠢᠯᠳᠠᠭᠳᠠᠭᠰᠠᠨ ᠳ᠋ᠧᠩ᠎ᠢᠶᠡᠨ ᠠᠰᠠᠭᠠᠮᠠᠭᠴᠠ ᠴᠠᠢ᠎ᠶᠢᠨ ᠮᠤᠬᠤᠯᠠᠭ᠎ᠤᠨ ᠬᠣᠶᠠᠷ ᠲᠠᠰᠤᠯᠭ᠎ᠠ ᠭᠡᠷ᠎ᠲᠦ ᠪᠤᠳᠤᠩᠭᠤᠢ ᠴᠠᠭᠠᠨ ᠭᠡᠷᠡᠯ ᠰᠦᠮᠡᠯᠵᠡᠪᠡ᠃

《ᠰᠢᠶᠣᠣ ᠱᠤᠸᠠᠨ᠎ᠤ ᠠᠪᠤ᠎ᠨᠢ ᠶᠠᠪᠤᠬᠤ ᠭᠡᠵᠦ ᠪᠠᠢᠬᠤ᠎ᠶᠤᠮ᠎ᠤᠤ?》 ᠭᠡᠬᠦ ᠬᠥᠭᠰᠢᠨ ᠪᠦᠰᠡᠭᠦᠢ᠎ᠶᠢᠨ ᠳᠠᠭᠤᠨ ᠰᠣᠨᠤᠰᠳᠠᠯ᠎ᠠ᠃ ᠳᠣᠲᠤᠷ᠎ᠠ ᠲᠠᠰᠤᠯᠭ᠎ᠠ᠎ᠠᠴᠠ᠎ᠨᠢ ᠪᠠᠰᠠ ᠬᠠᠨᠢᠶᠠᠯᠭᠠᠬᠤ ᠳᠠᠭᠤ ᠭᠠᠷᠤᠨ᠎ᠠ᠃

ᠯᠣᠣ ᠱᠤᠸᠠᠨ : 《ᠠ!》 ᠭᠡᠵᠦ ᠬᠠᠷᠢᠭᠤᠯᠬᠤ᠎ᠶᠢᠨ ᠵᠡᠷᠭᠡᠴᠡᠭᠡ᠎ᠪᠡᠷ ᠳᠡᠪᠡᠯ᠎ᠢᠶᠡᠨ ᠲᠣᠪᠴᠢᠯᠠᠵᠤ᠂ 《ᠠᠯᠢ》 ᠭᠡᠵᠦ ᠭᠠᠷ᠎ᠢᠶᠠᠨ ᠰᠠᠷᠪᠠᠢᠪᠠ᠃

ᠬᠤᠸᠠ ᠳ᠋ᠠ ᠮᠠ ᠡᠵᠢ ᠳᠡᠷ᠎ᠡ ᠳᠣᠭᠤᠤᠷ᠎ᠢᠶᠠᠨ ᠰᠤᠢᠯᠠᠵᠤ ᠲᠡᠮᠲᠡᠷᠢᠭᠡᠳ ᠨᠢᠭᠡ ᠪᠣᠭᠤᠳᠠᠯ᠎ᠲᠠᠢ ᠮᠥᠩᠭᠦ ᠠᠪᠴᠤ ᠯᠣᠣ ᠱᠤᠸᠠᠨ᠎ᠳᠤ ᠥᠭᠭᠦᠨ᠎ᠡ᠃ ᠯᠣᠣ ᠱᠤᠸᠠᠨ ᠰᠠᠯᠭᠠᠨᠠᠨ ᠴᠡᠴᠡᠷᠡᠭᠰᠡᠨ ᠭᠠᠷ᠎ᠢᠶᠠᠷ ᠲᠣᠰᠤᠨ ᠠᠪᠴᠤ ᠡᠪᠦᠷᠯᠡᠭᠡᠳ ᠭᠠᠳᠠᠨ᠎ᠠ᠎ᠠᠴᠠ᠎ᠨᠢ ᠪᠠᠰᠠ ᠬᠡᠳᠦ ᠳᠠᠷᠤᠯᠬᠢᠯᠠᠵᠤ ᠳ᠋ᠧᠩᠯᠦ ᠠᠰᠠᠭᠠᠵᠤ ᠳ᠋ᠧᠩ᠎ᠢᠶᠡᠨ ᠦᠯᠢᠶᠡᠭᠡᠳ ᠳᠣᠲᠤᠷ᠎ᠠ ᠲᠠᠰᠤᠯᠭᠠᠨ᠎ᠳᠤ ᠣᠷᠤᠪᠠ᠃ ᠲᠡᠷᠡ ᠲᠠᠰᠤᠯᠭᠠᠨ᠎ᠳᠤ ᠱᠤᠤᠬᠢᠲᠤᠨᠠᠨ ᠱᠠᠭᠠᠬᠢᠲᠤᠨᠠᠵᠤ ᠪᠠᠢᠭᠰᠠᠨ ᠴᠢᠮᠡᠭᠡ᠂ ᠤᠳᠠᠯ᠎ᠦᠭᠡᠢ ᠬᠠᠨᠢᠶᠠᠳᠤ ᠪᠣᠯᠤᠯ᠎ᠠ᠃ ᠯᠣᠣ ᠱᠤᠸᠠᠨ ᠲᠡᠭᠦᠨ᠎ᠦ ᠨᠠᠮᠳᠠᠬᠤ᠎ᠶᠢ ᠬᠦᠯᠢᠶᠡᠨ ᠪᠠᠢᠵᠤ ᠳᠣᠣᠷ᠎ᠠ ᠳᠠᠭᠤᠨ᠎ᠢᠶᠠᠷ 《 ᠰᠢᠶᠣᠣ ᠱᠤᠸᠠᠨ ᠁ ᠴᠢ ᠪᠣᠰᠬᠤ ᠬᠡᠷᠡᠭ᠎ᠦᠭᠡᠢ᠃ ᠁ ᠮᠤᠬᠤᠯᠠᠭ᠎ᠤᠨ ᠶᠠᠪᠤᠳᠠᠯ᠎ᠢ ᠮᠥᠮᠦ᠎ᠴᠢᠨᠢ ᠡᠪᠯᠡᠭᠦᠯᠬᠦ᠎ᠶᠦᠮ》 ᠭᠡᠪᠡ᠃

ᠬᠦᠦ᠎ᠨᠢ ᠦᠭᠡ ᠳᠤᠤᠭᠠᠷᠤᠯ᠎ᠦᠭᠡᠢ ᠰᠠᠢᠬᠠᠨ ᠤᠨᠲᠠᠭᠰᠠᠨ ᠬᠣᠢᠨ᠎ᠠ ᠯᠣᠣ ᠱᠤᠸᠠᠨ ᠬᠦᠷᠢᠶᠡᠨ᠎ᠦ ᠡᠭᠦᠳᠡ᠎ᠪᠡᠷ ᠭᠤᠳᠤᠮᠵᠢᠨ᠎ᠳᠤ ᠭᠠᠷᠤᠯ᠎ᠠ᠃ ᠭᠤᠳᠤᠮᠵᠢᠨ᠎ᠳᠤ ᠵᠠᠮ ᠴᠠᠢᠷᠠᠨ ᠮᠡᠳᠡᠭᠳᠡᠬᠦ᠎ᠡᠴᠡ ᠥᠭᠡᠷ᠎ᠡ ᠶᠠᠭᠤ᠎ᠴᠤ᠎ᠦᠭᠡᠢ᠂ ᠫᠠᠳ ᠬᠠᠷᠠᠩᠭᠤᠢ ᠪᠠᠢᠪᠠ᠃ ᠳ᠋ᠧᠩᠯᠦ᠎ᠶᠢᠨ ᠭᠡᠷᠡᠯ᠎ᠳᠦ ᠡᠭᠡᠯᠵᠢᠯᠡᠨ ᠠᠯᠬᠤᠬᠤ ᠬᠣᠶᠠᠷ ᠬᠥᠯ᠎ᠨᠢ ᠦᠵᠡᠭᠳᠡᠵᠦ ᠪᠠᠢᠯ᠎ᠠ᠃ ᠨᠣᠬᠠᠢ ᠬᠠᠶᠠ ᠲᠠᠭᠠᠷᠢᠯᠳᠤᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠬᠤᠴᠠᠭᠰᠠᠨ᠎ᠦᠭᠡᠢ᠃ ᠣᠷᠤᠢ᠎ᠶᠢᠨ ᠵᠢᠪᠠᠷ ᠨᠡᠯᠢᠶᠡᠳ ᠬᠦᠢᠲᠡᠨ ᠪᠣᠯᠪᠠᠴᠤ ᠯᠣᠣ ᠱᠤᠸᠠᠨ᠎ᠤ ᠳᠣᠲᠤᠷ᠎ᠠ ᠶᠡᠬᠡ ᠣᠩᠭᠤᠢᠵᠤ᠂ ᠭᠡᠨᠡᠳᠲᠡ ᠵᠠᠯᠠᠭᠤᠵᠢᠭᠠᠳ ᠬᠥᠮᠦᠨ᠎ᠦ ᠠᠮᠢ᠎ᠶᠢ ᠠᠪᠤᠷᠠᠬᠤ ᠷᠢᠳᠢ ᠰᠢᠳᠢ ᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ᠂ ᠬᠥᠯ᠎ᠨᠢ ᠶᠡᠬᠡ ᠬᠥᠩᠭᠡᠷᠡᠭᠰᠡᠨ᠎ᠢᠶᠡᠷ ᠪᠠᠷᠠᠬᠤ᠎ᠦᠭᠡᠢ ᠵᠠᠮ᠎ᠴᠤ ᠤᠯᠠᠮ᠎ᠢᠶᠠᠷ ᠲᠣᠳᠤᠷᠠᠵᠤ᠂ ᠲᠡᠭᠷᠢ᠎ᠴᠦ ᠤᠯᠠᠮ ᠭᠡᠭᠡᠷᠡᠯ᠎ᠡ᠃

ᠯᠣᠣ ᠱᠤᠸᠠᠨ ᠢᠩᠭᠢᠵᠦ ᠠᠵᠢᠭ᠎ᠦᠭᠡᠢ ᠶᠠᠪᠤᠭᠰᠠᠭᠠᠷ ᠭᠡᠨᠡᠳᠲᠡ ᠡᠮᠦᠨ᠎ᠡ᠎ᠨᠢ ᠨᠡᠯᠢᠶᠡᠳ ᠬᠣᠯᠠ ᠭᠠᠵᠠᠷ ᠨᠢᠭᠡ ᠴᠢᠭᠳᠠᠨ ᠭᠤᠳᠤᠮᠵᠢ ᠲᠣᠪ ᠲᠣᠳᠤᠷᠬᠠᠢ ᠬᠥᠨᠳᠡᠯᠢᠳᠦᠨ ᠪᠠᠢᠬᠤ᠎ᠶᠢ ᠬᠠᠷᠠᠭᠠᠳ ᠶᠡᠬᠡ ᠰᠣᠴᠢᠪᠠ᠃ ᠢᠩᠭᠢᠭᠡᠳ ᠲᠡᠷᠡ ᠬᠡᠳᠦᠨ ᠠᠯᠬᠤᠮ ᠤᠬᠤᠷᠢᠵᠤ ᠬᠠᠭᠠᠯᠭ᠎ᠠ᠎ᠨᠢ ᠲᠦᠭᠵᠢᠭᠡᠲᠡᠢ ᠨᠢᠭᠡ ᠫᠦᠰᠡᠨ᠎ᠦ ᠰᠠᠷᠠᠪᠴᠢᠨ ᠳᠣᠣᠷ᠎ᠠ ᠰᠢᠷᠭᠤᠵᠤ ᠣᠷᠤᠭᠠᠳ ᠬᠠᠭᠠᠯᠭ᠎ᠠ᠎ᠶᠢ ᠲᠦᠰᠢᠨ ᠵᠣᠭᠰᠤᠪᠠ᠃ ᠨᠡᠯᠢᠶᠡᠳ ᠤᠳᠠᠲᠠᠯ᠎ᠠ ᠵᠣᠭᠰᠤᠭᠠᠳ᠂ ᠪᠡᠶ᠎ᠡ᠎ᠨᠢ ᠵᠢᠩᠭᠢᠨᠡᠬᠦ᠎ᠰᠢᠭ ᠰᠠᠨᠠᠭᠳᠠᠯ᠎ᠠ᠃

《ᠮᠠᠭᠤ ᠵᠥᠨᠦᠭ!》

《ᠬᠠᠷᠢᠨ ᠬᠡᠴᠡᠭᠦᠦ ᠪᠠᠶᠠᠷᠲᠠᠢ ᠪᠠᠢᠬᠤ᠎ᠨᠢ ᠡ ᠁》 ᠭᠡᠬᠦ ᠳᠠᠭᠤᠨ ᠰᠣᠨᠤᠰᠳᠠᠯ᠎ᠠ᠃

ᠯᠣᠣ ᠱᠤᠸᠠᠨ ᠪᠠᠰᠠ ᠶᠡᠬᠡ ᠰᠣᠴᠢᠨ ᠬᠠᠷᠠᠵᠤ ᠦᠵᠡᠬᠦᠯ᠎ᠡ ᠡᠮᠦᠨᠡᠭᠦᠷ᠎ᠨᠢ ᠬᠡᠳᠦᠨ ᠬᠥᠮᠦᠨ ᠭᠠᠷᠪᠠ᠃ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠨᠢᠭᠡᠨ᠎ᠦ ᠬᠢᠨᠢ ᠴᠢᠷᠠᠢ ᠳᠡᠮᠡᠢ ᠲᠣᠳᠤ ᠦᠵᠡᠭᠳᠡᠭᠰᠡᠨ᠎ᠦᠭᠡᠢ ᠪᠣᠯᠪᠠᠴᠤ ᠨᠢᠳᠦᠨ᠎ᠳᠦᠨᠢ ᠥᠭᠶᠦᠭᠡ ᠣᠯᠵᠤ ᠦᠵᠡᠭᠰᠡᠨ ᠥᠯᠦᠨ ᠠᠮᠢᠲᠠᠨ ᠮᠡᠲᠦ ᠬᠣᠪᠳᠤᠭ ᠰᠢᠨᠤᠬᠠᠢ ᠭᠡᠷᠡᠯ ᠭᠢᠯᠠᠯᠵᠠᠨ᠎ᠠ᠃ ᠯᠣᠣ ᠱᠤᠸᠠᠨ᠎ᠤ ᠳ᠋ᠧᠩᠯᠦ ᠨᠢᠭᠡᠨᠲᠡ ᠤᠨᠲᠠᠷᠠᠵᠠᠢ᠃ ᠡᠪᠦᠷ᠎ᠢᠶᠡᠨ ᠳᠠᠷᠤᠵᠤ ᠦᠵᠡᠬᠦ᠎ᠳᠦ ᠬᠡᠪ᠎ᠢᠶᠡᠷ ᠬᠠᠪ ᠬᠠᠲᠠᠭᠤ ᠪᠣᠮᠪᠠᠢᠵᠤ ᠪᠠᠢᠨ᠎ᠠ᠃ ᠬᠣᠶᠠᠷ ᠲᠡᠰᠢ ᠠᠵᠢᠭᠯᠠᠪᠠᠯ ᠨᠡᠯᠢᠶᠡᠳ ᠣᠯᠠᠨ ᠬᠠᠴᠢᠨ ᠵᠢᠭᠲᠡᠢ ᠬᠥᠮᠦᠰ ᠬᠣᠶᠠᠷ ᠭᠤᠷᠪᠠ᠎ᠪᠠᠷ᠎ᠢᠶᠠᠨ ᠲᠡᠷᠡ ᠬᠠᠪᠢ᠎ᠪᠠᠷ ᠴᠢᠳᠭᠦᠷ ᠮᠡᠲᠦ ᠲᠥᠪᠦᠭᠡᠨᠡᠵᠦ ᠪᠠᠢᠨ᠎ᠠ᠃ ᠯᠠᠪᠯᠠᠨ ᠠᠵᠢᠭᠯᠠᠬᠤ᠎ᠳᠤ ᠪᠠᠰᠠ ᠳᠡᠮᠡᠢ ᠶᠡᠬᠡ ᠰᠣᠨᠢᠨ ᠶᠠᠭᠤᠮ᠎ᠠ ᠭᠡᠵᠦ ᠦᠵᠡᠭᠳᠡᠬᠦ᠎ᠦᠭᠡᠢ᠃

ᠤᠳᠠᠯ᠎ᠦᠭᠡᠢ᠂ ᠪᠠᠰᠠ ᠬᠡᠳᠦᠨ ᠴᠡᠷᠢᠭ ᠠᠯᠬᠤᠵᠤ ᠪᠠᠢᠬᠤ ᠦᠵᠡᠭᠳᠡᠪᠡ᠃ ᠬᠠᠨᠵᠢᠶᠠᠷ᠎ᠤᠨ ᠬᠢᠨᠢ ᠠᠷᠤ ᠥᠪᠦᠷ᠎ᠲᠡᠬᠢ ᠲᠥᠭᠦᠷᠢᠭ ᠴᠠᠭᠠᠨ ᠲᠣᠯᠪᠤ ᠬᠣᠯᠠ᠎ᠠᠴᠠ ᠲᠣᠪ ᠲᠣᠳᠤᠷᠬᠠᠢ ᠦᠵᠡᠭᠳᠡᠯ᠎ᠡ᠃ ᠲᠦᠷᠦᠭᠦᠨ᠎ᠳᠦᠨᠢ ᠶᠠᠪᠤᠭ᠎ᠠ᠎ᠶᠢᠨ ᠬᠢᠨᠢ ᠬᠠᠨᠵᠢᠶᠠᠷ᠎ᠤᠨ ᠬᠦᠷᠡᠩ ᠤᠯᠠᠭᠠᠨ ᠡᠮᠵᠢᠶᠡᠷᠢ᠎ᠨᠢ ᠬᠦᠷᠲᠡᠯ᠎ᠡ ᠬᠠᠷᠠᠭᠳᠠᠵᠤ ᠪᠠᠢᠯ᠎ᠠ᠃ ᠬᠥᠯ᠎ᠦᠨ ᠴᠢᠮᠡᠭᠡ ᠨᠢᠭᠡ ᠵᠡᠷᠭᠡ ᠰᠣᠨᠤᠰᠳᠠᠭᠠᠳ᠂ ᠨᠢᠭᠡ ᠪᠥᠭᠡᠮ ᠬᠥᠮᠦᠰ ᠨᠢᠳᠦ ᠴᠠᠪᠴᠢᠬᠤ᠎ᠶᠢᠨ ᠵᠠᠭᠤᠷ᠎ᠠ ᠥᠩᠭᠡᠷᠡᠨ ᠭᠠᠷᠤᠯ᠎ᠠ᠃ ᠥᠨᠥ ᠬᠣᠶᠠᠷ ᠭᠤᠷᠪᠠ᠎ᠪᠠᠷ ᠶᠠᠪᠤᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠭᠡᠨᠡᠳᠲᠡ ᠪᠥᠭᠡᠮᠨᠡᠷᠡᠨ ᠬᠤᠷᠠᠵᠤ᠂ ᠮᠥᠷᠡᠨ᠎ᠦ ᠳᠣᠯᠭᠢᠶᠠᠨ ᠮᠡᠲᠦ ᠤᠷᠤᠭᠰᠢᠯᠠᠭᠰᠠᠭᠠᠷ ᠴᠢᠭᠳᠠᠨ ᠭᠤᠳᠤᠮᠵᠢ᠎ᠶᠢᠨ ᠠᠮᠠᠰᠠᠷ᠎ᠲᠤ ᠬᠦᠷᠦᠮᠡᠭᠴᠡ ᠵᠣᠭᠰᠤᠵᠤ᠂ ᠲᠠᠯ᠎ᠠ ᠲᠣᠭᠤᠷᠢᠭ ᠪᠣᠯᠤᠨ ᠵᠢᠭᠰᠠᠪᠠ᠃

ᠯᠣᠣ ᠱᠤᠸᠠᠨ᠎ᠳᠤ ᠲᠡᠳᠡᠨ᠎ᠦ ᠠᠷᠤ᠎ᠯᠠ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠬᠦᠵᠦᠭᠦᠦ᠎ᠨᠢ ᠶᠠᠭ ᠦᠯᠦ ᠦᠵᠡᠭᠳᠡᠬᠦ ᠭᠠᠷ᠎ᠢᠶᠠᠷ ᠪᠠᠵᠠᠭᠤᠯᠤᠭᠰᠠᠨ ᠣᠯᠠᠨ ᠨᠤᠭᠤᠰᠤ ᠮᠡᠲᠦ ᠳᠡᠭᠡᠭᠰᠢ ᠰᠤᠨᠤᠭᠰᠠᠨ ᠪᠠᠢᠪᠠ᠃ ᠲᠦᠷ ᠨᠠᠮ ᠪᠠᠢᠵᠤ ᠠᠪᠤᠭᠠᠳ ᠪᠠᠬᠠᠨ ᠴᠢᠮᠡᠭᠡ ᠭᠠᠷᠴᠤ ᠬᠥᠳᠡᠯᠵᠡᠭᠡᠨ ᠭᠡᠨᠡᠳᠲᠡ 《ᠲᠦᠩ!》 ᠭᠡᠵᠦ ᠴᠢᠮᠡᠭᠡ ᠭᠠᠷᠤᠮᠠᠭᠴᠠ ᠪᠦᠷ ᠬᠣᠢᠰᠢ ᠤᠬᠤᠷᠢᠵᠠᠭᠠᠵᠤ᠂ ᠯᠣᠣ ᠱᠤᠸᠠᠨ᠎ᠤ ᠵᠣᠭᠰᠤᠵᠤ ᠪᠠᠢᠭ᠎ᠠ ᠣᠷᠤᠨ᠎ᠳᠤ ᠰᠢᠬᠠᠯᠴᠠᠨ ᠣᠷᠤᠵᠤ ᠢᠷᠡᠭᠡᠳ ᠪᠠᠷᠤᠭ ᠲᠡᠭᠦᠨ᠎ᠢ ᠲᠦᠯᠬᠢᠵᠦ ᠣᠢᠴᠢᠭᠤᠯᠬᠤ᠎ᠳᠤ ᠬᠦᠷᠦᠯ᠎ᠡ᠃

《ᠬᠦᠢ! ᠮᠥᠩᠭᠦ᠎ᠪᠡᠨ ᠠᠪᠴᠢᠷᠠ᠂ ᠪᠠᠷᠠᠭᠤᠨ ᠵᠡᠭᠦᠨ ᠭᠠᠷ᠎ᠢᠶᠠᠷ ᠰᠣᠯᠢᠨ᠎ᠠ!》 ᠭᠡᠵᠦ ᠨᠢᠭᠡ ᠬᠠᠪ ᠬᠠᠷ᠎ᠠ ᠬᠥᠮᠦᠨ ᠯᠣᠣ ᠱᠤᠸᠠᠨ᠎ᠤ ᠡᠮᠦᠨ᠎ᠡ ᠵᠣᠭᠰᠤᠵᠤ ᠬᠤᠷᠴᠠ ᠮᠡᠰᠡ ᠮᠡᠲᠦ ᠭᠢᠯᠠᠯᠵᠠᠭᠰᠠᠨ ᠨᠢᠳᠦ᠎ᠪᠡᠷ ᠬᠠᠷᠠᠬᠤ᠎ᠳᠤ ᠯᠣᠣ ᠱᠤᠸᠠᠨ ᠥᠪᠡᠷ᠎ᠦᠨ ᠡᠷᠬᠡ᠎ᠦᠭᠡᠢ ᠰᠦᠷᠳᠡᠭᠳᠡᠨ ᠳᠣᠲᠤᠷ᠎ᠠ᠎ᠨᠢ ᠰᠢᠷ ᠬᠢᠵᠦ ᠠᠪᠤᠭᠠᠳ ᠲᠡᠭᠦᠨ ᠤᠷᠤᠭᠤ ᠣᠴᠢᠪᠠ᠃ ᠲᠡᠷᠡ ᠬᠥᠮᠦᠨ ᠨᠢᠭᠡ ᠭᠠᠷ᠎ᠢᠶᠠᠨ ᠲᠡᠭᠦᠨ᠎ᠦ ᠵᠦᠭ ᠰᠠᠷᠪᠠᠢᠵᠤ᠂ ᠨᠢᠭᠡ ᠭᠠᠷ᠎ᠲᠠᠭᠠᠨ ᠤᠯᠠᠭᠠᠨ ᠳᠤᠰᠤᠯᠠᠭᠰᠠᠨ ᠴᠢᠰ ᠤᠯᠠᠭᠠᠨ ᠮᠠᠨᠲᠠᠤ ᠠᠳᠭᠤᠵᠠᠢ᠃

ᠯᠣᠣ ᠱᠤᠸᠠᠨ᠂ ᠰᠡᠩᠳᠡ ᠮᠡᠩᠳᠡ ᠮᠥᠩᠭᠦ᠎ᠪᠡᠨ ᠭᠠᠷᠭᠠᠵᠤ᠂ ᠰᠠᠯᠭᠠᠨᠠᠨ ᠴᠡᠴᠡᠷᠡᠭᠰᠡᠭᠡᠷ ᠲᠡᠭᠦᠨ᠎ᠳᠦ ᠥᠭᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ᠎ᠦ ᠶᠠᠭᠤᠮ᠎ᠠ᠎ᠶᠢ ᠲᠤᠰᠴᠤ ᠠᠪᠬᠤ ᠵᠣᠷᠢᠭ ᠬᠦᠷᠦᠭᠰᠡᠨ᠎ᠦᠭᠡᠢ᠃ ᠡᠭᠦᠨ᠎ᠳᠦ ᠲᠡᠷᠡ ᠬᠥᠮᠦᠨ ᠶᠡᠬᠡ ᠤᠴᠠᠭᠠᠷᠯᠠᠵᠤ: 《ᠶᠠᠭᠤᠨ᠎ᠠᠴᠠ᠎ᠨᠢ ᠠᠶᠤᠭᠰᠠᠨ᠎ᠶᠤᠮ ᠪᠤᠢ? ᠶᠠᠭᠤᠨ᠎ᠳᠤ ᠠᠪᠬᠤ᠎ᠦᠭᠡᠢ ᠪᠤᠢ?》 ᠭᠡᠵᠦ ᠪᠠᠷᠬᠢᠷᠠᠯ᠎ᠠ᠃ ᠯᠣᠣ ᠱᠤᠸᠠᠨ ᠮᠥᠨ᠎ᠬᠦ ᠲᠠᠲᠠᠭᠠᠯᠵᠠᠵᠤ ᠪᠠᠢᠲᠠᠯ᠎ᠠ᠂ ᠬᠠᠷ᠎ᠠ ᠬᠥᠮᠦᠨ ᠬᠡᠳᠦᠢᠨ ᠳ᠋ᠧᠩᠯᠦ᠎ᠶᠢ᠎ᠨᠢ ᠪᠤᠯᠢᠶᠠᠨ ᠠᠪᠤᠭᠠᠳ ᠪᠦᠷᠬᠦᠭᠦᠯ᠎ᠦᠨ ᠴᠠᠭᠠᠰᠤ᠎ᠶᠢ ᠤᠷᠠᠵᠤ ᠮᠠᠨᠲᠠᠤ᠎ᠪᠠᠨ ᠪᠣᠭᠤᠵᠤ ᠯᠣᠣ ᠱᠤᠸᠠᠨ᠎ᠳᠤ ᠥᠭᠭᠦᠭᠡᠳ᠂ ᠮᠥᠩᠭᠦ᠎ᠶᠢ᠎ᠨᠢ ᠠᠪᠴᠤ ᠪᠠᠷᠢᠯᠬᠢᠯᠠᠨ ᠦᠵᠡᠭᠡᠳ ᠴᠢᠨᠠᠭᠰᠢ ᠡᠷᠭᠢᠵᠦ 《ᠡᠨᠡ ᠦᠬᠦᠭᠰᠡᠨ ᠵᠥᠨᠦᠭ ᠁》 ᠭᠡᠵᠦ ᠳᠦᠳᠦᠨᠡᠭᠰᠡᠭᠡᠷ ᠶᠠᠪᠤᠪᠠ᠃

《ᠡᠭᠦᠪᠡᠷ ᠬᠡᠨ᠎ᠢ ᠡᠮᠨᠡᠭᠦᠯᠬᠦ᠎ᠶᠦᠮ ᠪᠤᠢ?》 ᠭᠡᠬᠦ ᠠᠰᠠᠭᠤᠯᠲᠠ᠂ ᠯᠣᠣ ᠱᠤᠸᠠᠨ᠎ᠤ ᠴᠢᠬᠢᠨ᠎ᠳᠦ ᠰᠣᠨᠤᠰᠳᠠᠬᠤ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠬᠠᠷᠢᠭᠤᠯᠲᠠ ᠣᠯᠤᠭᠰᠠᠨ᠎ᠦᠭᠡᠢ᠃ ᠠᠷᠪᠠᠨ ᠦᠶ᠎ᠡ ᠭᠠᠭᠴᠠ ᠦᠷ᠎ᠡ᠎ᠪᠡᠷ ᠰᠤᠷᠪᠤᠯᠵᠢ ᠵᠠᠯᠭᠠᠵᠤ ᠢᠷᠡᠭᠰᠡᠨ ᠤᠳᠤᠮᠲᠤ ᠠᠯᠠᠭ ᠦᠷ᠎ᠡ᠎ᠪᠡᠨ ᠲᠡᠪᠡᠷᠢᠵᠦ ᠶᠠᠪᠤᠭ᠎ᠠ ᠮᠡᠲᠦ ᠪᠦᠬᠦ ᠠᠩᠬᠠᠷᠤᠯ᠎ᠨᠢ ᠡᠨᠡ ᠪᠣᠭᠤᠳᠠᠯ ᠳᠡᠭᠡᠷ᠎ᠡ ᠲᠥᠪᠯᠡᠷᠡᠵᠦ ᠥᠭᠡᠷ᠎ᠡ ᠬᠡᠷᠡᠭ᠎ᠦᠳ᠎ᠢ ᠪᠦᠷ ᠲᠠᠭ ᠮᠠᠷᠲᠠᠵᠠᠢ᠃ ᠯᠣᠣ ᠱᠤᠸᠠᠨ ᠣᠳᠣ ᠡᠨᠡ ᠪᠣᠭᠤᠳᠠᠯ ᠳᠣᠲᠤᠷᠠᠬᠢ ᠰᠢᠨ᠎ᠡ ᠠᠮᠢ᠎ᠶᠢ ᠭᠡᠷ᠎ᠲᠡᠭᠡᠨ ᠠᠪᠠᠴᠢᠵᠤ ᠴᠠᠭᠯᠠᠰᠢ᠎ᠦᠭᠡᠢ ᠶᠡᠬᠡ ᠵᠣᠯ ᠵᠢᠷᠭᠠᠯ ᠡᠳ᠋ᠯᠡᠬᠦ ᠭᠡᠵᠦ ᠰᠠᠨᠠᠵᠤ ᠪᠠᠢᠨ᠎ᠠ᠃ ᠨᠠᠷᠠᠨ ᠮᠠᠨᠳᠤᠯ᠎ᠠ᠃ ᠲᠡᠭᠦᠨ᠎ᠦ ᠡᠮᠦᠨ᠎ᠡ᠂ ᠭᠡᠷ᠎ᠲᠦᠨᠢ ᠬᠦᠷᠲᠡᠯ᠎ᠡ ᠦᠷᠭᠦᠯᠵᠢᠯᠡᠭᠰᠡᠨ ᠳᠠᠷᠳᠠᠩ ᠴᠠᠭᠠᠨ ᠵᠠᠮ ᠳᠤᠷᠠᠢᠵᠤ ᠦᠵᠡᠭᠳᠡᠪᠡ᠃ ᠥᠨᠥ ᠴᠢᠭᠳᠠᠨ ᠭᠤᠳᠤᠮᠵᠢ᠎ᠶᠢᠨ ᠠᠰᠠᠷ᠎ᠤᠨ ᠦᠵᠢᠷᠡᠭᠰᠡᠨ ᠫᠠᠢᠰᠠ ᠳᠡᠭᠡᠷᠡᠬᠢ 《ᠬᠦ᠋ ᠲᠢᠩ ᠺᠧᠦ 》 ᠭᠡᠰᠡᠨ ᠵᠢᠪᠡᠷᠡᠵᠦ ᠬᠤᠪᠠᠬᠠᠢᠷᠠᠭᠰᠠᠨ ᠳᠥᠷᠪᠡᠨ ᠠᠯᠲᠠᠨ ᠦᠰᠦᠭ ᠠᠷᠤ᠎ᠳᠤᠨᠢ ᠬᠠᠷᠠᠭᠳᠠᠭᠰᠠᠭᠠᠷ ᠪᠠᠢᠪᠠ᠃

 

ᠬᠣᠶᠠᠷ

ᠯᠣᠣ ᠱᠤᠸᠠᠨ᠎ᠢ ᠬᠠᠷᠢᠵᠤ ᠢᠷᠡᠬᠦ᠎ᠳᠦᠨᠢ ᠮᠤᠬᠤᠯᠠᠭ᠎ᠤᠨ ᠲᠠᠰᠤᠯᠭ᠎ᠠ᠎ᠨᠤᠭᠤᠳ᠎ᠢ ᠬᠡᠵᠢᠶᠡᠨᠡᠢ ᠪᠦᠷ ᠭᠢᠯᠠᠢᠲᠠᠯ᠎ᠠ ᠱᠦᠭᠦᠷᠳᠡᠵᠦ ᠴᠡᠪᠡᠷᠯᠡᠭᠡᠳ ᠮᠥᠷᠯᠡᠭᠦᠯᠦᠨ ᠲᠠᠯᠪᠢᠭᠰᠠᠨ ᠴᠠᠢ᠎ᠶᠢᠨ ᠰᠢᠷᠡᠭᠡ᠎ᠨᠤᠭᠦᠳ᠎ᠢ ᠭᠥᠯᠲᠡᠭᠡᠨᠡᠳᠡᠯ᠎ᠡ ᠵᠦᠯᠭᠦᠭᠰᠡᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠵᠣᠴᠢᠨ ᠭᠡᠵᠦ ᠨᠢᠭᠡ᠎ᠴᠦ᠎ᠦᠭᠡᠢ᠃ ᠰᠢᠶᠣᠣ ᠱᠤᠸᠠᠨ ᠭᠠᠭᠴᠠᠭᠠᠷ ᠳᠣᠲᠤᠭᠠᠳᠤ ᠮᠥᠷ᠎ᠦᠨ ᠰᠢᠷᠡᠭᠡᠨ᠎ᠦ ᠡᠮᠦᠨ᠎ᠡ ᠰᠠᠭᠤᠵᠤ ᠬᠣᠭᠤᠯᠠ ᠢᠳᠡᠬᠦ ᠪᠥᠭᠡᠳ ᠬᠥᠯᠦᠰᠦᠨ᠎ᠦ ᠲᠣᠮᠤ ᠳᠤᠰᠤᠯ᠎ᠤᠳ ᠮᠠᠩᠨᠠᠢ ᠳᠡᠭᠡᠭᠦᠷ᠎ᠨᠢ ᠪᠥᠮᠪᠦᠷᠢᠵᠦ᠂ ᠲᠡᠷᠯᠢᠭ᠎ᠨᠢ ᠨᠢᠷᠤᠭᠤᠨ ᠳᠡᠭᠡᠷ᠎ᠡ᠎ᠨᠢ ᠨᠠᠭᠠᠯᠳᠤᠭᠠᠳ ᠬᠣᠶᠠᠷ ᠲᠣᠮᠤ ᠳᠠᠯᠤ᠎ᠨᠢ ᠥᠨᠳᠦᠷ ᠭᠡᠭᠴᠢ ᠭᠣᠵᠤᠢᠵᠤ ᠵᠠᠯᠪᠠᠷᠢᠭᠰᠠᠨ ᠭᠠᠷ ᠮᠡᠲᠦ ᠳᠤᠷᠠᠢᠵᠤ ᠪᠠᠢᠪᠠ᠃ ᠡᠭᠦᠨ᠎ᠢ ᠦᠵᠡᠭᠰᠡᠨ ᠯᠣᠣ ᠱᠤᠸᠠᠨ᠎ᠤ ᠲᠡᠨᠢᠢᠭᠰᠡᠨ ᠮᠠᠩᠨᠠᠢ ᠥᠪᠡᠷ᠎ᠦᠨ ᠡᠷᠬᠡ᠎ᠦᠭᠡᠢ ᠦᠷᠴᠢᠰᠬᠢᠪᠡ᠃ ᠡᠬᠡᠨᠡᠷ᠎ᠨᠢ ᠭᠠᠯ ᠲᠣᠭᠤᠭᠠᠨ᠎ᠤ ᠲᠠᠰᠤᠯᠭ᠎ᠠ᠎ᠠᠴᠠ᠎ᠪᠠᠨ ᠲᠦᠷᠭᠡᠬᠡᠨ ᠭᠠᠷᠴᠤ ᠢᠷᠡᠭᠡᠳ ᠨᠢᠳᠦ᠎ᠪᠡᠨ ᠪᠦᠯᠲᠡᠢᠯᠭᠡᠵᠦ ᠤᠷᠤᠭᠤᠯ᠎ᠢᠶᠠᠨ ᠴᠡᠴᠡᠷᠡᠭᠦᠯᠦᠭᠰᠡᠭᠡᠷ:

《ᠣᠯᠤᠭᠰᠠᠨ᠎ᠤᠤ?》 ᠭᠡᠵᠦ ᠠᠰᠠᠭᠤᠬᠤ᠎ᠳᠤᠨᠢ᠂

《ᠣᠯᠤᠯ᠎ᠠ》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠭᠠᠷ ᠬᠣᠶᠠᠭᠤᠯᠠ ᠭᠠᠯ ᠲᠣᠭᠤᠭᠠᠨ᠎ᠤ᠎ᠪᠠᠨ ᠲᠠᠰᠤᠯᠭ᠎ᠠ᠎ᠳᠤ ᠣᠷᠤᠵᠤ ᠶᠠᠷᠢᠯᠴᠠᠭᠠᠳ᠂ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠭᠠᠷᠴᠤ ᠤᠳᠠᠯ᠎ᠦᠭᠡᠢ ᠨᠢᠭᠡ ᠬᠡᠰᠡᠭ ᠯᠢᠩᠬᠤ᠎ᠠ᠎ᠶᠢᠨ ᠨᠠᠪᠴᠢ ᠠᠪᠴᠢᠷᠠᠵᠤ ᠰᠢᠷᠡᠭᠡᠨ ᠳᠡᠭᠡᠷ᠎ᠡ ᠲᠠᠯᠪᠢᠪᠠ᠃ ᠯᠣᠣ ᠱᠤᠸᠠᠨ ᠳ᠋ᠧᠩᠯᠦ᠎ᠶᠢᠨ ᠪᠦᠷᠬᠦᠭᠦᠯ᠎ᠢ ᠳᠡᠯᠭᠡᠵᠦ ᠥᠨᠥ ᠤᠯᠠᠭᠠᠨ ᠮᠠᠨᠲᠠᠤ᠎ᠪᠠᠨ ᠯᠢᠩᠬᠤ᠎ᠠ᠎ᠶᠢᠨ ᠨᠠᠪᠴᠢ᠎ᠪᠠᠷ ᠳᠠᠬᠢᠨ ᠪᠣᠭᠤᠪᠠ᠃ ᠰᠢᠶᠣᠣ ᠱᠤᠸᠠᠨ᠎ᠴᠤ ᠬᠣᠭᠤᠯᠠ᠎ᠪᠠᠨ ᠢᠳᠡᠵᠦ ᠳᠠᠭᠤᠰᠤᠭᠰᠠᠨ ᠲᠤᠯᠠ ᠡᠵᠢ᠎ᠨᠢ: 《ᠰᠢᠶᠣᠣ ᠱᠤᠸᠠᠨ! ᠲᠡᠨᠳᠡ᠎ᠪᠡᠨ ᠰᠠᠭᠤᠵᠤ ᠪᠠᠢ᠂ ᠡᠨᠳᠡ ᠪᠢᠲᠡᠭᠡᠢ ᠢᠷ᠎ᠡ》 ᠭᠡᠵᠦ ᠰᠡᠩᠳᠡ ᠮᠡᠩᠳᠡ ᠬᠡᠯᠡᠭᠡᠳ ᠭᠠᠯ᠎ᠢᠶᠠᠷ᠎ᠢᠶᠠᠨ ᠣᠷᠤᠯᠳᠤᠵᠤ ᠪᠠᠢᠲᠠᠯ᠎ᠠ ᠯᠣᠣ ᠱᠤᠸᠠᠨ ᠨᠣᠪ ᠨᠣᠭᠤᠭᠠᠨ ᠪᠣᠭᠤᠳᠠᠯ᠎ᠢ ᠤᠯᠠᠭᠠᠨ ᠴᠠᠭᠠᠨ ᠬᠤᠸᠠᠷᠲᠠᠢ ᠳ᠋ᠧᠩᠯᠦ᠎ᠲᠡᠢ ᠴᠣᠭ ᠵᠤᠤᠬᠠᠨ᠎ᠳᠠᠭᠠᠨ ᠴᠢᠬᠢᠵᠦ ᠣᠷᠤᠭᠤᠯᠤᠮᠠᠭᠴᠠ ᠨᠢᠭᠡᠨ ᠵᠤᠷᠪᠤᠰ ᠬᠦᠷᠡᠩ ᠤᠯᠠᠭᠠᠨ ᠭᠠᠯ ᠳᠦᠷᠡᠯᠵᠡᠵᠦ ᠮᠤᠬᠤᠯᠠᠭ᠎ᠤᠨ ᠪᠦᠬᠦ ᠲᠠᠰᠤᠯᠭ᠎ᠠ᠎ᠳᠤ ᠬᠠᠴᠢᠨ ᠦᠨᠦᠷ ᠬᠠᠩᠬᠤᠯᠤᠨ᠎ᠠ᠃

《ᠬᠠ! ᠶᠠᠮᠠᠷ ᠰᠠᠢᠬᠠᠨ ᠦᠨᠦᠷ ᠭᠡᠭᠴᠢ ᠪᠤᠢ! ᠲᠠ᠎ᠨᠠᠷ ᠶᠠᠮᠠᠷ ᠪᠣᠭᠤᠷᠰᠤᠭ ᠢᠳᠡᠵᠦ ᠪᠠᠢᠭ᠎ᠠ᠎ᠶᠤᠮ ᠪᠤᠢ?》 ᠭᠡᠬᠦ ᠳᠠᠭᠤ ᠰᠣᠨᠤᠰᠳᠠᠬᠤ᠎ᠨᠢ᠂ ᠦᠵᠡᠰᠡ ᠪᠥᠭᠲᠦᠷ ᠡᠦ ᠱᠣᠣ ᠶᠧ ᠢᠷᠡᠭᠰᠡᠨ ᠠᠵᠢ᠃ ᠡᠨᠡ ᠬᠥᠮᠦᠨ ᠪᠣᠯ ᠴᠠᠢ᠎ᠶᠢᠨ ᠮᠤᠬᠤᠯᠠᠭ᠎ᠲᠤ ᠡᠳᠦᠷ ᠥᠩᠭᠡᠷᠡᠭᠡᠵᠦ᠂ ᠬᠠᠮᠤᠭ᠎ᠤᠨ ᠡᠷᠲᠡ ᠢᠷᠡᠭᠡᠳ ᠬᠠᠮᠤᠭ᠎ᠤᠨ ᠣᠷᠤᠢ ᠬᠠᠷᠢᠳᠠᠭ ᠬᠥᠮᠦᠨ᠎ᠶᠦᠮ᠃ ᠡᠳᠦᠭᠡ ᠡᠨᠡ ᠬᠥᠮᠦᠨ ᠪᠠᠰᠠ᠎ᠯᠠ ᠪᠥᠭᠴᠦᠭᠡᠨᠡᠨ ᠢᠷᠡᠵᠦ ᠭᠤᠳᠤᠮᠵᠢᠨ᠎ᠤ ᠲᠠᠯ᠎ᠠ᠎ᠶᠢᠨ ᠪᠤᠯᠤᠩ᠎ᠤᠨ ᠰᠠᠨᠳᠠᠯᠢ ᠳᠡᠭᠡᠷ᠎ᠡ ᠰᠠᠭᠤᠮᠠᠭᠴᠠ ᠠᠰᠠᠭᠤᠯᠲᠠ ᠲᠠᠯᠪᠢᠬᠤ᠎ᠨᠢ ᠡᠨᠡ᠃ ᠭᠡᠪᠡᠴᠦ ᠬᠠᠷᠢᠭᠤᠯᠲᠠ ᠭᠡᠵᠦ ᠠᠯᠠᠭ᠎ᠠ᠃ 《 ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠᠨ᠎ᠤ ᠰᠥᠮᠦᠰᠦ᠎ᠶᠦᠮ ᠪᠣᠯᠪᠠ᠎ᠤᠤ?》 ᠭᠡᠰᠡᠨ ᠠᠰᠠᠭᠤᠯᠲᠠ᠎ᠨᠢ ᠮᠥᠨ ᠬᠠᠷᠢᠭᠤᠯᠲᠠ᠎ᠦᠭᠡᠢ ᠬᠠᠶᠠᠭᠳᠠᠪᠠ᠃ ᠯᠣᠣ ᠱᠤᠸᠠᠨ ᠶᠠᠭᠠᠷᠠᠨ ᠭᠠᠷᠴᠤ ᠢᠷᠡᠭᠡᠳ ᠴᠠᠢ ᠪᠦᠷᠢᠵᠦ ᠥᠭᠪᠡ᠃

《ᠰᠢᠶᠣᠣ ᠱᠤᠸᠠᠨ ᠣᠷᠤᠭᠠᠳ ᠢᠷ᠎ᠡ!》 ᠭᠡᠵᠦ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠰᠢᠶᠣᠣ ᠱᠤᠸᠠᠨ᠎ᠢᠶᠠᠨ ᠳᠣᠲᠤᠷ᠎ᠠ ᠲᠠᠰᠤᠯᠭᠠᠨ᠎ᠳᠠᠭᠠᠨ ᠠᠪᠠᠴᠢᠵᠤ᠂ ᠭᠠᠵᠠᠷ ᠳᠤᠮᠳᠠᠬᠢ ᠰᠠᠨᠳᠠᠯᠢ ᠳᠡᠭᠡᠷ᠎ᠡ᠎ᠪᠡᠨ ᠰᠠᠭᠤᠯᠭᠠᠭᠠᠳ ᠪᠢᠴᠢᠬᠠᠨ ᠲᠠᠪᠠᠭ᠎ᠲᠤ ᠫᠠᠳ ᠬᠠᠷ᠎ᠠ ᠪᠥᠭᠡᠷᠡᠩᠬᠡᠢ ᠶᠠᠭᠤᠮ᠎ᠠ ᠬᠢᠵᠦ ᠠᠪᠴᠢᠷᠠᠭᠠᠳ:

《ᠢᠳᠡᠴᠢᠬᠡ᠂ - ᠡᠪᠡᠳᠴᠢᠨ᠎ᠴᠢᠨᠢ ᠡᠳᠡᠭᠡᠬᠦ᠎ᠶᠦᠮ》 ᠭᠡᠵᠦ ᠠᠶᠠᠷᠬᠠᠨ ᠬᠡᠯᠡᠪᠡ᠃

ᠰᠢᠶᠣᠣ ᠱᠤᠸᠠᠨ ᠲᠡᠷᠡ ᠬᠠᠷ᠎ᠠ ᠶᠠᠭᠤᠮ᠎ᠠ᠎ᠶᠢ ᠠᠪᠴᠤ ᠪᠠᠬᠠᠨ ᠰᠢᠨᠵᠢᠭᠡᠳ ᠠᠮᠢ᠎ᠪᠠᠨ ᠭᠠᠷ᠎ᠲᠠᠭᠠᠨ ᠠᠳᠭᠤᠭᠰᠠᠨ ᠮᠡᠲᠦ ᠠᠢᠬᠤᠪᠲᠤᠷ ᠶᠡᠬᠡ ᠭᠠᠢᠬᠠᠪᠠ᠃ ᠢᠩᠭᠢᠭᠡᠳ ᠮᠠᠰᠢ ᠪᠣᠯᠭᠤᠮᠵᠢᠲᠠᠢ᠎ᠪᠠᠷ ᠳᠤᠮᠳᠠᠭᠤᠷ᠎ᠨᠢ ᠬᠠᠭᠠᠯᠤᠮᠠᠭᠴᠠ ᠰᠢᠲᠠᠩᠬᠠᠢ ᠬᠠᠯᠢᠰᠤᠨ ᠳᠣᠲᠤᠷ᠎ᠠ᠎ᠠᠴᠠ᠎ᠨᠢ ᠨᠢᠭᠡᠨ ᠵᠤᠷᠪᠤᠰ ᠴᠠᠭᠠᠨ ᠠᠭᠤᠷ ᠪᠤᠷᠭᠢᠵᠤ ᠭᠠᠷᠤᠭᠠᠳ ᠤᠳᠠᠯ᠎ᠦᠭᠡᠢ ᠵᠠᠮᠬᠠᠷᠠᠯ᠎ᠠ᠃ ᠦᠵᠡᠰᠡ᠂ ᠴᠠᠭᠠᠨ ᠭᠤᠯᠢᠷ᠎ᠤᠨ ᠮᠠᠨᠲᠠᠤ᠎ᠶᠢᠨ ᠬᠣᠶᠠᠷ ᠲᠠᠯ᠎ᠠ ᠪᠠᠢᠯ᠎ᠠ᠃ ᠭᠱᠠᠨ ᠵᠠᠭᠤᠷ᠎ᠠ ᠲᠡᠷᠡ᠎ᠨᠢ ᠪᠦᠷ ᠭᠡᠳᠡᠰᠦᠨ᠎ᠳᠦ ᠣᠷᠤᠵᠤ ᠠᠮᠲᠠ᠎ᠶᠢ᠎ᠨᠢ᠎ᠴᠤ ᠪᠦᠷ ᠮᠠᠷᠲᠠᠭᠠᠳ ᠬᠣᠭᠤᠰᠤᠨ ᠲᠠᠪᠠᠭ ᠡᠮᠦᠨ᠎ᠡ᠎ᠨᠢ ᠬᠡᠪᠲᠡᠨ᠎ᠡ᠃ ᠠᠪᠤ᠎ᠨᠢ ᠨᠢᠭᠡ ᠲᠠᠯ᠎ᠠ᠎ᠳᠤᠨᠢ ᠵᠣᠭᠰᠤᠵᠤ᠂ ᠡᠵᠢ᠎ᠨᠢ ᠪᠠᠰᠠ ᠨᠢᠭᠡ ᠲᠠᠯ᠎ᠠ᠎ᠳᠤᠨᠢ ᠵᠣᠭᠰᠤᠭᠠᠳ᠂ ᠲᠡᠭᠦᠨ᠎ᠦ ᠪᠡᠶ᠎ᠡ᠎ᠳᠦᠨᠢ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮ᠎ᠠ᠎ᠶᠢ ᠰᠢᠩᠭᠡᠭᠡᠨ ᠣᠷᠤᠭᠤᠯᠵᠤ ᠪᠠᠰᠠ ᠶᠠᠮᠠᠷ ᠨᠢᠭᠡᠨ ᠵᠦᠢᠯ᠎ᠢ ᠲᠡᠳᠡᠨ ᠭᠠᠷᠭᠠᠬᠤ ᠮᠡᠲᠦ ᠬᠠᠷᠠᠵᠤ ᠪᠠᠢᠪᠠ᠃ ᠢᠩᠭᠢᠵᠦ ᠪᠠᠢᠲᠠᠯ᠎ᠠ ᠰᠢᠶᠣᠣ ᠱᠤᠸᠠᠨ᠎ᠤ ᠵᠢᠷᠦᠬᠡ᠎ᠨᠢ ᠲᠦᠭᠰᠢᠵᠦ᠂ ᠥᠷᠦᠴᠡ᠎ᠪᠡᠨ ᠳᠠᠷᠤᠭᠠᠳ ᠪᠠᠰᠠ ᠨᠢᠭᠡ ᠪᠤᠯᠤᠩ ᠬᠠᠨᠢᠶᠠᠯᠭᠠᠪᠠ᠃

《ᠲᠦᠷ ᠳᠤᠭᠬᠢᠭᠡᠳ ᠠᠪ᠂ - ᠤᠳᠠᠬᠤ᠎ᠦᠭᠡᠢ ᠡᠳᠡᠭᠡᠬᠦ᠎ᠶᠦᠮ》

ᠰᠢᠶᠣᠣ ᠱᠤᠸᠠᠨ᠂ ᠡᠵᠢ᠎ᠶᠢᠨ᠎ᠢᠶᠡᠨ ᠦᠭᠡ᠎ᠪᠡᠷ ᠬᠠᠨᠢᠶᠠᠯᠭᠠᠭᠰᠠᠭᠠᠷ ᠬᠡᠪᠲᠡᠯ᠎ᠡ᠃ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠠᠮᠢᠰᠭᠤᠭ᠎ᠠ᠎ᠨᠢ ᠠᠭᠤᠵᠢᠷᠠᠬᠤ᠎ᠶᠢ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠲᠡᠯᠡᠨ ᠨᠥᠬᠦᠭᠡᠰᠦ᠎ᠲᠡᠢ ᠳᠠᠪᠬᠤᠷ ᠬᠥᠨᠵᠢᠯᠡ ᠨᠥᠮᠦᠷᠭᠡᠪᠡ᠃

 

ᠭᠤᠷᠪᠠ

ᠮᠤᠬᠤᠯᠠᠭ᠎ᠤᠨ ᠥᠷᠦᠭᠡᠨ᠎ᠳᠦ ᠮᠠᠰᠢ ᠣᠯᠠᠨ ᠬᠥᠮᠦᠨ ᠰᠠᠭᠤᠵᠤ᠂ ᠯᠣᠣ ᠱᠤᠸᠠᠨ ᠪᠠᠰᠠ ᠶᠡᠬᠡᠯ᠎ᠡ ᠶᠠᠭᠠᠷᠠᠵᠤ ᠴᠦᠯᠬᠦᠭᠡᠷ ᠲᠣᠮᠤ ᠭᠠᠤᠯᠢᠨ ᠳᠡᠪᠦᠷ᠎ᠡ ᠪᠠᠷᠢᠵᠤ ᠵᠣᠴᠢᠳ᠎ᠲᠤ ᠨᠢᠭᠡ ᠨᠢᠭᠡ᠎ᠪᠡᠷ ᠤᠰᠤ ᠨᠡᠮᠡᠵᠦ ᠥᠭᠬᠦ ᠪᠥᠭᠡᠳ ᠬᠣᠶᠠᠷ ᠨᠢᠳᠦᠨ᠎ᠦ ᠬᠢᠨᠢ ᠤᠬᠤᠷᠬᠠᠢ ᠬᠠᠷ᠎ᠠ ᠵᠢᠷᠤᠭᠠᠰᠤ᠎ᠪᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠪᠠᠢᠯ᠎ᠠ᠃

《ᠯᠣᠣ ᠱᠤᠸᠠᠨ᠂ ᠪᠡᠶ᠎ᠡ᠎ᠴᠢᠨᠢ ᠠᠶᠠᠭᠦᠢ ᠪᠠᠢᠨ᠎ᠠ᠎ᠤᠤ?ᠴᠢ ᠡᠪᠡᠳᠴᠢᠯᠡᠭᠰᠡᠨ᠎ᠦᠦ?》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯ᠎ᠲᠠᠢ ᠨᠢᠭᠡ ᠬᠥᠮᠦᠨ ᠠᠰᠠᠭᠤᠭᠰᠠᠨ᠎ᠳᠤ ᠯᠣᠣ ᠱᠤᠸᠠᠨ : 《ᠵᠦᠭᠡᠷ ᠵᠦᠭᠡᠷ》 ᠭᠡᠵᠦ ᠬᠠᠷᠢᠭᠤᠯᠤᠯ᠎ᠠ᠃

《ᠵᠦᠭᠡᠷ ᠡ? ᠬᠥᠭᠵᠢᠯᠲᠡᠢ ᠴᠣᠪᠤᠭᠤ᠎ᠯᠠ ᠪᠠᠢᠭ᠎ᠠ ᠬᠥᠮᠦᠨ᠎ᠶᠦᠮᠰᠡᠨ᠂ ᠶᠡᠷᠦ᠎ᠨᠢ ᠡᠢᠮᠦ ᠁》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠴᠢᠨᠠᠭᠰᠢ ᠬᠡᠯᠡᠬᠦ ᠭᠡᠰᠡᠨ᠎ᠢᠶᠡᠨ ᠪᠣᠯᠢᠪᠠ᠃

《ᠯᠣᠣ ᠱᠤᠸᠠᠨ ᠵᠠᠪ᠎ᠦᠭᠡᠢ ᠪᠠᠢᠬᠤ᠎ᠶᠤᠮ᠂ ᠬᠡᠷᠪᠡ ᠬᠦᠦ᠎ᠨᠢ ᠁》 ᠭᠡᠵᠦ ᠪᠥᠭᠲᠦᠷ ᠡᠦ ᠱᠣᠣ ᠶᠧ᠎ᠶᠢ ᠶᠠᠷᠢᠵᠤ ᠳᠠᠭᠤᠰᠬᠤ᠎ᠶᠢᠨ ᠤᠷᠢᠳ᠂ ᠬᠠᠷ᠎ᠠ ᠴᠠᠮᠴᠠ᠎ᠶᠢᠨ ᠡᠩᠭᠡᠷ᠎ᠦᠨ ᠲᠣᠪᠴᠢ᠎ᠶᠢ ᠲᠠᠯᠪᠢᠭᠰᠠᠨ᠂ ᠳᠠᠪᠤᠰᠠᠩ᠎ᠢᠶᠠᠷ᠎ᠢᠶᠠᠨ ᠥᠷᠭᠡᠨ ᠬᠠᠷ᠎ᠠ ᠪᠦᠰᠡ ᠬᠠᠮᠢᠶ᠎ᠠ᠎ᠦᠭᠡᠢ ᠣᠷᠢᠶᠠᠭᠰᠠᠨ ᠬᠥᠨᠳᠡᠯᠡᠨ ᠮᠢᠬᠠᠨ ᠰᠢᠷᠬᠡᠭ᠎ᠲᠡᠢ ᠬᠥᠮᠦᠨ ᠬᠠᠲᠠᠪᠴᠢ ᠠᠯᠬᠤᠨ ᠣᠷᠤᠵᠤ ᠢᠷᠡᠮᠡᠭᠴᠡ ᠯᠣᠣ ᠱᠤᠸᠠᠨ᠎ᠤ ᠵᠦᠭ:

《ᠢᠳᠡᠭᠦᠯᠪᠡ᠎ᠦᠦ? ᠭᠠᠢᠭᠤᠢ᠎ᠤᠤ? ᠯᠣᠣ ᠱᠤᠸᠠᠨ ᠴᠢ ᠬᠤᠪᠢ᠎ᠲᠠᠢ ᠬᠥᠮᠦᠨ! ᠨᠠᠳᠠ᠎ᠰᠢᠭ᠋ ᠰᠤᠷᠠᠭ ᠴᠢᠮᠡᠭᠡ ᠰᠠᠢᠨ ᠰᠣᠨᠤᠰᠳᠠᠭ ᠬᠥᠮᠦᠨ ᠪᠠᠢᠭᠰᠠᠨ᠎ᠦᠭᠡᠢ ᠪᠣᠯ ᠁》 ᠭᠡᠵᠦ ᠶᠡᠬᠡ ᠳᠠᠭᠤᠨ᠎ᠢᠶᠠᠷ ᠬᠡᠯᠡᠬᠦ᠎ᠳᠦ ᠯᠣᠣ ᠱᠤᠸᠠᠨ ᠨᠢᠭᠡ ᠭᠠᠷ᠎ᠢᠶᠠᠷ᠎ᠢᠶᠠᠨ ᠳᠡᠪᠦᠷ᠎ᠡ᠎ᠪᠡᠨ ᠠᠳᠭᠤᠵᠤ᠂ ᠨᠥᠭᠦᠭᠡ ᠭᠠᠷ᠎ᠢᠶᠠᠨ ᠳᠣᠷᠤᠭᠰᠢ ᠰᠤᠭᠤᠢᠲᠠᠯ᠎ᠠ ᠲᠠᠯᠪᠢᠵᠤ ᠢᠨᠢᠶᠡᠮᠰᠦᠭᠯᠡᠨ ᠰᠣᠨᠤᠰᠤᠨ᠎ᠠ᠃ ᠭᠡᠷ ᠳᠦᠭᠦᠷᠡᠩ ᠬᠥᠮᠦᠰ᠎ᠴᠦ ᠲᠡᠭᠦᠨ᠎ᠦ ᠦᠭᠡ᠎ᠶᠢ ᠪᠦᠷ ᠰᠣᠨᠤᠰᠤᠨ᠎ᠠ᠃ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠪᠠᠰᠠ ᠤᠬᠤᠷᠬᠠᠢ᠎ᠨᠢ ᠰᠢᠷᠭᠢᠭᠰᠡᠨ ᠨᠢᠳᠦ᠎ᠪᠡᠷ᠎ᠢᠶᠡᠨ ᠢᠨᠢᠶᠡᠮᠰᠦᠭᠯᠡᠵᠦ᠂ ᠴᠠᠢ ᠴᠣᠮᠣ ᠭᠠᠷᠭᠠᠵᠤ ᠨᠢᠭᠡ ᠮᠦᠬᠦᠯᠢᠭ ᠨᠠᠩᠭᠢᠶᠠᠳ ᠠᠷᠤᠷ᠎ᠠ ᠬᠢᠭᠰᠡᠨ᠎ᠳᠦ ᠯᠣᠣ ᠱᠤᠸᠠᠨ ᠤᠰᠤ ᠬᠢᠵᠦ ᠥᠭᠪᠡ᠃

《ᠯᠠᠪ ᠡᠳᠡᠭᠡᠬᠦ᠎ᠶᠦᠮ! ᠡᠨᠡ ᠭᠡᠭᠴᠢ ᠥᠭᠡᠷ᠎ᠡ ᠶᠠᠭᠤᠮ᠎ᠠ᠎ᠲᠠᠢ ᠲᠠᠭᠠᠷᠠᠬᠤ᠎ᠦᠭᠡᠢ᠂ ᠬᠠᠯᠠᠭᠤᠨ᠎ᠢᠶᠠᠷ᠎ᠨᠢ ᠠᠪᠴᠢᠷᠠᠵᠤ ᠬᠠᠯᠠᠭᠤᠨ᠎ᠢᠶᠠᠷ᠎ᠨᠢ ᠢᠳᠡᠭᠦᠯᠦᠭᠰᠡᠨ ᠰᠢᠤ ᠳ᠋ᠠ 》 ᠭᠡᠵᠦ ᠬᠥᠨᠳᠡᠯᠡᠨ ᠮᠢᠬᠠᠨ ᠰᠢᠷᠬᠡᠭᠲᠦ ᠬᠥᠮᠦᠨ ᠶᠡᠬᠡ ᠳᠠᠭᠤ᠎ᠪᠠᠷ ᠶᠠᠷᠢᠭᠰᠠᠭᠠᠷ᠎ᠯᠠ ᠪᠠᠢᠪᠠ᠃

《ᠦᠨᠡᠬᠡᠷ ᠲᠡᠢᠮᠦ ᠰᠢᠤ᠂ ᠬᠡᠷᠪᠡ ᠺᠠᠩ ᠠᠪᠠᠭ᠎ᠠ᠎ᠨᠢ ᠬᠠᠢᠷ᠎ᠠ ᠬᠠᠯᠠᠮᠵᠢ ᠦᠵᠡᠭᠦᠯᠦᠭᠰᠡᠨ᠎ᠦᠭᠡᠢ ᠪᠣᠯ ᠶᠠᠭᠠᠬᠢᠵᠤ ᠢᠩᠭᠢᠵᠦ ᠴᠢᠳᠠᠬᠤ ᠁》 ᠭᠡᠵᠦ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠲᠡᠭᠦᠨ᠎ᠳᠦ ᠰᠡᠳᠭᠢᠯ ᠬᠥᠳᠡᠯᠦᠭᠰᠡᠨ ᠪᠠᠢᠳᠠᠯ᠎ᠢᠶᠠᠷ ᠲᠠᠯᠠᠷᠬᠠᠵᠤ ᠪᠠᠢᠯ᠎ᠠ᠃

《ᠡᠳᠡᠭᠡᠬᠦ᠎ᠶᠦᠮ᠂ ᠡᠳᠡᠭᠡᠬᠦ᠎ᠶᠦᠮ᠂ ᠢᠩᠭᠢᠵᠦ ᠬᠠᠯᠠᠭᠤᠨ ᠳᠡᠭᠡᠷ᠎ᠡ᠎ᠨᠢ ᠢᠳᠡᠭᠦᠯᠦᠭᠰᠡᠨ᠎ᠶᠦᠮ᠎ᠴᠢᠨᠢ᠂ ᠬᠥᠮᠦᠨ᠎ᠦ ᠴᠢᠰᠤᠲᠠᠢ ᠮᠠᠨᠲᠠᠤ ᠶᠠᠮᠠᠷ ᠵᠡᠷᠭᠡ᠎ᠶᠢᠨ ᠠᠭᠤᠰᠭᠢᠨ᠎ᠤ ᠰᠦᠷᠢᠶ᠎ᠡ᠎ᠶᠢ ᠪᠦᠷ ᠡᠳᠡᠭᠡᠭᠡᠬᠦ᠎ᠶᠦᠮ!》 ᠭᠡᠪᠡ᠃

ᠬᠤᠸᠠ ᠳ᠋ᠠ ᠮᠠ ᠡᠵᠢ 《ᠠᠭᠤᠰᠭᠢᠨ ᠰᠦᠷᠢᠶ᠎ᠡ》 ᠭᠡᠰᠡᠨ ᠦᠭᠡ᠎ᠶᠢ ᠰᠣᠨᠤᠰᠤᠮᠠᠭᠴᠠ ᠴᠢᠷᠠᠢ᠎ᠨᠢ ᠪᠠᠬᠠᠨ ᠪᠠᠷᠤᠢᠵᠤ ᠤᠷᠮ᠎ᠠ᠎ᠦᠭᠡᠢ ᠮᠡᠲᠦ ᠪᠣᠯᠪᠠ᠃ ᠭᠡᠪᠡᠴᠦ ᠳᠣᠣᠷ᠎ᠠ᠎ᠪᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠴᠢᠷᠠᠢ ᠭᠠᠷᠭᠠᠵᠤ ᠠᠷᠭ᠎ᠠ᠎ᠪᠠᠨ ᠪᠠᠷᠠᠭᠰᠠᠨ ᠪᠠᠢᠳᠠᠯ᠎ᠲᠠᠢ ᠪᠣᠯᠤᠭᠠᠳ ᠭᠠᠷᠪᠠ᠃ ᠭᠡᠲᠡᠯ᠎ᠡ ᠺᠠᠩ ᠠᠪᠠᠭ᠎ᠠ ᠲᠡᠭᠦᠨ᠎ᠢ ᠳᠡᠮᠡᠢ ᠬᠠᠢᠬᠤᠷᠤᠭᠰᠠᠨ᠎ᠴᠤ᠎ᠦᠭᠡᠢ᠂ ᠮᠥᠨ᠎ᠬᠦ ᠬᠣᠭᠤᠯᠠᠢ᠎ᠪᠠᠨ ᠰᠢᠬᠠᠵᠤ ᠶᠡᠬᠡ ᠳᠠᠭᠤᠨ᠎ᠢᠶᠠᠷ ᠶᠠᠷᠢᠭᠰᠠᠭᠠᠷ ᠪᠠᠢᠭᠠᠳ ᠤᠨᠲᠠᠵᠤ ᠪᠠᠢᠭᠰᠠᠨ ᠰᠢᠶᠣᠣ ᠱᠤᠸᠠᠨ᠎ᠢ ᠪᠠᠰᠠ ᠰᠡᠷᠢᠭᠡᠭᠡᠳ ᠬᠠᠨᠢᠶᠠᠳᠤ᠎ᠶᠢ᠎ᠨᠢ ᠬᠥᠳᠡᠯᠭᠡᠪᠡ᠃

《ᠦᠵᠡᠰᠡ᠂ ᠲᠠᠨ᠎ᠤ ᠰᠢᠶᠣᠣ ᠱᠤᠸᠠᠨ᠎ᠴᠢᠨᠢ ᠡᠢᠮᠦ ᠶᠡᠬᠡ ᠬᠤᠪᠢ᠎ᠲᠠᠢ ᠠᠵᠢ᠃ ᠡᠨᠡ ᠡᠪᠡᠳᠴᠢᠨ ᠵᠠᠪᠠᠯ ᠬᠣᠭ᠎ᠦᠭᠡᠢ ᠡᠳᠡᠭᠡᠬᠦ᠎ᠶᠦᠮ᠃ ᠯᠣᠣ ᠱᠤᠸᠠᠨ ᠡᠳᠦᠷ ᠲᠤᠷᠰᠢ ᠪᠠᠶᠠᠷᠲᠠᠢ ᠪᠠᠢᠭ᠎ᠠ᠎ᠶᠢ᠎ᠨᠢ ᠦᠵᠡᠬᠦ᠎ᠦᠭᠡᠢ᠎ᠦᠦ》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠶᠠᠷᠢᠭᠰᠠᠭᠠᠷ ᠺᠠᠩ ᠠᠪᠠᠭ᠎ᠠ᠎ᠶᠢᠨ ᠳᠡᠷᠭᠡᠳᠡ ᠣᠴᠢᠵᠤ ᠳᠣᠣᠷ᠎ᠠ ᠳᠠᠭᠤᠨ᠎ᠢᠶᠠᠷ: 《ᠺᠠᠩ ᠠᠪᠠᠭ᠎ᠠ ᠡ - ᠰᠣᠨᠤᠰᠭᠤᠯ᠎ᠠ ᠥᠨᠥᠳᠦᠷ᠎ᠦᠨ ᠰᠢᠳᠭᠡᠭᠰᠡᠨ ᠲᠡᠷᠡ ᠶᠠᠯᠠᠲᠠᠨ᠎ᠴᠢᠨᠢ ᠰᠢᠶᠠ ᠣᠪᠤᠭᠲᠤ᠎ᠶᠢᠨ ᠬᠡᠦᠬᠡᠳ᠎ᠶᠦᠮ ᠭᠡᠨ᠎ᠡ᠃ ᠲᠡᠷᠡ᠎ᠴᠢᠨᠢ ᠬᠡᠨ᠎ᠦ ᠬᠢᠨᠢ ᠬᠦᠦ ᠪᠤᠢ? ᠶᠠᠮᠠᠷ ᠬᠡᠷᠡᠭ᠎ᠢᠶᠡᠷ ᠪᠤᠢ?》 ᠭᠡᠰᠡᠨ᠎ᠳᠦ᠂

《ᠬᠡᠨ? ᠰᠢᠶᠠ ᠰᠧ ᠨᠠᠢ ᠨᠠᠢ᠎ᠶᠢᠨ ᠬᠦᠦ ᠪᠢᠰᠢ᠎ᠦᠦ᠂ ᠲᠡᠷᠡ ᠮᠠᠭᠤ ᠴᠢᠰᠤ!》 ᠭᠡᠵᠦ ᠺᠠᠩ ᠠᠪᠠᠭ᠎ᠠ᠂ ᠬᠥᠮᠦᠰ ᠪᠦᠷ ᠲᠡᠭᠦᠨ᠎ᠦ ᠦᠭᠡ᠎ᠶᠢ ᠰᠣᠨᠢᠷᠬᠠᠯᠲᠠᠢ ᠰᠣᠨᠤᠰᠴᠤ ᠪᠠᠢᠭ᠎ᠠ᠎ᠶᠢ ᠦᠵᠡᠭᠡᠳ ᠨᠡᠩ ᠪᠠᠶᠠᠷᠯᠠᠵᠤ᠂ ᠮᠢᠬᠠᠨ ᠰᠢᠷᠬᠡᠭ᠎ᠨᠢ ᠬᠡᠰᠡᠭ ᠬᠡᠰᠡᠭ᠎ᠢᠶᠡᠷ ᠲᠠᠰᠤᠷᠬᠠᠢᠳᠠᠵᠤ ᠤᠯᠠᠮ ᠶᠡᠬᠡ ᠳᠠᠭᠤ᠎ᠪᠠᠷ: 《ᠡᠨᠡ ᠮᠠᠭᠤ ᠴᠢᠰᠤ ᠦᠨᠡᠬᠡᠷ ᠠᠮᠢᠳᠤ ᠶᠠᠪᠤᠬᠤ ᠳᠤᠷ᠎ᠠ᠎ᠦᠭᠡᠢ ᠪᠠᠢᠨ᠎ᠠ᠃ ᠪᠢ ᠡᠨᠡ ᠤᠳᠠᠭ᠎ᠠ ᠬᠠᠷᠢᠨ ᠶᠠᠭᠤ᠎ᠴᠤ ᠣᠯᠤᠭᠰᠠᠨ᠎ᠦᠭᠡᠢ᠂ ᠬᠠᠭᠤᠯᠵᠤ ᠠᠪᠤᠭᠰᠠᠨ ᠬᠤᠪᠴᠠᠰᠤ᠎ᠶᠢ᠎ᠨᠢ ᠴᠥᠮ ᠱᠣᠷᠤᠩ ᠮᠠᠨᠠᠭᠴᠢ ᠤᠯᠠᠭᠠᠨ ᠨᠢᠳᠦᠨ ᠠ᠎ᠶᠢ ᠠᠪᠴᠢᠬᠠᠯ᠎ᠠ᠃ - ᠲᠡᠷᠢᠭᠦᠨ᠎ᠳᠦᠨᠢ ᠮᠠᠨ᠎ᠤ ᠱᠤᠸᠠᠨ ᠠᠪᠠᠭ᠎ᠠ ᠬᠤᠪᠢ ᠳᠠᠭᠠᠷᠢᠵᠠᠢ᠃ ᠬᠣᠶᠠᠳᠤᠭᠠᠷ᠎ᠲᠤᠨᠢ ᠰᠢᠶᠠ᠎ᠰᠠᠨ ᠶᠧ ᠬᠣᠷᠢᠨ ᠲᠠᠪᠤᠨ ᠯᠠᠩ ᠴᠠᠰᠤ ᠴᠠᠭᠠᠨ ᠮᠥᠩᠭᠦ᠎ᠪᠡᠷ ᠱᠠᠩᠨᠠᠭᠳᠠᠪᠠ᠃ ᠲᠡᠷᠡ᠎ᠨᠢ ᠰᠣᠬᠤᠷ ᠵᠣᠭᠤᠰ᠎ᠤᠨ ᠬᠣᠷᠤᠭᠳᠠᠯ᠎ᠴᠤ᠎ᠦᠭᠡᠢ᠎ᠪᠠᠷ ᠴᠥᠮ ᠲᠡᠭᠦᠨ᠎ᠦ ᠡᠪᠦᠷ᠎ᠲᠦ ᠣᠷᠤᠯ᠎ᠠ》 ᠭᠡᠪᠡ᠃

ᠰᠢᠶᠣᠣ ᠱᠤᠸᠠᠨ ᠪᠢᠴᠢᠬᠠᠨ ᠲᠠᠰᠤᠯᠭᠠᠨ᠎ᠠᠴᠠ᠎ᠪᠠᠨ ᠭᠡᠯᠳᠦᠷᠢᠬᠢᠯᠡᠨ ᠭᠠᠷᠴᠤ ᠢᠷᠡᠭᠡᠳ ᠬᠣᠶᠠᠷ ᠭᠠᠷ᠎ᠢᠶᠠᠷ᠎ᠢᠶᠠᠨ ᠥᠷᠦᠴᠡ᠎ᠪᠡᠨ ᠳᠠᠷᠤᠵᠤ ᠪᠦᠭᠰᠢᠨ ᠬᠠᠨᠢᠶᠠᠭᠰᠠᠭᠠᠷ᠂ ᠲᠣᠭᠤᠭᠠᠨ᠎ᠠᠴᠠ᠎ᠪᠠᠨ ᠨᠢᠭᠡ ᠠᠶᠠᠭ᠎ᠠ ᠬᠦᠢᠲᠡᠨ ᠪᠤᠳᠠᠭ᠎ᠠ ᠠᠶᠠᠭᠠᠯᠠᠵᠤ ᠳᠡᠭᠡᠷ᠎ᠡ᠎ᠨᠢ ᠪᠤᠴᠠᠯᠤᠭᠰᠠᠨ ᠤᠰᠤ ᠬᠢᠭᠡᠳ ᠢᠳᠡᠯ᠎ᠡ᠃ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠲᠡᠭᠦᠨ᠎ᠦ ᠳᠡᠷᠭᠡᠳᠡ ᠢᠷᠡᠭᠡᠳ ᠨᠠᠮ ᠳᠠᠭᠤ᠎ᠪᠠᠷ: 《ᠰᠢᠶᠣᠣ ᠱᠤᠸᠠᠨ᠂ ᠪᠠᠬᠠᠨ ᠭᠠᠢᠭᠤᠢ ᠪᠠᠢᠨ᠎ᠠ᠎ᠤᠤ? ᠮᠥᠨ᠎ᠯᠡ ᠥᠯᠦᠰᠴᠦ ᠪᠠᠢᠨ᠎ᠠ᠎ᠤᠤ?》 ᠭᠡᠵᠦ ᠠᠰᠠᠭᠤᠯ᠎ᠠ᠃

《ᠡᠳᠡᠭᠡᠬᠦ᠎ᠶᠦᠮ᠂ ᠯᠠᠪ ᠡᠳᠡᠭᠡᠬᠦ᠎ᠶᠦᠮ!》 ᠭᠡᠵᠦ ᠺᠠᠩ ᠠᠪᠠᠭ᠎ᠠ ᠰᠢᠶᠣᠣ ᠱᠤᠸᠠᠨ᠎ᠢ ᠬᠠᠷᠠᠵᠤ ᠠᠪᠤᠭᠠᠳ ᠮᠥᠨ᠎ᠬᠦ ᠣᠯᠠᠨ᠎ᠤ ᠵᠦᠭ ᠬᠠᠨᠳᠤᠵᠤ: 《ᠰᠢᠶᠠ᠎ᠰᠠᠨ ᠶᠧ ᠦᠨᠡᠬᠡᠷ ᠰᠣᠷᠭᠤᠭ ᠬᠥᠮᠦᠨ᠂ ᠬᠡᠷᠪᠡ ᠲᠡᠷᠡ ᠵᠠᠪᠳᠤᠵᠤ ᠵᠠᠭᠠᠯᠳᠤᠭᠰᠠᠨ᠎ᠦᠭᠡᠢ ᠪᠣᠯ ᠭᠡᠷ᠎ᠢᠶᠡᠷ᠎ᠢᠶᠡᠨ ᠬᠦᠢᠰᠦ ᠲᠡᠮᠲᠡᠷᠢᠭᠳᠡᠬᠦ ᠪᠣᠯᠤᠨ᠎ᠠ᠃ ᠣᠳᠣ ᠶᠠᠮᠠᠷ ᠪᠠᠢᠨ᠎ᠠ ᠪᠤᠢ? ᠮᠥᠩᠭᠦ! - ᠡᠨᠡ ᠵᠢᠭᠠᠯ ᠦᠨᠡᠬᠡᠷ ᠬᠥᠮᠦᠨ᠎ᠦ ᠵᠤᠯᠵᠠᠭ᠎ᠠ ᠪᠢᠰᠢ᠂ ᠱᠣᠷᠤᠩ᠎ᠳᠤ ᠬᠣᠷᠢᠭᠳᠠᠵᠤ ᠪᠠᠢᠬᠤ᠎ᠳᠠᠭᠠᠨ ᠪᠠᠰᠠ ᠱᠣᠷᠤᠩ᠎ᠤᠨ ᠲᠦᠷᠦᠭᠦᠦ᠎ᠳᠦ ᠤᠷᠪᠠᠬᠤ᠎ᠶᠢ ᠵᠢᠭᠠᠳᠠᠭ ᠭᠡᠨ᠎ᠡ᠃ 》

《ᠬᠦᠢ! ᠴᠢᠩᠭᠢᠵᠦ ᠶᠠᠭᠠᠬᠢᠵᠤ ᠪᠣᠯᠳᠠᠭ᠎ᠶᠤᠮ?》 ᠭᠡᠵᠦ ᠳᠣᠲᠤᠭᠠᠳᠤ ᠮᠥᠷ᠎ᠲᠦ ᠰᠠᠭᠤᠭ᠎ᠠ ᠬᠣᠷᠢ ᠭᠠᠷᠤᠢ ᠨᠠᠰᠤᠨ᠎ᠤ ᠨᠢᠭᠡ ᠬᠥᠮᠦᠨ ᠬᠢᠯᠢᠩᠨᠡᠭᠰᠡᠨ ᠪᠠᠢᠳᠠᠯ᠎ᠲᠠᠢ ᠶᠠᠷᠢᠵᠤ ᠰᠠᠭᠤᠨ᠎ᠠ᠃

《ᠤᠯᠠᠭᠠᠨ ᠨᠢᠳᠦᠨ ᠠ᠎ᠶᠢ ᠲᠡᠭᠦᠨ᠎ᠦ ᠴᠣᠬᠤᠮ ᠪᠠᠢᠳᠠᠯ᠎ᠢ᠎ᠨᠢ ᠮᠡᠳᠡᠬᠦ᠎ᠪᠡᠷ ᠣᠴᠢᠭᠰᠠᠨ᠎ᠳᠤ ᠬᠠᠷᠢᠨ ᠲᠡᠭᠦᠨ᠎ᠢ ᠪᠠᠢ᠎ᠡ᠎ᠳᠡᠭᠡᠨ ᠲᠠᠲᠠᠬᠤ ᠭᠡᠵᠦ: 〈ᠳᠠᠢᠴᠢᠩ ᠤᠯᠤᠰ᠎ᠤᠨ ᠲᠥᠷᠦ ᠪᠣᠯ ᠮᠠᠨ᠎ᠤ ᠣᠯᠠᠨ ᠨᠡᠢᠲᠡ᠎ᠶᠢᠨ᠎ᠶᠦᠮ 〉 ᠭᠡᠵᠦ ᠭᠡᠨ᠎ᠡ᠂ ᠡᠨᠡ᠎ᠴᠢᠨᠢ ᠦᠭᠡ᠎ᠦᠦ? ᠤᠯᠠᠭᠠᠨ ᠨᠢᠳᠦᠨ ᠠ᠎ᠶᠢ ᠤᠭ᠎ᠠᠴᠠ ᠲᠡᠭᠦᠨ᠎ᠦ ᠭᠡᠷ᠎ᠲᠦ ᠭᠠᠭᠴᠠ ᠡᠵᠢ ᠪᠠᠢᠬᠤ᠎ᠶᠢ ᠮᠡᠳᠡᠳᠡᠭ ᠪᠣᠯᠪᠠᠴᠤ ᠲᠡᠭᠦᠨ᠎ᠢ ᠬᠠᠷᠢᠨ ᠲᠡᠢᠮᠦ ᠤᠯᠠᠭᠠᠨ ᠨᠢᠴᠦᠭᠦᠨ ᠶᠠᠳᠠᠭᠤ ᠭᠡᠳᠡᠭ᠎ᠢ ᠮᠡᠳᠡᠭᠰᠡᠨ᠎ᠦᠭᠡᠢ᠂ ᠴᠢᠩᠭᠢᠭᠡᠳ ᠣᠳᠣ ᠳᠤᠰᠤᠯ ᠲᠣᠰᠤ᠎ᠴᠤ ᠰᠢᠬᠠᠵᠤ ᠣᠯᠤᠭᠰᠠᠨ᠎ᠦᠭᠡᠢ᠎ᠳᠠᠭᠠᠨ ᠴᠡᠭᠡᠵᠢ᠎ᠪᠡᠨ ᠳᠡᠯᠪᠡᠷᠡᠲᠡᠯ᠎ᠡ ᠠᠭᠤᠷᠯᠠᠵᠠᠢ᠃ ᠲᠡᠷᠡ ᠬᠠᠷᠢᠨ ᠪᠠᠷᠰ᠎ᠤᠨ ᠲᠣᠯᠤᠭᠠᠢ᠎ᠶᠢ ᠮᠠᠭᠠᠵᠢᠵᠤ ᠥᠭᠬᠦ ᠭᠡᠵᠦ ᠪᠠᠢᠭᠠᠳ ᠬᠣᠶᠠᠷ ᠠᠯᠠᠭᠠᠳᠠᠭᠤᠯᠵᠤ ᠭᠡᠨ᠎ᠡ!》

《ᠠ᠎ᠶᠢ ᠠᠬ᠎ᠠ ᠪᠣᠯ ᠨᠢᠳᠤᠷᠭᠠᠨ᠎ᠤ ᠡᠷᠳᠡᠮ᠎ᠲᠡᠢ᠎ᠶᠦᠮ᠎ᠴᠢᠨᠢ᠂ ᠬᠣᠶᠠᠷ ᠠᠯᠠᠭ᠎ᠠ᠎ᠨᠢ ᠲᠡᠭᠦᠨ᠎ᠳᠡᠭᠡᠨ ᠵᠥᠪ ᠪᠠᠢᠯ᠎ᠦᠭᠡᠢ ᠳ᠋ᠠ 》 ᠭᠡᠵᠦ ᠪᠤᠯᠤᠩ᠎ᠳᠤ ᠰᠠᠭᠤᠭ᠎ᠠ ᠪᠥᠭᠲᠦᠷ ᠭᠡᠨᠡᠳᠲᠡ ᠪᠠᠶᠠᠷᠲᠠᠢ ᠶᠠᠷᠢᠯ᠎ᠠ᠃

《ᠡᠨᠡ ᠮᠣᠨᠳᠢ ᠵᠣᠳᠤᠭᠳᠠᠬᠤ᠎ᠠᠴᠠ ᠠᠶᠤᠬᠤ᠎ᠦᠭᠡᠢ᠂ ᠬᠠᠷᠢᠨ ᠬᠥᠭᠡᠷᠦᠬᠦᠢ ᠳ᠋ᠠ ᠭᠡᠵᠦ ᠪᠠᠢᠯ᠎ᠠ ᠭᠡᠨ᠎ᠡ᠃ 》

ᠪᠤᠭᠤᠷᠤᠯ ᠰᠠᠬᠠᠯᠲᠤ: 《ᠡᠨᠡ ᠠᠳᠤᠭᠤᠰᠤ᠎ᠶᠢ ᠵᠣᠳᠤᠬᠤ᠎ᠳᠤ ᠬᠥᠭᠡᠷᠦᠬᠦᠢᠯᠡᠬᠦ ᠶᠠᠭᠤ ᠪᠠᠢᠬᠤ ᠪᠤᠢ!》 ᠭᠡᠬᠦ᠎ᠳᠦ᠂

ᠺᠠᠩ ᠠᠪᠠᠭ᠎ᠠ ᠲᠡᠭᠦᠨ᠎ᠢ ᠲᠣᠭᠤᠮᠰᠠᠷᠯᠠᠬᠤ᠎ᠦᠭᠡᠢ ᠪᠠᠢᠳᠠᠯ᠎ᠲᠠᠢ ᠬᠦᠢᠲᠡᠨ᠎ᠢᠶᠡᠷ ᠢᠨᠢᠶᠡᠨ: 《ᠴᠢ ᠮᠢᠨᠦ ᠦᠭᠡ᠎ᠶᠢ ᠣᠢᠯᠠᠭᠠᠭᠰᠠᠨ᠎ᠦᠭᠡᠢ ᠰᠢᠪ ᠳ᠋ᠠ᠂ ᠲᠡᠷᠡ᠎ᠴᠢᠨᠢ ᠰᠠᠨᠠᠭᠠᠨ᠎ᠳᠠᠭᠠᠨ ᠠ᠎ᠶᠢ᠎ᠶᠢ ᠬᠥᠭᠡᠷᠦᠬᠦᠢ ᠭᠡᠵᠦ ᠰᠢᠤ》 ᠭᠡᠪᠡ᠃

ᠰᠣᠨᠤᠰᠴᠤ ᠪᠠᠢᠭᠰᠠᠨ ᠬᠥᠮᠦᠰ᠎ᠦᠨ ᠨᠢᠳᠦᠨ᠎ᠦ ᠬᠠᠷᠠᠴᠠ ᠭᠡᠨᠡᠳᠲᠡ ᠭᠥᠯᠢᠷᠡᠬᠦ ᠲᠥᠯᠦᠪᠲᠡᠢ ᠪᠣᠯᠵᠤ᠂ ᠦᠭᠡ᠎ᠪᠡᠨ ᠪᠠᠰᠠ ᠵᠣᠭᠰᠤᠪᠠ᠃ ᠰᠢᠶᠣᠣ ᠱᠤᠸᠠᠨ ᠬᠣᠭᠤᠯᠠ᠎ᠪᠠᠨ ᠢᠳᠡᠵᠦ ᠳᠠᠭᠤᠰᠪᠠ᠃ ᠪᠦᠬᠦ ᠪᠡᠶ᠎ᠡ᠎ᠡᠴᠡ᠎ᠨᠢ ᠬᠥᠯᠦᠰᠦ ᠠᠰᠭᠠᠷᠠᠵᠤ ᠲᠣᠯᠤᠭᠠᠢ᠎ᠠᠴᠠ᠎ᠨᠢ ᠠᠭᠤᠷ ᠪᠠᠭᠠᠭᠢᠵᠤ ᠪᠠᠢᠯ᠎ᠠ᠃

《ᠠ᠎ᠶᠢ ᠬᠥᠭᠡᠷᠦᠬᠦᠢ ᠭᠡᠨ᠎ᠡ - ᠰᠣᠯᠢᠶᠠᠷᠠᠵᠤ ᠪᠠᠢᠨ᠎ᠠ᠂ ᠶᠠᠭ ᠰᠣᠯᠢᠶᠠᠷᠠᠵᠤ ᠪᠠᠢᠨ᠎ᠠ》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠭᠡᠨᠡᠳᠲᠡ ᠤᠬᠠᠭ᠎ᠠ ᠣᠷᠤᠭᠰᠠᠨ ᠮᠡᠲᠦ ᠬᠡᠯᠡᠪᠡ᠃

《ᠰᠣᠯᠢᠶᠠᠷᠠᠵᠤ ᠪᠠᠢᠨ᠎ᠠ》 ᠭᠡᠵᠦ ᠬᠣᠷᠢ ᠭᠠᠷᠤᠢ ᠨᠠᠰᠤᠨ᠎ᠤ ᠬᠥᠮᠦᠨ᠎ᠴᠦ ᠭᠡᠨᠡᠳᠲᠡ ᠤᠬᠠᠭ᠎ᠠ ᠣᠷᠤᠭᠰᠠᠨ ᠮᠡᠲᠦ ᠬᠡᠯᠡᠪᠡ᠃

ᠮᠤᠬᠤᠯᠠᠭ᠎ᠲᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠣᠴᠢᠳ ᠳᠠᠬᠢᠨ ᠨᠡᠮᠡᠷᠢ ᠣᠷᠤᠭᠰᠠᠨ ᠮᠡᠲᠦ ᠢᠨᠢᠶᠡᠯᠴᠡᠵᠦ ᠶᠠᠷᠢᠯᠴᠠᠵᠤ ᠡᠬᠢᠯᠡᠪᠡ᠃ ᠰᠢᠶᠣᠣ ᠱᠤᠸᠠᠨ ᠪᠠᠰᠠ ᠡᠨᠡ ᠦᠢᠮᠡᠭᠡᠨ᠎ᠲᠡᠢ ᠳᠠᠭᠤ ᠨᠡᠢᠯᠡᠭᠦᠯᠵᠦ ᠪᠦᠭᠰᠢᠨ ᠬᠠᠨᠢᠶᠠᠯᠭᠠᠵᠤ ᠪᠠᠢᠯ᠎ᠠ᠃ ᠺᠠᠩ ᠠᠪᠠᠭ᠎ᠠ ᠳᠡᠷᠭᠡᠳᠡ᠎ᠨᠢ ᠣᠴᠢᠵᠤ ᠮᠥᠷᠦ᠎ᠶᠢ᠎ᠨᠢ ᠠᠯᠠᠭᠠᠳᠠᠵᠤ:

《ᠰᠢᠶᠣᠣ ᠱᠤᠸᠠᠨ᠂ ᠡᠳᠡᠭᠡᠬᠦ᠎ᠶᠦᠮ - ᠪᠤᠤ ᠢᠩᠭᠢᠵᠦ ᠬᠠᠨᠢᠶᠠ᠂ ᠡᠳᠡᠭᠡᠬᠦ᠎ᠶᠦᠮ -》 ᠭᠡᠪᠡ᠃

ᠪᠥᠭᠲᠦᠷ ᠡᠦ ᠱᠣᠣ ᠶᠧ : 《ᠰᠣᠯᠢᠶᠠᠷᠠᠵᠤ ᠪᠠᠢᠨ᠎ᠠ》 ᠭᠡᠵᠦ ᠲᠣᠯᠤᠭᠠᠢ᠎ᠪᠠᠨ ᠳᠣᠬᠢᠯᠵᠠᠭᠰᠠᠭᠠᠷ ᠬᠡᠯᠡᠪᠡ᠃

 

ᠳᠥᠷᠪᠡ

ᠪᠠᠷᠠᠭᠤᠨ ᠲᠡᠭᠦᠷᠭᠡ᠎ᠶᠢᠨ ᠬᠣᠲᠠ᠎ᠶᠢᠨ ᠬᠡᠷᠡᠮ᠎ᠢ ᠨᠠᠭᠠᠯᠳᠤᠵᠤ ᠪᠠᠢᠭ᠎ᠠ ᠬᠡᠰᠡᠭ ᠭᠠᠵᠠᠷ ᠪᠣᠯ ᠠᠯᠪᠠᠨ᠎ᠤ ᠭᠠᠵᠠᠷ᠎ᠶᠤᠮ᠃ ᠳᠤᠮᠳᠠᠭᠤᠷ᠎ᠨᠢ ᠭᠠᠷᠤᠭᠰᠠᠨ ᠮᠤᠷᠤᠢ ᠰᠠᠷᠤᠢ ᠴᠤᠪᠤᠭ᠎ᠠ᠎ᠨᠢ ᠳᠥᠲᠡ ᠵᠠᠮ᠎ᠢ ᠡᠷᠢᠭᠰᠡᠨ ᠤᠯᠤᠰ᠎ᠤᠨ ᠭᠤᠲᠤᠯ᠎ᠤᠨ ᠤᠯᠠ᠎ᠪᠠᠷ ᠪᠤᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠨᠡ᠎ᠨᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠬᠠᠷᠢᠨ ᠨᠢᠭᠡ ᠠᠶᠠᠨᠳᠠᠭᠠᠨ ᠪᠦᠲᠦᠭᠰᠡᠨ ᠵᠠᠭᠠᠭ ᠪᠣᠯᠵᠠᠢ᠃ ᠵᠠᠮ᠎ᠤᠨ ᠵᠡᠭᠦᠨ ᠭᠠᠷ ᠲᠠᠯ᠎ᠠ᠎ᠳᠤᠨᠢ ᠴᠠᠭᠠᠵᠠ᠎ᠪᠠᠷ ᠠᠪᠠᠴᠢᠭᠳᠠᠭᠰᠠᠳ ᠪᠠ ᠭᠢᠨᠳᠠᠨ᠎ᠳᠤ ᠦᠬᠦᠭᠰᠡᠳ᠎ᠦᠨ ᠪᠤᠯᠠᠰᠢ᠎ᠶᠢ᠂ ᠪᠠᠷᠠᠭᠤᠨ ᠭᠠᠷ ᠲᠠᠯ᠎ᠠ᠎ᠳᠤᠨᠢ ᠦᠭᠡᠢᠭᠦᠴᠦᠳ᠎ᠦᠨ ᠪᠤᠯᠠᠰᠢ᠎ᠶᠢ ᠪᠠᠶᠠᠴᠤᠳ᠎ᠤᠨ ᠨᠠᠰᠤᠨ᠎ᠤ ᠪᠠᠶᠠᠷ᠎ᠲᠤ ᠪᠡᠯᠡᠳᠭᠡᠳᠡᠭ ᠮᠠᠨᠲᠠᠤ᠎ᠶᠢᠨ ᠣᠪᠤᠭ᠎ᠠ᠎ᠰᠢᠭ᠋ ᠶᠠᠭᠰᠢᠷᠠᠲᠠᠯ᠎ᠠ ᠣᠪᠤᠭᠠᠯᠠᠵᠠᠢ᠃

ᠡᠨᠡ ᠵᠢᠯ᠎ᠦᠨ ᠬᠠᠩᠰᠢ᠎ᠶᠢᠨ ᠦᠶ᠎ᠡ᠎ᠪᠡᠷ ᠣᠨᠴᠤᠭᠤᠢ ᠵᠢᠬᠡᠭᠦᠨ᠂ ᠤᠳᠠ ᠤᠯᠢᠶᠠᠰᠤ ᠳᠥᠩᠭᠡᠵᠢ ᠲᠠᠯ᠎ᠠ ᠪᠣᠷᠤᠭᠠᠨ᠎ᠤ ᠴᠢᠨᠡᠭᠡᠬᠡᠨ ᠨᠠᠬᠢᠶᠠᠯᠠᠭᠰᠠᠨ ᠪᠠᠢᠯ᠎ᠠ᠃ ᠦᠷ ᠴᠠᠢᠮᠠᠭᠴᠠ᠂ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠪᠠᠷᠠᠭᠤᠨ ᠭᠠᠷ ᠲᠠᠯ᠎ᠠ᠎ᠶᠢᠨ ᠰᠢᠨᠡᠬᠡᠨ ᠪᠤᠯᠠᠰᠢᠨ᠎ᠤ ᠡᠮᠦᠨ᠎ᠡ ᠳᠥᠷᠪᠡᠨ ᠲᠠᠪᠠᠭ ᠵᠠᠭᠤᠰᠢ ᠨᠢᠭᠡ ᠠᠶᠠᠭ᠎ᠠ ᠪᠤᠳᠠᠭ᠎ᠠ ᠦᠷᠦᠭᠡᠳ᠂ ᠨᠢᠭᠡ ᠵᠡᠷᠭᠡ ᠤᠬᠢᠯᠠᠪᠠ᠃ ᠴᠠᠭᠠᠰᠤ ᠰᠢᠲᠠᠭᠠᠵᠤ ᠳᠠᠭᠤᠰᠤᠭᠠᠳ ᠲᠣᠪ ᠳᠤᠭᠤᠢ ᠪᠠᠬᠠᠨ ᠰᠠᠭᠤᠵᠤ ᠶᠠᠮᠠᠷ ᠨᠢᠭᠡᠨ ᠵᠦᠢᠯ᠎ᠢ ᠬᠦᠯᠢᠶᠡᠬᠦ ᠮᠡᠲᠦ ᠪᠣᠯᠪᠠᠴᠤ ᠥᠪᠡᠷ᠎ᠢᠶᠡᠨ ᠪᠠᠰᠠ ᠦᠯᠦ ᠮᠡᠳᠡᠨ᠎ᠡ᠃ ᠵᠥᠭᠡᠯᠡᠨ ᠰᠠᠯᠬᠢᠨ᠎ᠳᠤ ᠰᠠᠷᠪᠠᠯᠵᠠᠨ ᠬᠡᠢᠰᠦᠭᠰᠡᠨ ᠰᠠᠨᠴᠢᠭ᠎ᠤᠨ ᠦᠰᠦ᠎ᠨᠢ ᠨᠢᠳᠤᠨᠤᠨ᠎ᠠᠴᠠ ᠬᠣᠯᠠ ᠢᠯᠡᠭᠦᠦ ᠴᠠᠢᠵᠠᠢ᠃

ᠴᠤᠪᠤᠭ᠎ᠠ ᠵᠠᠮ᠎ᠢᠶᠠᠷ ᠪᠠᠰᠠ ᠬᠠᠭᠠᠰ ᠪᠤᠭᠤᠷᠤᠯᠳᠤᠭᠰᠠᠨ ᠲᠣᠯᠤᠭᠠᠢ᠎ᠲᠠᠢ᠂ ᠬᠠᠭᠤᠴᠢᠨ ᠬᠤᠪᠴᠠᠰᠤ᠎ᠲᠠᠢ ᠨᠢᠭᠡᠨ ᠪᠦᠰᠡᠭᠦᠢ᠂ ᠬᠠᠭᠤᠴᠢᠨ ᠤᠯᠠᠭᠠᠨ ᠲᠣᠭᠤᠷᠢᠭ ᠰᠠᠭᠰᠤ ᠲᠣᠬᠤᠢᠯᠠᠵᠤ᠂ ᠭᠤᠷᠪᠠ ᠠᠯᠬᠤᠨ ᠨᠢᠭᠡ ᠠᠮᠠᠷᠠᠭᠰᠠᠭᠠᠷ ᠠᠢᠰᠤᠢ᠃ ᠲᠡᠷᠡ ᠪᠦᠰᠡᠭᠦᠢ ᠬᠤᠸᠠ ᠳ᠋ᠠ ᠮᠠ ᠡᠵᠢ᠎ᠶᠢᠨ ᠭᠠᠵᠠᠷ ᠰᠠᠭᠤᠭᠠᠳ ᠲᠡᠭᠦᠨ᠎ᠢ ᠬᠠᠷᠠᠵᠤ ᠪᠠᠢᠬᠤ᠎ᠶᠢ ᠭᠡᠨᠡᠳᠲᠡ ᠦᠵᠡᠭᠡᠳ ᠪᠠᠬᠠᠨ ᠲᠦᠳᠡᠭᠡᠯᠵᠡᠵᠦ᠂ ᠵᠢᠪᠡᠬᠡᠢ ᠴᠠᠭᠠᠨ ᠴᠢᠷᠠᠢ ᠳᠡᠭᠡᠷ᠎ᠡ᠎ᠨᠢ ᠢᠴᠢᠵᠦ ᠰᠢᠷᠪᠡᠭᠡᠲᠦᠬᠦ ᠪᠠᠢᠳᠠᠯ ᠢᠯᠡᠷᠡᠭᠰᠡᠨ ᠪᠣᠯᠪᠠᠴᠤ ᠠᠷᠭ᠎ᠠ ᠪᠤᠶᠤ ᠨᠢᠭᠤᠷ᠎ᠢᠶᠠᠨ ᠰᠢᠷᠢᠯᠡᠨ ᠵᠡᠭᠦᠨ ᠭᠠᠷ ᠲᠠᠯ᠎ᠠ᠎ᠶᠢᠨ ᠨᠢᠭᠡᠨ ᠰᠢᠨᠡᠬᠡᠨ ᠪᠤᠯᠠᠰᠢᠨ᠎ᠤ ᠳᠡᠷᠭᠡᠳᠡ ᠠᠯᠬᠤᠵᠤ ᠣᠴᠢᠭᠠᠳ ᠰᠠᠭᠰᠤ᠎ᠪᠠᠨ ᠲᠠᠯᠪᠢᠪᠠ᠃

ᠲᠡᠷᠡ ᠪᠤᠯᠠᠰᠢ᠂ ᠰᠢᠶᠣᠣ ᠱᠤᠸᠠᠨ᠎ᠤ ᠪᠤᠯᠠᠰᠢ᠎ᠲᠠᠢ ᠨᠢᠭᠡᠨ ᠱᠤᠭᠤᠮ ᠳᠡᠭᠡᠷ᠎ᠡ ᠵᠡᠷᠭᠡᠴᠡᠵᠦ᠂ ᠵᠥᠪᠬᠡᠨ ᠨᠢᠭᠡ ᠴᠤᠪᠤᠭ᠎ᠠ ᠵᠠᠮ᠎ᠢ ᠬᠠᠪᠴᠢᠵᠤ ᠪᠠᠢᠨ᠎ᠠ᠃ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠲᠡᠭᠦᠨ᠎ᠢ ᠳᠥᠷᠪᠡᠨ ᠲᠠᠪᠠᠭ ᠵᠠᠭᠤᠰᠢ᠂ ᠨᠢᠭᠡ ᠠᠶᠠᠭ᠎ᠠ ᠪᠤᠳᠠᠭ᠎ᠠ᠎ᠪᠠᠨ ᠥᠷᠦᠭᠡᠦᠨ ᠨᠢᠭᠡ ᠪᠦᠯᠦᠭ ᠤᠬᠢᠯᠠᠵᠤ ᠴᠠᠭᠠᠰᠤᠨ ᠵᠣᠭᠤᠰ᠎ᠢᠶᠠᠨ ᠰᠢᠲᠠᠭᠠᠬᠤ᠎ᠶᠢ ᠦᠵᠡᠭᠡᠳ 《ᠡᠨᠡ ᠪᠤᠯᠠᠰᠢᠨ ᠳᠣᠲᠤᠷ᠎ᠠ ᠪᠠᠰᠠ ᠬᠦᠦ᠎ᠨᠢ ᠪᠠᠢᠨ᠎ᠠ》 ᠭᠡᠵᠦ ᠰᠡᠮᠡᠭᠡᠷ ᠪᠣᠳᠤᠨ᠎ᠠ᠃ ᠲᠡᠷᠡ ᠪᠦᠰᠡᠭᠦᠢ ᠡᠰᠢ ᠲᠡᠰᠢ ᠪᠠᠬᠠᠨ ᠠᠵᠢᠭᠯᠠᠭᠠᠳ᠂ ᠬᠥᠯ ᠭᠠᠷ᠎ᠨᠢ ᠭᠡᠨᠡᠳᠲᠡ ᠴᠡᠴᠡᠷᠡᠵᠦ ᠬᠠᠢᠪᠠᠩ ᠳᠠᠢᠪᠠᠩ ᠬᠢᠵᠦ ᠬᠡᠳᠦᠨ ᠠᠯᠬᠤᠮ ᠤᠬᠤᠷᠢᠭᠠᠳ ᠨᠢᠳᠦ᠎ᠪᠡᠨ ᠪᠦᠯᠲᠡᠢᠯᠭᠡᠵᠦ ᠪᠠᠬᠠᠨ ᠠᠶᠤᠭᠰᠠᠨ ᠪᠠᠢᠳᠠᠯ ᠭᠠᠷᠭᠠᠨ᠎ᠠ᠃

ᠬᠤᠸᠠ᠎ᠳᠠ ᠮᠠ ᠡᠵᠢ᠂ ᠡᠨᠡ ᠪᠠᠢᠳᠠᠯ᠎ᠢ ᠦᠵᠡᠭᠡᠳ ᠲᠡᠭᠦᠨ᠎ᠢ ᠬᠡᠲᠦᠷᠬᠡᠢ ᠵᠣᠪᠠᠵᠤ ᠰᠣᠯᠢᠶᠠᠷᠠᠬᠤ᠎ᠠᠴᠠ ᠪᠣᠯᠭᠤᠮᠵᠢᠯᠠᠨ ᠲᠡᠰᠭᠡᠯ᠎ᠦᠭᠡᠢ ᠪᠣᠰᠴᠤ ᠵᠣᠭᠰᠤᠭᠠᠳ ᠴᠤᠪᠤᠭ᠎ᠠ ᠵᠠᠮ᠎ᠢ ᠣᠭᠲᠤᠯᠵᠤ ᠳᠡᠷᠭᠡᠳᠡ᠎ᠨᠢ ᠣᠴᠢᠭᠠᠳ ᠳᠣᠣᠷ᠎ᠠ ᠳᠠᠭᠤᠨ᠎ᠢᠶᠠᠷ: 《ᠨᠠᠰᠤᠲᠠᠢ ᠡᠵᠢ ᠲᠠ ᠪᠤᠤ ᠶᠡᠬᠡ ᠵᠣᠪᠠ᠂ ᠬᠠᠷᠢᠵᠠᠭᠠᠶ᠎ᠠ ᠣᠳᠣ》 ᠭᠡᠪᠡ᠃

ᠲᠡᠷᠡ ᠬᠥᠮᠦᠨ ᠲᠣᠯᠤᠭᠠᠢ᠎ᠪᠠᠨ ᠳᠣᠬᠢᠭᠰᠠᠨ ᠪᠣᠯᠪᠠᠴᠤ ᠨᠢᠳᠦ᠎ᠪᠡᠨ ᠮᠥᠨ ᠪᠦᠯᠲᠡᠢᠯᠭᠡᠵᠦ ᠳᠣᠣᠷ᠎ᠠ ᠳᠠᠭᠤ᠎ᠪᠠᠷ ᠡᠭᠡᠷᠡᠵᠦ ᠲᠡᠬᠡᠳᠡᠭᠰᠡᠭᠡᠷ: 《ᠴᠢ ᠦᠵᠡ - ᠡᠨᠡ᠎ᠴᠢᠨᠢ ᠶᠠᠭᠤ ᠭᠡᠭᠴᠢ ᠪᠤᠢ?》 ᠭᠡᠪᠡ᠃

ᠬᠤᠸᠠ ᠲᠠ ᠮᠠ ᠡᠵᠢ ᠲᠡᠭᠦᠨ᠎ᠦ ᠬᠤᠷᠤᠭᠤ᠎ᠪᠠᠷ ᠵᠢᠭᠠᠭᠰᠠᠨ ᠴᠢᠭ᠎ᠲᠦ ᠬᠠᠷᠠᠬᠤᠯ᠎ᠠ ᠬᠠᠷᠠᠴᠠ᠎ᠨᠢ ᠡᠮᠦᠨᠡᠬᠢ ᠲᠡᠷᠡ ᠪᠤᠯᠠᠰᠢᠨ ᠳᠡᠭᠡᠷ᠎ᠡ ᠳᠣᠰᠤᠯ᠎ᠠ᠃ ᠡᠨᠡ ᠪᠤᠯᠠᠰᠢᠨ᠎ᠤ ᠳᠡᠭᠡᠷᠡᠬᠢ ᠡᠪᠡᠰᠦᠨ᠎ᠦ ᠦᠨᠳᠦᠰᠦ᠎ᠨᠢ ᠭᠦᠢᠴᠡᠳ ᠡᠳᠡᠭᠡᠷᠡᠭᠡᠳᠦᠢ ᠲᠤᠯᠠ ᠬᠡᠰᠡᠭ ᠬᠡᠰᠡᠭ ᠰᠢᠷ᠎ᠠ ᠰᠢᠷᠤᠢ᠎ᠨᠤᠭᠤᠳ ᠠᠷᠵᠠᠢᠵᠤ ᠮᠠᠰᠢ ᠦᠵᠡᠮᠵᠢ᠎ᠦᠭᠡᠢ ᠪᠠᠢᠪᠠ᠃ ᠭᠡᠲᠡᠯ᠎ᠡ ᠳᠠᠬᠢᠨ ᠯᠠᠪᠳᠠᠭᠤᠯᠠᠨ ᠦᠵᠡᠭᠡᠳ ᠶᠡᠬᠡ᠎ᠯᠡ ᠰᠣᠴᠢᠪᠠ᠂᠃ ᠤᠴᠢᠷ᠎ᠨᠢ᠂ ᠤᠯᠠᠭᠠᠨ ᠴᠠᠭᠠᠨ᠎ᠨᠢ ᠢᠯᠭᠠᠷᠠᠭᠰᠠᠨ ᠰᠠᠢᠬᠠᠨ ᠴᠡᠴᠡᠭ᠎ᠦᠨ ᠴᠠᠭᠠᠷᠢᠭ ᠲᠡᠷᠡ ᠪᠤᠯᠠᠰᠢᠨ᠎ᠤ ᠱᠣᠪᠤᠭᠤᠷ ᠣᠷᠤᠢ᠎ᠶᠢ ᠪᠦᠰᠡᠯᠡᠭᠰᠡᠨ ᠪᠠᠢᠪᠠ᠃

ᠲᠡᠳᠡᠨ᠎ᠦ ᠨᠢᠳᠦᠨ᠎ᠦ ᠭᠠᠯ ᠮᠠᠭᠤᠳᠠᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠤᠯᠠᠭᠠᠨ ᠴᠠᠭᠠᠨ ᠴᠡᠴᠡᠭ᠎ᠦᠳ ᠨᠢᠳᠦᠨ᠎ᠳᠦᠨᠢ ᠲᠣᠳᠤ ᠬᠠᠷᠠᠭᠳᠠᠨ᠎ᠠ᠂ ᠴᠡᠴᠡᠭ᠎ᠨᠢ ᠲᠡᠳᠦᠢ ᠠᠷᠪᠢᠨ ᠪᠢᠰᠢ ᠪᠥᠭᠡᠳ ᠴᠣᠭ ᠰᠦᠯᠳᠡ ᠮᠠᠭᠤᠲᠠᠢ ᠪᠣᠯᠪᠠᠴᠤ ᠲᠥᠪ ᠲᠦᠭᠦᠷᠢᠭ ᠴᠠᠭᠠᠷᠢᠭ ᠪᠣᠯᠵᠤ ᠮᠠᠰᠢ ᠵᠢᠭᠳᠡ ᠴᠡᠪᠡᠷᠬᠡᠨ ᠪᠠᠢᠯ᠎ᠠ᠃ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠬᠦᠦ᠎ᠶᠢᠨ᠎ᠢᠶᠡᠨ ᠪᠠ ᠪᠤᠰᠤᠳ᠎ᠤᠨ ᠪᠤᠯᠠᠰᠢ᠎ᠶᠢ ᠶᠠᠭᠠᠷᠠᠨ ᠠᠵᠢᠭᠯᠠᠪᠠᠯ ᠬᠠᠷᠢᠨ ᠬᠥᠬᠡᠪᠲᠦᠷ ᠴᠠᠭᠠᠨ ᠥᠩᠭᠡᠲᠡᠢ ᠬᠡᠳᠦᠨ ᠪᠢᠴᠢᠬᠠᠨ ᠥᠯᠴᠢᠷ ᠴᠡᠴᠡᠭ᠎ᠦᠳ ᠡᠨᠳᠡ ᠲᠡᠨᠳᠡ ᠳᠡᠯᠭᠡᠷᠡᠭᠰᠡᠨ ᠬᠠᠷᠠᠭᠳᠠᠨ᠎ᠠ᠃ ᠡᠭᠦᠨ᠎ᠢ ᠦᠵᠡᠭᠡᠳ ᠳᠣᠲᠤᠷ᠎ᠠ᠎ᠨᠢ ᠡᠪ᠎ᠦᠭᠡᠢ ᠣᠷᠬᠢᠵᠤ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠬᠤ ᠳᠤᠷ᠎ᠠ᠎ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠪᠦᠰᠡᠭᠦᠢ ᠪᠠᠰᠠ ᠤᠷᠤᠭᠰᠢ᠎ᠪᠠᠨ ᠬᠡᠳᠦ ᠠᠯᠬᠤᠨ ᠣᠴᠢᠵᠤ ᠠᠵᠢᠭᠯᠠᠭᠠᠳ: 《ᠡᠨᠡ ᠴᠡᠴᠡᠭ᠎ᠦᠳ ᠦᠨᠳᠦᠰᠦ᠎ᠦᠭᠡᠢ᠂ ᠥᠪᠡᠷ᠎ᠢᠶᠡᠨ ᠳᠡᠯᠭᠡᠷᠡᠭᠰᠡᠨ ᠶᠠᠩᠵᠤ᠎ᠦᠭᠡᠢ᠃ - ᠡᠨᠳᠡ ᠬᠡᠨ ᠢᠷᠡᠬᠦ ᠪᠤᠢ? ᠬᠡᠦᠬᠡᠳ ᠢᠷᠡᠵᠦ ᠨᠠᠭᠠᠳᠬᠤ᠎ᠦᠭᠡᠢ᠃ - ᠲᠥᠷᠦᠯ ᠰᠠᠳᠤᠨ᠎ᠴᠤ ᠬᠡᠳᠦᠢᠨ ᠢᠷᠡᠬᠦ᠎ᠪᠡᠨ ᠪᠣᠯᠢᠭᠰᠠᠨ᠃ - ᠴᠣᠬᠤᠮ ᠶᠠᠭᠤ ᠭᠡᠭᠴᠢ᠎ᠨᠢ ᠡᠨᠡ ᠪᠤᠢ?》 ᠭᠡᠵᠦ ᠪᠣᠳᠤᠵᠤ ᠪᠠᠢᠭᠠᠳ ᠭᠡᠨᠡᠳᠲᠡ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠶᠡᠬᠡ ᠳᠠᠭᠤᠨ᠎ᠢᠶᠠᠷ:

《ᠢᠦᠢ ᠡᠯ᠎ᠮᠢᠨᠢ ᠡ᠂ ᠲᠡᠳᠡ ᠴᠢᠮᠠᠢ ᠬᠢᠯᠢᠰ ᠮᠤᠰᠭᠢᠵᠠᠢ᠃ ᠴᠢ ᠲᠡᠭᠦᠨ᠎ᠢ ᠮᠠᠷᠲᠠᠬᠤ᠎ᠦᠭᠡᠢ ᠭᠤᠨᠢᠭᠯᠠᠵᠤ ᠲᠡᠰᠬᠦ᠎ᠦᠭᠡᠢ᠎ᠳᠡᠭᠡᠨ ᠡᠨᠡ ᠡᠳᠦᠷ ᠣᠨᠴᠤᠭᠤᠢᠯᠠᠨ ᠨᠠᠳᠠ ᠨᠢᠭᠡ ᠲᠡᠮᠳᠡᠭ ᠮᠡᠳᠡᠭᠳᠡᠪᠡ᠎ᠦᠦ?》 ᠭᠡᠪᠡ᠃ ᠴᠢᠩᠭᠢᠭᠡᠳ ᠳᠥᠷᠪᠡᠨ ᠲᠡᠰᠢ ᠠᠵᠢᠭᠯᠠᠵᠤ ᠭᠠᠭᠴᠠᠬᠠᠨ ᠬᠠᠷ᠎ᠠ ᠬᠡᠷᠢᠶ᠎ᠡ ᠬᠤᠪᠠᠬᠠᠢ ᠮᠣᠳᠤᠨ ᠳᠡᠭᠡᠷ᠎ᠡ ᠰᠠᠭᠤᠵᠤ ᠪᠠᠢᠬᠤ᠎ᠶᠢ ᠦᠵᠡᠭᠡᠳ 《ᠪᠢ ᠮᠡᠳᠡᠯ᠎ᠡ᠃ - ᠢᠦᠢ ᠡᠯ᠎ᠮᠢᠨᠢ ᠡ᠂ ᠬᠥᠭᠡᠷᠦᠬᠦᠢ ᠴᠢᠮᠠᠢ ᠲᠡᠳᠡ᠎ᠦᠭᠡᠢ ᠬᠢᠯ᠎ᠡ ᠰᠢᠤ᠃ ᠬᠣᠵᠢᠮ ᠲᠡᠳᠡ ᠡᠨᠡ ᠨᠢᠭᠦᠯ᠎ᠢᠶᠡᠨ ᠶᠠᠭᠠᠬᠢᠪᠠᠴᠤ ᠠᠮᠰᠠᠬᠤ᠎ᠶᠤᠮ ᠡ᠃ ᠲᠡᠭᠷᠢ ᠮᠡᠳᠡᠭ᠃ ᠴᠢ ᠨᠢᠭᠡᠨᠲᠡ ᠨᠢᠳᠦ ᠠᠨᠢᠵᠠᠢ᠃ - ᠴᠢ ᠦᠨᠡᠬᠡᠷ ᠡᠨᠳᠡ ᠪᠠᠢᠵᠤ ᠮᠢᠨᠦ ᠳᠠᠭᠤ᠎ᠶᠢ ᠰᠣᠨᠤᠰᠴᠤ ᠪᠠᠢᠪᠠᠯ - ᠲᠡᠷᠡ ᠬᠡᠷᠢᠶ᠎ᠡ᠎ᠶᠢ ᠪᠤᠯᠠᠰᠢᠨ ᠳᠡᠭᠡᠷ᠎ᠡ᠎ᠪᠡᠨ ᠢᠷᠡᠭᠦᠯᠵᠦ ᠨᠠᠳᠠ ᠦᠵᠡᠭᠦᠯ》 ᠭᠡᠪᠡ᠃

ᠵᠢᠪᠠᠷ ᠨᠠᠮᠳᠠᠭᠠᠳ ᠬᠤᠪᠠᠬᠠᠢ ᠡᠪᠡᠰᠦ ᠨᠤᠭᠦᠳ ᠵᠡᠰ ᠤᠲᠠᠰᠤ ᠮᠡᠲᠦ ᠭᠣᠵᠤᠢᠯᠴᠠᠨ᠎ᠠ᠃ ᠨᠢᠭᠡ ᠵᠤᠷᠪᠤᠰ ᠴᠡᠴᠡᠷᠬᠢᠯᠡᠭᠰᠡᠨ ᠠᠪᠢᠶ᠎ᠠ᠂ ᠬᠥᠨᠳᠡᠢ ᠣᠭᠲᠠᠷᠭᠤᠢ᠎ᠳᠤ ᠵᠢᠩᠭᠢᠨᠡᠭᠰᠡᠭᠡᠷ ᠤᠯᠠᠮ᠎ᠢᠶᠠᠷ ᠨᠠᠷᠢᠰᠴᠤ ᠠᠯᠠᠭ᠎ᠠ ᠪᠣᠯᠤᠯ᠎ᠠ᠃ ᠡᠷᠭᠢᠨ ᠲᠣᠭᠤᠷᠢᠨ ᠦᠬᠦᠭᠰᠡᠨ ᠮᠡᠲᠦ ᠴᠢᠮᠡᠭᠡ ᠠᠨᠢᠷ᠎ᠦᠭᠡᠢ ᠪᠣᠯᠪᠠ᠃ ᠬᠤᠪᠠᠬᠠᠢ ᠡᠪᠡᠰᠦᠨ ᠳᠣᠲᠤᠷ᠎ᠠ ᠬᠣᠶᠠᠷ ᠡᠮᠡᠭᠡᠨ ᠲᠡᠷᠢᠭᠦᠨ᠎ᠢᠶᠡᠨ ᠡᠷᠭᠦᠵᠦ ᠬᠡᠷᠢᠶ᠎ᠡ᠎ᠶᠢ ᠠᠵᠢᠭᠯᠠᠨ ᠵᠣᠭᠰᠤᠬᠤ᠎ᠳᠤ ᠲᠡᠷᠡ ᠬᠡᠷᠢᠶ᠎ᠡ ᠮᠥᠨ᠎ᠬᠦ ᠮᠣᠳᠤᠨ᠎ᠤ ᠬᠤᠪᠠᠬᠠᠢ ᠰᠠᠯᠠᠭ᠎ᠠ᠎ᠨᠤᠭᠤᠳ᠎ᠤᠨ ᠳᠤᠮᠳᠠ ᠰᠢᠷᠡᠮᠦ᠎ᠪᠡᠷ ᠴᠢᠳᠭᠤᠭᠰᠠᠨ ᠮᠡᠲᠦ ᠬᠦᠵᠦᠭᠦᠦ᠎ᠪᠡᠨ ᠠᠲᠤᠷᠢᠭᠤᠯᠵᠤ ᠬᠥᠳᠡᠯᠦᠯ᠎ᠦᠭᠡᠢ ᠰᠠᠭᠤᠨ᠎ᠠ᠃

ᠪᠠᠬᠠᠨ ᠤᠳᠠᠬᠤ᠎ᠳᠤ᠂ ᠪᠤᠯᠠᠰᠢᠨ ᠳᠡᠭᠡᠷ᠎ᠡ ᠢᠷᠡᠬᠦ ᠬᠥᠮᠦᠰ ᠤᠯᠠᠮ᠎ᠢᠶᠠᠷ ᠣᠯᠠᠰᠢᠷᠠᠵᠤ᠂ ᠡᠪᠦᠭᠡᠳ ᠬᠡᠦᠬᠡᠳ ᠪᠤᠯᠠᠰᠢ᠎ᠨᠤᠭᠤᠳ᠎ᠤᠨ ᠳᠤᠮᠳᠠᠭᠤᠷ ᠦᠵᠡᠭᠳᠡᠭᠰᠡᠭᠡᠷ ᠪᠠᠢᠯ᠎ᠠ᠃ ᠬᠤᠸᠠ ᠳ᠋ᠠ ᠮᠠ ᠡᠵᠢ ᠬᠡᠷᠬᠢᠭᠰᠡᠨ᠎ᠢ ᠪᠤᠤ ᠮᠡᠳᠡ᠂ ᠶᠠᠭ ᠬᠦᠨᠳᠦ ᠠᠴᠢᠶ᠎ᠠ᠎ᠪᠠᠨ ᠪᠠᠭᠤᠯᠭᠠᠭᠰᠠᠨ ᠮᠡᠲᠦ ᠬᠥᠩᠭᠡᠷᠡᠨ 《ᠣᠳᠣ ᠬᠠᠷᠢᠵᠠᠭᠠᠶ᠎ᠠ》 ᠭᠡᠵᠦ ᠢᠳᠭᠠᠵᠤ ᠪᠠᠢᠯ᠎ᠠ᠃

ᠲᠡᠷᠡ ᠪᠦᠰᠡᠭᠦᠢ ᠰᠠᠨᠠᠭ᠎ᠠ ᠠᠯᠳᠠᠵᠤ᠂ ᠨᠣᠭᠤᠭ᠎ᠠ ᠪᠤᠳᠠᠭ᠎ᠠ᠎ᠪᠠᠨ ᠤᠷᠮ᠎ᠠ᠎ᠦᠭᠡᠢ ᠬᠤᠷᠢᠶᠠᠨ ᠠᠪᠴᠤ᠂ ᠪᠠᠬᠠᠨ ᠲᠦᠳᠡᠭᠡᠯᠵᠡᠰᠬᠢᠭᠡᠳ ᠠᠮᠠᠨ᠎ᠳᠠᠭᠠᠨ ᠪᠠᠰᠠ: 《ᠴᠣᠬᠤᠮ ᠶᠠᠭᠤ ᠭᠡᠭᠴᠢ᠎ᠨᠢ ᠡᠨᠡ ᠪᠤᠢ? ᠁》 ᠭᠡᠵᠦ ᠳᠦᠳᠦᠨᠡᠭᠰᠡᠭᠡᠷ ᠭᠤᠨᠢᠷᠠᠨ ᠪᠤᠴᠠᠯ᠎ᠠ᠃

ᠲᠡᠳᠡ ᠬᠣᠶᠠᠷ᠎ᠢ ᠬᠣᠷᠢ ᠭᠤᠴᠢᠨ ᠠᠯᠬᠤᠮ ᠶᠠᠪᠤᠭᠠᠳᠤᠢ ᠪᠠᠢᠬᠤ᠎ᠳᠤ ᠭᠡᠨᠡᠳᠲᠡ ᠠᠷᠤ᠎ᠳᠤᠨᠢ 《ᠭᠤᠸᠠᠳ》 ᠭᠡᠬᠦ ᠳᠠᠭᠤ ᠭᠠᠷᠤᠯ᠎ᠠ᠃ ᠡᠷᠭᠢᠵᠦ ᠬᠠᠷᠠᠬᠤᠯ᠎ᠠ ᠥᠨᠥ ᠬᠡᠷᠢᠶ᠎ᠡ ᠵᠢᠭᠦᠷ᠎ᠢᠶᠡᠨ ᠳᠡᠯᠭᠡᠨ᠂ ᠬᠣᠶᠠᠷ ᠬᠥᠯ᠎ᠢᠶᠡᠨ ᠬᠣᠢᠰᠢ ᠲᠡᠢᠷᠦᠮᠡᠭᠴᠡ ᠠᠯᠤᠰ᠎ᠤᠨ ᠣᠭᠲᠠᠷᠭᠤᠢ᠎ᠶᠢ ᠴᠢᠭᠯᠡᠨ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠨᠢᠰᠤᠨ ᠣᠳᠤᠯ᠎ᠠ᠃

1919 ᠣᠨ᠎ᠤ ᠳᠥᠷᠪᠡᠳᠦᠭᠡᠷ ᠰᠠᠷ᠎ᠠ

ᠪᠤᠴᠠᠬᠤ
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081
fax : +81-3-5688-2082